1-2. Ke ku pudi judanu ntindi kuma ku Jeova ta sinti manera ku si nomi danadu?

 IMAẐINA kuma un algin ku bu ta preokupa ku el konta un mau kusa kontra bo. Bu sibi di kuma i mintida; ma, alguns fia nel. Pior inda, e kumsa ku spalia ki mintida i manga di jintis fia nel tambi. Kuma ku bu na sinti? Si bu gosta di jintis i bu ta preokupa ku ke ke ta pensa aserka di bo, sera ki kil mintida ka na fasiu sinti mal? — Dit 22:1.

² Es isemplu pudi judanu ntindi kuma ku Jeova sinti oca ku si nomi danadu. Un di si fijus spiritual konta mintida aserka del pa purmeru minjer, ku sedu Eva. I fia na ki mintida. Es mintida leba no purmeru papes rebela kontra Jeova. Pa kila, pekadu ku mortu yentra na mundu. (Kum 3:​1-6; Rom 5:12) Tudu purblemas ku ten na mundu aos suma mortu, gera ku sufrimentu, i pabia di mintida ku Satanas kumsa ku spalia na jardin di Eden. Sera ki Jeova fika mal pabia des mintida ku purblemas ki tisi? Jeova fika mal, ma i ka paña raiba. Na bardadi, i kontinua sedu “Deus filis.” — 1 Tim 1:​11, Tradução do Novo Mundo.

3. Kal privileẑiu ku no tene?

 ³ No tene privileẑiu di juda na difindi nomi di Jeova, ora ku no obdisi es mandamentu simplis: ‘Bo ngaba nomi di Jeova.’ (Sal 113:1) No ta ngaba nomi santu di Jeova, ora ku no ta papia ben del. Sera ki bu na fasil? No jubi tris motivus forti ku na judanu ngaba nomi di no Deus ku tudu korson.

NO TA KONTENTA JEOVA ORA KU NO NGABA SI NOMI

4. Pabia ku no ta kontenta Jeova ora ku no ngabal? Bu pudi da un isemplu. (Jubi tambi foto.)

⁴ No ta kontenta no Pape ku sta na seu ora ku no ngaba si nomi. (Sal 69:​30, 31) Ma, sera ki es signifika di kuma Deus ku tene tudu puder i suma jintis imperfeitu ku misti pa utrus ngaba elis pabia e pirsisa di nkoraẑamentu? Nau. Jubi un isemplu. Imaẑina un bajudasiñu kuri i bai nunde si pape i barsal i falal: “Abo i minjor pape na tudu mundu!” Pape ri i kontenti dimas. Pabia? Sera ki no pudi fala di kuma es omi pirsisa di nkoraẑamentu di si fiju o pa i ngabal? Nau. En ves di kila, i pabia di kuma i ama si fiju, tambi i kontenti pa manera ku si fiju mostral amor i da balur pa ke ki fasi. I sibi di kuma es maneras di sedu na judal sedu filis nkuantu i na kirsi. Di mesmu manera, Jeova, no Pape mas garandi, ta kontenti ora ku no ngabal.

5. Ora ku no ngaba nomi di Jeova, ke ku no ta mostra di kuma i mintida?

⁵ Ora ku no ngaba no Pape ku sta na seu, no ta mostra di kuma ke ku Satanas fala kontra nos i mintida. Satanas fala di kuma, nin un pekadur ka na difindi nomi di Deus di manera fiel. I fala di kuma ningin ka na kontinua sedu fiel pa Deus ora ki testadu. I fala di kuma anos tudu no na para sirbi Deus, si no pensa di kuma kila na sedu mas minjor pa nos. (Jo 1:​9-11; 2:4) Ma Jo kontinua sedu fiel i mostra di kuma Satanas i munturus. Abo gora? Kada un di nos pudi disidi difindi nomi di no Pape i ngabal ora ku no na sirbil ku fidelidadi. (Dit 27:11) Na bardadi, i un privileẑiu garandi pa fasil.

6. Kuma ku no pudi kopia isemplu di rei Davi ku levitas? (Neemias 9:5)

⁶ Jintis ku ama Deus ta misti ngaba si nomi ku tudu se korson. Rei Davi fala sin: “O ña alma, fala ben di SIÑOR! Tudu ku sta na mi, fala ben di si nomi  santu.” (Sal 103:1) Davi ntindiba di kuma, ngaba nomi di Jeova i mesmu ku ngaba Jeova propi. Ora ku no obi nomi di Jeova, no ta pensa na tipu di algin ki sedu, no ta pensa na tudu si maneras di sedu bonitu ku kusas garandi ki fasi. Davi mistiba trata nomi di si Pape suma santu i ngabal. I mistiba fasil ku ‘tudu ku sta nel’, ku sedu, ku tudu si korson. Di mesmu manera, levitas ta tomaba diantera na ngaba Jeova. Ku umildadi, e rikuñisi di kuma e ka pudi nunka ngaba nomi santu di Jeova suma ki mersi ngabadu. (Lei Neemias 9:5.) Sin duvida, Jeova fika kontenti manera ke ngabal ku umildadi i ku tudu se korson.

7. Kuma ku no pudi ngaba Jeova na pregason i na no vida di kada dia?

⁷ Aos tambi, no pudi ngaba Jeova ora ku no na papia del di un manera ku na mostra no gardisimentu i mostra di kuma no amal ciu. Ora ku no na prega, no ta lembra di kuma no objetivu prinsipal i di juda jintis pertusi di Jeova i juda elis oja Jeova suma ku no ta ojal, un Pape ku amanu. (Tiagu 4:8) No ta sta kontenti di mostra jintis kuma ku Biblia ta fala di Jeova, kuma ki mostra si amor, justisa, jiresa, puder ku utrus maneras di sedu bonitu. No ta ngaba tambi Jeova i kontental, ora ku no fasi no minjor pa kopial. (Ef 5:1) Ora ku no fasil, utrus pudi nota di kuma no sedu diferenti di jintis des mundu mau. (Mat 5:​14-16) Ora ku no na lida ku elis, no pudi splika elis pabia ku no sedu diferenti. Pabia di kila, jintis sinseru na pertusi di no Deus. Ora ku no ngaba Jeova des maneras, no ta kontenta si korson. — 1 Tim 2:​3, 4.

ORA KU NO NGABA NOMI DI JEOVA JESUS TA KONTENTI

8. Kuma ku Jesus toma diantera na ngaba nomi di Jeova?

⁸ I ka ten algin na seu o na Tera ku kunsi Jeova mas di ki Jesus. (Mat 11:27) Jesus ama si Pape, i toma diantera na ngaba nomi di Jeova. (Jon 14:31) Na un orason ki fasi pa si Pape na noti antis di muri, i fala di un kusa mas importanti ki fasi ocal na Tera. I fala sin: “Ami N pui elis kunsiu”. (Jon 17:26) Kuma ku Jesus fasi es?

9. Kal komparason ku Jesus fasi pa splika di manera klaru kal tipu di algin ku si Pape sedu?

⁹ Jesus fasi mas di ki so konta jintis di kuma nomi di Deus i Jeova. Judeus ku Jesus nsina kunsiba ja nomi di Deus. Ma Jesus toma diantera na sedu algin ku “pui pa no kunsil.” (Jon 1:​17, 18) Pur isemplu, Skrituras Ebraiku mostra di kuma Jeova tene miserikordia tambi i ta sinti pena. (Sai 34:​5-7) Jesus splika es bardadi di manera mas klaru oca ki konta komparason di un pape ku tene un fiju ku pirdi. Ora ku no lei aserka di pape ku oja si fiju ku ripindi “oca i staba inda lunju,” i kuri i barsal i purdal di tudu korson, no ta ntindi di manera klaru miserikordia ku pena ku Jeova ta sinti. (Luk 15:​11-32) Jesus mostranu kal tipu di algin ku si Pape na bardadi sedu.

10. (a) Kuma ku no sibi di kuma Jesus ta usaba nomi propi di Jeova, tambi i mistiba pa utrus fasi mesmu kusa? (Mar 5:19) (Jubi tambi diseñu.) (b) Ke ku Jesus misti pa no fasi aos?

¹⁰ Sera ki Jesus misti tambi pa utrus usa nomi propi di si Pape? Sin, i misti. Talves alguns ŝefis riliẑiosu ta fiaba di kuma nomi di Deus i sagradu dimas pa  usa, ma Jesus ka disa nunka pa es tradisons ku ka basia na Skrituras tujil ngaba nomi di si Pape. Un isemplu di kila, i oca Jesus kura un omi ku teneba dimoniu na reẑion di gadarenus. Jintis staba ku medu i e pidi Jesus pa i sai di la. Asin Jesus ka fika na ki zona. (Mar 5:​16, 17) Ma mesmu asin, Jesus mistiba pa nomi di Jeova kunsidu la. Asin, i fala omi ku kuradu pa i konta jintis ke ku Jeova fasi i ka ke ku el Jesus i fasi. (Lei Markus 5:19.) a I mesmu kusa ki misti tambi aos, pa nomi di si Pape kunsidu na mundu ntidu! (Mat 24:14; 28:​19, 20) Ora ku no fasil, no ta kontenta no Rei, Jesus.

11. Ke ku Jesus nsina si sigiduris pa e ora pa rel, i pabia ki importanti? (Ezekiel 36:23)

¹¹ Jesus sibiba di kuma Jeova misti pa si nomi santifikadu, pa i limpadu di tudu susidadi. E ku manda no Mestri nsina si sigiduris pa e ora asin: “No Pape ku sta na seu, no misti pa bu nomi rispitadu”. (Mat 6:9) Jesus ntindiba di kuma, es i asuntu mas importanti ku na afeta tudu jintis na seu i na Tera. (Lei Ezekiel 36:23.) I ka ten un algin na seu i na Tera ku fasi mas di ki Jesus pa santifika nomi di Jeova. Ma, oca Jesus prindidu, kal pekadu ku si inimigus akusal del? E akusal di kuma i lebsi Deus! Na bardadi, Jesus sibiba di kuma, lebsi o difama nomi sagradu di si Pape i pior pekadu ku ten. I fikaba mal dimas di sibi di kuma i na akusadu i kulpadu pa es krimi. Talves es ku mas pui Jesus staba ku “garandi kasabi” na oras antis di prindidu. — Luk 22:​41-44.

12. Kuma ku Jesus santifika nomi di si Pape di minjor manera ku ten?

¹² Pa santifika nomi di si Pape, Jesus nguenta tudu tipu di sufrimentu, nsultus ku mintidas ku kontadu kontra el. I sibiba di kuma i obdisi si Pape na tudu kusas; i ka burguñuba nada. (Eb 12:2) Tambi i sibiba di kuma Satanas ku staba na atakal na ki mumentu difisil. (Luk 22:​2-4; 23:​33, 34) Satanas mistiba pa Jesus sedu infiel; ma,  i ka konsigi! Jesus mostra di manera klaru di kuma, Satanas i un munturus garandi, tambi i mostra di kuma Jeova tene servus fiel ku kontinua sedu fiel, mesmu na situasons difisil dimas!

13. Kuma ku bu pudi kontenta bu Rei ku sta na rena?

¹³ Sera ki bu misti kontenta bu Rei ku sta na rena? Kontinua ngaba nomi di Jeova, i juda utrus sibi kin na bardadi ku no Deus sedu. Si bu fasil, bu ta sta na kopia isemplu di Jesus. (1 Ped 2:21) Suma Jesus, bu ta sta na kontenta Jeova i mostra di kuma, si inimigu Satanas i un munturus garandi!

ORA KU NO NGABA NOMI DI JEOVA NO TA STA NA JUDA SALBA VIDA DI JINTIS

14-15. Kal bon kusas ku pudi kontisi ora ku no nsina jintis aserka di Jeova?

¹⁴ Ora ku no ngaba nomi di Jeova, no ta sta na juda salba vida di jintis. Di kal manera? Satanas “sega ntindimentu di kilis ku ka ta fia”. (2 Kor 4:4) Kila ku pui e fia na mintidas di Satanas suma esis: Deus ka ten, Deus lunju nos, i ka ta preokupa ku pekaduris, Deus mau dimas, i ta kastiga jintis mau pa sempri. Es mintidas ta sirbi so pa dana nomi di Jeova, asin jintis ka misti pertusi del. Ma no tarbaju di pregason ta tuji Satanas yangasa si objetivu. No ta nsina jintis bardadi aserka di no Pape i no ta ngaba nomi santu di no Deus. Ku kal rusultadu?

¹⁵ Bardadis ku sta na Palabra di Deus tene forsa garandi. Ora ku no nsina jintis aserka di Jeova i kin na bardadi ki sedu, no ta konsigi oja un kusa bonitu. Jintis gosi ka segadu pa mintidas di Satanas, i e kumsa ku oja maneras di sedu bonitu di no Pape. E fika dimiradu ku si puder garandi dimas. (Isa 40:26) E aprindi konfia nel pabia di si justisa perfeitu. (Lei 32:4) E aprindi ciu ku si jiresa garandi. (Isa 55:9; Rom 11:33) Tambi e ta konsoladu di sibi kuma el i amor. (1 Jon 4:8) Nkuantu e na pertusi  di Jeova, se speransa di vivi pa sempri ta torna mas forti. I un privileẑiu garandi juda jintis pertusi di se Pape! Si no fasil, Jeova ta ojanu suma si “kumpañeris pa tarbaja”. — 1 Kor 3:​5, 9.

16. Kuma ku alguns sinti oca ke kunsi nomi di Deus? Bu pudi da isemplus.

¹⁶ Na kumsada, no pudi so konta jintis di kuma nomi di Deus i Jeova. So es pudi muda vida di jintis di bon korson. Pur isemplu, un bajuda comadu Aaliyah b kriadu na un familia ku ka sedu kriston. Ma i ka staba kontenti ku si riliẑion, tambi i ka ta sintiba di kuma i tene amisadi ku Deus. Es muda oca i kumsa ku studa ku Tustumuñas di Jeova. I kumsa ku oja Deus suma si Amigu. Tambi i fikaba dimiradu di sibi di kuma nomi di Deus tiradu na manga di Biblia i torkiadu pa simplis titulus suma Siñor. Si vida muda oca ki kunsi nomi di Jeova. I fala sin ku kontentamentu: “Ña minjor Amigu tene nomi!” Kal ku sedu rusultadu? I fala sin: “Gosi N tene pas garandi na ña korson. N sinti suma algin ku tene balur.” Un omi comadu Steve seduba artista ku bin di un familia di judeus pratikanti. I ka mistiba fasi parti di riliẑion organizadu pabia di manga di finjimentu ki ojaba la. Ma dipus ku si mame muri, i seta mati studu di Biblia di un di si amigu ku ta studaba ku un Tustumuña di Jeova. I fikaba tokadu oca ki kunsi nomi di Deus. I fala sin: “Nunka N obiba faladu di nomi di Deus. Pa purmeru bias, ntindi di kuma Deus i un algin ku izisti! N pasa sibi di kuma N oca un Amigu.”

17. Pabia ku bu sta disididu pa kontinua ngaba nomi di Jeova? (Jubi tambi foto.)

¹⁷ Ora ku bu na prega i nsina, sera ki bu ta konta utrus nomi sagradu, Jeova? Sera ki bu ta juda elis oja kal tipu algin ku no Deus sedu? Si bu fasil, bu na ngaba nomi di Deus. Kontinua ngaba nomi santu di Jeova, ora ku bu na juda jintis sibi kal tipu di algin ki na bardadi i sedu. Si bu fasil, bu na salba vida di jintis. Bu na sigi bu Rei, Kristu Jesus. Mas importanti, bu na kontenta bu Pape ku amau, ku sedu Jeova. Pa bu ‘fala ben di si nomi pa tudu sempri’! — Sal 145:2.