1-2. Nye ci tu kuatisa oku limbuka ndomo Yehova a liyeva eci kua popiwa uhembi watiamẽla kokuaye?

 SOKOLOLA ndoco: Omunu una ove wa kapako calua, o popia cimue cĩvi catiamẽla kokuove. Ove wa kũlĩha okuti ovina a popia viuhembi; pole, vamue va tava kuhembi waco. Handi vali, omanu vaco va pitulula uhembi waco kuenda valua va tavavo kolondaka viaco. Ove nda wa liyeva ndati? Ocili okuti nda ca ku kokela esumuo lialua, omo ove wa kapako omanu vaco kuenda ekalo liavo liwa.—Olosap. 22:1.

² Ocindekaise eci ci tu kuatisa oku kuata elomboloko ndomo Yehova a liyeva eci ekalo liaye liwa lia vĩhisiwa. Umue pokati komãla vaye vakuetimba liespiritu wa popia uhembi watiamẽla kokuaye kukãi watete, Eva. Eva wa tava kuhembi waco. Uhembi waco, wa kokela olonjali vietu viatete oku sinĩla Yehova. Kuenje onima yeyililako ekandu kuenda olofa komanu vosi. (Efet. 3:1-6; Va Rom. 5:12) Ovitangi viosi tu lete voluali ndeci, olofa, ovoyaki kuenda uhukũi vieya omo liovohembi Satana a sandeka vocumbo Cedene. Anga hẽ Yehova wa siata oku yeva esumuo omo liovohembi aco kuenda ovitangi vieyililako? Ocili okuti oco. Pole, Yehova ka soleka onyeño, ale ocikumbiti. Eye o kasi oku amamako oku kala “Suku ukuesanju.”—1 Tim. 1:11.

3. Esumũlũho lipi tu kuete?

³ Tu kuete esumũlũho linene lioku kuatisa koku kemãlisa onduko ya Yehova, poku pokola kocihandeleko ci popia hati:  “Sivayi onduko ya Yehova.” (Osa. 113:1) Tu ci linga poku sapuilako omanu ocili catiamẽla kokuaye. Ove hẽ o ka sivaya onduko ya Yehova? Kũlĩhĩsa asunga atatu, a pondola oku tu kuatisa oku sivaya onduko ya Suku lutima wetu wosi.

TU SANJUISA YEHOVA ECI TU SIVAYA ONDUKO YAYE

4. Momo lie esivayo lietu li sanjuisila Yehova? Tukula ocindekaise cimue. (Talavo ociluvialuvia.)

⁴ Etu tu sanjuisa Isietu wokilu eci tu sivaya onduko yaye. (Osa. 119:108) Anga hẽ eci ci lomboloka okuti Suku Ukuonene Wosi o kasi ndomanu ka va li puile okuti, va yongola lika oku sivayiwa lomanu vakuavo oco va liyeve okuti va velapo? Sio. Kũlĩhĩsa ocindekaise eci: Kafeko umue utito o kuata isiaye kapepe kuenje o popia hati: “Ove u isia umue wa velapo voluali luosi!” Isia o sanjuka calua kuenda o komõha omo liolondaka viaco. Anga hẽ eci ci lekisa okuti isia ka kolelepo kuenda esanju liaye lia tamba lika kepandiyo liomõlaye? Sio. Tua kolela okuti eye isia umue wa kolapo kuenda o kuata esanju poku mola ndomo omõlaye u lekisa ocisola loku u kapako. Isia wa kũlĩha okuti ocituwa caco ci vokiya kesanju liomõlaye osimbu a kasi oku kula. Cimuamue haico okuti Yehova Isietu wa velapo, o sanjuka calua eci tu u sivaya.

5. Eci tu sivaya Yehova, uhembi upi tu situlula?

⁵ Eci tu sivaya Isietu wokilu ci tu kuatisa oku situlula uhembi ukuavo Satana a popia watiamẽla kokuetu. Satana wa popia okuti lomue omunu o ka teyuila lekolelo onduko ya Suku. Wa popiavo okuti, lomue omunu o ka amamako lekolelo ku Suku eci a setekiwa. Handi vali, wa popiavo okuti vosi yetu tu ka liwekapo oku vumba Suku nda tua sima okuti oco ca velapo kokuetu. (Yovi 1:9-11; 2:4) Pole, Yovi wa eca uvangi wokuti Satana ohembi poku amamako lekolelo ku Suku. Nye ci popiwa kokuetu? Omunu lomunu pokati ketu, o kuete esumũlũho lioku teyuila lekolelo onduko ya Isietu wokilu kuenda oku u sanjuisa poku u vumba lekolelo. (Olosap. 27:11) Ocili okuti, esumũlũho linene poku ci linga.

6. Tu setukula ndati Soma Daviti kuenda va Lewi? (Nehemiya 9:5)

⁶ Oku sola Suku ci vetiya omanu vakuekolelo oku sivaya onduko yaye lutima wosi. Soma Daviti wa soneha ndoco: “Linga ndi sivaye Yehova; ovina viosi vi kasi vokati kange, vi sivaye onduko yaye yi kola.” (Osa. 103:1) Daviti wa kũlĩhĩle okuti eci tu sivaya onduko ya Yehova, tu kasi oku u sivaya eye muẽle. Eci tu yeva onduko ya Yehova tu sokolola ekalo liaye, ovituwa viaye viosi kuenda ovilinga viaye vi komõhisa. Daviti wa tenda onduko ya  Isiaye wokilu okuti, yi kola kuenda wo sivaya. Eye wa ci linga ‘lovina viosi vi kasi vokati’ kaye, ci lomboloka okuti lutima wosi. Cimuamue haico va Lewi va linga, poku kuata ocikele coku sivaya Yehova. Ovo lumbombe va popia okuti, olondaka viavo lalimue eteke via ponduile oku situlula lonjila ya suapo esivayo onduko yi kola ya Yehova yi sesamẽla. (Tanga Nehemiya 9:5.) Ocili okuti, esivayo liaco liumbombe halio liutima wosi, lia sanjuisa utima wa Yehova.

7. Tu sivaya ndati Yehova kupange woku kunda kuenda vomuenyo wetu weteke leteke?

⁷ Koloneke vilo, tu pondola oku sanjuisa Yehova poku lekisa olopandu kokuaye kuenda oku situlula ocisola calua tu u kuetele. Eci tu kasi kupange woku kunda, ocimãho cetu ca velapo oku kuatisa omanu oku amela ku Yehova kuenda oku limbukavo ocisola caye ndeci etu. (Tia. 4:8) Tu kuete esumũlũho linene lioku lekisa komanu ndomo Embimbiliya li situlula Yehova, ocisola caye, esunga, olondunge, unene kuenda ovituwa vikuavo vi vetiya. Tu sivayavo Yehova loku u sanjuisa poku likolisilako oku u setukula. (Va Efe. 5:1) Nda tua ci linga, omanu va ka limbuka okuti tua litepa lomanu vakuavo voluali lulo lua vĩha. Kuenje ovo va ka li pula esunga liaco. (Mat. 5:14-16) Osimbu tu kala lavo eteke leteke, tu ka tẽla oku va lomboluila esunga lieci tua li tepela lomanu vakuavo. Kuenje omanu vakuavitima via sunguluka va vetiyiwa oku kũlĩha Suku yetu. Eci tu sivaya Yehova lonjila yaco, tu sanjuisa utima waye.—1 Tim. 2:3, 4.

TU SANJUISA YESU ECI TU SIVAYA ONDUKO YA YEHOVA

8. Momo lie Yesu ongangu ya velapo yoku sivaya onduko ya Yehova?

⁸ Pokati koviluvo viosi vio kilu kuenda via palo posi, lomue wa kũlĩha ciwa Yehova okuti Yesu ci sule. (Mat. 11:27) Yesu o sole Isiaye kuenda eye wa velapo koku sivaya Yehova. (Yoa. 14:31) Vohutililo a lingila Isiaye vuteke wa sulako wolofa viaye, eye wa lombolola ocina cimue ci kuete esilivilo a linga kupange waye woku kunda palo posi, poku popia hati: “Nda va longisa onduko yove.” (Yoa. 17:26) Yesu wa ci linga ndati?

9. Olusapo lupi Yesu a tukula oco a situlule Isiaye lonjila yimue ya suapo?

⁹ Yesu ka sapuilile lika komanu okuti onduko ya Suku Yehova pole, wa sitululavo ovina vikuavo. Va Yudea vana Yesu a longisa, va kũlĩhĩle ale onduko ya Suku. Pole, Yesu “wo situlula.” (Yoa. 1:17, 18) Ndeci, Ovisonehua vio Heveru vi situlula okuti Yehova ukuahenda kuenda kuacikembe. (Etu. 34:5-7) Yesu wa situlula ciwa ocili caco eci a lombolola olusapo luomõla ocisandui. Eci tu tanga okuti isia wa mola omõlaye una wa li kekembela “osimbu a kala ocipãla” kuenje wa lupukila kokuaye kuenda wo pupola kapepe loku u wecela lutima wosi, tu pondola oku limbuka ciwa ohenda kuenda ocikembe ca Yehova. (Luka 15:11-32) Yesu wa kuatisa omanu oku kuata elomboloko lia suapo ndomo Yehova a tuwa.

10. (a) Tua kũlĩha ndati okuti Yesu wa tukula onduko ya Isiaye kuenda wa yonguile okuti vakuavo va linga ocina cimuamue? (Mar. 5:19) (Talavo ociluvialuvia.) (b) Nye Yesu a yongola okuti oco tu linga koloneke vilo?

¹⁰ Anga hẽ Yesu wa yonguile okuti omanu va tukulavo onduko ya Isiaye? Oco. Asongui vamue vatavo vo kotembo yaco, va enda oku popia okuti, oku tukula onduko ya Suku ekambo liesumbilo, pole, Yesu lalimue eteke a ecelelele okuti oviholo viaco vi tateka oku eca esivayo konduko ya Isiaye. Kũlĩhĩsa epuluvi eci eye a sakula ulume umue wa kuatiwile lolondele ko Gerasa. Omanu va kuata usumba walua kuenda va pinga ku Yesu oco a ende. Eli olio esunga lieci eye ka kailele vimbo liaco.  (Mar. 5:16, 17) Ndaño ndoco, Yesu wa yonguile okuti onduko ya Yehova yi kũlĩhĩwa vimbo liaco. Kuenje Yesu wa sapuila kulume una a sakula oco a lomboluile komanu vakuavo eci Yehova o lingila, pole, haceciko Yesu a linga. (Tanga Marko 5:19.) a Yesu o yongola okuti koloneke vilo, tu kuatisavo omanu oku kũlĩha onduko ya Isiaye voluali luosi! (Mat. 24:14; 28:19, 20) Eci tu likolisilako oku ci linga, tu sanjuisa Soma yetu, Yesu.

11. Nye Yesu a longisa kolondonge viaye oku likutilila kuenda momo lie ci kuetele esilivilo? (Esekiele 36:23)

¹¹ Yesu wa kũlĩhĩle okuti ocipango ca Yehova, oku yelisa onduko yaye kovohembi osi a lingiwa atiamẽla Kokuaye. Eli olio esunga lieci Cime cetu a longisila kolondonge viaye oku likutilila ndoco: “A Isietu o kasi kovailu, onduko yove yi sumbiwe.” (Mat. 6:9) Yesu wa limbukile okuti, eci oco ca kala ocitangi cinene oviluvo viosi via kala oku liyaka laco. (Tanga Esekiele 36:23.) Lacimue ociluvo cikuavo voluali luosi ca kolisa onduko ya Yehova okuti, Yesu ci sule. Eci Yesu a kuatiwa, elundi lipi ovanyãli vaye vo lingila? Vo lundila okuti, wa lekisa ekambo liesumbilo ku Isiaye! Yesu wa kũlĩhĩle okuti, oku lundila onduko yi kola ya Isiaye ekandu limue linene. Eye wa sumuile calua omo lioku lundiliwa loku kangisiwa omo lielinga liaco. Eli olio esunga lieci Yesu a yevela ‘esakalalo lialua’ eci a kala oku panda koku kuatiwa.—Luka 22:41-44.

12. Yesu wa kolisa ndati onduko ya Isiaye lonjila ya suapo?

¹² Yesu oco a kolise onduko ya Isiaye eye wa pandikisa koku tipuiwa, koku sepuiwa kuenda kalundi osi. Omo a kũlĩhĩle okuti eye wa pokola ku Isiaye kovina viosi; wa pembula osõi. (Va Hev. 12:2) Eye wa kũlĩhĩlevo okuti Satana eye wa kala oku u kokela ovitangi vepuluvi liaco. (Luka 22:2-4; 23:33, 34) Satana wa yonguile oku nyõla ekolelo lia Yesu, pole, ka ci tẽlele! Yesu wa eca uvangi wokuti Satana ohembi kuenda Yehova o kuete afendeli vakuekolelo, va tẽla oku pandikisa ndaño loloseteko vinene!

13. O pondola oku sanjuisa ndati Soma yove o kasi ale oku viala?

¹³ O yongola hẽ oku sanjuisa Soma yove o kasi ale oku viala? Amamako oku sivaya  onduko ya Yehova poku kuatisa vakuene oku kũlĩha ndomo Suku yetu a tuwa. Poku ci linga, o kasi oku setukula Yesu. (1 Pet. 2:21) Ndeci Yesu a linga, o ka sanjuisa Yehova loku lekisa okuti, Satana ohembi!

TU KUATISA OKU POPELA OVIMUENYO ECI TU SIVAYA ONDUKO YA YEHOVA

14-15. Ocina cipi ci pondola oku pita eci tu longisa omanu catiamẽla ku Yehova?

¹⁴ Eci tu sivaya onduko ya Yehova tu kuatisa koku popela ovimuenyo. Ndamupi? Ocili okuti, Satana wa siata oku “tekãvisa ovisimĩlo via vana ka va tavele.” (2 Va Kor. 4:4) Noke, ovo va fetika oku tava kovohembi a Satana ndeci: Ka kuli Suku, Suku o kasi ocipãla letu, ka kapeleko omanu, Suku ongangala kuenda Suku otembo yosi o kangisa olondingaĩvi. Ovohembi aco osi a vĩhisa lika onduko ya Yehova kuenda ekalo liaye oco omanu ka va ka kuate onjongole yoku amela kokuaye. Pole, eci tu kunda olondaka viwa, tu tateka ocimãho ca Satana. Tu longisa omanu ocili catiamẽla ku Isietu poku sivaya onduko ya Suku yetu. Onima yipi ya siata oku iyililako?

¹⁵ Ocili Condaka ya Suku ci kuete unene walua. Poku longisa omanu catiamẽla ku Yehova kuenda ndomo eye a tuwa, tu tẽla oku limbuka ovina vi komõhisa. Omanu ka va kembiwa vali lovohembi a Satana kuenje va fetika oku limbuka ovituwa viwa via Isietu. Ovo va komõha unene waye wa piãla. (Isa. 40:26) Ovo va fetika oku kolela Yehova omo liesunga liaye lia lipua. (Esin. 32:4) Ovo va pondolavo oku lilongisa ovina vialua vi tunda kolondunge viaye. (Isa. 55:9; Va Rom. 11:33) Kuenje va lembelekiwa poku kũlĩha okuti Yehova ono yocisola. (1 Yoa. 4:8) Osimbu va pamisa ukamba wavo la Yehova, elavoko liavo lioku kala otembo ka yi pui ndomãla vaye, li kolapo. Tu kuete esumũlũho linene lioku kuatisa omanu oku pamisa ukamba wavo la Isiavo! Nda tua ci linga, Yehova o ka tu tenda okuti “tulondingupange” viaye.—1 Va Kor. 3:5, 9.

16. Vamue va siata oku li yeva ndati eci va kũlĩha onduko ya Suku? Tukula ovolandu amue.

¹⁶ Catete, tu longisa omanu okuti onduko ya Suku Yehova. Elongiso liaco, li pondola oku pongolola ekalo liomuenyo womunu umue wa  sunguluka. Ndeci, manji umue ufeko o tukuiwa Aaliyah, b wa kulila vetavo limue okuti elongiso liayo ka lia kunamẽlele Vembimbiliya. Pole, eye ka sanjukilile etavo liaye kuenda ka liyevele okuti o kuete ukamba la Suku. Eci a fetika oku lilongisa Lolombangi Via Yehova, cosi ca pongoloka. Eye wa fetika oku tenda Suku okuti Ekamba liaye. Kuenje wa komõha calua poku kũlĩha okuti onduko ya Suku Vambimbiliya alua yopiwamo kuenda ya piñainyiwa lolonduko viesumbilo ndeci Ñala. Oku lilongisa onduko ya Yehova ca pongolola ekalo liomuenyo waye. Eye wa popia ndoco: “Ekamba liange lia velapo li kuete onduko!” Onima yipi a kuata? Eye hati: “Cilo ndi kuete ombembua yalua vutima. Ndi li yevite okuti ndi soliwe calua.” Ulume umue o tukuiwa Steve okuti wa kala onjimbi, wa tiamẽlele kepata limue lia va Yudea okuti va liketisa calua. Eye ka yonguile vali oku tiamẽla ketavo liaco, momo wa limbuka ombambe yalua ya kalamo. Pole, noke lia inaye oku fa, wa tava oku lilongisa Embimbiliya Lombangi yimue ya Yehova. Eye wa komõha calua poku lilongisa onduko ya Suku. Kuenje wa popia hati: “Ame sia la kũlĩha onduko ya Suku.” Wamisako hati: “Ca linga onjanja yatete oku kuata elomboloko liokuti Suku o kasiko muẽle! Ndo tenda okuti Omunu muẽle. Cilo, nda limbuka okuti nda sanga Ekamba liocili.”

17. Momo lie wa nõlelapo oku amamako oku sivaya onduko ya Yehova? (Talavo ociluvialuvia.)

¹⁷ Kupange wove woku kunda kuenda woku longisa wa siata hẽ oku sapuilako omanu onduko yi kola ya Yehova? Wa siata hẽ oku va kuatisa oku limbuka okuti Suku o kasiko muẽle? Nda wa ci linga, ove o sivaya onduko ya Suku. Amamako oku sivaya onduko yi kola ya Yehova poku kuatisa omanu oku kũlĩha ndomo eye a tuwa. Lonjila eyi, o ka kuatisa koku popela ovimuenyo. Ove o ka kuama ongangu ya Soma yove, Kristu Yesu. Handi vali, o ka sanjuisa Isiove ukuacisola Yehova. Omo liaco, “sivaya onduko [yaye] otembo ka yi pui!”—Osa. 145:2.