1-2. Ko ni chani chomwe chitithandiza kubvesa momwe Yahova adabvera pomwe adanamiziriwa bodza?

 GANIZIRANI chochitika ichi: Munthu yemwe imwepo muchamukonda wakuyankhulirani vinthu voipa, koma imwepo munkudziwa kuti imweyo ni bodza. Koma anango ankukhulupirira ndipo kuti viyipiretu iye ankufalisa nkhani mweyo ndipo wanthu azinji ankukhulupirirambo. Ko mungadzibve tani? Peno munthu moyu ni wodekana kwa imwepo ndipo peno muchalemekeza mbiri yanu, imwepo mudzakhumudwe navo maninge vimwevo, nteno lini?—Miy. 22:1.

² Nkhani mweyi itithandize kubvesa momwe Yahova adabvera pomwe mbiri yake idapsipiziwa. M’bodzi mwa wana wake wauzimu adanena bodza kwa nkazi woyambirira, Hava. Ndipo iye adakhulupirira bodza mweyi. Ndawa ya bodza mweyi, azibereki wathu wakuyamba adaleka kubvera Yahova. Koma vomwe vidachitika ni vakuti uchimo na impfa, vidafalikira kwa wanthu ose. (Gen. 3:1-6; Aro. 5:12) Mabvuto yose yomwe isepano tichayawona ntsiku zino ninge nkhondo, impfa na mabvuto yanango, yadabwera ndawa ya bodza yomwe Satana adanena m’munda wa Edeni. Ko Yahova achabva tani akawona mabvuto yose yomwe yachachitika ndawa ya bodza mweyi? Shuwadi, vimwevi vimuwawa maninge Yahova. Olo viri tene Yahova alibe kukhala Mulungu wakhanza. Kunena shuwa, Yahova ankupitiriza kukhala ‘Mulungu wokondwa.’—1 Tim. 1:11.

3. Ko ni mwayi uponi womwe isepano tinawo?

³ Isepano tinamwayi ukulu wowonesa kuti Satana adanama pakupsipiza dzina ya Yahova tikambatewedzera lamulo yosashupa iyi: ‘Lemekezani dzina ya Yahova.’ (Sal. 113:1) Isepano tichachita vimwevi pakuyankhula vinthu vabwino kwa munthu yemwe achadziwika na dzina mweyi. Ko imwepo ndimwe okonzeka kuchita vimwevi? Naboni tikambirane vifukwa vitatu vomwe vitithandize kulemekeza dzina ya Mulungu na ntima wose.

 YAHOVA AKHALA WOKONDWA TIKAMBALEMEKEZA DZINA YAKE

4. Ndawa chani Yahova akhala wokondwa tikambamulemekeza? Fotokozani. (Onani pomwe foto)

⁴ Ababa wathu wakudzulu akhala wokondwa maninge tikambalemekeza dzina yake. (Sal. 119:108) Wanthu anango ni osowa ndipo adzibva kuti ni osatetezeka. Ndipo afuna kuti wanthu anango ambawatembeje. Ko Mulungu ali tene uyu? Neye. Ganizirani chitsanzo ichi. Kantsikana kankukumbatira ababa wake nkuwauza kuti: “Imwepo ndimwe ababa wabwino maninge pa dziko yose yapasi.” M’bereki moyu angakhale wokondwa maninge ndawa ya vomwe mwana wake wanena. Ko ndawa chani? Ko baba moyu ni wosowa panango wosatetezeka yemwe athemba kutembejewa na mwana wake? Neye. Mosiyana na vimwevi iye adziwa kuti ni baba wachikondi komasoti wabwino maninge. Koma akhala wokondwa ndawa yakuti mwana wake wamuwonesa chikondi komasoti kumutembeja. Iye adziwapomwe kuti khalidwe mweyi ni yabwino maninge yomwe idzathandize mwana wake akadzakula. Mobverana na vimwevi, Ababa wathu Yahova akhala wokondwa tikambamulemekeza.

5. Tikambalemekeza Yahova, ko tithandizira kutsutsa bodza iponi?

⁵ Tikambalemekeza Yahova isepano tithandizambo kuonesa kuti Satana adanama. Ko ndawa chani? Ndawa yakuti iye adanena kuti palibe munthu aliyese yemwe angakwanise kukhala wokhulupirika kwa Yahova na kuteteza dzina yake. Satana adanena pomwe kuti palibe munthu yemwe angayesewe koma nkupitiriza kukhala wokhulupirika kwa Yahova. Iye adatsimikizira pomwe kuti tose isepano tingaleke kutumikira Yahova munthu akatipasa chinthu chabwino maninge. (Yobu 1:9-11; 2:4) Koma munthu wokhulupirika Yobu adawonesa kuti Satana ambanama. Manje ntsiku zino munthu aliyese anamwayi wothandizira basa yochenesa dzina ya Yahova na kumutumikira. (Miy. 27:11) Umoyu ni mwayi ukulu maninge.

6. Ko tingatewedzere tani Mpfumu Davide na Alevi? (Nehemiya 9:5)

⁶ Kukonda dzina ya Mulungu kuchitisa kuti wanthu okhulupirika ambafune kumulemekeza. Mpfumu Davide adanemba kuti: ‘Moyo wangu ulemekeze Yahova na vose vomwe ninavo vilemekeze dzina yanu yochena.’ (Sal. 103:1) Davide adabvesa kuti kulemekeza dzina ya Yahova ni kulemekeza Yahova chaiye. Dzina ya Yahova inkuphatanidzapo mbiri yake. Vimwevi vitikumbusa makhalidwe yabwino yomwe iye anayo na vinthu vabwino vomwe iye anchita. Davide ambafuna kulemekeza dzina ya Ababa wake ndawa yakuti iye ni wochena. Davide ambafuna kuchita vimwevi na ‘vose vomwe wenze navo.’ Mwevi vinkutanthauza na moyo wake wose. Mwanjira ibodzibodzi mweyi Alevi wenze patsogolo pa nkhani  yolemekeza Yahova. Iwo adabvuma modzichepesa kuti mawu yawo yenze yosakwanira pakupereka ulemu womwe dzina ya Yahova imbadekana. (Werengani Nehemiya 9:5.) Mosakayika kudzichepesa kumoku kudakondweresa maninge ntima wa Yahova.

7. Ko tingalemekeze tani Yahova mu umboni komasoti ntsiku na ntsiku?

⁷ Ntsiku zino isembo tingamulemekeze Yahova tikambalewa va iye mwaulemu na mwachikondi. Tikakhala mu umboni, tichadekana kukumbukira kuti cholinga chathu chikulu ni kuthandiza wanthu kumufenderera Yahova na kuwathandiza kuti ambamuwone ninge Baba wachikondi. (Yak. 4:8) Kwa isepano ni mwayi ukulu maninge kuwonesa wanthu kuti Yahova ni Mulungu wachikondi, wachilungamo, wanzeru, wamphanvu komasoti nakuti iye anamakhalidwe yanango yabwino maninge. Njira inango yomwe tingamulemekezere Yahova ni kuchita vose vomwe tingakwanise kuti timbamutewedzere. (Aef. 5:1) Tikambachita mwevi, wanthu anango adzawone kuti ndise osiyana maninge na wanthu azinji wa m’dziko iyi. (Mat. 5:14-16) Pomwe tinkukhala nawo ntsiku na ntsiku, tikhala na mwayi wakuwafotokozera kuti ndawa chani ndise osiyana na wanthu anango, ndipo mwanjira mweyi isepano tingalemekeze dzina ya Yahova. Phindu yake ni yakuti wanthu azinji omwe anantima wabwino, angachite chidwi na kufuna kuyamba kupfunzira vizinji va Yahova Mulungu wathu. Tikambalemekeza Yahova mwanjira mweyi iye akhala wokondwa maninge.—1 Tim. 2:3, 4.

ISEPANO TIKONDWERESA YESU TIKAMBALEMEKEZA DZINA YA YAHOVA

8. Ko Yesu adayambisa tani kulemekeza Yahova?

⁸ Pa volengewa vose vanzeru va kudzulu na dziko yapasi, palibe yemwe amudziwa bwinobwino Yahova kuposha Yesu. (Mat. 11:27) Yesu akonda maninge Ababa wake ndipo ayesesa kuti nthawe zose ambamulemekeze. (Yoh. 14:31) M’phemphero yake inango Yesu alipafupi kuphewa, iye adafotokoza mwachigwato va utumiki wake alipano pa dziko ya pasi pakulewa kuti: ‘Inepano nachitisa kuti adziwe dzina yanu.’ (Yoh. 17:26) Ko iye ambatanthauza chani?

9. Ko ni chitsanzo chiponi chomwe Yesu adachifotokoza kuti tikwanise kubvesa momwe Yahova aliri?

⁹ Yesu adachita vinthu vizinji maninge osati kundouza wanthu kuti dzina ya Mulungu ni Yahova. Ayuda omwe ambayankhula na Yesu, ambayidziwa kale dzina ya Mulungu. Koma Yesu . . . ‘adayidziwikisa.’ (Yoh. 1:17, 18) Mwakulinganiza, Baibolo ya Chiheberi inena kuti Yahova ni wachifundo na wokoma ntima. (Eks. 34:5-7) Yesu adafotokoza bwinobwino vimwevi pa fanizo ya mwana wolowerera. Isepano tikambawerenga pomwe baba adaona mwana wake ‘na patali,’ nkuthamanga kukamukumbatira na kumukhululukira na ntima wose, tikwanisa kubvesa bwinobwino va chikondi na chifundo cha Yahova. (Luka 15:11-32) Yesu adatiwonesa momwe Ababa wake aliri.

10. (a) Ko tinkudziwa tani kuti Yesu ambaphatisira basa dzina ya Ababa wake nakuti ambafunambo kuti wanthu anango ambayiphatisembo basa? (Maliko 5:19) (Onani pomwe foto) (b) Ko Yesu ankufuna kuti timbachite chani ntsiku zino?

¹⁰ Ko Yesu ambafunambo kuti wanthu ambaphatise basa dzina ya Ababa wake? Inde. Akuluakulu anango wa vipembedzo ambakhulupirira kuti kuphatisa basa dzina ya Mulungu ni kusowa ulemu. Koma Yesu alibe kubvuma kuti chipfunziso chimwechi chomwe chilibe kuchokera m’Malemba chimukangise kulemekeza dzina ya Ababa wake. Pa nthawe inango Yesu adapolesa mwamuna munango yemwe wenze na viwanda yemwe ambakhala mudera ya Agerasa. Wanthu adachita mantha maninge na Yesu ndipo adamukumbira kuti achoke mu dera yawo. (Maliko 5:16, 17) Podiya venze  tene Yesu ambafuna kuti wanthu wa mʼdera mwaire adziwe dzina ya Mulungu, ndipomwapa iye adauza mwamuna ule yemwe adamuchirisa kuti aleke kukanena vomwe Yesu wachita koma akanene vomwe Yahova wamuchitira. (Werengani Maliko 5:19.) a Yesu ankufuna kuti dzina ya Ababa wake idziwike padziko yose yapasi! (Mat. 24:14; 28:19, 20) Tikachita vomwe tingakwanise pa mbali mweyi, tikondweresa Mpfumu yathu Yesu Khrisitu.

11. Ko Yesu adapfunzisa ateweri wake kumbapempherera va chani ndipo ndawa chani mwevi ni vodekana? (Ezekieli 36:23)

¹¹ Yesu ambadziwa kuti cholinga cha Yahova ni kuchenesa dzina yake na kutsutsa bodza yomwe Satana adamunamizira. Ndipomwapa iye adapfunzisa ateweri wake kuti ambapemphere tene: “Ababa wanthu wakudzulu, dzina yanu ichenesewe.” (Mat. 6:9) Yesu ambadziwa kuti nkhani mweyi imbakhudza volengewa vose. (Werengani Ezekieli 36:23.) Palibe cholengewa chilichose chomwe chidakwanisa kuchenesa dzina ya Yahova kuposha Yesu. Koma pomwe Yesu adamangiwa, ko azondi wake adamuyimba mulandu uponi? Wamwano. Ni shuwadi, Yesu ambadziwa kuti kuphatisa basa mophonyeka panango kunyozesa dzina ya Yahova ni chimo ikulu maninge yomwe munthu angachite. Kuyimbiwa mulandu moyu na kunyozewa ndawa yakuti ni wamwano, vidamuwawa maninge Yesu. Vingachitike kuti chimwechi chenze chifukwa chikulu maninge chomwe chimbachitisa kuti Yesu ambakhale ‘wokhumudwa’ ali pafupi kumangiwa.—Luka 22:41-44.

12. Ko Yesu adachenesa tani dzina ya Ababa wake?

¹² Kuti achenese dzina ya Ababa wake, Yesu adadzudziwa, kunyozewa na kunamiziriwa mabodza. Koma iye ambadziwa kuti wenze adabvera Ababa wake pa vinthu vose ndipo wenze alibe chifukwa chochitira manyazi. (Aheb. 12:2) Iye ambadziwa kuti Satana ambamuukira mwasitiriti pa nthawe mweyire. (Luka 22:2-4; 23:33, 34) Satana ambafuna kuchita vose vomwe angakwanise kuti amukangise Yesu kukhala wokhulupirika. Koma Satana alibe kukwanisa. Yesu, adaonesa kuti Satana ni wabodza nakuti Yahova ana atumiki okhulupirika omwe apitiriza kumutumikira podiya pomwe ankugumana na mabvuto yoshupa maninge.

13. Ko imwepo mungakondwerese tani Mpfumu yanu Yesu Khrisitu?

¹³ Ko imwepo munkufuna kuti mumbakondwerese  Mpfumu yanu Yesu? Pitirizani kuchenesa dzina ya Yahova pakuthandiza wanthu anango kudziwa makhalidwe ya Mulungu wathu. Imwepo mukambachita mwevi munkutewedzera chitsanzo cha Mpfumu yathu Yesu. (1 Pet. 2:21) Ninge Yesu, imwepo munkuchitisa Yahova kukhala wokondwa ndipo munkuwonesambo kuti mʼzondi wanu Satana ni wabodza.

TITHANDIZA KUPULUMUSA WANTHU TIKAMBALEMEKEZA DZINA YA YAHOVA

14-15. Ko ni chinthu chiponi chodabwisa chomwe chingachitike tikambapfunzisa anango va Yahova?

¹⁴ Tikambalemekeza dzina ya Yahova tithandiza kupulumusa wanthu. Ko tichita tani vimwevi? Satana ‘adafunga maso ya wathu osakhulupirira.’ (2 Akor. 4:4) Wanthu mwawa achakhulupirira mabodza ya Satana ninge aya: Mulungu kulibe, Mulungu alikutali maninge na isepano ndipo iye alibe basa na wanthu. Mulungu ni wakhanza ndipo iye adzudza wanthu ochimwa ku moto. Satana anena mabodza yose mwaya ndawa yakuti iye ankufuna kupsipiza dzina ya Yahova na kukangisa wanthu kuti amufenderere Yahova. Koma isepano tikambalalikira tikangisa Satana kuchita vimwevi. Nthawe zose tipfunzisa wanthu va chonadi cha Ababa wathu Yahova na kulemekeza dzina yopatulika ya Mulungu wathu. Ko phindu yake ni chani?

¹⁵ Mawu ya chonadi cha Mulungu ni yamphanvu. Isepano tikambapfunzisa wanthu va Yahova na momwe iye aliri, tiwona chinthu chodabwisa maninge. Khungu yomwe Satana wayikha m’maso mwa wanthu ichoka ndipo iwo ayamba kuwona makhalidwe yabwino ya Ababa wathu. Iwo achita chidwi na mphanvu zomwe zilibe malire za Yahova. (Yes. 40:26) Iwo achapfunzira kumuthemba ndawa ya chilungamo chake cha ungwiro. (Deut. 32:4) Iwo achapfunzira vizinji ndawa ya nzeru zake. (Yes. 55:9; Aro. 11:33) Ndipo achanyamalisiwa akapfunzira kuti Yahova ni chikondi. (1 Yoh. 4:8) Akambamufenderera Yahova, chidikhiro chawo chodzakhala na moyo mpaka kalekale chikhala chaicho. Nimwayi ukulu maninge womwe isepano tinawo wothandiza wanthu kumufenderera Yahova. Tikambachita vimwevi, Yahova atiwona ninge ‘anyabasa anzake.’—1 Akor. 3:5, 9.

16. Ko wanthu angabve tani akapfunzira va dzina ya Mulungu? Perekani chitsanzo.

 ¹⁶ Chinthu chakuyamba chomwe tipfunzisa wanthu ni chakuti dzina ya Mulungu ni Yahova. Mwevi vingakhudze maninge munthu yemwe anantima wabwino. Mwakulinganiza, ntsikana munango dzina yake Aaliyah b adakulira mu chipembedzo chomwe ni cha Chikhrisitulini. Koma iye ambakondwalini na chipembedzo chake. Ndipo ambadzibvalini kuti alipafupi na Mulungu. Mwevi vidachinja pomwe iye adayamba kupfunzira na wa Mboni za Yahova. Iye adayamba kuwona Mulungu ninge shamwali wake. Iye adadabwa pomwe adapfunzira kuti dzina ya Mulungu idachosewa mu ma Baibolo yanango nkuyikha madzina ya udindo ninge yakuti ambuya. Kudziwa dzina ya Yahova kudachinja moyo wake. Iye adanena kuti: “Shamwali wangu wapantima anadzina!” Ko chidachitika ni chani? Iye adanena kuti: “Inepano ni na ntendere ukulu maninge manjeuno mu ntima mwangu ndipo nidzibva wolemekezeka maninge.” Mwamuna munango dzina yake Steve wenze woyimba. Iye adakulira mu chipembedzo chinango chomwe chimbamuchitira vinthu voipa maninge. Chomwe ni chipembedzo cha Chiyuda. Iye ambafunalini kuchita mbali ya gulu ya chipembedzo chilichose ndawa yakuti wenze adawona vinthu vizinji vachinyengo. Koma pambuyo pakuti amayi wake wamwalira, adabvuma kupfunzira Baibolo na Wamboni za Yahova. Pomwe adapfunzira va dzina ya Yahova vidamukhudza maninge. Iye adati: “Inepano nikalibe kupfunzirako va dzina ya Mulungu, kenze koyamba kubva kuti Yahova ni chaiye. Manjeuno nimuwona ninge munthu. Pa nthawe mweyireletu nidadziwa kuti nagumana shamwali chaiye.”

17. Ko ndawa chani imwepo munkufuna kupitiriza kulemekeza dzina ya Yahova? (Onani pomwe foto)

¹⁷ Pa basa yanu yolalikira, ko imwepo mupfunzisa wanthu va dzina yochena ya Yahova? Ko muthandiza wanthu kuwona makhalidwe yabwino ya Mulungu wathu? Mukambachita vimwevi imwepo munkulemekeza dzina ya Mulungu. Pitirizani kuchenesa dzina ya Yahova pa kuthandiza wanthu kudziwa munthu yemwe achadziwika na dzina mweyi. Mwanjira mweyi imwepo mudzapulumuse wanthu azinji. Imwepo mudzatewedzere chitsanzo cha Mpfumu yathu Yesu Khrisitu ndipo kuposha vose mudzakondwerese maninge Ababa wanu wakudzulu Yahova. Pitirizani ‘kulemekeza dzina ya [Yahova] mpaka kalekale.’—Sal. 145:2.