1-2. Andi sa heepi u fuu ko fusutan unfa Jehovah ta fii, u di de mindi soni dëën?

 BOO taa wan sëmbë di i lobi mindi soni da i. I sabi taa di soni di a taki dë na wan tuutuu soni, ma tökuseei so sëmbë ta biibi ën. Ma na di dë nöö, dee sëmbë dë seei ta bigi paaja di mindimindi woto dë tu. Unfa i bi o fii? Wë ee i ta booko i hedi ku wotowan, söseei ee i ta booko i hedi ku di në di i abi, nöö di soni dë sa hati gaanfa seei. Na sö u?​—Nöng. 22:1.

² Di soni aki sa heepi u fuu fusutan unfa Jehovah bi fii di sëmbë bi poi hën në. Wan u dee ëngëli fëën bi konda mindimindi soni fëën da Eva, di fosu mujëë. Eva bi biibi di soni dë, nöö di soni dë bi mbei taa Adam ku Eva pasa Jehovah buka. Te u kaba fëën, hën hii libisëmbë ko abi zöndu ta dëdë (Ken. 3:1-6; Lom. 5:12). Di mindi di Saatan mindi soni da Jehovah a di djai u Eden, hën mbei dëdë, ku gaan feti, ku pena ko dë a goonliba. A ta hati Jehovah u di de mindi soni dëën u? Söseei a ta hati ën taa di soni dë tja fuka ko u? Wë Aai. Ma tökuseei Jehovah hati an ta boonu u nöömö, biga di Bëibel ta lei u taa hën da di Gadu di ta dë waiwai.​—1 Tim. 1:11.

3. Un gaandi u abi?

³ Useei abi di gaandi u du wan soni u lei taa Saatan ta mindi soni da Jehovah. U sa du di soni dë, te u ta du di soni di di Bëibel ta taki. A ta taki taa: „Un gafa di në u Jehovah” (Ps. 113:1). U ta gafa di në u Jehovah te u ta konda da woto sëmbë unfa Jehovah bunu tjika. Joo gafa di në u Jehovah tu ö? Boo buta  pakisei a dii soni di o heepi u fuu gafa di në u Jehovah ku hii u hati.

U TA MBEI JEHOVAH WAI KU U TE U TA GAFA DI NË FËËN

4. Faandi mbei Jehovah ta wai te u ta gafëën? Konda wan woto. (Luku di peentje tu.)

⁴ U ta mbei Jehovah wai ku u te u ta gafa di në fëën (Ps. 119:108). Di soni aki kë taki taa Jehovah dë kuma dee zöndu libisëmbë dee ta kë u sëmbë gafa de, u di de kë dë seiki taa wotowan kai de gaan soni ö? Wë nönö. Buta pakisei a di woto aki: Boo taa wan piki mujëë mii kule go baasa hën tata, hën a piki ën taa: „I da di möön bunu tata u hii di goonliba!” Di tata ta lafu, söseei a ta wai te a jei di soni di di mujëë mii fëën taki. Ma faandi mbei? U di a ta kë nömönömö u di mujëë mii fëën ku woto sëmbë musu ta gafëën faa sa fii bunu ö? Wë nönö. Ma a ta wai u di a ta si taa di mujëë mii fëën lobi ën, söseei taa a ta tei soni u bigi. A sabi tu taa di soni dë o heepi di mii faa ta dë waiwai te a ta göö ta ko. Wë sö nöö Jehovah, di möön bunu Tata, ta wai te u ta gafa di në fëën.

5. Un mindimindi soni u ta lei taa na tuu, te u ta gafa Jehovah?

⁵ Te u ta gafa di Tata fuu di dë a liba ala, nöö u ta lei tu taa di soni di Saatan taki fuu da mindimindi soni. Saatan bi taki taa na wan libisëmbë o hoi deseei a Jehovah u mbei di në u Jehovah ko limbo. Fuu taki ën, nöö a bi kë lei taa na wan fuu o hoi useei a Gadu go dou te fuka miti u. A bi taki tu taa hii u tuu o disa u dini Jehovah ee u ko ta si kuma woo abi wan möön bunu libi te u du di soni dë (Jöpu 1:9-11; 2:4). Ma Jöpu bi hoi hënseei a Jehovah, nöö a bi lei taa Saatan da wan mindisonima. Joo hoi iseei a Jehovah tu ö? Hiniwan fuu abi di okasi u lei taa u ta tei Jehovah së. U sa du di soni dë te u ta dini ën go dou ku hii u hati, sö taa a sa wai ku u (Nöng. 27:11). Wan gaandi seei u abi dë.

6. Unfa u sa djeesi Könu Dafiti ku dee Leifi sëmbë? (Nehemia 9:5)

⁶ Dee sëmbë dee lobi Gadu ta kë gafa di në fëën ku hii de hati. Könu Dafiti bi sikifi taa: „Be mi gafa Jehovah. Be hii soni di dë a mi dendu gafa di santa në fëën” (Ps. 103:1). Dafiti bi fusutan taa te u ta gafa di në u Jehovah, hën da u ta gafa Jehovah seei. Te u jei di në Jehovah, nöö u ta mëni un pei sëmbë a dë, u ta mëni hii dee bunu fasi dee a abi, ku dee foombo soni dee a ta du. Di në u Jehovah bi dë wan gaan santa soni da Dafiti, nöö a bi lö ’u gafa di në fëën. A bi ta du di soni dë ku hii hën hati. Sö nöö dee Leifi sëmbë bi ta tei fesi a di gafa di de bi ta gafa Jehovah. De bi sabi taa de an bi abi wöutu tjika u gafa di santa në u  Jehovah te dou. (Lesi Nehemia 9:5.) U sa dë seiki taa Jehovah bi ta wai gaanfa seei ku di fasi fa de bi ta gafëën.

7. Unfa u sa gafa Jehovah hiniwan daka, söseei te u ta du di peleikiwooko?

⁷ U sa mbei Jehovah wai ku u te u ta lei taa u dë ku tangi a hati, söseei te u ta lei unfa u lobi ën tjika. Di möön fanöudu soni di u kë hoi a pakisei te u ta peleiki, hën da u musu heepi sëmbë u de ku Jehovah ko dë mati, söseei u de ko ta si ën kumafa u ta si ën (Jak. 4:8). U ta wai seei u lei sëmbë andi di Bëibel ta taki u di lobi di Jehovah abi, u di du di a ta du soni a wan leti fasi, u di köni di a abi, söseei u di makiti di a abi. U ta wai tu u lei de soni u dee woto bunu fasi fëën. U ta gafa Jehovah tu te u ta mbei möiti u djeesi ën (Ef. 5:1). Te u ta du sö, nöö sëmbë o sa si taa wa dë kuma dee sëmbë u di hogi goonliba aki, nöö de o sa ta hakisi deseei ee unfa a waka (Mat. 5:14-16). Te u ku dee sëmbë aki ta fan, nöö u sa feni di okasi u konda da de faandi mbei u dë woto fasi. Nöö te u kaba fëën, dee sëmbë dee o kë ko sabi Jehovah tuutuu o kë ko dë mati fëën. Te u ta gafa Jehovah a dee lö fasi dë, nöö u ta mbei a wai gaanfa seei.​—1 Tim. 2:3, 4.

JESOSI TA WAI KU U TE U TA GAFA DI NË U JEHOVAH

8. Unfa Jesosi bi tei fesi a di gafa di u musu ta gafa di në u Jehovah?

⁸ Na wan u dee ëngëli a liba ala, söseei na wan libisëmbë a goonliba aki, sabi Jehovah möön Jesosi (Mat. 11:27). Jesosi lobi hën Tata, nöö a bi tei fesi a di gafa di u musu ta gafa di në fëën (Joh. 14:31). A di begi di a bi begi di ndeti ufö a dëdë, a bi taki u di möön fanöudu soni di a bi du di a bi ta du di diniwooko fëën a goonliba aki. A bi taki taa: „Mi mbei de ko sabi i në” (Joh. 17:26). Unfa a bi du di soni dë?

9. Un woto Jesosi bi konda, u mbei sëmbë ko fusutan unfa hën Tata dë tuutuu?

⁹ Na piki nöö Jesosi bi ta piki sëmbë taa di në u Gadu da Jehovah, ma a bi ta du möön soni seei. Dee Dju dee Jesosi bi ta peleiki da bi sabi di në u Gadu kaa. Ma Jesosi hën bi ’mbei sëmbë ko sabi hën Tata’ (Joh. 1:17, 18). Dee Hebelejën Buku u Bëibel ta lei u taa Jehovah da wan Gadu di abi tjalihati u sëmbë, nöö a lobi sëmbë tu (Ëki. 34:5-7). Jesosi bi mbei sëmbë ko fusutan di soni dë möön bunu, di a bi konda di woto u di womi mii di bi lasi, ku hën tata. Te u ta lesi di pisi ka di Bëibel ta taki taa di tata „tuwë wojo go te ala, hën a si” di womi mii fëën ta ko hën a hopo vu kule go kisi ën baasa, a bosi ën wai ku ën te a bigi, söseei a dëën paadon ku hii hën hati, nöö u ta möön fusutan di lobi ku di tjalihati di Jehovah abi da sëmbë (Luk. 15:11-32). Jesosi bi heepi sëmbë u de ko sabi unfa hën Tata dë tuutuu.

10. (a) Unfa u du sabi taa Jesosi bi ta kai hën Tata nëën në, söseei taa a bi kë u woto sëmbë du di soni dë tu? (Maikusi 5:19) (Luku di peentje tu.) (b) Andi Jesosi kë fuu du a di ten aki?

¹⁰ Jesosi bi kë taa woto sëmbë bi musu ta kai hën Tata nëën në u? Wë aai. A kan taa so hedima u keiki bi ta biibi taa an dë wan lesipeki soni u kai Gadu nëën në. Ma Jesosi an bi ta mbei dee lei dee an bi ta kai ku di Wöutu u Gadu tapëën fa gafa di në fëën Tata. Pakisei di woto ka a bi puu wan taku jeje a wan womi liba a di pisiwata u Galasëni. Dee sëmbë u di pisiwata dë bi ko fëëë seei, hën de hakisi ën faa go, nöö fëën mbei an bi fika dë (Maik. 5:16, 17). Ma tökuseei Jesosi bi kë u dee sëmbë fu ala ko sabi di në u Jehovah tu. Fëën mbei a bi piki di womi di a bi heepi taa a bi musu piki sëmbë taa na hën Jesosi hën bi mbei a ko  bunu baka, ma Jehovah hën bi mbei soni waka sö. (Lesi Maikusi 5:19.) a Di seei soni dë a kë fuu du tu. A kë fuu mbei sëmbë ko sabi di në fëën Tata a hii së u goonliba! (Mat. 24:14; 28:19, 20) Te u ta du di soni dë, nöö woo mbei Jesosi di Könu fuu, wai ku u.

11. Andi Jesosi bi lei dee bakama fëën u de ta begi da, nöö faandi mbei a dë fanöudu u de du di soni dë? (Ezekiëli 36:23)

¹¹ Jesosi bi sabi taa Jehovah o mbei di në fëën ko santa baka, sö taa sëmbë sa ko sabi taa hii dee mindimindi soni di de taki fëën na tuutuu soni. Fëën mbei Jesosi bi lei dee bakama fëën fu de begi taa: „U Tata di dë a liba ala, be di në fii ko santa e” (Mat. 6:9). Jesosi bi sabi tu taa di soni dë da di möön gaan soni di bi musu seeka. (Lesi Ezekiëli 36:23.) Na wan ëngëli, söseei na wan libisëmbë a mundu bi du soni kuma Jesosi, u mbei di në u Jehovah ko santa. Ma di dee felantima u Jesosi bi kisi ën, hën de bi mindi soni dëën taa a ta poi hën Tata në. Jesosi bi sabi taa di poi di wan sëmbë ta poi di santa në fëën Tata, da di möön gaan zöndu di wan sëmbë sa du. A bi ta hati ën gaanfa seei taa u di soni dë hedi mbei de bi o kisi ën, nöö de lesi sitaafu dëën. A kan taa di soni dë hën bi mbei „soni ko hebi” dëën gaanfa seei ufö de kisi ën.​—Luk. 22:41-44.

12. Na un apaiti fasi Jesosi bi mbei di në fëën Tata ko santa?

¹² U Jesosi bi sa mbei di në fëën Tata ko limbo, nöö a bi musu hoi dou di sëmbë bi ta du hogi ku ën, di de bi ta kosi ën, söseei di de bi ta mindi soni dëën. A bi sabi taa a bi piki hën Tata buka a hii soni, fëën mbei an bi ta sen (Heb. 12:2). A sabi tu taa Saatan hën bi ta du ku ën a di pisiten di soni bi ta taanga dëën (Luk. 22:2-4; 23:33, 34). Saatan bi kë u Jesosi an hoi hënseei a Jehovah möön, ma di soni dë an pasa! Jesosi bi lei taa Saatan da wan gaan mindisonima, söseei a bi lei taa Jehovah abi dinima jeti di ta hoi deseei nëën aluwasi fa soni ta taanga da de!

13. Unfa i sa mbei di Könu fuu di ta tii wai ku i?

¹³ I kë mbei di Könu fuu di ta tii wai ku i ö? Wë a bunu fii ta gafa di në u Jehovah nöömö, ta heepi woto sëmbë u de ko sabi unfa a dë tuutuu. Te i ta du dee soni dë, nöö a o dë u si taa i ta djeesi Jesosi tuutuu (1 Pet. 2:21). Nöö leti kuma Jesosi joo mbei Jehovah wai seei,  söseei joo lei taa Saatan, di felantima fëën, da wan gaan mindisonima!

U TA HEEPI SËMBË U DE FENI LIBI, TE U TA GAFA DI NË U JEHOVAH

14-15. Un foombo soni sa pasa te u ta lei sëmbë soni u Jehovah?

¹⁴ U ta heepi woto sëmbë u de feni libi, te u ta gafa di në u Jehovah. Unfa sö? U di Saatan ’poi di hati ku di pakisei’ u dee sëmbë dee an ta biibi (2 Kol. 4:4). Di soni dë mbei de ko ta biibi so u dee mindimindi woto u Saatan. Saatan ta mbei de ta biibi taa Gadu an dë, nasö taa Gadu dë te a longi, nöö an ta booko hën hedi ku libisëmbë. A ta mbei de ta biibi tu taa Gadu abi hogihati, nöö a ta sitaafu dee hogilibi sëmbë u teego. Saatan taki dee mindimindi soni aki u poi Jehovah në, sö taa sëmbë an kë ko dë mati fëën. Ma di peleikiwooko di u ta du, ta mbei taa Saatan an ta feni pasi u du di soni di a abi a pakisei. U ta lei sëmbë ambë di Tata fuu dë tuutuu, söseei u ta gafa di santa në fëën. Un wini di soni dë ta tja ko?

¹⁵ Di Wöutu u Gadu abi kaakiti gaanfa seei. Te u ta lei sëmbë soni u Jehovah Gadu, söseei te u ta heepi de u de ko sabi unfa a dë tuutuu, nöö wan foombo soni ta pasa. Wojo u dee sëmbë dee u ta lei soni ta ko limbo pikipiki, nöö de ta bigi si di Tata fuu kumafa u ta si ën. De ta foombo seei te de ko sabi unfa a abi makiti tjika (Jes. 40:26). De ta lei u futoou ën u di a ta du soni a wan leti fasi (Deto. 32:4). De ta lei sömëni soni u di fasi fa a köni tjika (Jes. 55:9; Lom. 11:33). Di sabi di de ta ko sabi taa hën da lobi, ta da de kötöhati (1 Joh. 4:8). Möön de ku Jehovah ta ko dë mati, möön de ta ko dë seiki taa de o ko dë mii fëën, söseei taa de o libi u teego. A dë wan gaan soni seei taa u sa heepi woto sëmbë u de ku Jehovah ko dë mati! Te u ta du di soni dë, nöö Jehovah ta si u kuma sëmbë di u ku ën ta „wooko makandi”.​—1 Kol. 3:5, 9.

16. Andi ta pasa te so sëmbë ko sabi Gadu në? Konda wan woto.

¹⁶ Di fosu soni di u sa du, hën da u sa lei sëmbë taa di në u Gadu da Jehovah. Di soni aki sa tooka di libi u wan sëmbë di kë ko sabi Gadu tuutuu. Boo buta pakisei a di woto u  wan mujëë de ta kai Aaliyah. b De kiija di mujëë aki a wan keiki di an ta biibi dee lei u Bëibel. Ma an bi kaba lobi di biibi ka a bi dë, söseei an bi ta fii taa hën ku Gadu bi dë mati. Ma di soni aki bi ko tooka di a bigi lei soni u Bëibel ku dee Jehovah Kotoigi. A bi bigi ko ta si Gadu kuma hën mati. A bi foombo seei di a ko sabi taa de puu di në u Gadu a sömëni Bëibel, hën de buta woto soni kuma Masa a de kamian. Di ko di a bi ko sabi di në u Jehovah bi tooka di libi fëën gaanfa seei. A bi taki taa: „Di gaan mati u mi abi wan në!” Andi bi pasa baka di dë? A bi ta taki taa: „Nöunöu mi ta fii bunu seei. Mi ta fii taa Gadu kai mi gaan soni.” Wan womi de kai Steve bi ta pëë poku, nöö a bi go fundu a di Dju biibi. An bi kë nama ku keiki soni möön, u di a bi ta si taa de bi ta du soni a wan bödjëë fasi. Ma baka di hën mama bi lasi libi, hën a bi da wan Jehovah Kotoigi pasi faa lei ën soni u Bëibel. Di sabi di a bi ko sabi di në u Gadu bi dou hën hati seei. A bi taki taa: „Noiti mi bi sabi taa Gadu abi wan në.” A bi taki tu taa: „A di ten dë ufö mi bi ko fusutan taa Gadu dë tuutuu! Mi bi ko ta si taa a dë wan tuutuu sëmbë. Fëën mbei mi bi sabi taa mi feni wan mati.”

17. Faandi mbei i dë kabakaba u ta gafa di në u Jehovah u nöömö? (Luku di peentje tu.)

¹⁷ I ta konda soni u di santa në u Jehovah da sëmbë, te i ta peleiki, ta lei de soni u Bëibel ö? I ta heepi de u de ko sabi unfa di Gadu fuu dë tuutuu ö? Te i ta du dee soni aki, nöö i ta lei taa i ta gafa di në u Gadu. Heepi sëmbë go dou u de ko sabi unfa Jehovah Gadu dë tuutuu. A sö wan fasi joo ta gafa di santa në fëën go dou. Te i ta du sö, nöö joo heepi sömëni sëmbë u de feni libi, söseei joo waka a di Könu fii Jesosi baka. Ma di möön gaan soni, hën da joo mbei Jehovah, di lobihati Tata fii, wai ku i. Mbei möiti fii ta ’gafa di në fëën hii ten, aai, u teego’!​—Ps. 145:2.