1, 2. Цӕхуӕн цӕветтонӕй бӕрӕг ӕй, Йегови ном ке ӕгадӕ кӕнунцӕ, е ин зин ке ӕй?

 ДӔ ЦӔСТИТӔБӔЛ рауайун кӕнӕ: берӕ ке уарзис, уӕхӕн адӕймаг ди лӕгъуз цидӕртӕ фӕдздзурдта. Ду ’й зонис, етӕ мӕнгӕттӕ ке ’нцӕ, фал ибӕл кадӕртӕ ба баууӕндтӕнцӕ. Фал никки фуддӕр ба е ӕй, ӕма еци мӕнгӕттӕ парахат кӕнун райдӕдтонцӕ ӕма сӕбӕл никки фулдӕр адӕн баууӕндтӕнцӕ. Уомӕ ци цӕстӕй ракӕсдзӕнӕ? Кӕд адӕни хӕццӕ куд цӕрис ӕма дин сӕ астӕу ци ном ес, уомӕ цийфӕнди цӕстӕй нӕ кӕсис, уӕд дин, ӕвӕдзи, уӕхӕн цидӕртӕ дӕ зӕрдӕ фӕрресун кӕндзӕнцӕ (Ӕмб. 22:1).

² Аци цӕветтони фӕрци ’й хуӕздӕр лӕдӕрӕн, Йеговӕн куд зин адтӕй, ӕ хуарз ном ин ку фегадӕ кодтонцӕ, уӕд. Ӕ уӕларвон фурттӕй сӕ еу фиццаг силгоймаг Евӕн мӕнгӕттӕ фӕдздзурдта, ӕма ибӕл Евӕ баууӕндтӕй. Уотемӕй фиццаг адӕн Хуцауи нихмӕ рацудӕнцӕ ӕма сӕ байзӕддӕгти тӕрегъӕд ӕма мӕлӕти хай бакодтонцӕ (Райд. 3:1–6; Ром. 5:12). Абони адӕн ке мӕлунцӕ, ке гъезӕмарӕ кӕнунцӕ ӕма тугъдтитӕ ке цӕуй, е ӕй мӕнгӕтти туххӕй, Сайтан Едеми дзӕхӕрадони ци мӕнгӕттӕ фӕдздзурдта, уой туххӕй. Цума Йеговӕн еци мӕнгӕттӕмӕ игъосун ӕма, цӕмӕ ӕркодтонцӕ, уомӕ кӕсун ӕнцон ӕй? Гъай-гъайдӕр нӕй. Фал уӕддӕр Йеговӕ ӕ зӕрди маст нӕ ниддардта ӕма нури уӕнгӕ дӕр амондгун Хуцау ӕй (1 Тим. 1:11).

3. Цӕхуӕн кадӕ нӕмӕ ӕрхаудтӕй?

³ Махмӕ хъӕбӕр устур кадӕ ӕрхаудтӕй – Йегови ном мӕнгӕттӕй кӕдзос кӕнун. Уой туххӕй архайӕн аци фӕдзӕхстмӕ гӕсгӕ: «Кадгин кӕнтӕ Йеговӕн ӕ ном» (Пс. 113:1). Е нин бантӕсдзӕй,  нӕ Хуцауи туххӕй рӕстдзийнадӕ иннетӕн ку дзорӕн, уӕд. Дӕу ба фӕффӕндуй Йегови ном кадгин кӕнун? Аци статьяй ӕркӕсдзиан, цӕхуӕн ӕртӕ гъуддаги нӕ разӕнгард кӕндзӕнцӕ, цӕмӕй Йегови ном ӕгас зӕрдӕй кадгин кӕнӕн.

ЙЕГОВИ НОМ КУ КАДГИН КӔНӔН, УӔД ИН Ӕ ЗӔРДӔ РОХС КӔНДЗИАН

4. Йегови ку фӕккадгин кӕнӕн, уӕд ин ӕхцӕуӕн цӕмӕн фӕууй? Ӕрхӕссӕ цӕветтон. (Кӕсӕ ма хузӕмӕ.)

⁴ Нӕ уӕларвон Фиди ном ку фӕккадгин кӕнӕн, уӕд ин уотемӕй ӕ зӕрдӕ фӕррохс кӕнӕн (Пс. 119:108). Фал цума е уобӕл дзорӕг ӕй, ӕма Алцигъон Хуцау ӕнӕнхӕст адӕни хузӕн уой гъӕуагӕ ’й, цӕмӕй ӕй ’стауонцӕ ӕма ’й ке уарзунцӕ, уой ин дзоронцӕ? Нӕъ. Ӕрхӕссӕн цӕветтон. Минкъий кизгӕ ӕ фидӕмӕ балигъдӕй, ӕ минкъий къохтӕй ин рахъури кодта ӕма загъта: «Папӕ, дӕуӕй хуӕздӕр неке ес!» Фидӕ бахудтӕй. Хъӕбӕр ӕхцӕуӕн ин адтӕй. Цӕмӕн? Ӕ амонд, ӕ кизгӕ ’й ке растудта уомӕй кӕнгӕ ’й? Нӕъ. Фал ин ӕхцӕуӕн ӕй, ӕ кизгӕ ’й ке уарзуй ӕма хӕларзӕрдӕ ке ӕй. Фидӕ ’й лӕдӕруй, еци менеугути фӕрци амондгун ке уодзӕй, ку исустур уа, уӕд. Йеговӕ дӕр гъе уой туххӕй фӕццийнӕ кӕнуй, ӕ ном ин ку фӕккадгин кӕнӕн, уӕд.

5. Хуцауи ном ку фӕккадгин кӕнӕн, уӕд цӕхуӕн мӕнгӕттӕ раргом кӕнӕн?

⁵ Сайтан Йегови туххӕй ци мӕнгӕттӕ фӕдздзурдта, етӕ махмӕ дӕр хаунцӕ. Ӕма Йегови ном ку фӕккадгин кӕнӕн, уӕд бавдесӕн, Сайтан ци дзурдта, етӕ мӕнгӕттӕ ке ’нцӕ. Сайтан загъта, еунӕг адӕймаг дӕр Хуцауи фарс еузӕрдонӕй ке нӕ байзайдзӕй, ӕхецӕн си ку неци пайда уа, уӕд (Иов 1:9–11; 2:4). Фал Иов Хуцаубӕл еузӕрдонӕй ке байзадӕй, уомӕй бавдиста, Сайтан мӕнгӕттӕ дзорагӕ ке ӕй. Махӕй ба ци ес зӕгъӕн? Мах бон дӕр ӕй нӕ уӕларвон Фиди номи сӕрбӕл дзорун ӕма ин ӕ зӕрдӕ рохс кӕнун, еузӕрдонӕй ин ке лӕггадӕ кӕнӕн, уомӕй (Ӕмб. 27:11). Ӕцӕгӕйдӕр, алкӕмӕдӕр ни ци устур кадӕ ’рхаудтӕй!

6. Нӕ бон цӕмӕй ӕй паддзах Давид ӕма левитти фӕнзун? (Нееми 9:5).

⁶ Йегови ка уарзуй, уони фӕффӕндуй ӕ ном рохс кӕнун. Паддзах Давид зардта: «Арфӕ кӕнӕ Йеговӕн, о мӕ уод, ӕма мӕ бауӕри алли иуӕнг дӕр – ӕ сугъдӕг номӕн» (Пс. 103:1). Давид ӕй лӕдӕрдтӕй, Йегови ном кадгин кӕнун ке нисан кӕнуй Хуцауӕн ӕхе кадгин кӕнун. Ӕ ном ӕвдесуй, цӕхуӕн Хуцау ӕй, уой. Уомӕ гӕсгӕ ном Йеговӕ ку фегъосӕн, уӕд нӕ зӕрдӕбӕл ӕрбафтуйуй, цӕхуӕн дессаги менеугутӕ имӕ ес ӕма цӕхуӕн дессаги гъуддӕгтӕ кӕнуй, е. Давиди фӕндадтӕй, цӕмӕй ӕ бауӕри алли иуӕнг дӕр, гъома, ӕ царди алли гъуддагӕй дӕр Хуцауи ном кадгин кӕна. Еци гъуддаги ма фӕнзуйнаг адтӕнцӕ левиттӕ дӕр. Етӕ сӕрниллӕг адтӕнцӕ  ӕма лӕдӕрдтӕнцӕ, Йегови кади аккаг дзурдтӕ сӕ бон иссерун дӕр ке некӕд исуодзӕй. (Бакӕсӕ Нееми 9:5.) Дзубанди дӕр ибӕл нӕййес, Йеговӕн уотӕ сӕрниллӕгӕй ӕма зӕрдиагӕй ку фӕккадӕ кӕнӕн, уӕд ин ӕ зӕрдӕ барохс кӕнӕн.

7. Дӕ бон куд ӕй Йегови дӕ лӕггадӕй дӕр ӕма дӕ гъуддӕгтӕй дӕр кадгин кӕнун?

⁷ Мах дӕр иннетӕн Йегови туххӕй ку фӕдздзорӕн ӕма нӕ дзурдтӕй бӕрӕг ку фӕууй, ке ин аргъ кӕнӕн, боз си ке ан ӕма ’й берӕ ке уарзӕн, уӕд ин хъӕбӕр ӕхцӕуӕн фӕууй. Игъосун кӕнгӕй нӕ сӕйраг нисан фӕууй, адӕнӕн банхус кӕнун Йеговӕмӕ бахӕстӕг ун. Мах фӕндуй, цӕмӕй етӕ дӕр нӕ Хуцаумӕ, мах имӕ ци цӕстӕй кӕсӕн, уӕхӕн цӕстӕй кӕсонцӕ (Иак. 4:8). Нӕ зӕрдӕмӕ хъӕбӕр цӕуй, Библи Хуцауи уарзондзийнадӕ, рӕстдзийнадӕ, зунд, хъаурӕ ӕма ӕндӕр хуарз менеугутӕ куд ӕргом кӕнуй, уой син ӕвдесун. Уомӕй уӕлдай ма Йегови фӕккадгин кӕнӕн ӕма ин ӕ зӕрдӕ фӕррохс кӕнӕн, алли бон дӕр ку фӕййархайӕн, цӕмӕй уой хузӕн уӕн (Еф. 5:1). Уой фӕрци ма, ка ’й зонуй, иннетӕ дӕр фӕууиндзӕнцӕ, аци дуйней адӕни хузӕн ке нӕ ан, ӕма сӕ бафӕнддзӕй базонун, уотӕ цӕмӕн ӕй, уой (Матф. 5:14–16). Уотемӕй нин, гӕнӕн ес, ӕма фӕззиндзӕй фадуат, цӕмӕй син балӕдӕрун кӕнӕн, уотӕ цӕмӕн цӕрӕн, уой. Ӕма, ка ’й зонуй, кӕдзосзӕрдӕ адӕни бафӕнддзӕй Хуцауи ӕмбӕлттӕ исун. Нӕ уӕларвон Фидӕн хъӕбӕр ӕхцӕуӕн фӕууй, нӕ лӕггадӕй ӕма ин нӕ гъуддӕгтӕй ӕ кадгин ном ку фӕррохс кӕнӕн, уӕд (1 Тим. 2:3, 4).

ЙЕГОВИ НОМ КУ КАДГИН КӔНӔН, УӔД КИРИСТЕЙ ЗӔРДӔ РОХС КӔНДЗИАН

8. Уотӕ зӕгъӕн цӕмӕн ес, ӕма Йегови кадгин кӕнун куд гъӕуй, уомӕн Киристейӕй хуӕздӕр цӕветтон неке ниууагъта?

⁸ Зӕнхӕбӕл дӕр ӕма уӕлӕрвти дӕр Йегови ӕ Фуртӕй хуӕздӕр неке зонуй (Матф. 11:27). Киристе ӕ Фиди уарзуй ӕма ’й кадгин кӕнун куд гъӕуй, уомӕн тӕккӕ хуӕздӕр цӕветтон ниууагъта (Иоан. 14:31). Ӕ мӕлӕти размӕ, еци ӕхсӕвӕ Йесо кувди загъта, ӕ зӕнхон лӕггадӕн ӕ сӕйраг нисан ке исӕнхӕст кодта: «Ӕз [син] дӕ ном раргом кодтон» (Иоан. 17:26). Цума ’й уомӕй ци зӕгъун фӕндадтӕй?

9. Киристе цӕхуӕн фӕсномуг хабар радзурдта, цӕмӕй хуӕздӕр базонӕн, нӕ уӕларвон Фидӕ цӕхуӕн ӕй, уой?

⁹ Киристе адӕнӕн айдагъ уой нӕ дзурдта, ӕма Хуцауи ном Йеговӕ ’й. Уой дзиуиттӕгтӕ ӕнӕуойдӕр зудтонцӕ. Е син ӕнхус кодта, цӕмӕй, Йеговӕ цӕхуӕн Хуцау ӕй, уой хуӕздӕр базудтайуонцӕ (Иоан. 1:17, 18). Зӕгъӕн, Дзиуиттаг Финстити финст адтӕй, Йеговӕ фӕлмӕнзӕрдӕ ӕма тӕрегъӕдгӕнагӕ ке ӕй (Рац. 34:5–7). Киристе ба уой балӕдӕрун кодта, фидӕ ӕма исӕфт фурти туххӕй фӕсномуг хабар ку радзурдта, уӕд. Ку фӕккӕсӕн, фурт ке ӕрфӕсмон кодта ӕма фӕстӕмӕ ке раздахтӕй, ӕ фидӕ ба ’й идардӕй ку фӕууидта, уӕд имӕ куд балигъдӕй, куд ин рахъури кодта ӕма ин ӕгас зӕрдӕй куд ниххатир кодта, уӕд ӕй никки хуӕздӕр фӕллӕдӕрӕн, Йеговӕ цӕйбӕрцӕбӕл фӕлмӕнзӕрдӕ ӕма тӕрегъӕдгӕнагӕ Хуцау ӕй (Лук. 15:11–32). Уотемӕй Киристе адӕнӕн бавдиста, ӕ Фидӕ ӕцӕгӕйдӕр цӕхуӕн ӕй, уой.

10. а) Кӕцӕй ӕй зонӕн, Киристе ӕ Фиди ном ке дзурдта ӕма ’й ке фӕндадтӕй, цӕмӕй ӕй иннетӕ дӕр дзоронцӕ? (Марки 5:19). (Кӕсӕ ма хузӕмӕ.) б) Абони дӕр Киристей фӕндон цӕй медӕг ӕй?

¹⁰ Цума Киристей фӕндадтӕй, цӕмӕй иннетӕ ӕ Фиди ном дзоронцӕ? Дзубанди дӕр ибӕл нӕййес. Уӕди рӕстӕги еуӕй-еу дини разамонгутӕмӕ уотӕ кастӕй, ӕма Хуцауи ном дзорӕн нӕййес, уомӕн ӕма ӕгӕр сугъдӕг ӕй. Фал Киристе нӕ бауагъта, цӕмӕй уӕхӕн ӕгъдӕуттӕ уой зундахастбӕл дӕр рабӕрӕг адтайуонцӕ. Нӕ зӕрдӕбӕл ӕрлӕуун кӕнӕн, Киристе еухатт Гераси рази ку адтӕй, уӕд сайтӕнттӕ гъезӕмарӕй ке мардтонцӕ, уӕхӕн нӕлгоймаги куд исдзӕбӕх кодта. Адӕн уой ку фӕууидтонцӕ, уӕд хъӕбӕр фӕттарстӕнцӕ ӕма Киристейӕн лигъстӕ кодтонцӕ,  цӕмӕй рандӕ уа, ӕма е дӕр уотӕ бакодта (Мар. 5:16, 17). Фал уӕддӕр Киристей фӕндадтӕй, цӕмӕй еци рауӕн цӕрӕг адӕн Йегови туххӕй базононцӕ. Уомӕ гӕсгӕ, сайтӕнттӕй ке исуӕгъдӕ кодта, еци нӕлгоймагӕн загъта, цӕмӕй ӕ хӕстӕгутӕн радзора, ци ибӕл ӕрцудӕй, уой. Фал еци нӕлгоймаг гъӕуама дзурдтайдӕ, Йеговӕ ин ци искодта, уой туххӕй, Киристе нӕ, фал. (Бакӕсӕ Марки 5:19 a.) Гъе уотӕ абони дӕр Киристей фӕндуй, цӕмӕй ӕгас адӕн дӕр ӕ Фиди номи туххӕй фегъосонцӕ (Матф. 24:14; 28:19, 20). Хуарз хабар ку фегъосун кӕнӕн ӕма Хуцауи ном ку фӕдздзорӕн, уӕд нӕ Паддзах Киристей зӕрдӕ фӕррохс кӕнӕн.

11. Киристе ӕ фӕдбӕлдзӕугути цӕбӕл ахур кодта ковун ӕма е уотӕ ӕхсидзгӕ цӕмӕн ӕй? (Йезекил 36:23).

¹¹ Киристе ӕй зудта, Йегови фӕндон уой медӕг ке ӕй, цӕмӕй ӕ сугъдӕг ном еугур цъифкалӕнтӕй дӕр искӕдзос уа. Гъе уомӕ гӕсгӕ тӕккӕ хуӕздӕр Ахургӕнӕг, ковун куд гъӕуй, уой ку амудта, уӕд уотӕ загъта: «Нӕ уӕларвон Фидӕ, исрохс уӕд дӕ ном» (Матф. 6:9). Киристе ӕй лӕдӕрдтӕй, Хуцауи ном искӕдзос кӕнун Дун-дуйней тӕккӕ ӕхсидзгӕдӕр фарста ке ӕй, ӕма уӕлӕрвти дӕр, удта зӕнхӕбӕл дӕр алкӕмӕдӕр ке хауй. (Бакӕсӕ Йезекили 36:23.) Еци фарста ниллух кӕнуни туххӕй нӕдӕр изӕдтӕй, нӕдӕр адӕнӕй Киристейӕй фулдӕр неке искодта. Фал Йесой ку ниййахӕстонцӕ, уӕд ӕй цума цӕми фудгин кодтонцӕ? Хуцауи, дан, фауй. Еци гъуддаг Киристе ӕхуӕдӕг дӕр хъӕбӕр устур тӕрегъӕдбӕл нимадта. Ӕвӕдзи, гъе уой туххӕй уотӕ хъурдохӕн кодта, ӕ мӕлӕти размӕ Йеговӕмӕ ку кувта, уӕд (Лук. 22:41–44).

12. Цӕмӕн ес уотӕ зӕгъӕн, ӕма Киристе ӕ Фиди ном куд исрохс кодта, уотӕ неке?

¹² Цӕмӕй Киристе ӕ Фиди ном исрохс кодтайдӕ, уой туххӕй берӕ гъезӕмӕрттӕ баййафта. Уомӕй уӕлдай ма ӕ фудкой кодтонцӕ ӕма ’й дзурдӕй ӕфхуардтонцӕ. Киристе ӕй зудта, ӕ Фидӕн алли гъуддаги дӕр коммӕгӕс ке адтӕй ӕма имӕ фау ӕрхӕссӕн ке нецӕмӕй адтӕй (Дзиуит. 12:2). Удта ма ’й лӕдӕрдтӕй, еци зин рӕстӕг ибӕл Сайтан ӕхе ке ниццавта (Лук. 22:2–4; 23:33, 34). Дзубанди дӕр ибӕл нӕййес, ӕ фӕндӕ адтӕй, цӕмӕй Киристе Хуцаубӕл гадзирахаттӕй рацудайдӕ. Фал хъӕбӕр фӕффудӕнгъӕл ӕй. Киристе ӕхе куд бадардта, уомӕй бавдиста, Сайтан мӕнгӕттӕ дзорагӕ ке ӕй ӕма Йеговӕн алкӕддӕр ке  уодзӕй, еузӕрдон ибӕл ка ӕй, уӕхӕн лӕггадгӕнгутӕ. Етӕ ӕнаййеппӕй байзайдзӕнцӕ, цийфӕнди зиндзийнӕдти ма бахауонцӕ, уӕд дӕр.

13. Дӕ бон куд ӕй Паддзах Киристей зӕрдӕ рохс кӕнун?

¹³ Дӕу ба фӕндуй Паддзах Киристей зӕрдӕ рохс кӕнун? Идарддӕр дӕр иннетӕн Йегови туххӕй дзорӕ ӕма ин уотемӕй ӕ ном кадгин кӕнӕ. Уотемӕй бавдесдзӕнӕ, Киристей къахвӕдтӕбӕл ке цӕуис (1 Пет. 2:21). Ӕма уӕд Йегови зӕрдӕ рохс кӕндзӕнӕ ӕма ’й ӕвдесдзӕнӕ, е знаг Сайтан мӕнгӕттӕ дзорӕг ке ӕй.

ЙЕГОВИ НОМ КУ ФӔККАДГИН КӔНӔН, УӔД АДӔНӔН ФЕНХУС КӔНӔН, ЦӔМӔЙ ФӔЙЙЕРВӔЗОНЦӔ

14, 15. Адӕнӕн Йегови туххӕй рӕстдзийнадӕ ку фӕййамонӕн, уӕд ци ’рцӕуй?

¹⁴ Йегови ном ку фӕккадгин кӕнӕн, уӕд уотемӕй адӕнӕн фенхус кӕнӕн, цӕмӕй фӕййервӕзонцӕ. Уотӕ зӕгъӕн цӕмӕн ес? Мах ӕй зонӕн, Сайтан адӕни зунд ке бахъӕрӕу кодта (2 Кор. 4:4). Уой туххӕй ӕууӕндун райдӕдтонцӕ ӕ мӕнгӕттӕбӕл, гъома, Хуцау ке нӕййес, адӕнбӕл ке нӕ тухсуй, ӕнӕхатир ке ӕй кенӕ тӕрегъӕдгун адӕн гъезӕмарӕй ке маруй. Еци мӕнгӕттӕн еу нисан ес: Хуцауи ном фегадӕ кӕнун, цӕмӕй ӕй базонун маке бафӕндӕуа. Фал нӕ лӕггадӕй Сайтанӕн е ’гас пълӕнттӕ дӕр ихалӕн. Мах адӕнӕн нӕ Фиди туххӕй рӕстдзийнадӕ дзорӕн ӕма ин уотемӕй ӕ ном рохс кӕнӕн. Еци гъуддаги нин ци бантӕстӕй?

¹⁵ Хуцауи Дзурд ӕй рӕстдзийнадӕ ӕма ин устур хъаурӕ ес. Адӕнӕн ку фӕдздзорӕн, Йеговӕ цӕхуӕн Хуцау ӕй, уӕд сӕ цӕститӕ сабургай байгон унцӕ ӕма базонунцӕ, Хуцаумӕ цӕхуӕн хуарз менеугутӕ ес, уой. Хуцау цӕхуӕн устур хъаури Хецау ӕй, е сӕ деси бафтауй (Ис. 40:26). Ба ’й лӕдӕрунцӕ, алкӕддӕр рӕстӕй ке фӕййархайуй (Дук. з. 32:4). Ӕ арф зундӕй исхайгин унцӕ (Ис. 55:9; Ром. 11:33). Уомӕй уӕлдай ма адӕнӕн сӕ нифс бафедар уй, Хуцау уарзондзийнадӕ ке ӕй, уой ку базонунцӕ, уӕд (1 Иоан. 4:8). Йеговӕмӕ ку бахӕстӕг унцӕ, уӕд син фӕззиннуй ӕносмӕ цӕруни нифс. Мадта устур кадӕй исхайгин ан – нӕ бон ӕй Хуцауи ӕмкосгутӕ ун ӕма адӕнӕн ӕнхус кӕнун, цӕмӕй е ’мбӕлттӕ исуонцӕ (1 Кор. 3:5, 9).

16. Еуӕй-еуетӕбӕл куд рабӕрӕг ӕй, Хуцауи ном ке базудтонцӕ, е? Ӕрхӕссӕ цӕветтонтӕ.

¹⁶ Фиццаг бал нӕ бон ӕй адӕнӕн дзорун,  Хуцауи ном Йеговӕ ке ӕй. Айдагъ е дӕр, ка ’й зонуй, кӕдзосзӕрдӕ адӕймаги цард цӕхгӕрмӕ феййевдзӕй. Ӕркӕсӕн еу ӕригон силгоймаг Алийай b хабармӕ. Е исирӕзтӕй, киристон динбӕл хуӕст ка н’ адтӕй, уӕхӕн бийнонти. Фал Алийа ӕ динӕй райгонд н’ адтӕй ӕма имӕ уотӕ кастӕй, цума си Хуцау идард ӕй. Фал Йегови Ӕвдесӕнти хӕццӕ Библи ахур кӕнун ку райдӕдта, уӕд уавӕр феййивта. Алийа ӕй балӕдӕрдтӕй, Хуцау е ’мбал ке ӕй. Хъӕбӕр дессаг имӕ фӕккастӕй, Хуцауи ном Библийӕй ке рандӕ кодтонцӕ ӕма ’й аллихузи титултӕй ке баййивтонцӕ. Алийа Хуцауи ном ке базудта, уой фӕрци ӕ цард цӕхгӕрмӕ раййивта. Е загъта: «Мӕ хуӕздӕр ӕмбалӕн ес ном!» Е ибӕл куд рабӕрӕг ӕй? Алийа идарддӕр загъта: «Нур мӕ зӕрди ес фарнӕ. Ци хуарз ӕй, Йегови ном ке зонун!» Гъӕйдӕ нур ба ӕркӕсӕн Стиви хабармӕ. Ӕ бийнонтӕ дзиуиттӕгтӕ адтӕнцӕ ӕма дзиуиттаг дини ӕгъдӕуттӕ ӕнхӕст кодтонцӕ. Фал Стив Хуцаубӕл не ’ууӕндтӕй, уомӕн ӕма берӕ цӕстӕмӕ миутӕ уидта. Ӕ зӕрдӕмӕ хъӕбӕрдӕр цудӕй музыкӕ. Фал ӕ мадӕ ку рамардӕй, уӕд хъӕбӕр маст кодта. Еци рӕстӕг е ’мбал Библи ахур кӕнун райдӕдта Йегови Ӕвдесӕнти хӕццӕ, ӕма ’й ӕ Библий ахурмӕ фӕххудта. Стив дӕр исарази ӕй. Ӕ зӕрдӕбӕл хъӕбӕр бамбалдӕй, Хуцауӕн ном ке ес. Стив зӕгъуй: «Фиццаг хатт ӕй балӕдӕрдтӕн, уодӕгас Хуцау ке ес ӕма ма ин ном дӕр ке ес. Фӕззиндтӕй мин ӕгасемӕй хуӕздӕр Ӕмбал!»

17. Идарддӕр дӕ Йегови ном кадгин кӕнун цӕмӕн фӕндуй? (Кӕсӕ ма хузӕмӕ.)

¹⁷ Хуарз хабар ку фегъосун кӕнтӕ, уӕд адӕнӕн Хуцауи номи туххӕй фӕдздзоретӕ? Ӕнхус син кӕнтӕ, Хуцау ӕцӕгӕй цӕхуӕн ӕй, уой фӕууинунмӕ? Кӕд гъо, уӕд уотемӕй Хуцауи ном фӕккадгин кӕнтӕ. Мадта идарддӕр дӕр адӕнӕн нӕ уӕларвон Фиди дессаги менеугути туххӕй дзоретӕ. Уотемӕй сӕ фӕййервӕзун кӕндзиайтӕ ӕма нӕ Паддзах Йесо Киристей къахвӕдтӕбӕл цӕудзиайтӕ. Тӕккӕ ӕхсидзгӕдӕр ба е ӕй, ӕма нӕ уарзӕгой Фидӕ Йегови зӕрдӕ рохс кӕндзиайтӕ. Гъӕйдӕ мадта Йегови «ном... кадгин кӕнӕн ӕносӕй-ӕносмӕ, муггагмӕ»! (Пс. 145:2).