1، 2.‏ اِک مثال دے کے دَسو کہ یہوواہ نُوں ایہہ ویکھ کے کیہو جیہا محسوس ہوندا اے کے اوہدے ناں نُوں بدنام کیتا گیا اے؟‏

 تصور کرو کہ اِک بندہ جدے نال تُسی بڑا پیار کردے او، اوہ تواڈے بارے اِک بوہت بُری گل کہندا اے۔ توانوں پتہ اے کہ ایہہ جھوٹھ اے، پر کجھ لوک اوہدی گل تے بھروسا کر لیندے نیں۔ ایس توں وی بھیڑا ایہہ ہوندا اے کہ اوہ ایس جھوٹھ بارے ہور وی لوکاں نُوں دَسدے نیں تے اَگوں اوہ لوک وی اوہناں دی گل تے یقین کر لیندے نیں۔ ایہہ ویکھ کے توانوں کیہو جیہا محسوس ہوئے گا؟ جے تُسی لوکاں بارے تے اپنی نیک نامی بارے سوچو گے تے یقیناً ایس جھوٹھ دی وجہ توں تواڈا دل بوہت دُکھی ہوئے گا۔—‏اَمثال 22:‏1‏۔‏

² ایس مثال دے ذریعے تُسی ایہہ گل سمجھ سکدے او کہ جدوں یہوواہ تے اِلزام لایا گیا سی تے اوہنوں کیہو جیہا محسوس ہویا ہوئے گا۔ اوہدے اِک فرشتے نے اوہدے بارے حوا نال اِک جھوٹھ بولیا۔ حوا نے اوس جھوٹھ تے یقین کر لیا۔ تے ایس جھوٹھ دی وجہ توں آدم تے حوا نے یہوواہ دی نافرمانی کیتی۔ ایہدے نتیجے چ اَج اَسی وی گُناہ کرنے آں تے مرنے آں۔ (‏پیدائش 3:‏1-‏6؛‏ رومیوں 5:‏12‏)‏ شیطان نے عدن دے باغ چ جیہڑے جھوٹھ بولے سن اوہناں دی وجہ توں اَج سانوں مشکلاں دا سامنا کرنا پیندا اے جیویں کہ جنگ، ظلم تے موت۔ کیہہ یہوواہ نُوں ایہہ ویکھ کے دُکھ ہوندا اے کہ اوہدے بارے جھوٹھ بولے گئے نیں تے ایہناں دی وجہ توں کِنّے بھیڑے نتیجے نکل رہے نیں؟ جی بالکل۔ پر فیر وی یہوواہ دُکھی تے مایوس نئیں رہندا سگوں اوہ خوش‌دل خدا اے۔—‏1-‏تیمُتھیُس 1:‏11‏۔‏

3.‏ ساڈے کول کیہڑا اعزاز اے؟‏

³ ساڈے لئی ایہہ بڑے اعزاز دی گل اے کہ اَسی شیطان دے الزاماں نُوں جھوٹھا ثابت کر سکنے آں  تے اِنج کرن لئی اَسی ایس حکم تے عمل کرسکنے آں:‏ یہوواہ دے ناں دی وڈیائی کرو۔ (‏زبور 113:‏1‏)‏ اَسی اِنج کیویں کر سکنے آں؟ دُوجیاں نُوں یہوواہ بارے چنگیاں گلاں دَس کے۔ کیہہ تُسی یہوواہ دے ناں دی وڈیائی کرو گے؟ آؤ، اَسی تِن ایہو جہیاں گلاں تے غور کرنے آں جنہاں دی وجہ توں ساڈے دل چ یہوواہ دی وڈیائی کرن دی خواہش پیدا ہوئے گی۔‏

یہوواہ دے ناں دی وڈیائی کر کے اَسی اوہنوں خوش کرنے آں

4.‏ جدوں اَسی یہوواہ دی وڈیائی کرنے آں تے اوہ خوش کیوں ہوندا اے؟ مثال دَوو۔ (‏تصویر نُوں وی ویکھو۔)‏

⁴ جدوں اَسی اپنے اسمانی باپ دے ناں دی وڈیائی کرنے آں تے اوہ بڑا خوش ہوندا اے۔ (‏زبور 119:‏108‏)‏ تے کیہہ ایہدا مطلب ایہہ وے کہ خدا عیب‌دار انساناں وانگوں اے جیہڑے اپنی تعریف چاہندے نیں تاکہ ایہدے توں اوہناں دا حوصلہ ودھے؟ ایہہ گل نئیں اے۔ ایہدے لئی ذرا اِک مثال تے غور کرو۔ تصور کرو کہ اِک چھوٹی بچی اپنے باپ نُوں گلے لا کے کہندی اے:‏ ”‏ابو، تُسی ایس دُنیا دے سب توں پیارے ابو او۔“‏ باپ ایس گلوں بڑا خوش ہوندا اے۔ پر کیوں؟ کیہہ سانوں ایہہ سوچ لینا چاہی دا اے کہ باپ نُوں اپنی بچی کولوں تعریف دی لوڑ اے تاکہ اوہنوں حوصلہ ملے؟ نئیں، اصل چ گل ایہہ وے کہ اوہ اپنی دھی نُوں بڑا پیار کردا اے تے اوہ ایس گلوں خوش اے کہ اوہ اوہدے لئی محبت تے شکرگزاری وکھا رہی اے۔ اوہ جان‌دا اے کہ جدوں اوہ وڈی ہوئے گی تے ایہناں خوبیاں دی وجہ توں اوہ خوش رہ سکے گی۔ ایسے طرحاں جدوں اَسی اپنے اسمانی باپ یہوواہ دی وڈیائی کرنے آں تے اوہ وی ایہناں ای گلاں دی وجہ توں خوش ہوندا اے۔‏

5.‏ خدا دے ناں دی وڈیائی کرن نال اَسی شیطان دے کیہڑے اِلزام نُوں جھوٹھا ثابت کرنے آں؟‏

⁵ جدوں اَسی اپنے اسمانی باپ یہوواہ دی وڈیائی کرنے آں تے اَسی اوس اِلزام نُوں جھوٹھا ثابت کرنے آں جیہڑا شیطان نے انساناں تے لایا اے۔ شیطان ایہہ دعویٰ کردا اے کہ مشکلاں چ کوئی وی انسان یہوواہ دے ناں دی وڈیائی نئیں کرے گا۔ اوہدے مطابق کوئی وی انسان یہوواہ دا وفادار نئیں اے۔ اوہ ایہہ وی کہندا اے کہ جے سانوں یہوواہ نُوں چھڈن نال کوئی فائدہ حاصل ہوئے گا تے اَسی اوہدے توں مُونہہ موڑ لواں گے۔ (‏ایوب 1:‏9-‏11؛‏ 2:‏4‏)‏ پر ایوب نے شیطان نُوں جھوٹھا ثابت کیتا۔ کیہہ تُسی وی یہوواہ دے وفادار رہوو گے؟ اَسی سارے یہوواہ دے ناں دی وڈیائی کر سکنے آں تے وفاداری نال اوہدی خدمت کر کے اوہنوں خوش کر سکنے آں۔ (‏اَمثال 27:‏11‏)‏ ایہہ واقعی ساڈے لئی بڑے اعزاز دی گل اے۔‏

6.‏ اَسی داؤد تے لاویاں دی مثال تے کیویں عمل کر سکنے آں؟ (‏نحمیاہ 9:‏5‏)‏

⁶ جیہڑے لوک یہوواہ نال پیار کردے نیں، اوہ پورے دل نال اوہدے ناں دی وڈیائی کرنا چاہندے نیں۔ بادشاہ داؤد نے لکھیا:‏ اَے میری جان!‏ یہوواہ دی وڈیائی کر، میرا تن من اوہدے پاک ناں دی وڈیائی کرے۔ (‏زبور 103:‏1‏)‏ داؤد جان‌دا سی کہ یہوواہ دے ناں دی وڈیائی کرن دا مطلب اصل چ خود یہوواہ دی وڈیائی کرنا اے کیونکہ جدوں اَسی  اوہدا ناں سننے آں تے ساڈے ذہن چ آندا اے کہ اوہ کیہو جہی ہستی اے، اوہدے چ کیہڑیاں خوبیاں نیں تے اوہنے کیہڑے زبردست کم کیتے نیں۔ داؤد اپنے اسمانی باپ دے ناں نُوں پاک مننا چاہندا سی تے اوہدی وڈیائی کرنا چاہندا سی۔ اوہ اپنے تن من یعنی اپنے پورے دل نال اِنج کرنا چاہندا سی۔ ایسے طرحاں لاویاں نے وی یہوواہ دے ناں دی وڈیائی کرن چ پیشوائی کیتی۔ اوہناں نے بڑی خاکساری نال ایس گل نُوں منیا کہ اوہ اپنے لفظاں دے ذریعے جِنّی وی یہوواہ دے ناں دی وڈیائی کرن، اوہ گھٹ اے۔ ‏(‏نحمیاہ 9:‏5 نُوں پڑھو۔)‏ لاویاں نے جیویں خاکساری نال تے پورے دل نال یہوواہ دے ناں دی وڈیائی کیتی، یقیناً اوہدے توں اوہدا دل بڑا خوش ہویا ہوئے گا۔‏

7.‏ اَسی مُنادی دے دوران تے اپنی زندگی چ یہوواہ دی وڈیائی کیویں کرسکنے آں؟‏

⁷ اَج جدوں اَسی اپنیاں گلاں توں ظاہر کرنے آں کہ اَسی یہوواہ دے کِنّے شکرگزار آں تے اوہدے نال کِنّاں پیار کرنے آں تے اِنج اَسی اوہدے دل نُوں خوش کرنے آں۔ مُنادی کردے ویلے اَسی ایہہ گل یاد رکھنے آں کہ ساڈا مقصد ایہہ وے کہ اَسی لوکاں نُوں اپنے اسمانی باپ یہوواہ وَل لیائیے تاکہ اوہ وی اوہدے بارے اُنج ای محسوس کرن جِنج اَسی محسوس کرنے آں۔ (‏یعقوب 4:‏8‏)‏ سانوں اوہدوں بڑی خوشی ہوندی اے جدوں اَسی لوکاں نُوں بائبل چوں یہوواہ دِیاں خوبیاں بارے دَسنے آں جیویں کہ محبت، انصاف، حکمت، طاقت تے ہور وی کئی شاندار خوبیاں۔ اَسی اوس ویلے وی یہوواہ دی وڈیائی کرنے آں تے اوہنوں خوش کرنے آں جدوں اَسی اوہدی مثال تے عمل کرن دی کوشش کرنے آں۔ (‏اِفِسیوں 5:‏1)‏ اِنج اَسی ایس بھیڑی دُنیا توں فرق نظر آنے آں۔ تے جدوں لوک ایس گل نُوں ویکھدے نیں تے اوہ سوچدے نیں کہ اَسی دُوجے لوکاں توں فرق کیوں آں۔ (‏متی 5:‏14-‏16‏)‏ فیر جدوں سانوں لوکاں نال گل بات کرن دا موقع مِلدا اے تے اَسی اوہناں نُوں ایہہ دَسن دے قابل ہُنے آں کہ اَسی دُوجے لوکاں ورگے کم کیوں نئیں کردے۔ ایہدا ایہہ نتیجہ نکلدا اے کہ نیک‌دل لوک اوہدے نیڑے آ جاندے نیں۔ جدوں اَسی ایہناں طریقیاں نال اپنے اسمانی باپ یہوواہ دی وڈیائی کرنے آں تے اوہنوں بڑی خوشی ہوندی اے۔—‏1-‏تیمُتھیُس 2:‏3، 4‏۔‏

یہوواہ دے ناں دی وڈیائی کر کے اَسی یسوع نُوں خوش کرنے آں

8.‏ یسوع اپنے باپ دے ناں دی وڈیائی کرن دی بہترین مثال کیوں اے؟‏

⁸ اسمان تے زمین اُتے کوئی وی یہوواہ خدا نُوں اینی چنگی طرحاں نئیں جان‌دا جِنّی چنگی طرحاں یسوع جان‌دا اے۔ (‏متی 11:‏27‏)‏ یسوع اپنے باپ نال بوہت پیار کردا اے تے اوہ اپنے باپ دے ناں دی وڈیائی کرن دی سب توں ودھیا مثال اے۔ (‏یوحنا 14:‏31‏)‏ اپنی موت توں پہلے والی رات اوہنے دُعا چ اپنے اسمانی باپ نُوں دَسیا کہ اوہ زمین تے اپنی خدمت دے دوران کیہہ کرن چ کامیاب ہویا اے۔ اوہنے کہیا:‏ ”‏مَیں ایہناں نُوں تیرے ناں بارے سکھایا اے۔“‏ (‏یوحنا 17:‏26‏)‏ یسوع نے اِنج کیویں کیتا؟‏

9.‏ یسوع مسیح نے اِک مثال دے ذریعے ایہہ کیویں واضح کیتا کہ یہوواہ کیہو جہی ہستی اے؟‏

⁹ یسوع نے لوکاں نُوں یہوواہ دے ناں بارے دَسن توں علاوہ وی ہور بوہت کجھ سکھایا۔ جیہڑے یہودیاں نُوں یسوع نے تلیم دِتی، اوہ خدا داناں پہلے توں ای جان‌دے سن۔ پر یسوع نے اوہناں نُوں ”‏سمجھایا کہ خدا کون اے۔“‏ (‏یوحنا 1:‏17، 18‏)‏ مثال لئی، عبرانی صحیفیاں چ دَسیا گیا اے کہ یہوواہ خدا رحم‌دل تے مہربان اے۔ (‏خروج 34:‏5-‏7‏)‏ ایس گل نُوں ہور چنگی طرحاں سمجھن لئی یسوع مسیح نے اوہ مثال دِتی جدے چ اِک پُتر اپنے پیو نُوں چھڈ کے چلا گیا سی۔ اوس واقعے چ اَسی پڑھنے آں کہ جدوں اوہدا پُتر گھر توں دُور ای سی تے اوہدا پیو اوہنوں ویکھ لیندا اے تے بھجا بھجا اوہدے کول جاندا اے۔ اوہ اوہنوں اپنے گلے لاندا اے تے اوہنوں دِلوں معاف کر دیندا اے۔ ایس مثال توں اَسی بڑی چنگی طرحاں سمجھ جانے آں کہ یہوواہ رحم‌دلی تے مہربانی دی کِنّی ودھیا مثال اے۔ (‏لُوقا 15:‏11-‏32‏)‏ یسوع نے لوکاں نُوں ایہہ سمجھن چ مدد کیتی کہ اصل چ یہوواہ کیہو جہی ہستی اے۔‏

10.‏ (‏الف)‏اَسی ایہہ گل کیویں جاننے آں کہ یسوع اپنے باپ دا ناں استمال کردا سی تے اوہ چاہندا سی کہ دُوجے وی اِنج ای کرن؟ (‏مرقس 5:‏19‏)‏ (‏تصویر نُوں وی ویکھو۔)‏ (‏ب)‏اَج یسوع ساڈے کولوں کیہہ چاہندا اے؟‏

¹⁰ کیہہ یسوع چاہندا سی کہ دُوجے لوک وی اوہدے باپ دا ناں استمال کرن؟ یقیناً اوہ ایہہ چاہندا سی۔ اوس زمانے دے کجھ مذہبی رہنما سوچدے سن کہ خدا دا ناں ایناں پاک اے کہ ایہنوں زبان تے لیانا ای گُناہ اے۔ پر یسوع نے ایس سوچ دی وجہ توں کدی وی اپنے باپ دا  ناں استمال کرنا نئیں چھڈیا۔ ذرا اوس واقعے بارے سوچو جدوں اوہنے گِراسینیاں دے علاقے چ اِک بندے وچوں باغی فرشتیاں نُوں کڈھیا سی۔ ایس وجہ توں اوس علاقے دے لوک بوہت ڈر گئے تے اوہ یسوع اَگے ترلے پا کے کہن لگ پئے کہ اوہ اوتھوں چلا جائے۔ ایس لئی یسوع اوتھے نئیں رُکیا۔ (‏مرقس 5:‏16، 17‏)‏ پر فیر وی اوہ چاہندا سی کہ اوس علاقے دے لوکاں نُوں وی یہوواہ دا ناں پتہ ہووے۔ ایس لئی جیہڑے بندے وچوں اوہنے باغی فرشتیاں نُوں کڈھیا سی، اوہنوں ایہہ نئیں کہیا کہ اوہ لوکاں نُوں جا کے دَسے کہ یسوع نے اوہدے لئی کیہہ کیتا اے سگوں اوہنوں ایہہ حکم دِتا کہ اوہ لوکاں نُوں دَسے کہ یہوواہ نے اوہدے لئی کیہہ کیتا اے۔ ‏(‏مرقس 5:‏19 نُوں پڑھو۔)‏ a یسوع اَج وی ایہہ ای چاہندا اے کہ پوری دُنیا چ لوک اوہدے باپ دے ناں نُوں جانن۔ (‏متی 24:‏14؛‏ 28:‏19، 20‏)‏ جدوں اَسی لوکاں نُوں یہوواہ دا ناں دَسنے آں تے ساڈا بادشاہ یسوع بوہت خوش ہوندا اے۔‏

11.‏ یسوع نے اپنے شاگرداں نُوں کیس بارے دُعا کرنا سکھایا تے ایہہ اہم کیوں اے؟ (‏حِزقی‌ایل 36:‏23‏)‏

¹¹ یسوع جان‌دا سی کہ یہوواہ دا مقصد اے کہ اوہ اپنے ناں نُوں پاک ٹھہرائے تے اپنے ناں تے لگے الزاماں نُوں جھوٹھا ثابت کرے۔ یسوع جان‌دا سی کہ ایہہ کائنات دا سب توں وڈا معاملہ اے۔ ‏(‏حِزقی‌ایل 36:‏23 نُوں پڑھو۔)‏ ایس لئی اوہنے اپنے شاگرداں نُوں ایہہ دُعا سکھائی:‏”‏اَے ساڈے اسمانی باپ، تیرا ناں پاک منیا جائے۔“‏ (‏متی 6:‏9‏)‏ پوری کائنات چ کسے نے وی یہوواہ دے ناں نُوں پاک ٹھہران لئی اوناں کجھ نئیں کیتا جِنّاں یسوع نے کیتا اے۔ پر فیر وی جدوں یسوع نُوں گِرفتار کیتا گیا تے اوہدے دُشمناں نے اوہدے تے کیہڑا اِلزام لایا؟ خدا دے ناں دے خلاف کفر بکن دا۔ یسوع دی نظر چ اپنے باپ دے پاک ناں دی بے‌عزتی کرنا سب توں وڈا گُناہ سی۔ تے ایسے جُرم دی وجہ توں اوہنوں گِرفتار کیتا گیا تے سزا دِتی گئی۔ ایہی وجہ سی کہ یسوع گِرفتار ہون توں پہلاں بوہت پریشان سی۔—‏لُوقا 22:‏41-‏44‏۔‏

12.‏ یسوع نے اپنے باپ دے ناں نُوں پاک کیویں ثابت کیتا؟‏

¹² یسوع نے اپنے باپ دے ناں نُوں پاک ٹھہران لئی ہر قسم دا ظلم، بے‌عزتی تے جھوٹھے اِلزام برداشت کیتے۔ اوہ جان‌دا سی کہ اوہ ہر گل چ اپنے باپ دا فرمانبردار رہیا اے ایس لئی اوہنوں شرمندہ ہون دی لوڑ نئیں اے۔ (‏عبرانیوں 12:‏2‏)‏ اوہ ایہہ وی جان‌دا سی کہ اوس مشکل ویلے چ شیطان اوہدے تے حملے کر رہیا سی۔ (‏لُوقا 22:‏2-‏4؛‏ 23:‏33، 34‏)‏ یقیناً شیطان سوچ رہیا سی کہ یسوع یہوواہ دا وفادار نئیں رہوے گا۔ پر شیطان بڑی بُری طرحاں ناکام ہویا۔ یسوع نے ثابت کیتا کہ شیطان بڑا ظالم تے  جھوٹھا اے تے یہوواہ دے بندے اوہدے وفادار نیں تے اوہ مشکل توں مشکل اِمتحان چ وی اوہدے توں مُونہہ نئیں موڑدے۔‏

13.‏ تُسی اپنے بادشاہ یسوع نُوں کیویں خوش کر سکدے او؟‏

¹³ کیہہ تُسی اپنے بادشاہ یسوع نُوں خوش کرنا چاہندے او؟ جے ہاں تے فیر یہوواہ دے ناں دی وڈیائی کردے رہوو تے دُوجیاں نُوں اوہدیاں خوبیاں بارے دَسدے رہوو۔ جدوں تُسی اِنج کرو گے تے تُسی یسوع دی مثال تے عمل کر رہے ہووو گے۔ (‏1-‏پطرس 2:‏21‏)‏ ایس طرحاں تُسی یسوع وانگوں یہوواہ دے دل نُوں خوش کرو گے تے اوہدے دُشمن شیطان نُوں جھوٹھا ثابت کرو گے۔‏

یہوواہ دے ناں دی وڈیائی کر کے اَسی لوکاں دِیاں جاناں بچانے آں

14، 15.‏ جدوں اَسی لوکاں نُوں یہوواہ بارے سکھانے آں تے ایہدے کیہڑے شاندار نتیجے نکلدے نیں؟‏

¹⁴ یہوواہ دے ناں دی وڈیائی کرن نال اَسی لوکاں دِیاں جاناں بچانے آں۔ پر کیویں؟ شیطان نے غیرایمان لوکاں دِیاں عقلاں نُوں اَنھا کیتا ہویا اے۔ (‏2-‏کُرنتھیوں 4:‏4‏)‏ ایس وجہ توں اوہ لوک شیطان دے ایہناں جھوٹھاں تے یقین کر لیندے نیں:‏ خدا ہے ای نئیں، خدا ساڈے توں بوہت دُور اے تے اوہنوں انساناں دی کوئی فکر نئیں، خدا ظالم اے تے غلط کم کرن والیاں نُوں ہمیشاں لئی سزا دیندا رہندا اے۔ شیطان ایہہ جھوٹھ ایس لئی پھیلاندا اے تاکہ اوہ یہوواہ دے ناں نُوں بدنام کر سکے۔ اوہ چاہندا اے کہ لوکاں دا یہوواہ دے نیڑے جان تے دل ای نہ کرے۔ پر ساڈے مُنادی دے کم دی وجہ توں شیطان ناکام ہو جاندا اے کیونکہ اَسی اپنے اسمانی باپ دے پاک ناں دی وڈیائی کرنے آں تے اِنج لوکاں نُوں اوہدے بارے سچائی دَسنے آں۔ ایہدے کیہڑے نتیجے نکلدے نیں؟‏

¹⁵ خدا دے کلام دِیاں سچائیاں چ بڑی طاقت اے۔ جدوں اَسی لوکاں نُوں سکھانے آں کہ یہوواہ کیہو جہی ہستی اے تے سانوں ایہدے بڑے شاندار نتیجے ویکھن نُوں مِلدے نیں۔ لوکاں دِیاں اَکھاں توں شیطان دے جھوٹھاں دا پردہ ہٹن لگ پیندا اے تے ساڈے وانگوں اوہناں نُوں وی یہوواہ دِیاں شاندار خوبیاں نظر آن لگ پیندیاں نیں۔ مثال لئی، اوہ یہوواہ دی طاقت نُوں ویکھ کے حیران ہو جاندے نیں۔ (‏یسعیاہ 40:‏26‏)‏ اوہدے انصاف بارے جان کے اوہ اوہدے تے بھروسا کرن لگ پیندے نیں۔ (‏اِستثنا 32:‏4‏)‏ اوہ اوہدی حکمت توں شاندار گلاں سکھدے نیں۔ (‏یسعیاہ 55:‏9؛‏ رومیوں 11:‏33‏)‏ تے ایہہ جان کے اوہناں نُوں بڑی تسلی مِلدی اے کہ اوہ محبت اے۔ (‏1-‏یوحنا 4:‏8‏)‏ جیویں جیویں اوہ یہوواہ دے نیڑے ہوندے جاندے نیں، اوہناں دا یقین ایس گل تے ودھدا جاندا اے کہ اوہ یہوواہ دے بچیاں دے طور تے ہمیشاں دی زندگی حاصل کرن  گے۔ ساڈے لئی ایہہ بڑے مان دی گل اے کہ اَسی لوکاں دی مدد کر رہے آں کہ اوہ اپنے اسمانی باپ یہوواہ دے نیڑے ہو جان۔ جدوں اَسی اِنج کرنے آں تے اَسی اوہدے نال کم کر رہے ہنے آں۔—‏1-‏کُرنتھیوں 3:‏5،‏ 9‏۔‏

16.‏ خدا دے ناں بارے جان کے کجھ لوکاں تے کیہہ اثر ہویا؟ مثالاں دَوو۔‏

¹⁶ شروع چ اَسی لوکاں نُوں بس ایہہ سکھا سکنے آں کہ خدا دا ناں یہوواہ اے۔ ایہی سچائی نیک‌دل لوکاں دے دل تے بڑا گُوڑھا اثر پا سکدی اے۔ مثال لئی، اِک نوجوان بھین جدا ناں عالیہ اے،‏ b اِک ایہو جہے خاندان چ جمی پلی جیہڑا مسیحی نئیں سی۔ اوہ نہ تے اپنے مذہب توں مطمئن سی تے نہ ای اوہ اپنے آپ نُوں خدا دے نیڑے محسوس کردی سی۔ پر جدوں اوہنے یہوواہ دے گواہواں کولوں بائبل کورس کرنا شروع کیتا تے اوہ بدل گئی۔ اوہ خدا نُوں اپنا دوست سمجھن لگ پئی۔ تے اوہ ایہہ جان کے بڑی حیران ہوئی کہ بوہت ساریاں بائبلاں وچوں خدا دے ناں نُوں کڈھ دِتا گیا اے تے ایہدی جگہ خدا تے خداوند ورگے لفظ لا دِتے گئے نیں۔ یہوواہ بارے جان کے اوہدی زندگی بدل گئی۔ اوہ کہندی اے:‏ ”‏میرے سب توں چنگے دوست دا اِک ناں اے۔ ہُن میرا دل بڑا مطمئن اے۔ میرے لئی ایہہ بڑے مان دی گل اے کہ مَیں یہوواہ دا ناں جاننی آں۔“‏ اِک گلوکار جدا ناں سٹیو اے، اوہ اِک کٹر یہودی خاندان چ جمیاپلیا۔ پر اوہنے اپنے آپ نُوں مذہب توں دُور کر لیا کیونکہ اوہنے ویکھیا کہ لوک کہندے کجھ نیں تے کردے کجھ نیں۔ پر جدوں اوہ اپنی ماں دے فوت ہون دی وجہ توں بڑا دُکھی سی تے اوہ یہوواہ دے گواہواں دے اِک بائبل کورس دے دوران اوہناں نال بہہ گیا۔ اوتھے اوہنے خدا دا ناں سُنیا جدا اوہدے دل تے بڑا گُوڑھا اثر ہویا۔ اوہ کہندا اے:‏ ”‏مَیں پہلاں کدی خدا دا ناں نئیں سُنیا سی۔“‏ اوہنے ایہہ وی کہیا:‏ ”‏مَیں پہلی وار سکھیا کہ خدا واقعی ہے وے۔ مَیں اوہدی ذات بارے سکھیا تے مینوں محسوس ہویا کہ مینوں اِک دوست مِل گیا اے۔“‏

17.‏ تُسی یہوواہ دے ناں دی وڈیائی کرن دا عزم کیوں کیتا اے؟ (‏تصویر نُوں وی ویکھو۔)‏

¹⁷ کیہہ تُسی مُنادی کردے ویلے تے لوکاں نُوں تلیم دیندے ویلے یہوواہ دا ناں دَسدے او؟ کیہہ تُسی اوہناں دی ایہہ جانن چ مدد کردے او کہ یہوواہ کیہو جہی ہستی اے؟ اِنج کر کے تُسی خدا دے ناں دی وڈیائی کردے او۔ لوکاں نُوں یہوواہ دی خوبیاں بارے سکھاندے رہوو تے اِنج اوہدے پاک ناں دی وڈیائی کردے رہوو۔ ایس طرحاں تُسی لوکاں دِیاں جاناں بچا سکو گے۔ تُسی اپنے بادشاہ یسوع دی مثال تے عمل کرو گے تے سب توں ودھ کے تُسی اپنے اسمانی باپ یہوواہ نُوں خوش کرو گے۔ دُعا اے کہ تُسی ہمیشاں تک یہوواہ دے ناں دی وڈیائی کردے رہوو۔—‏زبور 145:‏2‏۔‏