STUDIE-ARTIKEL 6
SINGI 10 Prèise Yehovah wi Gado!
„Prèise a nen fu Yehovah”
„Un futuboi fu Yehovah, un prèise en. Prèise a nen fu Yehovah.”—PS. 113:1.
SAN WI O LERI
Na artikel disi o poti prakseri na den reide di wi abi fu prèise a santa nen fu Yehovah na ibri okasi.
1-2. San kan yepi wi fu ferstan fa Yehovah e si den lei di sma ferteri fu en?
KOW taki dati wan sma di yu lobi taki ogri fu yu. Yu sabi taki a sani di a taki na wan lei, ma son sma e bribi en. San moro ogri, na taki den e bigin ferteri trawan a lei tu èn moro sma e bribi en. Fa yu ben o firi? Efu yu e broko yu ede nanga san trawan e denki fu yu, dan a lei dati ben o hati yu, a no so?—Odo 22:1.
2 Na eksempre disi kan yepi wi fu ferstan fa Yehovah ben e firi di sma pori a nen fu en. Wan fu den engel fu en ben ferteri Eva, a fosi uma, lei fu Yehovah. A lei dati meki taki Adam nanga Eva opo densrefi teige Yehovah. Na so ala libisma kisi sondu èn den e dede te fu kba (Gen. 3:1-6; Rom. 5:12). Ala den problema di wi e si na grontapu na ini a ten disi, soleki dede, feti, nanga pina, kon fu di Satan bigin ferteri lei na ini a dyari fu Eden. Yu denki taki den lei nanga den problema disi e hati Yehovah? Seiker! Ma tòg Yehovah no abi bita-ati. Na presi fu dati a e tan „a koloku Gado”.—1 Tim. 1:11.
3. San wi kan yepi fu du?
3 Wi kan yepi fu sori taki Satan lei gi Yehovah. Wi e du dati te wi e gi yesi na a komando disi: „Prèise a nen fu Yehovah” (Ps. 113:1). Wi e prèise a nen fu Yehovah te wi e ferteri trawan ala den bun sani fu en. Yu o prèise a nen fu Yehovah? Kow go luku dri prenspari reide di wi abi fu prèise a nen fu Gado nanga wi heri ati.
YEHOVAH E PRISIRI TE WI E PRÈISE EN NEN
4. Fu san ede Yehovah e prisiri te wi e prèise en nen? Gi wan eksempre. (Luku a prenki.)
4 Wi Papa na hemel e prisiri te wi e prèise en nen (Ps. 119:108). Ma disi wani taki dati na almakti Gado de leki sondu libisma di wani taki trawan prèise den so taki den kan firi bun? Nôno. Prakseri wan pkin meisje di e lon go na en papa, dan a e brasa en. A e taki: „Papa mi lobi yu!” A papa e lafu èn a breiti srefsrefi nanga a sani di en meisje taigi en. Fu san ede? Yu denki taki a abi a sani di a meisje taigi en fanowdu fu de seiker taki a de wan bun p’pa? Nôno. A breiti fu di a lobi en meisje èn a e prisiri taki a meisje sori lobi gi en. A sabi taki te a meisje kon bigi a o de koloku fu di a lobi tra sma èn fu di a abi warderi. Na den srefi sani disi e meki taki Yehovah, a moro bun Papa, e prisiri te wi e prèise en.
5. Te wi e prèise Yehovah, dan sortu lei wi e yepi fu tyari kon na krin?
5 Te wi e prèise wi Papa na hemel, dan wi e yepi fu tyari wan tra lei kon na krin di Satan ferteri fu ibriwan fu wi. Satan e taki dati nowan sma o opo taki gi Yehovah en nen. Nowan sma o tan gi yesi na Gado te a kisi tesi. A e taki dati wi alamala ben o drai baka gi Gado efu wi ben e denki taki dati ben o tyari wini kon gi wi (Yob 1:9-11; 2:4). Ma Yob tan gi yesi na Gado èn a sori taki Satan e lei. Fa a de nanga yu? Ibriwan fu wi abi a grani fu opo taki gi a nen fu wi Papa èn fu dini en na wan getrow fasi so taki a kan prisiri nanga wi (Odo 27:11). A sani disi na wan grani trutru.
6. Fa wi kan de leki Kownu David nanga den Leifisma? (Nehemia 9:5)
6 Den sma di lobi Yehovah wani prèise en nen nanga den heri ati. Kownu David ben skrifi: „Mi ati, yu musu prèise Yehovah. Iya, ala sani na ini mi musu prèise en santa nen” (Ps. 103:1). David ben sabi taki te wi e prèise a nen fu Yehovah, dan dati na a srefi leki te wi e gi grani na Yehovah. Te wi e yere a nen fu Yehovah, dan wi e prakseri a sma di a de, wi e prakseri ala den moi fasi fu en èn den moi sani di a du. David ben wani lespeki a santa nen fu en Papa èn a ben wani prèise a nen dati. A ben wani du dati nanga „ala sani na ini” en, noso nanga en heri ati. Den Leifisma ben abi a frantwortu tu fu prèise Yehovah. Den ben agri taki den sani di den ben e taki noiti ben kan gi nofo grani na a santa nen fu Yehovah. (Leisi Nehemia 9:5.) A no de fu taki dati Yehovah ben e prisiri srefsrefi te den Leifisma ben e prèise en na a fasi dati.
7. Fa wi kan prèise Yehovah na ini a preikiwroko èn na ini wi aladei libi?
7 Wi kan meki Yehovah prisiri tu na ini a ten disi. Wi e du dati te wi e taki fu en na wan fasi di e sori taki wi lobi en èn taki wi e warderi den sani di a e du gi wi. Te wi de na ini a preikiwroko, dan wi e hori na prakseri taki wi wani hari sma kon na Yehovah èn wi wani meki den kon lobi wi Papa, neleki fa wi e du dati (Yak. 4:8). Wi e prisiri srefsrefi fu sori sma san Bijbel e taki fu Yehovah, so taki den e kon si taki a abi lobi, retidu, koni, makti, nanga tra moi fasi. Wan tra fasi fa wi e prèise Yehovah, na te wi e du muiti fu de leki en (Ef. 5:1). Te wi e du dati, dan kande tra sma o si taki wi no de leki den sma na ini na ogri grontapu disi èn den kan aksi densrefi fu san ede dati de so (Mat. 5:14-16). Te wi e miti den sma disi na ini wi aladei libi, dan wi o man ferteri den fu san ede wi e tyari wisrefi tra fasi leki den. Disi kan meki taki ret’ati sma o wani kon sabi a Gado fu wi. Te wi e prèise Yehovah na den fasi disi, dan wi o meki a prisiri.—1 Tim. 2:3, 4.
YESUS E PRISIRI TE WI E PRÈISE YEHOVAH NEN
8. Fu san ede nowan sma prèise Yehovah moro leki Yesus?
8 Fu ala den sma na hemel èn na grontapu, nowan sma sabi a Papa moro bun leki en Manpkin (Mat. 11:27). Yesus lobi en Papa, èn a prèise a nen fu Yehovah moro leki iniwan tra sma (Yoh. 14:31). A neti fosi a dede a begi en Papa èn na ini a begi dati a taki san ben de a moro prenspari sani di a du na ini a diniwroko fu en na grontapu. A ben taki: „Mi meki den kon sabi yu nen” (Yoh. 17:26). Fa Yesus du dati?
9. Sortu agersitori Yesus gebroiki fu sori fa en Papa de?
9 Yesus no ben e ferteri sma nomo taki a nen fu Gado na Yehovah. Den Dyu di Yesus ben e gi leri ben sabi Gado nen kba. Ma Yesus ben de a moro bun sma di ben kan „meki wi kon sabi en” (Yoh. 1:17, 18). Fu eksempre, den Hebrew Buku fu Bijbel e sori taki Yehovah abi sar’ati nanga switifasi (Eks. 34:5-7). Yesus ben yepi sma fu kon ferstan dati moro bun di a ferteri na agersitori fu a lasi manpkin nanga en papa. Wi e leisi taki a boi di ben sori berow „ben de fara fu oso ete” di en papa si en. Toku a papa lon go miti en, a brasa en, èn a gi en pardon nanga en heri ati. A tori disi e yepi wi fu si krin taki Yehovah abi sar’ati nanga switifasi (Luk. 15:11-32). Yesus yepi sma fu ferstan fa Yehovah de trutru.
10. (a) Fa wi du sabi taki Yesus ben e gebroiki a nen fu en Papa èn taki a wani taki wi du a srefi? (Markus 5:19) (Luku a prenki.) (b) San Yesus wani taki wi du na ini a ten disi?
10 A de so taki Yesus ben wani taki trawan gebroiki a nen fu en Papa? Seiker. Son fayafaya kerki fesiman fu a ten dati kande ben e bribi taki a nen fu Gado santa tumsi fu sma gebroiki en. Ma Yesus noiti no meki den falsi gwenti dati tapu en fu gi en Papa nen grani. Prakseri a wan leisi di a puru wan ogri yeye na wan man tapu di a ben de na ini a kontren fu den Gerasasma. Den sma drape bigin frede èn den begi Yesus fu gwe libi a kontren fu den. Dati meki a gwe fu drape (Mark. 5:16, 17). Tòg Yesus ben wani taki den sma drape kon sabi a nen fu Yehovah. Dati meki a no taigi a man di ben kon betre baka fu go ferteri den sma san Yesus ben du, ma a taigi en fu go ferteri den san Yehovah ben du. (Leisi Markus 5:19.) a Na ini a ten disi, Yesus wani tu taki wi e meki sma na heri grontapu kon sabi a nen fu Yehovah! (Mat. 24:14; 28:19, 20) Te wi e du dati, dan wi e meki wi Kownu Yesus prisiri.
11. Fa Yesus leri den bakaman fu en fu begi, èn fu san ede dati prenspari, soleki fa Esekièl 36:23 e sori?
11 Yesus ben sabi taki Yehovah wani santa a nen fu en. Dati wani taki dati a wani tyari den lei kon na krin di sma ferteri fu en. Dati meki wi Masra Yesus leri den bakaman fu en fu begi na a fasi disi: „Wi Tata na hemel, meki yu nen de santa” (Mat. 6:9). Yesus ben e ferstan taki a sani disi prenspari gi ala sma na hemel èn na grontapu. (Leisi Esekièl 36:23.) Nowan enkri sma na hemel noso na grontapu santa a nen fu Yehovah moro leki Yesus. Ma di den feanti fu Yesus ben grabu en, dan sortu sondu den taki dati a du? Den taki dati a ben taki ogri fu Gado! Wi kan de seiker taki Yesus ben e si en leki wan fu moro bigi sondu te sma ben e wiswasi a santa nen fu en Papa. A ben e hati en srefsrefi taki sma ben e krutu en fu na ogri disi. Kande na fu dati ede sani ben „kon so hebi gi en” wan tu yuru fosi den grabu en.—Luk. 22:41-44.
12. Fa Yesus santa a nen fu en Papa ala di hebi tesi ben miti en?
12 Aladi sma pina Yesus, den kosi en, èn den ferteri lei fu en, toku a hordoro fu man santa a nen fu en Papa. A ben sabi taki a ben gi yesi na en Papa na ini ala sani èn taki a no ben abi fu syen gi noti (Hebr. 12:2). Di den tesi dati ben e miti en, a ben sabi tu taki na Satan ben meki den sani dati psa nanga en (Luk. 22:2-4; 23:33, 34). A de krin taki Satan ben howpu taki Yesus ben o trangayesi Gado, ma dati no psa kwetkweti. Yesus sori krin taki Satan na wan ogr’ati leiman. A sori tu taki Yehovah abi getrow futuboi di e tan gi yesi na en srefi te hebi tesi miti den.
13. Fa yu kan meki Yesus, a Kownu fu yu, prisiri?
13 Yu wani taki Yesus, a Kownu fu yu, e prisiri? Efu dati de so, dan tan prèise a nen fu Yehovah èn tan yepi trawan fu kon sabi ala den moi fasi fu a Gado fu wi. Te yu e du dati, dan yu e teki na eksempre fu Yesus (1 Petr. 2:21). Neleki Yesus, yu e meki Yehovah prisiri èn yu e sori taki a feanti fu en, Satan, na wan ogr’ati leiman.
WI E YEPI FU KIBRI SMA LIBI TE WI E PRÈISE YEHOVAH EN NEN
14-15. Sortu moi sani kan psa te wi e yepi sma fu kon sabi Yehovah?
14 Te wi e prèise a nen fu Yehovah, dan wi e yepi fu kibri sma libi. Fa so? We, Satan „breni a frustan fu den sma di no e bribi” (2 Kor. 4:4). Dati meki den e bribi lei soleki: Gado no de, Gado de tumsi fara fu wi, a no e broko en ede nanga libisma, Gado abi ogr’ati èn a e pina sma di du ogri fu ala ten. Satan e ferteri den lei disi fu di a wani pori a nen fu Yehovah so taki sma no o wan leri sabi en. Ma te wi e preiki, wi e tapu Satan fu du san a abi na prakseri. Wi e leri sma den tru tori fu wi Papa èn na so wi e prèise a santa nen fu wi Gado. San na a bakapisi?
15 Den tru tori na ini Gado Wortu abi furu krakti. Te wi e yepi sma fu kon sabi Yehovah èn fu kon sabi den fasi fu en, dan wi e si taki wan moi sani e psa. Den lei fu Satan no e kori sma moro èn now den e bigin si den moi fasi fu wi Papa. Den sma disi e kisi furu lespeki gi a bigi makti fu Yehovah (Yes. 40:26). Den e leri fu fertrow na en tapu fu di ala ten a e du san reti (Deut. 32:4). Den e leri so furu fu a bigi koni fu en (Yes. 55:9; Rom. 11:33). Boiti dati, a de wan trowstu gi den fu kon sabi taki Gado na lobi (1 Yoh. 4:8). Te den e tron mati fu Yehovah, dan dati e tranga a howpu di den abi fu libi fu têgo leki en pkin. A de wan bigi grani gi wi fu yepi sma fu tron mati fu a Papa fu den. Te wi e du dati, dan Yehovah e si wi leki sma di „e wroko makandra nanga” en.—1 Kor. 3:5, 9.
16. Te sma e leri sabi Gado nen, dan fa dati abi krakti na den tapu? Gi wan tu eksempre.
16 Na a bigin, a kan taki wi e leri sma nomo taki Gado nen na Yehovah. A sani dati w’wan kan abi bigi krakti kba tapu wan ret’ati sma. Fu eksempre, wan yongu uma di nen Aaliyah b ben kweki na ini wan bribi pe sma no e kisi leri fu Bijbel. Ma a no ben de tevrede nanga a bribi fu en èn a no ben e firi leki a ben sabi Gado. Ma di a bigin studeri nanga den Kotoigi, dan a sani dati kon kenki. A bigin si Gado leki en Mati. Èn a no ben man bribi taki sma ben puru Gado nen na ini furu Bijbel fu poti gewoon titel soleki ’Masra’ na ini a presi fu a nen dati. Di a kon sabi taki Gado nen na Yehovah, dan dati kenki en libi. A taki: „A beste Mati fu mi abi wan nen!” San ben de a bakapisi? A e taki: „Mi e firi so korostu now. Mi e si en leki wan grani taki mi sabi Gado nen.” Wan man di nen Steven ben de wan pokuman di ben kweki na ini a Dyu bribi pe sma ben e hori densrefi fayafaya na den leri fu den. A drai baka gi a bribi fu en fu di a ben e si fa sma ben e hoigri. Ma baka di en mama dede, a ben e sari èn a besroiti fu sdon arki di wan Kotoigi ben e studeri Bijbel nanga wan mati fu en. A naki en ati di a kon sabi a nen fu Gado. A e taki: „Noiti mi ben yere a nen fu Gado.” A e taki moro fara: „Now fosi mi ben e ferstan taki Gado na wan trutru Sma. Now mi ben sabi taki mi ben feni wan Mati.”
17. Fu san ede yu o tan prèise Yehovah en nen? (Luku a prenki.)
17 Te yu e preiki èn te yu e studeri Bijbel nanga sma, dan yu e meki den kon sabi a santa nen fu Yehovah? Yu e yepi den fu si fa Gado de trutru? Te yu e du dati, dan yu e prèise Gado nen. Wi e howpu taki yu e tan du dati èn taki yu e yepi sma fu kon sabi fa Gado de trutru. Na so yu o kibri sma libi èn yu o tan gi yesi na yu Kownu, Krestes Yesus. Ma san moro prenspari, na taki yu o meki yu lobi Papa, Yehovah, prisiri. Meki a de so taki yu e „prèise [En] nen fu ala ten”.—Ps. 145:2.
SAN YU BEN O PIKI?
-
Fa wi e meki Yehovah prisiri te wi e prèise Gado nen?
-
Fa wi e meki Krestes Yesus prisiri te wi e prèise Gado nen?
-
Fa wi e kibri sma libi te wi e prèise Gado nen?
SINGI 2 Yehovah na yu nen