1-2. Se a te mea e mafai o fesoasoani mai ke malama‵lama tatou i lagonaga o Ieova e uiga ki fakamaseiga ne fai ki tena igoa?

 MAFAUFAU ki te mea tenei: E fai ne se tino telā e alofa malosi koe ki ei a pati sē ‵lei e uiga ki a koe. E iloa ne koe me e se ‵tonu a pati konā; kae e tali‵tonu a nisi tino ki ei. Kae sili atu i te masei, me e toe fakamatala atu ne latou te tala sē tonu tenā, kae tali‵tonu foki a tino e tokouke ki ei. Ka pefea ou lagonaga? Kafai e alofa koe ki tino kae manavase foki ke taku ‵lei tou igoa, ka se ‵lei eiloa ou lagonaga ona ko pati fatu‵fatu konā.—Faata. 22:1.

² E fesoasoani mai te fakatusaga tenei ke malama‵lama tatou i lagonaga o Ieova i te taimi ne taku fakamasei ei tena igoa. E tokotasi tena tama faka-te-agaga ne fai atu ne ia a pati sē ‵tonu e uiga ki a ia ki te fafine muamua eiloa, ko Eva. Ne talitonu tou fafine ki pati ‵loi konā kae ne fai ei ke ‵teke atu a ‵tou mātua muamua ki a Ieova. Ona ko te mea tenā, ne agasala ei a tino katoa kae ‵mate atu foki. (Kene. 3:​1-6; Loma 5:12) A fakalavelave katoa e lavea ne tatou i te lalolagi nei—te mate, taua, logo‵maega—ne māfua mai ona ko loi ne fakasalalau ne Satani i te fatoaga o Etena. E mata, ne logo‵mae a Ieova ona ko loi konā mo mea ne iku mai i ei? Ao, ne logo‵mae eiloa. Kae ko Ieova e seki kaitaua io me ita fakamoemoe. Ne tumau loa a ia i te fai pelā me se “Atua fiafia.”—1 Timo. 1:11.

3. Se a te tauliaga e maua ne tatou?

³ E maua loa ne tatou se tauliaga gali ke fesoasoani atu ke fakamaluga aka te igoa o Ieova mai te faka‵logo ki te fakatonuga faigofie tenei: “‵Viki atu ki te igoa o Ieova.” (Sala. 113:1) E fai tatou penā mai te fai‵pati ki mea ‵lei e uiga ki te Tino i o ia te igoa tapu tenā. E mata, e mafai o fai koe penā? Ke mafau‵fau nei tatou ki pogai tāua e tolu kolā ka fesoasoani mai ke ‵viki atu tatou ki te igoa o te Atua mo te loto kātoa.

 E FAKAFIAFIA NE TATOU A IEOVA MĀFAI E ‵VIKI ATU TATOU KI TENA IGOA

4. Kaia e fiafia ei a Ieova māfai e ‵viki atu tatou ki a ia? Fakamatala mai. (Onoono foki ki te ata.)

⁴ E fakafiafia ne tatou a te ‵tou Tamana i te lagi māfai e ‵viki atu tatou ki tena igoa. (Sala. 119:108) E mata, e fakauiga i ei me i te Atua malosi katoatoa e ‵pau mo tino sē ‵lei katoatoa kolā e ma‵nako ke maua ne latou a vikiga mai tino ke fakamalosi aka ei latou io me maua a lagonaga tokagamalie? Ikai. Mafaufau ki te fakatusaga tenei. E ‵sai atu se tamaliki fafine ki te ua o tena tamana kae fai atu, “A koe ko te ‵toe tamana ‵lei eiloa i te lalolagi kātoa!” E fiafia te tamana, kae otia foki tena loto i ana pati. Kaia? E mata, ka fai atu tatou me i a ia se tamana telā e manako ki ne fakamalosiga, io me fakalagolago ki tavaega mai tena tamaliki? Ikai. I lō te fai penā, e tali‵tonu tatou me i a ia se tamana malosi telā e fiafia māfai e fakaasi atu ne tena tamaliki a tena alofa mo tena loto fakafetai ki a ia. E iloa ne ia me ka aoga a uiga konā ki tou fafine māfai ko matua me fai ei a ia ke fiafia. Konā foki loa a pogai e fiafia ei a Ieova, te ‵toe Tamana sili, māfai e ‵viki atu tatou ki a ia.

5. Se a te loi e mafai o ‵teke atu ne tatou e auala i te avatuga o vikiga ki te igoa o te Atua?

⁵ Kafai e ‵viki atu tatou ki ‵tou Tamana i te lagi, ko fesoasoani tatou o ‵teke a so se loi telā e fai e uiga ki a tatou. E fai mai Satani me e seai se tino e mafai o ‵pulu mo te fakamaoni ne ia te igoa o te Atua, kae seai foki se tino e mafai o tumau i te fakamaoni. Ana muna me ka fulitua atu tatou katoa ki te Atua māfai e mafau‵fau ifo tatou me tenā te mea e ‵tau o fai. (Iopu 1:​9-11; 2:4) Kae ne fakamaoni atu ne Iopu me i a Satani se tino loi. Kae pefea koe? E maua ne tatou katoa te tauliaga ke ‵pulu te igoa o te ‵tou Tamana kae fakafiafia a ia mai te tavini atu mo te fakamaoni ki a ia. (Faata. 27:11) Se tauliaga gali eiloa mō tatou ke fai penā.

6. E mafai pefea o fakaakoako tatou ki te tupu ko Tavita mo te kau Levi? (Neemia 9:5)

⁶ A tino kolā e a‵lofa ki te Atua e ma‵nako o ‵viki atu ki tena igoa mo olotou loto kātoa. Ne tusi mai te tupu ko Tavita: “Ke ‵viki atu au ki a Ieova; ke ‵viki atu a mea katoa i loto i a au ki tena igoa tapu.” (Sala. 103:1) Ne iloa ne Tavita me kafai e ‵viki atu tatou ki te igoa o Ieova ko avatu foki loa i ei ne tatou a vikiga ki a Ieova eiloa. Kafai e lagona ne tatou te igoa o Ieova, e masaua ne tatou me ko ia se vaegā tino pefea, ana uiga ‵gali mo ana faifaiga fakaofoofogia. Ne manako a Tavita ke faka‵malu te igoa o tena Tamana kae ke ‵viki atu foki ki ei. Ne manako a ia ko “mea katoa i loto i a” ia ke fai penā—ko tena uiga, ke ‵viki atu mo te loto kātoa. E penā foki a tino Levi, ne fai ne  latou te takitakiga i te avatuga o vikiga ki a Ieova. Ne fai ‵tonu mai latou mo te loto maulalo me e seai ne pati e mafai o fakamatala katoatoa atu i ei a vikiga kolā e ‵tau o avatu ki te igoa tapu o Ieova. (Faitau te Neemia 9:5.) E mautinoa me ne fiafia eiloa te loto o Ieova ki vikiga kolā ne fai atu mo te loto maulalo mo te loto kātoa.

7. E mafai pefea o ‵viki atu tatou ki a Ieova i te ‵tou galuega talai mo ‵tou olaga i aso takitasi?

⁷ I aso nei e mafai o fakafiafia ne tatou a Ieova mai te fai‵pati e uiga ki a ia mo te alofa mo te loto fakafetai. Kafai e olo atu tatou i te galuega talai, e masaua ne tatou me i te ‵toe pogai tāua o te ‵tou galuega talai ko te fesoasoani atu ki tino ke fakapili‵pili atu ki a Ieova, kae ke ‵pau te lotou kilokiloga mo tatou e uiga ki te ‵tou Tamana pele. (Iako. 4:8) E fia‵fia tatou o fakaasi atu ki tino a fakamatalaga i te Tusi Tapu e uiga ki a Ieova, tena alofa, fai mea tonu, poto, malosi mo nisi uiga ‵gali o ia. E ‵viki atu foki tatou ki a Ieova kae fakafiafia ne tatou a ia mai te taumafai o fakaakoako ki a ia. (Efe. 5:1) Kafai e fai tatou penā, ka lavea mai ne tino me tu ‵kese eiloa tatou mai tino i te lalolagi masei tenei. (Mata. 5:​14-16) I te taimi e fesokotaki ei tatou mo latou i aso takitasi, e mafai o fakamatala atu ne tatou a pogai e ‵kese ei a mea e fai ne tatou. Mai te fai penā, ka fia fakapili‵pili atu eiloa a tino loto ‵lei ki te ‵tou Atua. Kafai e ‵viki atu tatou ki a Ieova i auala konei, ko fakafiafia eiloa ne tatou a tena loto.—1 Timo. 2:​3, 4.

E FAKAFIAFIA NE TATOU A IESU MĀFAI E ‵VIKI ATU TATOU KI TE IGOA O IEOVA

8. I te auala fea ne mua ei a Iesu o avatu a vikiga ki te igoa o Ieova?

⁸ Mai mea ‵poto katoa ne faite i te lagi mo te lalolagi, e seai se tino e iloa ‵lei ne ia te Tamana e pelā mo tena Tama. (Mata. 11:27) E alofa a Iesu ki tena Tamana, kae ko ia eiloa ne mua o avatu a vikiga ki te igoa o Ieova. (Ioa. 14:31) I tena ‵talo ki tena Tamana i te po mai mua o mate, ne fakamatala fakatoetoe mai ne ia tena galuega i te lalolagi nei, penei: “Ko oti ne fakailoa atu ne au tou igoa.” (Ioa. 17:26) Se a te mea ne fakauiga a ia ki ei?

9. Se a te tala fakatusa ne fakaaoga ne Iesu ke fakamatala faka‵lei mai i ei a tena Tamana?

⁹ E uke a mea ne fai ne Iesu i tafa o te fakailoa atu ki tino me i te igoa o te Atua ko Ieova. Ko leva ne iloa ne tino Iutaia kolā ne akoako ne Iesu, a te igoa o te Atua. Kae ne mua eiloa a Iesu o “fakamatala mai ne ia a te Tamana.” (Ioa. 1:​17, 18) E pelā me se mea e tasi, e fakamatala mai i Tusitusiga Epelu me i a Ieova e alofa fakamagalo kae alofa atafai. (Eso. 34:​5-7) Ne fakamaina faka‵lei mai ne Iesu te munatonu tenā i tena tala fakatusa e uiga ki te tama fakamāumāu mea mo tena tamana. Kafai e fai‵tau tatou i te taimi ne lavea ei ne te tamana a tena tama telā ko salamō “kae koi ‵mao a ia,” kae tele atu o fakafetaui ki a ia, ‵sai atu ki ei, kae fakamagalo ne ia mo te loto kātoa, ko lavea faka‵lei eiloa ne tatou i ei a te lasi o te alofa fakamagalo mo te alofa atafai o Ieova. (Luka 15:​11-32) Ne fesoasoani atu a Iesu ki nisi tino ke lavea faka‵lei ne latou me ko tena Tamana se vaegā tino pefea.

10. (a) E iloa pefea ne tatou me ne fakaaoga ne Iesu te igoa totino o tena Tamana kae manako foki ke fai penā a nisi tino? (Male. 5:19) (Onoono foki ki te ata.) (e) Se a te mea e manako a Iesu ke fai ne tatou i aso nei?

¹⁰ E mata, ne manako foki a Iesu ke fakaaoga ne nisi tino a te igoa totino o tena Tamana? Ao. Kāti e tali‵tonu a nisi takitaki lotu me e se ‵tau o takutaku te igoa o te Atua me ko tō ‵malu, kae ne seki taofi aka a Iesu ne akoakoga sē ‵tonu konā mai te fakaaloalo atu ki te igoa o tena Tamana. Mafaufau ki te taimi ne faka‵lei ne ia se tagata e pukea ne se temoni i  te fenua o tino Kelasa. Ne ma‵taku a tino kae fakamolemole atu ki a Iesu ke fano kea‵tea, tenā ne seki nofo ei a ia i te kogā fenua tenā. (Male. 5:​16, 17) Kae ko Iesu ne manako ke fakasalalau atu te igoa o Ieova i konā. Tenā ne fakatonu atu a ia ki te tagata ne faka‵lei ne ia ke fakailoa atu ki tino, a mea ne fai ne Ieova, kae e se ko mea ne fai ne Iesu. (Faitau te Maleko 5:19.) a Tenā foki te mea e manako a ia ke fai i aso nei—ke fakasalalau atu ne tatou te igoa o tena Tamana ke iloa ne tino i te lalolagi kātoa! (Mata. 24:14; 28:​19, 20) Kafai e fai a ‵tou tiute, ko fakafiafia ne tatou te ‵tou Tupu, ko Iesu.

11. Se a te mea ne akoako ne Iesu ana soko ke ‵talo ki ei, kae kaia e tāua ei? (Esekielu 36:23)

¹¹ Ne iloa ne Iesu me ko te fuafuaga eiloa a Ieova ke faka‵malu aka Tena igoa, ke faka‵ma mai so se fakamaseiga ne fai ki ei. Tenā te pogai ne akoako ne te ‵tou Matai ana soko ke ‵talo, penei: “Te motou Tamana telā i te lagi, ke tapu tou igoa.” (Mata. 6:9) Ne iloa ne Iesu me tenei te ‵toe kinauga sili e fe‵paki mo mea ola katoa ne faite. (Faitau te Esekielu 36:23.) E seai se mea ola kae poto ne faite i te iunivesi ne uke ana mea ne fai ke faka‵malu aka te igoa o Ieova i tafa o Iesu. Kae i te taimi ne puke fakapagota ei a Iesu, se a te agasala ne fai atu ana fili me ne fai ne ia? Ko te muna masei ki te Atua! Ne iloa ne Iesu me i te faipati sē ‵tau io me fatufatu te igoa tapu o tena Tamana ko te ‵toe agasala matagā eiloa. Ne seki toka tena mafaufau i ‵losiga konā ne fai atu ki a ia. Kāti tenā te pogai tonu ne “tigaina” ei a Iesu i itula mai mua o puke fakapagota a ia.—Luka 22:​41-44.

12. Ne faka‵malu pefea ne Iesu te igoa o tena Tamana i te ‵toe auala ‵lei?

¹² Ke faka‵malu te igoa o tena Tamana, ne kufaki ne Iesu a fakasauaga, fakamaseiga, mo pati fatufatu katoa ne fai ki a ia. E iloa ne ia me ne fakalogo a ia ki tena Tamana i mea katoa; e seai se mea e ‵tau o mā a ia i ei. (Epe. 12:2) Ne iloa foki ne ia me i a Satani ne taua ‵tonu atu ki a ia i toe taimi faiga‵ta konā. (Luka 22:​2-4; 23:​33, 34) Ne manako malosi a Satani ke fakaseaoga ne ia te fakamaoni o Iesu; kae ne seki taunu eiloa ana taumafaiga! Ne fakamaoni faka‵lei atu ne Iesu i a Satani se tino loi fakamataku kae e isi eiloa ne tavini fakamaoni  a Ieova, kolā e tumau i te fakamaoni faitalia toe tulaga faiga‵ta e fe‵paki mo latou!

13. E fakafiafia pefea ne koe tou Tupu telā ko pule mai nei?

¹³ E a, e manako koe o fakafiafia tou Tupu telā ko pule mai nei? Tumau i te ‵viki atu ki te igoa o Ieova, mai te fesoasoani atu ki nisi tino ke iloa faka‵lei ne latou te ‵tou Atua. Kafai e fai koe penā, ko tautali eiloa koe i kalafaga o Iesu. (1 Pe. 2:21) E pelā mo Iesu, ko fakafiafia eiloa ne koe te loto o Ieova kae fakamaoni atu me i Tena fili sili ko Satani, se tino loi eiloa!

E FESOASOANI TATOU O FAKA‵SAO A OLA MĀFAI E ‵VIKI ATU KI TE IGOA O IEOVA

14-15. Ne a mea ‵gali e mafai o ‵tupu māfai e akoako ne tatou a tino e uiga ki a Ieova?

¹⁴ Kafai e ‵viki atu tatou ki te igoa o Ieova, ko fesoasoani tatou o faka‵sao a ola. E pefea la? Ko oti ne ‘fakapouli ne Satani a mafaufau o tino sē tali‵tonu.’ (2 Koli. 4:4) Ona ko te mea tenā, ko oti ne kamata o tali‵tonu latou ki loi a Satani e pelā mo mea konei: E seai se Atua, a te Atua e ‵mao ‵ki kae e se alofa ki tino, a te Atua e masei kae fakasaua ne ia a tino ki te se-gata-mai. A vaega loi katoa konā ne fai ke ‵funa aka io me fakamasei te igoa mo te ata ‵lei o Ieova, ko te mea ke se fia fakapili‵pili atu a tino ki a ia. Kae ko te ‵tou galuega talai e fakaseaoga i ei a taumafaiga a Satani. E ‵viki tatou ki te igoa tapu o te ‵tou Atua, māfai e akoako ne tatou a tino ki te munatonu e uiga ki te ‵tou Tamana. Ne a mea ne iku mai i ei?

¹⁵ A te munatonu i te Muna a te Atua e ‵mana ‵ki. A te akoako atu o nisi tino e uiga ki a Ieova mo mea ‵tonu e uiga ki a ia, ka fai ei ke lavea ne tatou se mea tafasili i te gali. Ka matafitafi malielie atu te pouliga o loi a Satani mai olotou mata, kae kamata o ‵pau te kilokiloga a tino taki tokotasi konei mo tatou e uiga ki te ‵tou Tamana alofa. E ofo malosi latou i tena ‵mana telā e seai se gatamaiga. (Isa. 40:26) Ko tali‵tonu latou me e ‵lei katoatoa a tena fai mea tonu. (Teu. 32:4) E tauloto ne latou a mea e uke mai tena poto sili. (Isa. 55:9; Loma 11:33) Kae se fakamafanafanaga eiloa ki a latou ke iloa me i a ia ko te alofa eiloa. (1 Ioa. 4:8) I te taimi e fakapili‵pili atu latou ki a Ieova, ka gasolo o mautinoa i a latou te lotou fakamoemoega ke ola ki te se-gata-mai e pelā me ne ana tama‵liki. Ko oko loa te gali  o te tauliaga ko maua ne tatou ke fesoasoani atu ki tino ke fakapili‵pili ki te lotou Tamana! Kafai e fai tatou penā, ko kilo mai a Ieova ki a tatou e pelā me ne tino e “ga‵lue” tasi mo ia.—1 Koli. 3:​5, 9.

16. Ne otia pefea a loto o nisi tino i te iloaga ne latou a te igoa o te Atua? Taku mai ne fakaakoakoga.

¹⁶ Muamua la, kāti e akoako atu tatou ki tino me i te igoa o te Atua ko Ieova. E mafai ne te akoakoga tenā o ‵fuli ne ia te olaga o se tino loto ‵lei. E pelā mo te tamafine e igoa ki a Aaliyah b ne puti aka a ia i se kāiga sē Kelisiano. Ne seki fiafia a ia ki tena lotu kae e se pili a ia ki te Atua. Ne mafuli te tulaga tenā mai tua o te kamataga o fai tena akoga ne Molimau. Ne kamata o kilo atu a ia ki te Atua e pelā me se Taugasoa. Kae ne poi tou fafine i te iloaga ne ia me ne tapale kea‵tea te igoa o te Atua mai Tusi Tapu e uke kae sui ki tofi, e pelā mo te Aliki. Ne ‵fuli katoatoa tena olaga i te iloaga ne ia te igoa o Ieova. Ne fai mai tou fafine: “A toku Taugasoa pele e isi sena igoa!” Ne a mea ne iku mai i ei? Ana muna: “Ko lasi ‵ki te filemu e lagona ne au i toku loto. Ko oko loa au i te fiafia.” A Steve se tagata Iutaia tātā pese telā e ‵piki ‵mautakitaki ki ana tuu mo aganuu. Ne seki fiafia a ia ki lotu ona ko te uke o faifaiga sē ‵tonu ne lavea ne ia i ei. Kae i te taimi e tasi, ne talia ne ia ke kau atu ki se akoga faka-te-Tusi Tapu telā ne fai ne se Molimau a Ieova. Ne otia malosi tena loto i te iloaga ne ia te igoa o te Atua. Ana muna: “E se iloa lele ne au me isi se igoa o te Atua.” Ne toe fai mai a ia: “Tenei te taimi muamua ko malamalama au me i te Atua se tino tonu! Ne kilo atu au ki a ia me se Tino tonu. Ne iloa ne au i te taimi eiloa tenā me ko maua ne au se Taugasoa.”

17. Kaia ko fakaiku ei ne koe ke tumau i te ‵viki atu ki te igoa o Ieova? (Onoono foki ki te ata.)

¹⁷ I te taimi e talai kae akoako atu ei koe, e mata, e fakaasi atu ne koe ki tino a te igoa tapu, ko Ieova? E mata, e fesoasoani atu koe ke iloa ne latou me ko te ‵tou Atua se tino pefea? Mai te fai penā, ko ‵viki atu eiloa koe ki te igoa o te Atua. Ke na tumau eiloa koe i te ‵viki atu ki te igoa tapu o Ieova mai te fesoasoani ki tino ke iloa ne latou te Tino telā e fakaigoa ki te igoa tenā. Mai te fai penā, ko faka‵sao eiloa ne koe a ola o tino. Ka tautali eiloa koe i te takitakiga a tou Tupu, ko Keliso Iesu. Kae sili atu i mea katoa, ka fakafiafia eiloa ne koe a tou Tamana alofa ko Ieova. Ke na “‵viki atu [eiloa koe ki tena] igoa ki te se-gata-mai, se-gata-mai eiloa”!—Sala. 145:2.