1, 2. ¿Te mä kꞌoi faxkägihu̱ gä imäjinähu̱ te bi senti rä Zi Dada Jeoba nuꞌmu̱ bi mhää yä nkꞌuamba de Geꞌä?

 IMÄJINÄ ge nꞌa rä jäꞌi näꞌä gi mädi, bi xipäbi nuꞌu̱ ri amigo ꞌne ri familia nꞌa rä nkꞌuamba xi xä ntsꞌo de geꞌi. Mäske nuꞌi gi pädi xä ñho ge hingä mäjuäni näꞌä bi mää, pe nuꞌu̱ toꞌo bi yꞌo̱de rꞌaa bi gamfri. ¿Te ma gi senti? ¡Zäi ge xa ma dä u̱ ri mfeni! (Prov. 22:1).

² Kongehnä dä za gä imäjinähu̱ te bi senti rä Zi Dada Jeoba nuꞌmu̱ nꞌa de nuꞌu̱ yä bätsi mi ꞌmu̱i ha mähetsꞌi, bi mängä yä nkꞌuamba de Geꞌä ꞌne bi tsꞌombäbi rä thuhu. Eva bi gamfri näꞌä nkꞌuambaꞌä ꞌne tanto näꞌä ngu Adán bi desidi ya himbi yꞌo̱te rä Zi Dada Jeoba. Po geꞌä bi yu̱tꞌi rä pekado ꞌne rä du ha rä Xiꞌmhai (Gén. 3:​1-6; Rom. 5:12). Gatꞌho nuꞌu̱ yä sufrimiento di handihu̱ mäpaya, ngu rä du, yä gerra, yä ñheni ꞌne gatꞌho märꞌa yä xuñha, bä ehe po näꞌä rä nkꞌuamba bi mää rä Zithu. ¿Te gi kamfri ge bi senti rä Zi Dada Jeoba? ¡Zäi ge xa bi u̱ rä mfeni! Pe rä Zi Dada Jeoba hinxä ꞌme̱di rä johya nixi ꞌmu̱i ko rä kue̱, sino ke rä Mäkä Tꞌofo enä ge Jeoba näꞌä nꞌa rä «Zi Dada de gä johya» (1 Tim. 1:​11, TNM).

3. ¿Te mä oportunida di pe̱ꞌtsihu̱?

³ Mäpaya, nuju̱ di pe̱ꞌtsihu̱ rä oportunida de gä defendebihu̱ rä thuhu rä Zi Dada Jeoba. Pa geꞌä mähyoni gä pe̱fihu̱ nunä mhända uni rä Mäkä Tꞌofo ora enä: «Nsundabihu̱ rä mäkä thuhu Jeoba» (Sal. 113:1). Hää, di defendebihu̱ rä thuhu rä Zi Dada Jeoba ora di ñähu̱ xä ñho de Geꞌä ꞌne di xipäbihu̱ märꞌa toꞌoꞌä. Xi nuꞌi, ¿ꞌnehe gi ne gi mfaxte pa gi defendebi rä thuhu rä Zi Dada Jeoba? Ma gä handihu̱ te mä däta raso di pe̱ꞌtsihu̱ pa gä nsundahu̱ ꞌne gä eꞌspäbihu̱ rä nsu rä Zi Dada Jeoba.

 DI JOHYABIHU̱ RÄ MFENI ꞌNE RÄ KORASO RÄ ZI DADA JEOBA

4. Mää nꞌa rä kꞌoi näꞌä ma dä maxkägihu̱ gä imäjinähu̱ te di senti rä Zi Dada Jeoba ora di eꞌspäbihu̱ rä nsu (hyandi ꞌnehe rä foto).

⁴ Rä Zi Dada Jeoba go geꞌä mä Dadahu̱ ꞌne xa di ho gä nsundabihu̱ rä mäkä thuhu (Sal. 119:108). ¿Signifika ge rä Zi Dada Jeoba di ho dä teꞌspäbi rä nsu ja ngu yä jäꞌi pa dä senti xä ñho ꞌne dä senti ge di bale? Hinä. Pa gä imäjinähu̱ te di senti rä Zi Dada Jeoba ora tꞌespäbi rä nsu, ma gä hutsꞌihu̱ nꞌa rä kꞌoi; Jeoba ꞌñenä nꞌa rä dada ora rä zi tꞌu̱kä nxutsi hu̱fi ꞌne embäbi: «Papa, xa di mäꞌi ngeꞌä joꞌo mä nꞌa rä dada nguꞌi». Zäi ge näꞌä dadaꞌä xa di johya ꞌne bi tso̱ni ha rä koraso nuꞌu̱ yä noya bi yꞌo̱de bi xipäbi rä zi tꞌu̱kä nxutsi. ¿Por hanja? Mäske hinte ma dä thogi mu̱ hindä tꞌespäbi rä nsu näꞌä dadaꞌä, pe ora o̱de hanja ñä näꞌä rä zi tꞌu̱kä nxutsi; xa di johya ngeꞌä handi hängu di mädi ꞌne pe̱ꞌspäbi rä tꞌekꞌei. ꞌNehe xa di johya näꞌä dada ngeꞌä handi ge nuꞌu̱ yä hogä mꞌu̱i pe̱ꞌtsi rä zi tꞌu̱kä nxutsi, geꞌä ma dä matsꞌi xudi ndämäni. Njabu̱ ꞌnehe rä Zi Dada Jeoba, ¡joꞌo mä nꞌa rä dada nguꞌä ꞌne xa di johya ora di eꞌspäbihu̱ rä nsu!

5. ¿Te di udihu̱ ora di nsundabihu̱ rä thuhu rä Zi Dada Jeoba?

⁵ Rä Zithu hingä ho̱nse̱ xä mää yä nkꞌuamba kontra rä Zi Dada Jeoba, sino ke ꞌnehe xä gu̱tsꞌi yä nkꞌuamba kontra gekhu̱. Rä Zithu xä mää ge mu̱ nꞌa rä jäꞌi dä thogi yä xuñha, näꞌä jäꞌiꞌä hingä ma dä ne dä defendebi rä thuhu rä Zi Dada Jeoba. Rä Zithu xä mää ge di o̱tehu̱ rä Zi Dada Jeoba ho̱nse̱ mu̱ di kombienegihu̱ (Job 1:​9-11; 2:4). Pe mäyaꞌmu̱ bi mꞌu̱i nꞌa rä zi jäꞌi rä thuhu Job ꞌne bi ꞌñudi ge hingä mäjuäni näꞌä xä mää rä Zithu. ¿Pe xi nuju̱ te ma gä udihu̱? Ora di nsundabihu̱ rä thuhu rä Zi Dada Jeoba, ꞌnehe di udihu̱ ge näꞌä xä mää rä Zithu, hingä mäjuäni ꞌne ge näꞌä nꞌa rä kꞌuamba. Kada nꞌa de gekhu̱ di pe̱ꞌtsihu̱ rä däta nsu de gä mfaxtehu̱ pa gä defendebihu̱ rä thuhu rä Zi Dada Jeoba ꞌne gä pe̱fihu̱ näꞌä di hoꞌä pa njabu̱ gä johyabihu̱ rä mfeni ꞌne rä koraso (Prov. 27:11). ¿Hänge di pe̱ꞌtsihu̱ nꞌa rä däta nsu?

6. ¿Hanja dä za gä de̱mbäbihu̱ yä ejemplo rä rey David ꞌne yä levita? (Nehemías 9:5).

⁶ Toꞌo mädi Äjuä ko ngatꞌho rä koraso, geꞌä ma dä japäbi dä nsundabi rä thuhu. Rä rey David bi yꞌofo: «Ko ngatꞌho mä te, ma gä eꞌspäbi rä nsu Jeoba. Ko ngatꞌho mä mfeni ꞌne mä koraso, ma gä nsundabi rä mäkä thuhu» (Sal. 103:1). Rä rey David mi pädi xä ñho ge mu̱ dä nsundabi rä thuhu rä Zi Dada Jeoba, ꞌñenä go mi eꞌspäbi rä nsu mismo rä Zi Dada Jeoba. Gä ñähu̱ de rä thuhu rä Zi Dada Jeoba, ri bo̱ni gä xipäbihu̱ märꞌaa ge Näꞌä xa rä hojäꞌi ꞌne ge xa mähotho gatꞌho näꞌä xä hyoki ꞌne näꞌä pe̱fi. Rä rey David mi ne ko ngatꞌho rä koraso dä nsundabi rä  thuhu rä Zi Dada Jeoba ꞌne dä tratabi ko ndunthi rä tꞌekꞌei. Mäyaꞌmu̱, yä levita ꞌnehe xa mi ho dä nsundabi rä thuhu rä Zi Dada Jeoba. Nuyu̱ bi rekonose ge himi tini yä noya konte dä mää ge rä mäkä thuhu rä Zi Dada Jeoba, ¡xä nsundatho ꞌne xä mäkä ntꞌaxi! (Hñeti Nehemías 9:5). Zäi ge rä Zi Dada Jeoba xa mi johya ora mi o̱de hanja mri nsundabi rä mäkä thuhu.

7. ¿Hanja dä za gä nsundahu̱ ꞌne gä eꞌspäbihu̱ rä nsu rä Zi Dada Jeoba hyaxtho?

⁷ Mäpaya, nuju̱ di nsundahu̱ ꞌne di eꞌspäbihu̱ rä nsu rä Zi Dada Jeoba ora di ñähu̱ de geꞌä ko ndunthi rä mhäte ꞌne rä tꞌekꞌei. Ora di predikabihu̱ yä zi jäꞌi, di o̱thu̱ ntsꞌe̱di po gä utihu̱ hängu rä hojäꞌi rä Zi Dada Jeoba, pa njabu̱ yä zi jäꞌi dä ne dä bädi de Geꞌä ꞌne dä zo̱ho̱ dä mädi ja ngu di mädihu̱ (Sant. 4:8). Xa di hohu̱ gä utihu̱ ko rä Mäkä Tꞌofo nuꞌu̱ yä hogä mꞌu̱i pe̱ꞌtsi rä Zi Dada Jeoba. Di xipäbihu̱ ge rä Zi Dada Jeoba xa di mäkägihu̱, o̱tꞌä rä justisia, ꞌne ge xa ja ndunthi rä mfädi ꞌne rä tsꞌe̱di. Pe ja mä nꞌa rä forma hanja gä nsundabihu̱ rä thuhu rä Zi Dada Jeoba ꞌne gä johyabihu̱ rä koraso: ¡Mähyoni gä de̱mbäbihu̱ rä mꞌu̱i! (Efes. 5:1). Ora di udihu̱ rä mꞌu̱i rä Zi Dada Jeoba ꞌne märꞌaa di da ngue̱nda, tal vez nuꞌu̱ dä ñꞌani por hanja di nꞌañꞌohu̱ de märꞌa yä jäꞌi (Mat. 5:​14-16). Xa dä hogi ge hyaxtho gä o̱thu̱ ntsꞌe̱di po gä utihu̱ yä zi jäꞌi nuꞌu̱ yä hogä mꞌu̱i xä ꞌñutkägihu̱ rä Zi Dada Jeoba. Njabu̱, yä zi jäꞌi ma dä ne dä bädi ge geꞌä. Mu̱ di nsundahu̱ ꞌne di eꞌspäbihu̱ rä nsu rä Zi Dada Jeoba de nuya yoho yä forma, di lograhu̱ gä johyabihu̱ rä mfeni ꞌne rä koraso (1 Tim. 2:​3, 4).

DI JOHYABIHU̱ RÄ MFENI ꞌNE RÄ KORASO RÄ HESU

8. ¿Por hanja dä za gä eñhu̱ ge rä Hesu bi zogägihu̱ nꞌa rä hogä ejemplo de hanja di debe gä nsundabihu̱ rä thuhu rä Zi Dada Jeoba?

⁸ Tanto ha mähetsꞌi ngu ha rä Xiꞌmhai, joꞌo mä nꞌa toꞌo di konose xä ñho rä Zi Dada Jeoba ja ngu di konose rä Hesu (Mat. 11:27). Rä Hesu xa di mädi rä Zi Dada Jeoba ꞌne bi zogägihu̱ nꞌa rä hogä ejemplo de hanja di debe gä nsundahu̱ ꞌne gä eꞌspäbihu̱ rä nsu (Juan 14:31). Nꞌa xui änte de xä tho rä Hesu, bi xatuäbi rä Zi Dada Jeoba ꞌne bi ꞌñembäbi: «Nuga xtä utiyu̱ ndaꞌä ri thuhu» (Juan 17:​26, TNM). ¿Te bi me̱fi rä Hesu pa bi nsundabi rä thuhu rä Zi Dada Jeoba? Ma gä handihu̱.

9. ¿Te mä istoria bi mede rä Hesu pa bi matsꞌi yä jäꞌi bi ntiende xä ñho tenguꞌä rä mꞌu̱i rä Zi Dada Jeoba?

⁹ Rä Hesu hingä ho̱nse̱ bi xipäbi yä jäꞌi ge Jeoba geꞌä rä thuhu Äjuä. Ha näꞌä rä dähni habu̱ bi mꞌu̱i rä Hesu, yä jäꞌi ya mi pädi xä ñho ge Jeoba geꞌä rä thuhu Äjuä. Hänge rä Hesu hingä ho̱nse̱ bi xipäbi yä jäꞌi ge Jeoba geꞌä rä thuhu Äjuä, sino ke ꞌnehe bi ꞌñuti tenguꞌä rä mꞌu̱i (Juan 1:​17, 18). Mäske rä Mäkä Tꞌofo ya mi mää ge rä Zi Dada Jeoba xa di huegägihu̱ ꞌne rä hojäꞌi, pe rä Hesu bi hyoni hanja bi tso̱mbäbi ha yä koraso yä jäꞌi ko näꞌä mi uti de rä Zi Dada Jeoba (Éx. 34:​5-7). Nꞌa rä pa rä Hesu bi mede nꞌa rä istoria. Nunä istoria pede hanja nꞌa rä tꞌu̱ bi ma de rä nguu ꞌne bi hñätsꞌi nꞌa rä mꞌu̱i xa xä ntsꞌo. Mꞌe̱fa bi zopu̱ nunä mꞌu̱i xä ntsꞌo ꞌne bi desidi bi mengi ko rä dada. Nunä dada hyaxtho mi handi rä ꞌñuu ꞌne mi to̱ꞌmi rä tꞌu̱. Nꞌa rä pa bi hyandi ge xa mani rä tꞌu̱, hänge bi bo̱ni rä nhextꞌihi pa bi ma bä tsu̱di; oraꞌä bi hyu̱fi, bi zu̱ꞌtsi ꞌne bi pumbäbi näꞌä xki yꞌo̱tꞌe. ¿Hänge dä za gä handihu̱ hängu näꞌä rä mhäte ꞌne rä nhuekäte pe̱ꞌtsi rä Zi Dada Jeoba po gekhu̱? (Luc. 15:​11-32). Hää, rä Hesu bi nsundabi rä thuhu rä Zi Dada Jeoba nuꞌmu̱ bi matsꞌi yä jäꞌi dä ntiende xä ñho tenguꞌä rä mꞌu̱i rä Zi Dada Jeoba.

10. a) ¿Por hanja di pädihu̱ ge rä Hesu bi mämbäbi rä thuhu rä Dada ꞌne ge bi ꞌñuti yä jäꞌi dä me̱fi njabu̱ ꞌnehe? (Marcos 5:19; hyandi ꞌnehe rä foto). b) ¿Te ne rä Hesu gä pe̱fihu̱ mäpaya?

¹⁰ Rä Hesu ꞌnehe mi ne ge yä jäꞌi xä usabi rä thuhu rä Zi Dada Jeoba. Rꞌa de nuꞌu̱ yä majhä mi gu̱tꞌi rä ꞌñuu ha näꞌä tiempoꞌä, mi enä ge koꞌmu̱ rä thuhu Äjuä xa xä mäkä nsunda, himi  debe toꞌo dä mämbäbi rä thuhu. Pe rä Hesu hinto bi hñäkuäbi de dä mämbäbi ꞌne dä nsundabi rä thuhu rä Dada. Nꞌa rä pa —ha näꞌä luga mi fädi ngu yä hai yä geraseno— rä Hesu bi yꞌo̱the nꞌa rä ñꞌo̱ho̱ näꞌä xki yu̱tꞌi yä u̱xjua ha rä ndoyꞌo. Yä jäꞌi xa bi ntsu ꞌne bi bäntebi rä Hesu ge xä ma de näꞌä rä lugaꞌä (Mar. 5:​16, 17). Pe rä Hesu mi ne ge gatꞌho yä jäꞌi xä bädi ndaꞌä rä thuhu Äjuä. Hänge änte dä ma de gehni, bi ꞌñembäbi näꞌä ñꞌo̱ho̱ xki yꞌo̱the: «Gi ma ri nguu. Pengi ko ri pariente ꞌne xipäbi gatꞌho näꞌä xä me̱fi rä Zi Dada Jeoba po geꞌi ꞌne hängu xä huekꞌäꞌi» (hñeti Marcos 5:​19, TNM). a Mäpaya rä Hesu ne ge rä thuhu Äjuä dä fädi po gatꞌho rä Xiꞌmhai. Näꞌä ne gä utihu̱ yä jäꞌi ge Jeoba geꞌä rä thuhu Äjuä (Mat. 24:14; 28:​19, 20). Ora di pe̱fihu̱ näꞌä bi mända rä Hesu, di johyabihu̱ rä mfeni ꞌne rä koraso.

11. ¿Te bi xipäbi rä Hesu nuꞌu̱ yä de̱ni ge mi debe dä yꞌadi ha yä sadi ꞌne por hanja xa mähyoni? (Ezequiel 36:23).

¹¹ Rä Hesu mi pädi xä ñho ge rä Zi Dada Jeoba, ma dä nsunda rä mäkä thuhu ꞌne ma dä japi dä tꞌaxki de gatꞌho nuꞌu̱ yä nkꞌuamba xä mhää kontra Geꞌä. Hänge rä Hesu bi ꞌñutuäbi nuꞌu̱ yä de̱ni dä xatuäbi rä Zi Dada Jeoba njaua: «Mä Zi Dadaꞌihe gi ꞌmu̱i mähetsꞌi, drä nsunda ri mäkä thuhu» (Mat. 6:9). Rä Hesu mi pädi xä ñho ge drä su̱kuäbi rä thuhu rä Zi Dada Jeoba, geꞌä mänꞌa xa di mporta de gatꞌho märꞌa yä tꞌo̱tꞌe (hñeti Ezequiel 36:23). Tanto ha mähetsꞌi ngu ha rä Xiꞌmhai, rä Hesu geꞌä mänꞌa xä yꞌo̱tꞌe ntsꞌe̱di po dä xu̱kuäbi rä thuhu rä Zi Dada Jeoba. Pe mi mꞌu̱kua ha rä Xiꞌmhai, bri akusa rä Hesu ge go geꞌä xki mänchabi rä thuhu rä Zi Dada Jeoba. Rä Hesu mi pädi ge po geꞌä ma xrä kondenä ꞌne ma xä tho. Hänge xa mi turämu̱i de hanja ma xä gohi rä thuhu rä Zi Dada Jeoba (Luc. 22:​41-44).

12. ¿Te bi me̱fi rä Hesu pa bi nsundabi rä thuhu rä Zi Dada Jeoba ꞌne bi japi bi gohi xä ntꞌaxi?

¹² Rä Hesu bi mꞌu̱i dispuesto dä ze̱ti gatꞌho näꞌä bi tꞌo̱ꞌtuäbi kontal dä nsundabi rä thuhu rä Dada ꞌne dä ꞌñeꞌspäbi rä nsu. Rä Hesu mi pädi xä ñho ge xki me̱fi gatꞌho näꞌä xki mändabi rä Zi Dada Jeoba ꞌne hinte mä tsꞌoki xki yꞌo̱tꞌe pa dä me̱ꞌtsä rä tsa (Heb. 12:2). ꞌNehe mi pädi xä ñho ge gatꞌho näꞌä sufrimiento mi thogi näꞌä oraꞌä, xki ꞌñehe de rä Zithu (Luc. 22:​2-4; 23:​33, 34). Rä Zithu mi ne xä ꞌueke rä Hesu de rä ꞌñuu rä  Zi Dada Jeoba, pe himbi logra. Ko gatꞌho näꞌä bi ze̱ti rä Hesu, bi ꞌñudi ge hää ꞌmu̱i toꞌo pe̱päbi rä Zi Dada Jeoba mäske thogi yä däta xuñha. Njabu̱, rä Hesu bi ꞌñudi ge rä Zithu näꞌä nꞌa rä kꞌuamba ꞌne nꞌa rä fracasado.

13. ¿Te di debe gä pe̱fihu̱ pa gä johyabihu̱ rä koraso mä reyhu̱ Ñhesukristo?

¹³ Xi nuꞌi, ¿gi ne gi johyabi rä mfeni ꞌne rä koraso mä reyhu̱ Ñhesukristo? Mu̱ hää, sigi gi nsundabi rä thuhu rä Zi Dada Jeoba ꞌne fatsꞌi märꞌaa dä bädi ndaꞌä rä thuhu ꞌne tenguꞌä rä mꞌu̱i. Mu̱ gi pe̱fi njabu̱, ma gi de̱mbäbi yä paso rä Hesu (1 Ped. 2:21). Ja ngu rä Hesu, sigi gi yꞌo̱tꞌe ntsꞌe̱di po gi johyabi rä koraso rä Zi Dada Jeoba ꞌne ꞌñudi ge rä Zithu näꞌä nꞌa rä kꞌuamba näꞌä hinte di merese dä tꞌumbäbi.

DI FATSꞌIHU̱ MÄRꞌA DÄ ÑÄNI YÄ BIDA

14, 15. ¿Te thogi ko nuꞌu̱ yä zi jäꞌi di utihu̱ de rä Zi Dada Jeoba?

¹⁴ Ora di nsundahu̱ rä Zi Dada Jeoba, di fatsꞌihu̱ märꞌa dä ñäni yä bida. ¿Por hanja? Rä Mäkä Tꞌofo mää ge rä Zithu «xä goꞌtuäbi yä mfeni» yä jäꞌi (2 Cor. 4:​4, TNM). Hää, xi ndunthi yä jäꞌi xä gamfri nuꞌu̱ yä nkꞌuamba xä xani rä Zithu. ¿Ngu te mä nkꞌuamba? Rä Zithu xä mää ge “hingä mäjuäni ꞌmu̱i Äjuä”, “ge koꞌmu̱ Äjuä bi ꞌmu̱i ha mähetsꞌi, Näꞌä hingi turämu̱i po gekhu̱” ꞌne “ge pe̱hni ha rä nidu nuꞌu̱ yä pekador”. ¿Pate xä gu̱xä yä nkꞌuamba rä Zithu? Pa dä tsꞌombäbi rä thuhu rä Zi Dada Jeoba ꞌne njabu̱ hinto dä ne dä konose. Pe ora di predikahu̱ ꞌne di utihu̱ yä zi jäꞌi näꞌä xa mäjuäni de rä Zi Dada Jeoba, hindi hopäbihu̱ ge rä Zithu dä logra näꞌä xä beni, ꞌne go di nsundahu̱ ꞌne di eꞌspäbihu̱ rä nsu rä Zi Dada Jeoba.

¹⁵ Näꞌä udi rä Mäkä Tꞌofo ja ndunthi rä tsꞌe̱di. Ora di utihu̱ yä jäꞌi ge rä Zi Dada Jeoba xa rä hojäꞌi ꞌne xa di mäkägihu̱, tagi näꞌä rä benda ja ha yä da. ꞌNehe di fatsꞌihu̱ dä konose toꞌo xa mäjuäni rä Zi Dada Jeoba ꞌne tenguꞌä rä mꞌu̱i. Nuyu̱ yä zi jäꞌi umbäbi rä johya ora handi hängu rä tsꞌe̱di pe̱ꞌtsi rä Zi Dada Jeoba (Is. 40:26). ꞌNehe xa di nupäbi yä mfeni ora pädi ge rä Zi Dada Jeoba o̱tꞌe rä justisia (Deut. 32:4). Ora handi yä zi jäꞌi hängu rä mfädi pe̱ꞌtsi rä Zi Dada Jeoba, geꞌä japäbi dä me̱ꞌspäbi ndunthi rä tꞌekꞌei (Is. 55:9; Rom. 11:33). ꞌNehe tini ndunthi rä johya ora handi ge rä Zi Dada Jeoba xa di mäkägihu̱ kada nꞌa de gekhu̱ (1 Juan 4:8). Ora konose toꞌo rä Zi Dada Jeoba, di da ngue̱nda ge dä  za dä mꞌu̱i pa nzäntho ꞌne ge rä Zi Dada Jeoba ma dä zo̱ho̱ dä hyandi ngu yä bätsi. Nuju̱ ya di pe̱päbihu̱ rä Zi Dada Jeoba, ¡xi nꞌa rä däta nsu pa gekhu̱ gä utihu̱ märꞌa yä zi jäꞌi de Geꞌä! Ora di pe̱fihu̱ njabu̱, rä Zi Dada Jeoba di nugägihu̱ ngu yä maxte (1 Cor. 3:​5, 9).

16. ¿Te xä thogi ko ndunthi yä zi jäꞌi ꞌne te xä senti ora xä yꞌo̱de ndaꞌä rä thuhu Äjuä? Pede rꞌa yä esperiensia.

¹⁶ Ndunthi yä zi jäꞌi nunka xki yꞌo̱de ndaꞌä rä thuhu Äjuä. Pe ora xä bädi, ¡xä patuäbi yä mꞌu̱i! Geꞌä bi thogi ko nꞌa rä nxutsi rä thuhu Alía. b Nunä nxutsi mi pe̱ꞌtsi rä relijion, pe himi kombensebi näꞌä xti tꞌuti ꞌne mi senti ge mi japäbi mꞌe̱di dä konose xä ñho Äjuä. Pe rä bida bi mpadi nuꞌmu̱ bi mu̱di bi nxadi rä Mäkä Tꞌofo ko yä testigo rä Jeoba. Nunä nxutsi bi bädi ge ha ndunthi yä Mäkä Tꞌofo, xä thäkuäbi rä thuhu Äjuä ꞌne ho̱nse̱ xä thutsꞌi «Zi Dada» o «Zi Hmuu». Xa bi sorprendebi Alía mi bädi njabu̱. Nunä nxutsi nunka xä pumfri näꞌä rä pa bi tꞌuti ge Jeoba geꞌä rä thuhu Äjuä. Dende geꞌmu̱ bi hyandi rä Zi Dada Jeoba ngu rä amigo. Nunä nxutsi enä: «Mä amigo ja rä thuhu. Nubye̱ di senti nꞌa rä tsaya ha mä mfeni ꞌne ha mä koraso. ¡Xi nꞌa rä däta nsu pa geki gä konose rä Zi Dada Jeoba!». Nꞌa rä ku rä thuhu Steve, mrä músico ꞌne xki te ha nꞌa rä familia nuꞌu̱ myä judío ꞌne xa myä exigente. Ko rä tiempo Steve ya hinte mi ne dä bädi de yä relijion ngeꞌä ha näꞌä rä relijion xki tꞌuti, himi nheki rä mꞌu̱i Äjuä. Nꞌa rä pa, Steve bi thogi nꞌa rä däta dumu̱i ngeꞌä bi du nꞌa rä familia. Koꞌmu̱ nꞌa rä amigo mi nxadi rä Mäkä Tꞌofo ko yä testigo rä Jeoba, bi mbitabi dä kompañä pa dä yꞌo̱de näꞌä mi tꞌuti. Steve enä: «Ora dä o̱de ge Äjuä rä thuhu Jeoba, bi tso̱ni asta mbo ha mä koraso. Nunka xki tꞌutkägi ndaꞌä rä thuhu Äjuä. Po ri mu̱di dä handi ge Äjuä hää xa mäjuäni ꞌmu̱i ꞌne dä handi ge dä za gä o̱tꞌe mä amigo».

17. ¿Por hanja gi ꞌmu̱i desidido gi sigi gi nsundabi rä thuhu rä Zi Dada Jeoba? (Hyandi ꞌnehe rä foto).

¹⁷ Ora gi predika, ¿gi xipäbi yä zi jäꞌi ndaꞌä rä thuhu Äjuä ꞌne tenguꞌä rä mꞌu̱i? Mu̱ hää, sigi gi ꞌñeꞌspäbi rä nsu rä Zi Dada Jeoba ꞌne sigi gi ꞌñuti märꞌa yä zi jäꞌi tenguꞌä rä mꞌu̱i. Njabu̱, ma gi ꞌñudi ge gi de̱mbäbi yä paso mä Reyhu̱ Ñhesukristo, ma gi johyabi rä koraso rä Zi Dada Jeoba ꞌne ma gi fatsꞌi märꞌa yä zi jäꞌi dä ñäni yä bida. Hää, ja ngu rä rey David ma dä za gi ꞌñembäbi rä Zi Dada Jeoba: «¡Nuga ma gä nsunda ri thuhu pa nzäntho!» (Sal. 145:2).