1-2. Wanem stori inap helpim yumi long kliagut long samting Jehova i pilim taim Satan i bagarapim gutnem bilong em?

 TINGIM dispela: Wanpela yu laikim tru i mekim wanpela tok i bagarapim gutnem bilong yu. Yu save olsem dispela tok em i no tru, tasol sampela i bilipim dispela tok. Na samting i nogut moa, ol i go stori gen long ol narapela long dispela tok giaman, na planti narapela tu i bilipim dispela tok giaman. Yu bai pilim olsem wanem? Sapos yu save tingim ol narapela na gutnem bilong yu, ating dispela tok giaman bai bagarapim tru bel bilong yu, a?—Prov. 22:1.

² Dispela stori inap helpim yumi long kliagut long samting Jehova i pilim taim gutnem bilong em i bin bagarap. Wanpela pikinini bilong em long heven i mekim ol tok giaman long em long fes meri, em Iv. Iv i bilipim ol dispela tok giaman. Na ol dispela tok giaman i kirapim Adam na Iv long bikhet long Jehova. Olsem na olgeta man i gat sin na ol i save dai. (Stt. 3:​1-6; Rom 5:12) Ol hevi yumi lukim long olgeta hap bilong graun—ol man i dai, ol woa, na ol pen na hevi—olgeta i kamap bikos long ol tok giaman Satan i bin mekim long gaden Iden. Yu ting Jehova i bel hevi long ol dispela tok giaman na ol hevi dispela i kamapim? Yes, em i bel hevi tru. Tasol Jehova i no save bel nogut, nogat. Oltaim em i stap olsem “God bilong amamas.”—1 Tim. 1:11.

3. Yumi ken mekim wanem?

³ Yumi ken helpim wok bilong stretim bek gutnem bilong Jehova long rot bilong bihainim dispela tok olsem: “Preisim nem bilong Jehova.” (Sng. 113:1) Yumi preisim nem bilong Jehova taim yumi tokim ol narapela long ol gutpela pasin bilong em. Yu ting yu ken mekim olsem? Yumi ken stori long 3-pela bikpela risen we bai helpim yumi long givim bel olgeta long preisim nem bilong God bilong yumi.

YUMI AMAMASIM JEHOVA TAIM YUMI PREISIM NEM BILONG EM

4. Taim yumi preisim Jehova, bilong wanem dispela i amamasim em? (Stori long tok piksa.)

⁴ Yumi amamasim Papa bilong yumi long heven taim yumi preisim  nem bilong em. (Sng. 119:108) Tasol yu ting dispela i makim olsem God i Gat Olgeta Strong em i wankain olsem ol man i no gutpela olgeta, em ol i laik bai ol narapela i preisim ol bikos ol i nidim kain tok amamas olsem? Nogat. Tingim dispela tok piksa. Wanpela liklik gel i ran i go long papa bilong em, holimpasim em, na em i tok, “Dedi yu em bes ya!” Papa i amamas tru, na em i pilim tru dispela samting pikinini i mekim. Bilong wanem? Yu ting i stret long yumi ting olsem dispela papa i gat strongpela laik olsem pikinini bilong em i mas preisim em long olgeta taim? Nogat. Yumi save olsem em i amamas bikos em i laikim pikinini meri bilong em na em i amamas olsem pikinini i soim em olsem em i laikim em na em i tenkyu long em. Em i save olsem kain ol gutpela pasin bai helpim pikinini long stap amamas taim em i go bikpela. Long ol wankain risen olsem, Jehova em nambawan gutpela Papa, em i amamas taim yumi preisim em.

5. Taim yumi preisim nem bilong God, yumi daunim wanem tok giaman?

⁵ Taim yumi preisim Papa bilong yumi long heven, yumi daunim narapela tok giaman Satan i sutim long yumi olgeta wan wan. Satan i tok i no gat wanpela man bai stap gut na sambai long nem bilong God. Em i tok yumi ol man i no inap stap gut long God. Em i tok sapos taim nogut i painim yumi, yumi bai givim baksait long God bilong seivim laip bilong yumi yet. (Jop 1:​9-11; 2:4) Tasol bilipman Jop i kamapim klia olsem tok bilong Satan em i no tru. Olsem wanem? Yu tu bai stap gut long God? Yumi olgeta wan wan i ken makim olsem yumi laik sambai long nem bilong Papa bilong yumi na amamasim em long rot bilong stap gut long em na mekim wok bilong em. (Prov. 27:11) Tru tumas, em gutpela blesing tru long mekim olsem.

6. Olsem wanem yumi ken bihainim pasin bilong King Devit na ol Livai? (Nehemia 9:5)

⁶ Ol lain i laikim God i laik preisim nem bilong em long bel olgeta. King Devit i tok: “Mi mas preisim Jehova. Na olgeta samting insait long mi i mas preisim nem holi bilong em.” (Sng. 103:1) Devit i kliagut olsem taim em i preisim nem bilong Jehova, em i preisim Jehova. Taim yumi harim nem bilong Jehova, yumi tingim gutnem bilong em na yumi tingim olgeta gutpela pasin bilong em na ol narakain wok em i bin mekim. Devit i laik mekim holi nem bilong Papa bilong em na preisim nem bilong em. Em i laik mekim olsem long bel olgeta, i olsem em i laik givim “olgeta samting insait” long em long preisim God. Olsem tasol, ol Livai i go pas long preisim Jehova. Long pasin daun, ol i tokaut olsem maski ol i preisim na litimapim nem holi bilong Jehova, dispela em i no inap. (Ritim Nehemia 9:5.) Tru tumas, Jehova i amamas taim ol i daunim ol yet na long bel olgeta ol i preisim nem bilong em.

7. Olsem wanem yumi ken preisim Jehova long taim yumi autim tok na long ol samting yumi mekim long olgeta wan wan de?

 ⁷ Long nau, yumi ken amamasim Jehova long rot bilong tokim ol narapela long em long pasin we i soim olsem yumi tenkyu long em na yumi laikim em. Taim yumi autim tok, nambawan samting yumi laik tingim em long helpim ol manmeri long i go klostu long Jehova, na helpim ol long holim wankain tingting olsem yumi long gutpela Papa bilong yumi. (Jems 4:8) Yumi amamas long soim ol manmeri olsem Baibel i kamapim klia olsem Jehova i gat pasin laikim, stretpela pasin, savetingting, bikpela strong, na ol narapela gutpela pasin. Na tu, yumi preisim Jehova na amamasim em taim yumi wok strong long bihainim ol pasin bilong em. (Efe. 5:1) Taim yumi mekim olsem, ol narapela inap luksave olsem yumi no wankain olsem ol manmeri bilong dispela graun. Dispela i mekim na ol inap kisim tingting olsem wai na yumi olsem. (Mat. 5:​14-16) Taim yumi toktok o mekim ol samting wantaim ol, yumi inap stori long ol long as na yumi no wankain olsem ol manmeri bilong dispela graun. Dispela i mekim na ol man i gat gutpela bel i laik i go klostu long God bilong yumi. Taim yumi preisim Jehova long ol dispela rot, yumi mekim bel bilong em i amamas.—1 Tim. 2:​3, 4. 

YUMI AMAMASIM JISAS TAIM YUMI PREISIM NEM BILONG JEHOVA

8. Olsem wanem Jisas em i gutpela eksampel long pasin bilong preisim nem bilong Jehova?

⁸ Jisas tasol i save tru long Papa winim olgeta ensel long heven na ol manmeri long graun. (Mat. 11:27) Jisas i laikim Papa bilong em, na em i stap gutpela eksampel long pasin bilong preisim nem bilong Jehova. (Jon 14:31) Long beten em i mekim long Papa bilong em long nait paslain long em i dai, em i kamapim klia nambawan bikpela samting em i mekim long wok autim tok bilong em na em i tok: “Mi bin kamapim nem bilong yu.” (Jon 17:26) Tok bilong em i makim wanem samting?

9. Olsem wanem Jisas i yusim wanpela tok piksa long stori gut long Papa bilong em?

⁹ Jisas i kamapim klia long ol manmeri olsem nem bilong God em Jehova, na em i mekim sampela samting moa. Ol Juda em Jisas i skulim ol, ol i save pinis long nem bilong God. Tasol Jisas i go pas long “stori gut . . . long Papa.” (Jon 1:​17, 18) Olsem, Ol Skripsa Hibru i kamapim klia olsem Jehova i gat pasin marimari na pasin sori. (Kis. 34:​5-7) Jisas i kamapim klia dispela tok i tru taim em i stori long tok piksa bilong pikinini i lusim papa. Dispela pikinini i tanim bel na i kam bek long papa, na papa i lukim em “taim em i stap longwe yet” na em i ran i go bungim em na holimpasim em, na long bel olgeta em i fogivim em. Dispela i helpim yumi long luksave long pasin marimari na pasin sori bilong Jehova. (Luk 15:​11-32) Jisas i helpim yumi long kliagut long Jehova em i wanem kain Man.

10. (a) Hau yumi save olsem Jisas i kolim nem bilong Papa bilong em na em i laik bai ol narapela tu i mekim olsem? (Mak 5:19) (Lukim tu piksa.) (b) Jisas i laik bai yumi mekim wanem long nau?

¹⁰ Yu ting Jisas i laik bai ol narapela tu i kolim nem bilong Papa bilong em? Yes, em i laik ol i mekim olsem. Long taim bilong Jisas, ating sampela hetman bilong lotu i ting olsem nem bilong God em i holi tumas long kolim, tasol Jisas i no larim ol kain tingting em Baibel i no as bilong en i pasim em long onarim nem bilong Papa bilong em. Tingim dispela taim we Jisas i bin rausim ol spirit nogut long wanpela man long hap bilong Gerasa. Ol manmeri i pret na ol i tokim Jisas long lusim dispela hap na i go, so em i no stap long dispela hap. (Mak 5:​16, 17) Maski i olsem, Jisas i laik bai ol manmeri long dispela hap i save long nem bilong Jehova. Olsem na em i tokim dispela man em i bin oraitim long tokim ol manmeri long samting Jehova i bin mekim na i no samting Jisas i bin mekim. (Ritim  Mak 5:19.) a Em i laik bai yumi tu i mekim olsem long nau—yumi mas tokim ol manmeri long olgeta hap bilong graun long nem bilong Papa bilong em! (Mat. 24:14; 28:​19, 20) Taim yumi mekim olsem, yumi amamasim King bilong yumi, Jisas.

11. Jisas i skulim ol disaipel bilong em long beten long wanem samting, na bilong wanem dispela i bikpela samting? (Esekiel 36:23)

¹¹ Jisas i save olsem Jehova i tingting pinis long mekim holi nem bilong Em, na pinisim olgeta tok giaman Satan i bin kamapim long em. Em risen na Jisas i skulim ol disaipel bilong em long beten olsem: “Papa bilong mipela long heven, nem bilong yu i mas i stap holi.” (Mat. 6:9) Jisas i save olsem dispela em bikpela tok i bin kamap na yumi olgeta manmeri i insait long en. (Ritim Esekiel 36:23.) Jisas i mekim olgeta samting bilong mekim holi nem bilong Jehova winim ol ensel long heven na ol manmeri long graun. Tasol taim ol birua i arestim Jisas, ol i sutim wanem tok long em? Ol i tok olsem em i tok bilas long God! Jisas i pilim olsem pasin bilong bagarapim o krungutim nem holi bilong Papa bilong em, dispela em wanpela bikpela sin. Em i bel hevi tru olsem ol man bai sutim tok long em olsem em i tok bilas long God na ol i kotim em long dispela. Ating dispela em nambawan risen na Jisas i “pilim hevi tru” insait long ol aua paslain long ol i arestim em.—Luk 22:​41-44.

12. Olsem wanem Jisas i mekim holi nem bilong Papa bilong em winim ol ensel long heven na ol manmeri?

¹² Bilong mekim holi nem bilong Papa bilong em, Jisas i sanap strong na karim olgeta kain hevi, ol tok bilas, ol tok bilong daunim em, na ol tok giaman ol i mekim long em. Em i save olsem em i bihainim tok bilong Papa bilong em long olgeta samting em i mekim, olsem na i no gat as long em i sem long wanpela samting. (Hib. 12:2) Na tu, em i save olsem Satan i as bilong ol pen na hevi em i wok long karim long dispela taim nogut. (Luk 22:​2-4; 23:​33, 34) Satan i tingting strong tru long bagarapim pasin bilong Jisas long stap gut long God, tasol em i no inap tru long mekim olsem! Long olgeta tok na ol pasin Jisas i mekim, em i kamapim klia tru olsem Satan em i man nogut na em i man bilong giaman, na Jehova i gat ol gutpela wokman em ol i holimpas yet pasin bilong stap gut long em maski ol i feisim ol bikpela traim!

13. Yu ken mekim wanem bilong amamasim King bilong yu?

 ¹³ Yu laik amamasim King bilong yu? Wok yet long preisim nem bilong Jehova, helpim ol narapela long kisim save long ol gutpela pasin bilong God bilong yumi. Taim yu mekim olsem, yu bihainim lek mak bilong Jisas. (1 Pita 2:21) Olsem Jisas, yu wok long mekim Jehova i amamas na yu kamapim klia olsem Satan, dispela birua bilong Em, em i man bilong giaman!

TAIM YUMI PREISIM NEM BILONG JEHOVA, YUMI HELPIM OL MAN LONG KISIM LAIP

14-15. Wanem ol gutpela samting inap kamap taim yumi skulim ol manmeri long Jehova?

¹⁴ Taim yumi preisim nem bilong Jehova, yumi helpim ol manmeri long kisim laip. Wai na yumi tok olsem? Bikos Satan i “pasim tingting” bilong “ol man i no bilip.” (2 Kor. 4:4) Olsem na ol i bilipim ol tok giaman bilong Satan olsem: I no gat God i stap, God i stap longwe long yumi na em i no save tingim yumi ol man, God em i man nogut na em i save givim pen long ol man nogut inap oltaim oltaim. Ol kain tok giaman olsem i bilong bagarapim o krungutim gutnem bilong Jehova, na bai ol manmeri i no laik i go klostu long em. Tasol wok bilong yumi i pasim Satan long inapim samting em i tingting pinis long mekim. Yumi skulim ol manmeri long tok i tru long Papa bilong yumi, na yumi preisim nem holi bilong God bilong yumi. Wanem gutpela samting i kamap long dispela?

¹⁵ Ol tok i tru i stap long Tok Bilong God i gat bikpela strong. Taim yumi skulim ol manmeri long Jehova na ol pasin bilong em, gutpela samting i kamap long dispela. Isi isi ol manmeri i luksave long ol tok giaman bilong Satan na ol i no bilipim moa ol dispela tok giaman, na ol i kirap long luksave long ol gutpela pasin bilong Papa bilong yumi. Ol i kirap nogut long bikpela strong bilong em. (Ais. 40:26) Ol i bilip tru long stretpela pasin bilong em. (Lo 32:4) Ol i lainim planti samting long bikpela savetingting bilong em. (Ais. 55:9; Rom 11:33) Na ol i kisim bel isi long save olsem em i As bilong pasin laikim. (1 Jon 4:8) Taim ol i go klostu moa long Jehova, dispela i strongim pasin bilong ol long bilip na wet long taim ol bai stap laip oltaim olsem ol pikinini bilong em. Yumi amamas tru olsem yumi gat gutpela wok tru long helpim ol manmeri long i go klostu long Papa bilong ol! Taim yumi mekim  olsem, Jehova i tingim yumi olsem “ol wanwok” bilong em.—1 Kor. 3:​5, 9.

16. Taim sampela manmeri i kisim save long nem bilong God, dispela i mekim wanem long ol? Stori long sampela eksampel.

¹⁶ Long namba wan taim yumi bungim man bilong haus, ating yumi skulim em tasol olsem nem bilong God em Jehova. Man i gat gutpela bel inap pilim tru dispela save em i kisim. Olsem, wanpela yangpela meri nem bilong em Aaliyah b em i kamap bikpela long wanpela famili em ol i no Kristen. Tasol em i no amamas long lotu bilong em na em i pilim olsem em i no pas gut wantaim God. Dispela i senis taim em i kirap stadi wantaim ol Witnes. Nau em i kirap long tingim God olsem Pren bilong em. Na em i kirap nogut long save olsem ol man i bin rausim nem bilong God long planti Baibel na ol i putim ol biknem olsem Bikpela. Laip bilong em i senis taim em i kisim save long nem bilong Jehova. Em i tok: “Bes Pren bilong mi i gat nem!” Wanem gutpela samting i kamap? Em i tok: “Nau mi pilim bel isi tru. Mi amamas tru.” Wanpela man bilong pilaim musik em nem bilong em Steve, em i kamap bikpela insait long wanpela famili Juda. Em i no laik bihainim wanpela lotu bikos em i luksave olsem pasin bilong tupela maus i pulap insait long ol lotu. Tasol bihain long mama bilong em i dai, em i orait long sindaun long wanpela Baibel stadi em wanpela Witnes Bilong Jehova i mekim. Taim em i kisim save long nem bilong God, em i pilim tru long bel dispela save em i kisim. Em i tok: “Mi no bin save long nem bilong God.” Em i tok moa: “Dispela em fes taim mi kliagut olsem God i stap tru! Mi tingim em olsem wanpela Man i stap tru. Long dispela taim mi save tru olsem mi kisim wanpela Pren.”

17. Wai na yu tingting strong long wok yet long preisim nem bilong Jehova? (Lukim tu piksa.)

¹⁷ Taim yu autim tok na skulim ol man, yu save tokim ol long nem holi bilong Jehova? Yu save helpim ol long save long ol pasin bilong God bilong yumi? Taim yu mekim olsem, yu preisim nem bilong God. Yu ken wok yet long preisim nem holi bilong Jehova long rot bilong helpim ol manmeri long save long ol pasin tru bilong em. Long dispela rot, yu bai helpim ol man long kisim laip. Yu bai bihainim lek mak bilong King bilong yu, em Jisas Krais. Na bikpela samting moa, yu bai amamasim gutpela Papa bilong yu, Jehova. ‘Oltaim oltaim yu ken preisim nem’ bilong em!—Sng. 145:2.