1, 2. ¿La limakgkatsi Jehová taʼakgsanin nema wankanit xpalakata?

 KALILAKPUWANTI pi chatum tiku wix paxkiya wan tuku lu nitlan mimpalakata. Wix katsiya pi kaj taʼakgsanin, pero makgapitsi latamanin kanajlakgo, chu na tsukukgo lichuwinankgo uma chu taʼakgsanin talakgatumi. ¿La xmakgkatsi? Xlikana pi max lu nitlan xlimakgkatsi chu xlilakgaputsa pi latamanin nitlan tuku xlakpuwankgolh mimpalakata (Prov. 22:1).

² Uma liʼakxilhtit kinkamakgtayayan naʼakgatekgsaw la makgkatsilh Jehová akxni chatum tiku xkgawasa xlitaxtu wa taʼakgsanin xpalakata chu maxkajwilh xtukuwani. Eva kanajlalh uma taʼakgsanin chu wa xlakata xapulana kinatlatnikan talalakatawakakgolh Jehová. Xkuentajkan, putum akinin makglakgalhinanin litaxtuyaw chu niyaw (Gén. 3:​1-6; Rom. 5:12). Taʼakgsanin nema Satanás malakgatumilh kjardín xaʼEdén, liminit putum taʼakglhuwit nema anan la uku, chuna la linin, guerras chu tapatin. Xlikana pi Jehová lu nitlan limakgkatsi putum umakgolh taʼakgsanin chu tuku nitlan kitaxtunit. Pero uma ni tlawanit pi Jehová xasitsin nawan, wata Biblia wan pi chuntiya «xapaxuwana Dios» litaxtu (1 Tim. 1:11).

3. ¿Tuku tlan natlawayaw kimputumkan?

³ Putum akinin tlan namakgtayananaw xlakata nalitasiya pi tuku wanit Satanás xpalakata Jehová ni xaxlikana chu nakgalhmakgtayayaw xtukuwani. ¿La natlawayaw? Nakgalhakgaxmataw uma limapakgsin: «Kamalankitit xtukuwani  Jehová» (Sal. 113:1). ¿Chu la natlawayaw uma? Tlan nalichuwinanaw tiku lin uma xasanto tukuwani. ¿Chuna tlawaputuna wix? Kalichuwinaw pulaktutu tuku nakinkamakgtayayan namalankiyaw xtukuwani Jehová xliputum kinakujkan.

MAKGAPAXUWAYAW JEHOVÁ

4. Kalichuwinanti akgtum liʼakxilhtit nema limasiya tuku xlakata Jehová paxuwa akxni malankiyaw (na kaʼakxilhti dibujo).

⁴ Jehová wa kinTlatkan xalak akgapun, chu xla tlan limakgkatsi akxni malankiyaw xtukuwani (Sal. 119:108). ¿Wamputun uma pi Dios Tiku kgalhi putum litliwakga xtachuna la latamanin tiku makglakgalhinankgo, tiku kajwatiya putsakgo nakamalankikan xlakata tlan namakgkatsikgo? Nichuna. Xlakata liwana naʼakgatekgsaw, kalilakpuwaw chatum aktsu tsumat tiku talakatsuwini xtlat, akgpixti chu wani: «¡Tlat, lu kpaxkiyan!». Uma tlat lu paxuwa xlakata xtsumat limasiyanima xtapaxkit. ¿Tuku xlakata? ¿Wamputun pi makgkatsi pi nitu litaxtu chu wa xlakata lakaskin pi xtsumat nawani lakstlan tachuwin xlakata namakgkatsi pi xtapalh litaxtu? Nichuna. Kajwatiya lakaskin pi xtsumat nalimasiyani pi paxki chu paxtikatsini. Nachuna, katsi pi umakgolh tayat namakgtaya napaxuwa akxni nastaka. Xtachuna la uma, Jehová, tlakg xatlan tlat nema anan, paxuwa akxni malankiyaw.

5. ¿Tuku limasiyayaw akxni malankiyaw Jehová?

⁵ Satanás wanit akgtum taʼakgsanin kimpalakatakan. Wan pi nipara chatum lataman katikgalhmakgtayalh Dios akxni natitaxtu tuku tuwa chu namakgatsankganani. Satanás wan pi putum namakgxtakgaw Dios komo namakgkatsiyaw pi chuna tlakg tlan nakinkakitaxtuniyan (Job 1:​9-11; 2:4). Pero Job, tiku ni makgxtakgli Jehová, limasiyalh pi Satanás chatum akgsanina. ¿Chu tuku tlan nawanaw kimpalakatakan? Akxni malankiyaw Jehová, na limasiyayaw pi ni xlikana tuku wan Satanás. Chatunu akinin akgtum talakgalhaman liʼakxilhaw nakgalhmakgtayayaw xtukuwani Jehová chu ni namakgatsankgananiyaw xlakata chuna namakgapaxuwayaw (Prov. 27:11).

6. ¿La tlan nastalaniyaw xliʼakxilhtit mapakgsina David chu levitas? (Nehemías 9:5).

⁶ Tiku paxkikgo Jehová malankiputunkgo xtukuwani xliputum xnakujkan. Mapakgsina David tsokgwililh: «Kamalanki Jehová, kilistakna; putum tuku wi kkinaku kamalankilh xasanto xtukuwani» (Sal. 103:1). David xʼakgatekgsa pi akxni malankiyaw xtukuwani Jehová, wa Jehová tiku malankimaw.  Nalichuwinanaw xtukuwani kilhchanima nalichuwinanaw tuku tlawa, xalakstlan xtayat chu xtamalakatsukin. David xasanto xliʼakxilhputun xtukuwani xTlat xalak akgapun chu xmalankiputun. Wa pi xmalankiputun xliputum xnaku. Levitas na malankikgolh Jehová. Xlakan wankgolh pi ni akchan tachuwin nema tlan nalimalankikan xasanto xtukuwani Jehová (kalikgalhtawakga Nehemías 9:5). ¡Xlikana pi Jehová lu paxuwalh akxni kgaxmatli pi xliputum xnakujkan xmalankimakgo!

7. Kalichuwinanti pulaktiy la tlan namalankiyaw Jehová.

⁷ Akinin tlan namalankiyaw Jehová akxni xatapaxuwan nalichuwinanaw xtukuwani. Akxni kalitachuwinanaw Dios latamanin, lakaskinaw pi xlakan kalakgapasputunkgolh chu na kapaxkikgolh chuna la akinin paxkiyaw (Sant. 4:8). Lu lakgatiyaw kamasiyaniyaw tuku wan Biblia xlakata xalaktlan tayat nema kgalhi Jehová, pi xapaxkina, xaʼakgstitum, xaskgalala chu lu tliwakga. Atanu la tlan namalankiyaw Jehová chu namakgapaxuwayaw xnaku, wa pi natlawayaw chuna la xla (Efes. 5:1). Akxni chuna tlawayaw, latamanin max naʼakxilhkgo pi akinin nichuna likatsiyaw la amakgapitsin chu max nalilakpuwankgo tuku xlakata chuna likatsiyaw (Mat. 5:​14-16). Max namin kilhtamaku tlan nakalitachuwinanaw tuku xlakata akinin chuna likatsiyaw. Chu kalakapastakwi pi xatlan kintayatkan natlawa pi tiku tlan likatsikgo natalakatsuwiniputunkgo kiDioskan. Akxni tlawayaw putum uma, makgapaxuwayaw xnaku Jehová (1 Tim. 2:​3, 4).

MAKGAPAXUWAYAW JESÚS

8. ¿Tuku xlakata Jesús wililh tlakg xatlan liʼakxilhtit xlakata la malankikan xtukuwani Jehová?

⁸ Ni anan tiku tlakg lakgapasa Jehová nixawa Jesús (Mat. 11:27). Jesús paxki xTlat chu kinkawilinin lu xatlan liʼakxilhtit xlakata la malankikan xtukuwani Jehová (Juan 14:31). Katsisni akxni Jesús xʼama niy, tlawanilh akgtum oración xTlat niku lichuwinalh tuku xtlawanit: «Akit kkamasiyaninit mintukuwani» (Juan 17:26). ¿La tlawalh uma?

9. ¿Tuku parábola maklakaskilh Jesús xlakata liwana namasiya la likatsi Jehová?

⁹ Jesús ni kajwatiya kawanilh latamanin pi xtukuwani Dios wa Jehová. Judíos xkatsikgoya uma. Wata kamasiyanilh la xlikatsi (Juan 1:​17, 18). Akgtum liʼakxilhtit, Tatsokgni xa’Hebreo xwan pi Jehová xalakgalhamanina chu tapatinan (Éx. 34:​5-7). Pero Jesús kamakgtayalh liwana naʼakgatekgskgo uma akxni kalitachuwinalh parábola xla kgawasa tiku laktlawamilh xʼherencia. Akxni likgalhtawakgayaw kBiblia pi xatlat lakapala lakgalh xkgawasa maski «lakgamakgatku xminacha», akgpixtilh chu tapatilh, liwana akxilhaw pi Jehová xalakgalhamana chu tapatinan (Luc. 15:​11-32). Xlikana pi Jesús kamakgtayalh latamanin naʼakgatekgskgo la likatsi Jehová.

10. 1) ¿Tuku xlakata katsiyaw pi Jesús maklakaskilh xtukuwani xTlat chu xlakaskin pi amakgapitsin na xmaklakaskinkgolh? (Marcos 5:19; na kaʼakxilhti dibujo). 2) ¿Tuku lakaskin Jesús natlawayaw?

¹⁰ ¿Xlakaskin Jesús pi amakgapitsin na xmaklakaskinkgolh xtukuwani xTlat? Chuna. Max makgapitsi xpulalinanin takanajla xala ama kilhtamaku xlakpuwankgo pi xtukuwani Dios lu xasanto xwanit chu wa xlakata ni xlitamapakuwit xwanit. Pero Jesús ni mastalh talakaskin pi ama talismanin nema ni xtakilhtiyanit kTatsokgni xtlawalh pi ni xmalankilh xtukuwani xTlat. Kalilakpuwaw akxni mapaksalh chatum chixku tiku xlaktanuma demonio kxkachikinkan gerasenos. Latamanin lu pekuankgolh, wa xlakata wanikgolh Jesús pi xtaxtulh kʼuma kachikin (Mar. 5:​16, 17). Pero xla xlakaskin pi putum xlakgapaskgolh xtukuwani Jehová. Wa xlakata akxni  nina xʼan, wanilh ama chixku pi xkawanilh latamanin pi wa Jehová tiku xmakgtayanit (kalikgalhtawakga Marcos 5:19). a KiMapakgsinakan, Jesús, lakaskin pi nachuna katlawaw, kakamasiyaniw xtukuwani Jehová putum latamanin (Mat. 24:14; 28:​19, 20). Akxni chuna tlawayaw, makgapaxuwayaw.

11. ¿Tuku kawanilh Jesús kstalaninanin pi kskinkgolh kxʼoracioneskan, chu tuku xlakata lu xlakaskinka uma? (Ezequiel 36:23).

¹¹ Jesús xkatsi pi xtalakaskin Jehová wa pi xtasantujlilh xtukuwani, uma wamputun pi xlitasiyalh pi ni xlikana tuku limawakakanit. Wa xlakata kamasiyanilh kstalaninanin naskinkgo kxʼoracionkan: «KinTlatkan tiku wilapi kʼakgapun, katamasantujlilh mintukuwani» (Mat. 6:9). Jesús xʼakgatekgsa pi ni anan atanu tuku tlakg xlakaskinka nixawa uma (kalikgalhtawakga Ezequiel 36:23). Chu ni anan atanu tiku tlakg liskujnit xlakata namasantujli xtukuwani Jehová chuna la tlawalh Jesús. Pero akxni xtalamakgasitsin chipakgolh, ¿tuku limawakakgolh? Limawakakgolh pi xmaxkajwaninit xasanto xtukuwani xTlat. Wa uma tuku tlakg xalanka talakgalhin xliʼakxilha Jesús. Chu akxni nina xchipakan, nitlan xlimakgkatsimaja xlakata xkatsi pi xʼamaka limawakakan pi xmaxkajwaninit xtukuwani Dios chu wa xʼamaka limakgnikan. Max wa uma tuku xlakata «lu xlipuwaxnima» uma kilhtamaku (Luc. 22:​41-44).

12. ¿Tuku tlawalh Jesús xlakata xmasantujlilh xtukuwani xTlat?

¹² Jesús tayanilh tuku tlawanika chu tuku limawakaka xlakata namasantujli xtukuwani xTlat. Xla xkatsi pi xkgalhakgaxmatnanit chu ni xʼanan tuku xlimaxanalh (Heb. 12:2). Na xkatsi pi tiku xputsananima uma kilhtamaku wa Satanás (Luc. 22:​2-4; 23:​33, 34). Satanás xlakaskin pi Jesús xmakgatsankgananilh Jehová, ¡pero ni matlanilh! Jesús liwana limasiyalh pi Satanás chatum akgsanina chu pi Jehová kgalhi kskujnin tiku ni makgxtakgkgo asta maski natitaxtukgo tuku lu tuwa.

13. ¿Tuku kilitlawatkan xlakata namakgapaxuwayaw kiMapakgsinakan?

¹³ ¿Makgapaxuwaputuna wix miMapakgsina Jesucristo? Komo chuna, chuntiya kamalanki xtukuwani Jehová chu kakamakgtaya  amakgapitsin naʼakxilhkgo la xlikana likatsi. Chuna stalanipat nawan xliʼakxilhtit Jesús (1 Ped. 2:21). Chu chuna la Jesús, namakgapaxuwaya Jehová chu nalimasiyaya pi xtalamakgasitsin, Satanás, chatum akgsanina.

KAKAMAKGTAYAW LATAMANIN XLAKATA NALAKGTAXTUKGO

14, 15. ¿Tuku lu tlan kitaxtu akxni kamasiyaniyaw latamanin xaxlikana xlakata Jehová?

¹⁴ ¿Tuku xlakata wanaw pi akxni malankiyaw xtukuwani Jehová kamakgtayayaw latamanin nalakgtaxtukgo? Xlakata Satanás «kamalakgatsininit xtalakapastaknikan» tiku ni kanajlakgo (2 Cor. 4:4). Wa xlakata lhuwa latamanin kanajlanikgonit xtaʼakgsanin chu lakpuwankgo pi Dios niti lama, pi nila talakatsuwinikan, pi ni kinkalilakgaputsayan, pi lixkajni likatsi chu kamakgapatinan putum kilhtamaku tiku nitlan likatsikgo. Umakgolh taʼakgsanin maxkajwi xtukuwani Jehová chu tlawa pi nitlan nalichuwinankan xlakata niti natalakatsuwini. Pero akxni kalitachuwinanaw chu kamasiyaniyaw latamanin tuku xaxlikana xlakata kinTlatkan, limasiyayaw pi Satanás xaʼakgsanina chu malankiyaw xasanto xtukuwani Jehová. ¿Tuku kitaxtu akxni chuna tlawayaw?

¹⁵ Xaxlikana tuku masiya Biblia tlan kalakgpalini xlatamatkan latamanin. Akxni kamasiyaniyaw tiku Jehová chu la likatsi, lu kaks malakawaninan tuku kitaxtu. Chuna la akxilhtilhakgo pi tuku wan Akgskgawini ni xaxlikana tsukukgo akxilhkgo kinTlatkan xalak akgapun chuna la akinin akxilhaw. Kaks lilakawankgo akxni akxilhkgo litliwakga nema kgalhi (Is. 40:26). Lu tlan kamamakgkatsini pi xla xaʼakgstitum likatsi (Deut. 32:4). Kaks lilakawankgo akxni akxilhkgo pi xla lu skgalala (Is. 55:9; Rom. 11:33). Chu lu tlan makgkatsikgo akxni katsikgo pi xla tapaxkit (1 Juan 4:8). Akxni tlakg lakgapaskgo Jehová, liwana kanajlakgo pi tlan nalatamakgo putum kilhtamaku chu xkamanan nalitaxtukgo. ¿Ni xlikana pi akgtum talakgalhaman nakamakgtayayaw natalakatsuwinikgo xTlatkan xalak akgapun? Chu akxni chuna tlawayaw, Jehová «xtaskujnin» kinkaliʼakxilhan (1 Cor. 3:​5, 9).

16. ¿Tuku tlan kitaxtu maski kaj xtukuwani Dios nakalitachuwinanaw latamanin? Kalichuwinanti akgtum liʼakxilhtit.

 ¹⁶ Akxni wi tiku litachuwinanaw Dios, max xapulana kajwatiya namasiyaniyaw pi xtukuwani wa Jehová. Chu maski kajwatiya uma nawaniyaw, komo lataman tlan likatsi, uma tlan nalakgpalini xlatamat. Akgtum liʼakxilhtit, chatum tsumat tiku wanikan Alía b makgastakka kʼakgtum familia nema xkgalhi xtakanajla pero ni kstalanikgo tuku masiya Biblia. Alía ni xlipaxuwa tuku xmasiyanikanit chu xmakgkatsi pi ni lakatsu xwilanilh Dios. Pero akxni tsukulh katakgalhtawakga xtatayananin Jehová, putum uma talakgpalilh. Akxni katsilh pi ktipalhuwa Biblias xlilakgpalikanit xtukuwani Dios atanu tuku lilakgapaskan, chuna la Malana, nila xkanajla. Akxni katsilh tuku xtukuwani Dios, talakgpalilh putuminika xlatamat xlakata tsukulh liʼakxilha chuna la chatum xʼamigo. Alía wa: «¡Ki’amigo xkgalhi xtukuwani! La uku tlan kmakgkatsi. Akgtum talakgalhaman kliʼakxilha pi klakgapasa xtukuwani Dios». Steve chatum tlakgna tiku kstaknit kʼakgtum familia judía. Xlakata xʼakxilhnit pi takanajla ni xmasiyakgo tuku xaxlikana ni xmakgtapakgsiputun kʼakgtum takanajla. Pero akxni chatum tiku xalak xfamilia nilh, makgtawi chu kgaxmatli akxni chatum xtatayana Jehová xlimakgalhtawakgenama Biblia. Akxni katsilh tuku wanikan Dios, lakgchalh xnaku. Steve wan: «Nipara tsinu xakkatsi tuku xwanikan Dios. Xlimakgtumku kakxilhli pi Dios xlikana lama. Ama kilhtamaku kakxilhli pi xaktekgsnit chatum amigo».

17. ¿Tuku xlakata chuntiya malankiputuna wix xtukuwani Jehová? (Na kaʼakxilhti dibujo).

¹⁷ Akxni kalitachuwinanaw Dios latamanin o kamasiyaniyaw, ¿kalitachuwinanaw xtukuwani chu la likatsi? Komo chuna natlawayaw, malankimaw nawan xtukuwani. Wa xlakata chuntiya kakamakgtaya latamanin nalakgapaskgo la likatsi Jehová chu chuna namalankiya xasanto xtukuwani. Akxni chuna natlawaya, nakamakgtayaya latamanin nalakgtaxtukgo, stalanipat nawan xliʼakxilhtit kiMapakgsinakan Jesucristo chu tuku tlakg xlakaskinka, namakgapaxuwaya xapaxkina kinTlatkan, Jehová. Chuna la wa tiku tsokgwililh Salmo 145:​2, putum akinin kawaw: «Tantaku nakmalankiyan, putum kilhtamaku nakmalanki mintukuwani».