1-2. Ninji cinafuna kutiphedza toera kubvesesa mabvero a Yahova thangwi ya uthambi udamwaza Sathani?

 NYEREZERANI tenepa: Munthu wakuti imwe musanfuna kakamwe asalonga pinthu pyakuipa thangwi ya imwe. Imwe musadziwa kuti pinalonga iye ndi uthambi, mbwenye anthu anango asam’phedzera. Kusiyapo pyenepi, iwo asatoma kumwaza uthambi unoyu, pontho anthu azinji asaaphedzerambo. Kodi imwe mbamudapibva tani? Khala anthu anewa na makhaliro anu adidi ndi akufunika kakamwe kuna imwe, mwakukhonda penula mbamudatsukwala kakamwe.—Mis. 22:1.

² Citsandzo ceneci cisatiphedza toera kubvesesa kuti Yahova apibva tani pidalongwa iye mwakuipa. M’bodzi wa anace auzimu alonga uthambi thangwi ya iye kuna nkazi wakutoma, Eva, pontho iye akhulupira uthambi unoyu. Thangwi ya uthambi unoyu, anyakubalathu akutoma asiya kubvera Yahova, pontho pyenepi pyabweresa madawo na kufa kuna anthu onsene. (Gen. 3:1-6; Aroma 5:12) Nyatwa zonsene zinaona ife lero pa dziko ninga kufa, nkhondo na nyatwa zinango ndi thangwi ya uthambi udalonga Sathani m’munda wa Edheni. Mphapo Yahova asapibva tani angaona nyatwa zenezi thangwi ya uthambi udalonga Sathani? Mwakukhonda penula, pyenepi pisatsukwalisa kakamwe Yahova, mbwenye iye nee asapitiriza kukhala wakuipirwa, thangwi ndi “Mulungu wakutsandzaya.”—1 Tim. 1:11.

3. Ndi mwai upi uli na ife?

³ Ife tiri na mwai wakupangiza kuti Sathani alonga uthambi thangwi ya dzina ya Yahova tingabvera ntemo uyu wakukhonda nentsa: “Simbani dzina ya Yahova.” (Mas. 113:1) Ife tinakwanisa kucita pyenepi tingalonga mwadidi Yahova. Kodi imwe muli dzololo toera kucita pyenepi? Tendeni tione mathangwi matatu anafuna kutiphedza toera kusimba dzina ya Yahova na ntimathu onsene.

 YAHOVA ASAKOMERWA TINGASIMBA DZINA YACE

4. Thangwi yanji Yahova asatsandzaya tingansimba? Perekani citsandzo. (Onanimbo foto.)

⁴ Babathu wakudzulu asatsandzaya kakamwe tingasimba dzina yace. (Mas. 119:108) Kodi pyenepi pisabveka kuti Mulungu wathu wamphambvu zonsene akhala ninga anthu akusowa ungwiro akuti asafuna kakamwe kusimbwa na kulongwa mwadidi? Nkhabe. Nyerezerani citsandzo ici: Mwana wantsikana asakhumbatira pai wace mwaufuni mbampanga: “Ndimwe pai wadidi kakamwe pa dziko yonsene!” Pai wace asatsandzaya kakamwe na mafala anewa. Thangwi yanji? Kodi ndi thangwi yakuti iye asafuna kakamwe kusimbwa na mwanace? Nkhabe. Iye asadziwa kuti ndi pai wadidi, mbwenye asatsandzaya kakamwe angaona mwanace mbapereka takhuta na kupangiza ufuni kuna iye. Iye asadziwa kuti makhaliro anewa ndi akufunika kakamwe toera mwanace akhale wakutsandzaya angakula. Na thangwi ineyi, Yahova, Babathu wakudzulu asatsandzaya tingansimba.

5. Tingasimba dzina ya Yahova tinapangizanji?

⁵ Tingasimba Yahova tisaphedzerambo toera kupangiza kuti pidalonga Sathani thangwi ya ife ndi uthambi. Thangwi yanji? Thangwi iye alonga kuti anthu nee mbadakwanisa kukhala akukhulupirika kuna Yahova na kutsidzikiza dzina yace. Sathani alonga kuti nee m’bodzi mbadakwanisa kupitiriza kukhala wakukhulupirika kuna Mulungu angayeserwa. Kusiyapo pyenepi, Sathani alonga kuti tonsene mbatidasiya Yahova tingapaswa cinthu cadidi kakamwe. (Yobe 1:9-11; 2:4) Mbwenye Yobe apangiza kuti Sathani akhalonga uthambi. Mphapo ife tinakwanisambo tani kucita pyenepi? M’bodzi na m’bodzi wa ife ali na mwai wakupangiza kuti asaphedzera dzina ya Yahova mukuntumikira mwakukhulupirika. (Mis. 27:11) Unoyu ndi mwai ukulu kakamwe.

6. Tinatowezera tani Mambo Dhavidhi na Alevi? (Neemiya 9:5)

⁶ Kufuna Mulungu kusacitisa anthu akukhulupirika kufunambo kusimba dzina yace. Mambo Dhavidhi alemba: “Umaso wanga mbusimbe Yahova; makhundu onsenee a manungo anga mbasimbe dzina yace yakucena.” (Mas. 103:1) Dhavidhi akhadziwa kuti angasimba dzina ya Yahova ali kusimba Yahova. Nakuti dzina ya Yahova isaphataniza makhaliro ace, pyenepi pisatikumbusa makhaliro ace adidi na pinthu pyadidi kakamwe pinacita iye. Dhavidhi akhafuna kusimba dzina ya Pai wace thangwi Yahova ndi wakucena. Iye akhafuna kucita pyenepi na ‘makhundu onsene a manungo ace,’ pyenepi pisabveka, na ntimace onsene. Munjira ibodzi ene, Alevi akhatsogolera basa yakusimba Yahova. Iwo adzindikira mwakucepeseka kuti  mafala awo nee mbadakwana toera kusimba dzina yakucena ya Yahova. (Lerini Neemiya 9:5.) Mwakukhonda penula, kucepeseka kwawo kwatsandzayisa kakamwe Yahova.

7. Tinasimba tani Yahova m’basa yakumwaza mphangwa na tingakhala na anthu akuti nee asantumikira?

⁷ Ife tinakwanisambo kusimba Yahova tingalonga mwadidi thangwi ya iye, kupereka takhuta kuna iye na kunfuna. Tingakhala m’basa yakumwaza mphangwa tisafunika kukumbuka kuti cifuniro cathu cakutoma ndi kuphedza anthu toera akhale na uxamwali na Yahova na kumuona ninga Baba waufuni. (Tiya. 4:8) Kuna ife ndi mwai ukulu kakamwe kupangiza anthu m’Bhibhlya kuti Yahova ndi Mulungu waufuni, waulungami, waudziwisi, wamphambvu, pontho kuti iye ali na makhaliro anango adidi kakamwe. Njira inango yakusimba Yahova na kuntsandzayisa ndi kuwangisira toera kutowezera citsandzo cace. (Aef. 5:1) Tingacita pyenepi, anthu anango anakwanisa kuona kuti ndife akusiyana na anthu azinji. (Mat. 5:14-16) Tingakhala pabodzi na anthu anewa, panango tinakhala na mwai wa kuafokotozera kuti thangwi yanji ndife akusiyana na iwo. Natenepa anthu a mitima yadidi anakhala na cifuno cakupfundza thangwi ya Mulungu wathu. Tingasimba Yahova munjira zenezi, iye asatsandzaya kakamwe.—1 Tim. 2:3, 4.

IFE TISATSANDZAYISA YEZU TINGASIMBA DZINA YA YAHOVA

8. Yezu acitanji toera kusimba dzina ya Yahova?

⁸ Yezu asadziwa mwadidi Yahova kupiringana aanju onsene na anthu. (Mat. 11:27) Yezu asafuna Pai wace, pontho asacita pinthu toera kusimba dzina ya Yahova. (Juw. 14:31) M’phembero idacita iye kuna Pai wace namasiku mbadzati kufa, Yezu alonga thangwi ya utumiki wace pa dziko yapantsi kuti: “Ine ndaadziwisa dzina yanu.” (Juw. 17:26) Kodi Yezu akhafuna kulonganji na mafala anewa?

9. Ndi nsangani upi udaphatisira Yezu toera kutiphedza kubvesesa mwadidi makhaliro a Yahova?

⁹ Yezu acita pinthu pizinji kupiringana basi ene kulonga kuna anthu kuti dzina ya Mulungu ndi Yahova. Ayuda akhacedza na Yezu akhadziwa kale dzina ya Mulungu, ngakhale tenepo ‘Yezu aafokotozera.’ (Juw 1:17, 18) Mwacitsandzo, Malemba Acihebheri asalonga kuti Yahova ndi wantsisi na wakukoma ntima. (Eks. 34:5-7) Yezu abvekesa mwadidi pyenepi na nsangani wa mwana wakutsumbikika. Tingaleri m’Bhibhlya thangwi ya Pai adaona mwanace na kutali mbathamanga toera kaonana naye mbankhumbatira na kumulekerera na ntima onsene, tisakwanisa kubvesesa mwadidi kuti Yahova ndi wantsisi na wakukoma ntima. (Luka 15:11-32) Mwandimomwene Yezu atipangiza mwadidi makhaliro a Pai wace.

10. (a) Tisadziwa tani kuti Yezu akhaphatisira dzina ya Pai wace, pontho akhafuna kuti anthu anango acitembo pibodzi pyene? (Marko 5:19) (Onanimbo foto.) (b) Yezu asafuna kuti ticitenji lero?

¹⁰ Kodi Yezu akhafunambo kuti anango aphatisire dzina ya Pai wace? Inde. Atsogoleri anango a mauphemberi akakhulupira kuti kukhali kusowa cilemedzo kulonga dzina ya Mulungu, mbwenye Yezu nee atawirisa kuti nsambo unoyu wakuti nee ukhabverana na Malemba uncitise kusiya kupasa mbiri dzina ya Pai wace. Ulendo unango Yezu awangisa mamuna wakuti akhali na madimonyo, pontho akakhala mu cisa ca Jerazeno. Anthu agopa kakamwe Yezu mbadembetera toera abuluke mu cisa cawo. (Marko 5:16, 17) Ngakhale tenepo, Yezu akhafuna kuti anthu a mu cisa ceneci adziwe dzina ya Mulungu. Na thangwi ineyi, Yezu apanga mamuna adawangisa iye toera apange anthu kuti iye awangiswa na Yahova. (Lerini Marko 5:19.) a  Mpaka lero Yezu asafuna kuti dzina ya Pai wace idziwike pa dziko yonsene ya pantsi! (Mat. 24:14; 28:19, 20) Tingacita khundu yathu toera kudziwisa dzina ya Yahova tisatsandzayisa kakamwe Mambo wathu, Yezu Kristu.

11. Yezu apfundzisa atowereri ace toera aphembenji, pontho thangwi yanji pyenepi ndi pyakufunika kakamwe? (Ezekiyeli 36:23)

¹¹ Yezu akhadziwa kuti cifuniro ca Yahova ndi kucenesa dzina Yace na kupangiza kuti pidalonga Sathani thangwi ya iye ndi pyauthambi. Na thangwi ineyi, iye apfundzisa atowereri ace toera kuphembera tenepa: “Babathu muli kudzulu, dzina yanu mbiceneswe.” (Mat. 6:9) Yezu akhadziwa kuti kuceneswa kwa dzina ya Yahova ndi kwakufunika kakamwe kuna pinthu pyonsene pidacita Yahova. (Lerini Ezekiyeli 36:23.) Nkhabe munthu unango adacita pinthu pizinji kakamwe toera kucenesa dzina ya Yahova kupiringana Yezu. Kodi pidamangwa Yezu, ndi madawo api adampambizira anyamalwa ace? Iwo alonga kuti iye atikana Mulungu! Mwandimomwene Yezu akhadziwa kuti kuphatisira mwakuipa peno kulonga mwakuipa dzina yakucena ya Pai wace ndi madawo makulu kakamwe. Kupambizirwa na kuphiwa thangwi ya madawo anewa kwantsukwalisa kakamwe. Panango ndi thangwi ineyi idacitisa Yezu ‘kutsukwala kakamwe’ mbadzati kumangwa.—Luka 22:41-44.

12. Yezu acenesa tani dzina ya Pai wace?

¹² Toera kucenesa dzina ya Pai wace, Yezu athabuswa, atikanwa na kupambizirwa pinthu pyakuipa. Iye akhadziwa kuti abvera Pai wace mu pinthu pyonsene, pontho nee akhali na mathangwi toera kukhala na manyadzo. (Aheb. 12:2) Yezu akhadziwambo kuti ndi Sathani akhamuyesera m’midzidzi ineyi yakunentsa. (Luka 22:2-4; 23:33, 34) Sathani akhafuna kucita pyonsene toera Yezu asiye kukhala wakukhulupirika, mbwenye iye nee akwanisa. Yezu apangiza kuti Sathani ndi nyauthambi, pontho kuti Yahova ali na atumiki akukhulupirika akuti asapitiriza kukhala akukhulupirika kuna iye maseze athimbane na nyatwa zakunentsa kakamwe!

13. Munatsandzayisa tani Mambo wanu Yezu?

¹³ Kodi imwe musafuna kutsandzayisa Mambo wanu Yezu? Pitirizani kusimba dzina ya Yahova mukuphedza anango toera adziwe makhaliro adidi kakamwe a Mulungu wathu. Mungacita pyenepi muli kutowezera manyalo a Yezu. (1 Ped. 2:21) Ninga Yezu, imwe muli kutsandzayisa Yahova, pontho muli kupangiza kuti nyamalwa Wace, Sathani ndi nyauthambi kakamwe!

 TINGASIMBA DZINA YA YAHOVA TISAPHEDZA ANTHU TOERA APULUMUKE

14-15. Ndi pinthu pipi pyadidi pinafuna kucitika kuna anthu tingaapfundzisa thangwi ya Yahova?

¹⁴ Tingasimba dzina ya Yahova tisaphedza anthu toera apulumuke. Tisacita tani pyenepi? Sathani “afunga manyerezero a anyakukhonda kukhulupira.” (2 Akor. 4:4) Iwo asakhulupira uthambi wa Sathani ninga wakuti Mulungu nee alipo, Mulungu ali kutali na ife, pontho iye nee asatsalakana anthu. Kusiyapo pyenepi, iwo asakhulupirambo uthambi wakuti Mulungu ndi wakuipa ntima, pontho asathabusa anyakudawa kwenda na kwenda. Sathani asalonga uthambi unoyu thangwi asafuna kupswipisa dzina ya Yahova na kucitisa anthu toera akhonde kukhala na uxamwali na iye. Mbwenye tingamwaza mphangwa tisapangiza kuna anthu kuti Sathani ndi nyauthambi. Ife tisapfundzisa anthu undimomwene thangwi ya Babathu na kusimba dzina yakucena ya Mulungu wathu. Pyenepi pisaphedza tani anthu?

¹⁵ Undimomwene wa Mafala a Mulungu uli na mphambvu kakamwe. Tingapfundzisa anthu thangwi ya Yahova na makhaliro ace, ife tisaona udidi unaacitikira. Anthu anewa asafunguka maso mbatoma kuona makhaliro adidi a Babathu. Iwo asadzumatirwa na mphambvu zikulu za Yahova. (Iza. 40:26) Iwo asatoma kun’nyindira thangwi ya ulungami wace. (Dheu. 32:4) Iwo asapfundza pizinji na udziwisi wace ukulu. (Iza. 55:9; Aroma 11:33) Iwo asabalangazwa kakamwe angapfundza kuti Yahova ndi ufuni. (1 Juw. 4:8) Mu ndzidzi unakhala iwo na uxamwali wakuwanga kakamwe na Yahova, cidikhiro cawo cakukhala kwenda na kwenda cisakhalambo candimomwene. Ndi mwai ukulu kakamwe kuphedza anthu toera akhale na uxamwali wakuwanga na Babathu. Tingacita pyenepi, Yahova asationa kuti “tisaphata basa pabodzi na iye.”—1 Akor. 3:5, 9.

16. Anthu asapibva tani angadziwa dzina ya Mulungu? Perekani pitsandzo.

¹⁶ Panango cinthu cakutoma cinapfundzisa ife anthu ndi cakuti dzina ya Mulungu ndi Yahova. Pyenepi pinakwanisa kukhuya kakamwe munthu wakuti asafuna kupfundza undimomwene. Mwacitsandzo, ntsikana anacemerwa Aaliyah b akuzwa pa banja yakuti nee ndi  Yacikristu. Iye nee akhakomerwa na uphemberi wace, pontho nee akhapibva kuti ali na uxamwali na Mulungu. Mbwenye pidatoma iye kupfundza Bhibhlya na Mboni za Yahova, iye atoma kuona Mulungu ninga xamwali wace, pontho adzumatirwa pidapfundza iye kuti dzina ya Mulungu yabuluswa m’Mabhibhlya mazinji mbipitirwa mbuto na pidzo ninga Mbuya. Kudziwa dzina ya Yahova kwacinja umaso wace. Iye alonga: “Xamwali wanga wakufunika kakamwe ali na dzina!” Pyenepi pyamphedza tani? Iye alonga: “Cincino ndiri wakutsandzaya kakamwe, pontho ndisapibva kuti ndine wakulemedzwa.” Mamuna anacemerwa Steve akhali nyakuimba wakuti akuzwa mu uphemberi Waciyuda. Iye nee akhafunabve kucita khundu ya uphemberi thangwi akhadaona umpfakafaka uzinji. Mbwenye pidalowa mai wace, iye atoma kupfundza Bhibhlya na Mboni za Yahova. Pidadziwa iye dzina ya Mulungu, atsandzaya kakamwe. Iye alonga: “Ine nee ndikhadziwa kuti Mulungu ali na dzina. Pyenepi pyandiphedza toera kubvesesa kuti Mulungu ndi wandimomwene, pontho cincino ndisamuona ninga munthu. Ndzidzi unoyu ndadzindikira kuti ndagumana Xamwali wandimomwene.”

17. Thangwi yanji musafuna kupitiriza kusimba dzina ya Yahova? (Onanimbo foto.)

¹⁷ Mungamwaza mphangwa, musapfundzisa anthu dzina yakucena ya Yahova? Musaaphedza toera aone makhaliro adidi a Mulungu wathu? Mungacita pyenepi muli kusimba dzina ya Mulungu. Pitirizani kusimba dzina ya Yahova mukuphedza anthu toera an’dziwe mwadidi. Mungacita pyenepi, imwe munaaphedza toera apulumuke, kusiyapo pyenepi, munatowezera manyalo a Mambo wathu, Yezu Kristu na kutsandzayisa kakamwe Babathu waufuni, Yahova. Natenepa pitirizani ‘kusimba dzina ya Yahova kwenda na kwenda.’—Mas. 145:2.