1-2. Suˈmasi hunni yannara Yihowara macciishshaminosire huwanteemmo gede kaaˈlannonkeri maati?

 HANNI tenne hedi: Isi daafira hedattohu mittu manchi suˈmakki hunino. Isi suˈmakki huninohu kaphunni ikkinota afootto; ikkirono kayinni mitu manni konne kapho ammanino. Roore dadillisanno coyi, insa konne kapho tareessitino daafira batinyu manni konne kapho ammanino. Hakka woyite mayi macciishshamannohe? Mannaho hedattohanna suˈmikkira qorophattoha ikkiro suˈmakki hunniro xissiisiˈrattoti dihuluullissannote.—Law. 22:1.

² Kuni lawishshi suˈmasi hunnita Yihowara mayi macciishshaminosiro huwanteemmo gede kaaˈlankera dandaanno. Yihowate ayyaanaame ooso giddonni mittu Heewanira Yihowa daafira kapho coyiˈrino. Ise konne kapho ammantino. Kuni kaphi Addaaminna Heewani Yihowara finqilanno gede assino. Tini qolte baalunku manni cubbonna reyo ragiˈranno gede assitino. (Kal. 3:1-6; Rom. 5:12) Alamete aana noo qarri baalu lawishshaho reyo, olunna shetto batidhinohu Sheexaanu Edenete kaashshu basera tareessino kaphinni kainohunniiti. Kuni kaphinna kaphu abbino coyi Yihowa xissiisiˈranno gede assino? Assinoti dihuluullissannote. Ikkirono tennera Yihowa diaaraawino woy koma diamaxxino. Hatteentenni isi ‘hagiirraamo Magano’ ikke heeˈrino.—1 Xim. 1:11, NW.

3. Maa assate qoosso noonke?

³ ‘Yihowa suˈma guwisse’ yitannote qarrissannokki hajajora hajajamme isi suˈmi qullaawa ikkanno gede kaaˈlamate qoosso noonke. (Far. 113:1) Yihowa assinoha dancha coye baala wolootaho kulle qullaawa suˈmasi guwisa dandiineemmo. Ati isi suˈma guwisatto? Hanni Maganinke suˈma woˈma giddonkenni guwinseemmo gede kakkayisannonkeha sase kaajja coye laˈno.

 YIHOWA SUˈMASI GUWINSEEMMO WOYITE HAGIIDHANNO

4. Yihowa guwinseemmosi woyite hagiidhannohu mayiraati? Lawishsha kuli. (Misileno lai.)

⁴ Suˈmasi guwinseemmo woyite iimi Anninke hagiidhanno. (Far. 119:108) Hatto yaa kayinni woˈmanka dandaanno Maganira guuntete xeˈne noonsari mannu ooso gede jawaante afiˈrate guweenyu hasiisannosi yaateni? Deeˈni. Hanni mitto lawishsha laˈno. Mitte shiinqa qaaqqo annise goowa hanqaffe, “Alamete aana ate gedee anni dino!” yitannosi woyite annise lowo geeshsha hagiidhanno. Mayira? Isi qaaqqosi jawaachishanna guwisa hooggusiro hagiidha didandaanno yine heda hasiissannonkeni? Dihasiissannonke. Isi hagiidhinohu qaaqqosi baxanno daafiraatinna ise baxxannositanna naaddannosita leellishshino daafiraati. Isi togoo akatta ise lophitanno woyite hagiirraame ikkitanno gede kaaˈlitannoseta afino. Taalle noosikki Anninke Yihowano guwinseemmosi woyite hagiidhannohu iseraati.

5. Maganu suˈma guwinseemmo woyite hiikku kaphi xawo fulanno gede assineemmo?

⁵ Iimi Annanke guwinseemmo woyite, Sheexaanu ninke mittu mittunku daafira coyiˈrino kaphi xawo fulanno gede kaaˈlineemmo. Sheexaanu Maganu suˈmira ammaname halamanno manchi nookkihu gede asse coyiˈrino. Qoleno fonqolu iillannosi woyite Maganoho ammanamannohu diheeˈranno yiino. Sheexaanu, ninke baalunku uminke qiniitira yine Maganoho ammanama agurreemmohu gede asse coyiˈrino. (Iyo. 1:9-11; 2:4) Kayinni ammanamino manchi Iyyoobi Sheexaanu kapho xawo fushshino. Atina Maganoho ammanante heeˈratto? Ninke mittu mittunkura, Maganoho ammanamme soqqamme suˈmisira halamatenna iso hagiirsiisate qoosso noonke. (Law. 27:11) Tenne assa ninkera lowo ayirrinyeeti.

6. Moote Daawitinna Leewaawootu lawishsha harunsa dandiineemmohu hiittoonniiti? (Nehimiya 9:5)

⁶ Ammanamino manni Magano baxansa, suˈmasi woˈma giddonni guwisanno gede assitannonsa. Moote Daawiti, “Lubboˈya Kaaliiqa galati; woˈma mannimmaˈya qullaawa suˈmasi galati” yee borreessino. (Far. 103:1) Daawiti Yihowa suˈma guwisa Yihowa umosi guwisa ikkitinota wodanchino. Yihowa suˈma gannanna macciishshineemmo woyite, isi hiittoohoronna assinoha dhagge ikkanno coye qaangeemmo. Daawiti Annisi suˈmi qullaawanno gede assanna guwisa hasiˈrino. Isi ‘woˈma mannimmasinni’ yaano woˈma giddosinni tenne assa hasiˈrino. Leewaawootuno albisa ikkite Yihowa suˈma guwissino. Insa coyidhanno qaali Yihowaha qullaawa suˈma woˈmunni woˈma guwisate guutinoha ikkinokkita ammante adhitino.  (Nehimiya 9:5 nabbawi.) Insa umonsa heeshshi assite woˈma giddonni Yihowa guwisansa iso hagiirsiissinoti dihuluullissannote.

7. Soqqanshonkenninna barru barru heeshshonkenni Yihowa guwisa dandiineemmohu hiittoonniiti?

⁷ Xaa yannara Yihowa lowo geeshsha galanteemmotanna banxeemmota woˈma giddonkenni wolootaho kulle iso hagiirsiisa dandiineemmo. Soqqammeemmo woyite qara mixonke, mannu Yihowawa daanno gedenna ninkente gede baxillaancho Annanke afanno gede kaaˈla ikkitinota qaaga hasiissannonke. (Yai. 4:8) Qullaawu Maxaafi Yihowa, baxillesi, taashshosi, hayyosi, wolqasinna wole baxissanno akkattasi xawisanno gara mannaho kula hagiirsiissannonke. Qoleno Yihowa lawishsha harunsate sharramme iso guwisanna hagiirsiisa dandiineemmo. (Efe. 5:1) Hatto assineemmoha ikkiro mannu tenne busha alame giddo ninke wolootuwiinni baxxinoommore ikkinoommota huwataranna baxxinoommore ikkinoommohu mayiraatiro xaˈmara dandaanno. (Mat. 5:14-16) Barru baala mannu ledo xaande hasaambeemmo woyite baxxinoommore ikkinoommohu mayiraatiro xawinse kullammonsara dandiineemmo. Tini suwashshu wodani noonsa manni Maganinkewa daanno gede assitanno. Kuri doogganni Yihowa guwinseemmoha ikkiro isi wodana tashshi assineemmo.—1 Xim. 2:3, 4.

YIHOWA SUˈMA GUWINSEEMMO WOYITE YESUUSA HAGIIRSIINSEEMMO

8. Yihowa suˈma guwisate Yesuusi kaajja lawishsha ikkinonkehu hiittoonniiti?

⁸ Iimano ikko uulla noohu hedate dandoo noonsa kalaqami baalu giddo Yesuusi geeshsha Annasi afinohu dino. (Mat. 11:27) Yesuusi Annasi baxanno; hattono Yihowa suˈma guwisate dancha lawishsha ikkinonke. (Yoh. 14:31) Isi reyara albaanni noo hashsha Annisiwa huucciˈri woyite uullate aani soqqanshosi, “Suˈmakki egensiisoommo” yee gumulino. (Yoh. 17:26, NW) Isi hatto yaasi mayyaate?

9. Yesuusi Annisi daafira xawise kulate hiikkonne lawishsha horoonsiˈrino?

⁹ Yesuusi mannaho Maganu suˈmi Yihowa ikkinota kule calla diagurino. Yesuusi rosiisinohu Yihudu manni wonanni Yihowa suˈma afinoho. Kayinni Yesuusi mannaho Yihowa daafira ‘egensiisate’ dancha lawishsha ikkinonke. (Yoh. 1:17, 18) Lawishshaho Ibiraawootu Afiiti Qullaawa Borro Yihowa maarannohanna mararannoha ikkinota kultanno. (Ful. 34:5-7) Yesuusi mittu qaetenni fule baino beettinna annisi lawishsha horoonsiˈre tini halaale ikkase xawise kulino. Kuni anni maaro eino beettisi ‘fafowa heeˈre daanna’ afe dodanni mare hanqafe godowinta gatona yiinosita kultanno xagge nabbambeemmo woyite, Yihowa maaronna mararro roore xabbe leeltannonke. (Luq. 15:11-32) Yesuusi wolootu Annisi addinta hiittoohoro huwattanno gede kaaˈlino.

10. (a) Yesuusi Annisi suˈma horoonsiˈrinotanna wolootuno hatto assitara hasiˈrannota anfeemmohu hiittoonniiti? (Maarqoosi 5:19) (Misileno lai.) (b) Yesuusi xaa yannara ninke ma assinammora hasiˈranno?

¹⁰ Yesuusi wolootuno Annisi suˈma horoonsidhara hasiˈranno? Ee hasiˈranno. Hatte yannara heedhinori mite ammaˈnote massagaano lowo geeshsha qullaawa ikkino daafira Maganu suˈma gana dihasiissanno yite ammantannoha ikkara dandaanno; Yesuusi kayinni kuni Qullaawa Borro ledo sumuu yaannokki budi Annisi suˈma ayirrisannokki gede assasira diwodhino. Hanni Yesuusi Gergesenooni yinanni qooxeessira mitto agaaninte amaddino mancho hursi woyite ikkinore laˈno. Hakko qooxeessi manni lowo geeshsha waajjino daafira Yesuusi qooxeessinsanni agure haˈranno gede huucciˈrino; hakko daafira Yesuusi hakko dikeeshshino. (Maq. 5:16, 17) Ikkirono isi hakko heeˈranno manni Yihowa suˈma afara  hasiˈrino. Hakko daafira Yesuusi konne hurino mancho isi assinosire ikkikkinni Yihowa assinosire haˈre mannaho kulanno gede hajajino. (Maarqoosi 5:19 nabbawi.) a Xaa yannarano Yesuusi Annisi suˈma alame woˈmate kullammora hasiˈranno! (Mat. 24:14; 28:19, 20) Hatto assineemmo woyite Mootenke Yesuusa hagiirsiinseemmo

11. Yesuusi harunsaanosi mayite huuccidhanno gede rosiisino? Tini lowo geeshsha hasiissannota ikkitinohu mayiraati? (Hiziqeeli 36:23)

¹¹ Yesuusi, Yihowa hedinori suˈmisi qullaawa ikkanno gedenna isi daafira kaphinoonni kaphi xawo fulanno gede assa ikkitinota afino. Mootichinke harunsaanosi, “Iima heeˈrattohu Annanke, suˈmikki qullaawa ikko” yite huuccidhanno gede rosiisinonsahu iseraati. (Mat. 6:9) Yesuusi tini lowo geeshsha hasiissanno hajo baalanka kalaqama laˈannota ikkitinota afino. (Hiziqeeli 36:23 nabbawi.) Hedate dandoo noonsa kalaqami giddo Yihowa suˈmi qullaawanno gede assate Yesuusi geeshsha sharraminohu dino. Ikkollana Yesuusa amandi yannara diinnasi iso mayi cubbo loosino yite kassassino? Magano xonino yite kassassino. Yesuusi, qullaawa Annisi suˈma huna woy misha lowo cubbo ikkitinota afinoti dihuluullissannote. Isi togoo jaddo loosino yine kassansoonnisi daafira lowo geeshsha dadillino. Amandasira albaanni noo saatera ‘lowo geeshsha yaadanno’ gede assinosihu qaru korkaati konne ikkara dandaanno.—Luq. 22:41-44.

12. Yesuusi baalantenni roortino doogonni Annisi suˈmi qullaawanno gede assinohu hiittoonniiti?

¹² Yesuusi Annisi suˈmi qullaawa ikkanno gede assate shetinsoonnisita, xonnoonnisitanna kaphunni kassansoonnisita baala dandee saino. Isi Annisira baalunku coyinni hajajaminota afino daafira saalanno gede assannosiri mitturino dino. (Ibi. 12:2) Qoleno isi hattee qarru yannara Sheexaanu xaaddotenni sianni noosita afino. (Luq. 22:2-4; 23:33, 34) Sheexaanu Yesuusi ammanamannokki gede asseemmo yee hexxinoti dihuluullissannote; ikkirono irraawe gatino! Yesuusi jeefote Sheexaanu waajjo kapho kaphannoha ikkinotanna buutote qarri iillinsarono Yihowara ammanante soqqantanno soqqamaano noosita buuxisino!

13. Gashshe noo Mootekki hagiirsiisa dandaattohu hiittoonniiti?

 ¹³ Gashshe noo Mootekki hagiirsiisa hasiˈratto? Wolootu Maganinke ayimma affanno gede assite woˈmanka woyite Yihowa suˈma guwisi. Hatto assatto woyite Yesuusi faale hadhanni nootto. (1 Phe. 2:21) Yesuusi gede Yihowa hagiirsiisanna diinasi ikkinohu Sheexaanu waajjo kapho kaphannoha ikkinoti leeltanno gede assatto!

YIHOWA SUˈMA GUWINSEEMMO WOYITE MANNU HEESHSHO AFIˈRANNO GEDE KAAˈLINEEMMO

14-15. Mannaho Yihowa daafira rosiinseemmo woyite hiikku hagiirsiisanno coyi ikkanno?

¹⁴ Yihowa suˈma guwinseemmo woyite mannu heeshsho afiˈranno gede kaaˈlineemmo. Hiittoonni? Sheexaanu ‘ammantannokkiri wodana beeshshino.’ (2 Qor. 4:4) Hakko daafira insa Sheexaanu tareessanno kapho ammantanno; isi, Maganu dino, Maganunniwa shiqa didandiinanni, isi mannaho dihedannoho, kaajjadoho hattono cubbo loossinore hegerera qorichishanno yee kaphanno. Isi tenne assannohu Yihowa suˈma hune hattono mishamanno gede asse mannu Maganunniwa shiqannokki gede assateeti. Kayinni sabbakate loosinke Sheexaanu hedinori qinaannokki gede assanno. Mannaho Maganinke daafira halaale rosiinseemmo woyite isi suˈmi qullaawanno gede assineemmo. Tini mayi guma abbitannoyya?

¹⁵ Maganu Qaali giddo noo halaali lowo wolqa afiˈrino. Mannaho Yihowa daafira rosiinsenna isi ayimma afanno gede kaaˈline lowo geeshsha hagiirsiisanno guma afiˈneemmo. Hakkunni gedensaanni mannu Sheexaanu kaphinni didogamanno; hattono ninkente gede baxillaancho Annanke afanno. Insa taalle nookki wolqasi affe dhagge assidhanno. (Isa. 40:26) Yihowa taashshannoha ikkino daafira iso addaxxa rossanno. (Mar. 32:4) Insa Yihowate lowo hayyonni lowore rossanno. (Isa. 55:9; Rom. 11:33) Qoleno Yihowa baxille ikkinota affanno woyite sheshifattanno. (1 Yoh. 4:8) Yihowawa shiqqanno woyite oososi ikkite hegerera heeˈrate hexxonsa xabbe leeltannonsa. Mannu iimi Anninsawa shiqanno gede kaaˈla ninkera lowo ayirrinyeeti! Hatto assineemmo woyite Yihowa ‘ledosi loonseemmori’ gede asse laˈˈannonke.—1 Qor. 3:5, 9.

16. Maganu suˈma afa mito manna kaaˈlitinonsahu hiittoonniiti? Lawishsha kuli.

 ¹⁶ Mannaho umi qara Maganu suˈmi Yihowa ikkinota calla rosiinseemmoha ikkara dandaanno. Tini umise suwashshu wodani noonsare lowo geeshsha kaaˈlitara dandiitanno. Lawishshaho Aaliya b yinanni wedellitte Kiristaana ikkitinokki maate giddo lophitino. Ise ammaˈnosenni kassi diyitino; woy Maganunniwa shiqqinohu gede assite diheddanno. Kayinni Yihowa Farciˈraasine ledo xiinxallase kaaˈlitinose. Ise Magano Jaalise gede assite laˈˈa hanaffino. Qoleno Maganu suˈma batinye Qullaawu Maxaafi tiro giddonni fushshine hoolle guwishshu suˈma lawishshaho, Mooticha yaannoha worroonnita affuti dhagge assidhino. Ise Maganu suˈmi Yihowa ikkinota afase heeshshose soorritino. Ise dhagge assidhe, “Ada muxxe jaaliˈyara suˈmu noosi!” yitino. Tini mayi guma abbituyya? Ise ledde, “Xa harshammi yoomma; tini anera lowo ayirrinyeeti” yitino. Istiivi yinannihu muuziiqa ganate dandoo noosi manchi kayinni Yihudu ammaˈnora laalaattanno maate giddo lophino. Isi batinye ammaˈno lawisiisaano ikkitinota afino daafira insawa shiqa dihasiˈranno. Kayinni isi amasi shiiˈre xissiisiˈre noo yannara, Yihowa Farciˈraasinchi mitto mancho Qullaawa Maxaafa xiinxallisanna ofolle macciishshate sumuu yiino. Isi Maganoho suˈmu noosita afiti lowo geeshsha dhagge assiˈrino. Isi togo yiino: “Maganoho suˈmu noosi yinanna horo macciishshe diegennoommo. Mite yee Maganu addinta nooha ikkinota huwatoommo; hakkiinni iso jaaliˈya gede asse laˈˈa hanafoommo.”

17. Woˈmanka woyite Yihowa suˈma guwisate murciˈroottohu mayiraati? (Misileno lai.)

¹⁷ Sabbakattonna rosiisatto woyite Yihowaha qullaawa suˈma mannaho kulatto? Maganinke addinta hiittoohoro affanno gede kaaˈlattonsa? Hatto assatto woyite Maganu suˈma guwisatto. Mannu Yihowa ayimma seekke afanno gede kaaˈlite woˈmanka woyite Yihowaha qullaawa suˈma guwisi. Konni garinni mannu heeshsho gatisatto. Qoleno Mootekki Kiristoosi Yesuusi lawishsha harunsatto. Baalunkunni roore kayinni baxillaancho Annakki Yihowa hagiirsiisatto! “Hegere hegerera” isi suˈma guwisiˈri!—Far. 145:2.