1-2. Ngera sebechel ngosukid el mo medengelii a blo lolechesuar er ngii a Jehovah er a lolemall er a ngklel?

 MOLATK er tiang: Chad el betik a rengum er ngii a dmu kmal mekngit el tekoi el kirem. Ke medengei el kmo ngblulak engdi a rebebil oumerang er ngii. E a rullii el lmuut el kmal el mo mekngit a tirka el chad loumerang er ngii a omriid er tia el blulak el kirem me a rebebil a mo oumerang er tir. Ngmo uangerang a feeling er kau? A lsekum ngbetik a rengum er a rechad me a ungil chisem, e tia el otuub ngdiak lulterekokl el tomellii a rengum?—Osi. 22:1.

² Tia el blekeradel a ngosukid el mo medengelii a tekoi el blo lomelechesiu er ngii a Jehovah er a lemetemall a chisel. A ta er a rengelekel er a eanged a dilu blulak el kirel el mora kot el redil. Tia el blulekngel a uchul me a kot el demad me a delad a mlo omtok er a Jehovah. Sei a uchul me a klengit me a kodall a siliseb er a beluulechad. (Gen. 3:​1-6; Rom 5:12) Aike el rokui el mondai el deues er a beluulechad el ua kodall, mekemad, me a chelebuul a ngar ngii le Satan lulemuchel lomerk a blulak er a sers er a Eden. Aika el blulak me a mondai nguchul me a Jehovah melechesuar a ringel? Chochoi! Ngdi Jehovah diak el longemekl a kngtil a rengul e ngbai “dmeu a rengul el Dios.”—1 Ti. 1:​11, NW.

3. Ngera el ileakl el techall a dobang?

³ Ngngar ngii a ileakl el techelled el mesebechakl er a ngklel a Jehovah loeak a doltirakl er tia el tekoi: “Modengesii a ngklel a Jehovah.” (Psa. 113:​1, NW) Kede meruul el uaisei loeak a dolekoi a ungil el kirel Ngike el loba tia el chedaol ngakl. Ke mo  meruul el uaisei? Me dorriter a edei el mesisiich luchul me kede oldanges er a ngklel a Dios. Tia mo ngosukid el mo oba rengud el rokir el loldanges er a ngklel.

KEDE ODEUIR A RENGUL A JEHOVAH SEL DOLDANGES ER A NGKLEL

4. Ngera uchul me a odengesed odeuir a rengul a Jehovah? Momekesiu. (Dirrek el momes er a siasing.)

⁴ Kede odeuir a rengul a Demad el ngar er a eanged sel doldanges er a ngklel. (Psa. 119:​108, NW) Tiang, ngbelkul a kmo a olab a bek el klisiich el Dios a di ua rediak el mecherrungel el chad el soal odanges le ngousbech er kid el lolterekokl er a rengul me a lechub e kede melisiich er ngii? Ngdiak. Molatk er tia el okesiu. A kekerei el ngalek el redil a remurt el mora demal e mechulii e kmo, “Kau ngike el kot el lungil el dad er a beluulechad!” Tia kmal rutechii a rengul a demal. E ngerang? Ngika ngousbech er a ngelekel lolterekokl er a rengul e melisiich er ngii? Ngdiak, ngika bai kmal betik a rengul er a ngelekel e dmeu a rengul er a ngelekel lolecholt er a bltikerreng me a omereng el saul el mo er ngii. Ngmedengei el kmo aika el blekeradel a mo uchul a deuil a rengul a ngelekel sel lorael el mo klou. Aika osisiu luchul me a Jehovah, el ngike el kot el ngarbab el Chedam, a dmeu a rengul sel doldanges er ngii.

5. Sel doldanges er a Jehovah e ngera el tekoi a domeketakl er ngii el kmo ngblulak?

⁵ Sel doldanges er a Demad el ngar er a eanged e kede omeketakl er a blulak el tekoi el kid a uldimukl er ngii. A Satan a dilu el kmo ngdiak a chad el mo mesebechakl er a ngklel a Dios. Ngdmu el kmo ngdiak a chad el mo melemolem loba blakerreng el mora Dios sel measem. Kede rokui el mo obult lomtok er a Dios a lsekum ngngar ngii a klungiaol el bo dengai. (Job 1:​9-11; 2:4) Engdi Job a millemolem el loba blakerreng e mileketeklii el kmo a Satan a bulak. E kau? A derta er kid a ngar ngii a ileakl el techellel el mo dechor el kirel a ngklel a Demad e odeuir a rengul loeak a dolemolem loba blakerreng. (Osi. 27:11) Ngmera el chetengakl el techall a doruul el uaisei.

6. Ngmekera sebeched loukerebai er a King David me a re Levait? (Nehemia 9:5)

⁶ Bltkil a rengrir a remesiungel a Dios el mo er ngii a odbecheterir el mo oldanges er a ngklel el loba rengrir el rokir. A King David a milluches el kmo: “Moldanges er a RUBAK, kaul renguk! Renguk el rokir, modengesii a chedaol ngklel!” (Psa. 103:1) A David a mle medengei el kmo sel doldanges er a ngklel a Jehovah e kede oldanges er ngii. A chisel a Jehovah a uldimukl er a ngklel me sel derengesii a ngklel e ngmekltkid er a rokui el klebokel el blekerdelel me a omerellel. Me a David a mle soal a ngklel  a Jehovah a lolemolem el klikiid e loldanges er ngii. Ngmle soal el meruul el uaisei el oba ‘rengul el rokir.’ Ngdi osisiu a re Levait a mle oked er odanges el mora Jehovah. Te mle ngariou a rengrir el melekoi el kmo a tekoi el lolekoi a diak el sebechel cherrungel lodengesii a chedaol el ngklel a Jehovah el leredemelel. (Monguiu er a Nehemia 9:5.) Aika el odengesir lolechotel a klengariourreng a ulterekokl el mlo uchul a deuil a rengul a Jehovah.

7. Ngmekera sebeched loldanges er a Jehovah sel domerk er a klumech me a chelsel a klengar er kid er a bek el sils?

⁷ Chelecha el taem e ngsebeched lodeuir a rengul a Jehovah loeak sel dongedecheduch el kirel lochotii el kmo ngkmal betik a rengud er ngii e oba omereng el saul el kirel. Sel domerk er a klumech e kede blechoel el melatk el kmo a kot el ngarbab el moktek er kid a olechau er a rechad el mora Jehovah, e mo omes er a betik er a rengud el Demad el ua domes er ngii. (Jak. 4:8) Ngkmal dmeu a rengud el lochotii el mora rechad a rolel e a Biblia ouchais er kid el kirel a Jehovah, e mesaod el kirel a bltikerreng er ngii, llemeltel, llomeserreng er ngii, klisichel, me a lmuut el bebil er a blekerdelel. Kede dirrek el loldanges er a Jehovah e odeuir a rengul loeak sel debora tkurrebab el klisiched el oukerebai er ngii. (Efe. 5:1) Sel doruul el uaisei, e kede mo ngodech er a rechad er tia el mekngit el beluulechad. A rechad a locha mo mtebengii el kmo kede ngodech e locha mo melatk el kmo, ngera uchul me kede ngodech. (Mt. 5:​14-16) Ngar er a omerelled el mo er tir er a bek el sils, e ngsebeched el smodii el mo er tir er a uchul me kede ngodech er a rokui el chad. Tia rulleterir a remera el bliochel a rengrir el mo sorir el mo kmeed er a Dios er kid. Sel doldanges er a Jehovah el ngar er aika el rolel e kede odeuir a rengul.—1 Ti. 2:​3, 4.

KEDE ODEUIR A RENGUL A JESUS SEL DOLDANGES ER A NGKLEL A JEHOVAH

8. Ngera uchul me a Jesus a ngike el kot lungil kerebai er oldanges er a ngklel a Jehovah?

⁸ Ngdiak a chad er a eanged me a beluulechad el medengelii a Jehovah el ua Jesus. (Mt. 11:27) Jesus a kmal betik a rengul er a Demal e ngii ngike el kot lungil kerebai er a oldanges er a ngklel a Jehovah. (Jn. 14:31) Ngar er a nglunguchel el mora Demal er sel kesus er uchei er a lemad e ngsilodii omesiungel er tia el chutem el ngar tia el rolel: “Kmla ochotii a ngklem.” (Jn. 17:​26, BT) Ngera mle belkul a tekingel?

9. Ngmilekera Jesus e ousbech er a okesiu el lochotii el kmo ngkmal uangerang a Demal?

⁹ A Jesus a dimlak di louchais er a rechad el kmo a ngklel a Dios a Jehovah. Rechijudea el lullisechakl el mo er tir a mle medengelii a ngklel a Dios. Engdi Jesus a ngike el kot lungil kerebai er a “ochotii” el kmo ngtecha Dios. (Jn. 1:​17, 18) El ua tiang, aike el Bades el tekoi er a Hebru ouchais el kmo a Jehovah bekokuii e chubechub. (Exo. 34:​5-7) A Jesus ulemeketakl er tia el klemerang er a louchais er a okesiu el kirel a ririid el ngalek me a demal. Sel donguiu el kirel ngika el chedam el “dirk mle cheroid er a blai” a ngelekel el mla obult e ngremurt el mo osiueklii e mechulii e ousubes er ngii el loba rengul el rokir, e kede mo medengelii a delechel a blekokuii me a klechubechub er a Jehovah. (Lk. 15:​11-32) A Jesus ulechotii el kmo ngkmal uangerang a Demal.

10. (a) Kede mekera medengei el kmo a Jesus a uluusbech er a ngklel a Demal e soal a dirrek el dousbech er ngii? (Markus 5:19) (Dirrek el momes er a siasing.) (b) Ngera soal a Jesus el kired er chelecha el taem?

¹⁰ A Jesus, ngmle soal a rechad a lousbech er a ngklel a Demal? Chochoi. A rebebil mengeteklel a klechelid a locha ulemdasu el kmo a ngklel a Dios a kmal chedaol me ngdiak el kired el lousbech er ngii, engdi Jesus a dimlak lebechei aike el osisechakl el diak lemengai er a Biblia  me lolekebai er ngii a mengebkall er a ngklel a Demal. Molatk er sel taem er a lomekungil er a ta el chad er a Gerasa el mle teluchel er a mekngit el chelid. A rechad er tiang a mlo medakt me te ullengit er a Jesus me lorael, me ngtilobed el mo cheroid er a belurir. (Mk. 5:​16, 17) Me nguaisei engdi Jesus a mle soal a rechad er sei a bo lodengelii a ngklel a Jehovah. Me ngdilu er ngika el chad el lulemekungil er ngii me louchais er a rechad er aike el bla leruul a Jehovah, ngdiak el ngii. (Monguiu er a Markus 5:19.) a A Jesus a dirk soal tia el tekoi er chelecha el taem. Ngsoal a beluulechad el rokir a bo lodengelii a ngklel a Demal! (Mt. 24:14; 28:​19, 20) Sel doruul el uaisei e kede odeuir a rengul a King er kid el Jesus.

11. A Jesus ngullisechakl er a rultirakl er ngii el meluluuch el kirel a ngerang, e ngera uchul me tia kmal klou a ultutelel? (Esekiel 36:23)

¹¹ Jesus a mle medengei el kmo, a moktek er a Jehovah a omeketakl a blulak el medung el kirel. Sei a uchul me a Mastang er kid olisechakl er a rultirakl er ngii el mo meluluuch el kmo: “Demmam el ngara eanged, Le mechedaol a ngklem.” (Mt. 6:​9, BT) A Jesus a mle medengei el kmo tiakid sel kot el klou el mondai el lechelebangel er ngii a rokui el bleob. (Monguiu er a Esekiel 36:23.) Ngdiak a anghel me a lechub e ngchad el mla remuul a betok el mo mengedaol er a ngklel a Jehovah el ua Jesus. Me nguaisei engdi sera lebo el kelebus a Jesus, e ngera el klengit a lultelechakl er ngii a recherrouel? Oltuub er a Dios! A Jesus a ulterekokl el mle feel el kmo oltuub er a ngklel a Dios a sel kot el mekngit el klengit. Ngkmal milengesang er ngii a mo motelechakl e mutaut er a llach el kirel tiang. Tiakid a locha sel luchul me “ng kmal mlo chuarm er a ringel” er aike el sikang er a uchei er a lenguu el mo kelebus.—Lk. 22:​41-44.

12. Ngmilekera Jesus e chemedolii a ngklel a Demal el ngar sel kot el ngarbab el rolel?

¹² A Jesus a uluutekangel a rokui el ongarm, otuub, me a blulak el mo er ngii el mengedaol er a ngklel a Demal. Ngmle medengei el kmo ngullengesenges er a Demal er a rokui el tekoi, me ngii a diak a ngerang el lemerur el kirel. (Heb. 12:2) Ngdirrek el mle medengei el kmo a Satan a uleldechelakl er ngii er tia el kmal meringel el taem. (Lk. 22:​2-4; 23:​33, 34) A  Satan a kmal mle soal tomellii a blakerreng er a Jesus engdi ngdimlak el sebechel. A Jesus a mileketeklii el kmo a Satan a bulak. Ngngar ngii a reblak a rengrir el mesiungel a Jehovah el melemolem el loba blakerreng er a chelsel a kmal meringel el omelsemai!

13. Ngmekera omodeuir a rengul a King er kau?

¹³ Kau, ngsoam lodeuir a rengul a King er kau? Molemolem el loldanges er a ngklel a Jehovah, el lolengeseu er a rechad el mo medengelii a Dios er kid el kmo ngmera el uangerang. Sel moruul el uaisei, e ke oltirakl er a kerebil a Jesus. (1 Pe. 2:21) Ngdi ua Jesus, ke oldeu er a rengul a Jehovah e omeketakl el kmo a cherrouel er a Satan a bulak!

KEDE OLENGESEU EL OLSOBEL A KLENGAR SEL DOLDANGES ER A NGKLEL A JEHOVAH

14-15. Ngera el lungil tekoi a sebechel duubech sel dolisechakl er a rechad el kirel a Jehovah?

¹⁴ Sel doldanges er a ngklel a Jehovah e kede olengeseu el lolsobel a klengar. Ngoeak a ngera el rolel? A Satan a “mla chouid a rengrir tirikel diak loumerang.” (2 Ko. 4:​4, BT) Me te oumerang a blulekngel a Satan el ua: Ngdiak a Dios, Dios a cheroid er kid e diak lomekerreu er kid, Dios a mekngit a blekerdelel el Dios el lomekcharm er a remekngit el diak a ulebengelel. A moktek er aika el blulak a: ngmelemall er a ngklel me a chisel a Jehovah me a rechad bo lak el sorir el mo kmeed er ngii. Engdi urered a melemall er tia el moktek er a Satan. Kede olisechakl er a rechad er a klemerang el kirel a Demad, e oldanges er a chedaol el ngklel. Ngera mla duubech?

¹⁵ A klemerang el ngar er a Tekingel a Dios a klou a klisichel. Sel dolisechakl er a rechad el kirel a Jehovah e dochotii el kmo ngmera el uangerang, e kede mesang a mera el ileakl el tekoi. A rechad a mo diak el mecheblad er a blulekngel a Satan e mo mes a klebokel el blekerdelel a Demad. A klisichel a Demad a kmal remutech a rengrir. (Isa. 40:26) A llemeltel olterekokl a rengrir. (Dut. 32:4) A llemesel omekllomes er tir. (Isa. 55:9; Rom 11:33) E mengelaod a rengrir sel lesubii el kmo ngcherrengelel a bltikerreng. (1 Jn. 4:8) Sel lebo el keed er a Jehovah e a omelatk el mo kiei el mo cherechar el ngelekel a mo mera el tekoi er a rengrir. Ngmera el ileakl a techall el dobang el lolengeseu er a rechad el mo kmeed er a Demerir!  Sel doruul el uaisei e a Jehovah omes er kid el “kldemel . . . er a ureor.”—1 Ko. 3:​5, 9.

16. Ngera ngmlo rullii el mora rebebil er a bo lodengelii a ngklel a Dios? Mouchais a bebil er ngii.

¹⁶ A kot e kede locha di mo osisecheklii a chad el kmo a ngklel a Dios a Jehovah. Tiang a kmal klou a sebechel el rullii el mora chad el medemedemek a rengul. El ua tiang, a kekerei el redil el Aaliyah b a mlukeroul er a klechelid el diak el Klekristiano. Engdi ngdimlak el deu a rengul er a klechelid er ngii e dimlak el feel el kmo ngkmeed er a Dios. Tia mlengodech er a lomuchel el mesuub el lobengterir a Resioning. Ngmlo omes er a Dios el Sechelil. E kmal mlo mechas a rengul er a bo lodengei el kmo a ngklel a Dios a bla lotebedii er a oumesingd el Biblia e mla mutechei er a dui el ua Rubak. Ngkmal ngildechii a klengar er ngii er a bo lodengelii a ngklel a Dios. Ngkmo: “A best Friend er ngak a ngar ngii a ngklel!” Ngera dilubech? Ngmelekoi el kmo: “Ngkmal budech a renguk er chelechang. Ngmera el ileakl el tekoi er a renguk.” A chad el Steve a ngklel a mle chad er ongngak e mlukeroul el mesisiich el chad er a klechelid er a Rechijudea. Ngdimlak el soal mo part er a cheldebechel er a klechelid e le ngmiles a betok el cheleblad el remurt er a chelsel. Engdi sera lechuarm er a klengiterreng e ngkilengei el mo teloi er omesubel a Biblia el lulengetmokl er ngii a ta er a Sioning er a Jehovah. Ngkmal rirtechii a rengul er a bo lodengelii a ngklel a Dios. Ngkmo: “Ngdimlak a ta el ksuubii a ngklel a Dios. Ketengek er a klengar er ngak el mo mtebengii el kmo ngmera el ngar ngii a Dios! Ngika mera el chad er a renguk. Ak mlo medengei el kmo ak mla metik er a Sechelik.”

17. Ngera uchul me ke mla rullii er a rengum el mo melemolem el loldanges er a ngklel a Jehovah? (Dirrek el momes er a siasing.)

¹⁷ Sel momerk er a klumech e molisechakl, e kouchais er a rechad el kirel a chedaol el ngakl el Jehovah? Ke olengeseu er tir el mo medengei el kmo a Dios ngmera el uangerang? Sel moruul el uaisei e ke oldanges er a ngklel a Dios. Molemolem el oldanges er a chedaol el ngklel a Jehovah loeak omolengeseu er a rechad el mo medengelii ngike el chad loba tia el ngakl. Sel moruul el uaisei e ke olsobel a klengar. Ke oltirakl er a kerebil a King er kau el Kristus Jesus. E a ngaruchei er ngii ke odeuir a rengul a betik a rengul el Demam el Jehovah. “Moldanges er a ngklel el mo cherechar”!—Psa. 145:​2, NW.