1-2. O le ā e fesoasoani iā i tatou e malamalama ai i faalogona o Ieova ona o le taʻuleagaina o lona suafa?

 SEʻI manatu i le mea lenei: Ua faia e se tagata e te alofa i ai se tala lē lelei e faatatau iā te oe. E te iloa e lē saʻo lenā tala, ae ua talitonu i ai nisi. Peitaʻi, o le itu e sili ai ona leaga, ua latou taʻu atu i isi lenā pepelo ma ua talitonu ai foʻi le toʻatele. O ā ni aafiaga o lenā mea iā te oe? E mautinoa le tigā o ou faalogona, pe afai e tāua iā te oe tagata ma lou talaaga lelei.—Faata. 22:1.

² O lenā mea e tatou te malamalama ai i faalogona o Ieova, ina ua taʻuleagaina lona talaaga lelei. Na faia e se tasi o ona atalii agaga se pepelo e faatatau iā te ia i le uluaʻi fafine o Eva, ma na talitonu i ai Eva. O lenā pepelo na iʻu ai ina fouvale o tatou uluaʻi mātua iā Ieova. O le iʻuga, ua oo mai ai le agasala ma le oti i tagata uma. (Kene. 3:​1-6; Roma 5:12) O pepelo na faia e Satani i le faatoʻaga o Etena, ua oo mai ai faafitauli ua tatou vaaia i le lalolagi e pei o le oti, taua, ma tulaga pagatia. E mautinoa e lagona e Ieova le tigā ona o na tala taufaaleaga ma ona aafiaga. E ui i lea, e lē faaauau ai ona tigā pe ita faamoemoe Ieova, ae e tumau pea ona avea o ia o “le Atua fiafia.”—1 Timo. 1:11.

3. O le ā le faaeaga ua tatou maua?

³ O se faaeaga le faia o so tatou sao i le faasilisilia o le suafa o Ieova, e ala i le usitaʻia o le faatonuga faigofie lenei: “Ia vivii atu i le suafa o Ieova.” (Sala. 113:1) E tatou te faia faapea, pe a tatou taʻu atu i isi mea lelei uma e faatatau iā te ia. Seʻi o  tatou iloiloina ni vala se tolu e uunaʻia ai i tatou e vivii atu i le suafa o lo tatou Atua ma le lotoatoa.

E FAAFIAFIAINA IEOVA PE A TATOU VIVII I LONA SUAFA

4. Aiseā e faafiafiaina ai Ieova pe a tatou vivii atu iā te ia? Ia faataʻitaʻi. (Tagaʻi foʻi i le ata.)

⁴ E faafiafiaina lo tatou Tamā i le lagi pe a tatou vivii atu i lona suafa. (Sala. 119:108) Po o lona uiga la, e pei le Atua e ona le malosi uma lava o tagata lē lelei atoatoa e mananaʻo e viia i latou e isi, ona e latou te manaʻomia se faamautinoaga? E leai. O se faataʻitaʻiga, seʻi mafaufau i se teineitiiti o loo fusiina lona tamā ma faapea atu, “O oe o le tamā e sili ona lelei i le lalolagi.” E mautinoa le matuā faafiafiaina ai o le tamā. Aiseā? Pe e tatou te faapea atu ona e na te manaʻomia se faamautinoaga ma le viiga mai i lona afafine? E leai. Nai lo o lea, e fiafia o ia e vaai atu o faaalia e lona afafine le alofa ma le talisapaia o ia. E iloa e le tamā, e saosaolaumea na uiga i le fiafia o lona afafine a o ia tuputupu aʻe. O māfuaaga foʻi na e fiafia ai Ieova le Tamā silisili, pe a tatou vivii atu iā te ia.

5. O ā pepelo ua tatou faamaonia le sesē pe a tatou vivii i le suafa o le Atua?

⁵ Pe a tatou vivii i lo tatou Tamā i le lagi, ua tatou faamaonia ai le sesē o se tasi o pepelo a Satani o loo tatou aafia ai. Ua faapea mai Satani e leai se tagata e mafai ona puipuia ma le faamaoni le suafa o le Atua. E leai foʻi se tasi e mafai ona tumau faamaoni i le Atua pe a tofotofoina. Ua ia faapea mai foʻi o le a tatou fulitua i le Atua, pe afai e tatou te manatu o le faia faapea e tatou te manuia ai. (Iopu 1:​9-11; 2:4) Peitaʻi, o le tumau faamaoni o Iopu, na ia faamaonia ai le pepelo o Satani. Ae e faapefea oe? Ua iai iā i tatou taʻitoʻatasi se faaeaga tautele o le puipuia o le suafa o lo tatou Tamā, ma faafiafiaina o ia e ala i le auauna iā te ia ma le faamaoni.—Faata. 27:11.

6. E faapefea ona tatou faaaʻoaʻo i le tupu o Tavita ma le ʻau sa Levī? (Neemia 9:5)

⁶ O i latou e alolofa iā Ieova, e mananaʻo e viia ma le lotoatoa lona suafa. Na tusi le tupu o Tavita: “Ia ou vivii atu iā Ieova; o mea uma foʻi o i totonu iā te aʻu, ia vivii atu i lona suafa paia.” (Sala. 103:1) Na iloa e Tavita, e tutusa lava le vivii atu iā Ieova ma le vivii atu i lona suafa. O le suafa o Ieova e aofia ai lona talaaga, o ona uiga matagofie, ma mea ofoofogia na ia faia. O lea, na manaʻo Tavita e faapaiaina ma viiviia le suafa o lona Tamā. Na ia manaʻo foʻi e faia faapea e tusa ma ʻmea  uma o i totonu iā te ia,’ po o le faia ma le lotoatoa. I se tulaga talitutusa, na taulamua le ʻau sa Levī i le viiaina o Ieova. Na latou taʻutino mai ma le lotomaulalo e lē mafai e a latou upu ona faamatalaina atoatoa, le viiga e tatau mo le suafa paia o Ieova. (Faitau le Neemia 9:5.) O na viiga e faia ma le lotomaulalo faapea le lotoatoa, e mautinoa e faafiafiaina ai Ieova.

7. E faapefea ona tatou vivii iā Ieova i la tatou faiva ma feutagaʻiga ma isi i aso taʻitasi?

⁷ I aso nei, e mafai ona tatou faafiafiaina Ieova e ala i le talanoa e faatatau iā te ia, i se auala e faaalia ai le lotofaafetai ma le tele o lo tatou alofa mo ia. Pe a auai i le faiva, ia manatua o lo tatou sini autū o le tosina atu o tagata iā Ieova, ma ia latou alolofa iā te ia e pei ona tatou faia. (Iako. 4:8) E tatou te fiafia e faailoa i tagata le auala o loo faamatala ai Ieova i le Tusi Paia, ma ona uiga e pei o le alofa, faamasinotonu, atamai, malosi, ma isi ona uiga matagofie. E tatou te vivii ma faafiafiaina foʻi Ieova, e ala i le taumafai e faaaʻoaʻo iā te ia. (Efe. 5:1) Pe a tatou faia faapea, e ono mātauina e nisi lo tatou tuese mai i lenei lalolagi amioleaga, ma e latou te ono fia iloa le māfuaaga. (Mata. 5:​14-16) E mafai ona tatou faamatala atu le māfuaaga a o feutagaʻi ma i latou i aso taʻitasi. O le iʻuga, o le a tosina mai ai tagata lotofaamaoni i lo tatou Atua. O lo tatou vivii atu iā Ieova i nei auala, o le a faafiafiaina ai lona finagalo.—1 Timo. 2:​3, 4.

E FAAFIAFIAINA IESU PE A TATOU VIVII I LE SUAFA O IEOVA

8. Na faapefea ona taulamua Iesu i le viiaina o le suafa o Ieova?

⁸ E leai se foafoaga atamai i le lagi ma le lalolagi, e sili atu ona iloa lelei le Tamā nai lo o lona Alo. (Mata. 11:27) E alofa Iesu i lona Tamā o Ieova, ma na ia taulamua i le viiaina o lona suafa. (Ioa. 14:31) I le tatalo a Iesu i lona Tamā i le pō a o leʻi maliu, na ia taaofaʻi ai lana faiva i le lalolagi i faaupuga nei: “Ua ou faailoa atu lou suafa.” (Ioa. 17:26) Na faapefea ona ia faia lenā mea?

9. O le ā le talafaatusa na faaaogā e Iesu e faamatala manino mai ai lona Tamā?

⁹ E leʻi tau na o le faailoa atu e Iesu i tagata, o Ieova o le suafa o le Atua. O tagata na aʻoaʻo atu ai Iesu, ua latou iloa le suafa o le Atua. Peitaʻi, na taulamua Iesu i le ʻfaamatalaina mai o le Tamā.’ (Ioa. 1:​17, 18) O se faaaʻoaʻoga, ua faailoa mai i Tusitusiga Paia Eperu, e alofa mutimutivale ma tigā alofa Ieova. (Eso. 34:​5-7) Na faamanino atili mai e Iesu lenā manatu, ina ua ia faamatalaina le talafaatusa i le atalii faamaumauʻoa ma lona tamā. Ua faapea mai le tala, ina ua ʻiloa mamao atu e le tamā’ lona atalii ua salamō, ua tamoʻe atu ma fusi o ia ma faamagalo ma le lotoatoa. O lenei tala ua faamatilatila mai ai le alofa mutimutivale ma le tigā alofa o Ieova. (Luka 15:​11-32) Na fesoasoani Iesu i isi e malamalama i le ituaiga Tamā e iai Ieova.

10. (a) E faapefea ona iloa na faaaogā e Iesu le suafa o lona Tamā ma e finagalo o ia e faia foʻi faapea e isi? (Mareko 5:19) (Tagaʻi foʻi i le ata.) (e) O le ā e finagalo Iesu e tatou te faia i aso nei?

¹⁰ E mautinoa na finagalo Iesu e faaaogā e isi le suafa o lona Tamā. Na manatu nisi o taʻitaʻi lotu i lenā taimi, o se faiga lē faaaloalo le taʻua o le suafa o le Atua. Peitaʻi, e leʻi mafai e na talitonuga e lē faale-Tusi Paia ona taofia ai Iesu mai i le faamamaluina o le suafa o lona Tamā. Seʻi manatu i le taimi na ia faamālōlōina ai se tamāloa na uluitino e temoni i le vaipanoa o Kerekese. Na matataʻu tagata ma ʻaiʻoi atu iā Iesu ina ia alu ese. O lea, na ia  tuua ai lenā vaipanoa. (Mare. 5:​16, 17) E ui i lea, na manaʻo Iesu ina ia faailoa atu le suafa o Ieova i inā. O lea, na faatonu ai e Iesu le tamāloa na ia faamālōlōina ina ia taʻu atu i tagata mea na faia e Ieova, ae e lē o mea na ia faia. (Faitau le Mareko 5:19.) a E finagalo foʻi Iesu ina ia tatou faailoa atu le suafa o lona Tamā i le lalolagi atoa. (Mata. 24:14; 28:​19, 20) O le faia faapea, e faafiafiaina ai lo tatou Tupu o Iesu.

11. O le ā na aʻoaʻo e Iesu ona soo ia tatalo ai, ma e tusa ai ma le Esekielu 36:​23, aiseā e tāua ai le faia faapea?

¹¹ Na silafia e Iesu na finagalo Ieova ina ia faapaiaina Lona suafa, ma ia taʻumamāina mai i tuuaʻiga sesē uma. O le māfuaaga lea na ia aʻoaʻoina ai ona soo ina ia tatalo: “Lo matou Tamā e o i le lagi, ia faapaiaina lou suafa.” (Mata. 6:9) Na malamalama Iesu, o le mataupu lea e sili ona tāua o loo feagai ma foafoaga uma. (Faitau le Esekielu 36:23.) E leai lava se foafoaga atamai i le aoao o mea e sili atu ona faapaiaina le suafa o Ieova nai lo o Iesu. Peitaʻi ina ua puʻea Iesu, na tuuaʻia o ia e ona fili i le fai upuleaga i le Atua. E mautinoa na manatu Iesu, o le taʻuleagaina o le suafa paia o lona Tamā, o se agasala lea e sili ona matuiā. Na matuā mamafa iā te ia le molia ma le tuuaʻia o ia i lenā solitulafono. E foliga mai o le māfuaaga autū lenā na “matuā mafatia” ai Iesu ina ua lata ina puʻea o ia.—Luka 22:​41-44.

12. O le ā le auala silisili na faapaia ai e Iesu le suafa o lona Tamā?

¹² Na onosaia e Iesu puapuaga, taufaifaiga, ma tuuaʻiga sesē uma faasaga iā te ia, ina ia faapaia ai le suafa o lona Tamā. E leʻi iai se mea e māsiasi ai o ia, auā na ia iloa sa ia usiusitaʻi i lona Tamā i mea uma. (Epe. 12:2) Na ia iloa foʻi sa osofaʻia tuusaʻo o ia e Satani i lenā taimi faigatā. (Luka 22:​2-4; 23:​33, 34) E mautinoa sa naunau Satani ina ia lē faamaoni Iesu. Peitaʻi, e leʻi taulau ana taumafaiga. Na faamaonia atoatoa e Iesu le pepelo taufaaleaga o Satani, ma e iai auauna faamaoni a Ieova o loo tutumau e ui i tofotofoga ogaoga.

13. E faapefea ona e faafiafia lo tatou Tupu tofia?

¹³ Pe e te manaʻo e faafiafia lo tatou Tupu tofia? Ia faaauau ona vivii i le suafa o Ieova,  ma fesoasoani i isi ina ia iloa lelei lo tatou Atua. O le faia faapea, ua e mulimulituʻi ai i tulaga aao o Iesu. (1 Pete. 2:21) E pei lava o Iesu, o le a e faafiafiaina Ieova ma faamaonia atu le matuā pepelo o Lona fili o Satani.

E FAASAOINA ISI PE A TATOU VIVII I LE SUAFA O IEOVA

14-15. O ā iʻuga lelei pe a tatou aʻoaʻoina tagata e faatatau iā Ieova?

¹⁴ Pe a tatou vivii i le suafa o Ieova, o le a faasaoina ai isi. E faapefea? ʻUa faatauasoina e Satani manatu o ē e lē talitonu.’ (2 Kori. 4:4) O le iʻuga, ua latou talitonu ai i pepelo nei a Satani: e leai se Atua, e mamao ese le Atua mai iā i tatou ma e lē manatu mamafa mai i tagata, e sauā le Atua ma e na te faapuapuagatia e faavavau tagata amioleaga. O le fuafuaga o na pepelo uma, ina ia taʻuleagaina ai le suafa ma le talaaga o Ieova, ma leai ai se faanaunauga o tagata e faalatalata atu iā te ia. Peitaʻi, e lē taulau le fuafuaga a Satani, pe a tatou aʻoaʻo tagata i upu moni e faatatau i lo tatou Tamā ma vivii atu i lona suafa paia. O le ā ua iʻu i ai?

¹⁵ E malosi le mana o upu moni o le Afioga a le Atua. O lo tatou aʻoaʻoina o tagata i mea moni e faatatau iā Ieova, o le a tatou vaaia ai ni iʻuga lelei. O le a faasolosolo ona lē toe faatauasoina tagata i pepelo a Satani, ma o le a amata ona latou mātauina uiga matagofie o lo tatou Tamā. O le a latou maofa i le matuā tele o lona mana. (Isa. 40:26) O le a latou maufaatuatuaina lana faamasinogatonu lelei atoatoa. (Teu. 32:4) O le a latou aʻoaʻoina le tele o mea mai i lona atamai e lē masuʻesuʻeina. (Isa. 55:9; Roma 11:33) O le a faamāfanafanaina foʻi i latou i le iloaina, o ia o le alofa. (1 Ioa. 4:8) A o faasolo ina latou vavalalata atu iā Ieova, o le a atili ai ona latou mautinoa i lo latou faamoemoe o le ola e faavavau, i le avea ai ma fanau a Ieova. O se faaeaga tautele mo i tatou, le fesoasoani i tagata ina ia vavalalata atu i lo latou Tamā! O le faia faapea, o le a silasila ai Ieova iā i tatou o se “ʻaufaigaluega faatasi” ma ia.—1 Kori. 3:​5, 9.

16. O ā aafiaga i isi o le iloaina o le suafa o le Atua? Aumai ni faataʻitaʻiga.

¹⁶ I le taimi muamua, e tatou te aʻoaʻoina  tagata o Ieova le suafa o le Atua. O lenā aʻoaʻoga, e telē lona aafiaga i se tagata lotofaamaoni. O se faaaʻoaʻoga, e leʻi ola aʻe le tuafafine talavou o Aaliyah b i se aiga Kerisiano. Peitaʻi, e leʻi faamalieina o ia i lana lotu, ma e leʻi vavalalata atu i le Atua. Na suia lenā tulaga ina ua ia suʻesuʻe ma Molimau a Ieova. Na amata ona ia vaai i le Atua o sana uō, ma na faateʻia o ia i le iloaina ua aveesea le suafa o le Atua mai i le tele o Tusi Paia, ae suia i taʻu e pei o le Alii. O lona iloaina o le suafa o Ieova, na matuā suia ai lona olaga. Ua ia faapea mai: “E iai le igoa o laʻu Uō!” O le iʻuga, ua ia lagona ai le fiafia ma le faamamaluina. O Steve o se tagata fai musika, na ola aʻe i se siʻomaga e maumauaʻi i talitonuga faa-Iutaia. E leʻi fia faia sana vaega i lotu, ona o le tele o faiga lē tonu na ia vaai i ai. Peitaʻi ina ua mavae le maliu o lona tinā, na ia filifili ai e auai i se suʻesuʻega faale-Tusi Paia na faia e se Molimau a Ieova. Na matuā pāʻia lona loto ina ua ia iloa le suafa o le Atua. Ua ia faapea mai: “Ou te leʻi iloa muamua le suafa o le Atua.” Ua ia faapea atili mai: “O le taimi muamua lea ua ou iloa ai e iai moni lava le Atua, ma ua avea o ia ma aʻu uō.”

17. Aiseā ua e maumauaʻi ai e faaauau ona viia le suafa o Ieova? (Tagaʻi foʻi i le ata.)

¹⁷ Pe e te faailoa atu i tagata le suafa paia o Ieova pe a e auai i so o se vala o le faiva? Pe e te fesoasoani iā i latou ina ia iloa lelei o ia? O le faia faapea, e te viia ai le suafa o le Atua. Tau ina ia faaauau ona e viia le suafa paia o Ieova, e ala i le fesoasoani i tagata e iloa le ituaiga o Atua e iai o ia. O le faia faapea, o le a e faasaoina ai isi. O le a e mulimuli ai foʻi i le taʻitaʻiga a lo tatou Tupu o Keriso Iesu. Ae e sili atu i lenā, o le a e faafiafiaina ai lo tatou Tamā alofa o Ieova. Tau ina ia e “vivii atu i [lona] suafa e faavavau, faavavau lava”!—Sala. 145:2.