1, 2. ¿Imaynataj Jehová sientekun contranpi llullasta parlajtinku? Sutʼinchariy.

 KAYPI piensarina: mayta munakusqanchej runa contranchejpi llullasta parlanman. Noqanchejtaj yachanchej chay nisqanqa llulla kasqanta, jinapis wakin runas payta creenku. Mana chayllachu, chay nisqanta wajkunaman willaranku. Ajinamanta chay llullakusqanqa tukuynejman chayan. Chay pasawajtinchej, ¿imaynataj sientekusunman? Ichapis llakikusunman runas niña allinpajchu qhawanawanchejmanta, maytataj phutikusunman, ¿icharí? (Pro. 22:1).

² Chayqa entiendechiwanchej imaynachus Jehová sientekusqanta ujnin angelnin paymanta llullasta parlajtin, chaywantaj sutinta chʼichichajtin. Evataj chay llullakusqanta creeykorqa, chayrayku ñaupa tatasninchejqa Jehovaj contranta oqharikorqanku. Chaynejta tukuy runas juchallikunchej, tiempowantaj wañunchej (Gén. 3:1-6; Rom. 5:12). Satanás Edén huertapi llullakusqanrayku, mundo enteropi chay jina problemas kashan: wañuy, guerras, ñakʼariykunas ima. Jehovaj sonqonqa imaynapunichus kashan Satanás ajinata llullakusqanmanta, chaynejtataj may llakiypi kashasqanchejmanta. Chayrayku ichapis Jehovaqa phiñasqalla, sonqo nanasqalla kanman karqa. Pero mana jinachu kashan, astawanpis Bibliaqa nin ‘kusikuyniyoj Dios’ kasqanta (1 Tim. 1:11).

3. ¿Imata ruwaytaj may sumajpuni?

³ Noqanchejpis rikuchisunman Satanás Jehová Diosmanta  llullasta parlasqanta. Chaypi yanapakuyta atisqanchejqa, may sumajpuni. ¿Imaynamantá chayta rikuchisunman? Kay kamachiyta kasukuspa: “Jehová Diospa sutinta jatunchaychej” (Sal. 113:1). ¿Imaynatá chayta ruwasunman? Tukuy allin imasta Jehová ruwasqanmanta wajkunaman willaspa. ¿Sonqonchej aysawanchejchu chayta ruwanapaj? Qhawarina kinsa imasta imaraykuchus jatunchanamanta. Chayqa sonqonchejta aysanqa Diospa sutinta tukuy sonqo jatunchanapaj.

JEHOVATA KUSICHINCHEJ

4. ¿Imaraykú Jehová kusikun jatunchajtinchej? Sutʼinchariy (fototawan qhawariy).

⁴ Tatanchej Jehovataqa kusichinchej sutinta jatunchaspa (Sal. 119:108). Runasqa munanchej wajkuna alabanawanchejta, ajinamanta sumaj sientekunanchejpaj. Tukuy Atiyniyoj Jehová Diosninchejrí, ¿ajinallatajchu? Mana. Chayta sutʼita entiendenapaj uj imillitapi piensarina. Payqa tatanman qayllaykuspa kallpawan abrazaykun, nintaj: “Tatáy, qanlla sumaj tata kanki”, nispa. Tataqa mayta kusikun, casi waqarikunpis wawitan tukuy sonqo chayta nisqanmanta. ¿Imarayku? Chay tata, ¿wawitan chayta ninantachu necesitan aswan sumaj sientekunanpaj? Mana. Astawanqa tata kasqanrayku, kusikun wawitan “munakuyki” nejtin, agradecekojtinpis. Chantapis yachan wawitan ajina kasqanqa, wiñarqojtin may kusisqa kananpaj yanapananta. Jehovapis ajinallatataj mayta kusikun payta jatunchajtinchej. Payqa ni pi jina sumaj Tatapuni.

5. Jehovata jatunchaspa, ¿imatá rikuchinchej?

⁵ Satanasqa llullakusqanpi noqanchejtawan japʼiykuchiwarqanchej. Payqa nin llakiypi kaspa ni mayqen runa Jehová Diosta kasukunallantapuni. Nillantaj tukuyninchej Diosta wasanchananchejta imapis mana allinchu llojsinanta yuyajtinchej (Job 1:9-11; 2:4). Jinapis cheqan runa Jobqa Satanás llulla kasqanta rikucherqa. Noqanchejpis Jehovata jatunchaspa rikuchishanchej Satanás llulla kasqanta. Sapa ujninchej Jehovaj sutinta jatunchayta atinchej, payta tukuy sonqo kasukuspataj kusichiyta atinchej. Chayta ruwayta atisqanchejtaj may sumajpuni (Pro. 27:11).

6. ¿Imaynatá ruwasunman rey David jina, levitas jinataj? (Nehemías 9:5).

⁶ Jehovata munakojkunaqa tukuy sonqowan sutinta jatunchayta munanku. Rey Davidqa kayta qhelqarqa: “Noqaqa Jehová Diosta jatunchasaj. Tukuy sonqoywan santo sutinta jatunchasaj”, nispa (Sal. 103:1). Davidqa yacharqa Diospa sutinta jatunchaspaqa Jehovata jatunchashasqanta. Diospa sutinmanta parlaspaqa imaynachus kasqanmanta parlashanchej: kʼacha kaykunasninmanta, sumaj  ruwasqasninmantapis. Davidqa Tatan Jehovaj sutinta santopaj qhawarqa, jatunchaytataj munarqa. Payqa nerqa ‘tukuy sonqonwan’ chayta ruwayta munasqanta. Levitaspis chayllatataj ruwarqanku, Jehovata jatuncharqanku. Paykunaqa kʼumuykukoj sonqowan repararqanku ni mashkha palabraswanpis Jehovata munasqanman jina jatunchayta atisqankuta (Nehemías 9:5 leey). Jehovaqa maytachá kusikorqa levitas ajinata sonqomantapacha jatunchasqankuta uyarispa.

7. ¿Imaynatá Jehovata jatunchayta atisunman predicashaspa, chanta mayllapipis kashaspa?

⁷ Jehovamanta parlasqanchejpi sutʼi rikukunan tiyan payman agradecekusqanchej, munakusqanchejtaj. Ajinamanta payta jatunchayta atinchej. Predicashaspaqa runasta yanapayta munanchej Jehovaman qayllaykunankupaj, noqanchej jinataj mayta munakunankupaj (Sant. 4:8). Maytapuni munanchej Bibliawan paykunaman rikuchiyta Jehová Diosqa may kʼacha kasqanta, munakuyninta, cheqan kajta ruwasqanta, yachayninta, atiynintapis. Chantapis pay jina ruwanapaj mayta kallpachakuspa jatunchallanchejtaj, sonqontataj kusichinchej (Efe. 5:1). Chayta ruwajtinchejtaj ichapis runas reparanqanku mana waj runas jinachu kasqanchejta, tapukonqankutaj imaraykuchus ajina kasqanchejta (Mat. 5:14-16). Mayllapipis paykunawan kashaspa, ichapis chayta sutʼinchariyta atisunchej. Ajinamanta kʼacha sonqoyoj runasqa Diosninchejta rejsiyta munanqanku. Jehovata ajinasmanta jatunchaspaqa sonqonta kusichinchej (1 Tim. 2:3, 4).

JESUSTA KUSICHINCHEJ

8. ¿Imaynatá Jesús Tatanpa sutinta jatuncharqa?

⁸ Jehovataqa Jesuslla allinta rejsin. Cielopipis kay jallpʼapipis, ni pipuni Jesús jina Jehovata rejsinchu (Mat. 11:27). Jesusqa Tatanta munakun, sutinta jatunchaypitaj pay ñaupajpi kashan (Juan 14:31). Wañupunan ñaupaj chʼisitaj, Jesusqa kay jallpʼapi imatachus ruwasqanmanta Tatanman orakushaspa kay jinata nerqa: “Paykunaman sutiykita rejsicherqani”, nispa (Juan 17:26). ¿Imaynatá chayta ruwarqa?

9. ¿Ima kikinchaymantataj Jesús parlarqa imaynachus Jehová kasqanta sutʼinchananpaj?

⁹ Jesusqa runasman mana nillarqachu Diospa sutin Jehová kasqanta. Judiosqa Diospa sutinta yacharqankuña. Chayrayku Jesús paykunaman sutʼincharqa imaynachus Jehová kasqanta (Juan 1:17, 18). Hebreo Qhelqasqaspeqa nerqaña Jehovaqa khuyakoj Dios kasqanta, kʼacha sonqoyojtaj (Éxo. 34:5-7). Jesustaj uj kikinchaywan chayta sumajta sutʼincharqa. Payqa parlarqa chinkaj waynamanta. Chay wayna ‘karullapiraj kashajtin’, tatanqa usqhayllata correspa abrazaykorqa, sonqomantapachataj perdonarqa. Chayta leespa sutʼita reparanchej, Jehovaqa khuyakoj Dios kasqanta, kʼacha sonqoyojtaj kasqanta (Luc. 15:11-32). Yachakunchej jina, Jesusqa runasta yanaparqa imaynachus Jehová kasqanta entiendenankupaj.

10. 1) ¿Imaynapí yachanchej Jesús Tatanpa sutinta oqharisqantapuni, wajkunapis oqharinallankutataj munasqanta? (Marcos 5:19; dibujotawan qhawariy). 2) ¿Imatataj Jesús noqanchej ruwananchejta munan?

¹⁰ Jesusqa munarqa wajkunapis Tatanpa sutinta oqharinallankutataj. Chay tiempopi religionta kamachejkunamanta wakenqa, ichapis yuyaj kanku Diospa sutinta mana oqharinankuta may santo kasqanrayku. Chay costumbrenkutaj mana Bibliaman jinachu karqa. Chayrayku Jesusqa mana chay costumbrenkuman jinachu ruwarqa. Astawanpis Tatanpa sutinta jatuncharqa. Uj kutipi Jesusqa gerasenospa jallpʼankupi supayniyoj runata sanoyacherqa. Runastaj mancharikuspa Jesusta mayta rogakorqanku chaymanta ripunanta (Mar.  5:16, 17). Chaywanpis payqa munarqa tukuy runas Jehovaj sutinta rejsinankuta. Chayrayku niraj ripushaspa chay runaman nerqa, Jehová imatachus payrayku ruwasqanta tukuy runasman willananta, nitaj paymanta willanantachu nerqa (Marcos 5:19 leey). a Reyninchej Jesusqa munan noqanchejpis kikillantataj ruwananchejta, munan tukuy runasman Diospa sutinta rejsichinanchejta (Mat. 24:14; 28:19, 20). Chayta ruwaspaqa Jesusta kusichinchej.

11. 1) ¿Imaynata orakunankutataj Jesús discipulosninman yachacherqa? 2) Ezequiel 36:23 nisqanman jina, ¿imaraykutaj Diospa sutinta jatunchay aswan sumaj?

¹¹ Jehovaqa munan sutin jatunchasqa kananta, nisunman tukuy llullasmanta llimphuchasqa kananta. Jesustaj chayta yachasqanrayku, discipulosninman kay jinata orakunankuta yachacherqa: “Cielopi kashaj Tatayku, sutiyki jatunchasqa kachun”, nispa (Mat. 6:9). Jesusqa yacharqa chayta ruway aswan sumaj tukuy imamanta kasqanta, cielopipis kay jallpʼapipis (Ezequiel 36:23 leey). Jesusqa ni pi jina Jehovaj sutinta jatuncharqa. Jinapis payta presochashajtinku, ¿imamantá enemigosnin juchacharqanku? Diospa contranpi sajrata rimasqanta nerqanku, nisunman Tatanpa santo sutinta chʼichichasqanta. Jesuspajqa chayta ruway may jatun juchapuni karqa. Niraj presochashajtinku sonqonqa maytachá nanarqa chaymanta juchachaspa wañuchinankuta yachasqanrayku. Ichapis chayrayku chay kutipeqa “anchatañapuni” llakikorqa (Luc. 22:41-44).

12. ¿Imatá Jesús ruwarqa Tatanpa sutinta jatunchananpaj?

¹² Jesusqa Tatanpa sutinta jatunchananpaj aguantarqa ñakʼarichisqankuta, insultasqankuta, llullasta paymanta rimasqankutapis. Payqa yacharqa Jehovata tukuy imapi kasukusqanta, nitaj imatapis ruwarqachu pʼenqakunanpaj jinaqa (Heb. 12:2). Chantapis payqa yacharqa chay kutipi Satanás ñakʼarichishasqanta (Luc. 22:2-4; 23:33, 34). Satanasqa munarqa Jesús manaña Jehovata kasukunanta. Jinapis mana chayta ruwayta aterqachu. Urmachiyta munasqanqa qhasilla karqa. Chaywanqa Jesús rikucherqa Satanás llulla kasqanta, Diospa kamachisnintaj aswan sinchʼi pruebapi rikukuspapis kasukusqankutapuni.

13. ¿Imatá ruwananchej kanman Reyninchej Jesusta kusichinapaj?

 ¹³ ¿Reyninchej Jesucristota kusichiyta munankichu? Jina kajtenqa Jehovaj sutinta jatunchallaypuni, wajkunatapis yanapallaypuni payta sumajta rejsinankupaj. Ajinamanta Jesús jina ruwashanki (1 Ped. 2:21). Chantapis Jesús jina Jehovata kusichinki, rikuchinkitaj enemigon Satanás millay llulla kasqanta.

RUNASTA SALVAKUNANKUPAJ YANAPANCHEJ

14, 15. ¿Ima tʼukuna imastaj pasan Jehová Diosmanta runasman yachachejtinchej?

¹⁴ ¿Imaraykutaj nisunman Jehová Diospa sutinta jatunchajtinchej runasta salvakunankupaj yanapashasqanchejta? Satanás ‘mana creej runaspa yuyayninkuta laqhayachisqanrayku’ (2 Cor. 4:4). Chayrayku ashkha runasqa llullasninta creellanku, yuyankutaj Dios mana kasqanta, chayri noqanchejmanta may karupi kasqanta, noqanchejmanta mana llakikusqanta, chayri sajra Dios kasqanta, sajra runastataj wiñaypaj castigasqanta. Chay llullasqa Jehová Diospa sutillanta chʼichichanku, sajrapajtaj qhawachinku, ajinamanta mana pipis payman qayllaykuyta munananpaj. Chaywanpis predicajtinchej, cheqa kajtapunitaj Tatanchej Jehovamanta yachachejtinchej, mana saqenchejchu Satanás munasqanta ruwananta, Jehovaj santo sutintataj jatunchanchej. ¿Imapitaj chaywan yanapakunchej?

¹⁵ Bibliaj cheqa yachachiykunasnenqa manchay atiyniyoj kanku. Runasman pichus Jehová kasqanta, imaynachus kasqanta yachachejtinchejqa tʼukuna imas pasan: Manaña Satanaspa llulla yachachiykunasninwan engañachikunkuchu, noqanchej jinataj imaynachus Tatanchej Jehová kasqanta reparanku. Manchay atiyniyoj kasqanmanta tʼukushaj qhepakunku (Isa. 40:26). Cheqan kajtapuni ruwasqanrayku paypi atienekuyta yachakunku (Deu. 32:4). Mayta tʼukunku Jehová may yachayniyoj kasqanta yachaspa (Isa. 55:9; Rom. 11:33). Sonqochaytataj tarinku Diosninchej munakuy kasqanta yachaspa (1 Juan 4:8). Jehovaman kʼaskaykuspataj sutʼita reparanku wiñaypaj kausakuyta atisqankuta, wawasninmantaj tukuyta atisqankuta. ¿May sumajpunicharí runasta Tatanchej Jehovaman qayllaykunankupaj yanapayta atisqanchejqa?  Chantapis chayta ruwajtinchejqa, Jehovawan ‘khuska llankʼashanchej’ (1 Cor. 3:5, 9).

16. ¿Imaynatá Diospa sutinta yachay yanapawanchej? Uj ejemplomanta parlariy.

¹⁶ Pillamanpis predicashaspaqa, ichapis qallariypeqa Diospa sutillantaraj yachachinchej. Chay runa kʼacha sonqoyoj chayqa, Diospa sutinta yachasqallan kausayninta cambiachinman. Alía sutiyoj sipasmanta parlarina. b Maypichus uywakorqa chay religionpeqa mana Bibliamanta yachachinkuchu. Pero payqa mana kusisqachu kasharqa imastachus yachachisqankuwan, yuyarqataj Diosman mana qayllaykuchisqanta. Jehovaj testigosninwan estudiayta qallarejtintaj manaña jinachu karqa. Yachakorqa ashkha Bibliaspeqa Diospa sutinpa cuentanmanta, Señor nispallaña churaykusqankuta, chayri waj titulosta. Chayta yachaspataj maytapuni tʼukorqa. Jehová Diospa sutinta yachayqa kausayninta cambiarqa. Chay kutimantapacha Jehová Diosta amigonta jina qhawarqa. Pay nerqa: “Sumaj amigoyqa sutiyoj”, nispa. Pay nillantaj: “Kunanqa may sonqo tiyasqa kani. Chay yachakusqayqa may sumajpuni noqapaj”, nispa. Stevemantañataj parlarina. Payqa músico karqa, judío familiapitaj wiñakorqa. Steveqa rikorqa religionninpi ancha puraj uyas kasqankuta, chayrayku mana ni mayqen religionmanpis riyta munarqañachu. Chaywanpis maman wañupusqanrayku, Bibliamanta yachakuyta qallarerqa Jehovaj testigosninwan. Diospa sutinta yachayqa sonqonta mayta kuyuricherqa. Pay nin: “Mana yacharqanichu imachus Diospa sutin kasqanta”, nispa. Pay nillantaj: “Ñaupaj kutirayku repararqani Jehová Diosqa kasqantapuni. Chay kutipi repararqani uj sumaj amigota tarikusqayta”, nispa.

17. ¿Imajtintaj Jehová Diospa sutinta jatunchallaytapuni munanki? (Fototawan qhawariy).

¹⁷ Predicashaspa chayri yachachishaspa, ¿runasman willarinchejchu Diospa sutinta, imaynachus pay kasqantapis? Chayta ruwasun chayqa, sutinta jatunchashanchej. Chayrayku wajkunata yanapanallapuni imaynachus Jehová kasqanta yachachispa. Ajinamanta santo sutinta jatunchasun. Chayta ruwaspaqa runasta yanapasun salvakunankupaj, Reyninchej Jesucristo jina ruwashasun, astawanpis munakuyniyoj Tatanchej Jehovata kusichisun. Ajinamanta Salmo 145:2 versiculota qhelqarqa chay runa jina nisun: “Sutiykita jatunchasaj wiñaypaj wiñaynintinpaj”, nispa.