1, 2. ¿Juʼp akwiñkejoʼoyi tayooxpaʼtpa tan̈kutɨʼɨyɨy juʼuts in̈jaam Jehová iga kumɨgoyñeta?

 KUJƗƗSƗ iga algun i jempɨk iñtyoyba mikujɨyba. Mich iñjoodon̈ iga sɨʼ mikumɨgoy, pero weeñiyaj ikupɨkyajpa y mojpatyim in̈matyaj yɨʼp mɨgoʼoyi, y jaʼyan̈yaj ijoodon̈ayajpa. ¿Juʼutssɨ inin̈jaam? Min̈yaʼkwatpa jempɨk tun̈gakyaj ijɨɨsyajpa iga sɨʼ mikumɨgoytya (Prov. 22:1).

² Yɨʼp akwiñkejoʼoyi tayooxpaʼtpa tan̈kutɨʼɨyɨy juʼuts mu in̈jaam Jehová jesɨgam tuum imaanɨk sɨn̈yukmɨpɨk ikumɨgoy y ityuʼudɨyay iñɨɨyi. Eva ikupɨk jeʼm mɨgoʼoyi, jeʼyukmɨ kun Adán dyam ikupɨkyaj Jehová y sɨɨ tantumpɨytyam tatan̈kaɨytyaʼm y takaʼataʼmpa (Gén. 3:​1-6; Rom. 5:12). Jeʼm mɨgoʼoyi iga jeʼm Wookkɨʼɨwiñ nɨm en jeʼm jardín de Edén iktsukum jaʼyan̈ yaʼachaaji yɨʼp naxyukmɨ. Jeʼyukmɨ agui ity guerras, tayaʼachataʼmpa y takaʼataʼmpa. Jehová tsaam in̈yaʼkwatpa ityumpɨy yɨʼp. Pero jeʼ dyaʼ joʼyan̈jakneʼ y dyaʼ ichakneʼ iga maymayaap. Jeʼm Biblia nɨmpa iga jeʼ «jeʼm Dios maymaypɨk» (1 Tim. 1:​11, TNM).

3. ¿Juutypɨk wɨap tan̈kupujtaʼm jeʼm Jehová iñɨɨyi?

 ³ Taɨchtyam wɨaptyim tan̈kupujtaʼm jeʼm Jehová iñɨɨyi. ¿Juutypɨk? Jesɨk tan̈kupɨktaʼmpa yɨʼp an̈kiʼmayoʼoyi: «Kujiʼptaʼamɨ jeʼm Jehová iñɨɨyi» (Sal. 113:1). ¿Juutypɨk tan̈kujiʼppa? Jesɨk tanan̈madaʼyba tun̈gakyaj juʼuts Jehová. ¿Jeempɨktyim in̈wattoʼoba? Tanaʼmtaʼmiñ tukuteen jɨɨxiyaj iga tayooxpaʼttaʼmpa tan̈kujiʼptaʼm jeʼm Jehová iñɨɨyi kun ityumpɨy tananmaj.

TAMMAYMAYWATPA JEHOVÁ

4. An̈maatɨ kun tuum akwiñkejoʼoyi tyiʼiga Jehová maymay jesɨk tan̈kujiʼppa (aʼmɨtyim jeʼm imagen).

⁴ Jehová jeʼ jeʼm tanJaatun̈ sɨn̈yukmɨpɨk y ikusuʼnɨʼyba iga tan̈kujiʼbaʼyiñ iñɨɨyi (Sal. 119:108). ¿Nɨmtoʼoba yɨʼp iga jeʼm Dios tsampɨk pɨɨmiɨy jeextyim juʼuts jempɨk ityyaj yɨʼp naxyukmɨ iga maymayyaj numaaj jesɨk kujiʼpyajtaap? Dyaʼ. Iga tan̈wɨkutɨʼɨyɨʼyiñ, tan̈kujɨɨxiñ iga tuum wooñi iñuʼusmatspa ijaatun̈ y iñɨʼmaʼyba: «¡Tsaam mantoyba!». Jeʼm jaatun̈ tsaam maymay y wɨɨ in̈jaam iga nɨʼmaytya jeempɨk. ¿Tyiʼiga? ¿Ityogoyay iga kujiʼptaiñ iga wɨaiñ imaymaya? Dyaʼ. Yɨʼp jaatun̈ tsaam ikusuʼnɨʼyba iaʼm jesɨk jeʼm iyommaanɨk ikwiñkejaʼyba toyoʼoyi. Y ijoodon̈tyim iga yɨʼpyaj jaamoʼoyiyaj iyooxpaʼtpa iyommaanɨk iga maymayaiñ jesɨk mɨjan̈am. Jeempɨktyim naspa kun Jehová —jeʼm maaj wɨbɨk jaatun̈ iga tanaity— tsaam maymay jesɨk tan̈kujiʼptaʼmpa.

5. ¿Tyi tanakwiñkejpa jesɨk tan̈kujiʼppa Jehová?

⁵ Jeʼm Wookkɨʼɨwiñ takumɨgoyñetaʼmtyim y nɨmneʼ iga ni tuum de taɨchtyam tan̈kupɨktaʼmpa Dios jesɨk tannaskaʼaba kutɨʼɨchiyaj. Nɨmnetyim iga tanjagan̈tsakpa Dios siiga tanjɨɨspa iga jeempɨgam maaj tawɨnɨgaʼyba (Job 1:​9-11; 2:4). Pero Job ikwiñkej iga jeʼm Wookkɨʼɨwiñ tsaam mɨgoʼyba. ¿Y taɨchtyam? Jesɨk tan̈kujiʼptaʼmpa Jehová tanakwiñkejtaʼmpa iga jeʼm Wookkɨʼɨwiñ mɨgoʼyba. Tumtum de taɨchtyam wɨap tan̈kupujtaʼm jeʼm Jehová iñɨɨyi y wɨap tammaywattaʼm jesɨk takupɨgoytyaʼmpa (Prov. 27:11).

6. ¿Juutypɨk wɨap tan̈watkiʼpstaʼm jeʼm rey David y jeʼm levitas? (Nehemías 9:5).

⁶ Jempɨk ityoyyajpa Dios ikujiʼbayyajpa jeʼm iñɨɨyi kun ityumpɨy ianmaj. Jeʼm rey David ijaykunuʼk: «Mananmaj, kujiʼpɨ Jehová; ityumpɨy jempɨk ity ammɨjtayjom ikujiʼbaʼyiñ jeʼm iñɨɨyi santo» (Sal. 103:1). David ikutɨʼɨyɨyñeʼ idyɨk iga jesɨk tan̈kujiʼbaʼyba jeʼm iñɨɨyi, sɨʼtyim tan̈kujiʼp Jehová. Jesɨk tan̈kumaton̈ba jeʼm iñɨɨyi takjɨɨspa jeʼm wɨtampɨk cualidades iga iniity y ityumpɨy jempɨk iwatneʼ. David ijoodon̈ idyɨk iga jeʼm iJaatun̈ iñɨɨyi tsaam kuaʼyñeʼ y ikujiʼbaytyoʼoba idyɨk  kun ityumpɨy jempɨk iniity imɨjtayjom, yɨʼp nɨmtoʼoba kun ityumpɨy jeʼm iityi. Jeʼm levitas jeempɨktyim iwatyaj y nɨmyaj iga kun jeʼm in̈matyiyaj dyaʼ yajpa ikujiʼbayyaj jeʼm Jehová iñɨɨyi (maayɨʼ Nehemías 9:5). a ¡Tsaamsɨ maymaya Jehová jesɨgam ikumaton̈ iga sɨʼ ikujiʼpta!

7. ¿Juutypɨk tan̈kujiʼppa Jehová jeʼm an̈matkuyjom y kun tyityam tan̈watpa tumtum jaama?

⁷ Taɨchtyam tan̈kujiʼptaʼmpa Jehová jesɨk tanan̈madaʼyba tun̈gakyaj juutypɨk tayooxpaʼtneʼ y tyiʼiga tantoyba. Y jesɨk tanamuruyajpa, tansuntaʼmpa iga ikunuʼkyajiñ y ityoyyajiñtyim (Sant. 4:8). Tsaam tamaymaytyam iga tanan̈kejayyajpa kun jeʼm Biblia jeʼm wɨtampɨk cualidades iniitywɨʼɨp, juʼuts jeʼm ityoyoʼoyi, jeʼm ijusticia, jeʼm ijoodon̈oʼoyi y jeʼm ipɨɨmi. Wɨaptyim tan̈kujiʼp Jehová y tammaymaywat jesɨk tan̈watkiʼpspa (Efes. 5:1). Jesɨk tan̈watpa yɨʼɨmpɨk, tun̈gakyaj iaʼmyajpa iga dyaʼ tajeextyam juʼuts jempɨk imalwatyajpa y nakwaʼkyajtaap tyiʼiga (Mat. 5:​14-16). Y wɨapsɨ iga kun tyityam tan̈watpa tumtum jaama, tanaitypa tuum oportunidad iga tanan̈madayyajpa. Y jempɨk wɨanmajyaj ikunuʼkyajtoʼoba tanDios. Jehová tsaam maymay jesɨk tan̈kujiʼptaʼmpa de yɨʼpyaj maneras (1 Tim. 2:​3, 4).

TAMMAYMAYWATPA JESÚS

8. ¿Tyiʼiga Jesús jeʼam jeʼm maaj wɨbɨk akwiñkejoʼoyi iga ikujiʼbay jeʼm Jehová iñɨɨyi?

⁸ Ikuwɨtyi sɨn̈yukmɨ y naxyukmɨ, jempɨk maaj iwɨixpɨkpa Jehová jeʼ Jesús (Mat. 11:27). Jeʼ tsaam ityoyba iJaatun̈ y tan̈kejayñeʼ juutypɨk tan̈kujiʼbaʼyiñ jeʼm Jehová iñɨɨyi (Juan 14:31). Jeʼm tsuʼu wiñtyi iga kaʼiñ, in̈wejpaʼt iJaatun̈ y in̈mat tyiapaʼap jempɨk maaj ityegueda jeʼm an̈matkuyjom y nɨm: «Aŋwɨ̱aŋquejáy jeeyaj iga icutɨɨyɨyyajiñ iga mii̱apaap mimich» (Juan 17:26). ¿Juutypɨk iwat?

9. Iga wɨixpɨktaiñ juʼuts Jehová, ¿juʼp parábola in̈mat Jesús?

⁹ Jesús dyaʼ numaaj in̈mat iga Dios iñɨɨyi Jehová. Jeʼm judíojyaj ijoodon̈yajam idyɨk. Jeʼ in̈kej «juutspɨc Dios jém tanJa̱tuŋ Dios» (Juan 1:​17, 18). Juʼuts akwiñkejoʼoyi, jeʼm Escrituras Hebreas nɨmpa iga Jehová tsaam yaʼachan̈jaamoʼyba (Éx. 34:​5-7). Iga wɨkutɨʼɨyɨytyaiñ yɨʼp an̈kejayoʼoyi Jesús in̈mat tuum parábola juuty ijɨykiʼmpa iga tuum pɨɨxiñ jɨɨxtyogoy jeʼm imaanɨk. Jesɨk tammayba iga jeʼm jaatun̈ iix iga «juumɨnam miñi» imaanɨk, poʼyan̈tsukum, iñuʼusmats y iwaday perdón, yɨʼp tan̈kejaʼyba iga Jehová yaʼachan̈jaamoʼyba y toyoʼyba (Luc. 15:​11-32). Wɨkejpa iga Jesús iyooxpaʼt tun̈gakyaj iga iixpɨkyajiñ Jehová.

10. a) ¿Juutypɨk tanjoodon̈tam iga Jesús ipɨgay jeʼm iJaatun̈ iñɨɨyi y ixunba iga tun̈gakyaj jeempɨktyim iwatyajiñ? (Marcos 5:19; aʼmɨtyim jeʼm imagen). b) ¿Tyi ixunba Jesús iga tan̈wattaʼmiñ taɨchtyam?

¹⁰ ¿Ixunba idyɨk Jesús iga pɨgaytyaiñ jeʼm iJaatun̈ iñɨɨyi? Jɨ. Wɨapsɨ iga weeñi líderes religiosos iga jaʼy ityiyaj peʼm tiempo, ijɨɨsyajpa idyɨk iga jeʼm Dios iñɨɨyi tsaam sagrado y odoy jɨykiʼmaytyaiñ. Pero Jesús dyaʼ iaʼmchiʼ iga yɨkxpɨk jɨɨxi —iga dyaʼ idyɨk ity jeʼm Dios In̈matyijom— iktsaguiñ iga ikujiʼbaʼyba jeʼm iJaatun̈ iñɨɨyi. Tan̈kujɨɨstaʼmiñ jesɨgam ikpɨs tuum pɨɨxiñ endemoniado jeʼm an̈eymɨ juuty ityyaj jeʼm gerasenos. Jaʼyan̈yaj tsaam an̈jeʼkyaj y iñɨʼmayyaj Jesús iga nɨguiñam (Mar. 5:​16, 17). Pero jeʼ ixunba idyɨk iga ixpɨgaytyaiñ jeʼm Jehová iñɨɨyi. Jeʼyukmɨ  iñɨʼmay jeʼm pɨɨxiñ iga in̈madaʼyiñ tun̈gakyaj jempɨk Jehová —y dyaʼ Jesús— iwatneʼ idyɨk por jeʼ (maayɨʼ Marcos 5:19). b TanAn̈jagoʼoyi Jesús ixunba iga jeempɨktyim tan̈wadyiñ, tanan̈kejayyajiñ ityumpɨyyaj jeʼm Jehová iñɨɨyi (Mat. 24:14; 28:​19, 20). Jeʼ tsaam maymay jesɨk tan̈watpa yɨʼɨmpɨk.

11. ¿Tyi iñɨʼmay Jesús jempɨk ityun̈ɨyyajpa iga iwaʼkyajiñ jeʼm ian̈wejpadoʼoyijom? Y juʼuts nɨmpa Ezequiel 36:​23, ¿tyiʼiga tsaam importante?

¹¹ Jesús ijoodon̈ idyɨk iga Jehová ikkuaʼytyoʼoba jeʼm iñɨɨyi iga tsaam kumɨgoyñeta, y jeʼam jempɨk iwatpa. Jeʼyukmɨ in̈kejay jempɨk ityun̈ɨyyajpa iga nɨmyajiñ yɨʼɨmpɨk jesɨk in̈wejpaʼtyajpa Dios: «ManJaatun̈, miitywɨʼɨp sɨn̈yukmɨ, kuaʼyiñ jeʼm iññɨɨyi» (Mat. 6:​9, TNM). Ijoodon̈ idyɨk iga yɨʼbam jempɨk maaj importante (maayɨʼ Ezequiel 36:23). c Jesús tsaam ityegueda iga ikkuaʼyaʼyba jeʼm Jehová iñɨɨyi. Pero jesɨgam matsta, kumɨgoytya iga iwatneʼ tuum mɨjpɨk tan̈kaʼ iga jeʼ tsaam ijooyixpa. An̈joʼtsta de blasfemia, yɨʼp nɨmtoʼoba iga ityuʼudɨyayñeʼ jeʼm Dios iñɨɨyi. Y wiñtyi iga matstaiñ, pɨɨmi an̈yaʼkne’ idyɨk iga kumɨgoytyaap y akkaʼataap por yɨʼp tan̈kaʼ. Wɨapsɨ iga jeʼyukmɨ jeʼm Biblia nɨmpa iga «tsa̱m pɨ̱mi ijɨ̱spa iga accaata̱p» (Luc. 22:​41-44).

12. ¿Juutypɨk Jesús iwɨakkuaʼyay jeʼm iJaatun̈ iñɨɨyi?

¹² Jesús ikkuaʼyaytyoʼoba idyɨk jeʼm iJaatun̈ iñɨɨyi, jeʼyukmɨ iyaʼachɨy iga malnɨʼmaytya, kumɨgoytya y yaʼachwatta. Dyaʼ tsaʼa mex iga akkaʼata, ijoodon̈ idyɨk iga juchixkej kupɨgoy (Heb. 12:2). Ijoodon̈tyim idyɨk iga jempɨk sɨʼ imalwaday, jeʼ jeʼm Wookkɨʼɨwiñ (Luc. 22:​2-4; 23:​33, 34). Jeʼ ixunba idyɨk iga Jesús odoy ikupɨguiñ Jehová, pero dyaʼ iwɨpuday jeʼm ijɨɨxi. Jesús ikwiñkej iga jeʼm Wookkɨʼɨwiñ mɨgoʼyba y ikwiñkejtyim iga Jehová iniity iyooxakɨʼɨwiñyaj iga kupɨgoyyajpa mex iga yaʼachwatyajtaap.

13. ¿Tyi tan̈wadyiñ iga tammaymaywadyiñ jeʼm tanAn̈jagoʼoyi?

¹³ ¿Immaymaywattoʼoba jeʼm An̈jagoʼoyi Jesucristo? Odoy tsaakɨ iga in̈kujiʼppa jeʼm Jehová iñɨɨyi y yooxpaʼatɨ tun̈gakyaj iga  iixpɨkyajiñ. Yɨʼɨmpɨgam in̈watkiʼpspa Jesús (1 Ped. 2:21). Y juʼutstyim jeʼ, immaymaywatpa Jehová y inikwiñkejpa iga jeʼm ienemigo, jeʼm Wookkɨʼɨwiñ, tsaam mɨgoʼyba.

TANYOOXPAʼTYAJIÑ TUN̈GAKYAJ IGA NAKƗAKPUTYAJTAIÑ

14, 15. ¿Tyi naspa jesɨk tanyooxpaʼtpa tun̈gakyaj iga iixpɨkyajiñ Jehová?

¹⁴ ¿Tyiʼiga tanɨmpa iga jesɨk tan̈kujiʼbaʼyba jeʼm Jehová iñɨɨyi tanyooxpaʼtpa tun̈gakyaj iga nakɨakputyajtaiñ? Tan̈kujɨɨstaʼmiñ iga jeʼm Wookkɨʼɨwiñ «icácht́iwatne jém pɨxiñt́am, jém d́apɨc icupɨcyajpa» Dios (2 Cor. 4:4). Jeʼyukmɨ jaʼyan̈yaj ikupɨgayñeyaj jeʼm imɨgoʼoyi y ijɨɨsyajpa iga dyaʼ i Dios, dyaʼ wɨap tan̈kunuʼktaʼm, dyaʼ tateguettam, dyaʼ toyoʼyba y juchixkej iyaʼachwatpa jempɨk malojyaj. Yɨʼpyaj mɨgoʼoyiyaj ityuʼudɨyaʼyba jeʼm Jehová iñɨɨyi y iwatpa iga tun̈gakyaj odoy ikunuʼkyajiñ. Pero jesɨk tanan̈kejayyajpa juʼuts jeʼm tanJaatun̈ Jehová, tan̈kujiʼbaʼyba jeʼm iñɨɨyi y dyaʼ tanaʼmchiʼiba iga jeʼm Wookkɨʼɨwiñ iwɨpudaʼyiñ ijɨɨxi. ¿Juutypɨk iwɨwadayyajpa?

¹⁵ Jeʼm an̈kejayoʼoyiyaj itywɨʼɨp Bibliajom tsaam yooxpadoʼyba. Jeempɨgam naspa jesɨk tanan̈kejaʼyba tun̈gakyaj iapaʼap Jehová y juʼutspɨk Dios. Jesɨk ikutɨʼɨyɨyyajpa iga jeʼm Wookkɨʼɨwiñ tsaam mɨgoʼyba, mojpa iaʼmyaj jeʼm tanJaatun̈ juutypɨgam taɨchtyam tanaʼmtaʼmpa. Tsaam igaʼman̈jakyajpa iga agui pɨɨmiɨy (Is. 40:26). Y jeʼm ijusticia iyooxpaʼtyajpa iga iniidyayyajiñ confianza (Deut. 32:4). Tsaam maymayayajpa iga jeʼ iniity jaʼyan̈ joodon̈oʼoyi (Is. 55:9; Rom. 11:33). Y jesɨk ikuyujkayajpa iga tsaam toyoʼyba tsaam wɨɨ in̈jaamyaj (1 Juan 4:8). Jesɨk iixpɨkyajpa Jehová, ikupɨkyajpa iga wɨap iityyaj juchixkej y ichɨʼyyaj juʼuts imanɨktam. ¡Tsaam tamaymaytyam iga wɨap tanyooxpaʼtyaj iga ikunuʼkyajiñ tanJaatun̈ sɨn̈yukmɨpɨk! Y jesɨk tan̈watpa yɨʼɨmpɨk, Jehová iaʼmpa iga sɨʼ tanyooxpaʼt (1 Cor. 3:​5, 9).

16. ¿Juutypɨk iwɨwadaʼyba algun i jesɨk ijoodon̈aap i iñɨɨyi Dios? An̈maatɨ tuum akwiñkejoʼoyi.

¹⁶ Jesɨk tanamurupa algun i wɨapsɨ iga numaaj tanan̈kejaʼyba iga Dios iñɨɨyi Jehová. Y jempɨk iniityyaj tuum wɨbɨk anmaj wɨap  ikagayyaj iityi. Juʼuts akwiñkejoʼoyi, tuum wooñyoomoʼ iga iñɨɨyi Alía d mɨja en tuum familia iga ireligión dyaʼ jeʼ cristiana. Pero dyaʼ maymay idyɨk kun jempɨk an̈kejayñeta y dyatyim iyooxpaʼtneʼ idyɨk iga ikunuʼguiñ Dios. Pero kukak jeʼm iityi jesɨk moj kuyuuji kun jeʼm Testigojyaj. Dyaʼ wɨap idyɨk ikupɨk iga en waatyi Biblia kukagayñeta jeʼm Dios iñɨɨyi por Omi. Jesɨk ijoodon̈a i iñɨɨyi Dios pɨɨmi iyooxpaʼt, moj iaʼm juʼuts iamigo. Kun maymayaaji nɨm: «¡Jeʼm maaj wɨbɨk anamigo iniity iñɨɨyi!». Jeʼ nɨmpa: «Tsaam anaity paz y pɨɨmi amaymay». Steve jeʼ tuum pɨɨxiñ iga músico idyɨk y mɨjaneʼ en tuum familia judía iga iwɨkupɨkneʼ jempɨk an̈kejayñeyajta, ipɨkneʼ idyɨk ijɨɨxi iga dyaʼ tɨgɨykuʼmpa en ni tuum religión iga tsaam mɨgoyyajpa. Pero jesɨgam kaʼ tuum ifamiliar, jeʼ moj ikumaton̈ jesɨk tuum Jehová itestigo sɨʼ idyɨk ikkuyujoy. Pɨɨmi maymaya jesɨgam ijoodon̈a i iñɨɨyi Dios. Jeʼ nɨmpa: «Ni keman an̈kujɨɨs i iñɨɨyi Dios». Y nɨmtyim: «Jesɨgam, moj anaʼm iga Dios nunta ity y ampaʼt tuum wɨbɨk anamigo».

17. ¿Tyiʼiga seguido in̈kujiʼbaytyoʼoba jeʼm Jehová iñɨɨyi? (Aʼmɨtyim jeʼm imagen).

¹⁷ Jesɨk taputpa jeʼm an̈matkuyjom, ¿tanan̈kejayyajpa iapaʼap iñɨɨyi Dios y juʼutspɨk cualidades iniity? Siiga jeempɨgam tan̈watpa sɨʼ tan̈kujiʼbay jeʼm iñɨɨyi. Jeʼyukmɨ seguido tanyooxpaʼtyajiñ tun̈gakyaj iga iixpɨkyajiñ Jehová y wɨaiñtyim ikujiʼbayyaj iñɨɨyi. Jesɨk in̈watpa yɨʼɨmpɨk miyooxpadoʼyba iga tun̈gakyaj nakɨakputyajtaiñ, iñtyun̈ɨʼyba jeʼm tanAn̈jagoʼoyi Jesucristo iakwiñkejoʼoyi y immaymaywatpa jeʼm tanJaatun̈ Jehová. Juʼutstyim jempɨk ijay jeʼm Salmo 145:​2, tantumpɨytyam tanɨmtaʼmiñ: «Ni keman antsakpa iga an̈kujiʼppa jeʼm iññɨɨyi».