1-2. Nzu yeɛ ɔmaa yenwu kyɛ, mmerɛ bɔ bɛsɛkyele Yehowa dumaa ne, ɔyɛle ye yea paa ɔ?

 FA YE kyɛ ekuro ebie dwirɛ paa, nakoso ɔkekã wɔnwo dwirɛ kyire mmenia. Ɔwɔ nu kyɛ bɔ ɔkã ne tte nahorɛ de, nakoso ebiemɔ ale ali. Bɔ ɔyɛ yea po yeɛ ole kyɛ, sɔ mmenia nemɔ koso, bafa edwirɛ ne baténe maa mmenia pẽe koso ale ali. Sɛ ɔba sɔ a, ɔkɔyɛ wɔ yea anaa? Ɔnate kyɛ sona ne sɛkye wɔ dumaa nati, aporowaa biala nne yenwo kyɛ, ɔkɔyɛ wɔ yea paa.—Any. 22:1.

² Sɔ dwirɛ he maa yenwu kyɛ, mmerɛ bɔ bɛsɛkyele Yehowa dumaa ne, ɔyɛle ye yea paa. Abɔfo nemɔ anu kõ hãne edwirɛ bɔ ɔtte nahorɛ fale Yehowa nwo hyirele Hawa, bɔ yeɛ ole brasua bɔ olimoa ne, na ye koso ole lili. Ɛhẽne maa Adam ne Hawa yɛle Yehowa so asoserɛ, na ɔɔfale bɔne ne ewue wale sona so. (Gye. 3:​1-6; Rom. 5:12) Ɔhaw bɔ ɔwɔ ewiase tekyɛ ewue, kõɛ, ɔne amaneɛ bɔ yenwu ye mukoraati ne, ofi ngondombo bɔ Satan pɛle wɔ Eden turo nanu dɔ ne. Aso ngondombo bɔ bɛpɛ bɛtole Yehowa so, ɔne bɔ wafi nu wawa ne, ɔnha ye anaa? Aporowaa biala nne yenwo kyɛ ɔha ye paa. Nakoso ɛhẽne amma Yehowa wora ammɔ ammo so, ofikyɛ Bible ne kã kyɛ, ɔte anigye anaa “saleɛ Nyameɛ.”—1 Tim. 1:11.

3. Yenwo atẽe beni yeɛ yenu biala anya ye ɔ?

³ Yenu biala anya yenwo atẽe bɔ ɔkɔfa kohyire kyɛ, edwirɛ bɔ Satan hã tole Yehowa so ne, ɔtte nahorɛ. Ɛhẽne yeɛ ole kyɛ, ‘yɛkɔye Yehowa dumaa ne ayɛ.’ (Edw. 113:1) Atẽe kõ bɔ yɛfa so yɛyɛ sɔ yeɛ ole kyɛ, nningyein bɔ Yehowa ayɛ ne, yɛkɔhã yenwo dwirɛ yekohyire mmenia. Yede, nzu yeɛ ɔkɔboka wɔ maa ɛkɔyɛ sɔ ɔ? Nningyein nzã bie bɔ ɔkɔboka yɛ maa yekofi y’ahõne mukoraati nu yɛkɔye Nyameɛ dumaa ne ayɛ ne, yɛbaasusu yenwo.

 SƐ YƐYE YEHOWAA DUMAA NE AYƐ A, ƆMAA YENYE GYE PAA

4. Sɛ yɛye Yehowa ayɛ a, nzuati yeɛ ɔmaa yenye gye ɔ? Ma yenwo mvandoho. (Nea foto ne koso.)

⁴ Sɛ yɛye Yehowa dumaa ne ayɛ a, ɔmaa yenye gye paa. (Edw. 119:108) Nakoso sɛ yanyɛ sɔ a, yenye ngɔgye anaa? Daabi, ofikyɛ Yehowa de ɔtte kyɛ sona bɔ sana ebie kamvo ye kora na yenye agye ne. Wɔde ma yɛnea sɔ mvandoho he. Abayaa bie tuli amirika ɔɔtɔle ye baba nu, na ɔhãhyirele ye kyɛ, “Daa, mekuro wɔ dwirɛ paa, ofikyɛ nné baba biala bɔ ɔte kyɛ wɔ ɔ.” Sɔ dwirɛ ne maa baba ne nye gyele paa. Nakoso, sɛ akwalaa ne angã sɔ dwirɛ ne a, baba ne nye ngɔgye anaa? Daabi, na mmom ɔkɔmaa baba ne konwu kyɛ sãa nningyein bɔ ɔyɛ ma ɔwa ne, yenye sɔ paa. Afei koso, ɔkɔyɛ bĩaa ne fɛ kyɛ akwalaa ne ayɛ sɔ ɔ, ofikyɛ okonwu ye kyɛ sɔ subaen ne kɔboka akwalaa ne kyẽabie. Sɔ ala yeɛ yɛ koso, sɛ yɛye Yehowa bɔ ɔte yɛ Baba ne ayɛ a, ɔmaa yenye gye ɔ.

5. Sɛ yɛye Nyameɛ dumaa ne ayɛ a, sɛɛ yeɛ okohyire kyɛ Satan te ngondomboniɛ ɔ?

⁵ Sɛ yɛye yɛ Baba bɔ ɔwɔ anwuro ne ayɛ a, yɛmaa ɔda ali kyɛ edwirɛ bɔ Satan ahã ato yɛ so ne, ɔtte nahorɛ. Satan nwa, yenu biala nne berɛ bɔ ɔkɔhora kɔhyɛ Nyameɛ dumaa ne animnyam ɔ, na sɛ nzɔhwɛ to yɛ a, yengoli nahorɛ yɛngɔma ye kõ. Afei, ɔnwa nningyein bɔ Nyameɛ yɛ ma yɛ nati yeɛ yɛsõ ye ɔ, na sɛ sɔ nningyein nemɔ fi yɛsa a, yɛngɔsõ ye kõ. (Yob 1:​9-11; 2:4) Nakoso mmerɛ bɔ Yob hɔle nzɔhwɛ nu ne, ɔhɔleso lili nahorɛ mane Nyameɛ. Bɔ ɔyɛle ne kyire kyɛ Satan te ngondomboniɛ. Wɔ koso, ɛkɔyɛ sɛɛ né asuesũa bɔ Yob yɛle ne? Yenu biala kɔhora kofi ye ahõne nu koli nahorɛ kɔma Yehowa kyɛbɔ ɔkɔyɛ a, yenye kɔgye ɔ. (Any. 27:11) Ɛhe te yenwo atẽe pirikua paa bɔ yanya ye ɔ.

6. Kyɛbɔ Ɔhene Dawide ne Lewifoɛ nemɔ yele Yehowa ayɛ ne, nzu yeɛ yesũa yekofi nu ɔ? (Nehemia 9:5)

⁶ Bɛbɔ bɛdɔ Nyameɛ ne, bɛnye gye yenwo paa kyɛ bekofi b’ahõne mukoraati nu bɛkɔye ye dumaa ne ayɛ. Ɔhene Dawide hãne kyɛ: “Ma nye Yehowa ayɛ, yeɛ bɔ ɔwɔ me nu amukoraa, ɛmɔye ye dumaa krongron ne ayɛ.” (Edw. 103:​1, NWT) Né Dawide se kyɛ sɛ ɔye Yehowa dumaa ne ayɛ a, né ɔye Yehowa bɔbɔ deinn ayɛ. Sɛ yɛte Yehowa dumaa ne a, ɔmaa yenwu sonahorɛ deinn bɔ ɔte ɔ. Ɛhẽne yeɛ ole ye subaen ahoroɛ bɔ ɔyɛ nyemene, ɔne nningyein pá pẽe bɔ wayɛ ne. Né Dawide pena kyɛ ɔmaa ebiala nwu ye kyɛ Yehowa dumaa ne te krongron, yeti okofi ye ahõne mukoraati nu kɔye ye ayɛ. Ɛhẽne ati yeɛ Dawide hãne kyɛ ɔpena kyɛ ɔfa ‘bɔ ɔwɔ yenu amukoraa’ ye Yehowa dumaa ne ayɛ ne. Sɔ ala yeɛ Lewifoɛ nemɔ koso yɛle ɔ. Né bɛbrɛ bɛnwo ase paa, yeti né bɛse kyɛ, Yehowa dumaa krongron ne, bɛngɔhora ngɔye ye  ayɛ ngoyie llé. (Kenga Nehemia 9:5.) Nakoso mmerɛ bɔ Yehowa nwuni kyɛ bɛyɛ bɔ bɛkɔhora biala kyɛ bɛkɔyɛ sɔ ne, ɔmaa yenye gyele paa.

7. Yɛkɔyɛ sɛɛ né yahora yafa yɛ subaen, ɔne asɛnga adwuma naso yaye Yehowa ayɛ?

⁷ Ɛnnɛ koso, ɔdɔ bɔ yele yɛma Yehowa, ɔne kyɛbɔ yɛnye sɔ nningyein bɔ wayɛ wama yɛ ne, sɛ yɛkã yenwo dwirɛ yekyire mmenia a, okyire kyɛ yɛye ye ayɛ. Yeti sɛ yɛkã nzɛmba ne a, odikyɛ yɛfa yesie yɛnye so kyɛ, yɛkɔboka mmenia maa bekonya ɔdɔ bɛkɔma Yehowa, na wamaa bahora bapingye ye, kyɛbɔ yɛ koso yayɛ ne. (Yak. 4:8) Bible ne kã Yehowa nwo dwirɛ kyɛ ɔte ɔdɔ, obua ndɛen turoloo, ɔse nworɛ, na ole tumi paa. Yeti odikyɛ yɛmaa yɛnye gye yenwo kyɛ, yɛkɔhã sɔ subaen hemɔ, ɔne bɔ ɔbokaso nanwo dwirɛ yekohyire mmenia. Afei koso, sɛ yɛyere yɛnwo yesuesũa Yehowa a, okyire kyɛ yɛye ye ayɛ. (Ɛfe. 5:1) Sɛ yɛyɛ sɔ a, ɔkɔmaa mmenia konwu kyɛ yɛ subaen te kama, na sɛ bɛfa yɛ bɛtoto mmenia bɔ bɛnzõ Yehowa nanwo a, bekonwu kyɛ yɛte sorongo koraa. (Mat. 5:​14-16) Ɛhẽne kɔmaa yekonya yenwo atẽe yɛkɔhã bɔ yeti yeɛ yele sɔ subaen pá nanwo dwirɛ yekohyire bɛ, na ɔkɔmaa bɛnye kɔgye yenwo kyɛ bekosũa Nyameɛ nwo nikye. Sɛ yɛyɛ sɔ a, ɔkɔmaa Yehowa nye kɔgye paa.—1 Tim. 2:​3, 4.

SƐ YƐYE YEHOWA DUMAA NE AYƐ A, ƆMAA YESU NYE GYE PAA

8. Sɛɛ yeɛ Yesu aboka mmenia maa baye Yehowa dumaa ne ayɛ ɔ?

⁸ Sɛ yɛnea abɔfo bɔ bɛwɔ anwuro, ɔne mmenia bɔ bɛwɔ aseɛ he aso a, ebiala nne berɛ bɔ ɔse Yehowa paa tra Ɔwa Yesu ɔ. (Mat. 11:27) Yesu kuro ye Baba dwirɛ paa. Ɛhẽne ati, daa ɔyere yenwo kyɛ ɔkɔboka mmenia maa bɛkɔye Yehowa dumaa ne ayɛ. (Yoh. 14:31) Kɔngɔen bɔ aleɛ kyẽ maa Yesu wu ne, ɔbɔle ye Baba mbaeɛ kyɛ: “Mala wɔ dumaa ali mahyire bɛ.” (Yoh. 17:26) Yede atẽe beni yeɛ Yesu fale so yɛle sɔ ɔ?

9. Mvandoho bɔ ɔfa baa sɛkyefoɛ nanwo ne, sɛɛ yeɛ Yesu fa bokale mmenia maa benwuni sonahorɛ deinn bɔ Yehowa te ɔ?

⁹ Nna Nyameɛ dumaa bɔ yeɛ ole Yehowa ne mbaen yeɛ Yesu maa mmenia nwuni ye ɔ. Bɔ yeti yeɛ ɔte sɔ yeɛ ole kyɛ, né Yudafoɛ nemɔ se Nyameɛ dumaa ne dada. Nakoso bɔ dumaa ne kyire ne, ɔmaa bɛtele yebo yé. Bible ne kã Yesu nwo dwirɛ kyɛ ‘ye yeɛ wala Nyameɛ ali wahyire ɔ.’ (Yoh. 1:​17, 18) Hebri tworɔnzɛm ne kã Yehowa nwo dwirɛ kyɛ, ɔte Nyameɛ bɔ ɔse anwumvoin, na ɔdo mmenia ɔ. (Ɛks. 34:​5-7) Mvandoho bɔ ɔfa baa sɛkyefoɛ ne, ɔne ye baba nanwo ne, Yesu fa hyirehyirele sɔ dwirɛ nanu. Ɔmaa yenwu kyɛ, mmerɛ bɔ bĩaa ne nwuni kyɛ ɔwa ne “wɔ dedeede nen,” otuli amirika ooyiale ye, na ɔtɔle yenu. Afei bɔne bɔ ɔwa ne ayɛ ne, ofili ye ahõne nu fa hyɛle ye. Yesu mvandoho ne bokale Yudafoɛ nemɔ maa benwuni kyɛ, Yehowa nwu anwumvoin, na ɔdo mmenia. (Luka 15:​11-32) Yeti, yɛkɔhora yɛkɔhã ye paa kyɛ, Yesu bokale mmenia maa benwuni sonahorɛ deinn bɔ Yehowa te ɔ.

10. (a) Nzu yeɛ ɔmaa yenwu kyɛ né Yesu se ye baba dumaa, na né ɔpena kyɛ mmenia fa frɛ ye? (Marko 5:19) (Nea foto ne koso.) (b) Ɛnnɛ koso, nzu yeɛ Yesu pena kyɛ yɛyɛ ɔ?

¹⁰ Né Yesu nye gye yenwo kyɛ mmenia kɔfa ye Baba dumaa ne kɔfrɛ ye anaa? Yóo. Né nyamesom mbanyi nemɔ kyirekyire kyɛ, sɛ ɛbɔ Nyameɛ dumaa Yehowa ne frɛ ye a, okyire kyɛ emmu ye. Nakoso Yesu nwuni kyɛ, sɔ ngyerɛkyerɛ ne, oggyi Bible naso. Yeti wamma ɛhẽne anzi ye atẽe kyɛ ɔkɔmaa mmenia kɔbɔ Nyameɛ dumaa ne. Mmerɛ bie, Yesu sale bĩaa bie bɔ né sunzummɔne wɔ ye so ne anwonyerɛ wɔ Gadarafoɛ aseɛ so. Ɔwale sɔ ne, esuronyi hãne mmenia bɔ bɛwɔ berɛ ne paa. Yeti bɛhã behyirele Yesu kyɛ ofi bɛ mandanu berɛ hɔ, na ye koso ɔhɔle. (Mak. 5:​16, 17) Nakoso, né Yesu pena kyɛ ɔmaa mmenia bɔ bɛwɔ kuro naso ne, benwu Yehowa dumaa ne. Ye sɔ nati, ɔhãhyirele  bĩaa ne kyɛ, nnɛmaa ɔkã bɔ wayɛ wama ye nanwo dwirɛ kyire ebiala. Na mmom bɔ Yehowa ayɛ ama ye ne, yeɛ ɔha yenwo dwirɛ ɔ. (Kenga Marko 5:19.) a Ɛnnɛ koso, Yesu pena kyɛ yɛmaa mmenia nwu ye Baba dumaa ne wɔ ewiase mukoraati. (Mat. 24:14; 28:​19, 20) Sɛ Yesu bɔ ɔte yɛ Hene ne nwu kyɛ yɛyere yɛnwo yɛyɛ sɔ a, ɔmaa yenye gye paa.

11. Nzu yeɛ Yesu hãhyirele bɛbɔ beli yesĩ ne kyɛ bɛbɔ yenwo mbaeɛ ɔ, na nzuati yeɛ yenwo hia paa kyɛ bɛkɔyɛ sɔ ɔ? (Hesekiel 36:23)

¹¹ Né Yesu se kyɛ Yehowa pena kyɛ ɔte ye dumaa nanwo. Ɛhẽne ati yeɛ Yesu hãhyirele bɛbɔ beli yesĩ ne kyɛ bɛbɔ mbaeɛ kyɛ: “Yɛ Baba bɔ ɛwɔ nyameɛso ɔ, wɔ dumaa nwo te” ne. (Mat. 6:9) Né Yesu se kyɛ Yehowa dumaa bɔ yenwo kɔte ne, ɔte nikyee bɔ yenwo hia paa. (Kenga Hesekiel 36:23.) Abɔfo bɔ bɛwɔ anwuro, ɔne mmenia bɔ bɛwɔ aseɛ he so ne, benu biala nne berɛ bɔ wate Yehowa dumaa nanwo watra Yesu ɔ. Nakoso mmerɛ bɔ Yesu pɔfoɛ nemɔ hyele ye ne, bɛbɔle ye somoɛ kyɛ wagua ye Baba dumaa nanwo fĩɛ watra ebiala. Né Yesu se paa kyɛ, ɔte bɔne pirikua paa kyɛ ebie kogua ye Baba dumaa krongron nanwo fĩɛ ɔ. Ɛhẽne ati, né ɔyɛ Yesu yea paa kyɛ bɛkɔbɔ ye somoɛ, na babua ye fɔ kyɛ wagua ye Baba dumaa nanwo fĩɛ ɔ. Ɔkɔyɛ kyɛ ɛhẽne yeɛ ɔmaa Yesu ‘wora bɔle’ paa mmerɛ bɔ né waha kãa maa bɛkye ye ne.—Luka 22:​41-44.

12. Nzu yeɛ Yesu yɛ fa tele ye Baba dumaa nanwo ɔ?

¹² Ɔnate kyɛ né Yesu pena kyɛ ɔte ye Baba dumaa nanwo nati, mmerɛ bɔ né bɛbo ye, bɛbɔ ye alapaa, na begua ye nyunu ase ne, omiane yenye gyinane nu. Ne ɔse kyɛ, bɔ ɔfa nu namukoraati ne, sɛ omia yenye gyina nu a, ɔkɔmaa ye Baba dumaa nanwo kɔte. (Heb. 12:2) Afei koso né Yesu se kyɛ, amaneɛ bɔ ɔfa nu sɔ mmerɛ ne, Satan yeɛ ɔfa ba ye so ɔ. (Luka 22:​2-4; 23:​33, 34) Né Satan se kyɛ bɔ ɔyɛ nati, Yesu ngoli nahorɛ ngɔma Yehowa. Nakoso wanyɛ yé, na ɛhẽne maa ye nyunu guale ase paa. Yesu nate bɔ ɔyɛle naso maa ebiala nwuni kyɛ Satan te ngondomboniɛ, bɔ yetianu yɛ se paa ɔ. Afei ɔmaa yenwu kyɛ, Yehowa le mmenia bɔ bɛdɔ ye, na sɛ bɛfa nzɔhwɛ bɔ enu yɛ se nu po a, bɛkɔhɔ so bekoli nahorɛ bɛkɔma ye.

13. Nzu yeɛ sɛ ɛyɛ a, ɔkɔmaa Yesu bɔ ɔte wɔ Hene ne nye kɔgye ɔ?

¹³ Wɔ koso nzu yeɛ sɛ ɛyɛ a, ɔkɔmaa Yesu bɔ ɔte wɔ Hene ne, yenye kɔgye paa ɔ? Yeɛ ole  kyɛ, ɛkɔhɔso kɔye Yehowa dumaa ne ayɛ, na aboka mmenia maa bɛ koso banwu ye subaen bɔ ɔyɛ nyemene ne. Sɛ ɛyɛ sɔ a, né esuesũa Yesu. (1 Pet. 2:21) Ɛhẽne kɔmaa ebiala konwu kyɛ Satan bɔ ɔte Yehowa pɔfoɛ ne, ɔte ngondomboniɛ!

SƐ YƐYE YEHOWA DUMAA NE AYƐ A, ƆBOKA MMENIA MAA BENYA NGÕA

14-15. Sɛ yɛmaa mmenia banwu nahorɛ dwirɛ bɔ ɔfa Yehowa nwo ne a, sɛɛ yeɛ ɔboka bɛ ɔ?

¹⁴ Sɛ yɛye Yehowa dumaa ne ayɛ a, ɔboka mmenia maa benya ngõa. Nzuati yeɛ yɛkã sɔ ɔ? Satan “ama bɛ bɔ benne Nyameɛ benni ne, b’adwene ali naakye.” (2 Kor. 4:4) Ɔnate ɛhẽne ati, ngondombo dwirɛ bɔ Satan nate ebiemɔ so kekã fa Yehowa nwo ne, sɔ mmenia nemɔ ale ali. Ebie yeɛ ole kyɛ bɛnwa Nyameɛ nne berɛ, Nyameɛ ne yɛ afĩa atẽe wale, na ɔhaw bɔ yɛfa nu wɔ ewiase he anu ne, ɔmva nu. Afei, bɛnwa Nyameɛ tianu yɛ se, na ɔyɛ mmenia bɔ bedi bɔne ne ayayadeɛ daa wɔ sẽe nu. Bɔ ɔmaa Satan yɛ sɔ yeɛ ole kyɛ, ɔpena kyɛ ɔfa sɔ atẽe naso sɛkye Yehowa dumaa, kyɛbɔ ɔkɔyɛ a, mmenia nye ngɔgye yenwo kyɛ bekopingye ye ɔ. Nakoso, yɛnate asɛnga adwuma bɔ yɛyɛ naso, yɛmaa Satan bo da so. Yede, nzu biekũ yeɛ wafi bɔ yɛyɛ nanu wawa ɔ?

¹⁵ Tumi wɔ Nyameɛ dwirɛ nanu paa. Yeti sɛ yɛfa Bible ne yɛboka mmenia maa bɛbanwu nahorɛ dwirɛ bɔ ɔfa Yehowa nwo ne a, ɔboka bɛ wɔ atẽe pẽe so. Ebie yeɛ ole kyɛ, ɔmaa bede bɛnwo befi Satan sa nu, na bɛbanwu kyɛ ɔte ngondomboniɛ. Afei, bɛbafa Yehowa adamvoa, kyɛbɔ yɛ koso yayɛ ne. Ɛhẽne sĩ ne, sɛ bɛbasũa tumi bɔ Yehowa le ye nanwo nikyee a, ɔmaa bɛnwo dwiri bɛ paa. (Yes. 40:26) Ebiekũ koso, bɛbanwu kyɛ Yehowa te ebie bɔ ɔdwene sona nwo, ofikyɛ obua ndɛen turoloo. (Deut. 32:4) Sɛ bɛbasũa nningyein bɔ Yehowa abɔ nanwo nikye, na benwu nworɛ bɔ Yehowa le ye ne a, ɔmaa bɛnye gye paa. (Yes. 55:9; Rom. 11:33) Afei koso, sɛ bɛbanwu kyɛ Yehowa te ɔdɔ a, ɔmaa bɛ ahõne tɔ bɛ kunu paa. (1 Yoh. 4:8) Mmerɛ bɔ begu so besũa Yehowa nwo nikyee, na bɛpingye ye ne, ɔmaa bɛbanya anyelasoɛ kyɛ bɛkɔhora bɛkɔtena ase daa. Ɛhe mukoraati maa yenwu ye kyɛ, ɔte yenwo atẽe pirikua paa bɔ yanya ye kyɛ, yɛboka mmenia maa bepingye bɛ baba bɔ yeɛ ole Yehowa ne. Yeti sɛ yɛyere yɛnwo yɛyɛ asɛnga adwuma ne a, yɛbayɛ  “Nyameɛ adwumayɔlɛfoɛ bɔ yɛ ne ye bɔ nu yɛyɔ adwuma ɔ.”—1 Kor. 3:​5, 9.

16. Sɛ ebiemɔ banwu Nyameɛ dumaa ne a, sɛɛ yeɛ ɔboka bɛ ɔ? Kã benu bie nwo dwirɛ.

¹⁶ Sɛ yɛne mmenia hyɛ yebo kyɛ yesũa Bible ne a, nikyee kõ bɔ yedimoa yɛboka bɛ maa benwu yeɛ ole Nyameɛ dumaa ne. Sɔ nikyee bɔ yɛyɛ ne, nhyiraa pẽe yeɛ ofi nu ba ɔ. Taluwa bie bɔ bɛfrɛ ye Aaliyah b dwirɛ ne maa yenwu ye kyɛ, ɛhe te nahorɛ paa. Sõen bɔ bɛtetele ye wɔ nu ne, né bɛtte Kristofoɛ, na né onwu ye kyɛ mvasoɛ biala nne nyamesom so. Nakoso, mmerɛ bɔ ɔhyɛle yebo kyɛ ɔne Yehowa Adanzefoɛ sũa nikyee ne, nningyein hyɛle yebo sesãne. Afei de, oonwuni kyɛ ɔkɔhora kɔfa Nyameɛ adamvoa. Mmerɛ bɔ onwuni kyɛ baye Nyameɛ dumaa ne bafi Bible biemɔ nu, na bafa nzammranoa tekyɛ Awurade basi ye gya nu ne, ɔyɛle ye nwanwa paa. Nziɛen bɔ onwuni Yehowa dumaa ne, yenye gyele paa. Ɔhãne kyɛ: “Eii, sãa me damvo ne le dumaa!” Ɔtoale so hãne kyɛ: “Yehowa dumaa ne bɔ maanwu ye ne, wamaa m’ahõne atɔ me kunu paa.” Ɛmɔma yɛnea abrandeɛ bie koso bɔ bɛfrɛ ye Steve. Né ɔto dwein, na bɛtetele ye wɔ Yudafoɛ sõen nu. Nakoso ɔnate nningyein tɛ́ɛ bɔ né ɔkɔso wɔ asɔre ahoroɛ nemɔ anu nati, né yenye ngye benu biala nwo. Nakoso mmerɛ bɔ ye maame wuli ne, ole tole nu kyɛ ɔne Yehowa Danzeniɛ bie kosũa Bible ne. Mmerɛ bɔ onwuni Nyameɛ dumaa wɔ Bible nanu ne, yenye gyele paa. Steve hãne kyɛ: “Né menze ye llé kyɛ sãa Nyameɛ le dumaa. Yeti mmerɛ bɔ olimoa bɔ nwuni ye dumaa ne, ɔmaa nwuni kyɛ Nyameɛ te ebie bɔ ɔwɔ berɛ bɔ ngɔhora ngopingye ye, na me ne ye afa adamvoa ɔ. Ɛhe maa mahõne tɔle me kunu paa.”

17. Nzuati yeɛ ɛpena kyɛ ɛye Yehowa dumaa ne ayɛ daa ɔ? (Nea foto ne koso.)

¹⁷ Sɛ ɛyɛ asɛnga adwuma ne, anaa ɛne mmenia sũa Bible ne a, ɛyɛ a ɛboka bɛ maa benwu Yehowa dumaa bɔ ɔte krongron ne anaa? Na Nyameɛ subaen ahoroɛ bɔ ɔyɛ nyemene ne, ɛboka bɛ maa benwu ye anaa? Sɛ ɛyɛ sɔ a, okyire kyɛ ɛye Nyameɛ dumaa ne ayɛ. Yeti, kɔso ye Yehowa dumaa ne ayɛ, na boka mmenia ma benwu sonahorɛ deinn bɔ ɔte ɔ. Sɛ ɛyɛ sɔ a, ɛkɔboka mmeni pẽe maa bekonya ngõa. Afei, okyire kyɛ Yesu Kristo bɔ ɔte wɔ Hene ne, esuesũa ye. Bɔ ɔtra yemu ne, sɛ ɛyɛ sɔ a, ɔkɔmaa wɔ Baba bɔ okuro wɔ dwirɛ ne nye kɔgye paa. Yede, yere wɔnwo kyɛ ɛkɔye ‘Yehowa dumaa ayɛ afebɔɔ.’—Edw. 145:2.