1-2. Die yen sa cha avwanre uko vwo vwo ẹruọ rẹ oborẹ oma ru Jihova kpahen efian re gun nyẹ odẹ rọyen?

 VWẸ ẹwẹn roro nẹ, ohwo ru wo vwo ẹguọnọ kpahen ta erharhe rẹ eta kpahen owẹ. Wọ riẹnre nẹ obo rọ tare na ofian; dedena, ihwo evo sere gbuyota. Tobọ ma bra, kẹ ayen vwanriẹn ofian na, ihwo efa buebun ki ji se ofian na gbuyota. Mavọ yen oma che ru we? O muẹro nẹ ofian yena cha nẹrhẹ ivun miovwo uwe ọ da dianẹ wo vwo ẹguọnọ rẹ ihwo efa wọ je guọnọ nẹ e miovwo omamọ rẹ odẹ ru wo vwori-i, ọ dia ọtiọyen?​​—Isẹ 22:1.

² Udje nana cha vwẹ ukẹcha kẹ avwanre vwo vwo ẹruọ rẹ oborẹ oma ru Jihova ọke re vwo miovwo odẹ rọyen. Ọvo usun rẹ emekashe rehẹ odjuvwu gun ofian kpahọn vwọ kẹ aye rẹsosuọ, Ivi. O de se ofian na gbuyota. Ofian yena da nẹrhẹ Adam vẹ Ivi gbevwọso Jihova. Ọnana da so umwemwu vẹ ughwu vwọ kẹ ihworakpo eje. (Jẹ 3:​1-6; Ro 5:12) Efian rẹ Eshu gunru vwẹ ogba rẹ Idẹn yen hwarhiẹ ebẹnbẹn na eje rẹ avwanre rhiẹromrẹ vwẹ evun rẹ akpọ na rhe​​—ebẹnbẹn kerẹ ughwu, ifovwin kugbe oja. Efian rẹ Eshu gunru na vẹ obo ri nẹ obuko rọyen rhe da Jihova? Aphro herọ-ọ, ọ darọ mamọ. Dedena, ọnana nẹrhẹ ivun miovwo Jihova yẹrẹ muomaphiyọ-ọ. Ukperẹ ọtiọyen, ọyen “Ọghẹnẹ rẹ oma vwerhan.”​​—1Ti 1:11.

3. Uphẹn vọ yen avwanre vwori?

³ Avwanre vwo uphẹn re vwo toroba orufon rẹ odẹ ri Jihova womarẹ e vwo nene iji nana: “Jiri odẹ rẹ Ọrovwohwo na.” (Un 113:1) Avwanre jiri odẹ ri Jihova womarẹ a vwọ vuẹ ihwo efa kpahen erọnvwọn iyoyovwin ri Jihova ruru. Wo che jiri odẹ  ri Jihova? E jẹ a ta ota kpahen erọnvwọn erha re cha cha avwanre uko vwọ vwẹ udu rẹ avwanre eje vwo jiri Ọghẹnẹ.

AVWANRE NẸRHẸ OMA VWERHEN JIHOVA SIẸRẸ E DE JIRI ODẸ RỌYEN

4. Diesorọ ujiri rẹ avwanre vwọ vwerhen Jihova oma? Djudje rọyen.

⁴ Avwanre nẹrhẹ oma vwerhen Ọsẹ rẹ avwanre rọhẹ odjuvwu siẹrẹ e de jiri odẹ rọyen. (Un 119:108) Kẹ ọnana mudiaphiyọ nẹ Ọghẹnẹ ro me kpenu na pha kerẹ ihworakpọ re gbare-e, re guọnọ ihwo ri che jiri ayen kidie nẹ ayen roro nẹ ihwo vwo ẹguọnọ rayẹ-ẹn? Ẹjo. Roro kpahen udje nana. Ọmọtẹ rọ dia omotete rọ djẹ bru ọse rọyen ra ọ da gbanọ je vuẹ nẹ, “Wẹ yen ọsẹ ro me yovwin vwẹ akpọneje!” Oborẹ ọmọtẹ na ruru na vwerhen ọsẹ na oma mamọ, o ji te ẹwẹn. Diesorọ? Kẹ avwanre sa tanẹ ọsẹ na roro nẹ ọmọ na vwo ẹguọnọ rọye-en, ọtiọyena kọ guọnọ ujiri vẹ ẹguọnọ mie ọmọ na? Ẹjo. Ukperẹ ọtiọyen, oma vwerhen ọsẹ na rọ vwọ mrẹ ọmọtẹ rọyen ro dje ẹguọnọ vẹ ọdavwaro phia. Ọ riẹnre nẹ iruemu tiọyena che toroba omavwerhovwẹn rẹ ọmọtẹ rọyen rọ vwọ ghwaran na. Vwẹ idjerhe vuọvo na, oma vwerhen Jihova rọ dia Ọsẹ rẹ avwanre rọ ma rho na, ọke rẹ avwanre de jiro.

5. Ota rẹ Eshu vọ yen avwanre se dje phiyọ ofian siẹrẹ avwanre de jiri Ọghẹnẹ?

⁵ E de jiri Ọsẹ rẹ avwanre rọhẹ odjuvwu, jẹ avwanre djephia nẹ oborẹ Eshu ta kpahen avwanre komobọ dia uyota-a. Eshu tare nẹ o vwo ohworakpọ vuọvo rọ cha sa fuevun chochọn rẹ odẹ rẹ Ọghẹnẹ-ẹ. Ọ tare nẹ o vwo ohwo vuọvo usun rẹ avwanre na rọ cha sa fuevun ga Ọghẹnẹ siẹrẹ a da davwọn ni-i. Ọ je tanẹ avwanre eje che chukoku Ọghẹnẹ ọ da dianẹ ọyen na che fierere kẹ avwanre. (Job 1:​9-​11; 2:4) Ẹkẹvuọvo Job fuevun ga Ọghẹnẹ ji dje Eshu phiyọ ọvwọrofian. Wo ji se ru ọtiọyen? Avwanre ọvuọvo vwo uphẹn ra vwọ chochọn rẹ odẹ rẹ Ọsẹ rẹ avwanre rọhẹ odjuvwu ji ru obo re vwerhọn oma womarẹ a vwọ fuevun ga. (Isẹ 27:11) Ọyen emu rẹ ọghọ re vwo ru ọtiọyen.

6. Mavọ yen avwanre sa vwọ vwẹrokere Ovie Devid vẹ ihwo ri Livae na? (Nehemaya 9:5)

⁶ Ihwo re fuevun jiri Ọghẹnẹ vwo nẹ otọ rẹ udu cha kidie ayen vwo ẹguọnọ rẹ odẹ rọyen. Ovie Devid de si: “Bruphihọ kẹ Ọrovwohwo, E erhi mẹ; obo re vẹ ovwẹ herọ ejobi, bruphihọ kẹ odẹ ọfuanfon rọye.” (Un 103:1) Devid riẹnre nẹ e vwo jiri odẹ ri Jihova mudiaphiyọ e vwo jiri Jihova komobọ. Odẹ ri Jihova churobọ si oka rẹ ohwo rọ hepha, ọtiọyena kọ nẹrhẹ avwanre karophiyọ iruemu  iyoyovwin rọyen vẹ erọnvwọn rẹ igbevwunu ro ruru. Devid guọnọ ru odẹ rẹ Ọsẹ rọyen fon ji jiro. Ọ guọnọ ru ọtiọyen vẹ obo ro vwori “ejobi”​​—kọyen, vwo nẹ otọ rẹ udu rhe. Vwẹ idjerhe vuọvo na, ihwo ri Livae kobaro rẹ ujiri ra vwọ kẹ Jihova. Vwọrẹ omaevwokpotọ ayen da rhọnvwe nẹ a cha sa vwẹ eta rẹ ayen vwo djisẹ rẹ ujiri ro fo odẹ rẹ ọfuanfon ri Jihova-a. (Se Nehemaya 9:5.) Aphro herọ-ọ, ujiri ro nẹ otọ rẹ udu rhe ra vwọphia vwẹ idjerhe rẹ omaevwokpotọ tiọyena, vwerhen Jihova oma.

7. Mavọ yen avwanre se vwo jiri Jihova vwẹ iruo rẹ aghwoghwo na vẹ akpeyeren rẹ avwanre ri kẹdi kẹdẹ?

⁷ Nonẹna, e se jiri Jihova womarẹ a vwọ ta ota kpahọn vẹ oruru, ẹwẹn rẹ ọdavwaro kugbe ẹguọnọ. Avwanre dahẹ iruo rẹ aghwoghwo na, e jẹ a karophiyọ nẹ ọdavwẹ rẹsosuọ yen e vwo se ihwo bru Jihova ra, je vwẹ ukẹcha kẹ ayen vwo sikẹre Ọsẹ rẹ avwanre rọhẹ odjuvwu kerẹ oborẹ avwanre komobọ ji sikẹrẹ re na. (Jem 4:8) Oma vwerhan avwanre re vwo dje kẹ ihwo efa oborẹ Baibol na djisẹ ri Jihova, obo ro dje ẹguọnọ, orhiẹnbro abavo, aghwanre, kugbe ẹgba rọyen phia, ọtiọyen ji te iruemu iyoyovwin efa ro vwori. Vwọba, avwanre jiri Jihova ji ruẹ ọhọre rọyen womarẹ a vwọ vwẹrokere. (Ẹf 5:1) E de ru ọtiọyen, avwanre rha cha dia kerẹ ihwo umwemwu re vọn akpọna-a. Ihwo se noso nẹ avwanre fẹnẹ ihwo efa rehẹ akpọ na ayen me guọnọ riẹn oboresorọ. (Mt 5:​14-​16) Avwanre vwo nene ayen ta ota kuẹgbe kẹdẹ kẹdẹ na, kọ sa nẹrhẹ e djefiotọ kẹ ayen oboresorọ avwanre vwọ fẹnẹ ihwo efa. Ukuotọ rọyen, ihwo ri vwo udu ọsoso ki che rhi sikẹrẹ Ọghẹnẹ. Siẹrẹ avwanre de jiri Jihova vwẹ idjerhe nana, kọyen avwanre nẹrhẹ oma vwerhen Ọsẹ rẹ avwanre.​—1Ti 2:​3, 4.

AVWANRE RUO OBO RE VWERHEN JESU OMA ỌKE RE DE JIRI ODẸ RI JIHOVA

8. Idjerhe vọ yen Jesu vwọ kobaro vwẹ ujiri ra vwọ kẹ odẹ ri Jihova?

⁸ Vwẹ usun rẹ emama rẹ Ọghẹnẹ mare vwẹ odjuvwu vẹ otọrakpọ eje, o vwo ọvuọvo ro vughe Ọsẹ na kerẹ ọmọ na-a. (Mt 11:27) Jesu vwo ẹguọnọ rẹ Ọsẹ rọyen, ọ je kobaro rẹ ujiri ra vwọ kẹ odẹ rẹ Ọsẹ rọyen Jihova. (Jọ 14:31) Vwẹ ẹrhovwo rọ nẹ rhe Ọsẹ rọyen vwẹ ason rọ koba o ki rhi ghwu, ọ da djẹ iruo rẹ aghwoghwo rọyen koko vwẹ idjerhe nana rọ vwọ ta: “Mi dje odẹ wẹn kẹ ayen re.” Die yen ota rọyen na mudiaphiyọ?

9. Idjerhe vọ yen Jesu vwọ reyọ itẹ vwo djisẹ rẹ Ọsẹ rọyen phephẹn?

⁹ Ọ dia Jesu de vuẹ ihwo nẹ odẹ rẹ Ọghẹnẹ yen Jihova ọvo-o, o ji ru erọnvwọn efa. Ihwo ri Ju ri Jesu yonori riẹn odẹ rẹ Ọghẹnẹ jovwore. Ẹkẹvuọvo Jesu kobaro rọ vwọ dia “ohwo ro. . . djisẹ Rọyen.” (Jọ 1:​17, 18) Kerẹ udje, ẹbẹre ra vwẹ Hibru si vwẹ Baibol na djerephia nẹ Jihova ọyen ohwo rọ ria ehrọre ro ji gbe arodọnvwẹ. (Ey 34:​5-7) Jesu ru uyota na phẹn vrẹ obo ri jovwo ọke ro vwo kpe itẹ rẹ ọmọ rẹ osoghoro na vẹ ọsẹ rọyen. Ọke rẹ avwanre de se kpahen ọsẹ na rọ kparo mrẹ ọmọ rọyen ro kurhẹriẹ “ọke rọ je vwọ hẹ ugboko,” ọ da djẹ bro ra, gbanọ, ji vwo ghovwo nẹ otọ rẹ ẹwẹn rhe, jẹ avwanre djephia nẹ e vwo ẹruo rẹ ehrọre vẹ arodọnvwẹ ri Jihova. (Lu 15:​11-​32) Jesu dje oka rẹ ohwo rẹ Ọsẹ rọyen ghene hepha.

10. (a) Mavọ yen avwanre vwọ riẹn nẹ Jesu reyọ odẹ rẹ Ọsẹ rọyen vwo ruiruo nẹ ọ je guọnọ nẹ ihwo efa ru ọtiọyen? (Mak 5:19) (b) Die yen Jesu guọnọre nẹ avwanre ru nonẹna?

¹⁰ Jesu je guọnọ nẹ ihwo efa reyọ odẹ rẹ Ọsẹ rọyen vwo ruiruo? Dẹn. Ọ sa dianẹ ilori rẹ ẹga evo vwẹ ọke yena rorori nẹ odẹ rẹ Ọghẹnẹ fon nọ kẹ e se, ẹkẹvuọvo Jesu nẹrhẹ oka rẹ  iroro ọtiọyena dobọ rọyen ji ro vwo jẹ ọghọ emuo kẹ odẹ rẹ Ọsẹ rọye-en. Roro kpahen ọke ro vwo sivwin ọshare ọvo rẹ ẹwẹn rẹ Idẹbono kpokpo vwẹ ekogho rẹ ihwo ri Gẹrasa. Oshọ de rhi mu ihwo na, ayen da rẹ Jesu nẹ o vrẹ nẹ ekogho na, ọtiọyena Jesu de nẹ etiyin. (Mk 5:​16, 17) Dedena, Jesu guọnọre nẹ ihwo re dia ekogho na riẹn odẹ ri Jihova. Ọ da vuẹ ọshare ro sivwinrin na nẹ ọ vuẹ ihwo kpahen obo ri Jihova ruru, ọ dia obo ro ruru-u. (Se Mak 5:19.) a Ọ je guọnọ nẹ ihwo eje vwẹ otọrakpọ na nonena riẹn odẹ rẹ Ọsẹ rọyen! (Mt 24:14; 28:​19, 20) Oma vwerhen Ovie rẹ avwanre Jesu siẹrẹ e de ru ẹkẹn ro te avwanre.

11. Die yen Jesu vuẹ idibo rọyen nẹ ayen nẹrhovwo kpahen, kẹ diesorọ ọ vwọ dia obo re ghanre? (Izikiẹl 36:23)

¹¹ Jesu riẹnre nẹ ọyen ọhọre ri Jihova ro vwo ru odẹ Rọyen fon. Ọyen sorọ Jesu Kristi rọ dia onini rẹ avwanre vwọ vuẹ idibo rọyen nẹ ayen nẹrhovwo enẹ: “Ọsẹ rẹ avwanre rọhẹ obodjuvwu, e jẹ e ru odẹ wẹn fon.” (Mt 6:9) Jesu riẹnre nẹ ọnana ota ro shekpahen emama rẹ Ọghẹnẹ eje. (Se Izikiẹl 36:23.) O vwo emama rẹ Ọghẹnẹ vuọvo ro ru vrẹ obo ri Jesu ruru siẹrẹ a da ta ota kpahen orufon rẹ odẹ ri Jihova-a. Dedena, ọke re ivwighrẹn vwo mu Jesu, umwemwu vọ yen ayen tare nẹ o ruru? Ayen tare nẹ ọ ta ota rẹ Ẹgua! Vwọrẹ uyota Jesu niro nẹ a vwọ ta ota rẹ ẹgua kpahen odẹ rẹ Ọsẹ rọyen, ọyen umwemwu rọ ma bra kparobọ. O kpokpiro ẹwẹn nẹ e che mu ọyen ji brorhiẹn hwe ọyen fikirẹ umwemwu nana. Ọ sa dianẹ ọyen sorọ ẹwẹn rọyen vwọ “yanghan ku” inọke evo tavwen e ki rhi muo.​​—Lu 22:​41-​44.

12. Idjerhe ro me yovwin kparobọ vọ yen Jesu vwo ru odẹ rẹ Ọsẹ rọyen fon?

¹² Jesu se vwo ru odẹ rẹ Ọsẹ rọyen fon, o de chirakon rẹ emiavwe, ekan, vẹ efian re gun nyẹ. Ọ riẹnre nẹ ọyen kerhọ rẹ Ọsẹ rọyen vwẹ kẹdia kẹdia eje; ọtiọyena ọ rha cha vuoma rẹ emu vuọvo-o. (Hib 12:2) Ọ je riẹn nẹ Eshu yen ohwo rọ vwọsuọ ọyen vwẹ ọke rẹ ebẹnbẹn yena. (Lu 22:​2-4; 23:​33, 34) Eshu guọnọ guọghọ ọyọnregan ri Jesu; ẹkẹvuọvo o se ru ọtiọye-en! Jesu djerephia nẹ Eshu  ọvwọrofian rode nẹ Jihova ji vwo idibo re fuevun kẹ, re sẹro rẹ ọyọnregan rayen tobọ vwẹ ẹdia re ganre mamọ!

13. Die yen e se ru rere oma vwọ vwerhen Ovie rẹ avwanre?

¹³ Wọ guọno ru obo re cha vwerhen Ovie wẹn oma? Gbe rhe jiri odẹ ri Jihova, wọ me je vwẹ ukẹcha kẹ ihwo efa ayen vwọ riẹn oka rẹ ohwo rẹ Ọghẹnẹ ghene hepha. Wo de ru ọtiọyen, kọyen wo nene udje ri Jesu. (1Pi 2:21) Kerẹ Jesu, wọ nẹrhẹ Jihova ghọghọ, wo ji djephia nẹ Eshu rọ dia ọvweghrẹn rẹ Ọghẹnẹ, yen ọvwọrofian rode!

AVWANRE VWẸ UKẸCHA PHIA VWO SIVWIN ARHỌ RẸ IHWO SIẸRẸ E DE JIRI ODẸ RI JIHOVA

14-15. Erere vọ yen che norhe siẹrẹ avwanre de yono ihwo kpahen Jihova?

¹⁴ Avwanre vwẹ ukẹcha phia vwo sivwin arhọ rẹ ihwo siẹrẹ e de jiri odẹ ri Jihova. Vwẹ idjerhe vọ? Eshu “rhuẹro rẹ ubiudu rẹ ihwo ri segbuyota-a.” (2Kọ 4:4) Ukuotọ rọyen, ayen de se efian rẹ Eshu nana gbuyota: Ọghẹnẹ herọ-ọ, O sherabọ kẹ avwanre o ji vwo ọdavwẹ rẹ ihworakpọ-ọ, O sianro o ji gboja kẹ irumwemwu bẹdẹ. O gun efian nana rere o vwo miovwo odẹ ri Jihova kugbe oka rẹ ohwo rọ hepha, ọtiọyena ihwo rhe vwo owenvwe rẹ ayen vwo sikẹre Ọghẹnẹ-ẹ. Ẹkẹvuọvo iruo rẹ aghwoghwo rẹ avwanre ruẹ na gbowọphiyọ oborẹ Eshu ruẹ na. Avwanre yono ihwo uyota kpahen Ọsẹ rẹ avwanre, rọ hwarhiẹ ujiri brẹ odẹ rẹ ọfuanfon rọyen. Die yen nẹ obuko rọyen rhe re?

¹⁵ Uyota rehẹ Ota rẹ Ọghẹnẹ vwo ẹgba gangan. E de yono ihwo uyota kpahen Jihova kugbe oka rẹ ohwo rọ ghene hepha, erere no cha. O rhie ẹro rẹ ihwo rẹ uyono rẹ efian re Eshu rhuẹro rayen, kẹ ayen mrẹ iruemu iyoyovwin rẹ Ọsẹ rẹ avwanre kirobo rẹ avwanre mrẹ. Ẹgba rọyen rọ basa-an na gbe ayen unu. (Aiz 40:26) Ọ nẹrhẹ ayen vwẹrosuọ kidie o brorhiẹn rẹ abavo. (Urh 32:4) Ayen yono erọnvwọn buebun vwo nẹ aghwanre okokodo ro vwori. (Aiz 55:9; Ro 11:33) Ẹwẹn rayen totọ ayen vwọ riẹn nẹ Ọghẹnẹ hẹ ẹguọnọ. (1Jọ 4:8) Ayen vwo siẹkẹrẹ Ọghẹnẹ phiyọ ye, jẹ iphiẹrophiyọ rẹ ayen vwori ayen vwọ dia bẹdẹ kerẹ emọ rọyen je ganphiyọ. Ọyen okpuphẹn rode rẹ avwanre vwori ra vwọ cha  ihwo uko vwo sikẹrẹ Ọsẹ rayen! Avwanre de ru ọtiọyen, Jihova ko che nẹ avwanre kerẹ ihwo ri nene “wian kuẹgbe.”​​—1Kọ 3:​5, 9.

16. Mavọ yen oma ru ihwo evo ọke rẹ ayen vwo yono kpahen odẹ rẹ Oghẹnẹ? Djudje rọyen.

¹⁶ Ẹsosuọ, avwanre se yono ihwo nẹ Jihova yen odẹ rẹ Ọghẹnẹ. Ọyena se wene akpeyeren rẹ ohwo ro vwo ẹwẹn esiri. Kerẹ udje, a yọnrọn eghene aye ọvo re se Aaliyah b ghwanre vwẹ orua rẹ ihwo re dia Inenikristi-i. Obo re yono vwẹ ẹga na tere ẹwẹ-ẹn, ọ je nẹrhẹ o sikẹrẹ Ọghẹnẹ-ẹ. Ẹkẹvuọvo erọnvwọn weneri ọke rọ vwọ ton uyono ri Baibol phiyọ vẹ Iseri ri Jihova. Ọ da rhe mrẹ Ọghẹnẹ kerẹ ugbeyan rọyen. O gbere unu ro vwo yono nẹ e si odẹ rẹ Ọghẹnẹ nẹ Baibol buebun, a da reyọ edova ghevweghe kerẹ Ọrovwori vwo wene. Odẹ ri Jihova ro yonori wene akpeyeren rọyen. Ọ da ta: “Uvi rẹ ugbeyan mẹ na vwo odẹ!” Die yen nẹ obuko rọyen rhe? Ọ da je ta: “Mi vwo ufuoma enẹna. Oma vwerhen ovwẹ mamọ.” A yọnrọn ọshare ọvo re se Steve rọ dia ọbuine ghwanre vwẹ ẹga rẹ ihwo ri Ju ri sianro mamọ. Ọ ra guọnọ vwomaba ẹko rẹ ihwo re ga ẹga-a, kidie ọ mrẹ uruemu rẹ omeru rẹ ayen vwori. Ẹkẹvuọvo, ọke ro vwo muomaphiyọ fikirẹ ughwu rẹ oni rọyen, ọ da vwomaba uyono ri Baibol rẹ ọvo usun rẹ Iseri ri Jihova ruẹ. O gbere unu ro vwo yono kpahen odẹ rẹ Ọghẹnẹ. Ọ da ta: “Mi ji yono kpahen odẹ rẹ Ọghẹnẹ dẹvo-o, ọnana yen obọ rẹsosuọ, re me vwọ riẹn nẹ Ọghẹnẹ herọ me da rhe nabọ vughe kerẹ ohwo. Me da ghwa riẹn nẹ mi vwo ugbeyan re.”

17. Diesorọ wo vwo brorhiẹn wo vwo jiri odẹ ri Jihova ọkieje?

¹⁷ Wọ dahẹ iruo rẹ aghwoghwo na, wọ vuẹ ihwo efa kpahen odẹ na Jihova rọ dia odẹ rọ pha fuanfon na? Wọ je cha ayen uko vwọ riẹn oka rẹ ohwo rẹ Ọghẹnẹ rẹ avwanre ghẹnẹ hepha? Wo de ruẹ ọtiọyen, kọyen wo jiri odẹ rẹ Ọghẹnẹ. Gba davwẹngba wo vwo jiri odẹ ọfuanfon ri Jihova ọkieje ru wọ vwọ cha ihwo uko ayen vwọ riẹn oka rẹ ohwo rọ ghene hepha. Ọtiọyena, kẹ wo se sivwin arhọ rẹ ihwo. Ọ cha nẹrhẹ wo nene odjekẹ rẹ Ovie wẹn, Jesu Kristi. Ọ rọ ma rho, ọ cha nẹrhẹ oma vwerhen Jihova Ọsẹ wẹn rọ dia ohwo rọ vọnre vẹ ẹguọnọ na. Jẹ ọnana mu we vwo “jiri odẹ [rọyen] bẹdẹ bẹdẹ”!​​—Un 145:2.