1-2. I yini leswi nga hi pfunaka hi twisisa ndlela leyi Yehovha a titwaka hayona loko a thyakisiwa vito?

 EHLEKETA hi leswi: A hi nge munhu loyi u n’wi rhandzaka u vula swilo swo biha hi wena. Wa swi tiva leswaku sweswo i mavunwa kambe van’wana va swi tshemba. Lexi twisaka ku vava, van’wana va sungula ku haxa mavunwa wolawo naswona vo tala va ma tshemba. A wu ta titwa njhani? Loko u khathala hi vanhu ni hi ndhuma ya wena leyinene, a swi kanakanisi leswaku mavunwa wolawo ma ta ku twisa ku vava.—Swiv. 22:1.

² Xikombiso lexi, xi nga hi pfuna hi twisisa ndlela leyi Yehovha a titweke hayona loko a thyakisiwa vito. Yin’wana ya tintsumi takwe yi vulavule mavunwa hi yena eka Evha, wansati wo sungula. U tshembe mavunwa wolawo. Mavunwa wolawo ma endle leswaku vatswari va hina vo sungula va xandzukela Yehovha. Hikwalaho ka sweswo, xidyoho ni rifu swi tlulele vanhu. (Gen. 3:​1-6; Rhom. 5:12) Swiphiqo hinkwaswo leswi nga kona namuntlha, ku nga rifu, tinyimpi ni ku xaniseka swi ve kona hikwalaho ka mavunwa lawa Sathana a sunguleke ku ma vula entangeni wa Edeni. Xana Yehovha u twa ku vava hikwalaho ka mavunwa wolawo ni swiphiqo leswi veke kona hikwalaho ka wona? A swi kanakanisi leswaku ma n’wi twisa ku vava kambe Yehovha a nga dyanga makala kumbe a va ni xikhomela. Ku hambana ni sweswo, u tshama a ri “Xikwembu lexi tsakeke.”—1 Tim. 1:11.

3. Hi ni nkateko wihi?

³ Hi ni nkateko wa ku pfuneta ku basisiwa ka vito ra Yehovha hi ku va hi yingisa xileriso xakwe lexi nge: “Dzunisani vito ra Yehovha.”  (Ps. 113:1) Hi dzunisa vito ra Yehovha loko hi byela van’wana ntiyiso hi yena. Xana u ta endla tano? A hi kambisiseni swivangelo swinharhu swa nkoka leswi nga ta hi pfuna leswaku hi dzunisa vito ra Xikwembu xa hina hi timbilu ta hina hinkwato.

HI TSAKISA YEHOVHA LOKO HI DZUNISA VITO RAKWE

4. Hikwalahokayini Yehovha a tsaka loko hi n’wi dzunisa? Kombisa. (Nakambe vona xifaniso.)

⁴ Hi tsakisa Tata wa hina wa le tilweni loko hi dzunisa vito rakwe. (Ps. 119:108) Xana leswi swi vula leswaku Xikwembu xa matimba hinkwawo xi fana ni vanhu lava endlaka swihoxo naswona va lavaka ku dzunisiwa hikwalaho ka ku va va nga titshembi? Doo! Xiya xikombiso lexi. Ehleketa hi xinhwanyetana lexi tsutsumelaka eka tata wa xona ivi xi fika xi n’wi angarha, xi ku, “U papa lonene emisaveni hinkwayo!” Tata wa xona wa n’wayitela ni ku tlhela a tsakisiwa hileswi xi swi vulaka. Hikwalahokayini? Xana hi nga vula leswaku i wanuna loyi a nga titshembiki loyi a navelaka ku dzunisiwa hi n’wana wakwe? Doo! Ku ri na sweswo, u tsakile hi leswi a vonaka xinhwanyetana xakwe lexi a xi rhandzaka xi kombisa leswaku xa n’wi rhandza naswona xa tlangela. Wa swi tiva leswaku loko xi kula xi ta va ni ntsako hikuva xi ni rirhandzu naswona xa tlangela. Hilaha ku fanaka, Yehovha loyi a nga Tata wa hina lonkulu wa tsaka loko hi n’wi dzunisa.

5. Hi paluxa mavunwa wahi loko hi dzunisa vito ra Xikwembu?

⁵ Loko hi dzunisa Tata wa hina wa le matilweni, hi kombisa leswaku leswi Sathana a swi vuleke hi hina hinkwerhu a hi ntiyiso. Sathana u vula leswaku a ku na munhu loyi a nga yimelaka vito ra Xikwembu hi ku tshembeka naswona a ku na loyi a nga tshamaka a tshembekile eka Xikwembu loko a ringiwa. Nakambe u tlhela a vula leswaku hi ta tshika ku tirhela Xikwembu loko hi vona onge ku endla tano a swi hi vuyerisi. (Yobo 1:​9-11; 2:4) Kambe Yobo loyi a tshameke a tshembekile eka Xikwembu u kombise leswaku Sathana i muhembi. Xana na wena u ta tshama u tshembekile eka Xikwembu? Hinkwerhu hi ni njombo yo hlawula ku yimela vito ra Tata wa hina ni ku tlhela hi n’wi tsakisa hi ku n’wi tirhela hi ku tshembeka. (Swiv. 27:11) Hakunene i nkateko ku endla tano.

6. Hi nga n’wi tekelela njhani Hosi Davhida ni Valevhi? (Nehemiya 9:5)

⁶ Lava rhandzaka Xikwembu va lava ku dzunisa vito ra xona hi timbilu ta vona hinkwato. Hosi Davhida u tsale a ku: “Ndzi ta dzunisa Yehovha; ndzi ta dzunisa vito rakwe ro kwetsima hi mbilu ya mina hinkwayo.” (Ps. 103:1) Davhida a a swi tiva leswaku loko hi dzunisa vito ra Yehovha swi fana ni loko hi dzunisa Yehovha hi yexe. Vito ra  Yehovha ri katsa ndhuma yakwe kutani loko hi twa hi rona hi ehleketa hi vumunhu byakwe lebyinene ni hi mitirho yakwe yo xonga. Davhida a a lava ku kwetsimisa ni ku dzunisa vito ra Tata wakwe. A a lava ku endla tano hi ‘mbilu yakwe hinkwayo.’ Hilaha ku fanaka, Valevhi va rhangerile eka ku dzunisa Yehovha. Hi ku titsongahata va pfumerile leswaku a va nge pfuki va swi kotile ku dzunisa vito ra Yehovha ro kwetsima hi ku helela, hilaha ri faneleke ri dzunisiwa hakona. (Hlaya Nehemiya 9:5.) A swi kanakanisi leswaku swi n’wi tsakisile Yehovha loko a vona leswaku va titsongahata naswona va n’wi dzunisa hi timbilu ta vona hinkwato.

7. Hi nga n’wi dzunisa njhani Yehovha loko hi chumayela ni le ka vutomi bya hina bya siku ni siku?

⁷ Namuntlha hi nga tsakisa Yehovha hi ku vulavula kahle hi yena ni ku kombisa leswaku ha swi tlangela leswi a hi endleleke swona ni rirhandzu rakwe. Loko hi chumayela, xikongomelo xa hina i ku pfuna vanhu va tshinela eka Yehovha ni ku va pfuna va titwa hi ndlela leyi hi titwaka hayona hi Tata wa hina loyi a nga ni rirhandzu. (Yak. 4:8) Swa hi tsakisa ku pfuna vanhu va vona ndlela leyi Bibele yi n’wi hlamuselaka hayona Yehovha, rirhandzu rakwe, vululami, vutlhari, matimba ni vumunhu byakwe byin’wana byo tsakisa. Hi tlhela hi dzunisa Yehovha ni ku n’wi tsakisa hi ku endla hinkwaswo leswi hi nga swi kotaka leswaku hi n’wi tekelela. (Efe. 5:1) Loko hi endla tano, hi kombisa leswaku a hi xiphemu xa misava leyi. Vanhu va nga ha swi xiya leswaku hi hambanile ni vanhu va misava leyi yo homboloka naswona va nga ha tivutisa leswaku hikwalahokayini. (Mat. 5:​14-16) Leswi hi hanyaka na vona, swi ta hi olovela ku va hlamusela leswaku hikwalahokayini hi hanya hi ndlela yoleyo. Sweswo swi ta va ni vuyelo lebyinene hikuva lava nga ni timbilu letinene va ta tshinela eka Xikwembu-xa hina. Loko hi dzunisa Yehovha hi tindlela toleto, hi ta tsakisa mbilu yakwe.—1 Tim. 2:​3, 4.

HI TSAKISA YESU LOKO HI DZUNISA VITO RA YEHOVHA

8. Hikwalahokayini Yesu a ri xikombiso lexinene loko swi ta emhakeni yo dzunisa vito ra Yehovha?

⁸ A ku na ntsumi kumbe munhu loyi a tivaka Yehovha ku antswa ku tlula N’wana wakwe. (Mat. 11:27) Yesu u rhandza Tata wakwe naswona u ve xikombiso lexinene eku rhangeleni ka ku dzunisa vito ra Yehovha. (Yoh. 14:31) Loko a khongela eka Tata wakwe hi vusiku byo hetelela a nga si dlayiwa, u katsakanye ntirho wakwe wa laha misaveni hi ndlela leyi: “Ndzi va tivise vito ra wena.” (Yoh. 17:26) Xana a a vula yini?

9. Xana Yesu u tirhise xikombiso xihi ku hlamusela ndlela leyi Tata wakwe a nga hayona hi ndlela leyi twisisekaka?

⁹ Yesu u endle swo tala ku tlula ku byela vanhu leswaku vito ra Xikwembu i Yehovha. Vayuda lava Yesu a va dyondziseke a va ri tiva vito ra Xikwembu. Kambe Yesu ku ve yena murhangeri loyi a ‘hlamuseleke leswaku Xikwembu i mani.’ (Yoh. 1:​17, 18) Hi xikombiso, Matsalwa ya Xiheveru ma vula leswaku Yehovha u ni tintswalo ni ntwelavusiwana. (Eks. 34:​5-7) Yesu u pfune vanhu va twisisa ntiyiso wolowo hi ku tirhisa xikombiso xa tatana loyi n’wana wakwe a lahlekeke. Loko hi hlaya leswaku tatana loyi u vone n’wana wakwe la hundzukeke “a ha ri ekulenyana,” a tsutsuma leswaku a n’wi hlanganisa, a n’wi angarha ni ku n’wi rivalela hi mbilu hinkwayo, hi kota ku swi vona kahle leswaku Yehovha u ni tintswalo ni ntwelavusiwana. (Luka 15:​11-32) Yesu u pfune vanhu va kota ku twisisa leswaku Yehovha i Xikwembu xa njhani.

10. (a) Hi swi tiva njhani leswaku Yesu u tirhise vito ra Tata wakwe ni ku tlhela a lava leswaku van’wana va ri tirhisa? (Marka 5:19) (Nakambe vona xifaniso.) (b) I yini leswi Yesu a lavaka hi swi endla namuntlha?

¹⁰ Xana Yesu a a lava leswaku vanhu van’wana va tirhisa vito ra Tata wakwe? Ina. Swi nga endleka varhangeri van’wana va vukhongeri a va tibyela leswaku loko va vitana Xikwembu hi vito a swi kombisa ku delela kambe Yesu a nga  wu pfumelelanga mukhuva wolowo lowu nga humiki ematsalweni wu n’wi sivela ku dzunisa vito ra Tata wakwe. Ehleketa hi nkarhi lowu Yesu a horiseke wanuna loyi a a ri ni madimona emugangeni wa Vagerasa. Vanhu va chavile ni ku kombela Yesu leswaku a famba emugangeni wa vona kutani a nga tshamanga emugangeni wolowo. (Mar. 5:​16, 17) Hambiswiritano, Yesu a a lava leswaku vanhu va kwalaho va tiva vito ra Yehovha. Kutani u byele wanuna yoloye leswaku a nga byeli vanhu hileswi yena a n’wi endleleke swona kambe a va byela hi leswi Yehovha a n’wi endleleke swona. (Hlaya Marka 5:19.) a Ninamuntlha Yesu u lava hi endla leswi fanaka, hi byela vanhu emisaveni hinkwayo hi vito ra Tata wakwe! (Mat. 24:14; 28:​19, 20) Loko hi endla tano, hi tsakisa Yesu Hosi ya hina.

11. I yini leswi Yesu a dyondziseke valandzeri vakwe leswaku va swi khongelela naswona hikwalahokayini sweswo swi ri swa nkoka? (Ezekiyele 36:23)

¹¹ Yesu a a swi tiva leswaku xikongomelo xa Yehovha i ku kwetsimisa vito Rakwe a ri basisa eka swihehlo hinkwaswo. Hi yona mhaka N’wini wa hina a dyondziseke valandzeri vakwe ku khongela va ku: “Tata wa hina la nga matilweni, vito ra wena a ri kwetsimisiwe.” (Mat. 6:9) Yesu a a swi tiva leswaku leyi hi yona mhaka ya nkoka leyi khumbaka swivumbiwa hinkwaswo. (Hlaya Ezekiyele 36:23.) A ku na ntsumi kumbe munhu la tshameke a kwetsimisa vito ra Yehovha ku tlula Yesu. Kambe loko Yesu a khomiwa, valala vakwe va n’wi hehle hi ku delela vito ra Tata wakwe! A swi kanakanisi leswaku Yesu a a teka ku rhukana kumbe ku delela vito ro kwetsima ra Tata wakwe ku ri xidyoho lexikulu ngopfu. Hikwalaho, u karhatekile swinene hileswi a a ta hehliwa hi ku rhukana Xikwembu. Kumbexana lexi hi xona xivangelo lexikulu lexi endleke Yesu a va ni “gome lerikulu” loko a ri ekusuhi ni ku khomiwa.—Luka 22:​41-44.

12. Yesu u ri kwetsimise njhani vito ra Tata wakwe hi ndlela leyikulu?

¹² Leswaku Yesu a kota ku kwetsimisa vito ra Tata wakwe, u tiyisele ku xanisiwa hi tindlela hinkwato, a rhukaniwa ni ku hehliwa hi mavunwa. A a swi tiva leswaku u yingise Tata wakwe eka swilo hinkwaswo naswona a ku nga ri na lexi a xi ta n’wi khomisa tingana. (Hev. 12:2) Nakambe a a swi tiva leswaku enkarhini wolowo wo tika, Sathana a a ri eku n’wi hlaseleni. (Luka 22:​2-4; 23:​33, 34) Sathana a a tiyimisele ku tshikisa  Yesu ku tshembeka; kambe swi n’wi tsandzile. Yesu u kombise leswaku Sathana i muhembi lonkulu nileswaku Yehovha u na wona malandza lama tshamaka ma tshembekile hambiloko ma ringiwa swinene!

13. U nga yi tsakisa njhani Hosi ya wena leyi nga eku fumeni?

¹³ Xana wa swi lava ku tsakisa Hosi ya wena leyi nga eku fumeni sweswi? Yana emahlweni u dzunisa vito ra Yehovha, u pfuna van’wana va tiva vumunhu byakwe lebyinene. Loko u endla tano, u tekelela Yesu. (1 Pet. 2:21) Ku fana na Yesu, u ta tsakisa Yehovha ni ku kombisa leswaku nala Wakwe Sathana i muhembi lonkulu!

HI PFUNETA KU PONISA VUTOMI LOKO HI DZUNISA VITO RA YEHOVHA

14-15. Hi swihi swilo swo tsakisa leswi nga endlekaka loko hi dyondzisa vanhu hi Yehovha?

¹⁴ Loko hi dzunisa vito ra Yehovha, hi pfuneta ku ponisa vutomi bya vanhu. Njhani? ‘Lava nga riki vapfumeri, Sathana u va dlaye mianakanyo.’ (2 Kor. 4:4) Hikwalaho ka sweswo, va tshemba mavunwa ya Sathana yo fana ni lama nge: Xikwembu a xi kona, xi le kule swinene naswona a xi na mhaka ni vanhu, xi na tihanyi naswona xi xanisa vadyohi hilaha ku nga heriki. Mavunwa lawa ma thyakisa vito ni ndhuma ya Yehovha leswaku vanhu va nga lavi ku tshinela eka yena. Kambe loko hi chumayela hi endla leswaku Sathana a nga swi koti ku fikelela xikongomelo xakwe. Hi dyondzisa vanhu ntiyiso hi Tata wa hina ni ku dzunisa vito rakwe ro kwetsima. Xana ku va ni vuyelo byihi?

¹⁵ Ntiyiso lowu nga eRitweni ra Xikwembu wu ni matimba swinene. Loko hi dyondzisa vanhu hi Yehovha ni hi vumunhu byakwe, hi kota ku vona nchumu wun’wana wa nkoka swinene. Vanhu a va ha pfariwi mahlo hi mavunwa ya Sathana naswona va sungula ku byi vona kahle vumunhu byo xonga bya Tata wa hina ku fana na hina. Va hlamarisiwa hi matimba yakwe lama nga pimekiki. (Esa. 40:26) Va dyondza ku n’wi tshemba hileswi a lulameke. (Det. 32:4) Va dyondza swo tala eka vutlhari byakwe lebyikulu. (Esa. 55:9; Rhom. 11:33) Nakambe va chaveleleka ku dyondza leswaku Xikwembu i rirhandzu. (1 Yoh. 4:8) Loko va ya va tshinela eka Yehovha, ntshembo wa vona wa ku hanya hilaha ku nga heriki tanihi vana vakwe wu va wa xiviri. Mawaku nkateko lowu hi nga na wona wo pfuna vanhu va tshinela eka Tata wa vona! Loko hi endla tano,  Yehovha u hi teka hi ri “vatirhikulobye” vakwe.—1 Kor. 3:​5, 9.

16. Van’wana va titwe njhani loko va tiva vito ra Xikwembu? Vula swikombiso.

¹⁶ Loko ha ha sungula, hi nga dyondzisa vanhu leswaku vito ra Xikwembu i Yehovha. Sweswo ntsena swi nga cinca vutomi bya munhu loyi hi n’wi chumayelaka. Hi xikombiso, nhwanyana loyi a vuriwaka Aaliyah b u kuriseriwe eka vukhongeri lebyi nga pfumeliki eka Kreste. Kambe a a nga eneriseki hileswi a a swi dyondza ekerekeni yakwe naswona a a titwa a nga ri ekusuhi ni Xikwembu. Kambe loko a sungula ku dyondza ni Timbhoni, sweswo swi cincile. U sungule ku teka Xikwembu tanihi Munghana wakwe. Nakambe swi n’wi hlamarisile ku tiva leswaku vito ra Xikwembu ri susiwile eTibibeleni to tala ivi ri siviwa hi swithopo swo fana ni leswi nge Hosi. Ku dyondza hi vito ra Yehovha swi cince vutomi byakwe. U ri: “Munghana wa mina lonkulu u ni vito!” Ku ve ni vuyelo byihi? U ri: “Sweswi ndzi ni ku rhula embilwini ya mina. Ndzi titwa ndzi katekile.” Wanuna la vuriwaka Steve a a ri n’wavunanga loyi a kurisiweke hi ndhavuko wo tika wa Xiyuda. A a nga lavi ku katseka eka vukhongeri hikuva u vone vukanganyisi byo tala etikerekeni. Hambiswiritano, endzhaku ko loveriwa hi mhani wakwe, u pfumerile ku dyondza ni Timbhoni ta Yehovha. Swi n’wi khumbe swinene ku dyondza hi vito ra Xikwembu. U ri: “A ndzi nga si tshama ndzi dyondzisiwa vito ra Xikwembu.” U tlhela a ku: “A ku ri ro sungula ndzi tiva leswaku Xikwembu xi kona! Ndzi sungule ku xi teka tanihi Munhu. Ndzi swi tivile leswaku se ndzi kume Munghana.”

17. Hikwalahokayini u tiyimisele ku ya emahlweni u dzunisa vito ra Yehovha? (Nakambe vona xifaniso.)

¹⁷ Loko u ri karhi u chumayela ni ku dyondzisa, xana wa va byela vanhu hi vito ra Yehovha ro kwetsima? Xana wa va pfuna va tiva vumunhu bya Xikwembu? Loko u endla tano, u dzunisa vito ra xona. Onge u nga ya emahlweni u dzunisa vito ra Yehovha ro kwetsima hi ku pfuna vanhu va n’wi tiva kahle. Hi ndlela yoleyo u ta ponisa vutomi bya vanhu. U ta tekelela Hosi ya wena Yesu Kreste. Kasi xa nkoka swinene, u ta tsakisa Yehovha loyi a nga Tata wa wena loyi a nga ni rirhandzu. Onge u nga “dzunisa vito ra [yena] hilaha ku nga heriki”!—Ps. 145:2.