1-2. Wat nao savve helpem iumi for understandim feeling blo Jehovah abaotem hao Satan laea for spoelem nem blo hem?

 IMAGINIM samwan wea iu lovem, hem talem barava nogud samting abaotem iu. Iu savve hem laea, bat samfala pipol bilivim datwan. And worse samting, olketa spredim datfala laea, and staka narawan bilivim tu. Hao nao bae iu feel? If iu kea abaotem pipol and gud reputation blo iu, datfala laea bae mekem iu feel nogud, iaman?—Prov. 22:1.

² Disfala example helpem iumi for understandim feeling blo Jehovah taem wanfala spirit son blo hem lo heven spoelem reputation blo hem. Datfala son laea abaotem Jehovah lo first woman, Eve. Eve bilivim datfala laea. Datfala laea mekem first parents blo iumi for againstim Jehovah. From datwan, evri human being kasem sin and gogo olketa dae. (Gen. 3:​1-6; Rome 5:12) Evri problem wea iumi lukim lo world distaem olsem dae, war, pipol safa hem kamap bikos lo datfala laea wea Satan talem lo garden blo Eden. Hao, Jehovah feel nogud bikos lo kaen laea olsem and olketa problem wea kamaot from datwan? Yes. Nomata olsem, Jehovah no gohed for kros bat Bible storyim hao hem wanfala “hapi God.”—1 Tim. 1:11.

3. Wanem privilege nao iumi garem?

³ Iumi garem privilege for help for pruvim hao samting wea Satan talem abaotem Jehovah hem no tru, taem iumi obeyim disfala komand: “Praisem nem blo Jehovah.” (Ps. 113:1) Iumi praisem nem blo Jehovah taem iumi storyim truth abaotem  hem lo olketa narawan. Hao, bae iu praisem nem blo Jehovah? Distaem bae iumi storyim thrifala main reason wea bae helpem iumi for praisem nem blo God witim full heart blo iumi.

IUMI MEKEM JEHOVAH HAPI TAEM IUMI PRAISEM NEM BLO HEM

4. Why nao Jehovah hapi taem iumi praisem hem? Storyim example. (Lukim tu piksa.)

⁴ Iumi mekem Dadi blo iumi lo heven hapi taem iumi praisem nem blo hem. (Ps. 119:108) Hao, diswan minim olmaeti God hem olsem olketa imperfect human wea needim narawan for praisem olketa from olketa needim encouragement? Nomoa. Tingim disfala example. Wanfala smol gele ran lo dadi blo hem, hagem hem and sei, “Iu nao best dadi lo world!” Datfala dadi hem smile and barava hapi lo wat smol gele blo hem duim. Why nao olsem? Hem no bikos hem barava needim praise from pikinini blo hem for encouragem hem, bat hem bikos hem lovem pikinini blo hem and hem hapi from pikinini showim hem tinghae and lovem hem. Hem savve dat pikinini blo hem bae hapi taem hem growap bikos hem garem love and wei for tinghae. Jehovah, wea hem nambawan Dadi blo iumi hem olsem tu. Hem hapi taem iumi praisem.

5. Taem iumi praisem nem blo God, wat kaen laea nao iumi pruvim hem no tru?

⁵ Taem iumi praisem Dadi blo iumi lo heven, iumi help for pruvim nara laea wea Satan talem abaotem iumi wea no tru. Satan sei no eniwan bae loyal for defendim nem blo God, and no eniwan bae faithful taem hem kasem test. Hem sei iumi evriwan bae stop for worshipim God if iumi tingse bae iumi benefit from datwan. (Job 1:​9-11; 2:4) Bat Job gohed faithful lo God and pruvim Satan hem laea. Waswe lo iu? Each wan lo iumi savve chus for defendim nem blo Dadi blo iumi and mekem hem hapi taem iumi gohed faithful lo hem. (Prov. 27:11) Hem barava spesol privilege for duim datwan.

6. Hao nao iumi savve followim example blo King David and olketa Levite? (Nehemiah 9:5)

⁶ Olketa wea lovem God laek for praisem nem blo hem witim full heart blo olketa. King David sei: “Bae mi praisem Jehovah, evri samting insaed lo mi bae praisem holy nem blo hem.” (Ps. 103:1) David luksavve dat for praisem nem blo Jehovah, hem olsem nomoa for praisem Jehovah. Taem iumi herem nem blo Jehovah, iumi savve tingim wat kaen person nao hem, olketa naesfala wei blo hem, and olketa nambawan samting wea hem duim. David laekem nem blo Jehovah for holy and  for praisem hem. Hem laek duim datwan witim “evri samting insaed” lo hem, wea minim full heart blo hem. Olketa Levite tu showim example lo wei for praisem Jehovah. Olketa hambol for sei, toktok wea olketa talem hem no barava kasem yet praise wea holy nem blo Jehovah fit for kasem. (Readim Nehemiah 9:5.) From olketa hambol for praisem Jehovah olsem, datwan mas mekem heart blo Jehovah hapi tumas.

7. Hao nao iumi savve praisem Jehovah taem iumi duim ministry and deal witim pipol?

⁷ Distaem iumi savve mekem Jehovah hapi, taem iumi story abaotem hem lo olketa narawan lo wei wea showimaot iumi lovem and tinghae lo hem. Taem iumi lo ministry, main goal blo iumi hem for helpem pipol for fren gud witim Jehovah and for garem sem feeling wea iumi garem for Jehovah. (Jas. 4:8) Iumi hapi for teachim pipol wat Bible storyim abaotem hao Jehovah showimaot love, justice, wisdom, paoa, and olketa nara gudfala wei blo hem. And tu, iumi praisem Jehovah and mekem hem hapi taem iumi duim best for followim example blo hem. (Eph. 5:1) Taem iumi duim datwan, olketa narawan bae luksavve hao iumi difren from pipol lo world. (Matt. 5:​14-16) Taem iumi deal witim olketa, iumi savve explainim why wei blo iumi hem difren. From datwan, olketa wea garem gudfala heart bae laek for fren witim Jehovah. Taem iumi praisem Jehovah olsem, iumi mekem heart blo hem hapi.—1 Tim. 2:​3, 4.

IUMI MEKEM JESUS HAPI TAEM IUMI PRAISEM NEM BLO JEHOVAH

8. Hao nao Jesus showim nambawan example lo wei for praisem nem blo Jehovah?

⁸ No eniwan lo heven or lo earth savve gud lo Jehovah olsem Jesus. (Matt. 11:27) Jesus lovem Dadi blo hem and showim nambawan example lo wei for praisem nem blo Jehovah. (John 14:31) Taem Jesus prea lo Dadi blo hem lo naet bifor hem dae, hem talem barava important samting wea hem duim lo ministry blo hem lo earth. Hem sei: “Mi talemaot nem bilong iu long olketa.” (John 17:26) Wat nao Jesus minim?

9. Wanem parabol nao Jesus iusim for helpem iumi minim gud Dadi blo hem?

⁹ Jesus no just talem pipol hao nem blo God hem Jehovah. Olketa Jew wea Jesus preach lo olketa savve finis lo nem blo God. Bat Jesus nao ‘helpem iumi for minim Jehovah.’ (John 1:​17, 18) For example, olketa Hebrew Scripture storyim hao Jehovah garem bigfala mercy and hem tingim iumi. (Ex. 34:​5-7) Jesus helpem iumi for minim gud datfala truth taem hem storyim parabol abaotem son wea lus and dadi blo hem. Taem iumi read abaotem hao datfala dadi lukim son blo hem wea repent “taem hem lelebet farawe yet,” and hem ran go for meetim hem, hagem, and barava forgivim hem, datwan helpem iumi for luksavve hao Jehovah showim bigfala mercy and tingim iumi. (Luke 15:​11-32) Jesus helpem pipol for luksavve wat kaen Person nao Dadi blo hem.

10. (a) Hao nao iumi savve Jesus iusim nem blo Dadi blo hem and laekem olketa narawan tu for duim sem samting? (Mark 5:19) (Lukim tu piksa.) (b) Wat nao Jesus laekem iumi for duim distaem?

¹⁰ Hao, Jesus laekem olketa narawan tu for iusim nem blo Dadi blo hem? Yes. Samfala leader blo religion lo datfala taem maet sei for kolem nem blo God hem no showimaot respect. Bat Jesus nating letem olketa teaching olsem wea no kam from Bible for stopem hem for iusim nem blo Dadi blo hem. Tingim taem wea hem kiurim wanfala man lo Gerasenes wea demon spoelem. Olketa pipol barava fraet and begim Jesus for go, so hem lusim  datfala ples. (Mark 5:​16, 17) Nomata olsem, Jesus laekem pipol lo there for savve lo nem blo Jehovah. So hem talem man wea hem kiurim for storyim lo pipol, no samting wea Jesus duim, bat samting wea Jehovah duim for hem. (Readim Mark 5:19.) a Distaem tu, Jesus laekem iumi for helpem pipol evriwea lo world for savve lo nem blo Dadi blo hem! (Matt. 24:14; 28:​19, 20) Taem iumi duim datwan, iumi mekem King blo iumi Jesus for hapi.

11. Wat nao Jesus teachim olketa follower blo hem for prea for hem, and why nao datwan hem important? (Ezekiel 36:23)

¹¹ Jesus luksavve purpose blo Jehovah hem for nem blo Hem kamap holy, and for pruvim evri laea abaotem nem blo Hem no tru. Dastawe, Jesus teachim olketa follower blo hem for prea olsem: “Dadi bilong mifala long heven, mifala laekem nem bilong iu for holy.” (Matt. 6:9) Jesus savve hao diswan hem wanfala big issue wea evriwan feisim. (Readim Ezekiel 36:23.) Jesus nomoa mekhae lo nem blo Dadi blo hem winim eni narawan lo full universe. Bat taem olketa enemy arrestim Jesus, olketa accusim hem and sei hem barava no respectim Dadi blo hem. For sure, Jesus luksavve dat for tok spoelem holy nem blo God, hem wanfala worst sin. Hem barava wari nogud olketa accusim hem and sei hem guilty lo datfala crime. Masbi datwan nao main reason why Jesus “wari fogud” lo olketa hour bifor olketa arrestim hem.—Luke 22:​41-44.

12. Hao nao Jesus barava mekhae lo nem blo Dadi blo hem?

¹² For mekem nem blo Dadi blo hem holy, Jesus no givap nomata olketa killim hem, tok spoelem hem, and accusim hem lo olketa samting wea no tru. Hem savve hem obeyim Dadi blo hem lo evri samting, so no eni samting for hem shame lo hem. (Heb. 12:2) Jesus luksavve tu hao lo datfala barava hard taem, hem kasem direct attak from Satan. (Luke 22:​2-4; 23:​33, 34) Satan hope for spoelem faithful fasin blo Jesus, bat hem barava fail! Jesus pruvim wat Satan talem hem no tru and Jehovah garem olketa loyal servant, wea gohed for faithful nomata olketa kasem barava hard taem!

13. Hao nao iu savve mekem King blo iumi Jesus for hapi?

 ¹³ Hao, iu laek for mekem King blo iumi Jesus for hapi? Gohed praisem nem blo Jehovah and helpem olketa narawan for savve lo olketa nambawan wei blo hem. Taem iu duim datwan, iu followim gudfala example blo Jesus. (1 Pet. 2:21) Olsem Jesus, iu mekem Jehovah hapi and pruvim Satan wea againstim Hem, hem man for laea!

IUMI HELP FOR SEVEM LAEF TAEM IUMI PRAISEM NEM BLO JEHOVAH

14-15. Wat nao olketa positive result wea maet iumi lukim taem iumi teachim pipol abaotem Jehovah?

¹⁴ Taem iumi praisem nem blo Jehovah, iumi help for sevem laef. Why nao iumi sei olsem? Tingim, Satan “blindim mind” blo ‘olketa wea no biliv.’ (2 Cor. 4:4) From datwan, olketa bilivim olketa laea blo Satan. For example, olketa bilivim God no exist, God farawe tumas from iumi olketa man and no kea, hem cruel and mekem olketa wea duim nogud samting for safa for olowe. Satan talem olketa laea olsem for spoelem nem and reputation blo Jehovah mekem pipol no laek for fren witim Jehovah. Bat taem iumi preach, datwan mekem Satan for no kasem goal blo hem. Iumi teachim truth abaotem Jehovah lo pipol and praisem holy nem blo hem. Wat nao result?

¹⁵ Truth wea stap lo Bible, hem barava paoaful. Taem iumi teachim pipol abaotem Jehovah and wat kaen person nao hem, bae iumi lukim positive result. Pipol bae olsem iumi tu, olketa bae luksavve lo olketa laea blo Satan, and start for savve lo olketa naesfala wei blo Jehovah. Olketa sapraes tumas lo bigfala paoa blo Jehovah. (Isa. 40:26) Olketa lane tu for trustim hem bikos hem showim perfect justice. (Deut. 32:4) Olketa lanem staka samting from bigfala wisdom blo hem. (Isa. 55:9; Rome 11:33) And olketa hapi for savve dat Jehovah hem love. (1 John 4:8) Taem olketa fren klos witim Jehovah, olketa bae sure lo hope blo olketa for laef olowe. Hem spesol privilege for helpem pipol for fren klos witim Jehovah! Taem iumi duim datwan, Jehovah ting lo iumi olsem “iumi waka tugeta” witim hem.—1 Cor. 3:​5, 9.

16. Taem samfala savve lo nem blo God, hao nao datwan affectim olketa? Storyim olketa example.

 ¹⁶ Firstaem, maet iumi just teachim pipol hao nem blo God hem Jehovah. Datwan savve barava tasim heart blo samwan wea garem gud heart. For example, Aaliyah b hem wanfala young woman wea growap lo religion wea no teachim Bible. Bat hem no satisfae witim religion blo hem and no feel klos lo God. Datfala tingting hem change taem hem start for study witim olketa Witness. Hem start for feel klos lo God olsem Fren blo hem. Hem sapraes tu taem hem savve olketa aotem nem blo God from staka Bible and replacim witim olketa title, olsem Lord. Taem hem savve lo nem blo Jehovah, datwan changem laef blo hem. Hem sei: “Best fren blo mi hem garem nem!” Wat nao result? Hem sei: “Distaem mi garem peace lo heart. Mi hapi tumas.” Steve wanfala musician hem garem Jew baekgraon wea strik tumas. Hem no laek joinim eni religion bikos hem lukim wei for hypocrite hem big tumas insaed. Bat afta mami blo hem dae, hem agree for join insaed wanfala Bible study wea wanfala Jehovah’s Witness conductim. Taem hem lane abaotem nem blo God, datwan barava kasem heart blo hem. Hem sei: “No enitaem mi savve lo nem blo God.” Hem sei moa: “Hem firstaem for mi savve God hem real! Mi ting lo hem olsem wanfala real Person. Lo datfala taem, mi savve mi faendem wanfala Fren!”

17. Why nao iu disaed strong for gohed praisem nem blo Jehovah? (Lukim tu piksa.)

¹⁷ Taem iu preach and teachim pipol, hao, iu story abaotem datfala holy nem, Jehovah, lo olketa? Hao, iu helpem olketa for luksavve wat kaen person nao God blo iumi? Taem iu duim olsem, iu praisem nem blo God. So gohed for praisem holy nem blo Jehovah taem iu helpem pipol for savve lo wat kaen Person nao hem. Iu sevem laef blo pipol taem iu duim datwan. Iu bae followim example blo King blo iumi, Christ Jesus. And important samting, iu bae mekem Dadi blo iu, Jehovah, for barava hapi. Gohed for “praisem nem blo [hem] for olowe”!—Ps. 145:2.