1, 2. ¿Piri ejemplo tamó iʼwiri machiyá japi chu nili Jeobá echi ikaléwami namuti japi aniwá echi jitra?

 NATÁ japi bilé japi mi we galé aní chati namuti mi jitra. Mujé ko machí japi ke bichíwali ju, nalí jaré ko a bichiwi alí echi ayénachó ma echi jitra raʼicha alí miná ko ma chijáachi echi raʼíchali ke bichíwali. ¿Chumi nílimili? Ami we natámiré japi echi pagótami ke aʼlá natama mujé jitra alí mi we omona nílima, ¿kecha? (Prov. 22:1).

² Na ejemplo tamó iʼwiri aʼlá machiyá japi chu nílili Jeobá japalí bilé echi kúchuwala ikaleka raʼíchili alí isili japi jarecho cha riká natama echi jitra. Eva ko bichíwili japi anili Satanás, jiti la echi alí Adán ma ke nijéwili Jeobá. Echi jitra sinéami echi pagótami cha nokáami ju alí miná ko suwí (Gén. 3:1-6; Rom. 5:12). Echoná Edén Satanás ko chijáchili echi raʼíchali ke bichíwali alí echi isili japi nirúlima wiká chati namuti jenaʼí Wichimóbachi, japi riká sinéami ta suwí, nirú nakówami alí ta risoa nilia piré. Jeobá ko we omona nili jiti Satanás ikaleka raʼíchili alí suwaba echi chati namuti japi echi jitra ikí. Nalí echi namuti ke isili japi Jeobá iyoka ripima alí echi namuti bi jitra natama. Echoná Biblia aní japi Jeobá ko ju bilé Onorúami we kaníliami (1 Tim. 1:11, TNM).

3. ¿Piri namuti we natéami ta omeri nokayá?

³ Ata omeri iʼwiria jiti ke cha riká raʼichárami nima echi Jeobá riwalá jitra. ¿Chúriká? Nijewia jepuná nulalíwami: “Walubéala anesi echi Jeobá riwalá” (Sal. 113:1). Alí, ¿chúriká nokiboa? We aʼlá raʼíchika echi jitra japi too echi riwalá japi we natéami ju. ¿Ami inili echi riká isínalia? Ma  inepo bikiá namuti japi tamó iʼwírima jiti walubéala anepo echi Jeobá riwalá ne sulachí jonsa.

ATI KANÍLITI JEOBÁ

4. ¿Chúsiá Jeobá we kanili japalí ti walubéala ané? Ruyé bilé ejemplo (ayénachó iné echi foto).

⁴ Jeobá ju tamujé Onolá alí echi ko we kanili japi ta walubéala anepo echi riwalá (Sal. 119:108). ¿Achi aniwáami ju jepuná japi echi Onorúami we jiwérami, ju japi riká echi pagótami japi newalé japi walubéala anérami nima jiti simá nílima o natéami ka nílima? Ke tasi. Jiti aʼlá inámipo, natabo bilé taa tiwé jitra japi muliwi echi onolá, jiwérika mutú alí jéané: “¡We mi aʼláala onó ju!”. Echi onolá ko wabé kanili jiti echi taa tiwé echi riká anili ne sulachí jonsa. Echi ko we kanili inea japi echi taa tiwé simá isimí echi yúa, alí ke ju jiti echi onolá newalé japi echi riká isima jiti wabé natéami ka nílima. Ayénachó machí japi echi riká isiá iʼwírima jiti echi taa tiwé we kaníliami nima japalí ochérisa. Echi riká cho, Jeobá japi wabé aʼláala Onolá ju, we kanili japalí tamujé walubéala niraa ané echi.

5. ¿Piri ta néwariwéliti japalí ta walubéala ané Jeobá?

⁵ Satanás ayénachó cha riká raʼíchili tamujé jitra. Echi ko aní japi ke bilé pagótami nijéwima Jeobá alí ke cho nimima echi Onorúami riwalá japalí risoa olárami nisa. Ayénachó aní japi sinéami riwepo Jeobá ata mayésaká japi aʼlá ikiboa echi riká ti nokisáaká (Job 1:9-11; 2:4). Nalí Job japi nijéwami nili, néwariwélitili japi Satanás ikaléami ju. Alí tamujé, ¿piri néwariwélitipo? Japalí ta walubéala ané Jeobá, a ta néwariwéliti japi Satanás ikaléami ju. Ibili tamujé, ati we natéami niraa iné nimía echi Jeobá riwalá alí kanílitia echi, japalí ta nijéwami ju (Prov. 27:11).

6. ¿Chúriká nokiboa japi riká echi silíami David alí echi levitas? (Nehemías 9:5).

⁶ Japi we galé Onorúami, we inili walubéala anea echi riwalá ne sulachí jonsa. Echi silíami David osali: “Ani walubéala anénali Jeobá; japi suwaba japi riká nijé ju pachana walubéala anema echi riwalá japi santo ju” (Sal. 103:1). David ko aʼlá machiyé japi walubéala anea echi Jeobá riwalá, chopi iyiri ju walubéala anea Jeobá. Japalí ta kipú echi riwalá jitra a ti nata japi chúriká ju echi, japi we baʼóami namuti niwali alí japi we simá isíami ju. David ko walubéala anénalie echi Onolá riwalá alí néea japi riká santo. Anili japi echi riká isínilie suwaba japi riká ju binoy  pachana, ne sulachí jonsa. Echi levitas ayénachó echi riká nokali alí walubéala aneli Jeobá. Anijoli japi suwaba echi raʼíchali ke tasi sébali omérima aniyá japi echi Onorúami riwalá walubéala ju (leeri Nehemías 9:5). ¡Jeobá ko we kaníliliré japalí kipuli japi echi levitas we simárika raʼíchili echi jitra!

7. ¿Chúriká ti walubéala anepo Jeobá japalí ti nawisasia simía alí japi ta noká sinibí rawé?

⁷ Tamujé ayénachó walubéala anepo Jeobá japalí ti simárika raʼicha echi jitra alí ti matétara iyá. Japalí ta nawisasia simía tamujé ko nakí japi echi pagótami mulíwinalima Jeobá alí we galema japi riká tamujé (Sant. 4:8). We ti kanili ruyea echi Biblia jitra japi Jeobá we simá isíami ju, japi riká echi ko we tamó galé, wachíniga isíami ju, we machíami alí we jiwérami. Bilecho namuti japi ta oméripo nokayá jiti walubéala anepo Jeobá ko ju, ata iʼwérili nokisáré niya japi riká echi (Efes. 5:1).Echi riká ta nokisáaká, echi pagótami inémiré japi ta ke ju japi riká jarecho, alí nárika nokiméeré chúsiá ta echi riká ju (Mat. 5:14-16). Alí miná ko a keʼré japi ta a oméripo ruyea echi namuti jitra. Alí pe aminana echi pagótami japi aʼláala ju mulíwinalima Jeobá. Japalí ti noká suwaba echi namuti, ati kanílitipo Jeobá sulala (1 Tim. 2:3, 4).

ATI KANÍLITI JESÚS

8. ¿Chúsiá ti aní japi Jesús we aʼlá tamó binérili japi chúriká walubéala anepo Jeobá riwalá?

⁸ Ke wesi nirú japi we aʼlá machí echi onolá japi riká echi Jesús (Mat. 11:27). Jesús ko we galé echi Onolá alí we aʼlá tamó binérili chúriká nokiboa jiti walubéala anepo echi Jeobá riwalá (Juan 14:31). Kecho bijí mukuyá echi ko raʼíchili echi Onolá yúa alí kuabi niraa anili suwaba echi namuti japi isili: “Nijé ko machírtili mujé riwalá” (Juan 17:26, TNM). ¿Chúriká isili?

9. ¿Piri historia anili Jesús tamó ruyemia japi chúriká ju Jeobá?

⁹ Jesús ke bi aneli echi pagótami japi Jeobá ju echi Onorúami riwalá, jiti echi judíos ma aʼlá machili. Echi ko ruyeli chúriká ju Jeobá (Juan 1:17, 18). Japi riká, echoná Oserúami Hebreas ma aniyé japi Jeobá we simá isíami ju alí natimáami (Éx. 34:5-7). Nalí jiti echi pagótami aʼlá inámima echi namuti, Jesús ko anili bilé historia bilé remalí jitra japi kárika suwábili echi onolá níwala winomí. Nalí japalí echi towí ku nawali alí echi onolá riwali, sapú echi yúa simili, mutuli alí ne sulachí jonsa wikáwili. Jepuná jitra ata biné japi Jeobá we natimáami ju alí wikáwiami (Luc. 15:11-32). A ta aʼlá machí japi Jesús ko sinibí iʼwírili echi pagótami jiti machimea chúriká ju Jeobá.

10. a) ¿Chúriká ta machí japi Jesús néeli echi Onolá riwalá alí japi nakiyé japi jarecho echi riká nokimea? (Marcos 5:19, TNM; ayénachó iné echi dibujo). b) ¿Piri nakí Jesús japi tamujé nokiboa?

¹⁰ ¿Achi nakiyé Jesús japi jarecho néema echi Onolá riwalá? Ayena. Nalí jaré weli binériami mayeli japi echi Onorúami riwalá wabé santo ju, jiti la ke néesaré. Nalí be Jesús ko ke riweli japi echi namuti isima japi walubéala anema echi Onolá riwalá. Siné kaachi Jesús ko iʼwírili bilé rijoi geraseno japi olali wiká demonios. Echi pagótami we majali jiti la aneli Jesús japi ku simea echoná jonsa (Mar. 5:16, 17). Nalí, echi ko nakiyé japi sinéami pagótami machimea echi Onorúami riwalá. Jiti la kecho bijí simiyá, nuleli echi rijoi japi ruyésaré echi pagótami  japi Jeobá isili echi jitra, ke ko japi echi isili (leeri Marcos 5:19, TNM). a Jesús japi tamujé silíamiwala ju, nakí japi tamujé echi riká cho nokiboa, japi binéripo sinéami pagótami echi Jeobá riwalá jitra (Mat. 24:14; 28:19, 20). Japalí ti echi riká noká, ati kaníliti Jesús.

11. ¿Piri binérili Jesús echi najátowala japi raʼichama Onorúami yúa, alí chúsiá we natéami ju? (Ezequiel 36:23).

¹¹ Jesús ko aʼlá machili japi Jeobá ko nakí japi ma ke cha riká raʼichárami nima echi riwalá jitra. Jiti la binérili echi najátowala japi jériká raʼichama Onorúami yúa: “Tamujé Onolá japi mi ripá rewegachi atí, kiti riwé japi echi pagótami cha riká raʼichama mujé riwalá jitra” (Mat. 6:9, TNM). Jesús ko we aʼlá machili japi ke nirú bilecho namuti wabé natéami japi riká echi (leeri Ezequiel 36:23). Alí ke tasi nirú bilecho japi wiká namuti isili japi riká Jesús jiti ma ke cha riká raʼichárami nima echi Jeobá riwalá jitra. Tákoré echi riká isili, japalí echi sayérala chapili Jesús, anili japi echi cha riká raʼíchili echi Onolá riwalá jitra. Nalí Jesús jitra, echi ko nili bilé namuti we chati japi bilé isima. Alí japalí kecho bijí chapirúami nili, echi ko ma we risoa nílili jiti machili japi winijírami nima jiti jarecho animea riweili japi cha riká raʼíchili echi Onorúami riwalá jitra. Echi jitra Jesús wabé risoa níliliré echalí (Luc. 22:41-44).

12. ¿Piri isili Jesús jiti ke cha riká raʼichárami nima echi Onorúami riwalá jitra?

¹² Jiti ke cha riká raʼichárami nima echi Onorúami riwalá jitra, Jesús ko anáchili japi risoa olárami nima alí ikaleka raʼichárami nima echi jitra. Echi ko we aʼlá machili japi we nijéwami nili alí japi ke chati namuti isili japi jitra riwélima (Heb. 12:2). Ayénachó we aʼlá machili japi Satanás iyiri nili japi echi risoa nílima (Luc. 22:2-4; 23:33, 34). Echi Diablo ko nakili japi Jesús riwema nijewia Jeobá, ¡nalí ke oméali! Jesús ko néwariwélitili japi Satanás ikaléami ju alí japi a nirú pagótami japi we nijéwami ju Jeobá, tákoré ikiyé wiká chati namuti.

13. ¿Piri ta nokisáré jiti kanílitipo tamujé Silíamiwala Jesucristo?

 ¹³ Ami kanílitinalaká echi Silíami Jesucristo, aminabi iʼwérili isí walubéala anea echi Jeobá riwalá alí iʼwiria jarecho jiti machimea japi chúriká ju echi. Echi riká mi isísaká, ami isima japi riká Jesús isili (1 Ped. 2:21, TNM). Alí ayénachó japi riká Jesús, mujé ko isima japi Jeobá we kanílima alí mi néwariwélitima japi echi sayérala Satanás we ikaléami ju.

ATA IʼWIRI JITI JARECHO NIYÚBITAMI NIMA

14, 15. ¿Piri ikí japalí ti bineri echi pagótami echi bichíwali Jeobá jitra?

¹⁴ Japalí ti walubéala ané echi Jeobá riwalá, ata iʼwiri jarecho jiti niyúbitami nima. ¿Chúsiá? Jiti Satanás isimí japi echi pagótami ke machimea echi bichíwali Onorúami jitra (2 Cor. 4:4). Jiti la, wiká pagótami nata japi Onorúami ke bité, japi ta ke oméripo muliwia echi yúa, japi ta ke natéami ju echi jitra, japi we chati ju alí japi sinibí risoa olá echi chati pagótami echoná naʼírili. Nalí suwaba echi namuti ke bichíwali ju alí isimí japi echi pagótami cha riká raʼichama echi Onorúami riwalá jitra alí japi ke bilé mulíwinalima echi. Nalí be, japalí ti simía nawisasia alí ti bineri echi bichíwali Onorúami jitra, ke ti riwé japi echi Satanás isima japi echi nakí alí ti walubéala ané echi Jeobá riwalá. Alí, ¿piri jarecho namuti ikí?

¹⁵ Japi aní echi Biblia we aʼlá iʼwiri echi pagótami. ¿Chúsiá? Jiti japalí ti bineri Jeobá jitra alí japi chúriká ju echi, echi pagótami ma ke bichiwi echi ikaléwami namuti japi aniwá echi jitra alí chotásimi inea Onorúami japi riká tamujé. Japi riká, echi ko biné japi Onorúami wabé jiwérami ju (Is. 40:26). Ayénachó ma ke majawá jiti biné japi Onorúami wachíniga isíami ju (Deut. 32:4). Alí japi wabé machíami ju (Is. 55:9; Rom. 11:33). We kanili machiyá japi Onorúami we galéami ju (1 Juan 4:8). Alí japalí aminabi biné Jeobá jitra, we bichiwi japi omérima sinibí pirea alí japi omérima niya echi kúchuwala. ¿Kechi ko ti we natéami niraa iné iʼwiria echi pagótami jiti mulíwima tamujé  Onolá Jeobá? Alí, japalí ti echi riká noká, Jeobá ko tamujé iné japi riká echi níwala “nóchami” japi echi iʼwiri (1 Cor. 3:5, 9).

16. ¿Piri ikí japalí bilé biné echi Onorúami riwalá? Aní bilé ejemplo.

¹⁶ Japalí ti raʼicha echi pagótami yúa Onorúami jitra, a keʼré japi ta ne kulí ko bi ruyé echi riwalá. Alí a bichíwali ju japi echi pagótami aʼlá suléami nísaká, echi bi machiyá iʼwírima jiti sinúrika ku bitélima. Japi riká, bilé tiwé Alía b riwéami, ochérili japoná echi téemala olayé bilé religión japi ke cristiana ju. Nalí echi ko ke kanila biteili echi namuti jitra japi binéritami nili alí ke mulipi ka nílili Onorúami yúa. Nalí japalí chotásili binea echi Biblia echi testigo Jeobá yúa, ma ke echi riká nili. Japalí machili japi wiká Biblias ke olali echi Onorúami riwalá, ke mayeli japi nalí oserúami chukumea echi raʼíchali Señor. Jiti la, japalí ma bineli echi Onorúami riwalá, echi ko chotásili inea japi riká echi amígowala. We kanila echi ko jéanili: “¡Nijé amígowala a olá riwalá!”. Ayénachó echi ko jéaní: “We ni kanili echi jitra. Jipi ko we ni kilí niraa bité”. Steve ko nili bilé siméami japi ochérili japoná echi téemala judíos we natéami niraa ineli japi bichíwili. Jiti echi ko ineli japi wiká pagótami ke nokayé japi riká biné Onorúami jitra, echi ko anili japi ma ke bilé religión bichíwima. Nalí be, japalí echi iyela mukuli, echi ko a nijéwili japalí bayeri jiti asimea kipumia japi binerie bilé testigo Jeobá. Echi ko bineli echi Onorúami riwalá alí we kanílili. Echi ko jéaní: “Ke ni machiyé chu iyiri ju echi Onorúami riwalá”. Alí jéanili: “Ani bineki japi Onorúami a ne bichíwali bité. Echalí ni machiki japi ni riwali bilé amigo”.

17. ¿Chúsiá mi aminabi walubéala anénali Jeobá riwalá? (Ayénachó iné echi foto).

¹⁷ Japalí ti nawesa o japalí ti bineri echi pagótami, ¿achi ti ané chu iyiri ju echi Onorúami riwalá alí japi chúriká ju echi? Echi riká ti nokisáaká, ati walubéala anepo echi riwalá. Jiti la, aminabi iʼwérili nokiboa ruyea jarecho japi chúriká ju Jeobá alí echi riká ati walubéala anepo echi riwalá japi santo ju. Echi riká ti nokisáaká, ati iʼwíripo jiti jarecho ayénachó niyúbima, ata nokiboa japi riká isili echi Silíami Jesucristo, nalí wabé natéami ko ju, japi ta we kanílitipo tamujé Onolá Jeobá japi we simá isíami ju. Alí japi riká echi osáami japi osali Salmo 145:2, sinéami tamujé jériká aniboa: “Ani sinibimti walubéala anema mujé riwalá”.