1-2. So šaj te pomožini amen te haljova sar o Jehova osetini pe sose oleso anav tano klevetimo?

 ZAMISLIN akija situacija: Neko kas mangeja vaćeri diso but lošno tutar. Tu đaneja so odova tano hovajbe, ama ipak disave verujinena ko odova. Soj tano pana pološno, odola manuša vaćerena averenđe odova hovajbe hem but avera verujinena ko odova. Sar bi osetineja tut? Ako brinineja tut so ka mislinen o manuša tutar hem da li ka ove ko šukar glaso, odova hovajbe but ka povredini tut (Posl. 22:1).

² Akava primer šaj te pomožini amen te haljova sar o Jehova osetinđa pe ked oleso anav hine klevetimo. Jekh ando olese anđelija vaćerđa hovajbe olestar e prvo romnjaće, e Evaće. I Eva verujinđa ko odova hovajbe. Sebepi odova, oj hem o Adam pobuninđe pe protiv o Devel. Odolese, sa o manuša tane grešna hem merena (Post. 3:1-6; Rimlj. 5:12). Sa o problemija kola isi ko sveto, sar soj tane o meribe, o ćororipe hem o maribe, postojinena sose o Satana vaćerđa hovajba ko edensko vrt. Da li o Jehova osetini dukh ko vilo sebepi odola hovajba hem o problemija kola anđa odova hovajbe? Naravno! Ama, o Jehova na ićeri i holi. Ov tano „bahtalo Devel“ (1. Tim. 1:11).

3. Koja čast isi amen?

 ³ Amen šaj te pomožina te dokažini pe so o Satana vaćerđa hovajba ando Jehova. Odova šaj te ćera ađahar so ka šuna akija zapovest: „Hvalinen e Jehova“ (Ps. 113:1). Amen hvalinaja e Jehova ked averenđe vaćeraja o ćaćipe. Da li hem tu mangeja te ćere odova? Ka dikha trin buća kola ka pomožinen amen te hvalina e Jehovaso anav celone vileja.

AMEN ĆERAJA E JEHOVA BAHTALO KED HVALINAJA OLESO ANAV

4. Sose tano o Jehova bahtalo ked hvalinaja le? Vaćer jekh primer. (Dikh i slika.)

⁴ O Jehova tano bahtalo ked hvalinaja oleso anav (Ps. 119:108). Da li odova značini so o Svemoćno Devel tano sar o nesavršena manuša kola mangena avera te hvalinen len sose valjani lenđe ohrabrenje? Na. Te dikha jekh primer. Jekh tikni ćhaj prastala premalo po dad, zagrlini le hem phenela: „Tu hijan najšukar dad ko celo sveto!“ O dad asala hem bahtalo tano. Sose? Pa na sebepi soj tano olese potrebno olesi ćhaj te ohrabrini le ja te hvalini le, već odolese so mangela pe ćhaja hem bahtalo tano sose oj mothovi lese po mangipe hem zahvalnost. Ov đanela so sebepi odola osobine, oj kasnije ka ovel bahtali. Isto ađahar, o Jehova, amaro najbaro Dad, tano bahtalo ked amen hvalinaja le.

5. So dokažinaja odoleja ked hvalinaja e Devleso anav?

⁵ Ked hvalinaja amare nebesko Dade, tegani dokažinaja so jekh aver hovajbe kova o Beng phenela svakonestar amendar nane tačno. Ov phenela so nijekh manuš na ka aćhol verno e Devlese ked ka oven le pharipa. Isto ađahar, phenela so sare amen ka ćhinava te služina e Devlese ako mislinaja so tegani ka ovel amenđe pošukar (Jov 1:9-11; 2:4). Ama, o verno manuš o Jov mothovđa so o Satana hovavi. Da li hem tu ka aćhove verno sar o Jov? Svako amendar šaj te birini te ovel ki Devlesi strana hem te ćerel le bahtalo ađahar so verno ka služini lese (Posl. 27:11). Ćaće tani bari čast te ćera odova.

6. Sar šaj te oponašina e Davide hem e Leviten? (Nemija 9:5)

⁶ O mangipe premalo Devel podstaknini e verna manušen te hvalinen oleso anav celone vileja. O kralj David pisinđa: „Nek mi duša hvalini e Jehova! Nek sa soj tano ano mande hvalini oleso  sveto anav“ (Ps. 103:1). Ov đanđa so ked hvalinaja e Jehovaso anav, odova tano isto sar ked hvalinaja e Jehova. Ked šunaja o anav Jehova, ki godi avela amenđe jekh šukar osoba koja isi la šukar osobine hem sa o šukar buća so ćerđa. O David manglja premalo pe Dadeso anav te postupini sar premalo diso soj tano sveto hem te hvalini le. Odova manglja te ćerel celone vileja. Isto ađahar, o Levitija hvalinđe e Jehovaso anav. On priznajinđe so pe lafencar niked našti potpuno te hvalinen e Jehovaso sveto anav kobor ov odova zaslužini. (Čitin Nemija 9:5.) Sigurno asavke skromna hem iskrena hvale anđe radost e Jehovase.

7. Sar šaj te hvalina e Jehova ki služba hem ko amaro svakodnevno životi?

⁷ Avdije, amen šaj te ćera e Jehova bahtalo ađahar so ka vaćera averenđe olestar ko način kova ka mothovi kobor mangaja le hem kobor hijam lese zahvalna. Ked propovedinaja, amaro glavno cilj tano te pomožina lenđe te oven paše e Jehovaja hem te osetinen so ov mangela len (Jak. 4:8). Amen mangaja te mothova e manušenđe so i Biblija vaćeri ando Jehova, ando oleso mangipe, andi olesi pravda, mudrost, moć hem avera osobine. Isto ađahar, amen hvalinaja e Jehova ked daja sa amendar te oponašina le (Ef. 5:1). Ked odova ćeraja, mothovaja so hijam averćhane ando manuša kotar akava sveto (Mat. 5:14-16). A ked isi amen prilika šaj te phena lenđe sose hijam averćhane. Odolese, o iskrena manuša šaj ka mangen te oven paše e Devleja. Ked hvalinaja e Jehova ko asavke načinija, amen radujinaja oleso vilo (1. Tim. 2:3, 4).

O ISUS TANO BAHTALO KED HVALINAJA E JEHOVASO ANAV

8. Sar o Isus predvodinđa te hvalini pe e Jehovaso anav?

⁸ Niko ko nebo hem ki phuv na đanela e Jehova pošukar ando Isus (Mat. 11:27). O Isus mangela pe Dade hem predvodinđa ko odova te hvalini pe oleso anav (Jov. 14:31). Jekh rat angleder te merel, ov ki molitva phenđa koja tani i najvažno buti koja ćerđa. Ov phenđa: „Me vaćerđum lenđe to anav“ (Jov. 17:26). Sar o Isus ćerđa odova?

9. Kova poređenje koristinđa o Isus te objasnini savo tano o Jehova?

⁹ O Isus na vaćerđa e manušenđe samo so e Devleso anav tano Jehova. O Jevreja kase o Isus propovedinđa već đanđe e Devleso anav. Ama, o Isus „objasninđa [. . .] savo tano o Devel“ (Jov. 1:17, 18). Na primer, ko hebrejsko deo pisini so o Jehova tano milosrdno hem samilosno (Izl. 34:5-7). O Isus odova potvrdinđa ked vaćerđa o poređenje ando buntovno ćhavo. Ko odova poređenje o dad dikhlja pe ćhave „đi pana hine dur“, prastandoj ikljilo anglo leste, zagrlinđa le, ćumudinđa le hem spremno oprostinđa lese. Sar o dad ando akava poređenje, hem o Jehova tano but milosrdno hem samilosno (Luka 15:11-32). O Isus ćaće pomožinđa e manušenđe te haljon savo tano o Jehova.

10. (a) Sar đanaja so o Isus koristinđa pe Dadeso anav hem so manglja avera te koristinen le? (Marko 5:19; dikh i slika.) (b) So o Isus mangela amen avdije te ćera?

¹⁰ Da li o Isus manglja avera te koristinen e Devleso anav? Ja. Disave religiozna vođe verujinđe so e Devleso anav tano odobor sveto so na valjani te izgovorini  pe. Ama, o Isus na mukhlja i tradicija te ćhinavi le te slavini pe Dadeso anav. Te dikha so hine ked ko gerasinsko područje saćarđa jekhe manuše ko kova hine demonija. O manuša ko odova than but darandilje hem molinđe e Isuse te đal pese hem ov đelo (Mar. 5:16, 17). Ama, ov manglja odola manuša te đanen aso Jehovaso anav. Odolese phenđa e manušese kole saćarđa te vaćeri e manušenđe na so o Isus ćerđa, već so o Jehova ćerđa. (Čitin Marko 5:19.) a O Isus mangela hem amen ko celo sveto te vaćera e manušenđe ando olese Dadeso anav (Mat. 24:14; 28:19, 20). Ked odova ćeraja, amen ugodinaja amare Kraljese, e Isusese.

11. Aso so o Isus sikavđa pe učenikonen te molinen pe hem sose tano odova važno? (Jezekilj 36:23)

¹¹ O Isus đanđa so e Jehovasi namera tani te cidel i lađ kotar po sveto anav. Odolese, ov sikavđa pe učenikonen te molinen pe ađahar: „Amaro Dad, kova hijan ko nebo, nek svetini pe to anav“ (Mat. 6:9). O Isus đanđa so i najvažno buti tani te posvetini pe e Jehovaso anav. (Čitin Jezekilj 36:23.) Niko na posvetinđa e Devleso anav sar o Isus. Ama, ked olese dušmanija astarđe le, on optužinđe le so na mothovi poštovanje aso Devleso anav. O Isus đanđa soj tano najbaro greh te vaćeri protiv pe Dadeso sveto anav. Ov hine but uznemirimo so ka ovel nepravedno osudimo sebepi odova. Odova šaj hine o glavno razlog sose hine lese „but pharo“ nekobor satija angleder te astaren le (Luka 22:41-44).

12. Sar o Isus proslavinđa pe Dadeso anav?

¹² Te šaj te proslavini pe Dadeso anav, o Isus nakhlja bare pharipa. O manuša marđe lese muj, vređinđe le hem vaćerđe hovajbe olestar. Ov đanđa so ko sa šunđa pe Dade hem na hine sose te lađal (Jevr. 12:2). Isto ađahar, ov đanđa so o Satana direktno napadinđa le ko odola phare momentija (Luka 22:2-4; 23:33, 34). O Satana nadinđa pe so o Isus na ka aćhol poslušno pe Dadese. Ama,  ov dokažinđa so o Satana tano hovavno hem so e Jehovase sluge šaj te aćhon verna čak hem ked lenđe najpharo.

13. Sar šaj te ćere bahtalo e Kralje, e Isuse?

¹³ Da li tu mangeja te ćere bahtalo e Kralje, e Isuse? Ako ja, tegani hem ponodri hvalin e Jehovaso anav ađahar so ka pomožine e manušenđe te penđaren e Devle. Ađahar ka mothove so đaja palo Isusese korakija (1. Petr. 2:21). Sar oleste, hem tu ka radujine e Jehova hem ka mothove so o Satana tano hovavno.

AMEN POMOŽINAJA TE SPASINEN PE O MANUŠA KED HVALINAJA E JEHOVASO ANAV

14-15. Kola šukar buća šaj te oven ked pomožinaja e manušenđe te sikljon ando Jehova?

¹⁴ Ked hvalinaja e Jehovaso anav, amen pomožinaja e manušenđe te spasinen pe. Sar? O Satana „korjaćerđa [e manušengi] godi“ (2. Kor. 4:4). Sebepi odova, on verujinena ko Bengese hovajba. Na primer, ov phenela so o Devel na postojini, soj tano dur amendar, so na brinini pe amendar, soj tano nepravedno hem so mučini e lošna manušen ko pakao. Sa akala hovajba o Satana vaćeri odolese so mangela te meljaćeri e Devleso anav hem te ćhinavi e manušen te služinen lese. Ama, ked propovedinaja amen ćhinavaja e Benge te ispunini po cilj. Amen sikavaja e manušen o ćaćipe ando amaro Dad hem hvalinaja oleso sveto anav. So ovela ked odova ćereja?

¹⁵ O ćaćipe ando Devleso Lafi isi le bari moć. Ked sikavaja e manušen ando Jehova, amen šaj te dikha sar o ćaćipe utičini upro lende. On više na verujinena ko Bengese hovajba hem počminena te dikhen e Devlese but šuže osobine. Oduševinena pe ked dikhena kobor tano moćno o Devel (Is. 40:26). On stekninena poverenje upro Devel sebepi olesi savršeno pravda (Pon. zak. 32:4). Isto ađahar, sikljona but andi olesi mudrost (Is. 55:9; Rimlj. 11:33). Utešini len odova so o Devel tano mangipe (1. Jov. 4:8). Sar ovena popaše e Jehovaja, olengi nada so ka živinen večno ovela sa pozorali. Ćaće  tani bari čast te pomožina e manušenđe te oven paše amare nebesko Dadeja. Ked odova ćeraja, o Jehova dikhela amen sar pe „saradnikija“ (1. Kor. 3:5, 9).

16. Sar upro disave manuša utičinđa odova so haljilje so o Devel isi le anav? Vaćer disave primerija.

¹⁶ Ki početka, amen šaj samo te sikava e manušen so e Devleso anav tano Jehova. Odova šaj but te utičini ko životi ando iskrena manuša. Na primer, jekh ćhaj koja vićini pe Alija b barili ki religija koja na hine hrišćansko. Ama, oj na hine zadovoljno pe religijaja hem na osetinđa soj tani paše e Devleja. Odova meninđa pe, ked počminđa te proučini i Biblija. Upro Devel počminđa te dikhel sar upro po amal. Hine iznenadimi ked haljilji so e Devleso anav hine ikaldo ando but Biblije hem so hine ćhivde titule, sar na primer Gospod. Odova so sikljilji ando Devleso anav meninđa olako životi. Oj phenela: „Haljiljum so mo najšukar amal isi le anav. Akana isi man baro mir ko vilo. Ćaće tani bari čast te penđare e Devle.“ Jekh manuš kova vićini pe Stiv hine muzičari kotar jekh strogo jevrejsko porodica. Ov na manglja te ovel deo andi disavi religiozno organizacija odolese so dikhlja baro licemerstvo. Ama, ked olesi daj mulji, ov prihvatinđa te ovel ko jekh biblijako kurs. Hine oduševimo ked haljilo so o Devel isi le anav. Ov phenela: „Niked na šunđum aso Devleso anav. Prvo puti ko životi haljiljum so o Devel ćaće postojini hem so šaj te ovel mo amal.“

17. Sose hijan odlučno hem ponodri te hvaline e Jehovaso anav? (Dikh i slika.)

¹⁷ Ked propovedineja i šukar vest hem ćereja učenikonen, da li vaćereja e manušenđe ando Devleso sveto anav? Da li pomožineja lenđe te haljon savo tano o Devel? Ako ćereja odova, tu hvalineja e Devleso anav. De sa tutar hem ponodri te hvaline e Devleso anav ađahar so ka pomožine e manušenđe te haljon savo tano o Devel. Ako ćereja odova ka spasine e manušengo životi, ka sledine e Isuseso primer hem najvažno ando sa ka ćere e Jehova te ovel bahtalo. Odolese, hvalin e Jehovaso anav „doveka, ki celo večnost“ (Ps. 145:2).