1-2. Yihooway ba sunttay moorettin waanidaakko akeekanawu nuna aybi maaddana danddayii?

 ANE hagaa qoppa: Neeni bonchchiyo issi uri nebaa iitabaa haasayiis. I haasayidobay worddo gidiyogaa ne eraasa; shin amaridaageeti hegaa ammanidosona. Ubba iitabay, eti he wordduwa aassidosona; qassi hara darotikka hegaa ammanidosona. Yaatin, neeyyo aybi siyettanee? Neeni asawu qoppiyabanne ne loˈˈo sunttawu naagettiyaba gidikko, he worddoy neeni azananaadan oottanaagee qoncce.—Lee. 22:1.

² Yihooway ba sunttay moorettido wode waanidaakko akeekanaadan ha hanotay nuna maaddana danddayees. A kiitanchchatuppe issoy koyro maccaasee Hewanissi abaa wordduwa yootiis. A he wordduwa ammanaasu. He worddoy Addaamenne Hewana Yihoowa bolli makkalanaadan oottiis. Hegaappe denddidaagan nagaraynne hayqoy ubba asaa gakkiis. (Doo. 3:1-6; Roo. 5:12) Edene ataakiltte sohuwan Seexaanay wordduwa haasayido gishshawu ha wodiyan alamiyan hayquwa, olaanne tuggaa mala daro metoy deˈees. Yihooway ba sunttay moorettido gishshawunne hegee kaalettidoban azzanidee? Ee azzaniis. Gidoppe attin, Yihooway yiillotibeenna woy lanccibeenna. Shin I ubbatoo “ufayttiya Xoossa.”—1 Xim. 1:11, NW.

3. Nuussi deˈiya maatay aybee?

³ Yihoowa xeelliyagan Seexaanay yootidobay worddo gidiyogaa nuuni bessana danddayoos. ‘Yihoowa sunttaa sabba’ giya azazuwa azazettiyogan yaatana danddayoos. (Maz. 113:1) Nuuni haratussi abaa tumaa yootiyo wode A sunttaa  sabboos. Neeni Yihoowa sunttaa sabbana danddayay? Nu Xoossaa sunttaa nuuni kumetta wozanaappe sabbanaadan oottiya heezzu gaasota ane beˈoos.

NUUNI YIHOOWA SUNTTAA SABBIYO WODE I UFAYTTEES

4. Nuuni Yihoowa sabbiyogee A ufayssiyoy aybissee? Leemisuwa yoota. (Misiliyakka xeella.)

⁴ Nuuni saluwan deˈiya nu Aawaa sunttaa sabbiyo wode I ufayttees. (Maz. 69:30, 31) Shin hegaa giyogee ubbaa danddayiya Xoossay minttettoy koshshido gishshawu harati sabbanaadan koyiya nagaranchcha asatu malee? Gidenna. Ane issi leemisuwa beˈa. Ba aawaakko woxxaydda yaada A hashiyan ba kushiya wottada, “Kumetta saˈan ne mala aaway baawa” gaada yootaydda deˈiya guutta naˈiyo qoppa! He aaway noocu geesinne keehi ufayttees. Aybissi? Ba naˈeeppe awu minttettoynne sabay koshshido gishshataassa gidenna. I ba naˈiyo siiqiyo gishshawunne A ba aawaa siiqiyogaanne galatiyogaa bessido gishshawu ufayttiis. A dicciyo wode he eeshshati A ufayttanaadan oottiyogaa I erees. Hegaadan nuuni gita Aawaa Yihoowa sabbiyo wode I ufayttees.

5. Nuuni Yihoowa sabbiyo wode qonccanaadan oottiyo worddoy awugee?

⁵ Nuuni saluwan deˈiya nu Aawaa sabbiyo wode Seexaanay nuna ubbaa xeelliyagan yootidobay worddo gidiyogaa bessoos. Seexaanay ooninne Xoossaa sunttawu ammanettidi exatenna giidi yootees. I paacee gakkiyo wode ay asinne Xoossawu ammanettidi deˈenna yaagees. Nuuni ubbay Xoossawu ammanettennaagee nuna goˈˈees giidi qoppikko, Xoossawu haggaaziyogaa aggana giidi yootees. (Iyy. 1:9-11; 2:4) Shin Iyyoobi Xoossawu ammanettidi deˈiisinne Seexaanay worddanchcha gidiyogaa bessiis. Neeni shin? Nu Aawawu ammanettidi haggaaziyogan A sunttawu exatiyonne A ufayssiyo maatay nu ubbawu deˈees. (Lee. 27:11) Yaatiyogee nuussi tumukka gita maata.

6. Nuuni Kawuwa Daawitanne Leewatu leemisuwa waati kaallana danddayiyoo? (Nahimiyaa 9:5)

⁶ Yihoowa siiqiyageeti bantta kumetta wozanaappe A sunttaa sabbanawu koyoosona. Kawuwa Daawiti hagaadan giis: “Tanooshsho, [Yihoowa] galata! Ta kumetta asatettau, a geeshsha sunttaa galata.” (Maz. 103:1) Yihoowa sunttaa sabbiyogee Yihoowa sabbiyogaa gidiyogaa Daawiti eriis. Nuuni Yihoowa sunttaa siyiyo wode I ay mala Xoossakko qoppoos; qassi ufayssiya A eeshshatanne maalaalissiya A oosota qoppoos. Daawiti Yihoowa sunttaa geeshsha oottidi xeellanawunne sabbanawu koyiis. I ba ‘kumetta asatettaappe,’  hegeekka kumetta wozanaappe hegaadan oottanawu koyiis. Hegaadankka, Leewati Yihoowa sabbanawu minni oottidosona. Eti yootidobay Yihoowa geeshsha sunttaa bessiyagaa keena loytti sabbana danddayennaagaa banttana ziqqi oottidi ammanidosona. (Nahimiyaa 9:5 nabbaba.) Eti banttana ziqqi oottidi wozanappe Yihoowa sabbidoogan I ufayttidoogee qoncce.

7. Nu haggaazuwaninne nu deˈuwan Yihoowa waati sabbana danddayiyoo?

⁷ Ha wodiyan nuuni Yihoowa keehi galatiyogaanne siiqiyogaa bessiya ogiyan abaa haasayiyogan A ufayssana danddayoos. Nuuni haggaaziyo wode, nu waanna halchchoy asay Yihoowakko loytti shiiqanaadaaninne nu siiqo Aawaabaa nuugaadan akeekanaadan maaddiyogaa gidiyogaa hassayana koshshees. (Yaaq. 4:8) Geeshsha Maxaafay Yihoowa xeelliyagan yootiyobaa, hegeekka A siiquwabaa, suure pirddaabaa, aadhdhida eratettaabaa, wolqqaabaanne ufayssiya A eeshshatubaa haratuyyo yootiyogan ufayttoos. Qassi nuuni Yihoowa milatanawu baaxetiyo wode, A sabboosinne ufayssoos. (Efi. 5:1) Yaatiyo wode, ha iita alamiyan deˈiya asaappe nuuni dummatiyogaa harati akeekananne nuuni dummatiyoy aybissakko oychchana danddayoosona. (Mat. 5:14-16) Nuuni hegaadan oottiyo gaasuwa eti nunaara gayttiyo wode, yootana danddayoos. Hegaa gishshawu, ashkke asati nu Xoossaakko shiiqana danddayoosona. Nuuni ha ogetun Yihoowa sabbiyo wode, A loytti ufayssoos.—1 Xim. 2:3, 4.

NUUNI YIHOOWA SUNTTAA SABBIYO WODE YESUUSI UFAYTTEES

8. Yesuusi Yihoowa sunttaa sabbiyogan keehi loˈˈo leemiso gididoy aybiinee?

⁸ Saluwan gidin woy saˈan Yesuusaagaappe aaruwan Yihoowa eriyay ooninne baawa. (Mat. 11:27) Yesuusi ba Aawaa siiqiyo gishshawu, Yihoowa sunttaa sabbiyogan keehi loˈˈo leemiso gidiis. (Yoh. 14:31) Yesuusi saˈan haggaazido wode oottido gitabaa I hayqqanaappe kase qammi ba Aawaa woossido woosan qonccissiis. Hagaadan woossiis: “Taani ne sunttaa eta erissaas.” (Yoh. 17:26) Yesuusi hegaadan waati oottidee?

9. Yesuusi goˈettido leemisuwan ba Aawaabaa waati loytti qonccissidee?

⁹ Yesuusi Xoossaa sunttay Yihoowa gidiyogaa asawu yootiyogaappe aadhdhiyabaa oottiis. Yesuusi tamaarissido Ayhudati Xoossaa sunttaa kasekka eroosona. Shin Yesuusi ‘abaa markkattiyogan’ keehi loˈˈo leemiso. (Yoh. 1:17, 18) Leemisuwawu, Ibraawettuwan Xaafettida Geeshsha Maxaafay Yihooway maariyanne qarettiya Xoossaa gidiyogaa qonccissees. (Kes. 34:5-7) Yesuusi bayida naˈaabaanne aawaabaa yootido leemisuwan hegaa kaseegaappe aaruwan qonccissiis. Aaway so simmida ba naˈaa beˈidi “I biron haahuwan de7ishin,” akko woxxidi biidi A qoommidoogaanne awu wozanaappe atto giidoogaa nuuni nabbabiyo wode Yihooway maariyagaanne qarettiyagaa gidiyogaa loytti akeekoos. (Luq. 15:11-32) Yihooway ay mala Xoossakko akeekanaadan Yesuusi harata maaddiis.

10. (a) Yesuusi ba Aawaa buzo sunttaa goˈettidoogaanne haratikka goˈettanaadan koyidoogaa nuuni aybin eriyoo? (Marqqoosa 5:19) (Misiliyakka xeella.) (b) Yesuusi nuuni ha wodiyan ay oottanaadan koyii?

¹⁰ Yesuusi haratikka ba Aawaa buzo sunttaa goˈettanaadan koyidee? Ee koyiis. Haymaanootiya kaalettiya amaridaageeti Xoossaa sunttaa xeesiyogee A bonchchennaagaa bessees giidi ammanennan aggokkona; shin Yesuusi Geeshsha Maxaafaara maayettenna hegaa mala qofati I ba Aawaa sunttaa bonchchiyogaa digganaadan mule eeno gibeenna.  Gerggesenoona giyo biittan daydanttay oyqqido bitaniya I pattido wode hanidabaa beˈa. Asay yayyido gishshawunne Yesuusi baanaadan woossido gishshawu, I he biittan takkibeenna. (Mar. 5:16, 17) Gidikkonne, Yesuusi he heeran Yihoowa sunttay erettanaadan koyiis. Hegaa gishshawu, Yesuusi oottidobaa gidennan, Yihooway oottidobaa paxida bitanee haratussi yootanaadan Yesuusi azaziis. (Marqqoosa 5:19 nabbaba.) Yesuusi nuuni kumetta saˈan A Aawaa sunttaa erissanaadan koyees! (Mat. 24:14; 28:19, 20) Nuuni yaatiyo wode, nu Kawuwa Yesuusa ufayssoos.

11. Yesuusi bana kaalliyageeti aybaa xeelliyagan woossanaadan tamaarissidee, qassi Hizqqeela 36:23y yootiyogaadan, hegee keehi koshshiyoy aybissee?

¹¹ Yihoowa halchchoy ba sunttaa worddo ubbaappe geeshshiyogaa gidiyogaa Yesuusi erees. Nu Goday bana kaalliyageeta, “Saluwan deˈiya nu Aawawu, asa ubbay ne sunttaa geeshsha oottidi xeello” giidi woossanaadan tamaarissidoy hegaassa. (Mat. 6:9) Ha gita allaallee meretaa ubbaara gayttidabaa gidiyogaa Yesuusi akeekiis. (Hizqqeela 36:23 nabbaba.) Yesuusaagaappe aaruwan Yihoowa sunttaa geeshsha oottidi xeelliya uri saluwaninne saˈan baawa. Shin Yesuusi oyqettido wode, ba Aawaa mule bonchchibeenna giidi A morkketi A mootidosona. Ba Aawaa geeshsha sunttaa boriyogee woy cayiyogee gita nagaraa gidiyogaa Yesuusi eriyogee tuma! He hanttaarabaa oottiis giidi A mootidonne mooranchchadan xeellido gishshawu I keehi azzaniis. I oyqettanaappe kasetiya saatetun ba ‘wozanaa giddon mishettido’ waanna gaasoy hegaa gidana danddayees.—Luq. 22:41-44.

12. Yesuusi ba Aawaa sunttaa waati loytti geeshshidee?

¹² Yesuusi ba Aawaa sunttaa geeshshanawu dumma dumma waayiya, cashshanne A xeelliyagan odettida wordduwa ubbaa gencciis. Yesuusi ubbaban ba Aawawu azazettidoogaa eriyo gishshawu, A yeellayiyabi baawa. (Ibr. 12:2) He iita wodiyan A qohiiddi deˈiyay Seexaanaa gidiyogaakka I erees. (Luq. 22:2-4; 23:33, 34) Seexaanay Yesuusi ammanettidi deˈennaadan oottanawu qoppidoogee qoncce; gidikkonne Yesuusi ammanettidi deˈiis! Seexaanay worddanchcha gidiyogaanne keehi metiya hanotay deˈishinkka, Yihoowawu ammanettidi oottiyageeti deˈiyogaa Yesuusi qonccissiis!

13. Haariiddi deˈiya ne Kawuwa waata ufayssana danddayay?

 ¹³ Haariiddi deˈiya ne Kawuwa ufayssanawu koyay? Yaatikko, maalaalissiya nu Xoossaa eeshshata harati eranaadan maaddiyogan ubbatoo Yihoowa sunttaa sabba. Neeni yaatiyo wode Yesuusa leemisuwa kaallaasa. (1 PHe. 2:21) Yesuusaagaadan neeni Yihoowa ufayssaasa; qassi A morkkee Seexaanay worddanchcha gidiyogaa bessaasa!

NUUNI YIHOOWA SUNTTAA SABBIYO WODE ASAA SHEMPPUWA ASHSHOOS

14-15. Nuuni Yihoowabaa asaa tamaarissiyo wode hanana ufayssiyabay aybee?

¹⁴ Nuuni Yihoowa sunttaa sabbiyo wode asaa shemppuwa ashshoos. Waatidi? Seexaanay “ammanenna asatu qofaa jallissiis.” (2 Qor. 4:4) Hegaa gaasuwan eti Seexaanay yootiyo hagaa mala wordduwa ammanidosona; hegeetikka Xoossi baawa, Xoossay nuuppe haahuwan deˈees, I asawu qoppenna, Xoossay meqetta iitanne nagaranchchata merinawu qaxxayees. Seexaanay ha ubbaa wordduwa yootiyoy Yihoowa loˈˈo sunttaa mooranawunne asay Yihoowakko shiiqennaadan digganawu koyiyo gishshataassa. Shin nuuni sabbakiyo wode Seexaanay ba halchchuwa polennaadan oottoos. Nuuni nu Aawaa xeelliyagan tumaa asaa tamaarissiyo wode nu Xoossaa geeshsha sunttaa sabboos. Hegee ayba ayfiya demissii?

¹⁵ Xoossaa Qaalawu deˈiya tumawu zawi baynna wolqqay deˈees. Nuuni Yihoowabaanne maalaalissiya A eeshshaabaa asaa tamaarissiyo wode anjjuwa demmoos. Asay Seexaanaa wordduwan cimettenna; qassi eti nu Aawaassi deˈiya ufayssiya eeshshata akeekoosona. Eti awu deˈiya zawi baynna wolqqan keehi maalaalettoosona. (Isi. 40:26) I suure pirddiyo gishshawu eti an ammanettoosona. (Zaa. 32:4) Eti A aadhdhida eratettaa loytti tamaaroosona. (Isi. 55:9; Roo. 11:33) Qassi I siiqo gidiyogaa eriyogan minettoosona. (1 Yoh. 4:8) Eti Yihoowakko loytti shiiqiyo wode A naata gididi merinawu deˈiyo hidootay ammanttiyagaa gidees. Asay ba Aawaakko shiiqanaadan maaddiyogee nuussi gita maata! Nu yaatiyo wode, Yihooway nuuni ‘aara issippe oottiyabadan’ qoppees.—1 Qor. 3:5, 9.

16. Xoossaa sunttaa eridoogee amaridaageeta waati maaddidee? Leemisuwa yoota.

 ¹⁶ Koyro heeran nuuni Xoossaa sunttay Yihoowa gidiyogaa asaa tamaarissana danddayoos. Hegee suure wozanay deˈiyo asatu deˈoy laamettanaadan oottana danddayees. Leemisuwawu, Aliyo a giyo yelagiya Geeshsha Maxaafay yootiyobaa tamaarissenna haymaanootiyan diccaasu. Shin A ba haymaanootiyan ufayttabeykku; qassi Xoossaakko shiiqabeykku. A Yihoowa Markkatuura xannaˈiyogaa doomma simmin I deˈoy laamettiis. A Xoossaa ba Dabbodan xeelliyogaa doommaasu. Qassi daro Geeshsha Maxaafatuppe Xoossaa sunttaa kessidi Godaa giyogaa mala bonchcho sunttatun laammidoogaa erada A keehi maalaalettaasu. Yihoowa sunttaa eridoogee I deˈoy laamettanaadan oottiis. A hagaadan gaasu: “Ta Dabbuwawu suntti deˈees!” Hegee ay goˈˈaa demissidee? A hagaadan gaasu: “Taani haˈˈi keehi woppu gaas. Hegee tawu gita bonchcho.” Yettanchcha gidida Isteeva giyo bitanee kase Ayhuda ammanuwa mintti kaalliya asa. I yan daro wordduwa beˈido gishshawu, issi haymaanoote dirijjitiya yame gidanawu koyibeenna. Shin I ba aayyiyaa hayqqa simmin, Yihoowa Markkaara issi uray Geeshsha Maxaafaa xannaˈiyo wode yiidi beˈanawu maayettiis. I Xoossaa sunttaa erido wode keehi ufayttiis. I hagaadan giis: “Taani Xoossaa sunttaa kase erikke.” I gujjidikka: “Xoossay deˈiyogaa taani biron akeekaas! Xoossay tawu beettiyagaa keenaa qoncce. Yaatiyo gishshawu, taani Dabbo demmidoogaa eraas.”

17. Neeni Yihoowa sunttaa ubbatoo sabbanawu murttidoy aybissee? (Misiliyakka xeella.)

¹⁷ Neeni sabbakiyonne tamaarissiyo wode Yihoowa geeshsha sunttaa asawu yootay? Nu Xoossaa eeshshaa eti akeekanaadan maadday? Yaatiyogan neeni Xoossaa sunttaa sabbaasa. Yihooway ay mala Xoossakko asay eranaadan maaddiyogan A geeshsha sunttaa ubbatoo sabba. Yaatiyo wode, neeni asaa shemppuwa ashshaasa. Ne Kawuwa Kiristtoos Yesuusa kaallaasa. Ubbaappe aaruwan, nena siiqiya Aawaa Yihoowa ufayssaasa. A ‘sunttaa meri merinawu sabbiyagaa’ gida!—Maz. 145:2.