1, 2. ¿Náki ejemplujtsïni xarhatachesïni na enga pʼikuarherajka Tata Diosï Jeoba imani chkuanderakuecha jimbo enga imeeri ambe uandanhajka?

 ERANHASKA JE eska nema kánikua no sési uandasïnga chaari ambe. Ka nájkiruka no ísïika; máruksï jakajkusïndi ka ueenasïndiksï máteruechani aianguani, ka iápuru ísï mítekuarhisïndia. ¿Nájtsï pʼikuarherapirini chá? Jamberijtsï úpiringa uandanhiani ka kánikua no sési pʼikuarherani jimboka inde ambeksïni úpiringa kánikua no sési pakatani (Prov. 22:1).

² I ejemplujtsïni úpirindi jarhuatani kurhanguni na enga pʼikuarherapka Tata Diosï Jeoba enga imeeri uájpa ma chkuanderapka imeeri ambe jini auandarhu ka no sési pakatani. Eba jakajkuspti indeni chkuanderakuani, ka indeni jimbo, juchaari primeru taatiichaksï nóteru kurhajchasptia juchaari Tata Diosï Jeobani. Ka iásï, kʼuiripuechachi pekariisïnga ka uarhini (Gén. 3:​1-6; Rom. 5:12). Jimboka Satanási ueenaspka chkuanderani jardini de Edénirhu iásïksï interu parhakpinirhu jarhastia uandanhiateecha, pori ejemplu uarhikua jimbo, guerrecha ambe ka kʼuiripuechaksï komu nitamakuarhisïndi. Ka nájkiruka inde ambe úkuarhika, no ústi eska Tata Diosï Jeoba ikiani jauaka o jatanhetspini. Sánderu sési, Biblia uandasïndi eska Tata Diosï máeska enga “xáni tsípijka” (1 Tim. 1:11).

3. ¿Náki kóntperatachi jatsiski?

³ Juchachi kʼéri kóntperata ma jatsiska para kuájpini Tata Diosï Jeobaeri nombrini. ¿Nénachi uaa ísï úni? Engachi kurhajchaska arhini juramukuani: “Kʼéri ambe arhi je Tata Diosï Jeobaeri nombrini” (Sal. 113:1). ¿Ka nénachi uaa úni indeni ambe? Sési uandaparini ima kʼuiripueri enga indeni nombrini jukaka enga pímbinhasïika. ¿Chá uékasïni indeni ambe úni? Ju je exeni tanimu ambe engajtsïni jarhuataaka para kʼéri ambe arhini Tata Diosï Jeobaeri nombrini iámindu juchaari mintsita jingoni.

TSÍPERASÏNGACHI TATA DIOSÏ JEOBANI

4. Uanda je ejemplu ma enga xarhatajka na enga pʼikuarherajka Tata Diosï Jeoba engachi kʼéri ambe arhijka.

⁴ Tata Diosï Jeoba jindeesti juchaari taati auandarhu anapu, ka  ima tsitisïndi eskachi kʼéri ambe arhiaka imeeri nombrini (Sal. 119:108). Joperu ima no uétarhinchasïndi eskachi ísï uaaka nomasi para sési pʼikuarherani ka seguru, ísï eskaksï kʼuiripuecha engaksï tsitijka eskaksï kʼéri ambe arhinhaaka paraksï sési pʼikuarherani. Parachi sánderu sési kurhanguni, ju je eranhaskani nanaka sapichuni ma enga andarhierajka taatii jémbani para kamanharhini ka arhini: “¡Pá, tʼuri jindeeska sánderu ambakiti taatii!”. Taati jémba tsípini pʼikuarherasïndi, ka mintsitarhu niárakusïndi inde ambe enga uájpa újka. ¿Andi? Jimboka taati jémba no uétarhinchasïndi eska uájpa indeni ambe arhiaka para sánderu seguru pʼikuarherani. Sánderu sési taati jémba tsitisïndi na enga uájpa xénchajka ka xarhatakuni eska agradesidu jarhaska. Ístu, mítesti eska inde ambe jarhuataaka sánderu felisiini enga na kʼéakia. Májkueni Tata Diosï Jeobajtu enga sánderu ambakiti taatiika tsípini pʼikuarherasïndi engachi kʼéri ambe arhijka.

5. ¿Ambechi xarhatasïndi engachi kʼéri ambe arhijka Tata Diosï Jeobani?

⁵ Satanási chkuanderakua ambe uandasti juchaari ambe. Uandasïndi eska no nema kurhajchaaka Tata Diosïni nijtu kuájpia imeeri nombrini engachi tsʼéjkua ma jatsiaka. Ka eskachi jurajkuaka engachi exeaka eskajtsïni sánderu sési nicheaka ísï úni (Job 1:​9-11; 2:4). Joperu ambakiti achamasï ma enga Jobu arhinheenga xarhataspti eska Satanási chkuandera máeska. ¿Ka juchaia? Juchajtuchi xarhatasïnga eska Satanási chkuandera máeska engachi kʼéri ambe arhijka Tata Diosï Jeobani. Ka kʼéri kóntperata máesti para iámindu jucha kuájpini Tata Diosï Jeobaeri nombrini, ka úni eska ima tsípini pʼikuarheraka jimbokachi kurhajchasïnga (Prov. 27:11).

6. ¿Nénachi uaa májkueni úni eska Dabidi ka lebiteecha? (Nehemías 9:5).

⁶ Imeecha engaksï xénchajka Tata Diosï Jeobani uékasïndiksï iámu mintsita jingoni kʼéri ambe arhini Tata Diosïiri nombrini. Rei Dabidi karaspti: “Eskani ji kʼéri ambe arhiaka Tata Diosï Jeobani; eska iámu ambe engani xáni ji jindeeka kʼéri ambe arhiaka imeeri nombrini enga pímbinhasïika” (Sal. 103:1). Dabidi kurhangusïreendi eska kʼéri ambe arhini Tata Diosï Jeobaeri nombrini májkueniispka eska kʼéri ambe arhini imani. Uandani imeeri nombriiri ambe jindeesti uandani na enga mítekateeka, imeeri sési járhati kualidadicheeri ka ambakiti ambeeri enga úka. Dabidi uékasïreendi xarhatani eska imeeri Taatiiri nombri pímbinhasïiska ka uékasïreendi kʼéri ambe arhini. Uandaspti eska uékasïreenga méntku iámindu imeeri mintsita jingoni ísï úni. Ka lebiteechajtuksï uékaspti ísï úni ka kʼéri ambe arhisptiksï Tata Diosï Jeobani. Kaxumbikua jingonksï xarhataspti eskaksï no jarhaspka uandakuecha engaksï uétarhijka para kʼéri ambe arhini Tata Diosïiri nombrini enga pímbinhasïika (arhinta je Nehemías 9:5). ¡Kánikua tsípini pʼikuarherapti Tata Diosï Jeoba enga exepka na engaksï lebiteecha xáni mintsita jingoni kʼéri ambe arhipka!

7. ¿Nénachi uaa kʼéri ambe arhini Tata Diosï Jeobani aianhpikuarhu ka pauani pauani?

 ⁷ Engachi jucha xénchperakua jingoni uandajka Tata Diosï Jeobaeri ambe ka engachi xarhatakujka eskachi agradesidu jarhaska, kʼéri ambechi arhini jarhasïnga. Engachi aianhpijka, ambe engachi sánderu jánguarhintajka úni jindeesti jarhuatani kʼuiripuni paraka uékaaka andarhierani Tata Diosïni ka májkuenksï xénchani eska jucha (Sant. 4:8). Tsitisïngachi exeraani kʼuiripuechani Biblia jingoni na enga xáni xénchpetiika Tata Diosï, imeeri jurhimbikuani, jánhaskakuani ka uinhapikuani. Ístuchi úsïnga k’éri ambe arhini Tata Diosï Jeobani ka tsíperani imeeri mintsitani engachi jánguarhintajka ísï úni ambe ma eska ima na újka (Éfes. 5:1). Engachi ísï újka, jamberiksï kʼuiripuecha exejti ka kurhamarhikuarhini andichisï no májkueni jámajki eska máteruecha (Mat. 5:​14-16). Jamberichi úpiringa aianguani andichisï no májkueni Ka ísïksï ima kʼuiripuecha engaksï ambakiti mintsita ma jataka uékanksï sánderu ambe míteni Tata Diosï Jeobaeri. Engachi ini ambe újka para kʼéri ambe arhini Tata Diosï Jeobani tsíperasïngachi imeeri mintsitani (1 Tim. 2:​3, 4).

TSÍPERASÏNGACHI JESÚSINI

8. ¿Andisï Jesúsi jindee sánderu kʼéri ejemplu enga kʼéri ambe arhipka Tata Diosï Jeobaeri nombrini?

⁸ Iámu parhakpinirhu ka auandarhu, no nema xáni sési mítesti taati jémbani ísï eska uájpa (Mat. 11:27). Jesúsi xénchasïndi imeeri taatini ka ima jindeesti sánderu ambakiti ejemplu enga xarhatajka ambe enga arhikuekajka kʼéri ambe arhini Tata Diosï Jeobaeri nombrini (Juanu 14:31). Enga kómarhipka imeeri taati jémbani ima chúrikua ante de uarhini, ini ambe arhispti ima ánchikuarhiteeri enga úpka ixú echerirhu: “Ji aianguaskia na engari arhinhajka” (Juanu 17:26). ¿Néna ísï úspi?

9. ¿Náki ejempluni úraspi Jesúsi para xarhatani na enga jásïika Tata Diosï Jeoba?

⁹ Jesúsi no solu arhispti kʼuiripuni néna enga arhinhajka Tata Diosï Jeoba. Judiuechaksï mítesptia indeni ambe. Sánderu sési, aianguaspti “na enga jásïika ima” (Juanu 1:​17, 18). Pori ejemplu, Karakateecha engaksï Ebreu jimbo jaka uandasïreendiksï eska Tata Diosï Jeoba pʼamojpitiiska (Éx. 34:​5-7). Ka Jesúsi xarhataspti eska inde ambe meru ísïispka enga uandantapka ejempluni uájpeeri enga tsïnchetini japka. Engachi arhintajka eska taati jémba andajkuarhiska exeni “enga útasï iauani ísï jurhani japka” ka eska uiriipaspka kúmuni ka kamajchakuni ka sési jimbo puákuntani, exesïngachi eska Tata Diosï Jeoba meru pʼamojpitiiska (Lukasï 15:​11-32). Ísï jimbo, Jesúsi meru jarhuataspti kʼuiripuechani parakaksï kurhangupiringa na enga jásïika Tata Diosï Jeoba.

10. a) ¿Andichisï míti eska Jesúsi úraspka imeeri taati jémbeeri nombrini ka eska uékasïreenga eskaksï máteruechajtu májkueni úpiringa? (Markusï 5:19; ístu exe je imajenini). b) ¿Ambe uékasïni Jesúsi eskachi juchajtu uaaka?

¹⁰ ¿Uékasïreeni Jesúsi eskaksï máteruecha úrapiringa imeeri taati jémbeeri nombrini? Jo. Jamberiksï máru relijioniiri orhejtsïkutiicha engaksï imani tiempu jimbo irekapka jakajkuendi eskaksï no jatsipka para úrani Tata Diosïiri nombrini jimboka jukari pímbinhasïispka. Joperu Jesúsi no jurajkuspti eska inde pʼindekua enga no Bibliarhu jupindaskuarhitini jaka pʼíngupiringa para kʼéri ambe arini imeeri Taatiiri nombrini. Pori ejemplu, ju je eratseni ambe enga úpka Jesúsi ma uelta jimeesïsï engaksï Jerasa anapuecha irekapka, tsinaspti achamasïni ma engaksï demoniuecha incharhitini japka ka kʼuiripu xáni chérakuarhespti enga jamberi kurhakupka Jesúsi eska támisï nipiringa (Mar. 5:​16, 17). Joperu ima uékasïreendi eskaksï iáminduecha mítepiringa Tata Diosï Jeobaeri nombrini. Ísï jimbo, ante de kéndikuni, arhispti imani achamasïni enga tsinapka eska aianguapiringa kʼuiripuechani ambe enga úpka Tata Diosï Jeoba imani jimbo ka no Jesúsi (arhinta je Markusï 5:19). a Juchaari  Rei tata Jesukristu, uékasïndi eskachi májkueni uaaka eska ima, eskachi iámu kʼuiripuechani jorhendauaka Tata Diosï Jeobaeri nombrini (Mat. 24:14; 28:​19, 20). Engachi ísï újka kánikuachi tsíperasïnga imani.

11. ¿Ambe arhiaspi Jesúsi imeeri chúxapatiichani eskaksï kómarhipiringa, ka eska na arhijka Ezequiel 36:​23, ¿andisï xáni jukaparhakue inde ambe?

¹¹ Jesúsi mítespti eska Tata Diosï Jeoba uékasïnga eska imeeri nombri pímbinhaxentaaka iámindu imani chkuanderakuecheeri ambe engaksï xáni no sési pakatajka. Ísï jimbosï jorhendaapti imeeri chúxapatiichani eskaksï kómarhipiringa: “Juchaari Taati engari auandarhu jaka, eska niáraaka mítenhani eska chiiti nombri pímbinhasïiska” (Mat. 6:9). Jesúsi kurhangusïreendi eska no jarhaska iámu parhakpinirhu ka auandarhu sánderu jukaparhakua ambe ka eska pímbinhajkuntani Tata Diosïiri nombrini (arhinta je Ezequiel 36:23). Ka no nema jarhasti jini auandarhu ni ixú Echerirhu enga xáni jánguarhintaka eska Jesúsi para pímbinhajkuntani Tata Diosïiri nombrini. ¿Joperu andiksïsï jupikapi Jesúsini imeeri ikiatspitiicha? Jimbokaksï uandasïreenga eska no sési ambe uandaspka imeeri Taati jémbeeri nombriiri ambe enga xáni pímbinhasïika. Ka para Jesúsi no jarhaspti sánderu k’éri pekadu ma eska indeni ambe úni. Jimbosï ante de jupinhani, ima t’uini no sési pʼikuarherani japtia jimboka kʼuiripu indeni ambesï uandapiringa (Luk. 22:​41-44).

12. ¿Ambe úspi Jesúsi para pímbinhajkuntani Taati jémbeeri nombrini?

¹² Paraka Jesúsi pímbinhajkuntapiringa Taati jémbeeri nombrini, jurajkuspti eskaksï no sési kámapiringa, no sési arhipiringa ka eskaksï chkuanderakua ambe jauatakupiringa. Mítespti eska ima kurhandiraspka ka eska no ma ambe jarhaspka enga jimbo kʼuratseni pʼikuarherapiringa (Ebr. 12:2). Ístu mítespti eska Noambakitisï úni japka eskaksï no sési kámapiringa (Luk. 22:​2-4; 23:​33, 34). Noambakiti uékasïreendi eska Jesúsi jurajkupiringa Tata Diosï Jeobani, joperu méntku no úspti ísï úni. Jesúsi xarhataspti eska Satanási chkuanderari máeska ka eska Tata Diosï jatsiaska imeeri marhuariichani engaksï no méni jurajkujka na uéjkiksï xáni no sési kánhani.

13. ¿Ambejtsï jatsiski para úni parajtsï tsíperani juchaari Reini?

¹³ ¿Uékasïntsï tsíperani chaari Reini, tata Jesukristuni? Jiájkani seguirii je kʼéri ambe arhini Tata Diosï Jeobaeri nombrini ka jarhuataani máteruechani parakaksï exeaka na engamindu jásïika Tata Diosï Jeoba, ísïjtsï májkueni úni jauaka eska Jesúsi (1 Ped. 2:21). Ka ístujtsï úni jauaka eska Tata Diosï Jeoba tsípini pʼikuarheraaka ka xarhataakajtsï eska imeeri ikiatspiti Satanási kʼéri chkuanderari máeska.

 JARHUAJPESÏNGACHI KʼUIRIPUECHANI PʼÍMUTAANTANI

14, 15. ¿Ambe úkuarhisïni engachi jorhendaajka kʼuiripuechani Tata Diosï Jeobaeri jurhimbikua ambe?

¹⁴ ¿Andichisï uandajki eska engachi kʼéri ambe arhijka Tata Diosï Jeobaeri nombrini jarhuajpeni jarhasïngachi parakaksï máteru kʼuiripuecha pʼímutantskata uéraaka? Jimboka Satanási pápkʼanhastaasti imani kʼuiripuechani engaksï no jakajkutiika paraksï no úni kurhanguni ka nóksï exeni (2 Kor. 4:4). Ísï jimboksïsï uánikua kʼuiripuecha jakajkuati imeeri chkuanderakuechani ka eratsenksï eska no jarhaska Tata Diosï, eska jukari iauani jarhaska juchantsïni jingoni, eskajtsïni no pendienti pásïnga, eska noambakiska ka eska jimbosï kastigariuajka no sési úriichani para méntkisï. Inde chkuanderakuechaksï no sési pakatasïndi Tata Diosï Jeobani ka úsïndiksï eskaksï kʼuiripuecha no sési eratseaka imeeri ambe ka nóksï uékani andarhierani o míteni. Joperu engachi aianhpijka jurhimbikua ambe juchaari Taatiiri, nóchi jurajkuni jarhasïnga Satanásini paraka ima uaaka imani ambe enga eratseni jaka, ka kʼéri ambechi arhini jarhasïnga Tata Diosï Jeobaeri nombrini enga pímbinhasïika. ¿Ka ambe úkuarhisïni engachi ísï újka?

¹⁵ Jurhimbikua ambe enga Bibliarhu jaka, kánikua uinhapikua jatsisti. Engachi jorhendaajka kʼuiripuechani neeski Tata Diosï Jeoba ka na jásïiski, ambakiti ambe niárasïndi úkuarhini. Engaksï kʼuiripuecha sánhani arhijka nóteru jakajkunia chkuanderakua ambe enga Noambakiti jorhentpijka ka enga pápkʼanhastaani japka, ísïisti enajkiksï éskantajki ka ueenasïndiksï ísï exeni juchaari Taatini eskachi jucha na exejka, ísku pakataasïndi engaksï eratsentajka na enga xáni uinhapitiika Tata Diosï (Is. 40:26). Engaksï jorhenguarhijka eska ima jurhimbikua jingoni úsïnga iámindu ambe, jarhuataasïndi kʼuiripuechani paraksï sánderu seguru pʼikuarherani (Deut. 32:4). Ískuksï pakarasïndi engaksï mítejka na enga xáni jánhaskatiika (Is. 55:9; Rom. 11:33). Ka sésiksï pʼikuarhenhisïndi míteni eska ima xénchperakueska (1 Juanu 4:8). Engaksï andarhierajka Tata Diosï Jeobani, seguruksï jarhasïndi eskaksï uaaka irekani para méntkisï ka niárani imeeri uájpeeni. ¿A no eska jarhuataani kʼuiripuechani paraksï andarhierani juchaari Taatini auandarhu anapuni kʼéri kóntperata máeska? Ístu, engachi ísï úni jarhajka, Tata Diosï Jeoba ísï exesïndi eskachi imanisï jarhuatani jaka (1 Kor. 3:​5, 9).

16. Uanda je ejemplu ma enga xarhatajka na engaksï pʼikuarherajka kʼuiripuecha engaksï niárajka míteni na enga arhinhajka Tata Diosï.

 ¹⁶ Engachi uandontskuarhekujka nemani Tata Diosïiri ambe, jamberichi solu aiangujka na enga arhinhajka ima. Joperu enga ima kʼuiripu ambakiti mintsita ma jatajka, inde ambe úsïndi eska iásï ménderueni irekaakia. Pori ejemplu, uátsï ma enga Alicia b arhinhajka familia ma jimbo kʼuiripespti enga relijioni ma jatsipka enga no kristianueka. Joperu Alicia no konformu jarhaspti ambe engaksï jima jorhendeenga ka nijtu pʼikuarhereeni eska andarhierasïreenga Tata Diosïni. Joperu iámu ambe mójtakurhispti enga ueenapka jorhenguarhini Jeobaeri testiguecha jingoni. No úsïreendi jakajkuni enga exepka eskaksï uánikua Bibliecharhu mójtakuspka Tata Diosï Jeobaeri nombrini ka jatsikuntanksï títuluechani komueska Tata. Enga jorhenguarhipka na enga arhinhajka Tata Diosï, jiáni ueenaspti ísï exeni eska amigu ma. Tsípikua jingoni uandaspti: “Juchiiti sánderu ambakiti amigu jukasti nombri ma”. Ima uandantasïndi: “Iásï kánikua pínandikua jatsiskia, kánikua sési pʼikuarherasïnga indeni ambe míteni”. Steve, kústati máespti, imeeri familia judiuespti ka jánguarhintasïreendiksï iámindu ambe sési úni. Joperu uánikua ambe exespti eska no sési jarhaspka imeeri relijioni jimbo, ísï jimbosï nóteru ma relijionirhu uékeendia jarhani. Joperu enga imeeri parienti ma uarhipka uékaspti kurhaani ambe enga Jeobaeri testigu ma jorhendani japka máteru nemani Biblieri ambe. Enga jorhenguarhipka na enga arhinhajka Tata Diosï, mintsitarhu niárakuspti. Ima uandasïndi: “Méntkuni no mítespka na enga arhijka Tata Diosï”. Ka ístu uandasïndi: “Jiáni ueenaspka exeni eska Tata Diosï meru jarhaska, jiáni kuenta íntskukuarhespka eskani exentaspka amiguni ma”.

17. ¿Chá andisï uéjki seguiriini jarhani kʼéri ambe arhini Tata Diosï Jeobaeri nombrini? (Ístu exe je imajenini).

¹⁷ Engachi aianhpini jarhajka o jorhentpini jarhani na enga arhinhajka Tata Diosï ka na enga jásï kʼuiripueka, kʼéri ambechi arhini jarhasïnga imeeri nombrini. Ísï jimbo, ju je seguiriini jarhani jarhuataani máteruechani paraksï míteani Tata Diosï Jeobaeri kualidadiichani ka ísïchi kʼéri ambe arhiaka imeeri pímbinhasï nombrini. Ka ístuchi pʼímutaantani jauaka kʼuiripuechani ka májkuenchi úni jauaka eska juchaari Rei tata Jesukristu. Ka ambe enga sánderu jukaparhakueka, tsíperanchi jauaka juchaari Taatini enga xáni xénchpejka, Tata Diosï Jeobani. Eskachi iáminduecha uaaka ísï uandani eska ima enga karaka Salmo 145:2: “Kʼéri ambe arhiaka chiiti nombrini para méntkisï”.