1-2. Kiko por yuda nos komprondé kon Yehova ta sinti di e mentiranan tokante dje?

 IMAGINÁ e siguiente situashon: Un hende ku bo ta apresiá ta bisa algu hopi malu di bo. Bo sa ku ta gaña e ta gaña; pero algun hende ta kere su mentira. Anto pa hasi e kos pió, nan ta kuminsá plama e mentira, i mas hende tambe ta kere. Kon lo bo sinti? Kasi sigur hopi malu. Dikon? Pasó bo stima hende i bo reputashon ta importante pa bo.—Pro. 22:1.

² E ehèmpel ei por yuda nos komprondé kon Yehova a sinti ora ku un di su yunan den shelu a gaña riba dje i daña su reputashon. Eva a kere e mentira ei, anto esei a pone ku nos promé mayornan a rebeldiá kontra Yehova. I debí na esei, tur hende ta peka i muri ku tempu. (Gén. 3:​1-6; Rom. 5:12) Tur e problemanan ku tin den mundu, mané morto, guera i sufrimentu, t’ei pa motibu di e mentiranan ku Satanas a kuminsá plama den hòfi na Éden. Sin duda, Yehova ta sinti hopi malu debí na tur e mentiranan ei i nan konsekuensianan. Pero apesar di esei, Yehova no a bira un Dios amargá. Al kontrario, ketu bai e ta “e Dios felis.”—1 Tim. 1:11.

3. Ki privilegio nos tin?

³ Nos por yuda proba ku Satanas a gaña riba Yehova. Kon? Ora nos obedesé e mandamentu akí: “Alabá Yehova su nòmber.” (Sal. 113:1) Nos ta hasi esei ora nos ta papia bon di e Persona ku tin e nòmber santu ei. Abo lo hasi  esei? Ban wak tres motibu ku lo yuda nos haña mas gana di alabá Yehova su nòmber ku henter nos kurason.

NOS TA HASI YEHOVA KONTENTU

4. Duna un ehèmpel ku ta splika dikon Yehova ta keda kontentu ora nos alab’é. (Wak e plachi.)

⁴ Yehova ta nos Tata den shelu, i e ta keda masha kontentu ora nos ta alabá su nòmber. (Sal. 119:108) Akaso esei ke men ku nos Dios todopoderoso ta meskos ku un hende insigur ku ke pa otro hende keda elogi’é i papia bon di dje? Nò. Pa nos komprondé mihó, imaginá un mucha chikitu ta kore bai serka su tata i ta bras’é masha duru. Anto di su mes e ta bisa: “Tata, bo ta e mihó tata di henter mundu!” E tata ta sintié felis, asta su hemut ta yena, pa loke su yu a hasi. Anto e no ta reakshoná asina ei pasó e ta un tata insigur ku mester di elogio di su yu; mas bien e ta masha kontentu pa mira ku su yu ta stim’é i ta mustr’é su apresio. Ademas, e sa ku e kualidatnan ei lo yuda su yu bira un hende mas felis ora e krese. Asina tambe, Yehova, e mihó Tata di henter universo, ta keda masha kontentu ora nos alab’é.

5. Kiko kada un di nos ta demostrá ora nos alabá Yehova?

⁵ Satanas a bisa un mentira ku ta enbolbé kada un di nos. El a insinuá ku niun hende lo no defendé Dios su nòmber ni lo no keda leal ora nan haña nan ku prueba. Segun e, nos tur, sin eksepshon, lo stòp di sirbi Yehova si nos haña ku esei ta mihó pa nos. (Yòb 1:​9-11; 2:4) Pero Yòb a keda fiel na Dios i asina ei a proba ku Satanas ta un gañadó. Abo lo hasi meskos? Nos kada un por skohe pa defendé nos Tata i hasié kontentu dor di sirbié fielmente. (Pro. 27:11) Ta un onor i privilegio pa hasi esei.

6. Kon nos por hasi meskos ku Rei David i e levitanan? (Nehemías 9:5)

⁶ Hende ku ta stima Yehova ke alabá su nòmber ku henter nan kurason. Rei David a skirbi: “Lo mi alabá Yehova. Lo mi alabá su nòmber santu ku henter mi kurason.” (Sal. 103:1) David a komprondé ku alabá Yehova su nòmber ta meskos ku alabá Yehova mes. Pues, papia tokante Yehova su nòmber ta meskos ku papia tokante su reputashon, su bunita kualidatnan i su obranan maravioso. David kier a trata nòmber di su Tata komo santu i alab’é. E kier a hasié “ku henter  [su] kurason.” E levitanan tambe a tuma inisiativa i alabá Yehova. Humildemente nan a rekonosé ku hamas nan palabranan por ekspresá e alabansa ku Yehova su nòmber meresé. (Lesa Nehemías 9:5.) Sin duda, nan alabansa humilde i di kurason a hasi Yehova masha kontentu.

7. Kon nos por alabá Yehova den nos sirbishi i den nos bida diario?

⁷ Awe, nos por alabá Yehova ora nos ta papia tokante dje na un manera ku ta mustra nos gratitut i amor p’e. Ora nos ta prediká, nos ta keda kòrda ku nos meta prinsipal ta pa yuda otro hende hala serka Yehova i stim’é mes tantu ku nos ta stim’é. (Sant. 4:8) Nos gusta laga nan mira den Beibel e kualidatnan di Yehova, mané su amor, hustisia, sabiduria i poder. Un otro manera ku nos ta alabá Yehova i hasi su kurason kontentu ta ora nos ta hasi esfuerso pa imit’é. (Efe. 5:1) Ora nos hasi esei, kisas hende lo ripará ku nos no ta meskos ku otro hende i kisas ta puntra nan mes dikon. (Mat. 5:​14-16) Den nos trato di tur dia ku nan, kisas nos lo haña chèns pa splika nan dikon nos ta asina. E ora ei, hende ku ke sa e bèrdat lo sinti nan atraí na nos Dios. Ora nos ta alabá Yehova den e maneranan ei, nos ta hasi su kurason kontentu.—1 Tim. 2:​3, 4.

NOS TA HASI HESUS KONTENTU

8. Dikon Hesus ta e mihó ehèmpel den alabá Yehova su nòmber?

⁸ Niun persona den shelu ni riba tera no konosé Yehova mihó ku Hesus. (Mat. 11:27) Hesus stima su Tata i a pone e mihó ehèmpel kon pa alabá Yehova su nòmber. (Huan 14:31) E anochi promé ku Hesus a muri el a resa na su Tata i a menshoná e kos di mas importante ku el a hasi durante su sirbishi aki riba tera. El a bisa: “Mi a hasi bo nòmber konosí.” (Huan 17:26) Kon el a hasi esei?

9. Ki ilustrashon Hesus a usa pa splika na un manera mas komprendibel ken su Tata ta?

⁹ Hesus a hasi mas ku djis bisa hende ku Dios su nòmber ta Yehova. E hudiunan ya tabata sa esei. Pero Hesus a splika nan ta ken Yehova ta. (Huan 1:​17, 18) Por ehèmpel, Skritura Hebreo ta bisa ku Yehova ta miserikòrdioso i yen di kompashon. (Éks. 34:​5-7) Pero danki na e ilustrashon di e yu pèrdí i su tata, Hesus hasi e bèrdat ei mas komprendibel ku nunka. E relato ta konta ku “miéntras ku e [yu arepentí] tabata leu ainda,” e tata a mir’é ta bini; el a kore bai serka dje, bras’é i a pordon’é di kurason. Ora nos lesa e relato ei, e miserikòrdia i kompashon di Yehova ta emoshoná nos. (Luk. 15:​11-32) Asina, Hesus a yuda hende komprondé ken Yehova realmente ta.

10. (a) Kon nos sa ku Hesus a usa su Tata su nòmber i tabata ke pa otro hende hasi meskos? (Marko 5:19) (Wak e plachi.) (b) Kiko Hesus ke pa nos hasi?

¹⁰ Sin duda Hesus tabata ke pa hende usa nòmber di su Tata tambe. Aunke algun lider religioso kisas a pensa ku tabata un falta di rèspèt pa bisa e nòmber di Dios, Hesus no a laga e tradishonnan ei, ku no tabata basá riba Skritura, strob’é di onra nòmber di su Tata. Pensa riba e biaha ku el a kura e hòmber poseí pa demoño den e region di e gerasenonan. E hendenan na e region ei a haña asina tantu miedu ku nan a supliká Hesus pa e bai for di e region, anto el a bai. (Mar. 5:​16, 17) Pero e tabata ke pa e hendenan ei konosé Yehova su nòmber. P’esei, el a  bisa e hòmber ku el a kura pa konta e hendenan, no loke el a hasi, pero loke Yehova a hasi. (Lesa Marko 5:19.) a Hesus ke pa nos tambe hasi Yehova su nòmber konosí rònt mundu! (Mat. 24:14; 28:​19, 20) Ora nos hasi esei, nos ta hasi Hesus, nos Rei, kontentu.

11. Kiko Hesus a siña su siguidónan resa p’e, i segun Ezekiel 36:​23, dikon esei ta importante?

¹¹ Hesus tabata sa ku Yehova su propósito ta pa santifiká Su nòmber, esta, limpi’é di tur reproche. Ta p’esei el a siña su siguidónan pa resa: “Nos Tata ku ta den shelu, bo nòmber sea santifiká.” (Mat. 6:9) Hesus a komprondé ku den henter universo no tin nada mas importante ku esei. (Lesa Ezekiel 36:23.) Di henter kreashon, no tin niun persona ku a hasi mes tantu ku Hesus pa santifiká Yehova su nòmber. Pero, bo por kere ku ora Hesus su enemigunan a arest’é, nan a akus’é di falta nòmber di su Tata rèspèt! Pa Hesus, e pió piká ku un persona por a hasi ta di papia malu òf mancha e nòmber santu di su Tata. Pues, Hesus a sintié hopi malu ora nan a akus’é i deklar’é kulpabel di e krímen ei. Kisas, esei tabata e motibu prinsipal ku e tabata den agonia i a “drenta un ansha” den e oranan promé ku su aresto.—Luk. 22:​41-44.

12. Kiko Hesus tabata dispuesto pa hasi pa santifiká nòmber di su Tata?

¹² Pa santifiká nòmber di su Tata, Hesus tabata dispuesto pa wanta tur sorto di tortura, insulto i mentira. E tabata konvensí ku el a obedesé su Tata den tur kos; e no a hasi nada malu ni no tabatin niun motibu pa e sinti bèrgwensa. (Heb. 12:2) Tambe e tabata sa ku, durante e momentonan difísil ei, Satanas tabata esun ku ta atak’é direktamente. (Luk. 22:​2-4; 23:​33, 34) Satanas tabata ke pa Hesus bira infiel na Yehova. Pero maske kuantu el a purba, e no a logra su meta. Hesus a proba den tur forma ku Satanas ta kruel i un gañadó. Ademas, el a proba ku Yehova tin sirbidó ku ta determiná pa keda fiel asta den e pruebanan di mas difísil.

13. Kon bo por hasi bo Rei Hesus kontentu?

 ¹³ Abo ke hasi bo Rei Hesus kontentu? Si esei ta e kaso, sigui alabá Yehova su nòmber i yuda otro hende konosé ken nos Dios realmente ta. Ora bo hasi esei, bo ta siguiendo Hesus su pasonan. (1 Ped. 2:21) I meskos kuné, lo bo hasi Yehova kontentu i proba ku Su enemigu, Satanas, ta e pió gañadó di henter universo!

NOS TA YUDA SALBA BIDA

14-15. Ki kosnan maravioso ta pasa ora nos siña hende tokante Yehova?

¹⁴ Ora nos ta alabá Yehova su nòmber, nos ta yuda salba bida. Kon asina? Wèl, Satanas “a siega mente di esnan ku no ta kreyente.” (2 Kor. 4:4) P’esei, te ainda hopi hende ta kere su mentiranan i ta pensa ku Dios no ta eksistí, ku e ta leu for di nos i no tin kunes ku nos. Òf nan ta pensa ku Dios ta kruel i ta tortura mal hende pa semper. Satanas a plama tur e mentiranan ei pa daña Yehova su nòmber i reputashon, ya asina niun hende no ke hala serka Yehova. Pero ora nos prediká i siña hende e bèrdat tokante nos Tata, nos ta stroba Satanas di logra su meta, i nos ta alabá e nòmber santu di Yehova. Ku ki resultado?

¹⁵ E bèrdatnan den Beibel tin hopi poder. Ora nos siña hende tokante Yehova i di su maravioso kualidatnan, algu ekstraordinario ta pasa. Segun ku e hendenan ta siña, pokopoko nos ta yuda nan kita e mentiranan ku tin nan siegá, i nan ta kuminsá mira nos Tata mané nos ta mir’é. Nan ta keda impreshoná pa su poder ku no tin límite. (Isa. 40:26) Su hustisia perfekto ta laga nan sinti safe. (Deu. 32:4) Nan ta siña kon profundo su sabiduria ta. (Isa. 55:9; Rom. 11:33) I nan ta sinti un alivio pa siña ku Dios ta amor. (1 Huan 4:8) Segun ku nan ta hala serka Yehova, nan ta konvensé nan mes ku nan por biba pa semper i bira su yu. No ta bèrdat ku ta un onor pa yuda hende hala serka nos Tata? Anto ora nos hasi esei, Yehova ta mira nos komo su “kompañero[nan] di trabou.”—1 Kor. 3:​5, 9.

16. Kon algun hende ta sinti ora nan konosé e nòmber di Dios? Duna algun ehèmpel.

 ¹⁶ Kisas e promé kos ku nos ta siña un hende ta ku Dios su nòmber ta Yehova. Esei riba su mes so por kambia bida di un hende sinsero. Por ehèmpel, un hóben ku yama Aaliyah b no a lanta den un religion kristian. Pero, e no tabata kontentu ku su religion ni tabata sintié serka di Dios. Tur esei a kambia ora el a kuminsá studia ku Testigunan. El a kuminsá mira Dios komo su Amigu. E no por a kere ku hopi Beibel a kita Dios su nòmber i pone djis títulonan manera Señor. Ora Aaliyah a siña konosé Yehova su nòmber, esei a kambia su bida kompletamente. El a bisa: “Mi mihó Amigu tin un nòmber!” El a konta: “Awor mi ta sinti un pas den mi kurason. Mi ta sinti mi masha onrá.” Steve tabata un músiko ku a lanta den un famia ku tabata sigui religion i tradishon hudiu al pie de la letra. Komo ku el a mira asina tantu hipokresia den religion, e no tabata ke forma parti di niun di nan. Pero despues ku su mama a muri, el a bai di akuerdo pa sinta wak kon un estudio di Beibel ku Testigunan di Yehova ta bai. Ora el a bin haña sa e nòmber di Dios, el a sinti un goso inmenso. El a bisa: “Nunka mi no tabata sa e nòmber di Dios.” El a agregá: “Pa promé biaha den mi bida, m’a mira ku Dios ta un persona real! Na e momento ei, m’a realisá ku m’a haña un Amigu.”

17. Dikon bo ke sigui alabá Yehova su nòmber? (Wak e plachi.)

¹⁷ Ora bo ta prediká i siña hende e bèrdat, bo tin kustumber di bisa nan e nòmber di Dios i konta nan di su personalidat? Si bo ta hasi esei, bo ta alabá Dios su nòmber. P’esei, sigui yuda hende mira e sorto di persona ku Yehova ta i asina bo ta alabá su nòmber santu. Lo bo yuda salba bida i sigui e ehèmpel di nos Rei Kristu Hesus. I mas ku tur kos, lo bo hasi nos Tata stimá, Yehova, kontentu. Nos ta deseá pa bo “alabá [su] nòmber pa tur eternidat”!—Sal. 145:2.