1, 2. So daștil te ajutil amen te hachiaras so sas ando ilo le Iehovasco pala so lesco anav sas-lo meliardo?

 GÂNDISAR TUT că varecon caste încăres but phenel vareso zurales nasul anda tute. Jianes că si iech hohaimos, tha chichiva jene pachian-les. Cadal dumes jian vi mai dur hai vi aver manușa astaren te pachian codo hohaimos. Sar avelas te simțosares tut? Chio ilo avelas ciaces duchado anda codoia că cames ca le manușa te dichen tut lașe iachența. (Prov. 22:1)

² Cado exemplo ajutil amen te hachiaras so sas ando ilo le Iehovasco cana lesco anav sas-lo meliardo. Iech anda lesche șiave cerisco phendea iech hohaimos anda leste caring i dintuni jiuvli, i Eva. Voi pachiaia cado hohaimos hai cadea, le dintune manușa, anda save țârdas amen, ci mai așunde le Iehovastar. Cadaia cărdea ca sea le manușa te aven păcătoși hai, ji la urmă, te meren. (Gen. 3:1-6; Rom. 5:12) Sea le pharimata cai dichas-len aghies – o merimos, le marimata hai i duch – sile numai anda codoia că o Satan astardea te phenel dumes hohamne andi bar le Edenoschi. Duchaven le Iehovas le hohaimata cai phendea-len o Satan? Jianas ciaces că da. Cu sea cadala, o ilo le Iehovasco ci pherdea-pe holiatar hai nici na mechlea-pe perado. Mai but, vo așel vi mai dur ‘o Del fericime’. (1 Tim. 1:11)

3. So bari pachiv si amen?

³ Sar manușa le Iehovasche, si amen i bari pachiv te ujiaras lesco anav cana cheras so phendea o psalmisto: „Așaren o anav le Iehovasco!”. (Ps. 113:1) Cheras cadaia cana das duma șucar anda Codo cai phiravel cado sfânto anav. Camas vi amen te cheras cadai buchi? Mai dur, va avela te dichas trin buchia cai  zuriaren amen te așaras o anav le Devlesco anda sea o ilo.

BUCURISARAS O ILO LE IEHOVASCO CANA AȘARAS LESCO ANAV

4. Sostar ciaiol le Iehovas te anas lesche așarimata? Den iech exemplo. (Dich vi i imaginea.)

⁴ Le Iehovas ciaiol-les cana anas lesche așarimata. (Ps. 119:108) Camel te phenel cadaia că o Del o mai zuralo si cadea sar le manușa imperfecto, cai ajucăren așarimata caște aven zuriarde? Nici. Te gândisaras amen ca iech șeiorri cai nașel andi angali pesche dadeschi hai phenel lesche: „San o mai lașio dadorro anda sea i lumea!”. Cana așunel cadal dumes, o ilo lache dadesco bariol bucuriatar. Sostar? Anda codoia că si iech dad covlo hai rodel așarimata pesca șeiatar caște jianel că silo lașio? Nici. Mai but, daisaras te pachias că vo silo iech dad zuralo hai voime te dichel că leschi șei sicavel lesche iubirea hai pachiv. Vo jianel că cadal buchia va ajutina-la te avel fericime hai te bariol șucar. Sa cadea, o Iehova, o mai lașio Dad, bucuril-pe cana anas lesche așarimata.

5. Sar daisaras te sicavas că so phendea o Satan anda fiesavo mașcar amende si iech hohaimos?

⁵ Cana așaras amare dades cerisco, sicavas că so phendea o Satan anda fiesavo mașcar amende si iech hohaimos. Pala sar phenel vo, niciech manuș ci va așela zuralo ando pachiamos cana nachel prin pharimata. Vo mai phenel vi că savore avelas te risaras o dumo le Iehovasche caște rodas amaro miștimos. (Iov 1:9-11; 2:4) Tha o Iov, iech manuș loialo le Iehovasche, sicadea că so phendea o Satan si iech hohaimos. So daștil te phenel-pe anda amende? Savoren si amen i bari pachiv te ujiaras o anav amare dadesco andal ceruri hai te bucurisaras lesco ilo cana slujisaras lesche loialo. (Prov. 27:11)

6. Sar daisaras te las amen pala o exemplo le regesco David hai pala le leviți? (Neemia 9:5)

⁶ Anda codoia că iubin le Iehovas, sea lesche manușa loialo camen te așaren lesco anav anda sea o ilo. O David phendea: „Camav te așarav le Iehovas, sea so si ande mande te așarel lesco sfânto anav!”. (Ps. 103:1) O David jianglea că cana așaras o anav le Iehovasco si sa codoi buchi sar cana așaras le Iehovas. Cana așunas o anav le Iehovasco, gândisaras amen ca sar silo vo ciaces, anel ande amari goghi lesche șucar calități hai le bare buchia cai cărdea-len. O David dichlea sfânto cado anav hai camlea te așarel-les anda sea o ilo. Sa cadea, vi le leviți sas-le iech lașio exemplo anda sar așarde o anav le Iehovasco. Von phende pherde umilința că lenghe  așarimata ci daștinas te sicaven cu sea so baro si o sfânto anav le Devlesco. (Citisar Neemia 9:5.) Si ciaces, lenghe așarimata andine anda sea o ilo hai pherde umilința bucurisarde le Iehovas!

7. Sar daisaras te anas așarimata le Iehovasche andi predicarea hai ande fiesavo ghies?

⁷ Aghies, sam cuci andel iacha le Iehovasche cana das duma anda leste anda sea o ilo, pherde recunoștința hai iubirea. Cana sam andi predicarea, ci trebul te bâstras că amen camas te ajutisaras le manușen te pașion le Iehovastar hai te dichen-les sar iech Dad iubitorii, cadea sar amen. (Iac. 4:8) Si iech bari pachiv te anas așarimata le Iehovasche cana sicavas le manușenghe andi Biblia sar silo vo. Voi sicavel lesche șucar calități, sar si i iubirea, o ortomos, o goghiaverimos hai o zuralimos. Sa cadea, așaras le Iehovas cana das sea amari zor te las amen pala leste. (Ef. 5:1) Cana cheras cadaia, chichiva jene daștinas te pușen-pe sostar sam diferime le manușendar anda cadai lumea nasul. (Mat. 5:14-16) Ando timpo so dichen sar phiravas amen lența ande fiesavo ghies, daisaras te phenas lenghe sostar cheras cadaia. Cadea că, le manușa cai silen o ilo lașio va camena te prinjianen le Devles. Cana anas așarimata le Iehovasche prin cadal buchia, lesco ilo bucuril-pe zurales but. (1 Tim. 2:3, 4)

BUCURISARAS O ILO LE ISUSOSCO CANA AȘARAS O ANAV LE IEHOVASCO

8. Sostar daisaras te phenas că o Isus așardea o mai but le Iehovas?

⁸ Chonic anda o cerii hai pa i phuv ci prinjianel mai mișto le Dades cadea sar lesco Șiavo. (Mat. 11:27) O Isus iubil zurales but pesche Dades hai chonic ci așardea o anav le Devlesco mai but sar vo. (Ioan 14:31) I riat anglal te merel, ande iech manglimos, o Isus phendea i mai importanto buchi cai cărdea-la pi phuv prin le dumes: „Cărdem lenghe prinjiando chio anav”. (Ioan 17:26) So camlea o Isus te phenel?

9. Sar folosisardea o Isus iech ilustrarea caște sicavel sea mai mișto sar silo lesco dad?

⁹ O Isus cărdea mai but sar te phenel le manușenghe că o anav le Devlesco si Iehova. Le iudei anda lesco timpo prinjianenas deja cado anav. I Biblia phenel că o Isus sas codo cai sicadea sar silo o Del. (Ioan 1:17, 18) Sar exemplo, andel Scripturi ebraico sicavel-pe că o Iehova silo pherdo mila hai lașimos. (Ex. 34:5-7) Le manușa hachiarde mai mișto sar oricana cado ciacimos cana o Isus phendea lenghe i ilustrarea anda o șiavo hasardo hai lesco dad. Cana beșas hai gândisaras amen sar codo dad dichlea pesche șiaves „cana sas-lo încă dur”, nașlea angla leste, lea-les andi angali hai iertisardea-les anda sea o ilo, cherel-pe ande amari goghi iech imaginea vi mai claro anda i bari mila hai o baro lașimos le Iehovasco. (Luca 15:11-32) O Isus ajutisardea le manușen te hachiaren sar silo o Iehova ciaces.

10. a) Cathar jianas că o Isus phendea o anav le Devlesco? (Marcu 5:19) (Dich vi i imaginea.) b) So camel o Isus te cheras aghies?

¹⁰ Camlea o Isus ca vi aver manușa te phenen o anav le Devlesco? Sar te na! Chichiva rașaia anda lesco timpo, cai pachianas anda pende că sile prea orta, phenenas că o anav le Devlesco silo prea sfânto caște avel phendo. Tha o Isus ci mechlea niciechdata ca cadal dumes te încăren-les parpale te așarel o anav pesche dadesco. Te dichas so întâmplosardea-pe cana vo sastiardea ieche manușes cai sas-les benga, anda o than cai beșenas le gheraseni. Le manușa daraile hai mangle le Isusos te tiliarel de cothar. (Mar. 5:16, 17) Cu sea cadala, o Isus camlea ca o anav le Iehovasco te avel prinjiando vi code. Cadea că, vo phendea caring o murș saves  sastiardea-les te phenel le manușenghe na so cărdea vo, tha so cărdea o Iehova anda leste. (Citisar Marcu 5:19.) a Vo camel sa codoi buchi vi aghies, te cheras prinjiando o anav lesche Dadesco pe sea i phuv. (Mat. 24:14; 28:19, 20) Cana cheras cadea, bucurisaras o ilo amare Regesco, o Isus.

11. Anda soste zuriardea amen o Isus te mangas amen hai, cadea sar sicavel-pe ando Ezechiel 36:23, sostar si importanto te cheras cadai buchi?

¹¹ O Isus jianglea că o scopo le Iehovasco sas codo te sfințosarel-pe lesco anav hai te ujiarel-pe catar orisavo hohaimos cai sas-lo phendo anda leste. Ita sostar sicadea amen te mangas amen cadea: „Amaro Dad, cai san andel ceruri, te avel sfințome chio anav”. (Mat. 6:9) O Isus hachiardea că i mai importanto buchi anda sea le jene andal ceruri hai pa i phuv si ca o anav le Iehovasco te avel sfințome. (Citisar Ezechiel 36:23.) Chonic ci sfințosardea o anav le Iehovasco mai but sar o Isus. Cu sea cadala, anda so păcato doșarde-les lesche dușmani cana sas-lo phandado? Von phende că vo ci sicadea pachiv caring o anav le Iehovasco hai că phendea buchia nasul anda leste. Anda o Isus, te prasal sau te phenel dumes hohamne anda o anav le Devlesco sas iech anda le mai jiungale păcatea. O gândo că avelas te doșaren-les pe neciacimaste ande cadai buchi peravelas-les but. Daștil-pe că anda codoia o ilo le Isusosco sas cadea de duchado andel ceasurea angla te avel phandado. (Luca 22:41-44)

12. Sar sfințosardea o Isus o anav pesco Dadesco?

¹² Caște sfințosarel o anav pesche Dadesco, o Isus sas-lo gata te nachel prin orisavo pharimos, prasaimos hai hohaimos. Vo jianglea că așundea ande sea le buchia pesche Dadestar hai ci cărdea chanci jiungalo caște avel lesche lajiav. (Evr. 12:2) Tha vo jianglea vi că, ande codol cale ceasurea, les sas-les athaimata directo le Satanostar. (Luca 22:2-4; 23:33, 34) Chiar cana dea sea peschi zor caște cherel le Isusos te na mai așel loialo, o Satan ci daisardea te cherel chanci. O Isus sicadea că o Satan si o mai baro hohamno hai că le Iehovas siles manușa loialo cai așen zurale chiar andel mai bare pharimata.

13. Sar daștis te bucuris le Isusos, amaro Rege?

¹³ Cames te bucuris le Isusos, amaro Rege?  Dacă da, așar le Iehovas vi mai dur, ajutisar averen te prinjianen le Devles cadea sar silo vo ciaces, hai cadea va avela te uștares pe le urme le Isusosche. (1 Pet. 2:21) Cadea sar vo, va avela te bucuris le Iehovas hai te sicaves că o Satan, Lesco dușmano, si o mai baro hohamno.

CANA AȘARAS O ANAV LE IEHOVASCO, SALVISARAS MANUȘEN

14, 15. So șucar buchia daisaras te dichas cana sicavas le manușen anda o Iehova?

¹⁴ Cana așaras o anav le Iehovasco, ajutisaras te aven salvime le manușa. Sar? Pala sar jianas, o Satan ‘coriardea i goghi codolenghi bi pachiamasco’. (2 Cor. 4:4) Cadea că, von arăsle te pachian lesche hohaimata, sar avelas că ci si Del, că vo silo dur amendar, că ci duchal-les amendar hai că phiravel-pe nasul codolența jiungale hai chinuil-len veșnico. O Satan phenel sea cadal hohaimata caște meliarel o anav le Devlesco hai, cadea, le manușa te na mai camen te pașion lestar. Tha, cana jias andi predicarea, așiavas le Satanos te cherel cadaia. Amen sicavas le manușen o ciacimos anda amaro Dad hai așaras o sfânto anav le Devlesco. Savo si o miștimos cai anel-les cadai buchi?

¹⁵ Le ciacimatan anda o lil le Devlesco silen iech baro zuralimos. Cana sicavas le manușen anda o Iehova hai anda sar silo vo, va avela te dichas vareso zurales șucar. Anda codoia că ci mai mechen-pe athade catar le hohaimata le Satanosche, le manușenghe iacha pâtren-pe hai astaren te dichen le Devles cadea sar silo vo ciaces. Von simțosaren iech bari pachiv cana hachiaren so baro si lesco zuralimos. (Is. 40:26) Von sichion te pachian-pe ande leste cana dichen so orta silo vo. (Deut. 32:4) Cana prinjianen lesco baro goghiaverimos, vi von arăsăn te aven mai goghiaver. (Is. 55:9; Rom. 11:33) Hai lengo ilo silo zuriardo cana hachiaren că o Iehova silo iubirea. (1 Ioan 4:8) Ando timpo so von pașion le Iehovastar sea mai but, lenghi speranța te train anda sea o timpo hai te arăsăn lesche șiave si sea mai ciaci. So bari pachiv si te ajutisaras le manușen te pașion penghe Dadestar! Cana cheras cadea, o Iehova dichel sar cana ‘cheras buchi ande iech than lesa’. (1 Cor. 3:5, 9)

16. So phende chichiva manușa cana așunde că le Devles siles iech anav? Den chichiva exemplea.

 ¹⁶ Mai anglal, daisaras te phenas le manușenghe că le Devles siles iech anav hai cado si Iehova. Cadaia daștil te paruvel i viața codolenghi cai silen iech ilo lașio. Sar exemplo, i Aisha b si iech tărni cai barilea ande iech religia cai ci pachianas-pe andi Biblia. La ci ciaiolas-la lachi religia hai cothe ci simțolas-pe pașă le Devlestar. Tha, pala so astardea te sichiol anda i Biblia le Martorența le Iehovasche, astardea te dichel le Devles sar iech ciacio Amal. Ci avelas lache te pachial cana așundea că o anav le Devlesco sas-lo parudo ande but Biblii hai ande lesco than sas șiute aver dumes, sar avelas „Rai”. Cana așundea savo si o anav le Devlesco, cadaia parudea sea lachi viața. Voi phenel: „Mânre mai lașe amales siles iech anav. Si iech bari pachiv anda mande te jianav o anav le Devlesco. Aghies, simțosarav iech bari pacea ando ilo”. O Steve, iech ghilabaitorii, sas-lo bariardo andel phare norme la religiaco iudaico. Tha, anda codoia că dichlea but hohaimos, vo ci mai camlea te cherel partea anda niciech religia. Cu sea cadala, pala so varecon drago lesche mulea, vo camlea te sichiol andai Biblia ieche Martoresa le Iehovasco. Cana așundea că le Devles siles iech anav, cadaia pusadea lesco ilo. Vo phenel: „Chonic ci phendea manghe că le Devles siles iech anav. . . . Sas i dintuni data cana hachiardem că si ciaces iech Del. Dem mânri sama că arachlem iech Amal”.

17. Sostar san hotărâme te așares o anav le Iehovasco vi mai dur? (Dich vi i imaginea.)

¹⁷ Cana jias andi predicarea hai sicaves le manușen, des duma lența anda o sfânto anav le Iehovasco? Ajutis-len te dichen le Devles cadea sar silo vo ciaces? Dacă da, sicaves pachiv caring o anav le Devlesco. Așares vi mai dur o sfânto anav le Iehovasco cana ajutis le manușen te prinjianen Codoles cai phiravel cado anav. Cadea, va avela te hastraves lenghi viața, va avela te așunes che Regestar, o Isus Cristos, hai, mai opral sar oriso, va avela te bucuris o ilo le Iehovasco, chio Dad andal ceruri. Si ciaces, vi tu cames sa codoi buchi sar o psalmisto cana phendea: „Va avela te așarav chio anav anda sea o timpo, da, veșnico!”. (Ps. 145:2)