1-2. Nchiichili chikozyano chikonzya kutugwasya kuti tumvwisisisye Jehova mbalimvwa atala akubejelezegwa kwazina lyakwe?

 ATUTEEDI muntu nguyanda waamba zintu zibi atala anduwe. Pesi iwe ulizi kuti zintu eezyo nzyakubeja, nikuba oobo bamwi bazisyoma. Zyiinda kubija, bantu aabo basaanguna kubuzya bamwi zintu eezyo zyakubeja mpawo aabo banga babuzigwa ambabo bazisyoma. Ulamvwa biyeni? Kuti kuli aandaba abantu alubo kuyanda kuba aampuwo mbotu, manwa aayo alakonzya kukuchisa.—Tus. 22:1.

² Chikozyano eechi chitugwasya kumvwisisisya mbaakalimvwa Jehova chiindi naakabejelezegwa. Saatani wakaamba manwa atala aLeza kumwanakazi wakusaanguna, Eva. Eva wakaasyoma manwa aayo. Manwa aayo akapa kuti bazyali besu bakusaanguna bapapile Jehova. Eezi zyakapa kuti bantu boonse babe aachibi akuti bafwe. (Matl. 3:​1-6; Rom. 5:12) Mapenzi woonse aali munyika, lufu ankondo zyakabawo akaambo kamanwa aaSaatani ngaakaamba mumuunda wa-Edeni. Zilaantanganana kuti kubejelezegwa nkwaakachitwa Jehova amapenzi aakayetwa akaambo kakubejelezegwa zilamuchisa. Pesi Jehova taakatwaangila nkoto pe. Bbayibbili lyaamba kuti, ‘nguLeza uubotelwa.’—1 Tim. 1:11.

3. Nchiichili chilongezyo nchitulaacho?

³ Tuli aachilongezyo chakutola lubazu mukupa kuti zina lyaJehova lilemekwe kwiinda mukuswiilila mulawu wakuti: “Amutembaule zina lya Jehova.” (Int. 113:1) Tuchita oobo kwiinda mukwaambuula zintu zilikabotu atala aJehova. Uyoomutembawula na anduwe Jehova? Atubone zintu zitatu zikonzya kutugwasya kuti tutembawule zina lyaLeza wesu amoyo woonse.

 TUBOTEZYA JEHOVA CHIINDI NITUTEMBAWULA ZINA LYAKWE

4. Nkamboonzi Jehova nabotelwa chiindi nitumutembawula? Amba chikozyano. (Langa chifanikisyo.)

⁴ Tubotezya Taateesu wakujulu chiindi nitutembawula zina lyakwe. (Int. 119:108) Eezi zyaamba kuti Leza singuzuzyoonse uli mbuli bantu batamaninide na bayanda kutembawulwa akaambo kakuti nzizyo nzibafwabilila? Peepe. Atubone chikozyano. Atuteedi mwana musimbi wachijaanina wisi mpawo wamubuzya kuti, “Taata, taakwe uuli mbuli nduwe pe!” Wisi ulabotelwa. Nkamboonzi? Teekuti wisi ukufwabilila biya kulumbayizigwa aamwanaakwe pesi ulabotelwa akaambo kakuti umulangania kabotu mwanaakwe. Alubo ulabotelwa akaambo kakuti mwanaakwe nga watondeezya kuti ulamuyanda wisi akuti ulamulumba. Wisi ulizi kuti buntu buli boobu bupa kuti mwanaakwe azookomene kabotelwa. Munzila iikozyenie, Jehova Taateesu wiinda mandeende woonse, ulabotelwa chiindi nitumutembawula.

5. Tutondeezya biyeni kuti Saatani wakaamba manwa atala abantu?

⁵ Chiindi nitutembawula Taateesu wakujulu, nga tulikutondeezya kuti nzyaakaamba Saatani atala abantu nzyamanwa. Saatani wakaamba kuti taakwe muntu pe uukonzya kwiiminina zina lyaLeza chakusyomeka. Alubo wakaamba kuti taakwe muntu pe uukonzya kukkala kasyomeka kuli Jehova kuti waswaana mapenzi. Saatani wakaamba kuti bantu boonse balakonzya kuleka kukomba Leza kuti babona kuti talikubagwasya pe. (Job. 1:​9-11; 2:4) Pesi Jobu wakatondeezya kuti nzyaakaamba Saatani nzyakubeja. Aniwe utyeni? Toonse tulaachilongezyo chakwiiminina zina lyaTaateesu akuchita zintu zimubotezya kwiinda mukukkala katusyomeka kulinguwe. (Tus. 27:11) Nchilongezyo chipati loko nchitulaacho chakwiiminina Jehova!

6. Nga tulachitobelezya biyeni chikozyano chaMwaami Davida amaLevi? (Nehemiya 9:5)

⁶ Kuyanda Leza kupa kuti bakombi bakwe basyomeka batembawule zina lyakwe amoyo woonse. Mwaami Davida wakalemba kuti: “Anditembaule Jehova; zyoonse zili mukati kangu azitembaule zina lyakwe lisalala.” (Int. 103:1) Davida wakalizi kuti kutembawula zina lyaJehova nkutembawula Jehova lwakwe. Zina lyaJehova liswaanizya mpuwo yakwe alubo lituyeezya atala abuntu bubotu boonse mbwalaabo azintu zibotu nzyaakachita. Davida wakali kuchita zintu zitondeezya kuti zina lyaTaateesu likkale kalisalala alubo wakali kulitembawula. Wakali kuyanda kuti “zyoonse zili mukati” kakwe zitembawule zina lyaJehova lisalala. Munzila iikozyenie, maLevi bakali kuzulwida kukutembawula Jehova. Bakazumina  kuti teebakali kutembawula zina lyaJehova chakumaninina mbuli mbulyeelede kuchitwa. (Bala Nehemiya 9:5.) Kulibombya kuli boobu akutembawula zina lyaJehova amoyo woonse kwakapa kuti Jehova abotelwe.

7. Nga tulamutembawula biyeni Jehova mumulimu wakukambawuka anitwaambuuzyania aabantu buzuba abuzuba?

⁷ Mazubaano, tulakonzya kubotezya Jehova kwiinda mukwaambuula munzila iitondeezya kuti tulamulumba akuti tulamuyanda. Chiindi nituli mumulimu wakukambawuka, tweelede kuyeeya kuti makanze eesu mapati nga kugwasya bantu kuti baze kuli Jehova akubagwasya kuti bamuyande mbuli mbutumuyanda. (Jak. 4:8) Tulabotelwa chiindi nitutondeezya bantu nzilyaamba Bbayibbili atala aJehova abuntu mbwalaabo mbuli luyando, bululami, busongo, manguzu abumwi buntu bubotu mbwalaabo. Alubo tulamutembawula Jehova akumubotezya kuti tweezya kumutobelezya. (Ef. 5:1) Chiindi nituchita zintu eezi, nga twasiyana abantu beendelezegwa aaSaatani. Bamwi bantu balakonzya kubona kuti tulisiyene ambabo alubo ngabayanda kuziba zyiingi. (Mt. 5:​14-16) Chiindi nitwaambuuzyania aabantu buzuba abuzuba, tulakonzya kubapandulwida kuti nkamboonzi nitusiyene ambabo. Eezi nga zyapa kuti bantu bali aachiyandisyo baze kuli Leza wesu. Kuti twatembawula Jehova munzila eezi, nga tulikupa kuti abotelwe.—1 Tim. 2:​3, 4.

TUBOTEZYA JESU CHIINDI NITUTEMBAWULA ZINA LYAJEHOVA

8. Jesu wakatondeezya biyeni kuti ulikunembo munkani yakutembawula zina lyaJehova?

⁸ Kujulu naakuti aanyika, taakwe ngilozi naakuti bantu bamuzi kabotu Taata kwiinda Mwanaakwe. (Mt. 11:27) Jesu ulamuyanda Wisi alubo ulikunembo kukutembawula zina lyaJehova. (Joh. 14:31) Naakali kukomba kuli Wisi mubusiku bwamamanino katanafwa, wakaamba chintu chiyandikana loko nchaakachita aanyika, wakati: “Ndapa kuti zina lyako lizibinkane.” (Joh. 17:26) Wakali kwaambaanzi Jesu?

9. Jesu wakabelesya chikozyano chili kuti apandulule mbabede Wisi?

⁹ Jesu taakagolela aakubuzya bantu kupela pe zina lyaLeza lyakuti Jehova, pesi wakachita zyiingi. MaJuda mbaakali kuyiisya Jesu bakalilizi kale zina lyaLeza. Pesi Jesu wakaba kunembo mukutembawula zina lyaJehova akaambo kakuti “nguwe wakapandulula mbabede” Leza. (Joh. 1:​17, 18) Muchikozyano, Magwalo aachiHebberu atondeezya kuti Jehova ulaaluzyalo akuti ulaalweetelelo. (Kul. 34:​5-7) Jesu wakakabikka aantanganana kasimpe aaka chiindi naakaamba atala achikozyano chamwana wakasweekede awisi. Bbayibbili lyaamba kuti wisi naakabona mwanaakwe wakali wasanduka “naakachili kule-kule,” wakamuchijaanina, wamumbundila alubo wakamulekelela amoyo woonse. Chikozyano eechi chitugwasya kubona kuti Jehova ulaaluzyalo akuti ulaalweetelelo. (Lk. 15:​11-32) Nisimpe Jesu wakatugwasya kumvwisisisya mbabede Wisi.

10. (a) Tuzizi biyeni kuti Jesu wakali kubelesya zina lyaWisi akuti wakali kuyanda kuti bantu balibelesye? (Makko 5:19) (Langa chifanikisyo.) (b) Mazubaano, Jesu uyanda kuti tuchiteenzi?

¹⁰ Jesu wakali kuyanda na kuti bamwi babelesye zina lyaWisi? Iiyi, wakali kuyanda. Kulakonzeka kuti bapati bamuzikombelo bamuchiindi eecho bakali kwaamba kuti nkutalemeka kuti bantu bayita zina lyaLeza, pesi Jesu taakwe naakazumizya muzeezo ooyu uutazwi muMagwalo kuti umukachizye kubelesya zina lyaWisi. Atubone nzyaakachita Jesu chiindi naakaponia mwaalumi wakali aadimoni wamuchilawu chaGerasa. Bantu bamuchilawu eechi bakayoowa alubo bakakombelezya Jesu kuti ayende, nkinkaako, Jesu wakazwa muchilawu eecho. (Mk. 5:​16, 17) Nikuba oobo, Jesu  wakali kuyanda kuti bantu bamuchilawu eechi balizibe zina lyaJehova. Nkinkaako, wakabuzya mwaalumi ooyo ngwaakaponia kuti abuzye bantu atala anzyaakamuchitila Jehova kutali zintu nzyaakali wachita Jesu. (Bala Makko 5:19.) a Nikuba mazubaano, Jesu uyanda kuti tubuzye bantu munyika yoonse zina lyaWisi! (Mt. 24:14; 28:​19, 20) Kuti twachita oobo, tulamubotezya Mwaami wesu Jesu.

11. Jesu wakayiisya batobeli bakwe kuti bakombeleenzi alubo nkamboonzi nikuyandikana kuchita oobo? (Ezekieli 36:23)

¹¹ Jesu wakalizi kuti makanze aaJehova akali aakusalazya zina lyakwe kumanwa woonse aakali aambwa atala anguwe. Eezi nzizyo zyakapa kuti Simalelo wesu ayiisye batobeli bakwe kuti bakombe kabati: “Taateesu uuli kujulu, alisalazigwe zina lyako.” (Mt. 6:9) Jesu wakalizi kuti zilenge zyoonse zyeelede kutola lubazu mukusalazya zina lyaWisi. (Bala Ezekieli 36:23.) Taakwe chilenge pe chakatola lubazu mukusalazya zina lyaJehova kwiinda mbaakachita Jesu. Jesu naakasungwa wakabejelezegwa kuti wakasampawula Jehova. Pesi Jesu wakalizi kuti kusampawula zina lyaWisi lisalala chakali chibi chipati loko. Kulakonzeka kuti nzizyo zyakapa kuti Jesu ‘akataazikene loko’ naakali waamba kusungwa.—Lk. 22:​41-44.

12. Jesu wakalisalazya biyeni zina lyaWisi?

¹² Kuti asalazye zina lyaWisi, Jesu wakalisimya kukupenzegwa, kutukilwa akubejelezegwa koonse nkwaakali kuchitwa. Jesu wakalizi kuti wakali waswiilila Wisi muzintu zyoonse, nkinkaako, taakwe chintu chakali kupa kuti abe aabweeme pe. (Heb. 12:2) Alubo Jesu wakalizi kuti Saatani nguwe wakali kumulwana muziindi eezyo ziyumu. (Lk. 22:​2-4; 23:​33, 34) Saatani wakali kubonaanga ulakonzya kupa kuti Jesu atasyomeki pe, pesi taakazwidilila pe. Jesu wakatondeezya kuti Saatani ngunguwe mubeji mupati akuti Jehova ulaabakombi bakwe basyomeka nikuba kuti baswaana zyiimo ziyumu biyeni.

13. Niinzi nzukonzya kuchita kuti ubotezye Mwaami wesu uulikweendelezya?

¹³ Ulayanda na kubotezya Mwaami wesu uulikweendelezya? Kkala kutembawula zina lyaJehova, gwasya bamwi kuti bazibe buntu bubotu mbwalaabo Leza. Kuti wachita oobo, nga ulikutobelezya chikozyano chaJesu. (1 Pet. 2:21) Mbuli Jesu, ulikubotezya Jehova  alubo ulikutondeezya sinkondonyina waLeza kuti ngunguwe mubeji uutakwe bweeme.

TUFUTULA BUUMI BWABANTU CHIINDI NITUTEMBAWULA ZINA LYAJEHOVA

14-15. Nziizili zintu zibotu zikonzya kubawo chiindi nituyiisya bantu atala aJehova?

¹⁴ Chiindi nitutembawula zina lyaJehova, nga tulikufutula buumi bwabantu. Biyeni? Saatani ‘woofwaazya mizeezo’ yabantu batasyomi. (2 Kor. 4:4) Akaambo kazeezi, bantu balikusyoma manwa aaSaatani aakuti Leza tawo pe, ulikule andiswe, takwe ndaba pe andiswe, ulaalunya akuti upenzya basizibi mumulilo. Saatani waamba manwa woonse aaya kayanda kuti zina lyaJehova litabi aampuwo mbotu akuti bantu batasweni aafwiifwi aJehova. Pesi mulimu wesu wakukambawuka upa kuti makanze aaSaatani atazwidilili pe. Tuyiisya bantu kasimpe kali atala aTaateesu, tutembawula zina lyaLeza lisalala. Eezi zipa kuti kube mpinduunzi?

¹⁵ Kasimpe kali muJwi lyaLeza kali aamanguzu. Chiindi nituyiisya bantu atala aJehova akubagwasya kuti bazibe mbabede, kuli zintu zibotu zichitika. Bantu bawofwaazigwa aamanwa aaSatani ngabasaanguna kuchincha mbichaani-mbichaani alubo bantu aabo nga basaanguna kubona buntu bubotu mbwalaabo Taateesu. Nga bagamba chiindi nibaziba kuti Jehova ulaamanguzu. (Is. 40:26) Nga bayiya kuti bamusyome akaambo kakuti uchita zintu chabululami. (Dt. 32:4) Nga bayiya zyiingi kuzwa kubusongo mbwalaabo. (Is. 55:9; Rom. 11:33) Alubo nga bawumbulizigwa nibayiya kuti buntu bupati mbwalaabo Jehova nduyando. (1 Joh. 4:8) Chiindi nibaswena aafwiifwi aJehova, nga baba aabulangilizi bwakupona kukabe kutamani kabali bana bakwe. Tulaachilongezyo chipati chakugwasya bantu kuti baswene aafwiifwi aTaateesu. Chiindi nituchita oobo, Jehova nga watubona ‘katubelekaamwi’ anguwe.—1 Kor. 3:​5, 9:​5, 9.

16. Kwakabagwasya biyeni bamwi kuziba zina lyaLeza? Amba zikozyano.

¹⁶ Kumasaangunino, tulakonzya kuyiisya bantu atala azina lyaLeza lyakuti Jehova. Eezi zilakonzya kuchincha muntu ulaamoyo uubombede. Muchikozyano, umwi muchizi uutegwa Aaliyah b wakakomenena mumpuli mubakatali  kubelesya Bbayibbili. Pesi taakali kukkutisikana pe azyakali kuchitwa muchikombelo chakwe alubo wakali kulimvwa katali aafwiifwi pe aLeza. Eezi zyakachincha naakasaanguna kwiiya Bbayibbili aBakamboni baJehova. Wakasaanguna kubona Leza mbuli mweenzinyina. Alubo wakagamba naakaziba kuti zina lyaLeza lyakagwisigwa mumaBbayibbili miingi mpawo kwabikkwa mazina aakulemeka mbuli lyakuti Mwaami. Naakayiya atala azina lyaJehova, buumi bwakwe bwakachincha. Wakaamba kuti: “Mweenzuma wiinda boonse ulaazina!” Eezi zyakamugwasya biyeni? Wakaamba kuti: “Lino ndilimvwa kandili aaluumuno mumizeezo. Ndilaachilongezyo chipati chakumvwanana aawe.” Umwi mwaalumi uutegwa Steve wakali mwiimbi wakakomenena mumpuli yakazyatide muchiJuda. Taakali kuyanda pe kunjila kufumbwa chikombelo akaambo kakuti wakali wabona bantu biingi bakali basikuupawupa. Nikuba oobo, chiindi bayina nibakafwa, wakazumina kwiiya Bbayibbili awumwi Kamboni waJehova. Wakabotelwa loko naakaziba kuti Leza ulaazina. Wakaamba kuti: “Taakwe nindakali ndalimvwa pe zina lyaLeza.” Wakayungizya kuti: “Kakali kakusaanguna mubuumi bwangu kuziba kuti Leza mpali choonzyo! Ndakamubona mbuli muntu uupona chachoonzyo. Ndakajana mweenzuma.”

17. Nkamboonzi nwaakanza kwiinkilila kunembo kutembawula zina lyaJehova? (Langa chifanikisyo.)

¹⁷ Chiindi nuchita mulimu wakukambawuka awakuyiisya, nga wababuzya na bantu atala azina lyaLeza lisalala? Nga wabagwasya na kuti bazibe mbabede Leza? Kuti kuchita oobo, nga ulikutembawula zina lyaLeza. Yinkilila kunembo kutembawula zina lyaJehova kwiinda mukugwasya bantu kuti bazibe zintu zyiingi atala anguwe. Kuti wachita oobo, ulafutula buumi bwabantu. Alubo nga ulikutobelezya Mwaami wesu Kkristu Jesu. Kwiinda zyoonse, ulabotezya Taateesu siluyando Jehova. Kanza ‘kutembaula zina lyakwe lyoonse alyoonse mane kukabe kutamani’!—Int. 145:2.