1, 2. Ýehowa töhmet atylanda özüni nähili duýdy? Mysal getiriň.

 AÝDALY, dostuňyz size töhmet atýar. Käbirleri oňa ynanýar. Soňra aýdylan gep-gürrüňler dilden-dile geçip, köp adamlar eşidýär. Siz özüňizi nähili duýarsyňyz? Elbetde, siz atylan töhmeti dogan-garyndaşlaryňyzyň, dost-ýarlaryňyzyň eşitjekdigine we at-abraýdan düşjekdigiňize gynanarsyňyz (Nak. 22:1).

² Şu mysal Ýehowanyň özüni nähili duýandygyna düşünmäge kömek eder, sebäbi Oňa-da töhmet atyldy. Ýehowanyň ogullarynyň biri, ýagny bir perişde Oňa töhmet atýar. Ol How enä Ýehowa hakda ýalan gep-gürrüňleri aýdýar. How ene-de oňa ynanýar. Şeýdip, ilkinji ynsan jübüti Ýehowa garşy gozgalaň turuzýar, bütin adamzat nesli günäli bolup dünýä inýär we aradan çykýar (1 Mus. 3:​1—6; Rim. 5:​12). Şeýtanyň Erem bagynda Ýehowa atan töhmetinden soňra ýer ýüzünde betbagtçylyk, gyrgynçylyk we uruşlar günsaýyn köpelýär. Elbetde, Ýehowa adamlaryň ejir çekýänini görüp gynanýar. Emma ol gaharlanyp, öýke-kine saklap oturmady, sebäbi Mukaddes Kitapda oňa «bagtly Hudaý» diýilýär (1 Tim. 1:​11).

3. Bize nähili hormatly ýumuş tabşyryldy?

³ Bize hormatly ýumuş tabşyryldy. Mukaddes Kitapda: «Ýehowanyň adyny wasp ediň!» diýilýär (Zeb. 113:1). Biz şu tabşyryga eýersek, Şeýtanyň ýalançydygyny  subut ederis we Ýehowanyň adyny aklarys. Munuň üçin biz adamlara Ýehowa barada hoş habary wagyz etmeli. Şu makalada Ýehowanyň adyny wasp etmäge kömek edýän üç pikir hakda gürrüň ederis.

ÝEHOWA ÝÜREKDEN ŞATLANÝAR

4. Biz näme üçin Ýehowany wasp etmeli? Mysal getiriň. (Surata serediň).

⁴ Biz Ýehowanyň adyny wasp etsek, ol örän begenýär (Zeb. 119:108). Emma Ýehowa alkyş aýtmasak, özünden göwni geçip, gam-gussa batyp oturarmy? Göz öňüne getiriň, gyzjagaz ylgap barýar-da, kakasynyň boýnuna böküp: «Kakam jan, men seni gowy görýärin. Sen iň gowy kakasyň!» diýýär. Kakasy gyzynyň ak ýürekden aýdan sözlerine monça bolýar. Elbetde, gyzy öwmese, ol özünden göwni geçip, ruhdan düşüp oturmaz. Kakasy çaga kalbyndan çykan söýgi we minnetdarlyk sözlerine begenýär. Ol gyzynyň mähirli, mylakatly we minnetdar adam bolup ýetişjekdigine guwanýar. Biz hem gökdäki Atamyzyň adyny wasp etsek, onuň ýüregi şatlykdan dolar.

5. Şeýtan bize nähili töhmet atýar we biz onuň ýalançydygyny nädip subut edip bileris?

⁵ Ýehowanyň adyny wasp etsek, Şeýtanyň bize atan töhmetiniň ýalandygyny subut edip bileris. Şeýtan: «Adamlar Ýehowa ak ýürekden gulluk etmez» diýip töhmet atýar. Ol hamala: «Adam öz bähbidi üçin ýaşaýar. Eger Hudaýdan peýda görmese, oňa gulluk etmez» diýýär (Eýp. 1:​9—​11; 2:4). Eýýup pygamber Şeýtanyň ýalançydygyny subut etdi. Indi gezek biziňki. Eger biz Ýehowanyň adyny wasp etsek we oňa wepaly gulluk etsek, Şeýtanyň atan töhmetiniň ýalandygyny subut ederis (Nak. 27:11). Hawa, Ýehowanyň adyny wasp etmek uly hormat!

6. Biz Dawut patyşa bilen lewileriň göreldesine nädip eýerip bileris? (Nehemýa 9:5).

⁶ Ýehowany söýýän adamlar onuň adyny wasp edýärler we şöhratlandyrýarlar. Dawut patyşa: «Men Ýehowa alkyş aýdaryn! Janym-tenim bilen mukaddes adyny wasp ederin» diýdi (Zeb. 103:1). Dawut «mukaddes adyny wasp ederin» diýende nämäni göz öňünde tutdy? Ol Allanyň diňe bir adyny däl-de, onuň at-abraýyny, gudratly işlerini we ajaýyp häsiýetlerini göz öňünde tutdy. Dawut patyşa Ýehowanyň adyny «jany-teni» bilen şöhratlandyrmak isleýärdi. Edil şonuň ýaly, lewiler hem joşup Ýehowa  alkyş aýdýardylar. Olar Ýehowanyň mukaddes adyny näçe taryplasalar-da, bärden gaýdýandyklaryny pesgöwünlik bilen boýun alýardylar (Nehemýa 9:5-i okaň). Biz hem olaryň göreldesine eýerip, Ýehowany wasp etsek, Ol ýürekden şatlanar.

7. Biz Ýehowanyň adyny haýsy iki usul bilen wasp edýäris?

⁷ Biz hak Hudaý Ýehowany söýýändigimiz hakda adamlara höwes bilen gürrüň berýäris. Şonda Ýehowa örän begenýär. Biziň esasy maksadymyz — adamlara hak Allany tanatmak we Onuň bilen dostlaşmaga kömek etmek (Ýak. 4:8). Şol sebäpli biz Ýehowanyň söýgüden doly, adalatly, akyldar we gudratygüýçli Hudaýdygy hakda wagyz edýäris. Şeýle-de biz gökdäki Atamyzyň göreldesine eýerip, ony begendirýäris (Efes. 5:1). Biz Şeýtanyň dünýäsinde ýaşaýan adamlardan düýbünden tapawutlanýarys. Olar biziň ýagşy edim-gylymymyzy görüp, hak Alla barada köp zatlary bilmek isleýär (Mat. 5:​14—​16). Şonda biz Ýehowanyň Şaýadydygymyza buýsanýarys we Ýehowa hakda gürrüň berýäris. Şeýlelikde, olar Ýehowany tanap, onuň bilen dostlaşmak isleýärler. Biz Ýehowanyň göreldesine eýersek, ýagşy häsiýetlerini gürrüň bersek, Ony begendireris we adyny dillerimizde sena ederis (1 Tim. 2:​3, 4).

ISA MESIH BEGENÝÄR

8. Isa pygamber nähili görelde galdyrdy?

⁸ Isa pygamber perişdelerden hem, adamlardan hem Ýehowany has gowy tanaýar (Mat. 11:27). Ol Atasyny ýürekden söýýär. Isa pygamber Atasynyň adyny wasp edip, ajaýyp görelde galdyrdy (Ýah. 14:31). Ol ölmeziniň öň ýanyndaky gijesi: «Men olara adyňy tanatdym» diýip doga edýär (Ýah. 17:26). Bu sözler nämäni aňladýar?

9. Isa Atasyny tanatmak üçin nähili mysaly gürrüň berýär?

⁹ Ýehudylar Hudaýyň adynyň Ýehowadygyny bilýärdiler. Şol sebäpli Isa pygamber Atasyny tanatmak üçin diňe bir onuň adyny aýtman, ýagşy häsiýetlerini gürrüň berýär (Ýah. 1:​17, 18). Töwratda Ýehowanyň rehimdar, mähriban Hudaýdygy aýdylýar (2 Mus. 34:​5—7). Isa adamlara Atasyny tanatmak üçin ýiten ogul hakdaky mysaly gürrüň berýär. Kakasy oglunyň gelýändigini uzakdan görüp, ylgap barýar-da ogluny gujaklaýar we ýürekden bagyşlandygyny aýdýar. Şu mysal Ýehowanyň rehimdar, mähriban Hudaýdygyny gowy suratlandyrýar (Luka 15:11—​32). Şeýdip, Isa pygamber Atasyny adamlara tanatdy.

10. a) Isa pygamberiň Hudaýyň adyny tutandygyny we hemmeleriň tutmagyny isleýändigini nireden bilýäris? (Markus 5:19; surata serediň). b) Isa pygamber biziň näme etmegimizi isleýär?

¹⁰ Isa pygamber ähli adamlaryň hak Hudaýyň adyny bilmegini isleýärdi. I asyrdaky dini ýolbaşçylar: «Hudaýyň beýik ady mukaddesdir. Günäli adamlar onuň adyny tutmaga mynasyp däldir» diýýärdi. Emma Isa pygamber Mukaddes Kitaba ters gelýän pikirleri we däp-dessurlary inkär edýärdi. Bir gün Isa pygamber Gerasena welaýatyna barýar we bir adamyň içinden jynlary çykarýar. Adamlar jynly adamyň akyl-huşunyň ýerindedigini görüp juda gorkdular we Isadan başga ýere gitmegi haýyş etdiler (Mar. 5:​16, 17). Isa pygamber halkyň Ýehowanyň adyny bilmegini isleýärdi.  Şol sebäpli sagalan adama Ýehowanyň gudratly işlerini gürrüň bermegi tabşyrýar (Markus 5:​19-y okaň) a. Isa pygamber bize Ýehowanyň adyny bütin ýer ýüzüne jar etmegi tabşyrdy (Mat. 24:14; 28:19, 20). Biz şu tabşyrygy ýürekden ýerine ýetirsek, Beýik Patyşa Isany begendireris.

11. Isa pygamber näme hakda doga etmegi öwretdi we Hyzkyl 36:23-e görä, muny etmek näme üçin wajyp?

¹¹ Isa pygamber Ýehowanyň öz adyny aklamak isleýändigini bilýärdi. Şonuň üçin ol nusgalyk dogasynda: «Eý gökdäki Atamyz, adyň mukaddes bolsun!» diýdi (Mat. 6:9). Isa Ýehowanyň adynyň aklanmagy baradaky wajyp meselä hemmeleriň, ýagny perişdeleriň we adamlaryň gatnaşýandygyna düşünýärdi (Hyzkyl 36:23-i okaň). Hiç kim, ne perişdeler, ne-de adamlar Isa ýaly Ýehowanyň adyny mukaddes etmek üçin köp tagalla eden däldir. Isa pygamberi tussag edenlerinde, Hudaýyň mukaddes adyna dil ýetiren adam hökmünde günäkärlediler. Bu onuň üçin ölümden hem agyrdy. Şol sebäpli Isa ölüminiň öň ýanyndaky gijesi «güýçli gam-gussa batdy» (Luka 22:41—​44).

12. Isa pygamber Hudaýyň adyny nädip aklady?

¹² Isa pygamber Atasynyň adyny aklamak üçin islendik synaga döz gelmäge taýyndy. Duşmanlar Isa pygambere zorluk-sütem etdiler, kemsitdiler we töhmet atdylar. Emma Isa ejizlemedi, başyny dik tutdy, sebäbi Atasyny razy edýändigini bilýärdi (Ýew. 12:2). Şeýle-de Isa ömrüniň iň agyr pursadynda Şeýtanyň gönüden-göni hüjüm etjekdigine düşünýärdi (Luka 22:​2—4; 23:33, 34). Şeýtan Isa pygambere Hudaýa garşy günä etdirjek boldy, emma onuň niýeti başa barmady. Isa Şeýtanyň barypýatan ýalançydygyny we adamlaryň agyr synaglarda Hudaýa wepaly boljakdygyny subut etdi.

13. Beýik Patyşany begendirmek üçin näme etmeli?

¹³ Siz Beýik Patyşa Isany begendirmek isleýärsiňizmi? Onda Ýehowanyň  adyny wasp ediň, adamlara hak Hudaýy tanadyň. Şonda Isanyň göreldesine eýerersiňiz (1 Pet. 2:​21). Siz Ýehowanyň ýüregini şatlandyrarsyňyz we Şeýtanyň ýalançydygyny subut edersiňiz.

ADAMLARY HALAS EDÝÄRIS

14, 15. Biz adamlara Ýehowany tanamaga kömek edenimizde nähili gudratyň şaýady bolýarys?

¹⁴ Biz Ýehowanyň adyny wasp edip, adamlaryň janyny halas edýäris. Nädip? Şeýtan «iman etmeýän adamlaryň aň-düşünjesini küteldýär» (2 Kor. 4:4). Şol sebäpli adamlar: «Hudaý ýok, adamlaryň aladasyny etmeýär. Hudaý zalym, erbet adamlary dowzah odunda gynaýar» diýen ýaly Şeýtanyň ýalan sözlerine ynanýarlar. Şeýtan Ýehowanyň adyny garalamak we abraýdan düşürmek isleýär. Şeýtanyň ýalan sözlerine ynanýan adamlar Hudaýy tanamak we oňa sežde etmek islemeýärler. Emma biz adamlara hak Hudaýy tanadyp, onuň adyny wasp edýäris. Şeýlelikde, Şeýtanyň ýalançydygyny subut edýäris.

¹⁵ Hudaýyň Sözündäki hakykat adamlaryň ýüregine güýçli täsir edýär. Biz adamlara hak Allany tanamaga kömek edenimizde täsin gudratyň şaýady bolýarys. Şeýtanyň ýalan sözlerinden ýaňa gözleri gapylan adamlar ýuwaş-ýuwaşdan Ýehowanyň mähirli Atadygyna düşünip başlaýarlar. Olar Ýehowanyň güýç-kuwwatly Hudaýdygyny bilenlerinde, Oňa çuňňur hormat goýýarlar (Işa. 40:26). Ýehowanyň adalatly Hudaýdygyna düşünenlerinde, Oňa doly bil baglaýarlar (5 Mus. 32:4). Ýehowanyň çäksiz akyldar Hudaýdygyny bilenlerinde, Onuň her bir görkezmesine ýürekden eýerýärler (Işa. 55:9; Rim. 11:33). Ýehowanyň söýgüden doly Hudaýdygy hakda çuňňur oýlananlarynda, olaryň göwni giňeýär, kalby rahatlyk tapýar (1 Ýah. 4:8). Olar hak Allany näçe gowy tanadygyça, Onuň bilen ýakyndan dostlaşýarlar we ebedi ýaşaýşa ýürekden umyt edýärler. Geliň, adamlara hak Hudaýy tanadalyň, Onuň bilen dostlaşmaga kömek edeliň! Şonda biz Ýehowanyň «işdeşleri»  bolarys. Bu biziň üçin uly hormat! (1 Kor. 3:​5, 9).

16. Hudaýyň adyny bilmek adamlara nähili täsir edýär? Mysal getiriň.

¹⁶ Biz adamlara hak Hudaýy tanamaga kömek edýäris. Olar Hudaýyň adynyň Ýehowadygyny bilende örän begenýärler, durmuşyny düýbünden üýtgedýärler. Meselem, Aliýa b çagalykdan bäri hristian dinine däl-de, başga dine uýýardy. Emma ol dininiň hak Alla barada hakykaty öwretmeýändigine düşünýär. Soňra ol Ýehowanyň Şaýatlary bilen okuw geçip başlaýar we Hudaýy tanaýar. Aliýa Mukaddes Kitabyň köp aýatlaryndan Ýehowa adynyň aýrylyp, «Reb» diýen titulynyň ýazylandygyny bilende haýran galyp: «Meniň dostumyň ady bar eken. Indi meniň kalbym rahat. Hudaýyň adyny tutup ýüzlenmek uly hormat» diýýär. Geliň, indi sazanda Stiw hakda gürrüň edeliň. Ol ýewreý maşgalasynda önüp-ösüpdi. Emma ol dini däp-dessurlary berjaý etmeýär, sebäbi dindar adamlaryň ikiýüzlüligini görýär. Bir güni onuň ejesi aradan çykýar, Stiw gaýgy-hasrat çekýär. Şonda Ýehowanyň Şaýatlary bilen okuw geçýän dosty ony öýüne çagyrýar we okuwyna gatnaşyp görmegi haýyş edýär. Stiw Hudaýyň adynyň bardygyny bilende haýran galyp, şeýle diýýär: «Men ilkinji sapar Hudaýyň adyny eşitdim. Ýehowa diri Hudaý ekeni. Indi meniň aladaçyl we ynamdar dostum bar».

17. Siz näme üçin Ýehowanyň adyny şöhratlandyrmagy ýüregiňize düwdüňiz? (Surata serediň).

¹⁷ Siz adamlara Ýehowanyň ady barada wagyz edýärsiňizmi? Onuň häsiýetleri hakda gürrüň berýärsiňizmi? Eger şeýle bolsa, Hudaýyň adyny wasp edýärsiňiz. Geliň, mundan beýläk hem adamlara mukaddes ady göterýän Ýehowany tanamaga kömek edeliň. Şonda adamlaryň janyny halas ederis we Beýik Patyşamyz Isanyň göreldesine eýereris. Iň esasy zat bolsa, Ýehowa Atamyzyň ýüregini şatlandyrarys. Geliň, Ýehowa Hudaýyň adyna «ebedilik alkyş aýdalyň!» (Zeb. 145:2).