1-2. Nyen la apeut ti aidé e ti hinga tënë ti bê ti Jéhovah na ndö ti iri ti lo so a buba ni?

 IMAGINÉ so mbeni zo so mo ye lo atene mbeni sioni tënë na iri ti mo. Mo hinga so tënë ni ayeke mvene, me ambeni zo ayeda na ni. Ye so ayeke même sioni mingi ayeke so ala komanse ti tene peko ti tënë ni na ambeni zo, na gbâ ti azo ayeda nga na ni. A yeke sara mo tongana nyen? Tongana mo ye azo nga mo ye ti tene a buba iri ti mo ape, so a tene mvene na iri ti mo ayeke son mo.—aProv. 22:1.

² Ye so apeut ti aidé e ti hinga tënë ti bê ti Jéhovah na ngoi so a buba iri ti lo. Mbeni ange ti lo atene mvene na iri ti lo na kozo wali, Ève. Lo yeda na mvene ni. Mvene so ague na kozo babâ na mama ti e ti sara kpengba-li na Jéhovah. A sara si azo kue asara siokpari nga na nda ni ala yeke kui (Gen. 3:​1-6; aRom. 5:12). Akpale kue so ayeke na yâ ti dunia, na tapande, kuâ, bira nga na pasi, ayeke dä ndali ti so Satan akomanse ti tene mvene na yaka ti Éden. Eskê bê ti Jéhovah ason ndali ti so a buba iri ti lo nga ndali ti asioni ye so aga na pekoni? En. Ye oko, bê ti Jéhovah ayeke son gï songo ape. Me, lo ngbâ “Nzapa so ayeke na ngia”.—1 Tim. 1:11.

3. Pasa wa la e yeke na ni?

³ E yeke na pasa ti mû maboko ti fa so Satan atene mvene na iri ti Jéhovah. E yeke sara ni tongana e sara ye alingbi na commandement so: “Ala sepela iri ti Jéhovah.” (Ps. 113:1). E yeke gonda iri ti Jéhovah tongana e fa na azo tâ tënë na ndö ti lo. Eskê mo yeke gonda ande iri ti Jéhovah? Zia e bâ akpengba ye ota so ayeke pusu e ti gonda iri ti Nzapa ti e na bê ti e kue.

 TONGANA E SEPELA IRI TI JÉHOVAH, A YEKE NZERE NA LO

4. Ngbanga ti nyen la tongana e sepela Jéhovah ayeke nzere na lo? Mû mbeni tapande ti fa ni. (Bâ nga foto.)

⁴ Tongana e sepela iri ti Babâ ti e ti yayu ayeke nzere na lo (Ps. 119:108). Me eskê a ye ti tene so Nzapa so ngangu ti lo ahon angangu kue ayeke tongana azo so ayeke mbilimbili-kue ape so aye ti tene a gonda ala ti kpengba ala? Ên-ën. Bâ tapande so. Mbeni kete molenge ti wali so aye babâ ti lo mingi agbu lo na atene na lo, atene: “Mo yeke nzoni babâ ahon atanga ni kue.” Ye so lo sara so anzere na babâ ni mingi. Ngbanga ti nyen? A yeke pëpe ngbanga ti so babâ ni abezoin ti tene molenge ti lo akpengba lo nga agonda lo. Me a yeke ngbanga ti so lo ye molenge ti lo nga lo yeke na ngia so lo fa so lo ye lo nga lo kiri singila na lo. Lo hinga so asarango ye so ayeke aidé lo ti duti na ngia na ngoi so lo kono. Legeoko nga, Jéhovah, so ayeke Babâ so ayeke kota ahon atanga ni, ayeke na ngia tongana e sepela lo.

5. Tënë wa la e peut ti fa so ayeke mvene tongana e sepela iri ti Nzapa?

⁵ Tongana e sepela Babâ ti e ti yayu, e yeke fa so mbeni tënë nde so Satan atene na ndö ti e oko oko kue ayeke mvene. Satan atene so zo oko ayeke ngbâ ti gbu koko ti iri ti Nzapa ape. Lo tene so zo oko ti ngbâ be-ta-zo na Nzapa na yâ ti atara ayeke dä ape. Lo tene so e kue e yeke zia ti sara na Nzapa tongana e bâ so a ga na e nzoni ye (Job 1:​9-11; 2:4). Me Job so ayeke lani be-ta-zo afa so Satan ayeke zo ti mvene. Ka mo? E oko oko kue e peut ti soro ti gbu koko ti Babâ ti e nga ti zia ngia na bê ti lo na lege so e sara na lo be-ta-zo (aProv. 27:11). A yeke biani mbeni pasa ti sara tongaso.

6. Tongana nyen la e peut ti mû tapande ti Gbia David nga na ti azo ti mara ti Lévi? (Néhémie 9:5).

⁶ Azo so aye Jéhovah aye ti sepela iri ti lo na bê ti ala kue. Gbia David atene lani, atene: “Zia mbi sepela Jéhovah; zia si ye kue so ayeke na yâ ti mbi asepela iri ti lo so ayeke nzoni-kue.” (Ps. 103:1). David ahinga lani so tongana zo asepela iri ti Jéhovah, lo yeke sepela Jéhovah la. Tongana e mä iri ti Jéhovah, e yeke pensé na mara ti zo so lo yeke ni, e yeke pensé nga na anzoni sarango ye ti lo kue nga na aye so lo sara so apika bê mingi. David aye lani ti sara si iri ti Babâ ti lo aga nzoni-kue nga ti sepela ni. Lo ye lani ti sara ni na “ye kue so ayeke na yâ ti” lo, so ti tene na bê ti lo kue. Legeoko nga, azo ti mara ti Lévi amû lani li ni ti sepela Jéhovah. Ala sara terê ti ala kete ala yeda so ala lingbi pëpe ti tene atënë ti sepela so iri ti Jéhovah,  so ayeke nzoni-kue, alingbi tâ na ni. (Diko Néhémie 9:5.) Kite ayeke dä ape so, so ala sara terê ti ala kete ala sepela Jéhovah na bê ti ala kue, a zia ngia na bê ti lo.

7. Tongana nyen la e peut ti sepela Jéhovah na fango tënë nga na yâ ti gigi ti e ti lâ na lâ?

⁷ Laso, e peut ti sepela Jéhovah na lege so e sara tënë ti lo na azo na mbeni fason so afa so e kiri singila na lo nga e ye lo mingi. Na ngoi so e yeke fa tënë, ye so e yeke gi ayeke ti aidé azo ti ga nduru na Jéhovah nga ti aidé ala ti ye Babâ ti e ti ndoye tongana ti so e ye lo (Jacq. 4:8). A nzere na e ti fa na azo so Bible atene Jéhovah aye azo, lo sara ye mbilimbili, lo yeke na ndara, lo yeke na ngangu nga lo yeke na ambeni pendere sarango ye. E yeke sepela nga Jéhovah nga e yeke zia ngia na bê ti lo tongana e gi ti sara ye tongana lo (aÉph. 5:1). Tongana e sara tongaso, azo apeut ti bâ so e yeke ti e nde na azo ti sioni dunia so (Mat. 5:​14-16). Na ngoi so e yeke wara terê na ala na yâ ti aye so e yeke sara lâ na lâ, e peut ti fa na ala ndani so e yeke sara aye so e sara. Ye so apeut ti gboto azo so aye ti hinga tâ tënë na mbage ti Nzapa ti e. Tongana e sepela Jéhovah na alege so, e yeke zia ngia na bê ti lo.—1 Tim. 2:​3, 4.

TONGANA E SEPELA IRI TI JÉHOVAH, E YEKE ZIA NGIA NA BÊ TI JÉSUS

8. Ngbanga ti nyen la Jésus ayeke nzoni tapande ti zo so asepela iri ti Jéhovah?

⁸ Na popo ti acréature ti yingo nga na azo, mbeni zo so ahinga Jéhovah nzoni ahon Jésus ayeke dä ape (Mat. 11:27). Jésus aye Babâ ti lo Jéhovah nga lo mû li ni ti sepela iri ti lo (Jean 14:31). Na yâ ti mbeni sambela so lo tene na Babâ ti lo na bï so na ndade ni lo kui, lo fa na nduru tënë ye so lo sara na ngoi ti fango tënë ti lo na sese, lo tene: “Mbi sara si [azo ahinga] iri ti mo.” (Jean 17:26). Lo ye lani ti tene nyen la?

9. Tapande wa la Jésus asara kua na ni ti fa ye nzoni na ndö ti Babâ ti lo?

⁹ Jésus afa lani na azo so iri ti Nzapa ayeke Jéhovah, me lo ngbâ gï ge ape. A-Juif so Jésus afa ye na ala ahinga lani iri ti Nzapa awe. Me Jésus amû li ni ti duti zo so ‘afa Nzapa na azo nzoni.’ (Jean 1:​17, 18). Na tapande, Mbeti ti Nzapa so a sû ândö na Hébreu afa so Jéhovah ayeke Nzapa so asara nzoni bê na zo nga abâ mawa ti zo (Ex. 34:​5-7). Jésus asara lani si tâ tënë so aga polele na li ti azo na ngoi so lo tene toli ti molenge so agirisa lege nga na babâ ti lo. Tongana e diko ye na ndö ti babâ so lê ti lo atï na ndö ti molenge ti lo so achangé bê ti lo na ngoi so “lo ngbâ ayo,” lo kpe loro lo gbu lo na kate ti lo, e bâ polele so Jéhovah ayeke sara nzoni bê mingi na zo nga lo bâ mawa ti zo mingi (Luc 15:​11-32). Jésus a-aidé lani azo ti hinga zo so Jéhovah ayeke ni biani.

10. (a) E hinga tongana nyen so Jésus adi lani iri ti Babâ ti lo nga lo ye ti tene azo asara tongaso? (Marc 5:19). (Bâ nga foto.) (b) Nyen la Jésus aye ti tene e sara laso?

¹⁰ Eskê Jésus aye nga lani ti tene azo adi iri ti Babâ ti lo? En. Peut-être ambeni kota zo ti nzapa apensé lani so tongana zo adi iri ti Nzapa, andâ lo ne lo ape la. Me Jésus azia lâ oko ape si pensé so, so alondo na Mbeti ti Nzapa ape, akanga lege na lo ti di iri ti Babâ ti lo. Gbu li na ndö ti ngoi so lo tomba asioni yingo na yâ ti mbeni koli na sese ti azo ti Gérasa. Mbeto asara azo ni na ala voro yanga na Jésus ti zia ndo ni ti hon, tongaso lo hon (Marc 5:​16, 17). Me Jésus aye lani ti tene azo ni kâ ahinga iri ti Jéhovah. Tongaso, Jésus atene na koli ni ti tene na azo ye so Jéhovah asara, me pëpe ye so Jésus asara.  (Diko Marc 5:19.) a Lo ye nga oko ye so laso, lo ye ti tene e sara si azo ahinga iri ti Babâ ti lo na yâ ti dunia kue (Mat. 24:14; 28:​19-20). Tongana e sara ni, e yeke zia ngia na bê ti Gbia ti e Jésus.

11. Nyen la Jésus afa na adisciple ti lo ti sambela ndali ni? Ngbanga ti nyen la a yeke kota ye? (Ézéchiel 36:23).

¹¹ Jésus ahinga so ye so bê ti Jéhovah aye ayeke ti tene iri ti Lo aga nzoni-kue, so ti tene ti zi azonga kue so a bi na ndö ti iri ti lo. Ndani la Maître ti e afa na adisciple ti lo ti sambela, atene: “Babâ ti e so mo yeke na yayu, zia a sara si iri ti mo aga nzoni-kue.” (Mat 6:9). Jésus acomprendre lani so tënë so ayeke kota tënë so abâ acréature kue. (Diko Ézéchiel 36:23.) Mbeni créature so asara si iri ti Jéhovah aga nzoni-kue ahon Jésus ayeke dä ape. Me na ngoi so awato ti Jésus agbu lani lo, tënë ti nyen la ala bi na li ti lo? Ala tene lo zonga Nzapa. Kite ayeke dä ape so Jésus abâ lani so ti zonga wala ti buba iri ti Babâ ti lo so ayeke nzoni-kue ayeke siokpari so ayeke tâ sioni mingi. Bê ti lo ason lani mingi so a tene lo la lo sara mara ti sioni ye tongaso. Peut-être a yeke kota raison so ndali ni “vundu agbu lo mingi” na yâ ti al’heure so aga kozo ti tene a gbu lo.—Luc 22:​41-44.

12. Tongana nyen la Jésus asara si iri ti Babâ ti lo aga nzoni-kue na mbeni fason so ayeke kota mingi?

¹² Ti tene Jésus asara si iri ti Babâ ti lo aga nzoni-kue, lo gbu lani ngangu na yâ ti asioni ye kue so a sara na lo, na tapande, pasi, azonga nga na atënë ti mvene so a bi na li ti lo. Lo hinga so lo mä lani yanga ti Babâ ti lo na yâ ti aye kue, mbeni ye ti tene lo sara kamene ni ayeke dä ape (aHéb. 12:2). Lo hinga nga lani so Satan la ayeke ga na lo akpale na yâ ti ngangu ngoi so (Luc 22:​2-4; 23:​33, 34). Satan apensé lani so lo yeke sara biani si Jésus aduti be-ta-zo ape, me aye ti lo ni kue atï na ngu. Jésus afa lani polele so Satan ayeke sioni zo ti mvene nga Jéhovah ayeke na awakua ti lo so ayeke be-ta-zo, so ayeke ngbâ ti duti be-ta-zo même na yâ ti angangu kpale.

13. Tongana nyen la mo peut ti zia ngia na bê ti Gbia ti mo so ayeke komande?

¹³ Eskê mo ye ti zia ngia na bê ti Gbia ti mo  so ayeke komande? Ngbâ ti sepela iri ti Jéhovah, nga aidé azo ti hinga ye na ndö ti apendere sarango ye ti Nzapa ti e. Tongana mo sara tongaso, mo yeke mû tapande ti Jésus (1 Pi. 2:21). Tongana Jésus, mo yeke zia ngia na bê ti Jéhovah nga mo yeke fa so wato ti Lo Satan ayeke zo ti mvene so ayeke na kamene oko ape.

TONGANA E SEPELA IRI TI JÉHOVAH, E YEKE SÖ FINI TI AZO

14-15. Apendere ye wa la apeut ti si tongana e fa ye na azo na ndö ti Jéhovah?

¹⁴ Tongana e sepela iri ti Jéhovah, e yeke aidé azo ti sö fini ti ala. Na lege wa? Satan “asara si bibe ti azo so amä na bê pëpe avuko”. (2 aCor. 4:4). A sara si ala mä na bê na atënë ti mvene so Satan atene, na tapande, Nzapa ayeke dä ape, Nzapa ayo na e mingi nga lo pensé na e ape, Nzapa ayeke sioni nga lo yeke sara pasi na asioni zo teti lakue lakue. Satan atene amvene so kue ndali ti so lo ye ti buba nzoni iri ti Jéhovah nga ti kanga lege na azo ti ye ti ga nduru na lo. Me tongana e yeke fa tënë, e yeke kanga lege na Satan ti sara ye so lo ye. E yeke fa na azo tâ tënë na ndö ti Babâ ti e, nga e yeke sepela iri ti Nzapa ti e so ayeke nzoni-kue. Ye ti peko ni ayeke nyen?

¹⁵ Atâ tënë so ayeke na yâ ti Bible ayeke na ngangu mingi. Tongana e fa ye na azo na ndö ti Jéhovah nga e aidé ala ti hinga lo nzoni, e yeke bâ mbeni pendere ye. Amvene ti Satan ayeke vuko lê ti azo encore ape, nga ala peut ti komanse ti bâ apendere sarango ye ti Babâ ti e. Kota ngangu ti lo ayeke pika bê ti ala mingi (És. 40:26). Ala yeke manda ti sara confiance na lo ndali ti so lo yeke sara ye lakue mbilimbili (Deut. 32:4). Ala yeke manda ye mingi na lege ti kota ndara ti lo (És. 55:9; aRom. 11:33). Bê ti ala adë nga ti hinga so lo yeke ndoye (1 Jean 4:8). Na ngoi so ala yeke ga nduru na Jéhovah, ala yeke hinga biani so ala yeke ga amolenge ti lo so ayeke ngbâ na fini lakue lakue. Pendere pasa la e yeke na ni ti aidé azo ti ga nduru na Babâ ti ala. Na ngoi so e yeke sara ni, Jéhovah ayeke bâ so ‘e na lo e yeke sara kua oko.’—1 aCor. 3:​5, 9. 

16. Na ngoi so ambeni zo ahinga iri ti Nzapa, a sara ala tongana nyen? Fa ambeni tapande ni.

 ¹⁶ Na tongo nda ni, peut-être e fa gï na azo so iri ti Nzapa ayeke Jéhovah. Ye so apeut ti changé fini ti azo so aye biani ti hinga tâ tënë. Na tapande, mbeni maseka-wali so iri ti lo Aaliyah ayeke lani na yâ ti mbeni bungbi ti vorongo nzapa so afango ye ni alondo na Bible ape. b Me aye so bungbi ti vorongo nzapa ti lo ayeke fa anzere na lo ape nga lo bâ so lo yeke nduru na Nzapa ape. Ye ni achangé na peko ti so aTémoin akomanse ti manda Bible na lo. Lo komanse it bâ Nzapa tongana kamarade ti lo. Li ti lo akpe ti hinga so a zi iri ti Nzapa na yâ ti mingi ti abible na a zia na place ni atitre tongana Seigneur. So lo hinga iri ti Jéhovah, a changé fini ti lo. Lo tene: “Kota Kamarade ti mbi ayeke na iri.” Ye ti peko ni ayeke nyen? Lo tene: “Fadeso, mbi yeke na tâ siriri ti bê. Nzapa abâ mbi na nene ni mingi.” Mbeni koli so iri ti lo Steve ayeke lani mbeni zo ti pikango mozoko so ayeke Juif so tënë ti ngobo ti ala agbu bê ti lo mingi. Lo ye lani pëpe ti duti na yâ ti mbeni bungbi ti vorongo Nzapa ndali ti so lo bâ so azo mingi ayeke sara ye ti handango lê ti zo. Me na peko ti kuâ ti mama ti lo, lo yeda ti duti dä na ngoi so mbeni Témoin ti Jéhovah ayeke manda Bible na mbeni zo. So a fa na lo iri ti Nzapa andu bê ti lo mingi. Lo tene: “Mbi hinga iri ti Nzapa lâ oko ape.” Lo kiri lo tene: “Kozoni ti tene mbi hinga so Nzapa ayeke dä la. Mbi bâ so lo yeke tâ Zo. Na ngoi ni so, mbi hinga so mbi wara mbeni Kamarade awe.”

17. Ngbanga ti nyen la mo leke na bê ti mo ti ngbâ ti sepela iri ti Jéhovah? (Bâ nga foto.)

¹⁷ Na ngoi so mo yeke fa tënë nga mo yeke fa ye na azo, eskê mo yeke fa na ala iri ti Jéhovah so ayeke nzoni-kue? Eskê mo yeke aidé ala ti hinga Nzapa ti e nzoni? Tongana mo sara ni, mo yeke sepela iri ti Nzapa. Ngbâ ti sepela iri ti Jéhovah so ayeke nzoni-kue na lege so mo aidé azo ti hinga lo nzoni. Tongana mo sara tongaso, mo yeke sö fini ti azo. Mo yeke sara ye tongana Gbia ti mo, Christ Jésus. Kota ye ni, mo yeke zia ngia na bê ti Babâ ti mo ti ndoye, Jéhovah. Ngbâ ti “sepela iri ti [lo] lakue lakue nga kpu na kpu.”—Ps. 145:2.