1-2. Waut halpt ons to vestonen, woo Jehowa daut jeit, daut am eenen schlajchten Nomen jemoakt woat?

 STAL die mol väa, doa sajcht wäa, wäm du väl räakjenst, waut sea schlajchtet äwa die. Du weetst, daut et jeloagen es, oba eenje jleewen daut. Un dauts nich aules; dee vetalen daut wieda un väle aundre jleewen daut uk. Woo wudd die daut dan gonen? Wan du om de Menschen waut romjefst un uk doarom, waut du fa eenen Nomen hast, dan woat die daut sea truarich moaken, waut von die oppjeloagen wort (Spr. 22:1).

² Derch dit Biespel kjenn wie vestonen, woo Jehowa daut jinkj, aus am eenen schlajchten Nomen jemoakt wort. Eent von siene Enjel vetald de ieeschte Fru, Eva, Läajes äwa am. Eva jleewd dise Läajes. Doawäajen stalden dee un Adam sikj beid jäajen Jehowa. Doaderch haben wie aula de Sind un dän Doot metjeorwen (1. Mo. 3:1-6; Reem. 5:12). Aul de Trubbels, dee wie vondoag dän Dach seenen – soo aus de Doot, Kjrich ooda Lieden – jeft daut wäajen de Läajes, waut de Soton em Goaden Eden vetald. Moakt Jehowa daut waut ut, daut de Soton Läajes äwa am vetald un de Trubbels, waut daut jebrocht haft? Gaunz secha. Oba Jehowa es nich vebettat. Enne Städ daut es hee doawäajen noch de schaftja Gott (1. Tim. 1:11, NW).

3. Waut vonne Iea hab wie?

³ Daut es eene Iea, daut wie bewiesen kjennen, daut et jeloagen es, waut de Soton äwa Jehowa säd. Daut kjenn wie doaderch, daut wie dit eefache Jeboot nokomen: “Loft däm HARN sienen Nomen” (Psa. 113:1). Wie lowen Jehowa sienen Nomen doaderch, daut wie aundre de Woarheit äwa am lieren. Woascht du daut uk doonen? Räd wie mol von dreeatlei, waut ons bat doa brinjen woat, Gott sienen Nomen von gaunzen Hoaten to lowen.

 JEHOWA JLEICHT DAUT, WAN WIE SIENEN NOMEN LOWEN

4. Wuarom jefelt Jehowa daut, wan wie am lowen? Met waut jeit daut to vejlikjen? (See uk daut Bilt.)

⁴ Ons himlischa Voda jleicht daut, wan wie sienen Nomen lowen (Psa. 119:108). Bediet daut, daut hee soo es aus een onvolkomna Mensch, waut sikj onsecha feelt un dän daut doaraun fält, daut aundre am lowen? Nä. See wie mol een Jlikjnis. Een kjlienet Mejalkje pakt äare Pape om un sajcht: “Du best de baste Pape oppe gaunze Welt!” De Voda kjikjt schaftich un am jeit daut sea to Hoaten. Oba wudd wie denkjen, daut es wäajen dee sikj onsecha feelt un am daut fält, daut sien Kjint am loft? Nä. Enne Städ daut es daut wäajen de Pape siene Dochta leeft un es schaftich, daut see am Leew wiest un am dankboa es. Hee weet, daut soone Ieejenschoften ar halpen woaren, schaftich to sennen, wan see ieescht jrata es. Krakjt wäajen soo waut aus dit, jefelt onsen himlischen Voda daut uk, wan wie am lowen.

5. (a) Waut fa Läajes säd de Soton äwa ons? (b) Woo wies wie, daut et nich soo es?

⁵ Wan wie onsen himlischen Voda lowen, dan wies wie doamet, daut et nich soo es, waut de Soton äwa jiedrem eenen von ons säd. Hee säd, daut kjeen Mensch fa Jehowa sienen Nomen faust enstonen wudd, un daut kjeena von ons Jehowa tru bliewen wudd, wan wie aufjeprooft worden. Hee säd, daut wie ons aula wudden von Jehowa wajchdreien, wan wie dochten, ons wudd daut bäta utkomen (Hiob 1:9-11; 2:4). Oba Hiob bleef Gott tru un wees doaderch, daut de Soton een Läajna wia. Woascht du dautselwje doonen? Jieda eena von ons haft de Iea, fa Jehowa sienen Nomen entostonen un am schaftich to moaken, doaderch daut wie am tru deenen (Spr. 27:11). Dit to doonen, es fa ons werkjlich eene groote Iea.

6. Woo kjenn wie dän Kjennich David un de Leviten nodoonen? (Nehemia 9:5).

⁶ Dee, waut Gott leewen, lowen sienen Nomen von Hoaten. De Kjennich David schreef: “Low dän HARN, oo miene Seel, un met aulem waut ekj sie, low sienen heiljen Nomen” (Psa. 103:1). David kunn vestonen, daut wan wie Jehowa sienen Nomen lowen, dan low wie am selfst. Wan wie Jehowa sienen Nomen hieren, dan denkj wie aun siene goode Ieejenschoften un aun aul daut goode, waut hee deit, un woo hee es. David wull sienen himlischen Voda sienen Nomen heilich hoolen un lowen. Hee wull daut met sien gaunzet Hoat doonen. Krakjt soo wia daut uk met de Leviten, waut een Väabilt doarenn wieren, Jehowa to lowen. Dee stunden deemootich too, daut see Jehowa sienen Nomen nich kunnen  dee Iea jäwen, waut dän traft (läs Nehemia 9:5). Jehowa muak daut secha froo, daut dee soo deemootich wieren un sienen Nomen von Hoaten lowden.

7. Woo kjenn wie Jehowa em Prädichtdeenst lowen un uk, wan wie met de Menschen em auljemeenen toop sent?

⁷ Vondoag dän Dach kjenn wie Jehowa froo moaken, wan wie soo von am räden, daut et wiest, daut wie dankboa sent un am sea leewen. Wan wie prädjen, dan es daut fa ons daut wichtichste, daut wie aundre halpen, Jehowa noda to komen un am uk soo to leewen aus wie (Jak. 4:8). Wie freien ons, wan wie aundre met de Schreft wiesen kjennen, woo Jehowa es – biejlikj daut hee leeftolich, jerajcht un weis es, un väl Macht un uk aundre goode Ieejenschoften haft. Wie lowen Jehowa uk un moaken am schaftich, wan wie ons aunstrenjen am notodoonen (Efs. 5:1). Wan wie dit doonen, dan tieekjen wie ut en dise schlajchte Welt. De Menschen seenen daut, daut wie aundasch sent, un wundren veleicht, wuarom daut soo es (Mat. 5:14-16). Wan wie em auljemeenen met dee toop sennen, kjenn wie dee daut veleicht sajen, wuarom wie ons soo vehoolen. Doaderch kjennen soone, waut deemootich sent, Gott noda komen. Wan wie Jehowa en dise Stekjen lowen, dan freit hee sikj sea (1. Tim. 2:3-4).

JESUS JLEICHT DAUT, WAN WIE JEHOWA SIENEN NOMEN LOWEN

8. Wuarom es Jesus daut baste Biespel en Jehowa sienen Nomen lowen?

⁸ Kjeena em Himmel ooda oppe Ieed kjant Jehowa bäta aus Jesus (Mat. 11:27). Wäajen Jesus sienen Voda leeft, es hee noch emma daut dolste doarom to doonen jewast, Jehowa sienen Nomen to lowen (Joh. 14:31). Dee Nacht, ea Jesus storf, bäd hee to sienen Voda un säd, waut de wichtichste Sach en sienen Deenst oppe Ieed jewast wia. Hee säd: “Ekj hab dienen Nomen bekauntjemoakt” (Joh. 17:26). Woo deed hee daut?

9. Waut von Jlikjnis brukt Jesus, om daut soo kloa to moaken aus daut jinkj, woo sien Voda werkjlich wia?

⁹ Jesus deed noch mea, aus bloos de Menschen daut sajen, daut Gott sienen Nomen Jehowa es. De Juden, dee Jesus lieed, wisten Gott sienen Nomen aul. Oba Jesus wia deejanja, “dee [äant] daut utjelajcht haft, woo de Voda es” (Joh. 1:17-18). Biejlikj sajcht daut en de Hebräische Schreften, daut Jehowa voll Jnod un Metleet es (2. Mo. 34:5-7). Jesus muak dise Lia soo kloa aus noch kjeenmol ea, aus hee daut Jlikjnis von dän veloarnen Sän un sien Voda vetald. Wan wie daut läsen, woo de Voda sienen Sän, waut eenen Leetsennen haud, von “een langet Enj auf” sach un am entjäajen rand, am ompakt un am von Hoaten vejeef, see wie noch dietelja, woo väl Jnod un Metleet Jehowa haft (Luk. 15:11-32). Jesus muak gaunz dietlich, woo sien Voda werkjlich wia.

10. (a) Woo weet wie, daut Jesus sienen Voda sienen Nomen brukt un daut hee haben wull, daut de Menschen daut don uk sullen? (Mar. 5:19). (See uk daut Bilt.) (b) Waut well Jesus, daut wie vondoag dän Dach doonen sellen?

¹⁰ Wull Jesus uk, daut aundre Menschen sienen Voda sienen Nomen brukten? Gaunz secha. Eenje Gloowesleidasch ieeschtemma jleewden, daut Gott sien Nomen too heilich wia toom sajen. Jesus wudd daut kjeenmol jeloten haben, daut soone Jewanheiten, waut sikj nich opp de Schreft stetten, am doavon aufhoolen kunnen, sienen Voda sienen Nomen to ieren. Räd wie mol doavon, aus Jesus dän Maun von de Gerasena-Jäajent troff, waut von beese Jeista besäten wia, un dän doa heeld. De Menschen wort angst un dee prachaden Jesus, äare Jäajent to veloten, un doawäajen veleet hee (Mar. 5:16-17). Oba Jesus wull  Jehowa sienen Nomen doa bekauntmoaken. Doawäajen säd Jesus to dän Maun, dän hee jeheelt haud, daut hee de Menschen nich sajen sull, waut Jesus jedonen haud, oba waut Jehowa jedonen haud (läs Markus 5:19). a Krakjt soo well Jesus vondoag dän Dach uk, daut wie sienen Voda sienen Nomen äwa de gaunze Welt bekauntmoaken! (Mat. 24:14; 28:19-20). Wan wie daut doonen, dan doo wie daut, waut onsen Kjennich Jesus jefelt.

11. (a) Waut lieed Jesus siene Nofolja to bäden? (b) Wuarom es daut no Hesekiel 36:23 no wichtich?

¹¹ Jesus wist, daut et Jehowa sien Väanämen wia, daut sien Nomen jeheilicht wort – daut meent, von aule Läajes friejemoakt woat. Daut es, wuarom Jesus siene Nofolja lieed, soo aus dit to bäden: “Ons Voda em Himmel, lot dienen Nomen jeheilicht woaren” (Mat. 6:9). Jesus kunn vestonen, daut dit de wichtichste Sach wia fa aule em Himmel un uk oppe Ieed (läs Hesekiel 36:23). Kjeena em Himmel ooda oppe Ieed haft jeemols mea jedonen toom Jehowa sienen Nomen heiljen aus Jesus. Oba aus hee faustjenomen wort, beschuljden siene Fiend am doamet, daut hee jäajen sienen Voda sienen heiljen Nomen jelastat haud. Hee woat secha jedocht haben, daut dit de jratste Sind wia, waut eena jeemols moaken kunn. Hee wia secha sea besorcht doaräwa, daut se am met dit beschuljen wudden un uk sajen, daut hee daut jedonen haud. Dauts woomäajlich de jratste Uasoak, wuarom Jesus “en soone groote Noot” wia, jroz ea dee am faustneemen (Luk. 22:41-44).

12. Woo deed Jesus sienen Voda sienen Nomen oppe baste Wajch heilich hoolen?

¹² Wäajen Jesus sienen Voda sienen Nomen heilich hoolen wull, wort am schlajcht behaundelt un utjeflieekjt un äwa am worden Läajes vetalt. Wäajen hee daut wist, daut hee sienen Voda en aules wia jehuarsom jewast, durf hee sikj fa nuscht schämen (Heb. 12:2, NW). Hee wist uk, daut de Soton am en dise schwoare Tiet aunjriepen deed (Luk. 22:2-4; 23:33-34). De Soton wull sea jieren haben, daut Jesus sull ontru woaren; oba daut kjeem sea lang nich bat doa! Jesus bewees gaunz kloa, daut de Soton een Läajna wia un daut Jehowa true Deena haud, waut am tru bleewen, wan dee uk sea aufjeprooft worden!

13. Woo kaust du daut doonen, waut dien Kjennich jleicht?

 ¹³ West du daut doonen, waut dien Kjennich jleicht? Dan doo wieda Jehowa sienen Nomen lowen un halp aundre, Gott kjanen to lieren, soo aus hee es. Wan du daut deist, dan jeist du en Jesus siene Footspoaren (1. Pet. 2:21). Krakjt soo aus Jesus woascht du Jehowa dan uk schaftich moaken un daut kloa bewiesen, daut de Soton een groota Läajna es!

WAN WIE JEHOWA SIENEN NOMEN LOWEN, DAN HALP WIE MET, LÄWES TO RADEN

14-15. Waut fa wundascheenet kjenn wie seenen, wan wie aundre äwa Jehowa lieren?

¹⁴ Wan wie Jehowa sienen Nomen lowen, dan halp wie met, Läwes to raden. Woo krakjt? Na, de Soton haft de Menschen “met Blintheit jeschloagen” (2. Kor. 4:4). Doawäajen jleewen väle soone beese Läajes aus dit: “Daut jeft nich eenen Gott; Gott es wiet auf von de Menschen un jeft nuscht om dee rom; Gott es grausom un deit soone fa emma kjwälen, waut schlajchtet doonen”. De Soton sajcht aul dise Läajes toom Jehowa eenen schlajchten Nomen moaken un daut de Menschen am nich wellen noda komen. Oba wiels wie prädjen, kaun de Soton daut nich volbrinjen, waut hee sikj äwajetalt haft. Wie lieren aundre de Woarheit äwa onsen himlischen Voda un lowen dän sienen Nomen. Woo kjemt daut ut?

¹⁵ De Lieren ut Gott sien Wuat haben eene groote Krauft. Wan wie aundre äwa Jehowa lieren un woo hee es, dan kjenn wie waut wundascheenet seenen. De Soton kaun de Menschen dan nich mea met siene Läajes blint hoolen, un dee fangen aun, Jehowa siene feine Ieejenschoften to seenen. Dee wundren sikj äwa Jehowa siene Krauft, waut kjeen Enj haft (Jes. 40:26). Dee lieren, opp am to vetruen, wiels hee volkomen jerajcht es (5. Mo. 32:4). Dee lieren sea väl von siene Weisheit (Jes. 55:9; Reem. 11:33). Un wan dee daut enwoaren, daut Jehowa Leew es, dan kjrieen dee doaderch Troost (1. Joh. 4:8, NW). Wiels dee Jehowa emma noda komen, woaren dee sikj sechra, daut dee noch mol woaren fa emma läwen kjennen un siene Kjinja sennen. Dauts werkjlich eene groote Iea, daut wie aundre halpen kjennen, Frind met äaren himlischen Voda to woaren! Wan wie daut doonen, dan talt Jehowa ons fa “siene Metoabeida” (1. Kor. 3:5, 9).

16. Waut deit daut aun eenje, Gott sienen Nomen to lieren? Jeff een Biespel.

 ¹⁶ Aum Aunfank lia wie de Menschen veleicht bloos, daut Gott sien Nomen Jehowa es. Oba daut auleen kaun väl aun wäm doonen, dee opprechtich es. See wie mol een Biespel. Eene junge Fru, waut Aaliyah b heet, wort en eene Famielje oppjetrocken, wua se nich aun de Bibel jleewden. See wia nich met äare Jemeent tofräd un feeld sikj uk nich met Gott vebungen. Oba aus Jehowa siene Zeijen aunfungen, met ar de Schreft to studieren, endad sikj daut. See funk aun, Gott aus äaren Frint to seenen. Un see wia äwarauscht, aus see daut enwort, daut se Gott sienen Nomen ut väle Biblen rutjenomen haben un doa aundre Tietels nennjesat haben soo aus Har. Jehowa sienen Nomen to weeten, endad äa Läwen. See säd gaunz äwazeicht: “Mien basta Frint haft eenen Nomen!” Waut deed daut aun ar? See säd: “Ekj hab nu ennalich Fräd un ekj tal daut aus een Väarajcht, daut ekj kaun Jehowa sienen Nomen weeten.” Een Maun, waut Steve heet un waut Musikj moaken deed, wia en eenen ajchten Judengloowen oppjewossen. Wäajen hee soo väl Heichlarie jeseenen haud, wull hee nuscht met irjenteene Jemeent to doonen haben. Oba aus siene Mutta storf, wia hee doamet envestonen, bie eenen aundren sien Bibelstudium met bie to sennen, waut Jehowa siene Zeijen fieren deeden. Doa lieed hee Gott sienen Nomen un daut jinkj am sea to Hoaten. Hee säd: “Ekj haud kjeenmol Gott sienen Nomen jelieet.” Un hee säd noch: “Toom ieeschte mol wort ekj daut en, daut et Gott werkjlich jeef! Ekj kunn mie daut nu mol väastalen, woo hee es. Un ekj wist, ekj haud eenen Frint jefungen.”

17. Wuarom best du die eenich, wieda Jehowa sienen Nomen to lowen? (See uk daut Bilt.)

¹⁷ Brukst du Jehowa sienen heiljen Nomen, wan du aundre prädjen un lieren deist? Halpst du dee, Gott soo to seenen, aus hee werkjlich es? Wan du daut deist, dan deist du doaderch Gott sienen Nomen lowen. Muchst du wieda Jehowa sienen heiljen Nomen lowen, doaderch daut du aundre halpst to vestonen, woo Gott werkjlich es. Opp dee Wajch woascht du Läwes raden. Du woascht en dienen Kjennich Jesus siene Footspoaren gonen. Un daut wichtichste es, daut du dienen leeftoljen Voda woascht froo moaken. Muchst du wieda “emma un eewich . . . [sienen] Nomen lowen”! (Psa. 145:2).