1-2. Kiki ekisobora kutukonyera kwetegereza omulingo Yahwe ayehurramu habw’okumubazaaho ebisuba?

 TEKEREZAAHO kinu: Omuntu oworukugonza akubazaaho kubi. Okimanyire ngu bisuba baitu abantu abamu, nibabikiriza. Eky’obusaasi, nabo batandika kubigambiraho abandi. Wakwehuliire ota? Habwokuba ofaaho omulingo abandi bakuroramu, ebisuba ebi bikuleetera kwehurra kubi.—Nfu. 22:1.

² Ekyokurorraho kinu nikisobora kutukonyera kwetegereza omulingo Yahwe ayehurramu, abantu obubamubazaaho ebisuba. Omu ha bamalaika akagambira Hawa ebisuba ebirukukwata hali Yahwe. Hawa akaikiriza ebisuba ebi. Kandi kyaleetera abazaire baitu ab’okubanza kujeemera Yahwe. Ekyarugiremu, abantu boona bakasiisa kandi baatandika kufa. (Kub. 3:​1-6; Bar. 5:12) Ebizibu byona ebiturora omu nsi, nk’okufa, obulemu, n’okubonabona, bikabaho habw’ebisuba Sitaani yabalize omu rugonjo rwa Adeni. Mali Yahwe asaasa muno habw’ebisuba Sitaani yabalize n’ebintu ebibi ebirugiremu. Baitu kinu kiretiire Yahwe kwikara aine ekiniga? Nangwa. Oihireho, Baibuli egamba ngu aikara ali “Ruhanga ow’asemeriirwe.”—1 Tim. 1:​11, NWT.

3. Twine mugisa ki?

³ Twine omugisa ogw’okweza ibara lya Ruhanga kuraba omu kworobera ekiragiro kinu: ‘Mukugize ibara lya Yahwe.’ (Zab. 113:1) Tukugiza ibara lya Yahwe obutugambiraho abandi  amananu agarukumukwataho. Orakugiza ibara lya Yahwe? Leka tubazeeho ebintu bisatu ebiratwekambisa kukugiza ibara lya Ruhanga waitu n’omutima gwaitu gwona.

TUSEMEZA YAHWE OBUTUKUGIZA IBARA LYE

4. Habwaki kisemeza Yahwe obutumukugiza? Bazaaho ekyokurorraho. (Rora ekisisani.)

⁴ Tusemeza Isiitwe ow’omu iguru obutukugiza ibara lye. (Zab. 119:108) Baitu eki nikimanyisa ngu Ruhanga Ow’obusobozi bwona ali nk’abantu abatahikiriire abagonza kubakugiza? Nangwa. Tekerezaaho ekyokurorraho kinu. Omwisiki omuto airuka agwa omu kifuba kya ise, amugambira ati: “Niiwe taata arukukirayo oburungi!” Ise asemererwa muno. Habwaki? Tugambe ngu habwokuba n’agonza kugarurwamu amaani n’okukugizibwa muhara we? Nangwa. Oihireho, namugonza muno kandi kimusemeza muhara we obwamwoleka okugonza. Amanyire ngu eki nikiija kumukonyera kutunga okusemererwa obwaragenda nakura. Omulingo nugwo gumu, Isiitwe Yahwe asemererwa muno obutumukugiza.

5. Kisuba ki ekituhakaniza, obutukugiza ibara lya Yahwe?

⁵ Obutukugiza Isiitwe ow’omu iguru, twoleka ngu Sitaani ekiyabalizeeho buli omu haliitwe kisuba. Sitaani agamba ngu busaho muntu wena asobora kuteekamu amaani kweza ibara lya Ruhanga. Agamba ngu busaho muntu wena asobora kwikara ali mwesigwa hali Ruhanga obwatunga ebizibu. Agamba ngu itwena nitwija kuleka kuheereza Ruhanga kakuba tukirora ngu nikiija kutugasira. (Yob. 1:​9-11; 2:4) Baitu Yobu akaikara ali mwesigwa kandi yayoleka ngu Sitaani ebiyabalize bisuba. Naiwe oraikara oli mwesigwa hali Ruhanga? Buli omu haliitwe n’asobora kwekamba kweza ibara lya Isiitwe n’okumusemeza kuraba omu kumuheereza n’obwesigwa. (Nfu. 27:11) Kandi mali gunu tugutwara nk’omugisa ogw’amaani.

6. Kiki ekitusobora kwegera hali Omukama Daudi hamu n’Abalevi? (Nehemiya 9:5)

⁶ Kugonza Ruhanga kitwekamisa kukugiza ibara lye n’omutima gwaitu gwona. Omukama Daudi akagamba ati: “Yebaza [Yahwe], iwe obwomezi bwange; na byona ebiri omuli nyowe, mwebaze ibaralye erirukwera.” (Zab. 103:1) Daudi akaba akimanyire ngu kukugiza ibara lya Yahwe nikimanyisa kukugiza we wenyini. Obutuhurra ibara lya Yahwe tutekerezaaho emiringo ye, hamu n’ebintu ebirukuhuniiriza eby’akora. Daudi akaba n’agonza kukugiza ibara lya Ise n’okulyeza. Akaba n’agonza kukikora “na byona ebiri  omuli” uwe, ekirukumanyisa n’omutima gwe gwona. Omulingo nugwo gumu, Abalevi bakebembera omu kukugiza Yahwe. Kandi n’obwebundaazi bakakyoleka ngu ebigambo byabo byali bitasobora kukugiza ibara lya Ruhanga erirukwera omu bwijwire. (Soma Nehemiya 9:5.) Hataroho kugurukyagurukya, okukugiza oku okurukwoleka obwebundaazi kandi okurukuruga ha mutima kukasemeza Yahwe.

7. Nitusobora tuta kukugiza Yahwe omu bwomeezi bwaitu obwa buli kiro hamu n’omu buheereza bwaitu?

⁷ Kasumi kanu, nitusobora kusemeza Yahwe kuraba omu kumubazaaho, kumugonza n’okumusiima habw’ebintu ebyatukoliire. Obutuba nitutebeza, ekigendererwa kyaitu ekikuru kiba eky’okukonyera abantu kwirra haihi na Yahwe n’okubakonyera kumanya emiringo ye enungi. (Yak. 4:8) Kitusemeza kwoleka abantu omulingo Baibuli ebazaaho Yahwe. Eyoleka ngu ali Ruhanga ow’okugonza, w’obwinganiza, w’amagezi, aine amaani, hamu n’emiringo ye endi enungi. Ekindi, tukugiza Yahwe kandi tumusemeza obutwekamba kumwegeraho. (Bef. 5:1) Obutukora eki, tuba bantu ab’embaganiza omu nsi enu embi, kandi abantu nibasobora kugonza kumanya habwaki. (Mat. 5:​14-16) Nitusobora kubasoborra ensonga habwaki twetwaza tuti. Kandi ekirugamu, abantu abarukugonza amananu bairra haihi na Ruhanga. Obutukugiza Yahwe omu miringo enu, kisemeza omutima gwe.—1 Tim. 2:​3, 4.

TUSEMEZA YESU OBUTUKUGIZA IBARA LYA YAHWE

8. Habwaki Yesu ali kyokurorraho ekirukukirayo omu kukugiza ibara lya Yahwe?

⁸ Yesu nuwe arukukirrayo kimu kumanya Yahwe kurungi. (Mat. 11:27) Yesu agonza Ise, kandi nuwe ayebembiire omu kukugiza ibara lye. (Yoh. 14:31) Omu saara eyiyasabire Ise omu bwire bw’ekiro atakafiire, akagamba ati: “Nkabamanyisa ibara lyawe.” (Yoh. 17:26) Eki Yesu akakikora ata?

9. Yesu akakozesa ruganikyo ki kukonyera abantu kumanya Ise muntu wa mulingo ki?

⁹ Yesu atagarukire ha kugambira abantu ngu ibara lya Ruhanga nuwe Yahwe. Abayudaaya Yesu abaakaba nayegesa bakaba bamanyire ibara lya Ruhanga. Yesu akakonyera abantu kwetegereza Ise muntu wa mulingo ki. (Yoh. 1:​17, 18) Ekyokurorraho, Ebyahandiikirwe eby’Oruheburaniya byoleka ngu Yahwe w’embabazi, kandi asaalirirwa abandi. (Kurug. 34:​5-7) Eki Yesu akakyoleka kurungi omu ruganikyo orw’omwana ayazahire. Omu ruganikyo oru, ise omwana onu “akaba akiri hara muno,” obuyarozere ngu mutabani we ayegarukiremu kwo, yairuka kumutangana yamugwa omunda kandi yamuganyira kuruga ha mutima. Oruganikyo oru nirutukonyera kwetegereza ngu mali Yahwe w’embabazi kandi aganyira. (Luk. 15:​11-32) Yesu akakonyera abantu abandi kwetegereza Yahwe muntu wa mulingo ki.

10. (a) Nitumanya tuta ngu Yesu akakozesa ibara lya Ruhanga kandi ngu akaba n’agonza n’abantu abandi balikozese? (Marako 5:19) (Rora ekisisani.) (b) Kiki Yesu ekyarukugonza tukole omu kasumi kanu?

¹⁰ Yesu akaba n’agonza abandi bakozese ibara lya Ise? Ego. Abebembezi b’amadiini abamu baali nibatekereza ngu kyali kitahikire kwatura ibara lya Ruhanga erirukwera baitu Yesu ataikirize entekereza nk’egi kumulemesa kumanyisa abandi ibara lya Ruhanga. Tekerezaaho akasumi Yesu obuyakirize omusaija ow’akaba aine daimoni omu kiikaro ky’Abagerasene. Abantu bakatiina muno baayesengereza Yesu kuruga omu kiikaro  eki, nahabweki ataikaleyo. (Mar. 5:​16, 17) Baitu nabwo, akaba n’agonza abantu ab’omu kiikaro eki bamanye ibara lya Yahwe. Nahabweki akagambira omusaija ouyakirize kutagambira abantu ekyakaba akozere, baitu Yahwe ekyakaba akozere. (Soma Marako 5:19.) a Yesu n’agonza naitwe tumanyise abantu ibara lya Ruhanga omu nsi yoona. (Mat. 24:14; 28:​19, 20) Obutukikora, tusemeza Omukama waitu Yesu.

11. Kiki Yesu ekiyayegeseze abahondezi be kusaba kandi kusigikirra ha Ezekyeri 36:​23, habwaki kikuru?

¹¹ Yesu akaba akimanyire ngu ekigendererwa kya Ruhanga kiri ky’okweza ibara lye. Egi niyo ensonga habwaki Mukama waitu yayegeseze abahondezi be kusaba bati: “Isitwe ali omu iguru, ibara lyawe dyezebwe.” (Mat. 6:9) Yesu akaba akimanyire ngu ensonga enu erukukirayo obukuru n’ekwataho ebyahangirwe byona. (Soma Ezekyeri 36:23.) Omu byahangirwe byona omu iguru hamu n’omu nsi, Yesu nuwe akyakizireyo kweza ibara lya Ise. Baitu abanyanzigwa ba Yesu obubaamukwasire, bakamujunana ngu akaba najuma Ruhanga. Hataroho kugurukyagurukya, Yesu akaba akimanyire ngu kujuma rundi kusiiga ibara lya Ruhanga erirukwera enziro nikyo ekibi ekirukukirrayo kimu. Aine kuba yasaasire muno habwokumuteekaho omusango ogu. Egi niyo ensonga habwaki Yesu akaba ali omu busaasi obw’amaani obwakaba ali haihi kukwatwa.—Luk. 22:​41-44.

12. Yesu akeeza ata ibara lya Ise?

¹² Yesu kusobora kweza ibara lya Ise, akagumiisiriza okubonabonesebwa kwona, okujumwa, n’okuhangirirwa. Akaba akimanyire ngu ayorobiire Ise, nahabweki akaba ataine kintu kyona ekirukumukwasa ensoni. (Baheb. 12:2) Omu kasumi ako akagumire, akaba akimanyire ngu Sitaani nuwe arukumurwanisa. (Luk. 22:​2-4; 23:​33, 34) Sitaani akaba nanihira ngu naija kulemesa Yesu kwikara ali mwesigwa, baitu akalemwa. Yesu akakyolekera kimu ngu Sitaani mubiihi w’ebisuba kandi ngu Yahwe aine abaheereza be abaikara bali besigwa n’obubaba nibaraba omu bizibu eby’amaani.

13. N’osobora ota kusemeza Omukama waawe Yesu?

 ¹³ N’ogonza kusemeza Omukama waawe, Yesu? Ikara n’okugiza ibara lya Yahwe, kandi n’okonyera abandi kwega ha miringo ye enungi. Obwokora eki, oba noyegera hali Yesu Kristo. (1 Pet. 2:21) Kusisanaho na Yesu, osemeza Yahwe kandi oyoleka ngu omunyanzigwa Sitaani mubiihi w’ebisuba.

TUKONYERA KUJUNA OBWOMEEZI OBW’ABANTU ABANDI OBUTUKUGIZA IBARA LYA RUHANGA

14-15. Bintu ki ebirungi ebirugamu obutugambiraho abandi ibara lya Yahwe?

¹⁴ Obutukugiza ibara lya Yahwe, tukonyera kujuna obwomeezi obw’abantu abandi. Omu mulingo ki? Sitaani “akaigara amaiso . . . gabatarukuikiriza.” (2 Kol. 4:4) Ekirugiremu, basoboire kwikiriza ebisuba nka: Ruhanga taroho, ali hara naitwe, tatufaaho, mukaali kandi abonabonesa enkozi z’ebibi ebiro n’ebiro. Sitaani abaza ebisuba binu habwokuba n’agonza kusiisa ibara lya Ruhanga erirungi n’okulemesa abantu kumwirra haihi. Baitu obutugambira abantu amananu agarukukwata hali Ruhanga, tulemesa Sitaani kuhikiiriza ekigendererwa kye. Obutwegesa abantu amananu agarukukwata hali Isiitwe, tukugiza ibara lye erirukwera. Kiki ekirugamu?

¹⁵ Amananu agali omu Kigambo kya Ruhanga gaine amaani. Obutwegesa abantu ebirukukwata hali Yahwe, kandi tukabakonyera kumanya muntu wa mulingo ki, harugamu ebirungi. Abantu banu, baba batakyabiihwabiihwa Sitaani kandi batandika kurora emiringo enungi eya Isiitwe ow’omu iguru. Bahunirra muno habw’amaani ge amaingi agataine bugarukiro. (Is. 40:26) Beega kumwesiga habwokuba w’obwinganiza. (Bir. 32:4) Beega bingi ebirukukwata h’amagezi ge amaingi. (Is. 55:9; Bar. 11:33) Kandi bahuumuzibwa kukimanya ngu Ruhanga nuwe kugonza. (1 Yoh. 4:8) Obubeyongera kwirra haihi na Yahwe, beyongera kukigumya ngu omurago ogw’okwomeera ebiro n’ebiro nigwija kuhikirra. Mali twine omugisa ogw’amaani ogw’okukonyera abantu kwirra haihi na Isebo ow’omu iguru! Obutukikora, Yahwe aturora ‘nk’abakozi hamu nauwe.’—1 Kol. 3:​5, 9.

16. Abamu bakwatwaho bata obubeega ibara lya Ruhanga? Bazaaho ebyokurorraho.

 ¹⁶ Hakubanza, nitusobora kwegesa abantu ngu ibara lya Ruhanga nuwe Yahwe. Kandi eki, nikisobora kukwataho omuntu ow’aine omutima omurungi. Ekyokurorraho, omwisiki omuto arukwetwa Aaliyah b akakurra omu diini etarukwikiririza omu Baibuli. Akaba nagurukyagurukya enyegesa z’ediini egi kandi zitamukonyere kwirra haihi na Ruhanga. Eki kikahinduka hanyuma y’okutandika kwega Baibuli n’Abakaiso ba Yahwe. Akatandika kurora Ruhanga nka munywani we. Kandi akahunirra muno obuyakimanyire ngu ibara lya Ruhanga liihirwe omu Baibuli ezirukukira obwingi, baateekamu ebitiinisa nka Mukama. Kwega ibara lya Ruhanga kikahindura obwomeezi bwe. Akagamba ati: “Munywani wange nfenanfe aine ibara!” Kiki ekyarugiremu? Agumizaamu n’agamba ati: “Hati nyine obusinge bwingi omu mutima. Kandi ogu mugisa gw’amaani.” Omusaija arukwetwa Steve akaba ali muzini ayakuliire omu diini ey’Ekiyudaaya. Akaba atarukugonza kweteranizaaho ediini endi yoona habw’obugobya obwakaba arozereyo. Baitu hanyuma ya nyina kufa, akaikiriza kubaho omu h’Abakaiso ba Yahwe nayegesa omuntu ondi Baibuli. Akakwatwaho muno obuyayegere ibara lya Ruhanga. N’agamba ati: “Nkaba ntamanyire ibara lya Ruhanga.” Ayongera agamba ati: “Baitu hanyuma yokulimanya, nkakyetegereza ngu Ruhanga aroho kwo! Nkehurra ngu ntungire omunywani.”

17. Habwaki ocweriiremu kimu kugumizaamu nokugiza ibara lya Yahwe? (Rora ekisisani.)

¹⁷ Obwoba n’otebeza rundi n’oyegesa, ogambiraho abandi ibara lya Ruhanga? Obakonyera kumanya Ruhanga muntu wa mulingo ki? Obwokora eki, oba nokugiza ibara lya Ruhanga. Gumizaamu nokugiza ibara lya Ruhanga erirukwera kuraba omu kukonyera abantu kumanya muntu wa mulingo ki. Obworakora eki, noija kujuna obwomeezi obw’abantu abandi. Noija kuhondera ekyokurorraho ky’Omukama waawe Yesu Kristo. Kandi ekirukukira byona, noija kusemeza Sso ow’okugonza Yahwe. Ikara ‘nokugiza ibara lye ebiro n’ebiro’!—Zab. 145:2.