1-2. Ezemplu saida mak bele ajuda ita komprende Jeová nia sentimentu bainhira Satanás koʼalia lia-bosok kona-ba nia?

 IMAJINA toʼok: Ema ida neʼebé Ita hadomi koʼalia aat kona-ba Ita. Ita hatene katak buat neʼebé nia koʼalia mak la loos, maibé ema balu fiar ba ida-neʼe. Aat liután mak sira balu fahe tutan lia-bosok neʼe, no ema seluk mós fiar. Ita sente oinsá? Se Ita hanoin kona-ba ema seluk no Ita-nia reputasaun diʼak, neʼe sei halo Ita laran-triste duni, loos ka lae?—Prov 22:1.

² Ezemplu neʼe ajuda ita komprende Jeová nia sentimentu bainhira anju ida hafoʼer ninia naran hodi koʼalia lia-bosok ba feto primeiru Eva. Feto neʼe fiar lia-bosok neʼe. Lia-bosok neʼe halo Adão no Eva kontra Jeová. No rezultadu mak sala no mate kona ema hotu. (Gén 3:​1-6; Rom 5:12) Problema hotu neʼebé iha mundu neʼe, inklui mate, funu, no triste akontese tanba lia-bosok neʼebé Satanás hahú habelar iha jardín Eden. Lia-bosok no rezultadu aat neʼebé mosu halo Jeová laran-kanek duni. Maibé Jeová la rai odi, tuir loloos nia mak “Maromak neʼebé kontente”.—1 Tim 1:11.

3. Ita iha priviléjiu saida?

³ Ita iha priviléjiu atu halo santu Jeová nia naran hodi halo tuir ninia matadalan simples: “Hahiʼi Jeová nia naran.” (Sal 113:1) Ita hahiʼi Jeová nia naran bainhira ita koʼalia ba ema seluk kona-ba Jeová nia hahalok diʼak. Ita halo nuneʼe ka lae? Mai ita haree pontu tolu neʼebé bele book ita atu hahiʼi Maromak nia naran ho ita-nia laran tomak.

JEOVÁ KONTENTE KUANDU ITA HAHIʼI NINIA NARAN

4. Tanbasá Jeová kontente bainhira ita hahiʼi nia? Fó toʼok ilustrasaun. (Haree mós foto.)

⁴ Ita halo ita-nia Aman iha lalehan kontente bainhira  ita hahiʼi ninia naran. (Sal 119:108) Maibé neʼe la dehan katak Maromak kbiit boot liu hotu mak hanesan ema la perfeitu neʼebé hakarak ema seluk hahiʼi sira tanba la fiar an. Imajina toʼok ilustrasaun tuirmai. Labarik-feto ida halai ba hakoʼak ninia aman hodi hatete: “Apá mak aman neʼebé diʼak liu iha mundu neʼe!” Aman neʼe oin-midar no kontente tebes. Tanbasá? Laʼós tanba aman neʼe la fiar an no hakarak hetan gaba ka anima husi ninia oan. Maibé tanba nia hadomi ninia oan no kontente hodi haree ninia oan hatudu domin no hafolin nia. Nia hatene katak hahalok hanesan neʼe sei ajuda ninia oan atu moris ho kontente kuandu nia boot. Nuneʼe mós ho Jeová ita-nia Aman iha lalehan, nia sente kontente bainhira ita hahiʼi nia.

5. Bainhira ita fó hahiʼi ba Jeová ita fó prova katak Satanás bosok kona-ba saida?

⁵ Bainhira ita hahiʼi ita-nia Aman iha lalehan, ita prova katak lia-bosok seluk tan neʼebé Satanás koʼalia kona-ba ita ida-idak mak la loos. Satanás duun katak sei la iha ema ida mak laran-metin hodi defende Maromak nia naran. No katak ita hotu sei la hatudu integridade. Nia hatete katak ita hotu sei para atu serbí Maromak se ita hanoin neʼe sei lori diʼak ba ita. (Job 1:​9-11; 2:4) Maibé Job neʼebé laran-metin fó prova katak Satanás bosok-teen. Oinsá ho Ita? Ita ida-idak iha priviléjiu atu defende Maromak nia naran no halo nia kontente hodi serbí nia ho laran-metin. (Prov 27:11) Neʼe mak priviléjiu neʼebé boot tebes.

6. Oinsá mak ita bele banati-tuir Liurai David no ema Levi sira? (Neemias 9:5)

⁶ Ema neʼebé hadomi Maromak hakarak hahiʼi ninia naran ho laran tomak. Liurai David hakerek: “Haʼu sei hahiʼi Jeová; ho laran tomak haʼu sei hahiʼi ninia naran neʼebé santu.” (Sal 103:1) David komprende katak bainhira ita hahiʼi Jeová nia naran, neʼe hanesan ita fó hahiʼi ba Jeová nia reputasaun, ninia hahalok furak sira, no buat kmanek oioin neʼebé nia halo. David hakarak atu halo santu no hahiʼi ninia Aman nia naran. Nia hakarak halo nuneʼe “ho laran tomak”. Hanesan neʼe mós ho ema Levi, sira dirije povu atu fó hahiʼi ba Jeová. Ho haraik an, sira rekoñese katak sira-nia liafuan la toʼo atu bele hahiʼi Jeová nia naran neʼebé santu iha dalan neʼebé kompletu. (Lee Neemias 9:5.) Ita bele fiar katak Jeová sente kontente  bainhira sira fó hahiʼi ba nia ho laran tomak.

7. Oinsá mak ita bele hahiʼi Jeová iha ita-nia serbisu haklaken no liuhusi ita-nia hahalok?

⁷ Ohin loron, ita bele halo Jeová kontente hodi koʼalia kona-ba nia ho domin no agradese. Bainhira ita haklaken, ita-nia objetivu prinsipál mak atu ajuda ema seluk hakbesik no hadomi ita-nia Aman Jeová hanesan ita hadomi nia. (Tgo 4:8) Ita kontente atu uza Bíblia hodi hanorin ema seluk kona-ba Jeová nia domin, justisa, matenek, kbiit, no ninia hahalok furak seluk tan. Ita mós hahiʼi Jeová no halo nia kontente hodi hakaʼas an banati-tuir nia. (Éf 5:1) Kuandu ita halo nuneʼe, karik ema sei nota katak ita la hanesan duni ho ema seluk no halo sira hakarak atu buka-hatene tanbasá. (Mt 5:​14-16) Bainhira iha oportunidade, karik ita bele esplika tanbasá ita-nia hahalok la hanesan ho ema seluk. Rezultadu mak ema neʼebé laran-loos sei hakarak hakbesik ba Maromak. Bainhira ita hahiʼi Jeová iha dalan hanesan neʼe, ita halo nia kontente.—1 Tim 2:​3, 4.

JESUS KONTENTE KUANDU ITA HAHIʼI JEOVÁ NIA NARAN

8. Oinsá mak Jesus hatudu ezemplu neʼebé diʼak liu kona-ba hahiʼi Jeová nia naran?

⁸ La iha kriatura ida iha lalehan no rai neʼebé hatene Aman diʼak liu fali Oan-Mane. (Mt 11:27) Jesus hadomi ninia Aman, no nia hatudu ezemplu neʼebé diʼak liu kona-ba hahiʼi Jeová nia naran. (João 14:31) Iha kalan antes nia mate, nia halo orasaun ba ninia Aman kona-ba serbisu haklaken neʼebé nia halo ona iha rai: “Haʼu fó sai tiha ona Ita-nia naran.” (João 17:26) Neʼe katak sá?

9. Oinsá mak Jesus uza ai-knanoik ida atu esplika ho klaru kona-ba ninia Aman?

⁹ Jesus laʼós deʼit fó sai katak Maromak nia naran mak Jeová, tanba tuir loloos ema Judeu neʼebé Jesus hanorin hatene ona Maromak nia naran. Maibé Jesus hatudu ezemplu diʼak hodi “esplika kona-ba Aman”. (João 1:​17, 18) Porezemplu, Eskritura Lian Ebraiku hatete katak Jeová mak laran-sadiʼa no laran-diʼak. (Éx 34:​5-7) Jesus halo klaru pontu neʼe bainhira konta ai-knanoik kona-ba oan-mane neʼebé sai husi uma, husik ninia aman, no moris arbiru. Bainhira ita lee ai-knanoik neʼe, ita bele haree oinsá aman neʼe halai hodi hasoru ninia oan-mane neʼebé “sei dook hela”. Aman neʼe hakoʼak ninia oan neʼebé arrepende an, no perdua nia ho laran tomak. Neʼe ajuda ita komprende kona-ba Jeová nia laran-sadiʼa no laran-diʼak. (Lc 15:​11-32) Jesus ajuda ema seluk atu komprende didiʼak kona-ba Jeová nia hahalok sira.

10. (a) Oinsá ita hatene katak Jesus uza ninia Aman nia naran no hakarak ema seluk atu halo nuneʼe? (Marcos 5:19) (Haree mós dezeñu.) (b) Saida mak Jesus hakarak ita atu halo ohin loron?

¹⁰ Jesus mós hakarak ema seluk atu uza ninia Aman nia naran ka lae? Sin. Iha tempu neʼebá, karik ulun-naʼin relijiaun balu fiar katak tanba Maromak nia naran mak sagradu, ema labele temi ida-neʼe. Maibé Jesus la husik tradisaun neʼebé kontra Bíblia atu hanetik nia fó hahiʼi ba ninia Aman nia naran. Hanoin toʼok kona-ba tempu neʼebé Jesus kura mane ida neʼebé anju aat mak domina kuandu nia iha ema Gerasa nia área. Ema barak sai taʼuk no husu Jesus atu sai husi sira-nia área, tan neʼe nia la hela iha neʼebá. (Mc 5:​16, 17) Maibé Jesus hakarak ema  iha neʼebá hatene Jeová nia naran. Tan neʼe nia haruka mane neʼebé nia foin kura atu fó-hatene ba ema kona-ba buat neʼebé Jeová halo ona. (Lee Marcos 5:19.) a Nuneʼe mós ohin loron, nia hakarak ita atu fó-hatene ninia Aman nia naran ba ema hotu iha mundu tomak! (Mt 24:14; 28:​19, 20) Bainhira ita halo nuneʼe, ita halo ita-nia Liurai Jesus kontente.

11. Jesus hanorin ninia dixípulu sira atu halo orasaun kona-ba saida, no tanbasá neʼe importante? (Ezequiel 36:23)

¹¹ Jesus hatene katak Jeová nia hakarak mak atu halo santu Ninia naran no prova katak Satanás bosok kona-ba Nia. Tan neʼe ita-nia Naʼi hanorin ninia dixípulu sira atu halo orasaun: “Ami Aman iha lalehan, halo Ita-nia naran sai santu.” (Mt 6:9) Jesus komprende katak neʼe mak asuntu importante liu ba kriasaun hotu. (Lee Ezequiel 36:23.) La iha kriatura ida mak halo santu Jeová nia naran liu fali buat neʼebé Jesus halo. Maibé bainhira ema kaer Jesus, ninia inimigu sira duun katak nia la respeitu ninia Aman. Jesus sente duni katak hafoʼer ninia Aman nia naran neʼebé santu mak sala neʼebé aat tebes. Nia laran-susar tebes tanba ema sei duun no tesi-lia ba nia kona-ba sala neʼe. Karik neʼe mak razaun ida tanbasá Jesus “sente laran-susar tebetebes” iha oras neʼebé ema besik atu kaer nia.—Lc 22:​41-44.

12. Oinsá mak Jesus halo santu ninia Aman nia naran iha dalan neʼebé diʼak liu?

¹² Atu halo santu ninia Aman nia naran, Jesus tenke hasoru susar barak, ema insulta no duun matak nia. Nia hatene katak nia halo tuir ninia Aman iha buat hotu no la presiza sente moe. (Ebr 12:2) Nia mós hatene katak Satanás ataka nia iha tempu susar neʼe. (Lc 22:​2-4; 23:​33, 34) Satanás hakarak atu halakon Jesus nia integridade. Maibé Satanás la susesu! Jesus prova ho klaru katak Satanás mak bosok-teen no katak sei iha ema neʼebé serbí Jeová ho laran-metin no kontinua hatudu integridade maski hasoru situasaun neʼebé susar tebes!

13. Oinsá Ita bele halo kontente Ita-nia Liurai?

 ¹³ Ita hakarak halo kontente Ita-nia Liurai ka lae? Kontinua hahiʼi Jeová nia naran hodi ajuda ema seluk atu hatene Maromak nia hahalok diʼak. Bainhira Ita halo nuneʼe, Ita banati-tuir Jesus nia ezemplu. (1 Ped 2:21) Hanesan Jesus, Ita halo Jeová kontente no prova katak Satanás mak bosok-teen!

BAINHIRA ITA HAHIʼI JEOVÁ NIA NARAN, ITA AJUDA ATU SALVA EMA NIA MORIS

14-15. Saida mak rezultadu kuandu ita hanorin ema seluk kona-ba Jeová?

¹⁴ Bainhira ita hahiʼi Jeová nia naran, ita ajuda atu salva ema nia moris. Tuir loloos, Satanás ‘taka netik ema fiar-laek sira-nia neon’. (2 Kor 4:4) Rezultadu mak sira fiar ba Satanás nia lia-bosok hanesan: Maromak la iha, Maromak dook husi ema, Maromak la hadomi ema, Maromak laran-aat no fó-kastigu ba ema iha infernu. Satanás koʼalia lia-bosok sira-neʼe tanba nia hakarak hafoʼer Jeová nia naran atu nuneʼe ema lakohi hakbesik ba Maromak. Maibé kuandu ita haklaken, ita hanetik Satanás nia planu. Ita hanorin ema lia-loos kona-ba ita-nia Aman no fó hahiʼi ba ninia naran neʼebé santu. Neʼe lori rezultadu saida?

¹⁵ Lia-loos neʼebé fó sai iha Bíblia iha kbiit boot. Hodi hanorin ema seluk kona-ba Jeová no ninia hahalok sira, ita sei hetan rezultadu neʼebé furak. Ema sei la fiar tan Satanás nia lia-bosok no bele haree ita-nia Aman nia hahalok furak oioin. Sira admira tebes ho ninia forsa neʼebé boot. (Isa 40:26) Sira aprende atu tau fiar ba Maromak tanba ninia justisa neʼebé perfeitu. (Deut 32:4) Sira aprende buat barak husi ninia matenek. (Isa 55:9; Rom 11:33) Sira hetan kmaan hodi hatene katak nia mak domin. (1 João 4:8) No nuʼudar sira hakbesik ba Jeová, sira-nia esperansa atu moris ba nafatin nuʼudar ninia oan sai metin liután. Ita iha priviléjiu boot atu ajuda ema seluk hakbesik ba Jeová! Bainhira ita halo nuneʼe, Jeová sei haree ita nuʼudar ninia “maluk serbisu-naʼin”.—1 Kor 3:​5, 9.

16. Ema balu sente oinsá bainhira aprende Maromak nia naran? Fó toʼok ezemplu.

 ¹⁶ Foufoun, karik ita hanorin ema katak Maromak nia naran mak Jeová. Neʼe bele fó impaktu boot ba ema laran-loos nia moris. Porezemplu, feto joven ida naran Aaliyah b sai boot iha relijiaun neʼebé la hanorin kona-ba Bíblia. Nia la kontente kona-ba ninia relijiaun no sente dook husi Maromak. Maibé buat hotu troka bainhira nia hahú estuda Bíblia ho Testemuña sira. Nia komesa haree Maromak nuʼudar ninia Belun. No nia hakfodak tanba aprende katak ema hasai tiha Maromak nia naran husi Bíblia no troka fali ho títulu, hanesan Naʼi. Aprende kona-ba Maromak nia naran troka ninia moris. Nia hatete: “Haʼu-nia Belun iha naran!” Rezultadu mak saida? Nia hatete: “Haʼu sente dame iha laran. Haʼu sente neʼe mak priviléjiu atu bele hatene Jeová nia naran.” Tokadór ida naran Steve sai boot iha família neʼebé fiar metin ba relijiaun Judeu nian. Nia lakohi sai parte ba relijiaun ida tanba nia haree hahalok laran-makerek barak. Maibé depois ninia inan mate, nia akompaña ema seluk neʼebé estuda Bíblia ho Testemuña sira. Bainhira nia hatene Maromak nia naran, neʼe kona tebes ninia laran. Nia hatete: “Haʼu nunka rona kona-ba Maromak nia naran. Neʼe dala primeiru haʼu komprende katak Maromak iha duni! Haʼu bele haree ninia hahalok. Haʼu sente katak haʼu hetan Belun ida.”

17. Tanbasá Ita hakarak kontinua hahiʼi Jeová nia naran? (Haree mós foto.)

¹⁷ Kuandu Ita haklaken, Ita fó sai kona-ba Maromak nia naran neʼebé santu ka lae? Ita ajuda ema seluk atu hatene Jeová nia hahalok sira ka lae? Hodi halo nuneʼe, Ita hahiʼi Maromak nia naran. Mai ita hahiʼi Jeová nia naran neʼebé santu hodi ajuda ema seluk hatene kona-ba Jeová mak Maromak hanesan saida. Hodi halo nuneʼe, Ita salva ema seluk nia moris. Ita sei halo tuir Ita-nia Liurai Jesus Kristu nia ezemplu. No importante liu, Ita sei halo Maromak Jeová kontente. Mai Ita “hahiʼi [ninia] naran tinan ba tinan ba nafatin”!—Sal 145:2.