1-2. Cossa che ne giuta a capir come che Geovà el se sente cole busie sora el so nome?

 METEMO dir che una persona che te vol tanto ben la dise una busia sora ti e tanti i crede in quel che la ga dito e i scomìnsia a contarla in volta. Come che te te sentirissi? Se queste persone le ze care par ti e se te te preocupi con quel che le pensa sora ti, sicuro che te restarissi pròpio disgustà. — Pro. 22:1.

² Questo ne giuta a capir come che Geovà el se sente par causa dele busie sora el so nome. Come cossita? Ancora nel giardin del Èden, un àngelo el ga contà una busia sora lu, e Eva la ga credesto. Par via de quela busia, Adon e Eva i ga desobedio a Geovà. Cossita, tute le persone le ze deventade pecadore e le more. (Gén. 3:1-6; Rom. 5:12) Par quela, ancoi ghen’è tante morte, guere e sofrimento. Sicuro che Geovà el sofre tanto de veder tante robe brute suceder nel mondo par causa dela busia de Sàtana. Ancora cossita, Geovà no l’è mia tristo o disgustà. Invesse, la Bìblia la dise che lu l’è el “Dio felice”. — 1 Tim. 1:11.

3. Come che mostremo che Sàtana l’è un busier?

³ Noantri mostremo che Sàtana l’è un busier quando obedimo al comandamento: ‘Lodé el nome de Geovà.’ (Sal. 113:1) E podemo lodar el so nome quando parlemo la verità sora lu. In questo stùdio, ndaremo veder tre robe che ne dà ancora pi voia de lodar el nome de Geovà.

 GEOVÀ EL RESTA CONTENTO QUANDO LODEMO EL SO NOME

4. Parché che Geovà el resta contento quando lodemo el so nome? Parla de un esémpio. (Varda anca el ritrato.)

⁴ El nostro caro Dio el resta contento quando lodemo el so nome. (Sal. 119:108) Ma lu no l’è mia come le persone che ghe toca scoltar i lodi dei altri par sentirse ben o saver che le ze drio far un bon laoro. Alora, parché che Geovà el resta contento quando lodemo el so nome? Proa pensa nte una toseta che la ghe dà un strucon al so pare e la ghe dise: ‘Te sì el meio pupà del mondo!’ L’è vera che lu el sa che l’è un bon pare e che el se sforsa de tender dela so fiola. Anca cossita, lu el resta tanto contento de veder che ela lo ama e che la ghe dà valor a quel che lu el fà. Lu anca el sa che dar valor a quel che i altri i fà la giutarà a esser contenta dopo che la vien granda. Dela medèsima maniera, Geovà el resta contento quando lo lodemo parché el vede che ghe demo valor a tuto quel che el fà par noantri.

5. Che busia Sàtana el ga contà sora noantri?

⁵ Quando lodemo a Geovà anca mostremo che quel che Sàtana el ga dito sora noantri l’è una busia. Come cossita? Lu el ga dito che nissun seitaria leal a Geovà e che ndarìssino abandonarlo se qualchedun el ne desse qualcossa meio. (Giò 1:9-11; 2:4) Nel passà, Giò el ga belche mostrà che Sàtana l’è un busier. E cossa che ti te ndarè far? Anca ti te pol mostrar che Sàtana l’è un busier se te seiti fedele e te obedissi a Geovà. (Pro. 27:11) Varda sol che bela roba che te pol far!

6. Come che podemo far compagno al rè Davi e ai leviti? (Neemia 9:5)

⁶ Quei che i ama a Geovà i vol lodar el so nome de cuor. Varda due esempi. El rè Davi el ga dito che el volea lodar el nome santo de Geovà con tuta la so forsa. (Sal. 103:1) Davi el savea che, par lodar a Geovà, ghemo de lodar anca el so nome. Parché? Quando scoltemo el nome de Geovà, noantri se ricordemo dele so bele qualità e de tuto quel che el ga fato. Par quela che Davi el lodea el nome de Geovà con tuto el so cuor. Nantro bel esémpio l’è stà i leviti. Lori i giutea el pòpolo a lodar el santo nome de Geovà. Ma lori i era ùmili e i savea che mai i saria boni de lodar el so nome dela maniera che lu el mèrita. (Ledi Neemia  9:5. a) Sicuro che Geovà el restea tanto contento de veder che lori i i era ùmili e che i lo lodea de cuor.

7. Come che podemo lodar a Geovà nela predicassion e nela nostra vita?

⁷ Quando discoremo cole persone, podemo mostrar che amemo a Geovà e che ghe demo valor a tuto quel che lu el fà par noantri. Nela predicassion, volemo giutar le persone a deventar amighe de Geovà e a veder che lu l’è un Pare che el ne ama tanto. (Tia. 4:8) Ne piase insegnar la Bìblia ai altri e giutarli a capir tante qualità de Geovà, come el amor, giustìssia, sabedoria e poder. E come che podemo lodar a Geovà anca nela nostra vita? Ghemo de sforsarse par ndar drio al so esémpio. (Efe. 5:1) Cossita, le persone le ndarà veder che semo difarenti dei altri. Alora, podaremo spiegarghe parché che semo cossita. Fursi arquanti i volarà imparar de pi sora Dio. Sicuro che, quando lodemo el nome de Geovà, lu el resta tanto contento. — 1 Tim. 2:3, 4.

CONTENTEMO A GESÙ QUANDO LODEMO EL NOME DE GEOVÀ

8. Parché che Gesù l’è un bel esémpio de lodar a Geovà?

⁸ Gesù el cognosse meio a Geovà che tuti i altri nel cielo e nela Tera. (Mat. 11:27) Lu el ama tanto a so Pare e el giuta tuti noantri a lodar el nome de Geovà. (Gio. 14:31) Nela orassion che Gesù el ga fato vanti de morir, lu el ga parlà sora el laoro che el ga fato qua nela Tera. Lu el ga dito: “Mi go fato cognosser el to nome a lori.” (Gio. 17:26) Cossa che lu el ga volesto dir?

9. Come che la stòria che Gesù el ga contà la ne giuta a capir come che Geovà l’è?

⁹ Nela època de Gesù, i giudei i savea el nome de Dio. Ma Gesù el ga fato de pi che sol parlar el nome de Geovà. Lu el ga giutà le persone cognosser come Geovà l’è. (Gio. 1:17, 18) Par esémpio, le Scriture Ebraiche le spiega che Geovà l’è un Dio de “misericòrdia e compassion”. (Éso. 34:5-7) Gesù el ga mostrà che Geovà l’è pròpio cossita quando el ga contà la stòria del toso che l’è ndato via de casa e che dopo el se ga ciamà gramo. Quando el so pare lo ga visto de distante, lu l’è ndato de carera catarlo, ghe ga dato un strucon e lo ga perdonà del tuto. Cossita, podemo capir pròpio ben come che Geovà el ga misericòrdia e compassion. (Luc. 15:11-32) Sicuro che Gesù ne ga giutà a verder come che Geovà l’è.

10. (a) Come che savemo che Gesù el doperea el nome del so Pare e el volea che i altri i fesse compagno? (Marco 5:19) (Varda anca la ilustrassion.) (b) Cossa che Gesù el vol che femo ancoi?

¹⁰ Nela època de Gesù, tanti lìderi religiosi i disea che no se podea mia doperar el nome de Geovà. Ma invesse de ndarghe drio, Gesù el volea che tute le persone le cognossesse e le parlesse el nome del so Pare. Par esémpio, una volta, Gesù el ga parà via i demoni che i era nte un omo. Ma, come le persone le ze restade spaurade, lore ghe ga domandà che Gesù el ndesse via parché le gavea tanta paura. (Mar. 5:16, 17) Ancora cossita, Gesù el volea che le persone le cognossesse el nome de Dio. Alora, lu el ga  domandà che quel omo el parlesse ai altri che l’era stà Geovà che lo gavea curà, e nò Gesù che lo gavea fato. (Ledi Marco 5:19. b) c Ancoi, Gesù el vol che anca noantri giutemo le persone a cognosser el nome del so Pare. (Mat. 24:14; 28:19, 20) Alora, quando parlemo ai altri sora el nome de Geovà, el nostro Rè Gesù el resta tanto contento.

11. Cossa che Gesù el ga insegnà che i so dissìpoli i gavaria de dir quando i preghea a Geovà, e parché che questo l’è importante? (Ezechiel 36:23)

¹¹ Gesù el savea che la volontà de Geovà la ze santificar el so nome e mostrar che quel che i dise contra lu l’è una busia. Par quela che Gesù el ne ga insegnà a pregar cossita: “Pare nostro che te sì nel cielo, santificà sìpia el to nome.” (Mat. 6:9) Lu l’è la persona che se sforsa de pi par santificar el nome del so Pare parché el sa che questa la ze la roba pi importante che ghen’è. (Ledi Ezechiel 36:23. d) Ancora cossita, quando lu l’è stà preso, i so nemighi i ga dito che lu el gavea bestemà contra el nome del so Pare. Gesù el savea che questo l’è el pecato pi bruto che se pol far. Sicuro che lu l’è restà tanto disgustà, e fursi, l’è par quela che l’è restà tanto avelio vanti de esser preso. — Luc. 22:41-44.

12. Come che Gesù el ga santificà el nome del so Pare dela meio maniera?

¹² Sàtana el ga doperà i momenti pi bruti dela vita de Gesù par farlo desobedir a Geovà. (Luc. 22:2-4; 23:33, 34) Ma Gesù el fea de tuto par santificar el nome de so Pare. Par quela, le persone le contea busie sora lu, le ghe disea su e lo fea tribolar tanto. Ma Gesù el savea che no’l gavea fato gnente de sbalià.  (Ebr. 12:2) Lu el ga seità leal a Geovà. Cossita, lu el ga mostrà che Sàtana l’è rugno e un busier, e che i servi leai de Geovà i seitarà a obedirghe, anca se i infronta dificoltà.

13. Come che te pol contentar el to Rè, Gesù?

¹³ Vuto contentar el to Rè, Gesù? Alora, seita a lodar el nome de Geovà e a giutar i altri a cognosser le so bele qualità. Cossita, te ndarè drio el bel esémpio de Gesù. (1 Pie. 2:21) Compagno a lu, te assarè Geovà contento e te ndarè mostrar che Sàtana l’è un busier.

QUANDO LODEMO EL NOME DE GEOVÀ, GIUTEMO LE PERSONE A VIVER PAR SEMPRE

14-15. Che bele robe pol suceder quando ghe insegnemo ale persone la verità sora Geovà?

¹⁴ Quando lodemo el nome de Geovà, giutemo le persone a viver par sempre. Come cossita? Sàtana el ga dito tante busie ale persone. (2 Cor. 4:4) Par esémpio, tanti i crede che no ghen’è mia un Dio, che lu l’è distante, che no’l se importa cole persone e che el castiga par sempre tuti quei che no i vol obedirghe. Ma parché che Sàtana el ga contà queste busie? Parché cossita tanti no i vol cognosser a Dio gnanca i sa che lu el ga un nome. Alora, quando predichemo ale persone, ghe insegnemo la verità sora Geovà e lodemo el so nome. E cossa che sucede dopo?

¹⁵ La verità dela Parola de Dio la ga tanto poder. Quando insegnemo ale persone sora Geovà, vedemo tante robe maraveiose. Ghen’è de quei che i assa de creder nele busie de Sàtana quando i impara le bele qualità del nostro caro Dio. Par esémpio, lori i resta maraveiadi de imparar sora el grando poder de Geovà. (Isa. 40:26) Lori anca i resta sicuri dela so giustìssia. (Deu. 32:4) Lori anca i resta tanto contenti de imparar sora la so granda sabedoria e so grando amor. (Isa. 55:9; Rom. 11:33; 1 Gio. 4:8) Dopo che i deventa amighi de Geovà, la so speransa de viver par sempre la resta ancora pi forte. L’è tanto bel giutar  le persone a cognosser la verità sora nostro caro Pare. Quando femo questo, semo drio laorar insieme a lu. — 1 Cor. 3:5, 9.

16. Come che imparar sora el nome de Dio pol cambiar la vita de una persona? Parla de esempi.

¹⁶ Fursi la prima roba che insegnemo ai altri la ze el nome de Geovà, e questa verità la pol cambiar la vita de una bona persona. Par esémpio, una gióvena de nome Alìa e la ze stata slevada nte una religion che no i crede nela Bìblia. Ma ela no la ghe piasea la so religion e no la sentia che Dio ghe volea ben. Ma, dopo de studiar cole Testimònie de Geovà, ela la ga visto che Dio l’è so amigo. Ela anca la ze restada maraveiada quando la se ga nicorta che tante tradussion dela Bìblia le gavea cavà via el nome de Dio e le gavea metesto parole come Signor. Alìa la ga dito: “El me meio amigo el ga un nome! Adesso, go tanta pace e son tanto contenta.” Un omo de nome Steve l’era un mùsico che l’è stà slevà come un giudeo. Ancora cossita, lu no’l volea ndar de gnanca una religion parché el vedea tante busie. Ma, dopo che la so mama la ze morta, lu el ga acetà veder come che l’è un stùdio dela Bìblia. Imparar sora el nome de Dio ga cambià tanto quel che lu el pensea. Steve el ga dito: “Mai gavea visto che Dio el ga un nome. Par la prima volta, go visto che Dio l’è una persona e sò che go catà un vero Amigo.”

17. Parché che te vol seitar a lodar a Geovà? (Varda anca el ritrato.)

¹⁷ Come che te pol lodar el nome de Geovà? Parla del so nome e insegna le so bele qualità ai altri. Cossita, te ndarè drio el esémpio de Gesù, te giutarè tante persone a viver par sempre e te ndarè contentar el nostro caro Pare, Geovà! — Sal. 145:2.