1, 2. Иегова ооң адын карартырга чүнү миннип турарын билип алырда кандыг чижек дузалаар?

 ДЫКА ынак кижиңер силерни бактап турар дижик. А багай чүүл, улус аңаа бүзүрээш, улаштыр тарадып турар. Ынчан чүнү миннир силер? Кижилер-биле хамаарылгаңар болгаш ат-алдарыңар чугула болза, ындыг нүгүл силерге аарышкылыг (У. ч. 22:1).

² Кажан Иегованың адын дээрде оолдарының бирээзи нүгүлдеп карартыптарга, ооң чүнү миннип турганын ол байдал биске көргүзер. Бир дугаар херээжен Ева ол нүгүлге бүзүрей берген. Ооң хайы-биле баштайгы кижилер Бурганга удур тура халаан, кижи төрелгетенниң өг-бүлезинче бачыт биле өлүм кирип келген (Э. д. 3:1—6; Рим. 5:12). Амгы үениң өлүм-чидими, дайыннары, хилинчек-човалаңы база өске-даа бергелериниң дөзү — Эрликтиң Эдем садынга нептереткен нүгүлү. Иеговага бодунуң дугайында нүгүлдү дыңнаары база ооң чүге чедиргенин көөрү аарышкылыг деп чигзиниг чок. Ынчалза-даа Иегова хомудап, багай сеткил шыгжаваан. Ол ам-даа «аас-кежиктиг Бурган» бооп арткан (1 Тим. 1:11, Чаа делегей).

3. Биске кандыг хүндүткел көргүскен?

³ Иегованың адын арыглаар алдар-хүндүнү алган бис. Ынчангаш: «Иегованың адын алгап-мактаңар!» деп айтыышкынны дыңнаалыңар (Ыд. ыр. 113:1, Чаа делегей). Бурганывыстың дугайында алыс шынны өске улуска чугаалап тургаш, ооң адын алдаржыдып турар бис. Ооң адын алдаржыдар күзелиңер бар бе? Бүгү сеткиливистен Бурганның адын алдаржыдар күзел кайыын тыптып кээрин көрээлиңер.

 ИЕГОВАНЫҢ АДЫН АЛДАРЖЫДЫП, ОНУ ӨӨРТҮР БИС

4. Бистиң алгаг-макталывыс Иеговага чүге өөрүнчүг? Чижекти чугаалаңар. (Чурукту база көрүңер).

⁴ Бис дээрде Адавыстың адын алдаржыдып, ону өөртүп турар бис (Ыд. ыр. 118:108). Оон алырга, күчү-күштүг Бурган тергиин эвес кижилер ышкаш макталдан база ынакшылдың бүзүредиинден хамааржыр бе? Чок. Чижектен көрээлиңер. Бичии уруг ачазынче халып чеде бергеш, куспактаныпкаш: «Ачай, сен өртемчейде эң-не дээре кижи сен!» дээрге ачазы хүлүмзүрүп уруун дыка чаптаар. Чүге? Ачазының бот үнелели чаш кижиниң макталындан хамааржыр бе? Чок, болбайн канчаар. Аңаа уруунуң ынакшылы, өөрүп четтириишкини дыка өөрүнчүг. Чүге дээрге уруу өзүп кээрге, ол эки шынарлар аас-кежиктиг болурунга дузалаар деп ол шыырак эр кижи билир болгай. Шак ынчаар дээрде Адавыс Иегованы алдаржыдарывыска, ол өөрүүр.

5. Бурганның адын алгап-мактап тургаш, кандыг мегени сойгалаар бис?

⁵ Дээрде Адавысты алдаржыдарывыска, бисти нүгүлдээн Эрликтиң мегези ажыттынып турар. А Эрлик чаңгыс-даа кижи Иегованың адын бердингени-биле камгалавас дээр. Оон аңгыда, Бургандан ажык чок деп санаар болзувусса, бисти шуптувусту оон хая көрнү бээр кылдыр чугаалаар (Иов 1:9—11; 2:4). Ынчалза-даа Иов Бурганга шынчызы-биле Эрлик — мегечи деп бадыткаан. А биске хамаарыштыр чүнү чугаалап болур? Бис дээрде Адавыстың адын камгалап, шынчы бараалгап, ону өөртүп болур бис (У. ч. 27:11). Ол дээрге кижи бүрүзүнге улуг хүндүткел!

6. Давид хаан биле левиттерниң үлегер-чижээн канчаар эдерип болур бис? (Неемия 9:5).

⁶ Иеговага ынак кижилер бүгү сеткилинден ооң адын алгап-мактаар күзелдиг. Давид хаан мынча деп бижээн: «Сеткилим [Иегованы]... алгап-йөрээзин, бүгү ишти-хөңнүм Ооң ыдыктыг адын алгап-йөрээзин!» (Ыд. ыр. 102:1). Иегованың адын алдаржыткаш, Бурганның бодун алгап-мактап турарын Давид билип турган. Ол атты дыңнааш, ооң бүгү кайгамчыктыг шынарларын база өндүр улуг херектерин сактып кээр бис. Давид дээрде Адазының адынга ыдыктыг хамаарылгалыг болгаш, ону бүгү сеткилинден алдаржыдарын күзеп чораан. Шак-ла ындыг үлегерни биске левиттер арттырган. Олар Бурганның ыдыктыг адын чогуур деңнелге долузу-биле алдаржыдып шыдавазын биче сеткилдии-биле көргүскен (Номчуптуңар: Неемия 9:5.)  Шак ындыг биче сеткилдиг алгаг-мактал Иегованы өөртүрү чигзиниг чок.

7. Суртаалга, хүн бүрүде чуртталгавыста Иегованы канчаар алдаржыдып болур бис?

⁷ Иегованың дугайында чылыг-чымчак, өөрүп четтирип, ынакшылдыг чугаалаар болзувусса, ону өөртүр бис. Суртаалывыстың кол сорулгазы — Иеговаже кижилерни хаара тудуп, бис ышкаш көрүштүг болурунга дузалажыр бис (Иак. 4:8). Библиядан Иегованың ынакшылын, чөптүг-шынныын, мерген угаанын, күжүн болгаш өске-даа кайгамчыктыг шынарларын улуска көргүзеринге ынак бис. Чуртталгавыска Иегованы өттүнерин кызар болзувусса, ону өөртүр бис (Эф. 5:1). Ооң ачызында улус бисти бо делегейден аңгы деп эскерип кааш, чүге ылгалып турарывысты билип алыксай бээр чадавас. Ынчан ону тайылбырлап бээр арга тыптып кээр (Мф. 5:14—16). Түңнелинде ажык чүректиг улустуң Бурган-биле чоокшулажыр аргазы тыптып кээр. Бараалгалывыс болгаш алдынып турарывыс-биле Иегованы алдаржыткаш, ооң Ада чүрээн өөртүп турар бис (1 Тим. 2:3, 4).

ИЕГОВАНЫҢ АДЫН АЛДАРЖЫДЫП, ИИСУСТУ ӨӨРТҮР БИС

8. Иисус чүге Иегованың адын алдаржыдарының эң-не дээре үлегер-чижээ?

⁸ Дээрде-даа, черде-даа Иегованы Иисустан артык билир кым-даа чок (Мф. 11:27). Иисус Ачазынга ынак база ооң адын алдаржыдарынга эң-не эки үлегерни көргүскен (Ин. 14:31). Өлүмүнүң мурнунда бараалгалын түңнеп, мөргүлге ол мынча дээн: «Сээң адыңны оларга ажыдып берген мен» (Ин. 17:26). Ол сөстер-биле Иисус чүнү илереткен?

9. Иисус Адазын угаадыглыг төөгүге канчаар көргүскен?

⁹ Еврейлер Бурганның ады — Иегова деп билир турган, ынчангаш Иисус оларга Бурганны эки билип алырынга дузалажып турган (Ин. 1:17, 18). Чижээ, Еврей Бижилгелер Иегованың энерелин, кээргээчелин ажыткан (Хост. 34:5—7). Иисус ону будалып читкен оглун уткуп алган аданың дугайында угаадыглыг төөгүнүң дузазы-биле тайылбырлаан. Буруузунган оглун ырактан-на көрүп кааш, «ачазы оглунга маңнап чеде бергеш, ону кужактааш», сеткилиниң ханызындан өршээп каанын номчуурга Иегованың энерели, кээргээчели каракка чуруттунуп кээр (Лк. 15:11—32). Иисус кижилерге Адазының херек кырында кандыызын билип алырынга дузалашкан.

10. а) Иисус Адазының адын чугаалап, өске улус база шак ынчаар кылзын деп күзээнин кайыын билир бис? (Марк 5:19) (Чурукту база көрүңер) б) Иисус бисти бөгүн чүнү кылзын деп күзээр?

¹⁰ Өске кижилер ооң Адазының адын чугаалаарын Иисус күзээн бе? Ийе, болбайн канчаар! Ол үениң чамдык шажын башкарыкчылары Бурганның ады ыдыктыг, ынчангаш ону адап болбас деп санап турган чадавас. А Иисус ындыг чаңчылдарга чагыртпайн, Адазының адын хүндүлеп адап чораан. Гераса деп черге буктарга алыскан кижини Иисус экиртипкенин сактып кээлиңер. Ону дыңнааш улус корткаш, Иисусту ол черден чоруй баар кылдыр чаннып дилээн (Мк. 5:16, 17). Ынчалза-даа Иисус Иегованың ады ол черлерге база билдингир болзун деп күзээш, экирий берген кижиге дөргүл-төрелинге ооң-биле чүү болганын чугаалап бээрин дааскан. Ол эр кижи ону Иисус эвес, а Иегова экирткен деп чугаалаар ужурлуг турган. (Номчуптуңар:  Марк 5:19 a.) Амгы үеде Иисустуң күзели өскерилбээн, шупту кижилер Адазының адын билип алырын ол күзеп турар! (Мф. 24:14; 28:19, 20). Бис суртаалдап, Бурганның адын адап тургаш, Хаанывыс Иисусту өөртүп турар бис.

11. Иисус өөреникчилерин чүнүң дугайында мөргүүрүнге өөреткен база ол чүүл чүге чугула? (Иезекиил 36:23).

¹¹ Иегованың күзел-бодалы бодунуң адын ыдыктап, шупту буруудадыышкыннардан арыглаары деп, Иисус билир турган. Ынчангаш Өндүр улуг башкы мынчаар мөргүүрүнге өөреткен: «Дээрде Адавыс! Сээң адың алдаржызын!» (Мф. 6:9). Бурганның адын ыдыктаары — бүгү чаяалгаларның мурнунда эң-не чугула маргыштыг айтырыг деп, Иисус билип турган. (Номчуптуңар: Иезекиил 36:23.) Ол айтырыгны шиитпирлээринге хамаарыштыр дээрниң төлээлери-даа, кижилер-даа Иисустан артык хөйнү кылбаан. Ону Бурганны бак атка киирген деп нүгүлдеп шииткен. Иисусту бодунуң эң-не бужар кылдыр санаар бачыдынга буруудадырга, сөөлгү шактарда аңаа дыка аарышкылыг болган чадавас (Лк. 22:41—44).

12. Иисус Адазының адын чүге эң өндүр арга-биле ыдыктаан деп болур?

¹² Иисус Адазының адын ыдыктаар дээш улуг аарышкыны, куду көрүүшкүннү, нүгүлдү чүктеп эрткен. Адазынга бүгү талазы-биле дыңнангыр болгаш, ыядыр кандыг-даа чылдагаан чок деп, ол билир турган (Евр. 12:2). Муңгаранчыг шактарда Эрлик халдап турарын база билген (Лк. 22:2—4; 23:33, 34). Ол дайзын Иисус Бурганны садыптар деп идегезе-даа, дыка-ла часкан! Эрлик — эң-не арын-нүүр чок мегечи. Эң дошкун шенелделерде безин, Иеговага шынчы кижилер турар деп, Иисус кажан кезээде бадыткап каан!

13. Чагыра берген Хаанны канчаар өөртүп болур силер?

¹³ А силер дээрде чагырып турар Хааныңарны өөртүксээр силер бе? Өске улусту Бурган-биле таныштырып, Иегованың адын алдаржыдарын уламчылаалыңар. Ынчалдыр Иисустуң изин истээр силер (1 Пет. 2:21). Иисус ышкаш Иегованы  өөртүп, Бурганның удурланыкчызы Эрлик дээрге ийи арынныг мегечи деп бадыткаар силер!

ИЕГОВАНЫҢ АДЫН АЛДАРЖЫДЫП, КИЖИЛЕРНИ КАМГАЛААР БИС

14, 15. Иегованың дугайында алыс шын билиг кижилерге кандыг кайгамчык аргаларны ажыдып турар?

¹⁴ Иегованың адын алдаржытпышаан, кижилерниң амы-тынын камгалаарынга дузалажыр бис. Чүге? Эрлик «улустуң угаан-бодалын чүве эскербес кылып» каан (2 Кор. 4:4). Ынчангаш олар Бурган чок, Бурган оларны бодавас азы ону каржы-хажагай, бачыттыг улусту мөңгеде хилинчектээр деп ооң мегезинге бүзүреп чоруур. Ол меге: Иегованың адын бужартаткаш, аңаа кымны-даа чоокшулатпас деп чаңгыс сорулгалыг. Ынчалза-даа бистиң ажыл-херээвис Эрликке улуг шаптык болуп турар. Бис Адавыстың дугайында алыс шынны өөредип, адын алдаржыдып турар бис. Ооң түңнели кандыг?

¹⁵ Бурганның Сөзүнден алыс шын дыка күштүг. Иегова Бурганның дугайында шынны өөредиривиске кайгамчык чүүл болуп турар. Эрликтиң мегези буурап дүжерге, улус Иегованың чараш шынарларын эскерип эгелээр. Ооң кызыгаар чок күжүн көргеш, оларның чүректерин хүндүткелдиг коргуш дола бээр (Иса. 40:26). Бурганның дээди бады-шынчызынга бүзүреп, олар ооң ханы мерген-угаанынга өөренип турарлар (Ы. х. к. 32:4; Иса. 55:9; Рим. 11:33). Оон ыңай Бурган ынакшылдың үнер дөзү деп билгеш, аргалалды ап турар (1 Ин. 4:8). Иеговага чоокшулааш, олар мөңге чурттаар быжыг идегелди алыр. Иегова-биле кады ажылдап, кижилерге ооң-биле өңнүктежиринге дузалажыры — дыка-ла улуг хүндүткел! (1 Кор. 3:5, 9).

16. Бурганның адын билип алганы чамдык улуска кандыг салдарлыг болган? Чижектерни чугаалаңар.

¹⁶ Эгезинде кижилерге Бурганның ады — Иегова деп таныштырып болур. Чүгле ону билири безин ажык чүректиг улустуң чуртталгазын өскертип болур. Чижээ, Али́я b деп аныяк херээжен христиан эвес шажынныг  өг-бүлеге өскен. Ол бодун чүдүлгезинде артык, Бургандан ырак кылдыр миннип турган. Библияны Иегованың Херечилери-биле өөренип эгелээрге, шупту чүве өскерли берген. Бурган ооң өңнүү, деп Алия билип эгелээн. Бурганның адын Библиялардан ап каапкаш, Дээрги дээн ышкаш ат-дужаалдарга солуп каанын ол кайгап-ханмаан. Иегованың адын билип кааны аңаа ажыдыышкын болган. Ынчан ол ыыткыр: «Мээң эң-не эки өңнүүмнүң ады бар!» — дээн. Билиглери аңаа кандыг салдарлыг болганын Алия: «Мен ам оожургалдыг апардым. Иегованың адын билири меңээ дыка эки-дир!» — деп үлешкен. А эрги чаңчылдарлыг еврей өг-бүледен Стивтиң төөгүзү мындыг. Ол ийи арынныг чоруктан хөңнү калгаш, кандыг-даа шажынга хамааржырын күзевес болгаш, хөй кезиинде ыры-хөгжүм сонуургаар турган. Авазы чок апарган соонда удатпаанда Стив Иегованың Херечизиниң библейжи кичээлинге олуржурун чөпшээрешкен. Бурганның ады бар деп чүүл, аңаа дыка дээштиг болган. Стив: «Мен кажан-даа Бурганның адын билбес турган мен» — дээн. Оон: «Бурган бар деп чуртталгамда бир дугаар билип кагдым. Ол угаан чок күш эвес деп шынзыктым. Мен Өңнүүмнү тып алдым!» — деп немээн.

17. Иегованың адын чүге моон-даа соңгаар алдаржыдар күзелдиг силер?

¹⁷ Суртаалга-даа, кижилерни өөредирде-даа Иегованың ыдыктыг адын чугаалап турар силер бе? Бурган херек кырында кандыызын билип каарынга оларга дузалажыр-дыр силер бе? Ийе болза, ооң адын алдаржыдып турар силер. Дээрде Адавыстың кайгамчыктыг шынарларын улуска таныштырып, Иегованың ыдыктыг адын алдаржыдарын соксатпаңар. Шак ынчаар оларны камгалап, Хааныңар Иисус Христостуң изин истээр силер. А эң-не кол чүүл — ынакшылдыг Адаңарны Иегованы өөртүр силер. Ооң адын кезээ мөңгеде алгап-мактаалыңар! (Ыд. ыр. 144:2).