1-2. Yini lengasisita sicondze kutsi Jehova utiva njani ngekunyundzelwa kwelibito lakhe?

 CABANGA nganaku: Ase sitsi umuntfu lomtsandzako ukhuluma kabi ngawe. Uyati kutsi unemanga; kodvwa labanye bayakwetsemba loku lakushoko. Lokubuhlungu kakhulu kutsi babese bayawasakata lamanga futsi labanyenti bayawetsemba. Ungativa njani? Nangabe unendzaba nebantfu nelidvumela lakho lelihle, siyaciniseka kutsi lokunyundzelwa kutakuvisa buhlungu.​—Taga 22:1.

² Lomfanekiso usisita sibone indlela Jehova lativa ngayo ngesikhatsi koniwa lidvumela lakhe. Lenye yemadvodzana akhe lengumoya yakhuluma emanga ngaye ku-Eva, umfati wekucala. Wawetsemba lamanga, futsi enta kutsi batali betfu bekucala bavukele Jehova. Ngenca yaloko, kwangena sono nekufa kubantfu. (Gen. 3:1-6; Rom. 5:12) Tonkhe tinkinga letikhona lamuhla emhlabeni, letifaka ekhatsi kufa, timphi nekuhlupheka tingumphumela wemanga lasakatwa nguSathane e-Edeni. Jehova kumvisa buhlungu yini lokunyundzelwa nemiphumela yako? Yebo kumvisa buhlungu. Kodvwa akahlali atfukutsele, ecinisweni uchubeka ‘anguNkulunkulu lojabulako.’​—1 Thim. 1:11.

3. Nguliphi litfuba lelihle lesinalo?

³ Sinelitfuba lelihle lekungcwelisa libito laJehova ngekutsi silalele umyalo lotsi: “Dvumisani libito laJehova.” (Hla. 113:1) Loko sikwenta ngekutsi sikhulume kahle ngaLoyo lomelelwa ngulelibito lelingcwele. Utamdvumisa yini wena? Nyalo ase sicoce  ngetintfo letintsatfu letitasisita kutsi sidvumise libito laNkulunkulu wetfu ngenhlitiyo yonkhe.

SIJABULISA JEHOVA NASIDVUMISA LIBITO LAKHE

4. Yini leyenta Jehova ajabule nasimdvumisa? Fanekisa. (Buka nesitfombe.)

⁴ Sijabulisa Babe wetfu wasezulwini nasidvumisa libito lakhe. (Hla. 119:108) Kodvwa loko kusho kutsi Nkulunkulu Somandla ufana nemuntfu lofuna kudvunyiswa ngenca yekutsi ufuna kucinisekiswa yini nobe ngenca yekutsi ufuna kukhutsatwa? Cha. Cabanga nganangu umfanekiso. Cabanga ngentfombatanyana legijima iye kubabe wayo ifike imbambe imutsi ngci, bese itsi: “Ngiyakutsandza babe!” Lobabe uyajabula futsi utsintseka inhlitiyo ngaloku lokwentiwa ngulomntfwana angakakugadzi. Kwentiwa yini? Kusho kutsi lobabe akativa yini akhululekile nakangakadvunyiswa ngulendvodzakati yakhe? Cha. Kungenca yekutsi uyayitsandza, futsi uyajabula nayimkhombisa kutsi iyamtsandza. Uyati kutsi loko kutayenta ihlale ijabulile njengobe ikhula. Ngendlela lefanako, Jehova longuBabe wetfu lophakeme uyajabula nasimdvumisa.

5. Nasidvumisa Jehova, ngumaphi emanga lesiwabeka ebaleni?

⁵ Nasidvumisa Babe wetfu wasezulwini, sisuke sikhombisa kutsi loko Sathane lakushoko ngatsi kungemanga. Sathane utsi kute umuntfu lotawumelela libito laNkulunkulu ngekwetsembeka. Utsi kute ngisho namunye emkhatsini wetfu locotfo. Uphindze atsi sonkhe sitamshiya Nkulunkulu nasibona ngatsi kukhona lesitakutfola ngekwenta njalo. (Jobe 1:9-11; 2:4) Kodvwa Jobe lebeketsembekile wakhombisa kutsi Sathane unemanga. Wena utawenta njani? Ngamunye wetfu unelitfuba lekumelela libito laBabe wetfu futsi simjabulise ngekutsi simkhonte ngekwetsembeka. (Taga 27:11) Lelo litfuba lelihle kakhulu!

6. Singayilingisa njani iNkhosi Davide kanye nemaLevi? (Nehemiya 9:5)

⁶ Kutsandza Nkulunkulu kwenta bantfu labetsembekile badvumise libito lakhe ngenhlitiyo yabo yonkhe. INkhosi Davide yabhala yatsi: “Shengatsi ngingamdvumisa Jehova; angidvumise libito lakhe lelingcwele ngayo yonkhe inhlitiyo yami.” (Hla. 103:1) Davide bekati kutsi kudvumisa libito laJehova kufana nekudvumisa yena matfupha. Libito laJehova lifaka ekhatsi lidvumela lakhe, ngako lisenta sicabange ngabo bonkhe buntfu bakhe lobuhle kanye netintfo letimangalisako latentile. Davide bekafuna kuphatsa libito laBabe wakhe njengalelingcwele futsi alidvumise. Loko bekafuna kukwenta “ngayo yonkhe inhlitiyo”  yakhe. Ngendlela lefanako, emaLevi bekahola ekudvumiseni Jehova. Asho ngekutfobeka kutsi emavi awo bekangeke aluvete kahle ludvumo lolufanele libito laJehova lelingcwele. (Fundza Nehemiya 9:5.) Siyaciniseka kutsi loko kwamjabulisa kakhulu Jehova.

7. Singamdvumisa njani Jehova nasishumayela nasekuphileni kwamalanga onkhe?

⁷ Lamuhla singamjabulisa Jehova ngekutsi sikhulume ngaye ngendlela lekhombisa kutsi simtsandza kakhulu futsi simhlonipha kakhulu. Nasenta umsebenti wekushumayela, sihlale sikhumbula kutsi umgomo wetfu kusita bantfu kutsi basondzelane naJehova futsi sibasite bative ngendlela lesitiva ngayo ngaBabe wetfu lesimtsandzako. (Jak. 4:8) Siyakujabulela kukhombisa bantfu indlela liBhayibheli lelimchaza ngayo Jehova, livete lutsandvo lwakhe, kulunga, kuhlakanipha, emandla kanye nalobunye buntfu bakhe lobuhle. Siphindze simdvumise futsi simjabulise nasenta konkhe lokusemandleni kuze simlingise. (Ef. 5:1) Nasenta njalo, siyehluka kulelive lelibi. Bantfu bangahle banake kutsi sehlukile futsi batibute kutsi kwentiwa yini loko. (Mat. 5:14-16) Njengobe sicoca nabo nobe ngukuphi, singabachazela kutsi kwentiwa yini kutsi sehluke. Ngenca yaloko, bantfu labacotfo bangasondzelana naNkulunkulu wetfu. Nasidvumisa Jehova ngaletindlela, sisuke sijabulisa inhlitiyo yakhe.​—1 Thim. 2:3, 4.

SIJABULISA JESU NASIDVUMISA LIBITO LAJEHOVA

8. Yini leyenta Jesu abe sibonelo lesihamba embili sekudvumisa libito laNkulunkulu?

⁸ Kuto tonkhe tidalwa letihlakaniphile ezulwini nasemhlabeni, kute ngisho sinye lesati Jehova kwendlula Jesu. (Mat. 11:27) Jesu uyamtsandza Babe wakhe, futsi uhamba embili ekudvumiseni libito lakhe. (Joh. 14:31) Emthantazweni lawusho ngebusuku lobungaphambi kwekufa kwakhe, wawuchaza ngalendlela umsebenti wakhe wekushumayela lamhlabeni: “Ngibafundzisile ngelibito lakho.” (Joh. 17:26) Bekasho kutsini?

9. Ngumuphi umfanekiso lowasetjentiswa nguJesu kuze achaze Babe wakhe ngendlela lecacile?

⁹ Jesu akagcinanga nje ngekutjela bantfu kutsi libito laNkulunkulu nguJehova. EmaJuda lebekawafundzisa bekalati ligama laNkulunkulu. Kodvwa wahamba embili ‘ekuwachazeleni kutsi ungubani.’ (Joh. 1:17, 18) Sibonelo nje, imiBhalo yesiHebheru itsi Jehova unesihawu neluvelo. (Eks. 34:5-7) Jesu walenta lacaca kakhulu leliciniso ngesikhatsi asho umfanekiso lomayelana nendvodzana leyahamba ekhaya. Nasifundza kutsi babe wayo “wayibona isesekhashane” lendvodzana yakhe lebeseyiphendvukile, wagijimela kuyo, wase utijika kuyo futsi wayicolela ngenhlitiyo yakhe yonkhe, loko kusenta sisibone kahle sihawu neluvelo lwaJehova. (Luk. 15:11-32) Jesu wamveta njengobe anjalo Babe wakhe.

10. (a) Sati njani kutsi Jesu walisebentisa libito laBabe wakhe nekutsi bekafuna labanye balisebentise? (Makho 5:19) (Buka nesitfombe.) (b) Yini Jesu lafuna siyente lamuhla?

¹⁰ Jesu bekafuna yini kutsi labanye basebentise ligama laBabe wakhe? Yebo. Kungenteka labanye baholi benkholo bangaleso sikhatsi bebakholelwa kutsi kubita ligama laNkulunkulu kukhombisa kungahloniphi, kodvwa Jesu akazange avumele lamasiko langakasekelwa emibhalweni amvimbele kutsi advumise libito laBabe wakhe. Cabanga ngalesikhatsi elapha lenye indvodza lebeyinemadimoni endzaweni yemaGerasa. Bantfu bakulendzawo besaba kakhulu futsi bamncenga kutsi ahambe, ngako Jesu wahamba. (Mak. 5:16, 17) Nobe kunjalo, bekafuna kutsi libito laNkulunkulu latiwe kulendzawo. Ngako watjela lendvodza lebekayelaphile  kutsi itjele bantfu ngaloko bekwentiwe nguJehova, hhayi loko bekwentiwe nguye. (Fundza Makho 5:19.) a Ufuna lokufanako nalamuhla, ufuna kutsi sente libito laBabe wakhe latiwe emhlabeni wonkhe! (Mat. 24:14; 28:19, 20) Nasenta njalo, sisuke sijabulisa Jesu loyiNkhosi yetfu.

11. Yini Jesu lafundzisa balandzeli bakhe kutsi bayithantazele, futsi loko kubaluleke ngani? (Hezekeli 36:23)

¹¹ Jesu bekati kutsi injongo yaJehova kungcwelisa libito lakhe, alihlante kuko konkhe kuhlantjalatwa. Kungako iNkhosi yetfu yafundzisa balandzeli bayo kutsi bathantaze batsi: “Babe wetfu losemazulwini, alingcweliswe libito lakho.” (Mat. 6:9) Jesu bekati kutsi lena yindzaba lebaluleke kakhulu letsintsa yonkhe indalo. (Fundza Hezekeli 36:23.) Kute ngisho nasinye sidalwa lesihlakaniphile ezulwini nobe emhlabeni lesilingcwelise ngelizinga leliphakeme libito laJehova kwendlula Jesu. Nobe kunjalo, ngesikhatsi aboshwa, nguliphi licala lamangalelwa ngalo? Kuhlambalata! KuJesu, kuhlanjalatwa nobe kunyundzelwa kwelibito laBabe wakhe lelingcwele bekusono lesibi kakhulu. Kwamphatsa kabi kakhulu kumangalelwa ngaloku. Kungenteka nguloko lokwamenta waba ‘lusizi kakhulu’ ngema-awa langaphambi kwekuboshwa kwakhe.​—Luk. 22:41-44.

12. Jesu walingcwelisa njani libito laBabe wakhe ngelizinga leliphakeme kakhulu?

¹² Kuze Jesu angcwelise libito laBabe wakhe, wabeketelela konkhe kuphatfwa kabi, kwetfukwa nekunyundzelwa. Bekati kutsi ulalele Babe wakhe kuto tonkhe tintfo; kute lebekangaba nemahloni ngako. (Heb. 12:2) Bekati nekutsi bekahlaselwa nguSathane ngalokucondzile ngaleso sikhatsi lesimatima. (Luk. 22:2-4; 23:33, 34) Sathane bekatimisele kwenta Jesu kutsi angetsembeki; kodvwa wakha phansi! Jesu wakhombisa kutsi Sathane ungumcambimanga lomubi nekutsi Jehova unato tikhonti takhe letetsembekile, letichubeka ticotfo kuye ngisho tibhekene netimo letimatima kakhulu!

13. Ungayijabulisa njani iNkhosi yakho lebusako?

¹³ Uyafuna yini kujabulisa iNkhosi yakho lebusako? Chubeka udvumisa libito laNkulunkulu, usite labanye kutsi bati liciniso ngaNkulunkulu wetfu. Nawenta njalo, ulingisa Jesu. (1 Phet. 2:21) NjengaJesu, wenta  Jehova kutsi ajabule futsi ukhombisa kutsi sitsa sakhe lesinguSathane sinemanga lamabi!

SISINDZISA KUPHILA NASIDVUMISA LIBITO LANKULUNKULU

14-15. Ngutiphi tintfo letingenteka nasifundzisa bantfu ngaJehova?

¹⁴ Nasidvumisa libito laNkulunkulu, sisindzisa kuphila. Njani? Sathane ‘uvale tingcondvo’ talabangakholwa. (2 Khor. 4:4) Ngenca yaloko, sebetsemba emanga aSathane lafana nalatsi: Nkulunkulu akekho, Nkulunkulu ukhashane futsi akanendzaba nebantfu, Nkulunkulu unelunya futsi ujezisa bantfu labangakalungi kuze kube phakadze. Sathane ukhuluma lamanga ngobe ufuna kona ligama laJehova lelihle futsi ente bantfu bangabi nesifiso sekusondzela kuye. Kodvwa umsebenti wetfu wekushumayela wenta kutsi ungafezeki lomgomo wakhe. Sifundzisa bantfu liciniso ngaBabe wetfu, sidvumise libito laNkulunkulu wetfu lelingcwele. Uba yini umphumela?

¹⁵ Liciniso leliseVini laNkulunkulu linemandla lamakhulu. Ngenca yekutsi sifundzisa bantfu ngaJehova nangebuntfu bakhe, sibona intfo lemangalisako. Bantfu babese bayabona kutsi Sathane unemanga futsi babese bacala kubona buntfu lobuhle baBabe wetfu. Abamangalisa kakhulu emandla akhe langapheli. (Isa. 40:26) Bafundza kumetsemba ngenca yekutsi ulunge ngelizinga leliphelele. (Dut. 32:4) Bafundza lokunyenti ekuhlakanipheni kwakhe lokukhulu. (Isa. 55:9; Rom. 11:33) Bayadvudvuteka nabafundza kutsi ulutsandvo. (1 Joh. 4:8) Njengobe basondzelana naJehova, litsemba labo lekuphila phakadze liba yintfo mbamba kubo. Sinelitfuba lelihle lekusita bantfu kutsi basondzelane naBabe wabo! Nasenta njalo, Jehova usitsatsa ‘njengetisebenti letikanye’ naye.​—1 Khor. 3:5, 9.

16. Uba yini umphumela kulabanye nabafundza ngelibito laNkulunkulu? Niketa tibonelo.

¹⁶ Sicale sifundzise bantfu kutsi libito laNkulunkulu nguJehova. Loko kungamtsintsa kakhulu umuntfu lonenhlitiyo lecotfo. Sibonelo nje, lomunye sisi lokutsiwa ngu-Aaliyah b wakhulela enkholweni lengasiyo yebuKhristu. Kodvwa bekangenetiseki enkholweni lebekakuyo  futsi bekangativa asondzelene naNkulunkulu. Loko kwashintja ngesikhatsi acala kudadisha liBhayibheli naboFakazi. Wacala kutsatsa Nkulunkulu njengeMngani wakhe. Wamangala kakhulu nakafundza kutsi libito laNkulunkulu lisusiwe emaBhayibhelini lamanyenti futsi kwafakwa ticu letinjengalesitsi Nkhosi esikhundleni salo. Kufundza ngelibito laNkulunkulu kwakushintja kuphila kwakhe. Utsi: “UMngani wami lomkhulu uneligama!” Waba yini umphumela? Utsi: “Senginekuthula kwangekhatsi. Ngitiva ngibalulekile.” Lenye indvodza lokutsiwa nguSteve beyingumhlabeleli futsi ikhulele enkholweni yebuJuda. Steve bekangasafuni kutihlanganisa nenkholo ngobe bekabone kutentisa lokunyenti. Kodvwa ngesikhatsi ashonelwe ngumake wakhe, wavuma kulalela ngesikhatsi labanye BoFakazi BaJehova badadisha liBhayibheli nalomunye umuntfu. Watsintseka kakhulu ngesikhatsi afundza ligama laNkulunkulu. Utsi: “Bengingazange sengifundze ngelibito laNkulunkulu.” Uchubeka utsi: “Bekukwekucala ngibona kutsi Nkulunkulu ukhona mbamba! Ngabona kutsi ungumuntfu mbamba. Bengati kutsi sengimtfolile umngani.”

17. Yini lekwenta utimisele kuchubeka udvumisa libito laJehova? (Buka nesitfombe.)

¹⁷ Nawushumayela futsi ufundzisa, uyabatjela yini bantfu ngelibito laNkulunkulu lelingcwele? Uyabasita yini babone kutsi Nkulunkulu unabuphi buntfu? Nawenta njalo, udvumisa libito laNkulunkulu. Shengatsi ungachubeka udvumisa libito laNkulunkulu ngekutsi usite bantfu bamati loyo lobitwa ngalelibito lelingcwele. Nawenta njalo, utawusindzisa kuphila kwebantfu. Utawulingisa iNkhosi yakho lenguKhristu Jesu. Ngetulu kwako konkhe, utawujabulisa Babe wakho lokutsandzako, lokunguJehova. Shengatsi ‘ungadvumisa libito lakhe kuze kube phakadze’!​—Hla. 145:2.