1-2. Eaa te ka tauturu ia tatou kia mārama i to Iehova manako no tei akakinoia tona ingoa meitaki?

 AKAMANAKO ana i teia: Kua tuatua akakino tetai tei akaperepere ia koe. Kua kite koe e pikikaa te reira; inara kua irinakiia e tetai pae. Tei kino atu, kua akatotoa ratou i teia pikikaa e e manganui tei irinaki i te reira. Eaa toou manako? Mea papu, ka mamae koe me akakinoia toou ingoa meitaki.—Mase. 22:1.

² Ka tauturu teia akaraanga ia tatou kia mārama i to Iehova mamae no tei akakinoia tona ingoa. Kua pikikaa tetai o tana tamariki vaerua ki te vaine mua ko Eva e kua irinaki aia i te reira. Aru mai, kua meameaau to tatou nga metua mua ia Iehova. Tei tupu, kua iri mai te ara e te mate ki te au tangata ravarai. (Gene. 3:​1-6; Roma 5:12) Pouroa te au manamanata i teianei ao, te mate, te tamaki e te taitaia. Kua tupu te reira mei te au tuatua pikikaa a Satani tei akatotoaia mei te aua o Edene. Te mamae ra ainei a Iehova no teia pikikaa? Ae! Inara, kare Aia e akamoupuku mari ra e Atua mataora aia.—1 Timo. 1:11.

3. Eaa ta tatou akameitakianga?

³ Tei ia tatou te akameitakianga no te akatapuanga i te ingoa o Iehova na te aru anga i teia akauenga: “Akapaapaa, e te au tavini o Iehova, e akapaapaa i te ingoa o Iehova.” (Sala. 113:1) Ka akapaapaa tatou i te ingoa o Iehova me akakite aere tatou i te tuatua mou no runga iaia. Ka rave ainei koe i teia? Ka uriuri tatou e toru akakoroanga puapinga te ka tauturu ia tatou kia akapaapaa i  te ingoa o to tatou Atua ma te ngakau katoa.

MAREKA A IEHOVA ME AKAPAAPAA TATOU I TONA INGOA

4. Eaa te tumu ka mareka a Iehova i ta tatou akapaapaa anga? Akatutu mai. (Akara katoa i te tutu.)

⁴ Ka akamareka tatou i to tatou Metua i te rangi me akapaapaa i tona ingoa. (Sala. 119:108) Inara ko te aiteanga ainei e kua aite te Atua Mana Katoatoa ki te au tangata apa ua, tei anoano i te akapaapaaanga ei akamaroiroi ia ratou? Kare. Akamanako i teia akatutuanga. Kua takave tetai manga tamaine i tona papa e kua tuatua, “E tati meitaki koe!” Kua kata a papa e kua mareka aia i tana tuatua. No teaa ra? Ka manako ainei tatou e te inangaro ra te papa i te akameitaki anga a tana tamaine? Kare. Mari ra, kua inangaro e kua mareka aia i tana tamaine no tona tu maoraora e te aroa. Ka kite katoa te tati me maata mai tana tamaine, ka akaari ua rai aia i te tu aroa e te takinga meitaki. Mei te reira katoa a Iehova, to tatou Metua maata rava atu, ka mareka aia me akapaapaa tatou iaia.

5. Me akapaapaa tatou i te ingoa o Iehova, eaa te pikikaa ka akakore tatou?

⁵ Me akapaapaa tatou i to tatou Metua i te rangi, te āriki ra tatou e e pikikaa ta Satani akaapaanga. Karanga aia kare e tangata e paruru i te ingoa o te Atua. Kare katoa e tangata e vai tiratiratu ki te Atua. Ka akamutu tatou i te tavini i te Atua me manako tatou e puapinga kore te reira. (Iobu 1:​9-11; 2:4) Inara kua akapapu a Iobu e e pikikaa a Satani. Akapeea koe? Tei ia tatou tataki tai te akameitaki anga kia paruru i te ingoa o to tatou Metua e te akamareka iaia na te tavini tiratiratu anga iaia. (Mase. 27:11) E tikaanga manea tikai.

6. Akapeea tatou me aru i te akaraanga o te Ariki ko Davida e te ngati Levi? (Nehemia 9:5)

⁶ Ka akakeu te inangaro i te Atua i tetai kia akapaapaa i tona ingoa ma te ngakau katoa. Tata te Ariki ko Davida: “E akameitaki ia Iehova, e taku vaerua; e to roto katoa iaku nei, i tona ra ingoa tapu.” (Sala. 103:1) Kua kite a Davida me akapaapaaia te ingoa o te Atua, aite rai ki te akapaapaa anga ia Iehova. Me rongo tatou i to Iehova ingoa, ka akamanako tatou i tona au tu manea e tana au angaanga memeitaki. Kua akatapu a Davida i te ingoa o tona Metua e kua akapaapaa Iaia. Kua rave aia i te reira ma tona ngakau katoa koia oki  “to roto katoa” iaia. E pera kua rave katoa te ngati Levi i te arataki anga no te akapaapaa ia Iehova. Kua āriki akaaka ratou e kare ta ratou au tuatua e taeria te akameitaki e te akapaapaa anga i te ingoa tapu o Iehova. (E tatau ia Nehemia 9:5.) Mea papu, kua riro to ratou tu akaaka, ei akamareka ia Iehova.

7. Akapeea tatou me akapaapaa ia Iehova i roto i te angaanga tutu aere e i te au rā?

⁷ I teia rā, ka akamareka tatou ia Iehova na te tuatua anga no runga iaia ma te maanaana, takinga meitaki e te aroa. Me tutu aere tatou, ka akamanako tatou i te akakoroanga, koia oki kia tauturu i te tangata kia akavaitata kia Iehova, e kia kite iaia ei Metua akaperepere no ratou. (Iako. 4:8) Ka mareka tatou i te akaari mei roto i te Pipiria i to Iehova tu aroa, tuatua tau, pakari, mana e tetai atu au tu manea. Ka akapaapaa e ka akamareka katoa tatou ia Iehova na te aru anga i tona tu. (Ephe. 5:1) Me rave tatou i te reira, ka tuke tatou mei teia ao kino. Ka kite mai te tangata e ka manako eaa ra te tumu. (Mata. 5:​14-16) Ia tatou e piri ra kia ratou i te au rā, penei ka rauka ia tatou i te akamārama i te tumu. Tei tupu, ka akavaitata mai te aronga ngakau tae ki to tatou Atua. Me akapaapaa tatou ia Iehova na roto i teia au mataara, ka rekareka aia.—1 Timo. 2:​3, 4.

MAREKA A IESU ME AKAPAAPAA TATOU I TE INGOA O IEHOVA

8. Eaa i riro ei e ko Iesu te akaraanga meitaki no te akapaapaa i te ingoa o Iehova?

⁸ I te au mea ora i te rangi e te enua, kare atu e tangata i kite meitaki i te Metua, mari ra ko te Tamaiti. (Mata. 11:27) Kua akaperepere a Iesu i tona Metua, e kua akapaapaa i te ingoa o Iehova. (Ioa. 14:31) I roto i tana pure ki tona Metua i te po i mua ake ka mate ei aia, kua tuatua a Iesu i te mea puapinga tana i rave i te na ko anga: “Kua akakite atu oki au kia ratou, . . . i toou ingoa.” (Ioa. 17:26) Eaa te aiteanga o tana tuatua?

9. Eaa ta Iesu parapore i akakite tei akamārama atu i te tu o tona Metua?

⁹ Kare a Iesu i akakite ua ki te tangata i to te Atua ingoa ko Iehova. Kua kite takere te ngati Iuda i to te Atua ingoa. No reira, kua akamārama a Iesu e koai tikai te Atua. (Ioa. 1:​17, 18) Ei akaraanga, kua akamārama te Tuatua Tapu Epera ia Iehova ei Atua takinga meitaki e te aroa ua. (Exo. 34:​5-7) Kua akapapu a Iesu i teia irava i tona akakite anga mai i te parapore no te tamaiti kaimoumou apinga e tona metua. Me tatau tatou no runga i te papa tei kite i tana tamaiti tataraara “e tei te ngai mamao rai aia,” kua oro atu te papa i te aravei iaia, kua takave iaia e kua akakore i tana ara. Ka tauturu te reira ia tatou kia kite i to Iehova tu takinga meitaki e te aroa ua. (Luka 15:​11-32) Kua tauturu a Iesu i te tangata kia kite tikai i to Iehova tu.

10. (a) Akapeea tatou i kite ei e kua taangaanga a Iesu i te ingoa o tona Metua e kua inangaro aia i tetai ke kia pera katoa? (Mareko 5:19) (Akara katoa i te tutu.) (e) Eaa ta Iesu e inangaro ra no tatou kia rave i teia rā?

¹⁰ Kua inangaro ainei a Iesu i te au tangata kia taangaanga i te ingoa o tona Metua? Mea papu. Kua irinaki te au arataki akonoanga o te reira tuatau e tapu roa te ingoa o te Atua e kia kore e tuatuaia. Inara kare a Iesu i ariu ana ki ta ratou peu tei akakino i te ingoa o tona Metua.  Akamanako ana i te tuatau i akaora ei a Iesu i tetai tangata tei uruia e te temoni i Gadara. Kua mataku te oire tangata e kua pati ia Iesu kia akaruke aia i te reira ngai. (Mare. 5:​16, 17) Noatu ra, kua inangaro a Iesu kia akakiteia rai te ingoa o Iehova. No reira, kua akaue a Iesu ki te tangata tana i akaora kia akakite i ta Iehova i rave e kare i tana i rave. (E tatau ia Mareko 5:19.) a Aite katoa i teia tuatau—kua inangaro a Iesu ia tatou kia akakite i te ingoa o tona Metua i te ao katoa! (Mata. 24:14; 28:​19, 20) Me rave tatou i teia, te akamareka ra tatou i to tatou Ariki ko Iesu.

11. Eaa ta Iesu i apii ki tana au pipi kia pure, e eaa i puapinga ai te reira? (Ezekiela 36:23)

¹¹ Kua kite a Iesu i to Iehova akakoroanga koia oki kia akatapuia Tona ingoa, e kia takoreia te au pikikaa no runga iaia. No reira a Iesu i apii ei ki tana au pipi kia pure: “E to matou Metua i te ao ra, Kia tapu toou ingoa.” (Mata. 6:9) Kua mārama a Iesu e ko teia te māroanga puapinga rava atu. (E tatau ia Ezekiela 36:23.) Kare atu e mea ora i te rangi e i te enua tei akatapu i te ingoa o Iehova mei ia Iesu rai. Inara, i tona tapekaia anga, eaa tana ara i akaapaia ai aia? Te akakinoanga i te Atua! Inara, kia Iesu ko te ara kino roa atu koia oki ko te akakino anga i te ingoa tapu o tona Metua. Kua taitaia maata aia no teia akaapaanga e ka akautungaia aia no te reira. Penei ko te tumu teia i “maata ua” atu ei to Iesu mamae i mua ake ka tapekaia ai aia.—Luka 22:​41-44.

12. Akapeea a Iesu te akatapu anga i te ingoa o tona Metua?

¹² Kia akatapu i te ingoa o tona Metua, kua akakoromaki a Iesu i te au tu takinokino anga, tamamae anga e te au akaapaanga pikikaa. Kua kite aia e ka akarongo aia i te au mea pouroa a tona Metua e kia kore e akamā i te reira. (Ebe. 12:2) Kua kite katoa aia e te takinokino ra a Satani iaia i tera tuatau ngatā. (Luka 22:​2-4; 23:​33, 34) Kua inangaro a Satani kia tiratiratu kore a Iesu, inara kare te reira i  puapingaia! Kua akapapu mai a Iesu e e pikikaa ta Satani akaapaanga e kare o Iehova tavini mou te ka tiratiratu kiaia noatu te pakari o te au timataanga!

13. Akapeea koe me akamareka i toou Ariki ko Iesu i te rangi?

¹³ Ka inangaro ainei koe i te akamareka i toou Ariki i te rangi? E akapaapaa ua atu i te ingoa o Iehova e te tauturu i te tangata kia kite i to tatou Atua e tona au tu manea. Me rave koe i te reira, te aru ra koe i te akaraanga o Iesu. (1 Pete. 2:21) Mei ia Iesu rai, te akarekareka ra koe ia Iehova e te akapapu ra i te enemi ko Satani e pikikaa aia!

AKAORA TATOU I TE TANGATA ME AKAPAAPAA I TE INGOA O IEHOVA

14-15. Eaa te au mea umere ka tupu me apii tatou ki te tangata i te tuatua mou no runga ia Iehova?

¹⁴ Me akapaapaa tatou i te ingoa o Iehova, ka tauturu tatou i te akaora i te tangata. Akapeea ra? Kua akapoiriia te ngakau o te aronga akarongo kore e Satani. (2 Kori. 4:4) No reira kua irinaki ratou i te au pikikaa a Satani e kare e Atua, e mamao aia, kare e tangi mai ana i te tangata, e e Atua kino aia tei tamamae i te aronga kino. Kua akatotoa a Satani i te au pikikaa kia akakino i te ingoa meitaki o Iehova: e kia kore te tangata e akavaitata atu kiaia. Inara, ka riro te angaanga tutu aere ei tamanamanata i to Satani akakoroanga. Ka apii tatou ki te tangata i te tuatua mou no to tatou Metua, ma te akapaapaa i tona ingoa tapu. Eaa ta teia ka akatupu?

¹⁵ E ririnui te Tuatua mou a te Atua. Na te apiianga ia Iehova e tona au tu ki te tangata ka tupu te au mea umere. Kare te tangata e akavareia e te au pikikaa a Satani, mari ra ka kite ratou i te au tu manea o Iehova mei ia tatou rai. Ka umere ratou i tona mana maata. (Isa. 40:26) Kua irinaki ratou iaia no tona tu tau tikai. (Deu. 32:4) Ka apii ratou i tona tu pakari. (Isa. 55:9; Roma 11:33) Kua pumaanaia ratou e tona aroa. (1 Ioa. 4:8) Ia ratou e akavaitata ra kia Iehova, e mea mou to ratou manakonakoanga  kia riro ei tamariki nana e tuatau ua atu. E tikaanga manea no tatou kia tauturu i te tangata kia akavaitata atu ki te Atua! Me rave tatou i te reira, ka āriki a Iehova ia tatou ei au oa rave angaanga nona.—1 Kori. 3:​5, 9.

16. Eaa te ka tupu me apii tetai i te ingoa o te Atua? Oronga mai i te akaraanga.

¹⁶ I te akamataanga, penei ka apii tatou ki te tangata i te ingoa o te Atua ko Iehova. Ka riro te reira ei akakeu i te aronga ngakau tae. Ei akaraanga, kua maata mai te mapu vaine ko Aaliyah b ki roto i tetai akonoanga kare e apii ana i te Pipiria. Iaia, kare ona pirianga ki te Atua. Inara kua taui te reira i tona apiianga i te Pipiria ma te Au Kite o Iehova. Kua kite mai aia i te Atua ei oa nona. Kua poitirere aia e kua monoia te ingoa o te Atua ki te taoonga Atu i roto i te Pipiria. Te kite anga aia i te ingoa o Iehova kua taui te reira i tona oraanga. Karanga aia: “Toku Oa meitaki e ingoa tona! Kua ’au ua toku ngakau, e tikaanga ngateitei tikai.” Ko Steve, e tangata akatangi imene e e ngati Iuda aia. Kare ana akonoanga no te maata o te pikikaa. Inara, i muri ake te mate anga tona mama, kua āriki aia i tetai apii Pipiria ma te Au Kite o Iehova. Kua pakia tona ngakau te kite anga i te ingoa o te Atua. Karanga aia: “Kare rava au i kite ana i te ingoa o te Atua. Ko te taime mua teia i kite ei au iaia ei Atua mou. E e Oa aia noku.”

17. Eaa koe ka akapaapaa ua rai i te ingoa o Iehova? (Akara katoa i te tutu.)

¹⁷ I roto i taau angaanga tutu aere e te apiianga, te akakite ra ainei koe i te ingoa tapu o Iehova ki te tangata? Te tauturu ra ainei koe ia ratou kia kite e koai tikai to tatou Atua? Me pera koe, te akapaapaa ra koe i te ingoa o te Atua. Me tauturu koe i te tangata kia kite tikai no runga i te Atua, te akapaapaa ra koe i te ingoa tapu o Iehova. Na te reira mataara te akaoraia ra ratou. Te aru ra koe i te akaraanga o to tatou Ariki ko Iesu Mesia. E te akamareka ra koe i toou Metua akaperepere ko Iehova. Kia ‘akapaapaa ua rai koe i tona ingoa e tuatau e tuatau ua atu’!—Sala. 145:2.