1, 2. Кыӵе пример юрттэ валаны, кыӵе шӧдонъёсыз кылдо Иеговалэн, солэсь нимзэ саптамен сэрен?

 ПУКТЭ син азяды таӵе учырез: адями, кудзэ тӥ яратӥськоды, тӥ сярысь оло мар но супыльтыса ветлэ. Тӥ тодӥськоды, со зэм ӧвӧл шуыса, но куд-огъёсыз солы оско. Со сяна, соос мукетъёсызлы но сое верало на. Кыӵе тӥляд шӧдонъёсты кылдозы соку? Тӥляд адямиосын умой кусыпъёс воземды потэ ке но тӥ ӟеч нимдэс утьыны тыршиськоды ке, юнме кыл вӧлдон тӥлесьтыд сюлэмдэс вӧсь кароз (Мад. 22:1).

² Та пример милемлы валаны юрттэ, кыӵе шӧдонъёсыз кылдӥзы Иеговалэн, куке солэсь ӟеч нимзэ саптазы. Одӥг кылчин нырысетӥ кышномуртлы, Евалы, Иегова сярысь шонертэмзэ вераз. Со солы оскиз. Озьы нырысетӥ адямиослэн Иеговаен кусыпъёссы сӧриськизы но дунне вылэ сьӧлык но кулон вӧлмиз (Ул.-выл. 3:1—6; Рим. 5:12). Вань курадӟонъёс — кулон, ожъёс, шуг-адӟонъёс — Шайтанлэн Едем садын пӧяськемез бордысь пото. Иеговалы туж вӧсь вал кылыны, кызьы солэсь ӟеч нимзэ саптазы но кытчы со вуттӥз. Озьы ке но Иегова ӧз куатаськы но вожпотонэзлы ӧз сётскы. Библиын верамын, со шудо Инмар шуыса (1 Тим. 1:11).

3. Кыӵе дан асьмелы сётэмын?

³ Асьмелы дан сётэмын Иеговалэсь ӟеч нимзэ шонере поттыны. Соин ик ойдолэ кылзӥськомы та ӧтёнлэсь: «Кузё-Инмарлэсь нимзэ ушъялэ» (Пс. 112:1). Кызьы  ми быгатӥськомы Иеговалэсь нимзэ ушъяны? Со сярысь мукетъёсызлы зэмлыкез вераса. Вань-а тӥляд мылкыдды Иегова сярысь зэмлыкез вераны? Та статьяын асьмеос эскеромы куинь мугъёсты, малы кулэ Иеговалэсь нимзэ вань сюлмысь ушъяны.

ИЕГОВАЛЭСЬ НИМЗЭ ДАНЪЯСА, МИ ИЕГОВАЕЗ ШУМПОТТӤСЬКОМЫ

4. Малы Иегова шумпотэ, куке ми сое ушъяськомы? Вералэ пример. (Озьы ик учке суредэз.)

⁴ Ми инмысь Атаймес шумпоттӥськомы, куке солэсь нимзэ данъяськомы (Пс. 68:31, 32). Сьӧлыко адямиослы кулэ, соосты мед ушъялозы шуыса. Со юрттэ соослы асьсэды кулэен шӧдыны. Иеговалы но, сьӧлыко адямиослы сямен ик, кулэ-а, сое одно ик мед ушъялозы шуыса? Ӧвӧл. Учкомы сое таӵе пример вылын. Пичи ныл атаез доры бызьыса лыктэ. Со сое ӟыгыртэ но шуэ: «Атай, мон тонэ туж яратӥсько. Тон самой умой!» Атай нылызлэн верамезлы пальпотэ. Малы? Солы кулэ но ӧвӧл кадь, нылыз сое одно ик мед ушъялоз шуыса. Но со шумпотэ, нылыз сое яратэ но солы тау каре шуыса. Атай тодэ, та сямъёс нылызлы юрттозы бадӟым будэм бераз шудо луыны. Озьы ик инмысь Атаймы но, Иегова, шумпотэ, куке ми сое ушъяськомы.

5. Кыӵе пӧяськонэз асьмеос шарае поттӥськомы, Инмарлэсь нимзэ данъяса?

⁵ Инмысь Атаймес, Иеговаез, данъяса, ми шараяськомы Шайтанлэсь пӧяськонзэ, кудӥз асьмемын но герӟаськемын. Шайтан вера, одӥг адями но, шуг-секытъёсын пумиськиз ке, Иеговаез уз данъя ни шуыса (Иов 1:9—11; 2:4). Но Иов, шуг-секытъёсын пумиськыса но, Инмарлы оскымон кылиз. Озьы со возьматӥз, Шайтан — пӧяськись шуыса. Нош мар вераны луоз ми сярысь? Ми но быгатӥськомы Иеговалэсь ӟеч нимзэ утьыны но сое шумпоттыны, солы оскымон ужаса-тыршыса (Мад. 27:11). Ми понна со бадӟым дан!

6. Кызьы ми Давид эксэйлэсь но левитъёслэсь адӟем карыны быгатӥськомы? (Неемия 9:5).

⁶ Иеговаез яратӥсьёслэн сое вань сюлмысьтызы ушъямзы потэ. Давид эксэй кырӟаз: «Эй, лулы, Кузё-Инмарез данъя, пушкы-сюлмы, Солэсь дун-чылкыт нимзэ данъя» (Пс. 102:1). Давид вала вал, Иеговалэсь нимзэ данъян — со Иеговаез данъян шуыса. Иегова нимез кылыса, ми соку ик малпаськомы, кыӵе со Инмар, кыӵе солэн сямъёсыз, ужъёсыз. Давид туж дунъя вал Иеговалэсь нимзэ. Солэн сое вань сюлмысьтыз ушъямез потэ вал. Озьы ик умой пример возьматӥзы левитъёс. Соос валало  вал, Иеговалэсь святой нимзэ ушъян понна, соослэн кылъёссы ик уз тырме шуыса. (Лыдӟе Неемиялэсь 9:5.) Веранэз ӧвӧл, Иеговаез вань сюлмысь ушъян-данъян сое шумпоттэ.

7. Кызьы ми Иеговаез данъяны быгатӥськомы, ӟеч иворез веракумы, но ас улонэнымы?

⁷ Озьы ик ми Иеговаез шумпоттыны быгатӥськомы, со сярысь мукетъёсызлы вераса. Ми вераськомы адямиослы, макем ми яратӥськомы инмысь Атаймес но макем ми солы тау кариськомы. Милям потэ, мукет адямиос но Иеговаез мед тодозы но соос понна но со яратӥсь Атай мед луоз шуыса (Иак. 4:8). Ми шумпотыса адямиослы возьматӥськомы, мар верамын Библиын Иеговалэн яратонэз, шонерлыкез, визьлыкез, кужымез но мукет сямъёсыз сярысь. Озьы ик ми Иеговаез данъяськомы но сое шумпоттӥськомы, куке котькуд нунал солэсь адӟем кариськомы (Еф. 5:1). Озьы лэсьтӥмы ке, мукет адямиос адӟозы, дыр, ми та дуннеысь адямиос кадь ӧвӧл шуыса (Матф. 5:14—16). Соку милям луонлыкмы кылдоз соослы валэктыны, малы ми тросэз адямиос кадь ум улӥське. Сое тодыса, кылзӥськись сюлэмо адямиослэн Инмар сярысь тросгес тодэмзы потоз. Куке ми Иегова сярысь мукетъёсызлы вераськомы но котькуд нунал солэсь адӟем кариськомы, ми Иеговаез шумпоттӥськомы (1 Тим. 2:3, 4).

ИЕГОВАЛЭСЬ НИМЗЭ ДАНЪЯСА, МИ ИИСУСЭЗ ШУМПОТТӤСЬКОМЫ

8. Малы вераны луоз, Иисус самой умой пример возьматӥз шуыса, кызьы Иеговаез данъяно?

⁸ Иеговаез, солэн Пиез сяна, нокин но сокем умой уг тоды (Матф. 11:27). Иисус яратэ Атайзэ. Со самой умой пример возьматӥз, кызьы Иеговаез данъяно (Иоанн 14:31). Кулон азяз уе Иисус Атаезлы вӧсяськиз. Со вераз, мае со тужгес но кулэзэ лэсьтӥз. Со шуиз: «Мон соослы Тынэсьтыд нимдэ тодмо кари» (Иоанн 17:26). Кызьы Иисус Инмарлэсь нимзэ тодмо кариз?

9. Кыӵе мадён вераз Иисус, Иеговалэсь сямъёссэ валэктон понна?

⁹ Иисус Инмарлэсь нимзэ гинэ адямиослы ӧз вера. Еврейёс, кудъёссэ со дышетӥз, тодо вал ини, Инмарлэн нимыз — Иегова шуыса. Нош Иисус соослы юрттӥз умойгес валаны Инмарлэсь сямъёссэ (Иоанн 1:17, 18). Кылсярысь, Еврей Гожтэмъёсын верамын, Иегова адямиез яратӥсь но гажась-жалясь шуыса (Пот. 34:5—7). Иисус валэктӥз, кызьы Иегова та сямъёссэ возьматэ, йыромем пи сярысь мадёнэз вераса. Куке ми лыдӟиськомы, кызьы йыромем пилэн атаез, бертӥсь пизэ кыдёкысен ик адӟыса, солэн пумитаз бызьыса мынэ, кызьы со сое ӟыгыртэ но вань сюлмысьтыз простить каре, ми валаськомы, макем яратӥсь но гажась-жалясь луэ Иегова (Лука 15:11—32). Иисус возьматӥз, кыӵе солэн Атаез зэмзэ ик.

10. а) Кытысь ми тодӥськомы, Иисус ачиз Атаезлэсь нимзэ вера вал но солэн потэ вал, мукетъёсыз но сое мед вералозы шуыса? (Марк 5:19). (Озьы ик учке суредэз.) б) Мае возьма Иисус милесьтым туннэ?

¹⁰ Потэ вал-а Иисуслэн, мукет адямиос но Атаезлэсь нимзэ мед вералозы шуыса? Потэ вал! Куд-ог религиозной кивалтӥсьёс малпало вал, Инмарлэн нимыз святой, соин ик сьӧлыко адямиослы сое вераны уг яра шуыса. Но Иисус ноку ӧз лэзьы, сыӵе шонертэм малпанъёс Атаезлэсь нимзэ вераны но сое данъяны солы мед люкетозы шуыса. Тодамы ваёмы учырез, куке Гадара шаерын Иисус перияськем муртэ бурмытӥз. Соку адямиос кышказы но Иисусэз отысь кошкыны куризы. Соин ик Иисус  отысь кошкиз (Марк 5:16, 17). Но солэн потэ вал, со шаерын улӥсьёс Иеговалэсь нимзэ мед тодозы шуыса. Соин ик со куриз бурмытэм муртсэ бертыны но вераны, сое Иегова бурмытӥз шуыса. (Лыдӟе Марклэсь 5:19 a.) Озьы ик туннэ но Иисуслэн потэ, адямиос Атаезлэсь нимзэ мед тодозы шуыса! (Матф. 24:14; 28:19, 20). Куке ми Инмарлэсь нимзэ мукетъёсызлы вераськомы, озьы ми Иисусэз, асьмелэсь Эксэймес, шумпоттӥськомы.

11. Мар сярысь вӧсяськыны дышетӥз Иисус? Малы кулэ вал со сярысь вӧсяськыны? (Иезекииль 36:23).

¹¹ Иисус тодэ вал, Иеговалэн аслэсьтыз нимзэ чылкытатэмез но шонере поттэмез потэ шуыса. Тӥни малы Иисус, Быдӟым Дышетӥсь, тазьы вӧсяськыны дышетӥз: «Инмысь Атаймы! Тынад нимыд дано мед луоз» (Матф. 6:9). Иисус вала вал, Иеговалэсь нимзэ чылкытатон — туж кулэ луись юан шуыса. (Лыдӟе Иезекиильлэсь 36:23.) Нокин но Инмарлэсь нимзэ чылкытатон понна Иисус мында ӧз лэсьты. Нош куке Иисусэз кутӥзы, мар понна сое судъязы? Веразы, со Инмарез сантэма шуыса. Сое янгыше уськытӥзы ӵапак со понна, мае Иисус бадӟым сьӧлыкен лыдъяз. Соин, вылды, кутон азязы Иисуслы сокем секыт вал (Лука 22:41—44).

12. Малы вераны луоз, Иисус ваньмызлэсь трос лэсьтӥз шуыса, Атаезлэсь нимзэ чылкытатон понна?

¹² Атаезлэсь нимзэ чылкытатон понна, Иисус трос курадӟонъёсты чидаз. Сое сантэмазы, ултӥязы. Но Иисус Атаезлэсь кылзӥськиз но солы оскымон кылиз (Евр. 12:2). Иисус вала вал, вань та курадӟонъёс Шайтан бордысь пото шуыса (Лука 22:2—4; 23:33, 34). Шайтан малпа вал, Иисус Инмарлэсь куштӥськоз шуыса. Но со Иеговалы оскымон кылиз но валамон возьматӥз, Шайтан пӧяськись шуыса. Озьы ик Иисус возьматӥз, музъем вылын котьку но луозы шуыса адямиос, кудъёсыз, номыр шоры учкытэк, Иеговалы оскымон кылёзы!

13. Кызьы тӥ быгатӥськоды асьмелэсь Эксэймес шумпоттыны?

¹³ Нош тӥляд Иисусэз, асьмелэсь Эксэймес, шумпоттэмды потэ-а? Соку Иеговаез данъямысь но мукетъёсызлы со сярысь  верамысь эн дугдэ. Та возьматоз, тӥ Иисуслэн пытьы кузяз мынӥськоды шуыса (1 Пётр 2:21). Озьы лэсьтӥды ке, тӥ, Иисус сямен ик, Иеговаез шумпоттоды но возьматоды, Инмарлэн тушмонэз, Шайтан,— пӧяськись шуыса!

ИЕГОВАЛЭСЬ НИМЗЭ ДАНЪЯСА, МИ ЮРТТӤСЬКОМЫ АДЯМИОСТЫ УТЬЫНЫ

14, 15. Кыӵе емышъёс вае Иегова сярысь зэмлыкез веран?

¹⁴ Куке ми Иеговалэсь нимзэ данъяськомы, ми юрттӥськомы адямиосты утьыны. Малы озьы вераны луоз? Асьмеос тодӥськомы, Шайтан адямиослэсь «визьзэс пеймытэн ӵоксаз» шуыса (2 Кор. 4:4). Со пӧя, Инмар ӧвӧл, со адямиос сярысь уг сюлмаськы, со лек но сьӧлыкасьёсты адын курадӟытэ шуыса. Озьы Шайтан Иеговалэсь ӟеч нимзэ сапта. Солэн потэ, адямиос Иегова сярысь медаз тодэ шуыса. Нош асьмелэн ужмы люкетэ Шайтанлы малпанзэ быдэстыны. Асьмеос вераськомы адямиослы инмысь Атаймы сярысь. Озьы солэсь нимзэ данъяськомы. Кыӵе емышъёс со вае?

¹⁵ Куке ми вераськомы адямиослы Библиысь зэмлыкез, соос пумен валаны кутско, Шайтан пӧяське шуыса. Соос адӟо Инмарлэсь умой сямъёссэ, кылсярысь, макем со кужмо (Ис. 40:26). Соос Инмарлы оскыны кутско, малы ке шуоно адӟо, со котьку но котьмае шонер лэсьтэ шуыса (К. Зак. 32:4). Инмарлэсь адӟем карыса, соос дышетско визьмо улыны (Ис. 55:9; Рим. 11:33). Озьы ик соос тодо, Иегова — со яратон но со соосты туж буйгатэ шуыса (1 Иоанн 4:8). Куке адямиос Иегова сярысь тросгес тодо, соос азьын пырак улыны луонлык усьтӥське. Макем бадӟым дан милемлы сётэмын — Иеговалэн ужась-тыршисьёсыз луыны но юрттыны адямиослы Инмарен эшъяськыны! (1 Кор. 3:5, 9).

16. Кызьы куд-ог адямиослэн улонзы воштӥськиз, куке соос Инмарлэсь нимзэ тодӥзы? Вералэ примеръёсты.

¹⁶ Иеговалэсь нимзэ тодыса гинэ но, кылзӥськись адямиослэн улонзы воштӥське. Учкомы кык адямиослэсь учырзэс. Нырысетӥез, Али́я b егит кышномуртлэн учырез.  Со будӥз оскись семьяын. Соослэн осконзы Библия вылэ пыкиськемын ӧй вал. Но Алиялы осконэз уг кельшы вал. Солы потэ вал, Инмар туж кыдёкын шуыса. Ваньмыз воштӥськиз, куке со Адӟись-Ивортӥсьёсын Библиез дышетыны кутскиз. Алия валаны кутскиз, Инмар — солэн Эшез шуыса. Со туж паймиз, куке тодӥз, трос берыктэм Библиосын Иегова ним интые Инмар яке Кузё-Инмар гожтэмын шуыса. Иеговалэсь нимзэ тодыса, Алиялэн улонэз чутрак воштӥськиз. Со вераз: «Мынам самой Эшелэн нимыз вань!» Кызьы Инмарлэсь нимзэ тодон Алиялэсь улонзэ воштӥз? Со вера: «Мынам сюлмы каньыл луиз. Кыӵе умой Инмарлэсь нимзэ тодыны!» Нош тани Стив пиосмуртлэн учырез. Со будӥз туж оскись еврей семьяын, но ачиз нокыӵе религие ӧз пыры, малы ке шуоно отысь трос пӧяськонэз адӟиз. Нош анаез кулэм бере одӥг тодмоез ӧтиз сое Библия дышетонэ, кудзэ ортчытэ вал Иеговалэн Адӟись-Ивортӥсез. Соку Стив Инмарлэсь нимзэ кылӥз. Со солэн сюлмаз ик пыриз. Стив вера: «Азьвыл мон Инмарлэсь нимзэ уг тодӥськы вал. Нырысьсэ мон валай, Инмар зэмзэ ик вань, озьы ик солэн шӧдонъёсыз но сямъёсыз вань шуыса. Мон тодӥ, соин эшъяськыны быгатӥсько шуыса!»

17. Малы тӥляд азьланяз но Иеговалэсь нимзэ данъямды потэ? (Озьы ик учке суредэз.)

¹⁷ Адямиослы ӟеч иворез веракуды но соосты дышетыкуды, вераськоды-а тӥ Иеговалэн святой нимыз сярысь? Юрттӥськоды-а тӥ соослы адӟыны, кыӵе Инмар зэмзэ ик? Озьы ке, тӥ Иеговалэсь нимзэ данъяськоды. Эн дугдэ солэсь нимзэ данъямысь. Тӥ азьланяз но Иеговалэн умой сямъёсыз сярысь верады ке, адямиослэсь улонзэс утёды. Озьы тӥ Иисус Христослэн, асьмелэн Эксэймылэн, пытьы кузяз мыноды. Нош самой валтӥсез — озьы тӥ Иеговаез, асьмелэсь яратӥсь Атаймес, шумпоттоды. Ойдолэ Иеговалэсь нимзэ «пумтэм вапумъёсы ушъяса» вераломы! (Пс. 144:2).