1-2. Antoy makatulong pian natalosan tayoy alikna nen Jehova nen dineralan so ngaran to?

 IMADYIN mo pa iyan situasyon: Walay kapamilya o kaarom ya in-tsismis to ka. Siempre, antam ya aliwan tuay ibabaga to. Pero wala ray anisia ed sikato. Say aliwliwa ni, imbaga da met itan ed arum. Kanian kinmalat laingen itan ya tila. Antoy naliknam ey? Seguradon aburido ka ta apektadoy relasyon mod arum, tan siempre, nasakitan ka ta sankanonot moy reputasyon mo.​—Pro. 22:1.

² No imadyinen mo itan ya situasyon, natalosan moy alikna nen Jehova nen dineralan so ngaran to. Sakey ed saray anghel ya inturing ton anak so angikalat na tila tungkol ed sikato. Tinilaan na sayan anghel so unonan bii, si Eva, tan anisian tampol. Lapud satan ya tila, nanrebelde so inmunan atateng tayo ed si Aman Jehova, tan adamay tayon ananak da. Amin tayo et naaripen na kasalanan tan ipapatey. (Gen. 3:1-6; Roma 5:12) Amin ya problema ed mundo natan singa say sakit, guerra, tan irap na bilay et ginmapo lapud tila ya imbaga nen Satanas diad hardin na Eden. Anto kasi alikna nen Jehova nen dineralan so ngaran to tan anengneng toy aliwliwan epekto na satan ya katilaan? Seguradon asakisakitan. Pero anggano asakitan tan adismaya si Jehova, ibabaga na Biblia ya sikatoy nansiansian “maliket a Dios.”​—1 Tim. 1:11.

3. Antoy pribilehyo tayon amin?

³ Walay naitulong tayo pian nalinisan so ngaran nen Jehova. Pribilehyo tayon patunayan ya matila si Satanas. Nagawaan tayo itan no unoren tayo iyan ganggan: “Idayew yoy ngaran nen Jehova.” (Sal. 113:1) Naidayew tayoy ngaran nen Jehova no ibaga tayo ed arum so katuaan tan amin ya mararakep ya bengatla tungkol ed sikato. Kasin labay mon idayew so ngaran to?  Pantongtongan tayo natan so taloran rason ya manpakilos ed sikatayon idayew so ngaran nen Jehova diad interon puso.

NAPAPALIKET TAYOY JEHOVA NO IDADAYEW TAYOY NGARAN TO

4. Akin et naliliketan si Jehova no idadayew tayo? Mangiter na ilustrasyon. (Nengnengen met so litrato.)

⁴ Naliliketan si Aman Jehova kada no idadayew tayoy ngaran to. (Sal. 119:108) Labay to kasin ibaga, kulang so tiwala nen Jehova ed sarili to kanian kailangan toy panangidayew? Andi. Imanoen pa iyan ilustrasyon: Imadyin mo pay sakey ya ugaw ya nilakalakap toy tatay to, insan to imbaga, “Pa, the best kayon talaga!” A-touch ya maong imay tatay tan anggad layag so imis to. Akin et ontay reaksion to? Kasin kulang so tiwala tod sarili to kanian labalabay toy pairayew ed anak to? Andi. Say rason no akin ya malikeliket iyan tatay et lapud sankalikna to ya maar-aro tan maapresya so anak to. Amta to ya maliket so bilay na anak to no ombaleg ya maar-aro tan maapresya. Atan met so rason nen Aman Jehova no akin ya naliliketan kada no sikatoy idadayew tayo.

5. No idayew tayoy Jehova, anton akusasyon nen Satanas so napatunayan ya aliwa?

⁵ No idadayew tayoy Aman Jehova, napapatunayan tayon aliwa imay akusasyon nen Satanas ed sikatayo ran totoo. Diad panaon nen Job, imbaga nen Satanas ya anggapo tay too ya manmatoor ed Dios no wala lad mairap ya situasyon. Imbaga to ingen ya mandadayew tayo labat ed si Aman Jehova lapud bendisyon ya nanaawat tayo tan ibeneg tayo lanlamang no anggapo la kunoy pinanabangan tayod sikato. (Job 1:9-11; 2:4) Pero nanmatoor si Job kanian apatunayan ya matila si Satanas. Sika ey? Kasin labay mo met ya patunayan ya aliwan tua imay akusasyon nen Satanas? Idepensam sirin so ngaran nen Jehova tan manmatoor kad sikato anggan diad sankairapan ya situasyon. (Pro. 27:11) Balbaleg itan ya pribilehyo!

6. Panon tayon naalig si Arin David tan saray Levita? (Nehemias 9:5)

⁶ Inar-aro tayoy Jehova kanian idadayew tayoy ngaran to diad interon puso. Oniay insulat nen Arin David: “Idayew ko si Jehova; idayew na amin a kabiangan na laman ko so masanton ngaran to.” (Sal. 103:1) Amta nen David ya no idayew toy ngaran nen Jehova, si Jehova ya mismo so idadayew to. Duga met itan, ta no narengel tayoy ngaran nen Jehova, say nanonotan tayon tampol et saray mararakep ya kualidad to tan saray makapabilib ya ginawa to. Parad si David, masanto so ngaran na Ama to tan labalabay to itan ya idayew. Idayew kuno itan na “amin a kabiangan na laman [to].” Ontan met so ginawa na saray Levita  nensaman. Indaulo day pangirayew ed si Jehova. Imbaga ra ya say ngaran to et “nitandoro nen say amin a bendisyon tan dayew.” (Basaen so Nehemias 9:5.) Singa da ibabaga ya aliwan sapat so salita pian nairayew day sagradon ngaran nen Jehova. Seguradon naliliketan si Aman Jehova ed ontan iran mapaabeba tan impapuson panangirayew ed sikato.

7. Panon tayon naidayew si Jehova diad ministeryo tan diad inagew-agew ya bilay tayo?

⁷ No itotongtong mod arum so tungkol ed si Jehova, kasin nalikas da ya sikatoy inar-arom tan agaylay pisasalamat mod sikato? Kada no nanenengneng nen Jehova ya ontay gagawaen mo, seguradon naliliketan ed sika. No manpupulong tayo, tandaan tayo ya say gagala tayo et nakabat na totoo si Jehova, naar-aro da, tan ituring dan Ama. (Sant. 4:8) Labalabay tayon ipabasa ed sikara iray teksto tungkol ed saray balibalin kualidad nen Jehova, singa say panangaro, hustisya, karunongan, pakapanyari, tan arum ni. Nairarayew tan napapaliket tayo met si Jehova no aaligen tayo iray ugali to. (Efe. 5:1) No ontay gawaen tayo, napansin na totoo ya duma tayo tan ompan mankelaw ira. (Mat. 5:14-16) Diad inagew-agew ya bilay tayo, samboten tayo ray pagkakataon ya i-explain ed sikara no akin et duma tayo. Malay mo, ompan atan so rason pian labay da met lan kabaten so Dios. On, no irarayew tayoy Aman Jehova diad ministeryo tan diad inagew-agew ya bilay tayo, napapaliket tayoy puso to.​—1 Tim. 2:3, 4.

NAPAPALIKET TAYOY JESUS NO IDADAYEW TAYOY NGARAN NEN JEHOVA

8. Siopa so sankaabigan ya alimbawa na angirayew ed ngaran nen Jehova, tan akin?

⁸ Diad amin ya pinalsa ed interon uniberso, si Jesus so talagan makapikabat ed si Aman Jehova. (Mat. 11:27) Inar-aro nen Jesus so Ama to tan manuna ed bilay to so pangirayew ed ngaran nen Jehova. (Juan 14:31) Diad samay pikakasi nen Jesus ed samay labi antis ya ompatey, oniay imbaga tod Ama to ya sankaimportantian ya ginawa to diad dalin: “Impakabat kod sikara so ngaran mo.” (Juan 17:26) Panon to itan ya ginawa?

9. Antoy sakey ya ilustrasyon ya inusar nen Jesus pian mas nakabat na totoo no anton klase na Dios si Jehova?

⁹ Diad tua, amta la na saray Judio so ngaran na Dios. Kanian antoy labay ya ibaga nen Jesus nen imbaga ton, “Impakabat kod sikara so ngaran mo”? Imbangat tan impalinew nen Jesus ed sikara no anton klase na Dios si Jehova. (Juan 1:17, 18) Singa bilang, ibabaga na Hebreon Kasulatan ya si Jehova et “mapangasi tan maabagey.” (Exo. 34:5-7) Pero mas pinaletaw nen Jesus iratan ya ugali nen Ama to nen inusar to may ilustrasyon tungkol ed sakey ya anak a laki ya apariwara nen pinili toy onsian ed pudir na ama to. Sinmabi panaon ya nagbabawi yan anak tan nandesisyon ya ompawil lad abung da. “Legan a walad nid arawi,” sikatoy abantag nen tatay to tan akasian to. Kanian binmatik ya tampol tan nilakalakap to! Mabulos ton pinerdona tan tinanggap to lamet bilang anak. Diad sayan ilustrasyon, atalo-talosan tayo ya talagan makasi tan maabagey si Jehova. (Luc. 15:11-32) Lapud satan ya paraan na panagbangat nen Jesus, mas akabat na totoo iray balibalin ugali tan kualidad nen Ama to.

10. (a) Akin et segurado tayon inusar nen Jesus so ngaran nen Ama to tan ontan met so labay ton gawaen na arum? (Marcos 5:19) (Nengnengen met so litrato.) (b) Antoy labay met nen Jesus ya gawaen tayo natan?

¹⁰ Kasin labay nen Jesus ya usaren tayoy ngaran nen Ama to? On, segurado. Pero nen panaon nen Jesus, wala ray lider na relihyon ya ibabaga ran aga kuno nayarin bitlaen so ngaran na Dios ta sagradon maong. Pero aga nampaimpluensya si Jesus ed ontan iran tradisyon. Tuloytuloy ton inggalang so ngaran nen Ama to. Imanoen pa imay agawa nen pinaabig nen  Jesus so sakey ya laki ya aselepan na demonyo diad lugar na saray Geraseno. Ataktakot iray totoo kanian akikasi irad si Jesus ya ontaynan lad lugar da, katon inmalis la. (Mar. 5:16, 17) Pero labalabay nen Jesus ya ipakabat so ngaran nen Jehova ed satan ya lugar, kanian ingganggan to may pinaabig ton laki: “Ibalitam ed sikara so amin a ginawa nen Jehova ed sika.” Agto imbagan, “ginawak ed sika.” (Basaen so Marcos 5:19.) a Ontan met so labay nen Jesus ya gawaen tayo natan. Ipakabat tayod interon mundo so ngaran nen Ama to! (Mat. 24:14; 28:19, 20) No ontay gawaen tayo, napapaliket tayoy Jesus, say Ari tayo.

11. Anto so imbangat nen Jesus ya ipikasi na saray papatumbok to, tan akin et importante itan? (Ezequiel 36:23)

¹¹ Amta nen Jesus ya importantin maong ed Ama to ya nalinisan tan napasanto so ngaran To. Atan so rason no akin ya imbangat nen Jesus iray papatumbok to ya ipikasi ran: “Ama mi a walad tawen, napasanto komon so ngaran mo.” (Mat. 6:9) Amta nen Jesus ya aya so sankaimportantian ya isyu ed interon uniberso. (Basaen so Ezequiel 36:23.) Diad amin ya pinalsa, anggapoy makapipara ed ginawa nen Jesus pian napasanto so ngaran nen Ama to. Pero nen sikatoy inaresto na saray mamubusol ed sikato, inakusaan da ya anggapo kunoy respeto to ed ngaran na Dios. Parad si Jesus, atan la so sankabelatan tan sankaugsan ya kasalanan. Agto naawat ya sikatoy nasentensiaan lapud sayan krimen! Nayarin atan so rason no akin ya ‘agonigon a maong’ si Jesus antis dan arestoen.​—Luc. 22:41-44.

12. Anto ray inanosan nen Jesus pian napasanto so ngaran nen Ama to?

¹² Pian napasanto nen Jesus so ngaran nen Ama to, inanosan toy amin ya panamairap, panag-insulto, tan kababaingan. Pero diad puso to, amta to ya anggapoy nepeg ton ibaing lapud inunor toy amin ya ipapagawa nen Ama to. (Heb. 12:2) Amta to met ya si Satanas so walad benegan na sarayan amin. (Luc. 22:2-4; 23:33, 34) Ginawa lan amin nen Satanas pian traidoren nen Jesus so Ama to. Pero abaibaingan si Satanas ta nanmatoor si Jesus anggad patey! Pinaneknekan nen Jesus ya aliwan tua imay imbaga nen Satanas ya anggapoy manmatoor ed Dios no ondalan lad sankairapan ya subok.  On, malinlinew ton pinatunayan ya sankatilaan si Satanas!

13. Antoy gawaen mo pian napaliket moy Ari tayo?

¹³ Kasin labay mo ya naliketan si Jesus ed sika? No on, itultuloy mo sirin ya idayew so ngaran nen Jehova tan ibagam ed arum iray balibalin ugali to. No ontay gawaen mo, ‘tutumboken moy bakat’ na Ari tayo. (1 Ped. 2:21) Napaliket moy Jehova tan napatunayan mo ya sankatilaan si Satanas!

BILAY NA TOTOO SO NALALANOR

14-15. Anto ray balibalin resulta no ibangat tayo ray totoo tungkol ed si Jehova?

¹⁴ No idadayew tayoy ngaran nen Jehova, walay naitutulong tayo pian nailigtas so bilay na totoo. Abaybayag lan ‘bubulagen nen Satanas so kanonotan na saray agmananisia.’ (2 Cor. 4:4) Apanisia to ra ed saray katilaan to ya anggapo kunoy Dios; arawrawi kunoy Dios tan anggapoy malasakit tod sikatayo; maruksa kunoy Dios tan dudusaen to iray mauges diad impierno. Ikakalat nen Satanas iratan ya tila ta labay ton narutakan so ngaran o reputasyon nen Aman Jehova pian onarawi so liknaan na totoo ed Dios. Pero kada no manpupulong tayo, ompapalpak so plano nen Satanas lapud ibabangat tayod saray totoo so katuaan tungkol ed si Aman Jehova. Anto ray marakep ya resulta no ontay gawaen tayo?

¹⁵ No naamtaan na sakey ya too so katuaan ya walad Salita na Dios, balbaleg so epekto ed bilay to. No naamtaan to no anton klase na Dios si Jehova, manguma-uman so bilay to. Sikatoy kalkalnan nibulos ed saray katilaan nen Satanas. Malinlinew to lan nanengneng iray balibalin ugali na Ama tayo. Seguradon pambiliban toy pakapanyari nen Aman Jehova. (Isa. 40:26) Naaralan toy mantiwala ed Dios ta perpekto so hustisya To. (Deu. 32:4) Naaralan to met so manmatalek ed aralem ya karunongan na Dios. (Isa. 55:9; Roma 11:33) Tan seguradon na-touch ed katuaan ya say Dios et maar-aro. (1 Juan 4:8) No diman oneelet so pikakaaro tod si Jehova, diman met mas ombiskeg so ilalo to ya sikatoy manbilay ya andi-anggaan tan ituring nen Jehova bilang anak. Amay natulongan moy sakey ya too ya nakabkabat tan naar-aro toy Ama to ed tawen—balbaleg itan ya pribilehyo!  Kagalangan tayo ya ituring itayo nen Jehova ya “kakimeyan” to.​—1 Cor. 3:5, 9.

16. Antoy nayarin epekto ed totoo no naamtaan day ngaran na Dios? Mangiter na alimbawa.

¹⁶ Say maslak ya unonan ibabangat tayo ed saray totoo et walay ngaran na Dios—say ngaran to et Jehova. Simpli labat itan ya katuaan. Pero diad tua, balbaleg so epekto to itan ed puso na sakey ya mapaabeban too. Imanoen so eksperiensya na kabataan ya si Aaliyah. b Say relihyon na pamilya to et agmanisia ed Biblia. Anggano walay relihyon to, arawrawi kunoy liknaan to ed Dios. Pero anguma-uman itan nen ginmapon nampa-Bible study ed saray Tasi. Inmapit so liknaan to ed Dios tan inturing ton Kaaro. Agmakapanisia ya say ngaran na Dios et inekal ed dakdakel ya Biblia tan sinalatan na saray titulo, ya singa say Katawan. Agto kuno nalinglingwanan nen naamtaan to ya say ngaran na Dios et Jehova. Kuan to: “Walay ngaran na best Friend ko!” Antoy epekto to itan ed si Aaliyah? Oniay imbaga to: “Malikeliket so pusok. Balbaleg ya kagalangan ya naamtaan koy ngaran na Dios.” Imanoen met so eksperiensya na sakey ya musician, si Steve. Sikatoy binmaleg ed debotadon Judion pamilya. Dismayado kuno ed amin ya relihyon ta dakel so kabat ton relihyoso pero aliwliway kagagawa ra. Nen inatey balet si nanay to tan agaylay ermen to, walay kaaro ton Bible study na saray Tasi ya angitagar ed sikaton man-obserba tan ondengel legan dan iyaaralan. A-touch kunon maong nen naamtaan toy ngaran na Dios. Oniay imbaga to: “Agko amta ya wala manayay ngaran na Dios. Sa wakas, nagmaliw ya tudtua so Dios ed siak. Akaalmo ak na Kaarok!”

17. Akin et labalabay mon idayew so ngaran nen Jehova? (Nengnengen met so litrato.)

¹⁷ Diad ministeryo, kasin ipapaamtam ed totoo so masanton ngaran nen Jehova? Kasin tutulongan mo ra ya nakabkabat day tuan Dios? Kada no gagawaen mo itan, naidadayew moy ngaran na Dios. Komon ta itultuloy mo itan ya gawaen. Ibangat mod sikara no anton klase na Dios si Jehova. Napakilos kan gawaen itan no sankanonot mo ya bilay so nalalanor. Tandaan mo met ya napapaliket moy Ari tayo, si Kristo Jesus. Tan manuna ed amin, napapaliket moy maar-aron Ama tayo, si Jehova. Komon ta “idayew [moy] ngaran [to] ya anggad angga”!​—Sal. 145:2.