1-2. Ino ty manampy antsika hahay ty raha tsapan’i Jehovah lafa nisy nandratiraty ty anarany?

 ERITSERETO moa hoe misy olo raiky teanao, miresaky raha raty mikasiky anao. Hainao hoe vandy raha iny, fe mino azy ty olo sisany. Ty tena raty aza, resahin-drozy amin’olo hafa koa vandy iny ka lasa maro ty olo mino an’ny raha iny. Ino ty tsapanao? Azo antoky fa halahelo iha satria iha mba midary olo noho miezaky hana laza soa.​—Ohab. 22:1.

² Lasa haintsika baka amy ohatsy io hoe ino ty tsapan’i Jehovah lafa nisimba ty lazany. Niresaky vandy mikasiky azy tamy Eva, azy ampela voalohany iny, ty raiky amy anany an-danitsy any rey. Nino an’ny raha iny Eva. Vandy iny ro nitariky an’ny ray aman-drenintsika voalohany rey hanohitsy an’i Jehovah. Lasa mpanota noho maty ty taranak’olombelo iaby vokatsini-zay. (Gen. 3:1-6; Rom. 5:12) Vandy nivolanin’i Satana tamy zaridain’ny Edena tao iny avao ro nahavy ty problemo iaby hitantsika maneran-tany, anatini-zay ty fahafatesa, aly, noho fijalea. Nalahelo va Jehovah lafa naharè an’ny vandy iny noho mahita ty problemo naterakin’ny raha iny? Mazava ho azy. Fe tsy meloky Jehovah na mitanjaky lolompo. Mbo “Ndranahary falifaly” avao ie.​—1 Tim. 1:11.

3. Ino ty tombotsoa ananantsika?

³ Mana tombotsoa handramby anjara amy fanamarina ty anaran’i Jehovah tsika. Manao ani-zay tsika laha manoriky an’ny didy toy: “Derao ty anaran’i Jehovah.” (Sal. 113:1) Midera ty anaran’i Jehovah tsika laha miresaky ty marina mikasiky  azy amin’olo. Ta hanao ani-zay va iha? Ino ty handrisiky anao hidera ty anaran’ny Ndranaharintsika iny amy fonao iaby? Ndao tsika handiniky raha telo bevata.

FALIFALY JEHOVAH LAFA MIDERA TY ANARANY TSIKA

4. Manino Jehovah ro falifaly lafa midera azy tsika? Manomeza ohatsy. (Henteo koa sary io.)

⁴ Falifaly Babantsika an-danitsy any iny lafa midera ty anarany tsika. (Sal. 69:30, 31) Fe midika va zay hoe tea-Ndranahary farani-ze mahery iny hidera azy ty olo satria mila fampahereza ie, manahaky olo tsy lavorary io? Aha. Toy misy ohatsy. Eritsereto hoe misy ajà ampela kelikely lomay mamonjy an’ny babany. Sady mandrakoky azy ie no mivola hoe: “Tsy misy baba soa fanahy manahaky anao an-tany etoy!” Mihehihehy avao babany iny sady falifaly biby, mahita an’ny fihetsikin’ny anakiny iny. Fa manino? Tsy hoe mila fampahereza noho safà fiderà baka amy anakampelany iny ie. Teany anany io ka falifaly ie satria nasehon’ny anakampelany iny azy hoe teany ie sady ankasitrahany. Hainy fa hanampy an’ny anany iny ho falifaly avao ty fanana an’ny toetsy reo lafa ie be. Zay koa ty antony mahavy an’i Jehovah ho falifaly lafa tsika midera azy.

5. Ino ty vandy lasa voaporofontsika lafa tsika midera an’i Jehovah?

⁵ Lafa tsika midera an’ny Babantsika an-danitsy any iny, le manaporofo tsika hoe vandy ty raha nivolanin’i Satana mikasiky antsika kiraidraiky. Mivola Satana fa tsy hisy olo hahavita hiaro ty anara-Ndranahary zao. Hivaliky hoasany tsika lafa tojiky raha sarotsy. Mivola koa ie fa hijano tsy hanompo a-Ndranahary sasy tsika lafa misy raha hitantsika hoe mahasoa antsika. (Joba 1:9-11; 2:4) Fe tsy nivaliky mihintsy Joba ka nanaporofo hoe mpavandy Satana. Ka iha? Afaky mifily ty hiaro an’ny Babantsika iny noho hanao ze mampifalifaly azy tsika laha tsy mivaliky mihintsy. (Ohab. 27:11) Tena voninahitsy bevata ty manao ani-zay.

6. Akory ty hanahafantsika an’i Davida Mpanjaka noho Levita rey? (Nehemia 9:5)

⁶ Ta hidera ty anaran’i Jehovah amy fony iaby ty olo tea azy. Hoy Davida Mpanjaka: “Hidera an’i Jehovah aho! Loniky mba hidera ty anarany masy ty vatako iaby.” (Sal. 103:1) Hain’i Davida fa lafa midera ty anaran’i Jehovah ie le midera an’i Jehovah mihintsy. Tafilitsy amy anaran’i Jehovah io ty lazany. Lafa tsika koa maharè anarany io, le mieritseritsy ty toetsy soany iaby noho ty raha soasoa nataony. Tean’i Davida ty hanamasy noho hidera  ty anaran’ny Babany. Ta hanao ani-zay amy ‘ty vatany iaby’ ie, zany hoe amy fony iaby. Nidera an’i Jehovah manahaky ani-zay koa ty Levita. Niambany rozy ka nieky hoe masy marè ty anaran’i Jehovah ka tsy hahavola ty fiderà maeva azy ty raha volanin-drozy. (Vakio Nehemia 9:5.) Azo antoky fa nifalifaly Jehovah lafa nahita ty fiambanean-drozy noho ty fiderà baka amy fo nataon-drozy.

7. Ino ty azontsika atao mba hiderà an’i Jehovah amy fanompoa eny noho amy fiainantsika andavanandro?

⁷ Afaky mampifalifaly an’i Jehovah koa tsika lafa miresaky mikasiky azy, le asehontsika hoe tena ankasitrahantsika ie sady tena teantsika. Lafa tsika manompo, le tiarovintsika avao hoe ty hanampy olo hifandramby marìny amy Jehovah ro tena kendrentsika, sady hanampy an-drozy hahatsapa ty raha tsapantsika mikasiky an’ny Babantsika be fitiava iny. (Jak. 4:8) Falifaly tsika mampiseho amin’olo hoe ino ty raha volanin’ny Baiboly mikasiky an’i Jehovah ka ahità hoe be fitiava ie, tea rariny, hendry, mahery, noho ahità ty toetsiny soa hafa. Midera an’i Jehovah noho mampifalifaly azy koa tsika lafa miezaky manahaky azy. (Efes. 5:1) Laha manao ani-reo tsika, le hiavaky amy tontolo raty toy eto. Ho voamarikin’olo raha zay ka mety hanontany rozy. (Mat. 5:14-16) Mety ho afaky hanazava amin-drozy ty antony tsika lafa mifandramby amin-drozy sanandro. Lasa ta hinama amy Ndranaharintsika iny ty olo mana fo soa. Ho falifaly ty fon’i Jehovah laha midera azy manahaky ani-zay tsika.​—1 Tim. 2:3, 4.

FALIFALY JESOSY LAFA TSIKA MIDERA TY ANARAN’I JEHOVAH

8. Manino Jesosy ro modely tena soa amy fiderà ty anaran’i Jehovah?

⁸ Amy zavaboary manan-tsay iaby an-danitsy any noho an-tany etoy, le Jesosy avao ro tena mahay soa an’i Jehovah. (Mat. 11:27) Tean’i Jesosy Babany, ka nataony ze hahavy ty olo hidera ty anarany. (Jaona 14:31) Lafa nivavaky tamy Babany ie tamy haliky talohan’ny nahafatesany iny, le niresaky raha tena bevata nataony tamy fanompoany tan-tany etoy. Hoy ty asany: “Fa nambarako an-drozy ty anaranao.” (Jaona 17:26) Akory ty nanaovany ani-zay?

9. Ino ty fanohara nampiasan’i Jesosy mba hanazavà soa ty mikasiky an’ny Babany?

⁹ Tsy hoe nivolanin’i Jesosy tamin’olo avao hoe Jehovah ty anara-Ndranahary. Fa nahay ty anara-Ndranahary Jiosy nampianarin’i Jesosy rey. Fe Jesosy mihintsy ro “nanazava ty mikasiky Azy.” (Jaona 1:17, 18) Aseho amy Soratsy Hebreo ao, ohatsy, fa mamindra fo noho soa fanahy Jehovah. (Eks. 34:5-7) Nanao fanohara Jesosy mba hanampea antsika hahazo soa an’ny fahamarina zay, le niresaky mikasiky nahoda raiky nana anaky adala iny ie. Lafa tsika mamaky tantara iny, le misy raha nataon’ny nahoda iny. Nijilony anany iny “laha mbo nilavitsy” eny, le nilay ie, nandrakoky azy, sady nanenga tanteraky ty hadisoany. Hitantsika baka amin’io fa tena mamindra fo noho soa fanahy vatany Jehovah. (Lioka 15:11-32) Nampean’i Jesosy ty olo mba hahay hoe olo manao akory marina Babany.

10. a) Akory ty ahaizantsika hoe nampiasa ty anaran’ny Babany Jesosy sady teany hanao manahaky ani-zay koa ty olo hafa? (Marka 5:19) (Henteo koa sary io.) b) Ino ty tean’i Jesosy hataontsika henanizao?

¹⁰ Tean’i Jesosy hampiasa ty anaran’ny Babany koa va ty olo hafa? Mazava ho azy. Nino ty mpitariky fivavaha sisany tamy zay fa tsy nanaja a-Ndranahary ze olo nanonotono ty anarany, fe tsy nanaka an’i Jesosy tsy hanome voninahitsy an’ny Babany ty fampianara tsy mifanaraky amy Soratsy Masy ho zay. Diniho  moa ty raha niseho lafa ie nangalaky demonian’ny lahilahy raiky tamy faritsy nisy an’ny Gerasianina reo tany. Lasa natahotsy ty olo ka nisoloho an’i Jesosy mba hiala teo, farany ie tsy nijano tamy faritsy iny teo. (Mar. 5:16, 17) Fe mbo tean’i Jesosy ho hain’olo tamy faritsy iny any avao ty anaran’i Jehovah. Farany nivolaniny lahilahy nitahàny iny mba hiresaky amin’olo, tsy ty raha nataony fa ty raha nataon’i Jehovah. (Vakio Marka 5:19.) a Tean’i Jesosy hambarantsika olo maneran-tany koa ty anaran’i Jehovah! (Mat. 24:14; 28:19, 20) Laha manao ani-zay tsika, le hampifalifaly an’i Jesosy Mpanjakantsika.

11. Nampianarin’i Jesosy hivavaky mikasiky ino ty mpianatsiny, le manino raha zay ro tena vatan-draha laha hentea ty Ezekiela 36:23?

¹¹ Hain’i Jesosy fa sitrapon’i Jehovah ty hanamasy ty anarany, zany hoe hataony ze tsy hahafa-baraka azy sasy. Zay nahavy an’ny Tompontsika iny nampianatsy ty mpanori-dia azy mba hivavaky ho zao: “Babanay an-danitsy any, hohamasìny lahy ty anaranao!” (Mat. 6:9) Hain’i Jesosy fa io ro alihevitsy bevata mahatafilitsy ty olombelo noho ty anjely iaby. (Vakio Ezekiela 36:23.) Mbo tsy nisy zavaboary manan-tsay nanao raha mandilatsy ty nataon’i Jesosy mba hanamasìna ty anaran’i Jehovah. Fe lafa nisambory Jesosy, le nivola fahavalony rey fa nao tsy nanaja an’ny Babany ie. Azo antoky fa nieritseritsy Jesosy hoe ty fanararaota na fandratiratia ty anara masin’ny Babany ro fahotà farani-ze raty. Tena niasa loha Jesosy lafa nasara hoe nanao ani-raha zay. Mety zay ro tena antony nahavy azy “nitebiteby marè”, lera vitsivitsy talohan’ny nanambora azy iny.​—Lioka 22:41-44.

12. Ino ty raha bevata nataon’i Jesosy mba hanamasìna ty anaran’ny Babany?

¹² Niaritsy fijalea, kizakizaky, noho fandratiratia Jesosy mba hanamasìna ty anaran’ny Babany. Hainy fa tokony hanoriky ty safàn’ny Babany amy kila raha iaby ie, sady tsy misy tokony hahamenatsy azy. (Heb. 12:2) Hainy koa fa hanafiky azy mivanta Satana amy fotoa sarotsy io. (Lioka 22:2-4; 23:33, 34) Tena nitamà Satana hoe hivaliky Jesosy, fe tsy nahavoa raha ie! Niporofoen’i Jesosy fa mpavandy Satana sady raty fanahy.  Niporofoeny koa fa mana mpanompo tena tea azy Jehovah, le tsy mivaliky mihintsy rozy ndre miatriky raha tena sarotsy aza!

13. Ino ty azonao atao mba hampifalifalea an’ny Mpanjakanao iny?

¹³ Ta hanao raha mampifalifaly an’i Jesosy, azy Mpanjakantsika iny va iha? Derao avao ty anaran’i Jehovah, le ampeo ty olo hafa hahay hoe ia marina Ndranaharintsika iny. Manoriky marìny ty lian’i Jesosy iha laha manao ani-zay. (1 Pet. 2:21) Hampifalifaly an’i Jehovah iha manahaky ty nataon’i Jesosy, sady hanaporofo hoe mpavandy Satana, azy fahavalony iny!

HANAVOTSY AIN’OLO TSIKA LAHA MIDERA TY ANARAN’I JEHOVAH

14-15. Ino ty raha soa mety hiseho lafa ampianarintsika ty marina mikasiky an’i Jehovah ty olo?

¹⁴ Mety hanavotsy ain’olo tsika laha midera an’i Jehovah. Manao akory zao? Nataon’i Satana ze ‘hahajiky ty sain’olo tsy mpino.’ (2 Kor. 4:4) Vokany, lasa inoan-drozy vandin’i Satana retoa: Tsy misy Ndranahary zao, tsy ahoany ino ze fomba anompoantsika azy sady tsy midary antsika ie, tena raty fanahy Ndranahary ka ampijalijaliny mandrakizay ty olo raty fanahy. Mivola an’ny vandy reo Satana satria teany ho simbà ty lazan’i Jehovah, amy zay ty olo tsy ta hifandramby aminy. Fe lafa mitory tsika, le mampandamòka ty tetikin’i Satana. Mampianatsy olo ty marina mikasiky an’ny Babantsika iny tsika, sady midera ty anara masin’ny Ndranaharintsika iny. Ino ty vokany?

¹⁵ Tena misy heriny ty fahamarina amy Safà-Ndranahary ao. Laha tsika mampianatsy olo mikasiky an’i Jehovah noho ty toetsiny, le misy raha soa ho hitantsika. Tsy ho jikin’ny vandin’i Satana rey sasy ty olo fa lasa hahita ty toetsy soan’ny Babantsika iny. Ho tseriky rozy lafa mahay hoe tsy misy fetrany ty heriny. (Isaia 40:26) Hihamatoky azy rozy satria manao ty rariny ie. (Deot. 32:4) Ho hain-drozy koa hoe tena hendry ie. (Isaia 55:9; Rom. 11:33) Le hampahery an-drozy ty mahay hoe fitiava ro tena maha ie azy. (1 Jaona 4:8) Lafa mamonjy an’i Jehovah rozy, le lasa azo antoky ty fanantenan-drozy fiaina mandrakizay satria fa anany rozy. Tena voninahitsy bevata  ho antsika ty manampy olo mba hifandramby amy Baban-drozy iny! Laha manao ani-zay tsika, le ataon’i Jehovah “mpiaraky miasa” aminy.​—1 Kor. 3:5, 9.

16. Ino ty vokany lafa mahay ty anara-Ndranahary ty olo sisany? Manomeza ohatsy.

¹⁶ Mety hampianarintsika olo tse amy voalohany hoe Jehovah ty anara-Ndranahary. Mety hisy vokany laliky amin’olo mana fo soa raha zay. Zay mihintsy ty niseho tamy somonjara mana anara Alyah. b Nitezà tamy fivavaha tsy mampianatsy ty raha resahin’ny Baiboly ie. Fe tsy nahafa-po azy ty tao sady tsy nahatsapa ie hoe mifandramby amy Ndranahary. Niova raha zay lafa nanomboky nianatsy Baiboly tamy Vavolombelon’i Jehovah ie. Lasa sahala amy Namany io ty fahitany a-Ndranahary. Nitseriky ie lafa nahay hoe nalà tsy ho anaty Baiboly maro ty anara-Ndranahary, le nisoloa amy anaram-boninahitsy manahaky hoe Tompo. Niova biby ty fiainany lafa nahay ty anaran’i Jehovah ie. Hoy ty asany: “Kay hondy mana anara Namako iny io!” Ino ty vokany? Nivola ie hoe: “Milamy ty saiko henanizao. Tsapako hoe nahazo fitahia bevata aho fa mahay ty anaran’i Jehovah.” Misy lahilahy raiky jiosy mana anara Steve zay koa nimpititiky moziky taloha. Tsy ta hilitsy ho anisan’ny antoko-pivavaha ie satria hitany fa miatsaravelatsihy iaby ty olo amy raha rey. Fe lafa nimaty reniny, le naneky hianatsy Baiboly niaraky tamy Vavolombelon’i Jehovah raiky zay ie. Tena nidosiky ty fony ty nahay ty anara-Ndranahary. Hoy ty asany: “Mbo tsy nahay anara-Ndranahary mihintsy aho.” Nivola koa ie hoe: “Zay vo haiko hoe tena misy Ndranahary! Manahaky olo io mihintsy ty fahitako azy. Tsapako amy zay hoe nahita Nama aho.”

17. Manino iha ro tapa-kevitsy tsy hieny fa hidera ty anaran’i Jehovah avao? (Henteo koa sary io.)

¹⁷ Ambaranao olo va ty anara masi-Ndranahary hoe Jehovah lafa iha mitory noho mampianatsy? Ampeanao va rozy hahay hoe manao akory marina Ndranaharintsika io? Laha manao ani-zay iha, le midera ty anara-Ndranahary. Enga anè iha tsy hieny hidera ty anara masin’i Jehovah ka hanampy ty olo hahay hoe ia marina ie io. Hanavotsy ain’olo iha laha manao ani-zay, sady hanaraky ty fitarihan’i Jesosy Kristy, azy Mpanjakanao iny. Fa ty tena vatan-draha, hampifalifaly an’i Jehovah, azy Babanao be fitiava iny iha. Loniky lahy iha ‘hidera ty anarany avao mandrakizay mandrakizay’!​—Sal. 145:2.