1, 2. Σο βοηθίνελα-αμέν τι αγαβάς σαρ νιωθίνελα ο Ιεχωβά ι ψεματένγκε σο βακέρντιλε λέσκε ναβέσκε;

 ΑΝΕΝ τουμαρέ γκοντιάτε ακαβά: Εκ τζενό σο πφαμπόνα λέσκε βακερέλα κάτι μπουτ μπέτι τουμένγκε. Τουμέν τζανένα ότι ανταβά ισί ψέμας, αλλά μερικοί πακιάνα-λες. Ντα ο χειρότερος ισί ότι ανταλά τζενέ αρχίνενα τι βακερέν ανταβά ψέμας γιαβερέντε-ντα, ντα αντικάς πακιάνα-λες βον-ντα. Σαρ κα νιωθίνενας τουμέν ανταλέσκε; Άμα μανγκένα τι τθερέν εκ λατσσί σχέση ι γιαβερέντζαρ ντα μανγκένα τι τθερέν εκ λατσσό ναβ, ανταβά ψέμας κα κερέλας-τουμέν τι νιωθίνεν μπέτι, αντικάς νανέ;​—Παρ. 22:1.

² Ανταβά παράδειγμας βοηθίνελα-αμέν τι αγαβάς σαρ νιωσάλο ο Ιεχωβά κάνα βακέρντιλε ψέματα για τι χαλάντιβελ λέσκο ναβ. Εκ λέσκε τσσαβένταρ κο ουρανός βακερντάς ψέματα λέσκε κι πρώτη τζουβέλ, κι Εύα, ντα βόι πακιαντάς-λες. Ιτιρί ανταλέ ψεμάσταρ, αμαρό πρώτος ντατ ντα αμαρί πρώτη ντάι γκιλέ κόντρα κο Ιεχωβά. Οτθάρ, σαρέ ο τζενέ αμαρτίνενα ντα τελικά μερένα. (Γέν. 3:1-6· Ρωμ. 5:12) Σαρέ ο προβλήματα σο ντικχάσα κο ντουνιάς​—ο μεριπέ, ο τζένγκια, η στεναχώρια​—αβιλέ ιτιρί κατά ψέματα σο βακερντάς ο Μπενγκ κο κήπος της Εδέμ. Ανένα ντουκχ κο Ιεχωβά σαρέ ανταλά ψέματα ντα ο αποτελέσματα σο αβιλέ; Σίγουρα βα. Όμως ο Ιεχωβά να τθερέλα πι γκίστε ούτε κερκιπέ ούτε χολί. Οκιά μπάνταρ, συνεχίνελα τι αβέλ “ο ευτυχισμέ Ντεβέλ”.​—1 Τιμ. 1:11.

3. Καβά προνόμιος τθεράσα;

³ Αμέν τθεράσα εκ προνόμιος, τι βοηθίνας τι σικάντιβελ ότι ο Μπενγκ βακερντάς ψέματα ι Ιεχωβάσκε. Κεράσα-λες ανταβά κάνα ντάσα καν κι απλή εντολή: «Δοξάνεν ο ναβ ι Ιεχωβάσκο». (Ψαλμ. 113:1) Ανταβά αβέλα-πες κάνα βακεράσα λατσσέ πράγματα  Οντουλέσκε σο τθερέλα ανταβά άγιος ναβ. Κα κερέν-λες τουμέν ανταβά; Για τι ντικχάς τριν σημαντικούς λόγους σο τσσίντενα-αμέν τι δοξάνας ο ναβ ι Ντεβλέσκο αντράλ αμαρέ γκίσταρ.

ΚΕΡΑΣΑ Ι ΙΕΧΩΒΑΣΚΟ ΓΚΙ ΚΑΝΑ ΔΟΞΑΝΑΣΑ ΛΕΣΚΟ ΝΑΒ

4. Σόσκε αβέλα ι Ιεχωβάσκο γκι κάνα δοξάνασα-λες; Βακερέν εκ παράδειγμας. (Ντικχέν ι φωτογραφία-ντα)

⁴ Κεράσα ο γκι αμαρέ Νταντέσκο σο ισί κο ουρανός κάνα δοξάνασα λέσκο ναβ. (Ψαλμ. 119:108) Μήπως όμως ανταβά μανγκέλα τι βακερέλ ότι ο παντοδύναμος Ντεβέλ ισί σαρ ο ατελείς τζενέ σο κερένα σαρ σαρ για τι ισαρέλ-λεν κάποιος επειδή μανγκένα τι ασουνέν εκ λατσσό λάφι; Νάα. Σκεφτίνεν εκ παράδειγμας. Εκ χουρντί τσσάι τθάβντελα ντα ντέλα ανγκάλι πι νταντές μανγκιμάσαρ ντα βακερέλα: «Ισινάν ο πο λατσσό ντατ σαρό κο ντουνιάς!» Ο ντατ χαιρίνελα αζόμ μπουτ σο λέλα-λες ροϊπέ. Σόσκε; Μήπως πρέπει τι νικαβάς ο συμπέρασμας ότι ισί εκ τζενό σο νανέ σίγουρος πι νεαυτόσκε ντα κερέλα σαρ σαρ για τι ισαρέλ-λες λέσκι τσσάι; Ή μήπως μανγκέλα τι ασουνέλ εκ λατσσό λάφι; Νάα. Ανταβά αβέλα-πες επειδή μανγκέλα πι τσσαγιά ντα χαιρίνελα σο σικαβέλα λέσκε αγάπη ντα εκτίμηση. Τζανέλα ότι ανταλά ιδιότητες κα βοηθίνεν-λα τι αβέλ ευτυχισμέ καζόμ μπαριόλα. Αντικάς ο Ιεχωβά-ντα, ο πο μπαρό Ντατ, χαιρίνελα κάνα δοξάνασα-λες.

5. Κάνα δοξάνασα ι Ιεχωβάς, καβά ψέμας σικαβάσα ότι νανέ μπαγιά;

⁵ Κάνα δοξάνασα αμαρέ Νταντές σο ισί κο ουρανός, βοηθίνασα τι σικάντιβελ ότι ο ψέμας-ντα σο βακερντάς ο Μπενγκ ι κάθε εκχέσκε αμένταρ νανέ μπαγιά. Ο Μπενγκ βακερέλα ότι καέκ τζενό να κα τσσίντελ πιστά κατά ναβ ι Ντεβλέσκο. Επίσης, βακερέλα ότι καέκ τζενό να κα ατσσόλ αφοσιωμέ κο Ντεβέλ κάνα δοκιμάντιβελα. Αμντίνελα ότι σαρέ κα τσσιναβάς τι υπηρετίνας ι Ντεβλές άμα κα τθεράς τι κερδίνας κάτι. (Ιώβ 1:9-11· 2:4) Αλλά ο πιστός Ιώβ σικαντάς ότι ο Μπενγκ ισί ψεύτης. Τουμέν σο κα κερέν; Ο κάθε εκ αμένταρ τθερέλα ο προνόμιος τι τσσίντελ πιστά κατά ναβ αμαρέ Νταντέσκο ντα τι κερέλ λέσκο γκι καζόμ υπηρετίνελα-λες αφοσιωμέ. (Παρ. 27:11) Ισί μπαρί τιμή αμένγκε τι κεράς-λες ανταβά.

6. Σαρ μπορίνασα τι μοιάζας κο βασιλιάς Δαβίδ ντα κο Λευίτες; (Νεεμίας 9:5)

⁶ Η αγάπη ι Ντεβλέσκε τσσίντελα πιστέ τζενέν τι δοξάνεν λέσκο ναβ αντράλ πουμαρέ γκίσταρ. Ο βασιλιάς Δαβίδ γραφιντάς: «Τι δοξάναβ ι Ιεχωβάς· σαρέ μι γκίσαρ τι δοξάναβ λέσκο άγιος ναβ». (Ψαλμ. 103:1) Ο Δαβίδ αγαβέλας ότι κάνα δοξάνασα ι Ιεχωβάσκο ναβ, κι πραγματικότητα δοξάνασα ι ίδιε ι Ιεχωβάς. Κάνα ασουνάσα ι Ιεχωβάσκο ναβ, σκεφτίνασα σο χαρακτήρας τθερέλα ντα αβένα αμαρέ γκοντιάτε σαρέ λέσκε σουκάρ ιδιότητες ντα ο λατσσέ πράγματα σο κερέλα. Ο Δαβίδ μανγκέλας τι αγιάνελ ο ναβ  πι Νταντέσκο ντα τι δοξάνελ-λες. Μανγκέλας τι κερέλ-λες ανταβά “σαρέ πι γκίσαρ”. Αντικάς ο Λευίτες-ντα, ντένας ο λατσσό παράδειγμας καζόμ δοξάνενας ι Ιεχωβάς. Βακερντέ με ταπεινότητα ότι ναστί αρακχένας λάφια για τι ντεν κο άγιος ναβ κι Ιεχωβάσκο σαρί ι δόξα σο αξίνελα. (Διαβάνεν Νεεμίας 9:5) Ισί σίγουρος ότι ασακέ ταπεινά λάφια σο βακερντέ ο Λευίτες αντράλ πουμαρέ γκίσταρ αντέ χαρά κο Ιεχωβά.

7. Σαρ μπορίνασα τι δοξάνας ι Ιεχωβάς κάνα κεράσα έργος ντα καζόμ κεράσα διάφορα πράγματα κάθε ντιβές;

⁷ Αντιβές, αμέν μπορίνασα τι κεράς ο γκι ι Ιεχωβάσκο κάνα κεράσα λάφι λέσκε με τρόπος σο σικαβέλα καζόμ εκτίμηση νιωθίνασα ντα καζόμ μανγκάσα-λες. Κάνα ισινάμ κο έργος, τθεράσα αμαρέ γκοντιάτε ότι αμαρό σκοπός ισί τι βοηθίνας ι τζενέν τι αβέν πασέ κο Ιεχωβά, τι ντικχέν αμαρέ αγαπημέ Νταντές σαρ ντικχάσα-λες αμέν. (Ιακ. 4:8) Χαιρίνασα μπουτ τι σικαβάς κο τζενέ αντράλ κατά Γραφή κον ισί ο Ιεχωβά, ντα μερικές κατά ιδιότητες λέσκε σαρ ισί η αγάπη, η δικαιοσύνη, η σοφία, η ζορ ντα γιαβερά μπουτ σουκάρ ιδιότητες σο τθερέλα. Επίσης, δοξάνασα ι Ιεχωβάς ντα κεράσα λέσκο γκι κάνα προσπαθίνασα τι μοιάζας λέστε. (Εφεσ. 5:1) Κάνα κεράσα-λες ανταβά, ξεχωρίνασα αντρέ ανταλέ πφιρνέ ντουνιάστε. Ο τζενέ μπέκιμ ντικχένα ότι ισινάμ διαφορετικοί ντα μπορεί τι σκεφτίνεν καβά ισί ο λόγος. (Ματθ. 5:14-16) Καζόμ κεράσα διάφορα πράγματα κάθε ντιβές, μπορεί τι ντιντιόλ-αμέν η ευκαιρία τι εξηγίνας λένγκε σόσκε ισινάμ διαφορετικοί. Ντα ανταβά ταρτίνελα ι τζενέν σο τθερένα λατσσό γκι αμαρέ Ντεβλέστε. Κάνα δοξάνασα ι Ιεχωβάς ανταλέ τροπόντζαρ, ανάσα χαρά λέσκε γκίστε.​—1 Τιμ. 2:3, 4.

ΚΕΡΑΣΑ Ι ΙΗΣΟΥΣΚΟ ΓΚΙ ΚΑΝΑ ΔΟΞΑΝΑΣΑ Ι ΙΕΧΩΒΑΣΚΟ ΝΑΒ

8. Σαρ ντινάς ο Ιησούς ο πο λατσσό παράδειγμας καζόμ δοξάνελα ο ναβ ι Ιεχωβάσκο;

⁸ Καέκ κο ουρανός ή κι πφουβ να τζανέλα πο λατσσές ι Ιεχωβάς κατά Ιησούς. (Ματθ. 11:27) Ο Ιησούς μανγκέλα πι Νταντές ντα δοξάνελα ο ναβ ι Ιεχωβάσκο. Μάλιστα, ισί ο πο λατσσό παράδειγμας οπράλ ανταλέστε. (Ιωάν. 14:31) Καζόμ προσευχίντιβελας πι Νταντέστε ι ιράτ πριν τι μερέλ, σικαντάς καβά ισινέ ο πο σημαντικός πράγμας σο κερντάς κάνα ισινέ κι πφουβ, ακαλέ λαφίντζαρ: «Βακερντόμ λένγκε το ναβ». (Ιωάν. 17:26) Σο μανγκέλας τι βακερέλ;

9. Καβά παράδειγμας χρησιμοποιηντάς ο Ιησούς για τι εξηγίνελ καζόμ πο ξεκάθαρα αβέλα-πες κον ισί λέσκο Ντατ;

⁹ Ο Ιησούς να βακερντάς απλώς κο τζενέ ότι ο ναβ ι Ντεβλέσκο ισί Ιεχωβά. Ο Ιουδαίοι σο σικλιαρέλας-λεν τζανένας ήδη ο ναβ ι Ντεβλέσκο. Αλλά ο Ιησούς ισινέ «οντουβά σο εξηγιντάς κον ισί» ο Ντεβέλ. (Ιωάν. 1:17, 18) Για παράδειγμας, ο Εβραϊκές Γραφές σικαβένα ότι ο Ιεχωβά τζιτζίνελα ντα πφαμπόλα ι γιαβερένγκε. (Έξοδ. 34:5-7) Ο Ιησούς κερντάς ανταγιά αλήθεια ατζέ πο ξεκάθαρη κάνα βακερντάς ο παράδειγμας ι τσσαβέσκο σο νασλό πι κχερέσταρ. Κο παράδειγμας ανταβά, κάνα ο ντατ ντικχλάς «ντουράλ» πι τσσαβές σο μετανιωσάλοας, τθαβντισάλο πασέ λέστε, ντινάς-λες ανγκάλι ντα συγχωριντάς-λες αντράλ πι γκίσταρ. Ανταβά σικαβέλα ξεκάθαρα καζόμ μπουτ τζιτζίνελα ντα πφαμπόλα αμένγκε ο Ιεχωβά. (Λουκ. 15:11-32) Ο Ιησούς βοηθιντάς ι τζενέν τι αγαβέν σο χαρακτήρας τθερέλα μπαγιά λέσκο Ντατ.

10. (α) Σαρ τζανάσα ότι ο Ιησούς χρησιμοποιήνελας ο ναβ πι Νταντέσκο ντα μανγκέλας τι κερέν-λες ανταβά ο γιαβερά-ντα; (Μάρκος 5:19) (Ντικχέν ι φωτογραφία-ντα) (β) Σο μανγκέλα ο Ιησούς τι κεράς αντιβές;

¹⁰ Μανγκέλας ο Ιησούς τι χρησιμοποιήνεν γιαβερά-ντα τζενέ ο ναβ λέσκε Νταντέσκο; Σίγουρα. Μερικά παπάζια αζομάν μπέκιμ πακιάνας ότι άμα εκ τζενό βακερέλας ι Ντεβλέσκο ναβ να σικαβέλας σεβασμός. Αλλά ο Ιησούς να μουκχλάς ασακέ πράγματα σο τζάνας κόντρα ι Γραφιάσαρ τι κερέν-λες μα τι δοξάνελ πι Νταντέσκο ναβ. Ανέν τουμαρέ γκοντιάτε σο αβιλό-πες κάνα κερντάς λατσσές εκχέ δαιμονισμέ τζενές κο Γερασηνοί. Ο τζενέ νταρασάλε ντα μολίνενας ι Ιησούς τι νασέλ, οτθάρ βοβ να ατσσιλό οντουλέ  τθεμέστε. (Μάρκ. 5:16, 17) Όμως ο Ιησούς μανγκέλας τι σικλιόν ο τζενέ οτθέ ι Ιεχωβάσκο ναβ. Οτθάρ, βακερντάς κο τζενό σο κερντάας-λες λατσσές τι βακερέλ, όχι σο κερντάς ο Ιησούς, αλλά σο κερντάς ο Ιεχωβά. (Διαβάνεν Μάρκος 5:​19) a Ανταβά μανγκέλα αντιβές-ντα​—τι βακεράς ο ναβ λέσκε Νταντέσκο σαρό κο ντουνιάς! (Ματθ. 24:14· 28:19, 20) Κάνα κεράσα-λες ανταβά, αβέλα ο γκι αμαρέ Βασιλιάσκο, ι Ιησούσκο.

11. Καλέ πραγμάσκε βακερντάς ο Ιησούς αμένγκε τι προσευχίντιβας, ντα σόσκε ανταβά ισί σημαντικός; (Ιεζεκιήλ 36:23)

¹¹ Ο Ιησούς τζανέλας ότι ο Ιεχωβά μανγκέλα τι αγιάνελ πο ναβ, τι νασκιαρέλ σαρί ι λατζ οπρά-λέσταρ. Άκ’ σόσκε αμαρό Κύριος σικλιαρντάς οντουλέν σο τζάνα παλά-λέστε τι προσευχίντιβεν: «Ντάντε σο ισινάν κο ουρανός, τι αγιάντιβελ το ναβ». (Ματθ. 6:9) Ο Ιησούς αγαβέλας ότι ανταβά ισί ο πο μπαρό ζήτημας σαρό κο ντουνιάς. (Διαβάνεν Ιεζεκιήλ 36:​23) Καέκ άγγελος κο ουρανός ντα καέκ τζενό κι πφουβ να κερντάς ποτές πο μπουτ πράγματα κατά Ιησούς για τι αγιάνελ ο ναβ ι Ιεχωβάσκο. Όμως κάνα ασταρντέ ι Ιησούς, σο βακερντέ λέσκε ντουσμάνια; Κατηγοριντέ-λες ότι προσβαλιντάς ι Ντεβλές! Ο Ιησούς σίγουρα νιωθίνελας ότι άμα εκ τζενό κα προσβαλίνελας ο άγιος ναβ λέσκε Νταντέσκο ή κα βακερέλας ψέματα για τι χαλαβέλ-λες, ανταβά κα αβέλας η πο μπαρί αμαρτία. Σάντε σο σκεφτίνελας ότι κα κατηγορίντιβελας ντα κα καταδικάντιβελας ανταλέ πραγμάσκε, πφανγκιόλας λέσκο γκι. Μάλλον οτθάρ «τθερέλας αζόμ αγωνία» ο σαάτια πριν τι ασταρέν-λες.​—Λουκ. 22:41-44.

12. Σαρ αγιαντάς ο Ιησούς ο ναβ πι Νταντέσκο ι πο λατσσέ τροπόσαρ;

¹² Για τι αγιάνελ ο ναβ πι Νταντέσκο, ο Ιησούς νταϊντιντάς καζόμ βασανίνενας-λες, προσβαλίνενας-λες ντα βακερένας ψέματα λέσκε. Τζανέλας ότι ντινάας καν πι Νταντές σαρέ κο πράγματα. Ο Ιησούς να κερντάας κάτι μπέτι, οτθάρ να τθερέλας καέκ λόγος τι λατζάλ. (Εβρ. 12:2) Τζανέλας επίσης ότι ο Μπενγκ τζάλας λέσαρ κόντρα οντουλά μπουτ δύσκολες στιγμές. (Λουκ. 22:2-4· 23:33, 34) Ο Μπενγκ σίγουρα μανγκέλας τι κερέλ ι Ιησούς μα τι ατσσικιαρέλ σαστό πο γκι κο Ντεβέλ, αλλά να καταφεριντάς-λες ανταβά! Ο Ιησούς σικαντάς ότι ο Μπενγκ ισί εκ μπαρό ψεύτης ντα ότι ο Ιεχωβά τθερέλα μπαγιά πιστέ υπηρετόν σο ατσσικιαρένα σαστό πουμαρό γκι λέστε ατζέ-ντα κο πο μπαρέ δοκιμασίες!

13. Σαρ μπορίνενα τι κερέν ο γκι τουμαρέ Βασιλιάσκο σο κυβερνίνελα κο ουρανός;

 ¹³ Μανγκένα τι κερέν ο γκι τουμαρέ Βασιλιάσκο σο κυβερνίνελα κο ουρανός; Συνεχίνεν τι δοξάνεν ο ναβ ι Ιεχωβάσκο καζόμ βοηθίνενα γιαβερέν-ντα τι γνωρίνεν μπαγιά αμαρέ Ντεβλές. Κάνα κερένα-λες ανταβά, ακολουθίνενα ι Ιησούσκε βήματα πιστά. (1 Πέτρ. 2:21) Σαρ ο Ιησούς, αντικάς τουμέν-ντα κερένα ι Ιεχωβάσκο γκι τι χαιρίνελ ντα σικαβένα ότι Λέσκο ντουσμάνι, ο Μπενγκ, ισί εκ μπαρό ψεύτης!

ΚΑΝΑ ΔΟΞΑΝΑΣΑ Ι ΙΕΧΩΒΑΣΚΟ ΝΑΒ, ΒΟΗΘΙΝΑΣΑ ΤΙ ΣΩΝΤΙΒΕΝ ΖΩΕΣ

14, 15. Καλά μπουτ σουκάρ πράγματα μπορεί τι αβέν-πες κάνα σικλιαράσα ι τζενέν ι Ιεχωβάσκε;

¹⁴ Κάνα δοξάνασα ι Ιεχωβάσκο ναβ, βοηθίνασα τι σώντιβεν ζωές. Σόσκε βακεράσα-λες ανταβά; Ο Μπενγκ «πφαντάς ι γκοντί ι τζενένγκι» σο να τθερένα πίστη. (2 Κορ. 4:4) Οτθάρ, βον πακιαντέ ο ψέματα ι Μπενγκέσκε σαρ ισί ότι: ο Ντεβέλ να υπαρχίντιβελα, ο Ντεβέλ ισί ντουρ κατά τζενέ ντα να πφαμπόλα λένγκε, ο Ντεβέλ ισί σκληρός ντα τσσιντικιαρέλα μπουτ ι αμαρτωλόν για πάντα. Ανταλά ψέματα ο μόνος σο κερένα ισί τι γκεραβέν ή τι μελιαρέν ο πάκι ναβ ι Ιεχωβάσκο ντα τι κερέν ι τζενέν μα τι μανγκέν ιτς τι τζαν πασέ λέστε. Αλλά κάνα αμέν βακεράσα ο λατσσέ αμπέρια, να μουκχάσα ι Μπενγκές τι πετυχίνελ πο σκοπός. Καζόμ σικλιαράσα ι τζενέν ι αλήθεια αμαρέ Νταντέσκε, δοξάνασα ο άγιος ναβ αμαρέ Ντεβλέσκο. Καβά ισί ο αποτέλεσμας;

¹⁵ Ο αλήθειες σο ισί κο Λάφι κι Ντεβλέσκο τθερένα μπουτ μπαρί ζορ. Καζόμ σικλιαράσα ι τζενέν ι Ιεχωβάσκε ντα καβά ισί ο πραγματικός χαρακτήρας λέσκο, τθεράσα ι ευκαιρία τι ντικχάς κάτι μπουτ σουκάρ. Νικιόνα κι φόρα ο ψέματα ι Μπενγκέσκε, ντα οντουλά τζενέ αρχίνενα τι ντικχέν αμαρέ αγαπημέ Νταντές σαρ ντικχάσα-λες αμέν. Σαστίνενα σο αγαβένα ι μπουτ μπαρί ζορ ι Ντεβλέσκι. (Ησ. 40:26) Σικλιόνα τι ντεν λέσκε μπέσα χάρη κι τέλεια δικαιοσύνη σο τθερέλα. (Δευτ. 32:4) Η μπαρί σοφία λέσκι πουτρέλα λένγκε γιακχά. (Ησ. 55:9· Ρωμ. 11:33) Ντα λοκχιόλα λένγκο γκι σο σικλιόνα ότι βοβ ισί αγάπη. (1 Ιωάν. 4:8) Καζόμ τζάνα πο πασέ κο Ιεχωβά, η ελπίδα λένγκι τι τζουβντιόν για πάντα σαρ τσσαβέ λέσκε αβέλα σίγουρη. Σο μπαρό προνόμιος τθεράσα τι βοηθίνας ι τζενέν τι τζαν πασέ πουμαρέ Νταντέστε! Κάνα κεράσα-λες ανταβά, ο Ιεχωβά ντικχέλα-αμέν «συνεργάτες» λέσκε.​—1 Κορ. 3:5, 9.

16. Σαρ επηρεάντιβενα μερικά τζενέ κάνα σικλιόνα ο ναβ ι Ντεβλέσκο; Βακερέν παραδείγματα.

 ¹⁶ Κι αρχή, μπορεί τι σικλιαράσα απλώς ι τζενέν ότι ο ναβ ι Ντεβλέσκο ισί Ιεχωβά. Ανταβά μπορεί τι αλλάνελ ι ζωή εκχέ τζενέσκι σο τθερέλα λατσσό γκι. Για παράδειγμας, εκ τσσάι, η Αλία, b μπαριλί εκχέ φαμιλιάτε σο να ισινέ Χριστιανοί. Αλλά να νιωθίνελας πφερντί πι θρησκειάτε, ούτε νιωθίνελας πασέ κο Ντεβέλ. Ανταβά αλλαξάλο κάνα αρχισάλι μελέτη ι Μαρτυρέντζαρ. Αρχισάλι τι ντικχέλ ι Ντεβλές σαρ Αμάλ. Ντα σαστισάλι κάνα σικλιλί ότι ο τζενέ νικαντέ ο ναβ ι Ντεβλέσκο από μπουτ Γραφές ντα λέσκε θεσιάτε τσσουντέ απλούς τίτλους, σαρ ισί Κύριος. Κάνα σικλιλί ότι ο ναβ ι Ντεβλέσκο ισί Ιεχωβά, αλλαξάλι σαρί λάκι ζωή. Βόι βακερντάς μπαρέ χαράσαρ: «Μο πο λατσσό Αμάλ τθερέλα ναβ!» Καβά ισινέ ο αποτέλεσμας; Η Αλία βακερέλα: «Νιωθίναβα μπαρί ηρεμία μι γκίστε ακανά. Ισί μπαρό προνόμιος μάνγκε τι τζανάβ ι Ιεχωβάσκο ναβ». Ο Στιβ ισινέ εκ μουσικός σο μπαριλόας σε εκ αυστηρή θρησκεία Ιουδαιόνγκι. Τσσιντιντάς-πες ντουρ κατά οργανωμέ θρησκεία επειδή ντικχλάας ότι χουχαβένας ι τζενέν. Όμως, κάνα μουλί λέσκι ντάι, συμφωνιντάς τι ντικχέλ σαρ αβέλα-πες εκ μελέτη κατά Γραφή. Συγκινισάλο μπουτ κάνα σικλιλό ο ναβ ι Ντεβλέσκο. Βοβ βακερέλα: «Να τζανάβας ότι ο Ντεβέλ τθερέλα ναβ». Ντα συνεχίνελα: «Πρώτη φαρ αγαντόμ ότι ο Ντεβέλ ισί αληθινός! Τθερέλα συναισθήματα ντα ιδιότητες. Τζανάβας ότι αρακχλόμας εκχέ Αμαλές».

17. Σόσκε ισινέν αποφασισμέ τι συνεχίνεν τι ντεν δόξα κο ναβ κι Ιεχωβάσκο; (Ντικχέν ι φωτογραφία-ντα)

¹⁷ Κάνα βακερένα ντα σικλιαρένα ο λατσσέ αμπέρια, βακερένα ο ιερός ναβ, Ιεχωβά, κο τζενέ; Βοηθίνενα-λεν τι αγαβέν καβά ισί ο πραγματικός χαρακτήρας αμαρέ Ντεβλέσκο; Κάνα κερένα-λες ανταβά, δοξάνενα ο ναβ ι Ντεβλέσκο. Μα τσσιναβέν τι δοξάνεν ο άγιος ναβ ι Ιεχωβάσκο ντα τι βοηθίνεν ι τζενέν τι γνωρίνεν Οντουλές σο τθερέλα ανταβά ναβ. Αντικάς κα σώνεν ζωές. Κα ακολουθίνεν τουμαρέ Βασιλιάς, ι Ιησού Χριστός, σο οδηγίνελα-τουμέν. Ντα ο πο σημαντικός σαριλένταρ, κα κερέν ο γκι τουμαρέ λατσσέ Νταντέσκο, ι Ιεχωβάσκο. Τι “ντεν δόξα λέσκε ναβέστε για πάντα”!​—Ψαλμ. 145:2.