1, 2. ¿Bin yaʼiyel ya yaʼiy sba te Jehová ta swenta te lotiletik te albil ta stojole? Ala junuk ejemplo.

 NOPA AWAʼIY te ay bintik maba lek ya yal ta atojol te machʼa kʼux ta awoʼtan. Anaʼoj te maba smeleliluk, pero ay machʼatik ya schʼuunik sok ya xjajch spukik ta alel. ¿Bin yaʼiyel ya awaʼiy aba? ¿Mabal jichuk te ya amel awoʼtan yuʼun te maba lekix akʼoplal ya yilat te ants winik? (Prov. 22:1).

² Te ejemplo ini ya skoltayotik ta yichʼbeyel swentail te bin yaʼiyel la yaʼiy sba te Jehová kʼalal jtul snichʼan la yal lotil ta stojol sok la sbolobtesbey skʼoplal. Te Eva la schʼuun te lotil la yal te Satanás, te bin lokʼ-ae jaʼ te sbabial jmeʼ jtatik la skontrainik te Jehová. Ta skaj-abi, jpisiltik ya jta jmultik sok ya xlajotik (Gén. 3:​1-6; Rom. 5:12). Te lotiletik te la spuk te Satanás ta tsʼunbil kʼinal Edén yakʼoj bayal wokolil ta swolol balumilal, jich bitʼil te lajel, te guerraetik sok te wokolil. Te Jehová ya smel yoʼtan ta skaj te lotiletik-abi sok te bintik ma lek lokʼem ta swenta. Pero maba jkʼaxel ya smel yoʼtan yuʼun o maba ya skʼej slab yoʼtan. Te Biblia ya yal te jaʼ «te Dios te tseʼel yoʼtane» (1 Tim. 1:11).

3. ¿Bin ay ta jwentatik spasel?

³ Jpisiltik ya xjuʼ ya jkoltaybeytik skʼoplal te sbiil te Jehová. ¿Bin-utʼil? Jaʼ te kʼalal ya jchʼuuntik te mantalil ini: «Halbeyahic yutsil sbihil te Jehová» (Sal. 113:1). ¿Bin-utʼil ya xjuʼ ya jpastik? Jaʼ te kʼalal lek ya xkʼopojotik ta stojol te machʼa yichʼoj te chʼul biilil-abi. ¿Yabal akʼan ya apas? Kiltik oxchajp swentail te bin ya xbajt skoltayotik ta yalbey yutsil skʼoplal te sbiil te Dios sok spisil koʼtantik.

 KAKʼBEYTIK STSEʼELIL YOʼTAN TE JEHOVÁ

4. Cholbeya skʼoplal sok jun ejemplo te bin yuʼun tseʼel yoʼtan ya yaʼiy sba te Jehová te kʼalal ya kalbeytik yutsil skʼoplal (jaʼnix jich ilawil te foto).

⁴ Te Jehová jaʼ jTatik te ay ta chʼulchan sok ya smulan te ya kalbeytik yutsil skʼoplal te sbiile (Sal. 119:108). ¿Yabal skʼan ya yal-abi te pajal stalel te Dios sok te jmulawil ants winiketik, te ya sleik ichʼel ta mukʼ yuʼun jich lek ya yaʼiy sbaik? Maʼuk. Yuʼun ya xkʼot ta koʼtantik, jnop kaʼiytik ta stojol jtul chʼin achʼix te ya xnoptsaj ta stojol te spapa, ya spet sok jich ya yalbey: «¡Kʼax lekil papailat!». Ta swenta-abi, te papail kʼax tseʼel yoʼtan ta swenta te jich albote. ¿Bin yuʼun? ¿Yuʼunbal ma lek ya yaʼiy sba sok yabal skʼan te ya x-ichʼot ta mukʼ yuʼun te chʼin achʼix yuʼun swenta ya xmukʼub kʼinal yaʼiy? Maʼuk. Ya x-akʼbot stseʼelil yoʼtan yilel te ya xkʼanot yuʼun te yantsil nichʼan sok te ya x-albot wokol. Jaʼnix jich, snaʼoj te taleliletik-abi ya xbajt akʼbot stseʼelil yoʼtan te kʼalal ya xchʼixan. Jaʼnix jich, te Jehová —te tatil te maʼyuk machʼa pajal soke— tseʼel yoʼtan ya yaʼiy sba te kʼalal ya kalbeytik yutsil skʼoplal.

5. ¿Bin ya kakʼtik ta ilel te kʼalal ya kalbeytik yutsil skʼoplal te Jehová?

⁵ Te Satanás yaloj jun lotil ta jtojoltik. Ya yal te maʼyuk jtul ants winik ya xjuʼ te jun yoʼtan ya yakʼ sba ta stojol te Dios sok te ya skoltaybey skʼoplal te sbiil te kʼalal ya yichʼ pasel ta prueba. Ya skuy te jpisiltik ya kijkitaytik te Dios yuʼun maba ya jta jwokoltik-a (Job 1:​9-11; 2:4). Pero te Job la yakʼ ta ilel te maba meleluk te bin la yal te Satanás. ¿Bin ya xjuʼ ya kaltik ta jtojoltik-euk? Kʼalal ya kalbeytik yutsil skʼoplal te Jehová, jaʼnix jich ya kakʼtik ta ilel te ma meleluk te bin la yal te Satanás. Jaʼ mukʼul majtanil ya kiltik te ya jkoltaybeytik skʼoplal te sbiil te Jehová, sok te ya kakʼbeytik stseʼelil yoʼtan te kʼalal jun koʼtan ya kakʼ jbatik ta stojol (Prov. 27:11).

6. ¿Bin-utʼil ya xjuʼ ya jkʼayinbeytik stalel te ajwalil David sok te levitaetik? (Nehemías 9:5).

⁶ Te machʼatik kʼux ta yoʼtanik te Dios ya xtijbot yoʼtanik yuʼun ya yalbeyik yutsil skʼoplal te sbiile. Te ajwalil David jich la stsʼibay: «Jchʼuhlel, halbeya yutsil scʼoblal te Jehová; ta spisil coʼtan halbeya yutsil scʼoblal te schʼul bihil» (Sal. 103:1). Te David snaʼoj-a te yalbeyel yutsil skʼoplal te sbiil te Jehová pajal sok te yichʼel ta mukʼ. Te kʼalal ya kalbeytik skʼoplal te Jehová, ya kaltik ta swenta te tʼujbil taleliletik yuʼun sok te bintik spastiklanoje. Te David jich la yil te chʼultesbil te sbiil te sTat sok la skʼan la yalbey yutsil skʼoplal. La yal te ya skʼan ya spas sok spisil yoʼtan. Te levitaetik jaʼnix  jich la yalbeyik yutsil skʼoplal te Jehová. Snaʼojik-a te maʼyuk kʼopiletik te ya xjuʼ ta tuuntesel yuʼun ya yichʼ albeyel yutsil skʼoplal te schʼul biil te Jehová (kʼopona Nehemías 9:5). ¡Kʼax tseʼelniwan yoʼtan la yaʼiy sba te Jehová te kʼalal jich la yaʼiy te yak ta albeyel yutsil skʼoplale!

7. ¿Bin-utʼil ya xjuʼ ya kalbeytik yutsil skʼoplal te Jehová ta scholel skʼop Dios sok ta swenta te bin ya jpastik ta jujun kʼajkʼal?

⁷ Te joʼotik ya xjuʼ ya kalbeytik yutsil skʼoplal te Jehová te kʼalal ya kalbeytik skʼoplal sok ya kalbeytik wokol. Te kʼalal ya jcholtik skʼop Dios, te bin ya jkʼantik jaʼ te yakuk xnoptsajik ta stojol te Jehová te ants winiketik sok te kʼuxuk ya yaʼiyik ta yoʼtanik jich te bin-utʼil kʼux ya kaʼiy ta koʼtantik te joʼotike (Sant. 4:8). Ya jmulantik yakʼbeyel yil te ants winiketik ta swenta te Biblia te tʼujbil taleliletik yuʼun te Jehová, jich bitʼil te skʼuxul yoʼtan, te toj te bintik ya spas, te spʼijil sok te yuʼel. Yan te bin-utʼil ya kalbeytik yutsil skʼoplal te Jehová sok te ya kakʼbeytik stseʼelil yoʼtan jaʼ te kʼalal ya jkʼayinbeytik te stalel (Efes. 5:1). Te kʼalal jich ya jpastik, te ants winiketik yaniwan staik ta ilel te maba pajalukotik sok te yantik ants winiketik sok yaniwan sjojkʼoybey sbaik bin yuʼun te jich jtaleltike (Mat. 5:​14-16). Ta jujun kʼajkʼal yaniwan xjuʼ ya jcholbeytik yaʼiy te bin yuʼun jich jtaleltik. Te ants winiketik te pekʼel yoʼtanike yame xnoptsajik ta stojol te Dios kuʼuntik. Te kʼalal jich ya kalbeytik yutsil skʼoplal te sbiil te Jehová, ya kakʼbeytik stseʼelil yoʼtan (1 Tim. 2:​3, 4).

YA KAKʼBEYTIK STSEʼELIL YOʼTAN TE JESÚS

8. ¿Bin yuʼun jaʼ lekil ejemplo ta jtojoltik te Jesús ta swenta te yalbeyel yutsil skʼoplal te sbiil te Jehová?

⁸ Ta chʼulchan sok ta balumilal maʼyuk yan machʼa ya snaʼbeyxan sba ta lek te Tatil jich bitʼil te Jesuse (Mat. 11:27). Te Jesús kʼux ta yoʼtan te sTat sok yakʼoj kiltik te bin smakojbey skʼoplal te yalbey yutsil skʼoplal te sbiil te Jehová (Juan 14:31). Te kʼalal junxanix ajkʼabal ya skʼan yuʼun ya xlaj-a te Jesús, jich la yalbey te sTate: «La kakʼbeyix snaʼik te abiile» (Juan 17:26). ¿Bin-utʼil la spas?

9. ¿Bin lokʼomba kʼop la stuuntes te Jesús yuʼun ya yakʼ ta naʼel te bin yilel stalel te Jehová?

⁹ Te Jesús ma jaʼuknax la yalbey te ants winiketik te jaʼ Jehová sbiil te Diose, melel te judioetik snaʼojikix-a. Te bin la spase jaʼ te la scholbey yaʼiyik te bin yilel stalel (Juan 1:​17, 18). Jich bitʼil te Escrituras Hebreas ya yal te Jehová ya snaʼ yoʼbolil jbatik (Éx. 34:​5-7). Pero, te Jesús la yakʼ ta naʼel te jichnix stalel-a te Jehová te kʼalal la yalbey skʼoplal te lokʼomba kʼop yuʼun te nichʼanil te la yijkitay te state. Te tatil la sta ta ilel «te kʼalal namalto» ay-a te snichʼan, animalnax bajt sta talel, la spet sok la spasbey perdón ta smelelil, jamal chikan ta ilel te Jehová ya snaʼ yoʼbolil jbatik (Luc. 15:​11-32). Te Jesús la skoltay te ants winiketik yuʼun ya snaʼik te bin yilel stalel te Jehová.

10. 1) ¿Bin yuʼun ya jnatik te Jesús la stuuntes te sbiil te sTat sok te ya skʼan te jaʼnix jich ya stuuntesik–euk te yantik ants winiketike? (Marcos 5:19; jaʼnix jich ilawil te dibujo). 2) ¿Bin ya skʼan te Jesús te yakuk jpastike?

¹⁰ Te bin ya skʼan-a te Jesús, jaʼ te ya stuuntesik te ants winiketik te sbiil te sTate. Ayniwan chaʼoxtul jwolwanejetik yuʼun te religión ta yorail-abi te ya schʼuunik-a te kʼax chʼultesbil te sbiil te Dios te ma skʼan ya yichʼ alele. Pero te Jesús maba komot yuʼun te costumbre-abi —te maba lokʼem ta Biblia— yuʼun maba ya yichʼ ta mukʼ te sbiil te sTate. Jnop kaʼiytik ta swenta te kʼalal la slekubtes jtul winik te ochem pukuj ta yoʼtan ta skʼinal te gerasenoetik.  Te ants winiketik kʼax bayal xiwik te la skʼanbeyik swokol te Jesús te yakuk xlokʼ bael tey-ae (Mar. 5:​16, 17). Pero, te Jesús ya skʼan-a te yakuk snaʼbeyik te sbiil te Dios te ants winiketik. Jaʼ yuʼun, te kʼalal mato xbajt-a la yalbey te winik te yakuk yalbey te ants winiketik te bin la spas te Jehová ta stojol, ma jaʼuk te bin la spas te Jesús (kʼopona Marcos 5:19). a Te Jesús, te ajwalil kuʼuntik, ya skʼan te yakuk kakʼbeytik snaʼ spisil te ants winiketik te sbiil te Jehová (Mat. 24:14; 28:​19, 20). Te kʼalal jich ya jpastike, ya kakʼbeytik stseʼelil yoʼtan.

11. ¿Bin la yalbey te jnopojeletik yuʼun te Jesús te yakuk skʼanik te kʼalal ya skʼoponik te Diose? Sok, jich bin-utʼil ya yal Ezequiel 36:​23, ¿bin yuʼun kʼax mukʼ skʼoplal te jich yichʼ kʼanele?

¹¹ Te Jesús snaʼoj ta lek-a te skʼanojel yoʼtan te sTat jaʼ te ya schʼultes te sbiil, ta swenta te lotiletik te la yichʼ alel ta stojole. Jaʼ yuʼun jich la snojptes ta skʼanel te jnopojeletik yuʼune: «Jtatik te ayat ta chʼulchan, akʼa yichʼ chʼultesel te abiile» (Mat. 6:9). Te Jesús snaʼoj-a te maʼyuk bin yan mukʼxan skʼoplal te bitʼil schʼultesel te sbiil te Jehová (kʼopona Ezequiel 36:23). Sok ta spisil te bintik pastiklanbil maʼyuk machʼa yan jich schʼultesoj-a te sbiil te Jehová te bitʼil la spas te Jesús. Pero, manchukme jich la spas te kʼalal la yichʼ tsakel, ¿bin-a te akʼbot smulin? Jaʼ te la sbolkʼoptay te schʼul biil te sTate. Ta stojol te Jesús kʼax tulan mulil-abi. Te kʼalal mato tsakbil-ae, kʼax ma lekix ya yaʼiy sba-a, melel snaʼoj te ya yichʼ lebeyel smul sok ya yichʼ milel ta swenta te bin ya x-akʼbot smulin. Jaʼniwan yuʼun ta yorail-abi, «kʼax tulan te swokole» (Luc. 22:​41-44).

12. ¿Bin la spas te Jesús yuʼun ya schʼultesbey te sbiil te sTate?

¹² Te Jesús kujch yuʼun te majel, utel sok te lebot smul ta swenta te la schʼultesbey te sbiil te sTate. Snaʼoj-a te la schʼuun mantal sok te maʼyuk bin ya xkʼexaw yuʼun (Heb. 12:2). Jaʼnix jich snaʼoj-a te jaʼ te Satanás te machʼa yak ta akʼbeyel swokol yuʼune (Luc. 22:​2-4; 23:​33, 34). Te Pukuj jaʼ ya skʼan-a te maba junuk yoʼtan ta stojol Jehová te Jesús, pero maba juʼ yuʼun; te Jesús la yakʼ ta ilel te jaʼ jpas lot te Satanás  sok te ay j-abatetik yuʼun te Jehová te jun yoʼtan ya yakʼ sbaik manchukme kʼax tulan te pruebaetik ya xkʼax ta stojolike.

13. ¿Bin ya skʼan ya jpastik yuʼun ya kakʼbeytik stseʼelil yoʼtan te Ajwalil kuʼuntike?

¹³ Teme ya akʼan ya awakʼbey stseʼelil yoʼtan te Ajwalil kuʼuntik, te Jesucristo. Albeyaxan yutsil skʼoplal te sbiil te Jehová sok koltaya te yantik yuʼun ya yilik te bin yilel stalele. Jichme ya akʼayinbey stalel te Jesús. (1 Ped. 2:21). Teme jich ya apase, ya awakʼbey stseʼelil yoʼtan te Jehová sok jich ya awakʼ ta ilel te jaʼ jpas lot te Satanase.

JKOLTAYTIK TE YANTIK YUʼUN YA STA SKOLELIK

14, 15. ¿Bintik lek ya xlokʼ-a te kʼalal ya jnojptestik te ants winiketik ta swenta te Jehová?

¹⁴ ¿Bin yuʼun ya kaltik te kʼalal ya kalbeytik yutsil skʼoplal te sbiil te Jehová ya jkoltaytik te yantik yuʼun ya sta skuxlejalik? Melel te Satanás smakbeyoj spensarik «te machʼatik maba jchʼuunjeletik» (2 Cor. 4:4). Jaʼ yuʼun bayal ants winiketik ya schʼuunik te lotiletik-abi ya snopik te maʼyuk te Dios, te namal ay ta jtojoltik, te maʼyuk jkʼoplaltik ta yoʼtan, te chopol stalel sok te ya yakʼbotik castigo ta sbajtelkʼinal. Spisil te lotiletik-abi ya sbolobtesbey skʼoplal te sbiil te Jehová, jaʼ yuʼun maʼyuk machʼa ya skʼan ya xnoptsajix ta stojol. Pero, te kʼalal ya jcholtik te skʼop Dios sok ya kakʼtik ta nopel te bin smelelil ta stojol te Jehová ya kakʼtik ta ilel te lotil te bin ya yal te Satanás sok jich ya kalbeytik yutsil skʼoplal te schʼul biil te Jehová. ¿Bin lek ya xlokʼ kuʼuntik-a?

¹⁵ Te bin ya yal te Biblia bayal yuʼel. Te kʼalal ya jnojptestik te ants winiketik ta swenta te Jehová sok te bin yilel stalel, bayal bintik lek ya xlokʼ-a. Te kʼalal ya yilik te maba smeleliluk te bintik ya yal te Satanás sok ya xjajch yilik te kʼax lek stalel te Jehová. Chamnax yoʼtanik yuʼun te kʼalal ya yilik te kʼax bayal yuʼele (Is. 40:26). Te bitʼil toj spisil te bintik ya spase ya x-akʼbot smukʼul yoʼtanik yuʼun (Deut. 32:4). Chamnax yoʼtanik yuʼun te kʼalal ya yilik te bayal spʼijile (Is. 55:9; Rom. 11:33). Sok ya x-akʼbot bayal smukʼul yoʼtanik yuʼun te kʼalal ya snopik te jkʼuxultaywanej te Diose (1 Juan 4:8). Te kʼalal ya xnoptsajikxan ta stojol te  Jehová, ya schʼuun yoʼtanik te ya xjuʼ ya xkuxinik ta sbajtelkʼinal sok te ya xkʼotik ta yal snichʼnab te Diose. ¿Melel te jaʼ jun mukʼul majtanil te ya jkoltaytik te ants winiketik ta snaʼbeyel sba te Jehová? Jaʼnix jich te kʼalal ya jpastike te Jehová jich ya yilotik te «joy jbatik ta aʼtel» soke (1 Cor. 3:​5, 9).

16. ¿Bin ya xlokʼ kuʼuntik-a te kʼalal ya jnaʼtik te bin sbiil te Diose? Ala junuk ejemplo.

¹⁶ Te kʼalal ya xkʼopojotik ta sbabial buelta sok te ants winiketik, jaʼnax ya kakʼbeytik snop te Jehová sbiil te Diose. Teme pekʼel yoʼtan te ants winik, ya xjuʼ ya xjelontesbot skuxlejal yuʼun te kʼalal ya snaʼ te bin sbiil te Dios. Jich bitʼil jtul achʼix te Alía b sbiil maba tseʼel yoʼtan ya yaʼiy sba sok te bin akʼbot snop ta jun religión sok maba nopol ya yaʼiy sba ta stojol-a te Diose. Pero jelon te bin yaʼiyel la yaʼiy sba te kʼalal jajch snop te Biblia sok te Testigoetik. Chamnax yoʼtan yuʼun te kʼalal la snaʼ te yichʼoj jeltayel ta kajwal te sbiil te Dios ta bayal Bibliaetik. Te kʼalal la snaʼ te bin sbiil te Diose, jelontesbot ta jkʼaxel te skuxlejal, melel jich jajch yil bitʼil yamigo. Jich la yal: «¡Ay sbiil te kamigo!». Jich ya yalxan: «Ta ora ini bayal slamalil kʼinal ya kaʼiy sok jaʼ jun mukʼul majtanil ya kil». Te Steve te ya snaʼ stijel música te jaʼ judío te sfamilia, yiloj-a te ya spasik lot te religionetik, jaʼ yuʼun maba la skʼan och ta jun religión. Pero te kʼalal laj jtul sfamilia, la skʼan yaʼiy te nojptesel ya yakʼ ta swenta te Biblia jtul testigo yuʼun Jehová. Kʼot ta yoʼtan te bin sbiil te Diose. Jich ya yal: «Ma jnaʼoj-a te bin sbiil te Dios. Jaʼ sbabial buelta te la kil te yuʼunix-a ay-a te Dios. Ta yorail-abi la jta ta ilel te la jta jtul kamigo».

17. ¿Bin yuʼun ya akʼan ya awalbeyxan yutsil skʼoplal te sbiil te Jehová? (Jaʼnix jich ilawil te foto).

¹⁷ Te kʼalal ya jcholtik skʼop Dios, ¿yabal kalbeytik te ants winiketik te sbiil te Dios sok te bin yilel stalele? Teme jich ya jpastike ya kalbeytik yutsil skʼoplal te sbiil te Jehová. Jaʼ yuʼun koltaya te yantik ta snaʼbeyel sba te Jehová, jichme ya awalbey yutsil skʼoplal te schʼul biile. Sok te kʼalal jich ya apase ya akoltay te yantik yuʼun ya sta skuxlejalik, ya akʼayinbey stalel te Ajwalil kuʼuntik, te Jesucristo, sok ya awakʼbey stseʼelil yoʼtan te Jehová. Jich ya kaltik te bitʼil la yal te machʼa la stsʼibay te Salmo 145:2: «Ya calbe yutsil scʼoblal abihil spisil ora soc sbahtel qʼuinal».