1-2. Kɛkɔnge ketokotshɛ́ djɛ nsipisoyɛ wopo wɔ Yehova okande lá nkambo dj’engolo enkfumɔ wɛ yowande?

 KOOKANELA nkambo djɛnɛ: Onto ɔmɔtshi wɔkɔpɛ efula ambotepela nkambo mɔtshi djɛ nyɛtshi lá djiina djɛko. Wɛ ewa ente oyɛwɔ nde ongolo; koko anto amɔtshi wawola. Kɛnɛ keleka nyɛtshi lonkina nde, iwɔ wambowanga mpetola ongolo wɔkɔ, ko anto ankina efula wambokalɔ ndjawola. Nghongoyawoka ngete mo? Ntsha oyakiyanyɛ lá nkambo djɛ anto ankina la djɛ lokumu lɔko, nkambo dj’ongolo djɛsɔ nkoka nkokiyanyɛ, ape nghɔsɔ?​—Woo. 22:1.

² Ndjɔmbɔmba kɛsɔ kekoka ntokotshɛ́ djɛ nsipisoyɛ wopo wɔ Yehova ndoke winá wɔ lokumu lɔnde iyatshitana. Wɔnande ɔmɔtshi wɔ nyuma omamanyɛka akambo le Eva omoto wɔ ntondo. Nde awolaka ongolo wɔsɔ. M’ɔtɛ wɔ ongolo wɔsɔ, Adama la Eva watɔmbɔkwɛlaka Yehova. Eposelo weyalisá nde mpekanto la nyɔyi kingelaka lá nkfumbo kɛ wana w’anto. (Ewa. 3:1-6; Ɔrɔ. 5:12) Akambo ankfumɔ wɛnaso l’andja: nyɔyi, ambandji, ndjolo, yomboyɛ nde m’ongolo wɔ Satana ndatateyɛ ntshanghanyɛ lá bedji dj’Ɛdɛna. Yehova okaka djodjo l’oloko m’ongolo wɔsɔ la má eposelo wɛnde? Ee, ape l’ehamo. Koko Yehova apakotelaka onto onkomba. Lá nsɔsɔlɔ, nde ntshikalaka ngo ‘Ndjambe k’osasa.’​—1 Ti. 1:11.

3. Oyɛso la mpeyi kɛkɔnge?

³ Tolekɔ la mpeyi kɛ nkotshɛ́ djɛ ndjila djiina djɛ Yehova piyɔɔ má nɛmɛyɛ ɔlɛmbɛ wɔ daambi wɔnɛ: ‘Nyolumɛ djiina djɛ Yehova.’ (Yee. 113:1) Tongonangha nghɔsɔ má ntepela wɔlɔ lá nkambo djɛ Kanga djiina dj’ekina djɛsɔ. Wɛ ongolumɛ djiina djɛ Yehova? Nyontshɔ tokoshishima donga ntshato djɛ nkekete ngotokotshɛ́ djɛ numɛ djiina djɛ Ndjambe kɛso winá enkfumɔ.

 TONGOSASANGƐKE YEHOVA WINÁ W’OLUMƐSO DJIINA DJƐNDE

4. Ladjikɛnge Yehova osasangande winá w’olumɛso? Pɛyɛ ndjɔmbɔmba. (Lenda edjinge ntshango.)

⁴ Tongosasangɛke Papa kɛso kɛ l’olongo winá w’olumɛso djiina djɛnde. (Yee. 119:108) Ko kɛsɔ osakisolawɔ nde ente Ndjambe kanga nkfulu inkfumɔ alekɔ ngete wana w’anto wa ntshamba djɛ djɔ, walekɔ́ la mposɛ kɛ lomo ladjikɛnde walekɔ la djonyi kana wahona lokembo? Lako. Tokolenda ndjɔmbɔmba kɛnɛ. Kookanela djɛ wɔna w’ilɛngɛ ambodjinga isɛkɛnde ɛwɔ lá mpowo ko amboshimela ante: “Olekɔ papa keleka wɔlɔ l’andja w’otondo!” Nkambo djɛsɔ ngosasangɛ papa edjinge ngovunda kaanga l’oloko. Lamo? Ngo ladjikɛnde papa kɛsɔ alekɔ la djonyi djɛ lokembo kana lomo lɔ me wɔnande? Lako. Koko, ladjikɛnde papa nkɔpaka wɔnande la alekɔ l’osasa wɔ nyɛna ente wɔna wɔkɔ ndɔkɔpaka la alekɔ la djedjɛ. Nde ewa ante wekeka wa nghɔsɔ wangokotshɛ́ djɛ nde ndjala l’osasa winá wɔ ndongotafulaka. Lá wopo wɔkɔ ɔmɔ, Yehova Papa keleka ekekete, angosasangake winá w’olumɛso.

5. Ongolo wɔkɔnge sotonaka winá w’olumɛso djiina djɛ Ndjambe?

⁵ Winá w’olumɛso Papa kɛso kɛ l’olongo, tongotonake nkambo dj’ongolo djelendana ole laso. Satana afunaka ante lako kaanga onto ɔmɔ w’okoka nseela djiina djɛ Ndjambe la nkɔmano. Lá nkilika etepela wɛnde, lako kaanga onto wɔ l’anteyi kɛso wolekɔ́ la nkɔmano. Nde atepelaka ante isankfumɔ tɔngɔpɛyɛ Ndjambe ɔkɔngɔ ntsha tombewa ente tongowa wapɔ má nangha nghɔsɔ. (Djɔ. 1:9-11; 2:4) Koko Djɔbɔ mpame kɛ nkɔmano, ɛnyɛka ante Satana alekɔ kanga ongolo efula. Iya wɛ? Onto onkfumɔ wɔ l’anteyi kɛso alekɔ la mpeyi kɛ nseela djiina djɛ Papa kɛso la nkɔmano nkfumɔ ole ndosasangɛ má ndokambela. (Woo. 27:11) Alekɔ nsɔsɔlɔ mpeyi k’ekekete kɛ nangha nkambo djɛsɔ.

6. Wopo wɔkɔnge w’okokaso ndjokola Nkfumi Davidɛ l’ase Lewi? (Nɛhɛmiya 9:5)

⁶ Má ngandji kɛwɔ k’okawɔ Ndjambe, anto wá nkɔmano ntshindamaka djɛ ndolumɛ m’anse k’oloko. Nkfumi Davidɛ afunaka ante: ‘Lemi ente numɛ Yehova; ekete kenkfumɔ kɛ l’eteyi kɛmi kelumɛ djiina djɛnde dj’ekina.’ (Yee. 103:1) Davidɛ ewaki ante numɛ djiina djɛ Yehova nde numɛ otondo wɔ Yehova. Djiina djɛ Yehova nsakisolaka lonkina lokumu lɔnde, ko kɛsɔ ntovungolaka wekeka la nanghedji djɛnde djɛ wɔlɔ. Davidɛ akɔpaki numɛ djiina djɛ Papa kɛnde la ndɔwɔsa ngete ekina. Nde akɔpaki nangha nghɔsɔ la ‘ekete kenkfumɔ kɛ l’eteyi’ kɛnde, ntepela  ente, l’oloko ɔmɔ. Lá wopo wɔkɔ ɔmɔ, ase Lewi watshikaka ndjɔmbɔmba kɛ wɔlɔ lá kɛnɛ kelendana la numɛ Yehova. Wasuyɛka l’okitshakitshɛ onkfumɔ ambɔ etepela wɛwɔ wepakokaki lotshinda mpɛyɛ lomo lɛlama la djiina djɛ Yehova dj’ekina. (Wala Nɛhɛmiya 9:5.) Ape l’ehamo, etepela w’okitshakitshɛ la wɛ l’oloko ɔmɔ wɛpɛyɛ Yehova lomo nghɔsɔ, nsasangɛka oloko wɔnde.

7. Wopo wɔkɔnge w’olumɛso Yehova l’olemo w’ipoposanyɛ la lá lowiko lɔso lɔ lofu la lofu?

⁷ Lɔɔkɔ kɛnɛ, tokoka nsasangɛ Yehova má ntepela lá nkambo djɛnde l’osasa, la djedjɛ ole la ngandji. Winá w’oyalaso l’olemo w’ipoposanyɛ, tokote lá yimba ente okoma wɔso woleka djonyi nde nsepa anto te Yehova, ndakotshɛ́ dj’iwɔ nyɛna Papa kɛso kɛ ngandji etengo ɔwɛnaso. (Dja. 4:8) Tolekɔ l’osasa wɔ nyɛnyɛ anto wopo wɔ Bible otepelande djɛ Yehova, oposɛnde lá ntshandjawala ngandji, sii, balo la nkfulu kɛnde ole wekeka wande ankina wasepa anto le nde. Tongolumɛke la tongosasangɛke Yehova lonkina má nangha la wolo djɛ ndowokola. (Ɛfɛ. 5:1) Má nangha nghɔsɔ, tongoyatshikitanyɛ l’ase andja wa lopango wanɛ. Anto wakoka nyɛna ambɔ totshikitana lawɔ edjinge wakoka ndjopola lamo. (Mat. 5:14-16) Winá w’osawolaso lawɔ lofu la lofu, tokoka ndapakisola lamo onanghaso nghɔsɔ. Eposelo wengoyala nde, anto w’eloko wɔlɔ wangosukana te Ndjambe kɛso. Winá w’olumɛso Yehova lá topo tɔsɔ, tongosasangɛ oloko wɔnde.​—1 Ti. 2:3, 4.

TONGOSASANGƐKE YESO WINÁ W’OLUMƐSO DJIINA DJƐ YEHOVA

8. Wopo wɔkɔnge Yeso oyɛnde ndjɔmbɔmba kɛ wɔlɔ lá kɛnɛ kelendana la numɛ djiina djɛ Yehova?

⁸ Lako onto wɔ l’olongo kana wɔ lá looko, wewa Yehova wɔlɔwɔlɔ ndaka Yeso. (Mat. 11:27) Yeso angɔkɔpake Papa kɛnde edjinge atshikaka ndjɔmbɔmba kɛ wɔlɔ efula lá kɛnɛ kelendana la numɛ djiina djɛ Yehova. (Dj. 14:31) Lá lɔlɔmbɔ lɔ ndalɔmbɛ Papa kɛnde la lotsho lá ntondo kɛnde mvɔ, nde atepelaka lá kawosɛ akambo ankfumɔ wá nananghe l’olemo w’ipoposanyɛ lanɛ lá looko má etepela wɛnɛ: ‘Lemi ndjewanyɛka djiina djɛko.’ (Dj. 17:26) Wopo wɔkɔnge Yeso ndananghe nkambo djɛsɔ?

9. Ndjɔmbɔmba kɛkɔnge kekambisá la Yeso djɛ mpakisola papoo wopo wɔ Papa kɛnde oyɛnde?

⁹ Yeso ananghaka akambo efula ndeka ngo nshimela anto toko ante djiina djɛ Ndjambe nde Yehova. Ase Juda wa Yeso ndalakanyɛka wewaki djiina djɛ Ndjambe. Koko Yeso ndeke loyalisá onto wɔ ntondo ‘w’otopakisolisá wopo w’oyɛnde.’ (Dj. 1:17, 18) Ndjɔmbɔmba, Afunelo wa Hebero wɛnyɛ ambɔ Yehova alekɔ kanga nkɛtshi la kanga djadji. (Epo. 34:5-7) Yeso apakisolaka nkambo djɛ nsɔsɔlɔ djɛsɔ lá wopo wɔ papoo winá wɔ ndapakisolaka ndjɔmbɔmba kɛ wɔna w’ovungisá la isɛkɛnde. Winá w’owalaso nkambo djɛ papa ketangelisá wɔnande woyapɛlisá ‘winá wɔ ndayalaka ngo m’otale,’ alotaka djɛ ntopomana nya nde, ɔtɔka mpidji edjinge owimeyɛka lá kenfumɔ kɛ ndananghe, tosipisoyɛ wɔlɔwɔlɔ ente Yehova alekɔ kanga nkɛtshi la kanga djandji. (Luka 15:11-32) Yeso ɛnyɛka lá ntshandjawala wopo wolekɔ́ isɛkɛnde.

10. a) Wopo wɔkɔnge w’ewaso ente Yeso akambaka la djiina djɛ Papa kɛnde mɛlɛmɛlɛ la akombolaki anto ankina nangha wopo wɔkɔ ɔmɔ? (Marko 5:19) (Lenda edjinge ntshango.) b) Kɛkɔnge kɛ Yeso okombolande iso nangha lɔko kɛnɛ?

¹⁰ Yeso akombolaki lonkina djɛ anto ankina nkamba la djiina mɛlɛmɛlɛ dj’isɛkɛnde? Ee, ape l’ehamo. L’etsho wɛsɔ, ewandji ɛmɔtshi w’ɛtɛmwɛlɔ weyalaki l’eloko wɔlɔ wakokaki nkanela ambɔ djiina djɛ Ndjambe dekɔ ekina efula djɛ numola, koko Yeso atatshikaki  kaanga ndambo daambi tokanyi topalɔndɛ Afunelo tɔsɔ ndopekala djɛ nde numɛ djiina djɛ Papa kɛnde. Tokolenda mbala kɛmɔtshi kɛ ndaposɛ ɛdjɛngɛ me mpame kɛmɔtshi lá djeke djɛ Ngeraseni. Anto wa l’eteyi wokaka wɔma efula ko walɔmbaka Yeso djɛ nyima m’eteyi, ko nde atshɔka. (Mar. 5:16, 17) Koko, Yeso akombolaka djɛ djiina djɛ Ndjambe ndjewama l’eteyi. Djɛkondeke ndashimela mpame kesalisá djɛ ntoshimelá anto, ape kɛnɛ kɛ Yeso ndananghe, koko kɛ Yehova ndananghe. (Wala Marko 5:19.) a Nde nkombolaka tii lɔɔko kɛnɛ, iso ndjewanyɛ djiina dj’Isɛkɛnde l’andja w’otondo! (Mat. 24:14; 28:19, 20) Winá w’onanghaso nghɔsɔ, tongosasangɛke Nkfumi kɛso, Yeso.

11. Kɛkɔnge kɛ Yeso ndalakanyɛ ambeki wande dj’iwɔ ndɔmbɔka, ko lamo nkambo djɛsɔ oyɛwɔ djonyi? (Ezekiyɛlɛ. 36:23)

¹¹ Yeso ewaki ante ikanyi yɛ Yehova nde nkinyɛ djiina djɛnde, ndɔwɛdjɛ piyɔɔ má engolo enkfumɔ. L’ɔtɛ w’elonga kɛsɔ ndeke Owandji wɔso ndalakanyɛ ambeki wande dj’iwɔ ndɔmbaka nghɔnɛ: ‘Papa kɛso kɛ l’olongo, djiina djɛko ndjale ekina.’ (Mat. 6:9) Yeso asipisoyɛki ante ɔsɔ ndeke nkambo deka ekekete mpomana la ntongami nkfumɔ. (Wala Ezekiyɛlɛ 36:23.) Lako kaanga etongami kɛmɔ kɛ yimba kɛ l’olongo kana kɛ lá looko kembonangha akambo efula ndaka Yeso djɛ nkinyɛ djiina djɛ Yehova. Ya winá wɔ yavunde Yeso, antonyi wande yowande mpekanto kɛkɔnge? Wowandaka ambɔ atola Ndjambe! Yeso ewaki nsɔsɔlɔ ante ntonghanyɛ kana ndjila djiina djɛ isɛkɛnde mbindo, oyɛwɔnde mpekanto k’ekekete efula. Nde okaka yɛnyi efula lá wopo wɔ yowande nkambo djɛ nyɛtshi djɛsɔ. Ɔsɔ akokaka ndjala elonga kɛmɔtshi k’ekekete efula kɛ Yeso ndayale la ‘yɛnyi efula’ lá ntondo k’iwɔ ndovunda.​—Luka 22:41-44.

12. Wopo wɔkɔnge Yeso ndakinyɛ djiina dj’Isɛkɛnde lá lɛdji lokoka?

¹² Djɛ nkinyɛ djiina djɛ Papa kɛnde, Yeso akfulumeyɛka ndjolo, atoyi edjinge emamɔ. Nde ewaki ante alɛmɛyɛki Papa kɛnde lá akambo ankfumɔ, atayalaki kaanga la nkambo mɔ djɛ nde ndjoka nsɔnyi. (Heb. 12:2) Nde ewaki lonkina ante Satana ndeke l’onanyɛki  lá winá wɛ ndjolo wɛsɔ. (Luka 22:2-4; 23:33, 34) Satana ayalaki la eshikikelo ante angotshita nkɔmano djɛ Yeso, koko atalonga kaanga ndambo daambi! Ekomo ekomo Yeso ɛnyɛka ante Satana oyɛnde nde kanga ongolo, edjinge ante Yehova alekɔ l’enkambi wekindjɛ nama nkɔmano djɛwɔ, kaanga l’anteyi k’ekakasano wɛ nkekete!

13. Wopo wɔkɔnge w’okokɛ nsasangɛ Nkfumi kɛko kɛ lɔndjɛ?

¹³ Ongokombolake nsasangɛ Nkfumi kɛko kɛ lɔndjɛ? Kindjɛ numɛ djiina djɛ Yehova, kotshɛ́ anto ankina djɛ ndjewa wopo wɔ Ndjambe kɛso oyɛnde nsɔsɔlɔ. Winá w’onanghɛ nghɔsɔ, ɔlɔndɛ nde wina wa Yeso. (1 Pɛ. 2:21) Etengo Yeso, wɛ osasangɛ Yehova la ɛnyɛ ente ontonyi wɔnde Satana oyɛnde nde kanga ongolo!

ISO NKOTSHƐ́KÁ DJƐ MBIKƐ MBIKO WINÁ W’OLUMƐSO DJIINA DJƐ YEHOVA

14-15. Akambo wakɔnge wa wɔlɔ wakoka nanghema winá w’olakanyɛso anto akambo walendana la Yehova?

¹⁴ Winá w’olumɛso djiina djɛ Yehova, iso nkotshɛ́ká djɛ mbikɛ mbiko. Lá wopo wɔkɔnge? Satana ‘ambódjipá timba tɔ anto wapalekɔ́ andjawodji.’ (2 Kɔ. 4:4) Eposelo weyalaka nde, iwɔ wangawolake engolo wɛ Satana wɛnɛ: lako Ndjambe, Ndjambe ambowangɔ otale efula laso, apilaka anto yimba, Ndjambe alekɔ kanga lopango la angɛnyɛke anto wa nyɛtshi ndjolo lotshinda. Engolo wɛsɔ oyɛwɔ ngo djɛ ndjila djiina la lokumu lɔ Yehova mbindo, dj’ipa anto ndjala la mposɛ kɛ nsukana la nde. Koko olemo wɔso nde, ndjilela ikanyi yɛ Satana yɛsɔ onkeka. Tolakanyɛ anto nsɔsɔlɔ lá nkambo djɛ Papa kɛso, la tolumɛ djiina djɛnde dj’ekina. Eposelo wɛkɔnge w’owaso?

¹⁵ Akambo wa nsɔsɔlɔ w’Otepela wɔ Ndjambe walekɔ la nkfulu k’ekekete efula. Má ndjekɛ anto akambo walendana la Yehova la wopo w’oyɛnde nsɔsɔlɔ, tɔngɛnake akambo amɔtshi wa wɔlɔ efula. Mpɛlɔ dj’engolo djɛ Satana ndombodjipa anto, ngodjipɔke ndambo ndambo ko anto wasɔ wangowangake ndɔsa Papa kɛso kɛ ngandji etengo ɔwɔsaso. Wambolola kfu la wɔma tá nkfulu kɛnde k’ipa l’ekomo. (Iza. 40:26) Wamboyashikikɛ ambɔ sii kɛnde kelekɔ djɔ. (Mvu. 32:4) Wangɛnake osase má djana djɛnde dj’efula. (Iza. 55:9; Ɔrɔ. 11:33) La wangokembɛmake má ndjeka  ente nde alekɔ ngandji. (1 Dj. 4:8) Winá wɔ yotasukana la Yehova, ndeke nkongi djɛwɔ djɛ mbika lotshinda etengo wana wande yotetela nkoma nsɔsɔlɔ. Ɔsɔ alekɔ nsɔsɔlɔ mpeyi kɛ wɔlɔ efula kɛ nkotshɛ́ anto dj’iwɔ nsukana la Papa kɛso! Winá w’onanghaso nghɔsɔ, Yehova angɔtɔsa etengo ‘winande w’olemo.’​—1 Kɔ. 3:5, 9.

16. Wopo wɔkɔnge anto amɔtshi yavundama l’oloko winá wɔ yewe djiina djɛ Yehova? Pɛyɛ ndjɔmbɔmba.

¹⁶ Má bango tokoka ndakanyɛ anto ngo ente djiina djɛ Ndjambe nde Yehova. Etepela wɛsɔ toko nkoka ntshikitanyɛ lowiko l’onto w’oloko wɔlɔ. Ndjɔmbɔmba, wɔna omoto ɔmɔtshi wetawɔ Aaliyah b atafula ngo ngete Okristo. Ko nde atɛnaki djokanelo djɛ kɔɔ l’anteyɛ etolo kɛnde la Ndjambe. Kɛsɔ ketshikitanaka m’ɔkɔngɔ wɔ ndawange ndjeka Bible l’Ewakɛ. Nde awangaka nyɛna Ndjambe etengo Ilongo yɛnde. Edjinge akamɔka efula winá wɔ ndewe ante wambimɛ́ djiina djɛ Ndjambe má Bible efula ko wambɔpɛnyɛ la nkombo yɛ nkopo, ndjɔmbɔmba Nkfumi. Ndjeka djiina djɛ Yehova atshikitanyɛka lowiko lɔnde. Nde akamɔka ante: “Ntshende Ilongo yɛmi yɛ wɔlɔ alekɔ la djiina!” Eposelo wɛkɔnge weyalisá? Nde atepela ante: “Lambowa vu dj’efula l’oloko winá wɔsɔ. Lamboka wɔlɔ efula.” Mpame kɛmɔtshi k’ose Juda ketawɔ Steve ndayalaka nde ondjombe la alapɛyɛki efula lá nkfumbo djɛwɔ. Nde atakɔpaki kaanga ndjingela l’etolo kɛmɔ ladjikɛnde ɛnaki ante ntolo nkfumɔ dekɔ ngo dongi mpe. Koko, m’ɔkɔngɔ wɔ nyɔyi kɛ nyɛnghɛnde, mbala kɛmɔtshi nde awolaka ndjintasɛ ko ndjekameyɛ wekelo wɔ Bible w’Owakɛ wɔ Yehova ɔmɔtshi ndalɔndjɛka. Nde avundamaka efula l’oloko winá wɔ ndewe djiina djɛ Ndjambe. Nde atepela ante: “Ntokaka djiina djɛ Ndjambe ntondo.” Akfɛ ante: “Ɔsɔ alekɔ mbala kɛ ntondo kɛ moke ente Ndjambe alekɔ onto wɔ nsɔsɔlɔ! Ndɔwɔsaka ente oyɛnde nde Onto wɔ nsɔsɔlɔ. Makɔ, nyɛnaka ente lambowa Ilongo.”

17. Lamo nghɔmbɔsa nkano djɛ nkindjɛ numɛ djiina djɛ Yehova? (Lenda edjinge ntshango.)

¹⁷ Winá w’olakanyɛ la w’opoposanyɛ, ongotshanghanyɛke djiina dj’ekina djɛ Yehova le anto ankina? Ongakotshɛke dj’iwɔ nyɛna wopo wɔ Ndjambe kɛso oyɛnde nsɔsɔlɔ? Má nangha nghɔsɔ, olumɛnyo nde djiina djɛ Ndjambe. Nyontshɔ nyokindjɛ numɛ djiina dj’ekina djɛ Yehova má nkotshɛ́ anto djɛ ndjewa wopo w’Onto w’oyɛnde nsɔsɔlɔ. Lá wopo wɔsɔ, nyongowikɛ mbiko. Nyɔngɔlɔnda wina wa Nkfumi kɛnyo Yeso Kristo. Edjinge nkambo deka nde, nyongosasangɛ Papa kɛnyo kɛ ngandji, Yehova. Nyontshɔ ‘nyolumɛ djiina djɛnde lotshinda lotshinda’!​—Yee. 145:2.