1-2. Dahme kak sewese kitail en wehwehki ia sapwellimen Siohwa pepehm ni ahnsou me karaun likamw wiawihong mwareo?

 MEDEWEHLA met: Aramas emen me ke kin kesempwalki ndahkin uhk mehkot suwed. Ke ese me likamw pwoat me, ahpw ekei kamehlele. Suwedsang met, irail tepida kihpeseng likamwo, oh me tohto pil kamehlele. Ia pahn omw pepehm? Ma ke kin nsenohki aramas oh omw adamwahu, karaun likamw wet pahn kansensuwedihiukala, kaidehn?—Lep. Pad. 22:1.

² Karasaras wet kak sewese kitail en wehwehki ia sapwellimen Siohwa pepehm ni ahnsou me ekei kahdsuwedihala mwareo. Emen sapwellime tohnleng ko karaunlikamwih Ih ong tepin liho, Ihp. Ihp kamehlele likamwo. Likamwo kahrehiong tepin atail pahpa nohno en uhwongada Siohwa. Pwehki met, dihp oh mehla lelohng aramas koaros. (Sen. 3:​1-6; Rom 5:12) Kahpwal kan koaros me kitail kin kilang nin sampah—mehla, mahwen, lokolok—kin wiawi pwehki likamw kan me Sehdan tepida kihpeseng nan mwetuwel en Ihden. Ia duwe, Siohwa ketin kupwurtoutoukihla karaun likamw pwukat oh kahpwal kan me likamw pwukat kahrehda? Ei uhdahn. Ahpw Siohwa sohte kin ketin kolokolete sapwellime engieng. Ni mehlel, e ketin wiahte “Koht me peren.”—1 Tim. 1:11.

3. Pai kaselel dahieu me kitail ahneki?

³ Kitail ahneki pai kaselel en sewese kadehdehda me Sehdan likamwkihda soahng kan duwen Siohwa. Kitail kak wia met sang ni atail peikiong kehkehliko en ‘kapinga mwaren Siohwa!’ (Mel. 113:1) Kitail kin kapinga mwaren Siohwa sang ni atail padahkihong meteikan dahme mehlel duwen ih. Ke pahn kapinga mwaren Siohwa? Kitail pahn koasoiapene kahrepe kesempwal siluh me pahn sewese kitail en kapinga mwaren atail Kohto sang atail mohngiong unsek.

 KITAIL KIN KAPERENDA SIOHWA NI ATAIL KAPINGA MWARE

4. Dahme kahrehda atail kaping kin kaperenda Siohwa? Menlau kihda ehu karasaras. (Pil kilang kilel.)

⁴ Kitail kin kaperenda Samatailo nanleng ni atail kin kapinga mware. (Mel. 119:108) Ia duwe, met wehwehki me Koht wasa lapalahpie kin duwehte aramas soh unsek kan me men meteikan en kapinga irail pwehki re anahne kangoang? Soh. Medewehla karasaras wet. Kisin serepein kis tangala rehn eh pahpao, pwoalehdi, oh nda, “Ipa, kowe me keieu nan sampah pwon!” Pahpao sirei oh uhdahn perenkihda. Dahme kahrehda? Kaidehn pwehki e anahne kangoang oh kaping sang rehn nah serepeino. Ahpw pwehki e poakohng nah serepeino oh perenki me serio kasalehiong ih eh limpoak oh kalahngan. E ese me serio pahn keirda wia aramas peren men pwehki e kin kasalehda limpoak oh kalahngan. Duwehte met, Samatail me keieu lapalapo, Siohwa, kin ketin kupwurperenki ni atail kin kapinga ih.

5. Ni atail kin kapinga Siohwa, dahme kitail kin kadehdehda me likamw?

⁵ Ni atail kin kapinga Samatailo nanleng, kitail kin sewese kadehdehda pil ehu likamw me Sehdan ndahki emenemen kitail. Sehdan kose me dene sohte aramas emen pahn uhki mwaren Koht ni loalopwoat. E kose me sohte emen rehtail pahn lelepekte ong Koht ni atail kin lelohng kasongosong. E pil nda me kitail koaros pahn uhdihsang papah Koht ma kitail medewe me met pahn mwahu ong kitail. (Sohp 1:​9-11; 2:4) Ahpw Sohp lelepekte oh kadehdehda me Sehdan likamw. Ia duwen kowe? Emenemen kitail kak pilada en uhki Samatailo oh kaperenda ih sang ni atail kin papah ih ni lelepek. (Lep. Pad. 27:11) E uhdahn wia pwais kaselel ehu en wia met.

6. Ia duwen atail kak alasang Nanmwarki Depit oh mehn Lipai ko? (Nehmaia 9:5)

⁶ Irail kan me kin poakohng Siohwa kin men kapinga mware sang arail mohngiong unsek. Nanmwarki Depit ntingihedi: “I en kapinga Siohwa; soahng koaros loaleiet en kapinga mware sarawi.” (Mel. 103:​1, NW) Depit ese me atail kapinga mwaren Siohwa kin duwehte atail kapinga Ih. Ni atail rong mwaren Siohwa, kitail kin medewe duwen soangen Koht dahmen ih, sapwellime irair kaselel koaros oh sapwellime wiewia kapwuriamwei kan. Depit men wiahki mwaren Semeo mwar sarawi ehu oh kapinga. E men wia met sang ni ‘soahng koaros loale’—me iei ni mohngiong unsek. Duwehte met, mehn Lipai ko kin tiengla mwowe en kapinga Siohwa. Ni aktikitik irail pohnese me dahme irail nda sohte kak itar en uhdahn  kasalehda kaping laud me warohng mwaren Siohwa me sarawi. (Wadek Nehmaia 9:5.) Ei uhdahn, soangen kaping karakarahk wet kin kaperenda kupwuren Siohwa.

7. Ia duwen atail kak kapinga Siohwa nan kalohk oh nan atail mour en ehuehu rahn?

⁷ Rahnwet, kitail kak kaperenda Siohwa sang ni atail kin koasoia duwen ih ni ahl ehu me kasalehda uwen atail kalahngan oh poakohng ih. Nan kalohk, atail mehn akadei iei en sewese meteikan en karanihala Siohwa oh poakohng Ih duwehte atail kin poakohng. (Seims 4:8) Kitail kin perenki kasalehiong aramas akan ia duwen Paipel eh kawehwehda duwen Siohwa, sapwellime limpoak, pwung pahrek, erpit, manaman, oh irair kaselel teikan. Kitail pil kin kapinga Siohwa oh kaperenda ih sang ni atail nantihong en kahlemengih ih. (Ep. 5:1) Ni atail wia met, meteikan ele pahn kilang me kitail weksang aramas en sampah suwed wet oh men ese dahme kahrehda. (Mad. 5:​14-16) Nan atail mour en ehuehu rahn ni atail iang irail doadoahk de wia soahng teikan, ele kitail kak kawehwehiong irail kahrepen atail wiewia kan. Eri, me ahneki mohngiong mehlel kan pahn men karanihala atail Kohto. Ni atail kin kapinga Siohwa ni soangen ahl pwukat, kitail kin kaperenda kupwure.—1 Tim. 2:​3, 4.

KITAIL KIN KAPERENDA SISES NI ATAIL KAPINGA MWAREN SIOHWA

8. Dahme kahrehda Sises ketin wia mehn kahlemeng keieu mwahu en kapinga mwaren Siohwa?

⁸ Sohte emen nanleng de nin sampah me ese Siohwa laudsang Sises. (Mad. 11:27) Sises ketin poakohng Semeo, oh ketin kasalehdahr mehn kahlemeng en kapinga mwaren Siohwa. (Sohn 14:31) Nan eh kapakap ong Semeo nipwongo mwohnte eh pwoula, Sises ketin kawehwehda ni ahl wet dahme keieu kesempwal me e ketin wiahda: “Ngehi me kahrehiong irail en ese mwaromwi.” (Sohn 17:26) Ia duwen Sises eh ketin wia met?

9. Karasaras dahieu me Sises ketin doadoahngki pwehn kawehwehda mwahu duwen Semeo?

⁹ Sises ketin wia laudsang en padahkihongete aramas akan me mwaren Koht iei Siohwa. Mehn Suhs kan me Sises ketin padahki eseier mwaren Koht. Ahpw Sises ketin tiengla mwowe oh “patohwan kawehwehdahr duwen Ih.” (Sohn 1:​17, 18) Karasepe, Palien Paipel ni Lokaiahn Ipru kasalehda me Siohwa kin ketin kadek kalahngan oh kupwurkalahngan. (Eks. 34:​5-7) Sises ketin kalaudehla ire mehlel wet ni eh ketin doadoahngki karasaras en pwutak me salongalao oh eh pahpao. Ni atail wadek duwen pahpao eh kilangada nah pwutak me koluhlahro “eh mihmihte wasa doh,” oh tangala pwehn tuhwong oh pwoalehdi, oh uhdahn mahkohng, kitail kin uhdahn wehwehkihla uwen Siohwa eh kin ketin kadek kalahngan oh kupwurkalahngan. (Luk 15:​11-32) Sises ketin sewese aramas akan en wehwehki soangen Koht dahmen Siohwa.

10. (a) Ia duwen atail ese me Sises ketin doadoahngki mwaren Semeo oh kupwurki meteikan en pil wia duwehte? (Mark 5:19) (Pil kilang kilel.) (b) Dahme Sises kupwurki kitail en wia rahnwet?

¹⁰ Ia duwe, Sises pil kupwurki meteikan en doadoahngki mwaren Semeo? Ei uhdahn. Ekei kaunen pelien lamalam ele kamehlele me en nda mwaren Koht kin kasalehda atail sohte wauneki, ahpw Sises sohte ketin mweidohng soangen madamadau wet me sohte poahsoankihda Paipel en kauhdi ih sang en kawauwih mwaren Semeo. Medewehla ahnsou me e ketin kamwahwihala ohl me ngehn suwed tiada powe nan sapwen mehn Kerasa kan. Aramas ako masepwehkada oh peki Sises en ketila sang wasao. (Mark 5:​16, 17)  Ahpw Sises kupwurkihte aramas ako en esehla mwaren Siohwa. Eri e kehkehlingkihong ohlo me e kamwahwihala en padahkihong aramas ako, kaidehn dahme e wiahda, ahpw dahme Siohwa ketin wiahda. (Wadek Mark 5:19.) a E pil kupwurkihte kitail en wia met rahnwet—en kalohkihong sampah pwon duwen mwaren Semeo! (Mad. 24:14; 28:​19, 20) Ni atail kin wia met, kitail kin kaperenda atail Nanmwarkio Sises.

11. Dahme Sises ketin padahkihong sapwellime tohnpadahk kan en kapakapki, oh dahme kahrehda met kesempwal? (Esekiel 36:23)

¹¹ Sises mwahngih me kupwuren Siohwa iei en kasarawihala Mwareo, oh kamwekelehsang karaunlikamw koaros me wiawihong. Ihme kahrehda e ketin padahkihong sapwellime tohnpadahk kan en kapakapki: “Samat me ketiket nanleng, mwaromwi en sarawihla.” (Mad. 6:9) Sises mwahngih me ire wet iei me keieu kesempwal oh kin pidada koaros me mi nanleng oh pil nin sampah. (Wadek Esekiel 36:23.) Sohte emen nanleng de nin sampah me kasarawihala mwaren Siohwa laudsang me Sises ketin wia. Ahpw ni ahnsou me Sises ketin selidi, sapwellime imwintihti ko karaunehki me e ketin lahlahwe Semeo! Ong Sises, en kauwe de karaunlikamwih mwaren Semeo me sarawi iei dihp me keieu suwed. E uhdahn kupwurtoutoukihla arail pahn karaunehki oh salihedi ih pwehki met. Ele ih kahrepe wet me Sises “ketin pwunodada kowahlap” mwohnte arail salihedi ih.—Luk 22:​41-44.

12. Ni soahng laud dah me Sises ketin kasarawihala mwaren Semeo?

¹² Pwehn kasarawihala mwaren Semeo, Sises ketin dadaur pahn soangen kalokolok, kanamenek, oh karaunlikamw koaros me wiawihong ih. E mwahngih me e ketin peikiong Semeo ni soahng koaros, oh sohte mehkot me e anahne namenengki. (Ipru 12:2) E pil mwahngih me Sehdan me kalokaloke ih ni ahnsou apwalo. (Luk 22:​2-4; 23:​33, 34) Sehdan uhdahn men kahrehiong Sises en sohla ketin lelepek; ahpw e sohte douluhl pweida! Sises ketin kadehdehda ni sansal me Sehdan uhdahn sounlikamw men oh Siohwa sapwellimanki ladu loalopwoat kan me kin lelepekte pil ni arail kin mi pahn kasongosong keieu laud kan!

13. Ia duwen omw kak kaperenda omw Nanmwarkio me wie kakaun?

 ¹³ Ke men kaperenda omw Nanmwarkio me wie kakaun? Pousehlahte kapinga mwaren Siohwa, sewese meteikan ren sukuhlki soangen irair kaselel koaros me atail Kohto sapwellimanki. Ni omw wia met, ke kin kahlemengih Sises. (1 Pit. 2:21) Duwehte Sises, ke kin kaperenda Siohwa oh kadehdehda me sapwellime imwintihtio, Sehdan, uhdahn sounlikamw men!

KAPINGA MWAREN SIOHWA KIN SEWESE DOAREHLA MOUREN ARAMAS

14-15. Soahng kaselel dah kan me kak wiawi ni atail padahkihong aramas akan duwen Siohwa?

¹⁴ Ni atail kin kapinga mwaren Siohwa, kitail kin sewese doarehla mouren aramas akan. Ia duwen? Sehdan “kin karotongehla madamadau en me seupwoson akan.” (2 Kor. 4:4) Pwehki met, aramas akan kamehlelehla ahn Sehdan likamw kan duwehte: Koht sohte ketin ieias, Koht ketin dohsang aramas oh sohte ketin nsenohki irail, Koht ketin lemei oh kin kaloke me dipan kan kohkohlahte. Sehdan wiahda likamw pwukat koaros pwehki e men kauwehla adamwahu en Siohwa oh kauhdi aramas akan en dehr karanihala Koht. Ahpw ni atail kin kalohk, kitail kin kalowehdi dahme Sehdan men wia. Kitail kin padahkihong aramas akan dahme mehlel duwen Samatailo oh kin kapinga mwaren atail Koht me sarawi. Ia imwilahn met?

¹⁵ Padahk mehlel en Mahsen en Koht uhdahn manaman. Ni atail kin padahkihong aramas akan duwen Siohwa oh soangen Koht dahmen ih, kitail kin kilang soahng kaselel kan wiawi. Aramas akan sohla kamehlele ahn Sehdan likamw kan, oh re kak tepida kilang irair kaselel kan me Samatailo sapwellimanki. Re kin uhdahn waunekihla sapwellime manaman lapalap me sohte irepe. (Ais. 40:26) Irail kin sukuhlki en likih ih pwehki sapwellime pwung pahrek me unsek. (Deud. 32:4) Irail kin sukuhlki soahng tohto sang sapwellime erpit me inenen laud. (Ais. 55:9; Rom 11:33) Oh arail esehla me ih Koht limpoak men kin kansenamwahwihirailla. (1 Sohn 4:8) Ni arail kin karanihala Siohwa, arail koapworopwor en mour kohkohlahte nin duwen sapwellime seri kei kin laudla. E uhdahn wia pwais kaselel  ehu ong kitail en sewese aramas akan en karanihala Samarailo! Ni atail wia met, Siohwa kin ketin wiahkin kitail ‘ienge tohndoadoahk.’—1 Kor. 3:​5, 9.

16. Ia duwen ekei ar mwekidkihda ar sukuhlki mwaren Koht? Menlau kihda karasaras kan.

¹⁶ Nin tapio, ele kitail kin padahkihongete aramas akan me mwaren Koht iei Siohwa. Met kak uhdahn wekidala mour en emen me ahneki mohngiong mehlel. Karasepe, peinakapw men me adaneki Aaliyah b tikida nan pelien lamalam ehu me sohte kin padahk sang nan Paipel. Ahpw eh pelien lamalamo sohte kaitarala dahme e men ese de kahrehiong en karanihala Koht. Met wekila mwurin e tepida onop rehn Sounkadehde kan. E tepida wiahki Koht Kompoakepah. Oh e uhdahn pwuriamweila ni eh sukuhlki me ekei kihsang mwaren Koht nan Paipel tohto oh uhd wiliankihdi lengileng kei, duwehte Kaun. Eh sukuhlki mwaren Siohwa uhdahn wekidala eh mour. E koasoia: “Uhdahn mie eden Kompoakepahi kereno!” Ia imwilahn met? E koasoia: “Met I ahneki meleilei laud. I uhdahn kalahnganki met.” Emen ohl me adaneki Steve wia sounkoul men me tikida nan tiahk en mehn Suhs me uhdahn kakos. E sohte men iangala pelien lamalam ehu pwehki e kin kilang wiewiahn mwalaun tohto. Ahpw mwurin eh nohnou mehla, e pwungki en mwohdehng onop en Paipel ehu me Sounkadehde men wia. E uhdahn mwekidkihda ni eh sukuhlki mwaren Koht. E koasoia: “Sohte me padahkihong ie mwaren Koht.” E pil nda: “Ehdin ei wehwehkihda me Koht uhdahn ketin ieias! I kilang me E uhdahn mehlel. Ni ahnsowo I esehda me I diaradahr Kompoakepahi men.”

17. Dahme kahrehda ken koasoanehdi teng en doulahte kapinga mwaren Siohwa? (Pil kilang kilel.)

¹⁷ Ni omw kin kalohk oh padahk, ke kin ehukihong aramas akan duwen mwaren Siohwa me sarawi? Ke kin sewese irail en kilang soangen Koht dahmen ih? Ni omw wia met, ke kin kapinga mwaren Koht. Eri doulahte kapinga mwaren Siohwa me sarawi sang ni omw kin sewese aramas akan ren esehla uhdahn Koht dahmen ih. Ni ahl wet, ke pahn doarehla mouren aramas akan. Ke pahn kahlemengih omw Nanmwarkio, Krais Sises. Oh kesempwal sang met, ke pahn kaperenda Semomw limpoako, Siohwa. Eri, ken ‘kapinga mware kohkohlahte.’—Mel. 145:​2, NW.