1, 2. ¿Imanotaj musyanchi Jehová laquicushganta pipis paypita lutancunata parlaptin?

 IMARAJ canman juc cuyashga ayluyqui gampita manacajta parlar galaycuptin. Pero gam musyanqui chayga mana rasunpa cashganta, chayno captinpis waquincunaga rasunpa cajtano creir galaycärin y waquincunatapis wilapan. Jutiqui manacajman churashga captin, alapachi yarpachacunqui y laquishgapis ricacunquichi ¿au? (Prov. 22:1).

² Cay tantiachicuywan cuentata gocunchi Jehová imano ricacushganta, juc angelnin Paypita manacajta parlaptin y jutintapis manacajman churaptin. Nircur Adanwan Evapis chay mana ali ángel nishganta creircur, Diospa contranman churacargan. Chayraycur lapan runacuna juchasapa canchi y tiempuwanga wanunchipis (Gén. 3:1-6; Rom. 5:12). Edén huertacho Satanás lulacushganpitami imayca mana alicunapis yurimushga, wanuy, guerracuna y ima nacaycunapis. Chay lapancunata ricar Jehová alapami laquicun, pero manami rabiashgalachu o ajayashgalachu cawacun. Chaypa trucanga Biblia wilacun cushishgala cawaj Dios cashganta (1 Tim. 1:11).

3. ¿Imatataj lapanchi rurayta munanchi?

³ Noganchi munanchi Jehovapa jutin ali ricashga y respetashga cananpaj. ¿Imanotaj chayta ruranchi? Jehovapa jutinta alabaptinchimi (Sal. 113:1). Chaypäga Jehovapa jutinpita rasun cajta parlacunanchi. ¿Gampis munanquichu Diospa jutin alabashga cananpaj? Chaymi canan ricärishun imanirtaj Diospa jutinta shongupita alabashwan.

JEHOVATA CUSHICHINCHI

4. ¿Imanirtaj Jehová alapa cushicun payta alabaptinchi? Juc tincuchicuywan tantiachicamuy (fotutapis ricay).

⁴ Jehovaga cuyacoj Taytanchimi, payga cushicun jutinta  alabaptinchi (Sal. 119:108). Runacunaga ali tucunalanpaj alabananta munan, ¿Lapanta puedej Jehovaga chaynochuraj? Manami. Chaypäga cayman yarpäshun, juc warmi wamrashi taytanta macalacuycur nin: “¡Taytalä gamnoga pipis canchu!” nir. Chay taytaga wamran chayno nishganpita cushicuypita wagananraj. Y ¿chay taytaga wamran alabanantachuraj necesitaycan más ali ricacunanpaj? Manami. Payga cushicun wamran cuyashganpita y agradecido caycashganpita. Jina musyanmi jipashyarcuptinpis chaynola cananpaj cajta. Chaynolami Taytalanchi Jehovapis alapa cushicun paylata alabaptinchi.

5. ¿Imataj ricächicushun Jehová Dioslata imaypis alabaptinchi?

⁵ Satanasga noganchipita mana cashgantami parlan. Payga nin pï runapis ima pruebacunapa pasaptin Jehovata jaguirinanpaj y jutintapis manacajman churananpaj. Payga yarpan ima nacaycho caycaptinchi vidanchita salvananchiraycur Jehovapa contranman churacänapaj (Job 1:9-11; 2:4). Pero Job ricächicurgan Satanás lulacoj cashganta. Noganchipis Jehovalata alabaptinchega Satanás lulacushgantami ricächishun. Chaymi cada ununchimi valurcharcushun Jehovapa jutinta imaypis defendinapaj, chayta rurarga Jehovatami cushichishun (Prov. 27:11).

6. ¿Imataj yachacunchi rey Davidpita y levitacunapis Jehovata alabashganpita? (Nehemías 9:5).

⁶ Diosta rasunpa cuyajcunaga shongupita imaypis jutinta alabaycun. Rey Davidpis cayta nergan: “TAYTA DIOSTAMI lapan shonqüwan alabashaq. Lapan voluntänïwanmi santu jutinta joqarir agradëcikushaq” (Sal. 103:1). David tantiargan Jehovapa jutinta alabarga, quiquin Jehovatami alabaycargan. Jutinpita parlarga ali ricashga, imano cashganpita y lapan camashgancunapitami parlananchi. Davidga lapan shongunwanmi Diospa jutinta alabargan y respetargan. Levitacunapis lapan voluntäninwan Jehovata alabapäcurgan. Humilde cashpan paycunaga Jehovapa jutin santo cashganta ricargan, chaymi imaycanopapis alabayta munargan (leiriy Nehemías 9:5). Jehovaga alapachi cushicurgan runacuna shongupitami y alapa respetuwan alabapäcuptin.

7. ¿Imata rurartaj Jehovata alabanchi cawayninchicho y predicaciuncho?

⁷ Noganchipis Jehovata alabanchi paypita cuyacuywan parlaptinchi. Chaymi runacunata yachachicur yarguptinchi, munanchi  waquin runacunapis Jehovata alapa cuyar galaycunanpaj (Sant. 4:8). Bibliawanmi runacunata yachachinchi Jehová cuyacoj, alilata ruraj, yachaj y poderyoj cashganpita. Nircurpis Jehovata alabanchi y shongunta cushichinchi payno cuyacoj captinchi y yarpashganno yarpaptinchi (Efes. 5:1). Dios munashganno cawaj runa captinchega, waquin runacunapis ricangami cay munducho runacunano mana cashganchita y öraga chaypitapis parlapacur galaycushwanchi (Mat. 5:14-16). Aumi, capaz creencianchipitapis tapupämashwan o imalapitapis musyayta munanman. Ali shonguyoj runacunaga Diospa Palabranta ali chasquiycur Diospita yachacuyta munangami. Cay lapancunata rurarmi Jehovapa shongunta cushichishun (1 Tim. 2:3, 4).

JESUSTA CUSHICHINCHI

8. ¿Imanirtaj ninchi Jesús Taytanpa jutinta imaypis alabashganta?

⁸ Jana pachachopis y cay Pachachopis manami pipis Jesusnoga Jehovata reguinchu (Mat. 11:27). Jesusga Taytantami alapa cuyaycun, y shumaj yachachimashcanchi imano noganchipis Jehovapa jutinta alabanapaj (Juan 14:31). Noganchiraycur wanunanpaj ichiclana pishiycaptin, Taytan Jehovata mañacushgancho cayta nergan: “Qampa wilakuynikitami [y jutikitami] yachatsishqä” (Juan 17:26). ¿Imanotaj chayta rurashga?

9. ¿Ima tincuchicuywantaj Jesús yachachergan Jehová cuyapäcoj y perdunacoj cashganta?

⁹ Jesusga manami yachachicurganlachu Diospa jutin Jehová cashganta. Judiucunaga mayna musyapäcurgan chayta. Chaymi Jesusga paycunata yachachergan Jehová Dios imano cashganpita (Juan 1:17, 18). Escrituras Hebreas o unay testamentucho niycargan Jehová “kuyapäkuq y perdonakuq” cashganta (Éx. 34:5-7). Pero Jesús juc tincuchicuywan shumaj tantiachicurgan imano Jehová cuyapäcoj y perdunacoj cashganta. Juc wamrashi shongun munashgalanta rurayta munar wasinpita aywacurgan. Ichanga taytanga churin arrepentido “karulataraq kutiykaqta rikärirshi” payga “kushikushpan warakayla aywar makalakurkur mutsarqan” y juchantapis perdunargan. Chay wilacuywan Jesús ricächicurgan Jehová cuyapäcoj y perdunacoj cashgantami (Luc. 15:11-32). Chaynopami Jesusga runacunata yachachergan Jehová imano Dios cashganpita.

10. 1) ¿Imanirtaj Jesús Taytanta jutinpa gayargan y imataj munargan waquincunapis rurananpaj? (Marcos 5:19; dibujutapis ricay). 2) ¿Diospa jutinwan ima rurananchitataj Jesusga munan?

¹⁰ ¿Jesusga munarganchuraj lapan runacuna Taytanta jutinpa gayananta? Au, munarganmi. Pero chay tiempucho waquin pushacoj religiosucunaga costumbrincunaraycur manami munapäcojchu runacuna Diosta jutinpa gayapäcunanta, paycunaga yarpapäcurgan Diospa jutin alapa sagrado cashganta. Ichanga Jesusga manami permitirganchu chay wichancho caycaj costumbricuna michänanpaj runacuna Diosta jutinpa alabapäcunanta. Juc cuticho Geraseno marcapita juc runa endemoniado caycajta Jesús aliyächergan. Chayta ricajcunaga alapa manchacushpan Jesusta nergan chay marcapita aywacunanpaj (Mar. 5:16, 17). Pero Jesusga munargan chay marcacho lapan runacuna Diospa jutinta musyapäcunanpaj. Chaymi manaraj aywacurmi aliyächishgan runata nergan waquincunata wilapänanpaj Jehová payraycur rurashganta (leiriy Marcos 5:19). Reyninchi Jesusga munaycunmi noganchipis lapan runacunata Diospa jutinta  yachachinapaj y imano cashgantapis (Mat. 24:14; 28:19, 20). Chaynopa Jesuspa shongunta cushichishun.

11. ¿Imata mañacunanpätaj Jesusga yachachergan discipuluncunata? Y, Ezequiel 36:23 nishganno, ¿imanirtaj chayno mañacunman cargan?

¹¹ Jesusga musyarganmi Taytan alapa munaycashganta jutin ali ricashga cananpaj. Chaymi discipuluncunata cayno yachachergan mañacuynincho ninanpaj: “Jana patsacho kaykaq Papä, qampa jutiki respitashqa kaykulätsun” nir (Mat. 6:9). Jesusga munargan jana pachacho y cay Pachachopis Taytanpa jutin alapa respetashga cananta (leiriy Ezequiel 36:23). Chaymi cielucho o Pachacho caycarpis Jesusga Taytanpa jutinta alapa respetachishga, paynoga manami pipis rurashgachu. Chayno captinpis, chiquejnincunaga Jesusta preso charicurcurgan. ¿Imanir? Paycunaga tumpargan Diospa jutinta manacajman churashganpitami o mana respetaycashganpita. Pero payga chayta manami ruranmanchu cargan, Jesusga musyarganmi pipis chayta ruraptenga, alapa jatun juchata ruraycan. Chaymi preso manaraj chariycuptin Jesús pasaypa laquicuycargan chayraycur chiquejnincuna tumpananpaj o acusananpaj cajta musyar. Bibliaga nin ‘fiyupa lakikurqan’ (Luc. 22:41-44).

12. ¿Imataj Jesusga rurargan Diospa jutin ali ricashga cananpaj?

¹² Chiquejnincunaga Jesusta alapami nacachergan, ashlirgan y tumparganpis, payga chay lapancunata aguantargan Taytanpa jutin respetashga o ali ricashga cananpaj. Lapanchomi Taytanta cäsucurgan, chaymi imapitapis pengacunmanchu cargan (Heb. 12:2). Jina musyarganmi chay lapan mana alicunapa pasashganga Satanás caycashganta (Luc. 22:2-4; 23:33, 34). Diabluga munargan Jesús Jehovata jaguirinanta, pero lapan rurashgancunaga yangalapami cargan. Jesús musyachicurgan Satanás lulacoj cashganta y Diospa sirvejnincuna imayca sasa pruebacunapa pasarpis Jehovata mana jaguirinanpaj cajta.

13. ¿Imataraj rurashwan Reyninchi Jesusta cushichinapaj?

¹³ ¿Gampis munanquichu Reyninchi Jesuspa shongunta cushichiyta? Chayno captenga Jehovapa jutinta imaypis alabay  y waquincunatapis yachachiy Jehová imano cashganta. Chayta rurarmi Jesús rurashganno ruraycanqui (1 Ped. 2:21). Chaynopa Jesús rurashganno Jehovapa shongunta cushichishun y ricächicushun Satanás pasaypa lulacoj cashganta.

YANAPASHUN RUNACUNA SALVACÄRINANPAJ

14, 15. ¿Imacunataj pasan runacunata yachachiptinchi Jehovapita?

¹⁴ ¿Imanirtaj ninchi Jehovata alabarga runacuna salvacärinanpaj yanapaycanchi? Satanasmi runacunapa yarpayninta upataycächin ali yachachicuycunata mana tantiananpaj (2 Cor. 4:4). Chaymi achca runacunaga luta yachachicuycunata creir, yarpapäcun Dios mana cashganta, noganchipita may carucho caycashganta, runacunata pruebaman churashganta y infiernucho mana alita rurajcunata castigashganta. Chay luta yachachicuycunaga Diospa jutinta ganratan, manacajman churan y chayraycur runacuna Diostapis sirviyta munannachu. Pero predicaciuncho Diospita rasun cajta yachachicuptinchi, ricächicunchi Satanás lulacoj cashganta y Jehovapa jutintami alabaycanchi. ¿Imataj logranchi chayta rurar?

¹⁵ Bibliapa yachachicuynincunaga alapa poderyojmi. Runacunaga alapami cushicärin Jehová pï cashganta y imano cashganta yachacuptin. Paycunaga ichic ichiclapa cuentata gocärin maygan rasunpa yachachicuycuna cashganta y Diostapis noganchino rasunpa taytantano ricayta galaycärin. Jehová Lapanta puedej Dios cashganta musyar almiracärin (Is. 40:26). Jaucalana cawapäcun Dios alilata ruraj captinmi (Deut. 32:4). Alapa cushicärin fiyupa yachaj cashgantami musyar (Is. 55:9; Rom. 11:33). Cuyashgapis ricacärin Jehová amatar cuyacoj captin (1 Juan 4:8). Jina cada cadala payman masraj guelicamur convencido carcaycan imaycamapis cawapäcunanpaj y Diospa wamrancuna japuy cananpaj. ¿Manachu alapa cushicurcunchi runacunata yanaparcuptinchi Jehovata rasunpa taytantano ricananpaj? Chayta ruraptinchi, ‘Tayta  Diospa aruqninkunami’ caycanchi (1 Cor. 3:5, 9).

16. ¿Imanotaj Alía y Steve ricacärergan Dios jutiyoj cashganta musyar?

¹⁶ Pilawanpis Diospita parlarga puntata jutilantami yachachicunchi. Y ali shonguyoj captenga, chayga cawaynintapis cambianmanmi. Yarpäshun Alía a jipashta ima pasashganta, taytancuna caycashgan religiunchoga manashi Bibliapita yachachicojchu. Payga manashi acuerducho caycargan yachacuycashganwan, Diostaga manashi shumaj reguirganchu. Ichanga Testigucunawan Bibliapita yachacurga manashi chaynochu cargan. Cuentata gocurgan achca Bibliacunacho Diospa jutinta trucachishganta Señor nir, chayta musyar laquicurganmi. Pero Dios jutiyoj cashganta musyar amiguntano ricayta galaycurgan, y cushishga cayno nergan: “¡Amigüga jutiyojmi!”. Payga nin: “Cananga shongüpis ancashna caycan, y cushicö Diospa jutinta musyar”. Steve mozuga músico cargan y judía familiapitash canaj. Runacuna ishcay cara cashganta ricar maygan religiunmanpis yaycuyta munarganchu. Pero maman wanuriptinshi, juc amigun invitargan Bibliapita juc Testigo yachachishganta wiyananpaj. Dios jutiyoj cashganta mayarga shongunmanmi chayargan. Payga nin: “Manami musyargächu imata Diospa jutin cashganta”. Caytapis nin: “Chayraj creirgä Dios rasunpa cashgantami. Chaychoraj cuentata gocurgä juc ali amiguta tarishgäta”.

17. ¿Imanirtaj Jehovapa jutinta alabayta munanqui? (Fotutapis ricay).

¹⁷ Runacunata yachachicurga Diosninchi jutiyoj cashganta y imano cashgantapis wilapashwan. Chayta rurarmi Diospa jutinta alabaycanchi. Chaymi runacunata yanapaycäshun musyananpaj Jehová imano cashganta, chayta rurar jutintami alabaycäshun. Jina cawaynintapis salvaycäshun, Reyninchi Jesús rurashganno ruraycäshun y masraj Taytanchi Jehovapa shongunta cushichishun. Yarpay Salmo 145:2 nishganta, chaycho nin: “Imayyaqpis jutikita joqarirmi alabashayki”.