1, 2. ¿Satanás llullacunata nishcamantaca Jehová Diosca ima shinataj sintirin? (Shuj ejemplota churashpa parlai).

 CAMBAJ cꞌuyashca amigo canmanta huashalla mana allicunata nijpica ¿ima shinataj sintiringuiman? Canca cambaj amigo nishcacuna mana cierto cashcatami yachangui. Shinapish maijancunaca pai nishcacunata crishpami shujtajcunamanpish parlancuna. Achca gentecuna chai llullacunata crinata yuyashpami achcata llaquiringuiman ¿nachu? (Proverbios 22:1).

² ¿Cai ejemplomantaca imatataj yachanchij? Diabloca Jehová Diosmanta llullacunata nishpami paipaj shutita mapayachirca. Chaita ricushpaca Jehová Diosca llaquillami sintirirca. Evaca Diablo nishcacunata crishcamantami Jehová Diosta mana cazunata agllarca. Qꞌuipaca Adanpishmi Diosmanta caruyarca. Chaimantami tucuicuna juchayujcuna huacharishcanchij, huañunchijpish (Génesis 3:​1-6; Romanos 5:12). Edén huertapi Diablo llullacunata nishcamantami cunancama muyundij Allpapica huañuicuna, macanacuicuna, llaquicuna tiyan. Diablopaj llullacunamanta cai Allpapi achca llaquicuna tiyajta ricushpaca Jehová Diosca achcatami llaquirin. Shinapish paica mana llaquicunallapi yuyashpachu causan. Shinallataj paica mana resentidochu saquirishca. Ashtahuanpish Bibliapi nishca shinaca Yaya Jehová Diosca ‘cushi Diosmi’ can (1 Timoteo 1:11).

3. ¿Ima oportunidadtataj charinchij?

³ Ñucanchijcunaca Jehová Diospaj shutita difindina oportunidadtami charinchij. Chaipajca Salmo 113:​1-pi nishcatami pajtachina canchij. Chaipica: ‘Jehová Diospaj shutita alabaichigari’ ninmi. Jehová Diosmanta allicunata nishpami paipaj shutitaca jatunyachinchij. Canca, ¿Jehová Diospaj shutita jatunyachisha ninguichu? Jehová Diospaj shutita tucui shunguhuan imamanta  jatunyachina cashcata intindingapajca cunanca quimsa yuyaicunatami yachashun.

DIOSTA CUSHICHINGAPAJCA PAIPAJ SHUTITA JATUNYACHISHUNCHIJ

4. ¿Jehová Diosca imamantataj paita jatunyachichun munan? (Shuj ejemplota churashpa parlai; fotomantapish parlapai).

⁴ Yaya Jehová Diosca paipaj shutita jatunyachichunmi munan (Salmo 119:108). Huaquin gentecunaca alli sintiringapajllami paicunata felicitachun munancuna. Pero, ¿Jehová Diosca chai gentecuna shina cashcamantachu paita jatunyachichun munan? Mana. Caita alli intindingapajca caipi yuyashun: shuj huahuaca paipaj yayata ugllashpami, “papito, can shinaca pi mana tiyanchu” nin. Yayaca paipaj huahua shungumanta cꞌuyaita ricuchicushcata ricushpaca cushillami sintirin. ¿Imamanta? ¿Paica alli yaya cashcata seguro cangapajchu paipaj huahua felicitachun minishtin? Mana, mana minishtinchu. Pero paita felicitachun mana minishtishpapish shungumanta felicitajta ricushpaca cushillami sintirin. Ashtahuanpish chai huahuaca uchillamantapacha cꞌuyaita ricuchinata, agradicinata yachashpaca huiñashpaca cushillami causanga. ¿Caimantaca imatataj yachanchij? Jehová Diosca gentecuna paita jatunyachichunca mana minishtinchu. Pero ñucanchijcuna paita jatunyachijpica paica cushillami sintirin.

5. ¿Jehová Diosta jatunyachishpaca imatataj ricuchishun?

⁵ Diabloca ñucanchijmantapishmi shuj llullata nishca. Paica: ‘Llaquicuna japijpica gentecunaca Diospaj shutitaca ña mana jatunyachingacunachu. Ashtahuanpish paicunapaj ima alli cashcata mashcashpami Diosmanta caruyangacuna’ nircami (Job 1:​9-11; 2:4). Pero Job runaca Diablo llulla cashcatami ricuchirca. Ñucanchijpish ¿imatataj rurana canchij? Jehová Diosta jatunyachishpaca ñucanchijpish Diablo llulla cashcatami ricuchinchij. Ñucanchijpajca Diospaj shutita difindina, paita tucuipi cazuna, paipaj shunguta cushichinami tucuimanta yalli valishca can (Proverbios 27:11).

6. ¿Rey David shina, levitacuna shinaca imatataj rurana canchij? (Nehemías 9:5).

⁶ Diosta cꞌuyajcunaca paipaj shutitami shungumanta jatunyachinata munancuna. Rey Davidca: “Ñuca almalla, Mandaj Diostaca allimari cangui niyari. Paipaj jucha illaj shutitaca ñuca tucui cashcahuanmi alli nini” nircami (Salmo 103:1). Davidca Jehová Diosta jatunyachingapaj paipaj shutitapish jatunyachina cashcatami intindirca. Ñucanchijpish Diospaj shutita jatunyachishpaca pai alli Dios cashcata, sumaj cualidadcunata charishcata, tucui pai imalla rurashcacuna sumaj cashcatami ricuchinchij. Davidca Diospaj shuti chuya, ima mapa illaj  cashcamantami paitaca tucui shunguhuan jatunyachisha nirca. Levita runacunapishmi Jehová Diosta jatunyachircacuna. Pero paicunaca humilde shunguhuanmi Diospaj shutica ima alabashcamantapish ashtahuan jatun cashcata reconocircacuna (Nehemías 9:​5-ta liyipai). Levitacuna Jehová Diosta jatunyachijpica paica cushillami sintirirca.

7. ¿Diospaj shutitaca ima shinataj jatunyachi tucunchij?

⁷ Jehová Diosta shungumanta cꞌuyashcata, paita tucuimanta agradicishcata parlashpami paita jatunyachinchij. Diosmanta huillacushpaca gentecunataca paimanta yachanata munachunmi ayudana canchij. Chashnami paicunapish Jehová Diostaca shungumanta cꞌuyangacuna (Santiago 4:8). Jehová Dios cꞌuyaj, cashcata ruraj, tucuita yachaj, achca poderta charishcata, shujtajcunaman yachachishpami cushilla sintirinchij. Shinallataj Jehová Diosta jatunyachingapajca pai shina tucuita rurangapajmi esforzarina canchij (Efesios 5:1). Chaita rurajpica gentecunaca Diosta mana sirvijcuna shina mana cashcatami cuentata cungacuna. Shinallataj Diosmantami yachanata munangacuna (Mateo 5:​14-16). Diosta sirvijcuna cashcamanta alli cualidadcunata charishcata shujtajcunaman yachachishpami Diospaj shutita jatunyachinchij. Ñucanchij alli ejemplota ricushpaca alli shungu gentecunaca Diosmantami yachanata munangacuna. Jehová Diosca ñucanchijcuna shujtajcunaman paimanta yachachijta ricushpaca cushillami sintiringa (1 Timoteo 2:​3, 4).

JESUSTA CUSHICHISHUNCHIJ

8. ¿Jesusca Diospaj shutitaca ima shinataj jatunyachishca?

⁸ Jesús shina Jehová Diosta rijsijca pi mana tiyanchu (Mateo 11:27). Jesusca Yaya Jehová Diostaca achcatami cꞌuyan. Chaimantami paica Diospaj shutita alabangapaj tucuita rurashca (Juan 14:31). Shinallataj Jesusca manaraj huañushpaca Yaya Diostaca cashna nishpami mañarca: “Cambaj shutitaca rijsichishcani” (Juan 17:26). ¿Jesusca Diospaj shutitaca ima shinataj rijsichirca?

9. ¿Jesusca Yaya Dios ima laya cashcata yachachingapajca ima chꞌimbapuraitataj churarca?

⁹ Jesusca Yaya Dios Jehová shuti cashcallataca mana yachachircachu. Judiocunaca chaitaca ñami yacharcacuna. Ashtahuanpish Jesusca paicunamanca Jehová Dios ima shina cashcatami yachachirca (Juan 1:​17, 18). Por ejemplo, Ñaupa Testamentopica Jehová Dios cꞌuyaj, llaquij cashcatami nin (Éxodo 34:​5-7). Pero Jesusca chingashca churimanta chꞌimbapuraita churashpami judiocunataca Jehová Dios ima laya cashcata intindichun ayudarca. Chingashca churi caruta shamucujpirajmi yayaca paita ricushpa achcata llaquirirca. Chaimi paita tupanaman callpashpa rirca. Ña tupashpaca cꞌuyaihuanmi ugllashpa mucharca. Chashnami Yayaca paipaj churita perdonarca. Bibliapi chaita liyishpaca Jehová Dios yallitaj cꞌuyaj, llaquij cashcatami intindinchij (Lucas 15:​11-32).

10. a) ¿Jesús Diospaj shutita nij cashcata, shujtaj gentecunapish chai shutita nichun munashcataca ima shinataj yachanchij? (Marcos 5:19; fotomantapish parlapai). b) ¿Jesusca ñucanchijpish imata rurachuntaj munan?

¹⁰ ¿Jesusca shujtaj gentecunapish paipaj Yayapaj shutita nichunchu munarca? Ari. Chai punllacunapica panda religionta pushajcunaca ‘Diospaj shuti yallitaj jucha illaj cashcamantami mana nina canchij’ nishpami yuyashcangacuna. Pero Diospaj Shimipica chaitaca mana yachachinchu. Chaimantami Jesusca chai costumbretaca mana catirca. Ashtahuanpish paica paipaj Yayapaj shutitami jatunyachishpa catirca. Por ejemplo, demoniocuna japishca runata Jesús jambijpica chaipi causaj gentecunaca achcata mancharishpami Jesustaca  chaimanta richun mañarcacuna (Marcos 5:​16, 17). Pero Jesusca chai gentecuna Yaya Diospaj shutita yachachunmi munarca. Chaimantami manaraj rishpa pai jambishca runamanca ‘Jehová Dios canmanta imata rurashcata gentecunaman huillagri’ nirca (Marcos 5:​19-ta liyipai). a Jesusca ñucanchijcunapish tucui gentecunaman Diospaj shutita yachachichunmi munan (Mateo 24:14; 28:​19, 20). Chaita rurajpica Jesusca cushillami sintiringa.

11. a) ¿Jesusca paita catijcunamanca ima shina mañachuntaj yachachirca? b) ¿Diospaj shuti ‘jucha illaj nishca cachun’ mañanaca imamantataj importante can? (Ezequiel 36:23).

¹¹ Jehová Dios paipaj shuti cutin alli nishca cachun munashcataca Jesusca allimi yachan. Chaimantami paita catijcunamanca cashna nishpa mañachun yachachirca: ‘Jahua pachapi caj ñucanchij Yaya, cambaj shutica jucha illaj nishca cachun’ (Mateo 6:9). Jesuspajca Jehová Diospaj shutita jatunyachinami tucuimanta ashtahuan importante carca (Ezequiel 36:​23-ta liyipai). Chaimantami Diospaj shutita jatunyachingapajca tucuita rurashca. Pai shinaca pi mana rurashcachu. Chaita rurajpipish paipaj contracuna prezu japishpaca ‘Diospaj shutitami mapayachishcangui’ nishpami yangamanta juchachircacuna. Pero Jesusca Diospaj shutita mapayachinataca mana nunca yuyarcallapishchu. Jesusca paita yangamanta juchachishpa huañuchinataca allimi yacharca. Chaimantami paita manaraj prezu japijpica yallitaj llaquilla sintirirca (Lucas 22:​41-44).

12. ¿Jesusca Diospaj shutitaca ima shinataj jatunyachirca?

¹² Jesusca Diospaj shutita jatunyachingapajca mana pꞌiñarishpami achca llaquicunata ahuantarca. Paitaca yangamantami juchachircacuna, macarcacuna, cꞌamircacunapish. Jesusca Jehová Diosta tucuipi cazushcamantami paimanta burlarijpipish mana pingarishpa huañurca (Hebreos 12:2). Shinallataj Jesusca chai sinchi punllacunapi Diablo paita llaquichicushcatami yacharca (Lucas 22:​2-4; 23:​33, 34). Diabloca Jesustaca Jehová Diosmantami caruyachisha nirca. Pero mana pudircachu. Ashtahuanpish Yaya Diosta tucuipi cazushpami Jesusca Diablo llulla cashcata ricuchirca. Shinallataj Diosta sirvijcuna achca llaquicunata charishpapish Jehová Diosta  tucui shunguhuan sirvi tucushcatami ricuchirca.

13. ¿Jesusta cushichingapajca imatataj rurana canchij?

¹³ ¿Jesusta cushichisha ninguichu? Chaipajca Diospaj shutitami jatunyachina cangui. Shinallataj shujtaj gentecunatapish Jehová Diosta alli rijsichunmi ayudana cangui. Chashnami Jesuspaj ejemplota caticushcata ricuchingui (1 Pedro 2:21). Ashtahuanpish shujtajcunaman Diosmanta yachachishpami Jehová Diosta cushichingui. Diablo llulla cashcatapishmi ricuchingui.

GENTECUNA QUISHPIRICHUN AYUDASHUNCHIJ

14, 15. ¿Gentecunaman Diosmanta yachachijpica paicunaca ima shinataj beneficiarincuna?

¹⁴ Jehová Diospaj shutita jatunyachishpaca shujtaj gentecunapish quishpirichunmi ayudanchij. ¿Imamantataj chashna ninchij? Diabloca ‘gentecunapaj yuyaitami tapashca’ (2 Corintios 4:4). Achca gentecunaca Diablopaj llullacunata crishcamantami Yaya Dios mana tiyashcata yuyancuna. Cutin shujtajcunaca Yaya Dios tiyashcata crishpapish ñucanchijmanta mana sustarishcatami yuyancuna. Ashtahuanpish paicunaca Jehová Dios millai, huiñaipaj llaquichij cashcatami yuyancuna. Diabloca chai llullacunahuanmi Diospaj shutita mapayachishca. Paica gentecuna Diospajman cꞌuchuyachunca mana munanchu. Pero gentecunata Diablo ama pandachishpa catichunmi paicunamanca Diosmanta yachachina canchij. Chashnami Diospaj shutita jatunyachishun. ¿Ñucanchijcuna huillashcamantaca gentecunaca ima shinataj beneficiarishcacuna?

¹⁵ Diospaj Shimipi yachachishcacunaca achca valishcami can. Gentecunaman Yaya Dios ima shina cashcata yachachijpica paicunaca achcatami beneficiarincuna. Paicunaca Bibliamanta yachai callarishpaca Diablopaj llullacunapi crinatami saquincuna. Chashnami Jehová Dios yallitaj cꞌuyaj, llaquij cashcata cuentata cuncuna. Shinallataj Jehová Dios tucui poderta charishcata yachashpami sorprendidos saquirincuna (Isaías 40:26). Cutin, Jehová Dios cashcata ruraj cashcata, alli yachaita charishcata yachashpaca cushillami sintirincuna (Deuteronomio 32:4; Isaías 55:9; Romanos 11:33). Yayitu Dios cꞌuyaj cashcata yachashcamantapishmi achcata cushicuncuna (1 Juan 4:8). Shinallataj paicunaca Jehová  Diospajman cꞌuchuyashpaca huiñai huiñaita causai tucushcata, Diospaj huahuacuna tucui pudishcatami cri callarincuna. Caipi ricushca shinaca gentecuna Diospajman cꞌuchuyachun ayudanaca achca valishcami can. Chaita rurashpami Jehová Dioshuanca tandalla trabajai tucunchij (1 Corintios 3:​5, 9).

16. ¿Maijancunaca Diospaj shutita yachashpaca ima shinataj sintirincuna? (Shuj ejemplota churashpa parlai).

¹⁶ Gentecunaman Bibliamanta yachachi callarishpaca Diospaj shutitami puntapica yachachinchij. Maijancunaca chai shutita yachashpaca paicunapaj causaipica ratomi cambiocunata rurashcacuna. Por ejemplo, Alía b shuti huarmica Bibliamanta mana yachachij religionpimi huiñarca. Chaimantami paica Yaya Diostaca shuj alli amigota shina mana ricurca. Testigo de Jehovacunahuan Bibliata yachai callarishpaca Aliaca panda religionta pushajcuna achca Bibliacunapi Diospaj shutita churanapaj randi Señor nishpa churashcatami yacharca. Paicuna imamanta chaita rurashcataca Aliaca mana intindircachu. Pero Diospaj shutita yachashpaca paitaca shuj alli amigota shinami ricui callarirca. Paica: “Ñuca alli amigoca shuj shutitami charin. Chaita yachashcamantami cunanca tranquila sintirini. Diospaj amiga canaca ñucapajca achca valishcami can” nircami. Cutin Esteban shuti runaca musicata tocashpami trabajaj carca. Paipaj familiaca judío religiontami tucui shunguhuan catijcuna carca. Pero chai religionta catijcuna mana alli causacujta ricushcamantami paica ima religiontapish mana catinata decidirca. Shuj familia huañujpica Estebanca achcatami llaquirirca. Chaimi shuj punllaca testigo de Jehovacuna shuj amigoman Bibliamanta ima shina yachachijta ricunaman rirca. Chaipica Diospaj shutitami yacharca. Diospaj shutita yachashpaca paica yallitaj cushillami sintirirca. Estebanca: “Diospaj shuti maijan cashcataca mana yacharcanichu. Pero paipaj shutita yachashpaca Dios verdadero cashcatami cuentata curcani. Cunanca paica ñuca alli amigomi can” nircami.

17. ¿Canca Diospaj shutitaca imamantataj jatunyachisha ningui? (Fotomantapish parlapai).

¹⁷ Diosmanta huillacushpaca paipaj shutita, pai ima shina cashcatami huillana canchij. Chaita rurashpami Diospaj shutita jatunyachishun. Shinallataj shujtajcunapish quishpirichun Jehová Diospaj shutita rijsichun ayudashunchij. Chashnami Jesuspaj ejemplota caticushcata ricuchishun. Ashtahuantajca Yaya Jehová Diospaj shungutami cushichishun. Salmo 145:​2-ta quillcaj runa shina tucuicuna nishunchij. Paica Jehová Diostaca: “Quiquinpaj shutitaca huiñai huiñaitami alabasha” nircami.