1-2. Ano an makakabulig ha aton nga masabtan kon ano an inaabat ni Jehova mahitungod ha pagpakaraot ha iya ngaran?

 IMADYINA ini: May-ada ka hinigugma nga nagyakan hin maraot gud mahitungod ha imo. Maaram ka nga buwa ito; pero tumuod hito an iba. An maraot pa gud, kay iginpinanumat nira ito ha iba, ngan damu pa an tumuod hito. Ano an imo aabaton? Kon importante ha imo an mga tawo ngan an imo maopay nga reputasyon, ito nga pakaraot makakapasubo ha imo, diri ba?—Prob. 22:1.

² Ito nga kahimtang makakabulig ha aton nga masabtan kon ano an inabat ni Jehova han nadaot an iya reputasyon. Usa han mga anghel an nagbuwa mahitungod ha Iya ha siyahan nga babaye, hi Eva. Tumuod hi Eva hito nga buwa. Tungod hito nga buwa, nagrebelde an aton siyahan nga mga kag-anak kan Jehova. Sugad nga resulta, an ngatanan nga tawo nakakasala ngan ha urhi, namamatay. (Gen. 3:​1-6; Roma 5:12) An ngatanan nga problema nga aton nakikita ha kalibotan—an kamatayon, girra, kasakit—nahitabo tungod han buwa nga iginpasarang ni Satanas ha garden han Eden. Nasusubo ba hi Jehova tungod hito nga pakaraot ngan han mga resulta hito? Sigurado. Pero hi Jehova diri masurub-on. Ha pagkamatuod, nagpapabilin hiya nga “malipayon nga Dios.”—1 Tim. 1:11.

3. Ano an aton pribilehiyo?

³ May-ada kita pribilehiyo ha pagbulig ha pagbindikar han ngaran ni Jehova pinaagi ha pagsunod hinin simple nga sugo: “Dayawa an ngaran ni Jehova.” (Sal. 113:1) Mabubuhat naton ini kon isusumat naton ha iba an kamatuoran mahitungod ha iya. Dadayawon mo ba an ngaran ni Jehova? Hisgotan naton an tulo nga marig-on nga hinungdan nga mabulig ha aton nga kinasingkasing nga dayawon an ngaran han aton Dios.

 NAPAPALIPAY NATON HI JEHOVA KON GINDADAYAW NATON AN IYA NGARAN

4. Kay ano nga an aton pagdayaw nakakapalipay kan Jehova? Iilustrar. (Kitaa liwat an piktyur.)

⁴ Napapalipay naton an aton langitnon nga Amay kon gindadayaw naton an iya ngaran. (Sal. 119:108) Pero nangangahulogan ba ini nga an makagarahum-ha-ngatanan nga Dios pariho ha diri perpekto nga mga tawo nga naghihingyap hin pagdayaw kay kinahanglan nira hin pasarig? Diri. Pansina ini nga ilustrasyon. May bata nga babaye nga hinangkop ha iya tatay ngan nagsiring, “Ikaw an pinakamaopay nga tatay ha bug-os nga kalibotan!” Nalipay an tatay ngan nabantad pa ngani tungod han ginbuhat han iya anak. Kay ano? Makakasiring ba kita nga kinahanglan niya hin pasarig ngan pagdayaw han iya anak? Diri. Lugod, tungod ito kay hinigugma niya an iya anak ngan malipayon hiya nga iginpapahayag han iya anak an gugma ngan apresasyon ha iya. Maaram hiya nga ito nga mga kalidad makakabulig nga magin mas malipayon an iya anak samtang nagtutubo. Sugad man, nalilipay hi Jehova, an pinakamaopay nga Amay, kon gindadayaw naton hiya.

5. Kon gindadayaw naton hi Jehova, ano nga akusasyon ni Satanas an napapamatud-an naton nga buwa?

⁵ Kon gindadayaw naton an aton langitnon nga Amay, nakakabulig kita nga pamatud-an nga sayop an usa pa nga gin-akusar ni Satanas parte ha aton. Nagsiring hi Satanas nga waray tawo nga maunungon nga magdidepensa ha ngaran han Dios. Siring niya nga kon sarihan an mga tawo, waray magpapabilin nga matinumanon ha Dios. Nasiring hiya nga kita ngatanan maundang ha pag-alagad ha Dios kon abaton naton nga mas makakaopay ito para ha aton. (Job 1:​9-11; 2:4) Pero ginpamatud-an han matinumanon nga hi Job nga buwaon hi Satanas. Magigin matinumanon ka ba liwat ha Dios? An tagsa ha aton may-ada pribilehiyo nga depensahan an ngaran han aton Amay ngan lipayon hiya pinaagi ha matinumanon nga pag-alagad ha iya. (Prob. 27:11) Daku gud ito nga kadungganan.

6. Paonan-o naton masusubad hi Hadi David ngan an mga Levita? (Nehemias 9:5)

⁶ An gugma ha Dios nagpapagios ha magtinumanon nga tawo nga kinasingkasing nga dayawon an iya ngaran. Hi Hadi David nagsurat: “Dadayawon ko hi Jehova; an ngatanan nga aadi ha akon magdadayaw han iya baraan nga ngaran.” (Sal. 103:1) Maaram hi David nga an pagdayaw ha ngaran ni Jehova pariho la ha pagdayaw kan Jehova mismo. Kon nababatian naton an ngaran ni Jehova, nahuhunahuna naton kon ano hiya nga klase hin persona ngan an ngatanan niya nga magpakaruruyag nga kalidad ngan mag-opay nga buhat. Karuyag ni David nga tagdon nga baraan an ngaran han iya Amay ngan dayawon ito. Karuyag niya nga buhaton ito ha ‘ngatanan nga  aada’ ha iya—karuyag sidngon, kinasingkasing. Sugad man, an mga Levita nanguna ha pagdayaw kan Jehova. Mapainubsanon nga nagsiring hira nga an ira mga pulong diri gud bug-os nga makakapahayag han pagdayaw nga angayan han sagrado nga ngaran ni Jehova. (Basaha an Nehemias 9:5.) Sigurado, ito nga mapainubsanon ngan kinasingkasing nga pagdayaw nakapalipay ha kasingkasing ni Jehova.

7. Paonan-o naton madadayaw hi Jehova ha aton pagsangyaw ngan ha aton adlaw-adlaw nga pagkinabuhi?

⁷ Yana, mapapalipay ta hi Jehova pinaagi ha pag-istorya ha iba mahitungod ha iya ha paagi nga nagpapakita nga mapasalamaton gud kita ngan hinigugma gud naton hiya. Kon nagsasangyaw kita, an aton nangunguna nga katuyoan amo an pagpahirani han mga tawo kan Jehova, ngan pagbulig ha ira nga abaton an aton inaabat ha aton mahigugmaon nga Amay. (San. 4:8) Nalilipay kita nga ipakita ha mga tawo kon paonan-o iginhuhulagway han Biblia hi Jehova, an iya gugma, hustisya, kinaadman, gahum, ngan iba pa nga makaruruyag nga mga kalidad. Gindadayaw ngan ginpapalipay liwat naton hi Jehova pinaagi ha pangalimbasog nga subaron hiya. (Efe. 5:1) Kon buhaton ta ito, naiiba kita hinin maraot gud nga kalibotan. Bangin mapansin han mga tawo nga naiiba kita ngan maghunahuna hira kon kay ano. (Mat. 5:​14-16) Samtang nakikiistorya kita ha ira ha aton adlaw-adlaw nga pagkinabuhi, mahimo naton maisaysay kon kay ano nga sugad kita hito. Tungod hito, an mga sinsero naipapahirani ha aton Dios. Kon gindadayaw naton hi Jehova hini nga mga paagi, napapalipay naton an iya kasingkasing.—1 Tim. 2:​3, 4.

NAPAPALIPAY NATON HI JESUS KON GINDADAYAW NATON AN NGARAN NI JEHOVA

8. Paonan-o hi Jesus nanguna ha pagdayaw han ngaran ni Jehova?

⁸ Waray intelihente nga linarang ha langit ngan ha tuna nga mas nakilala kan Jehova kay ha kan Jesus. (Mat. 11:27) Hinigugma ni Jesus an iya Amay, ngan hiya an nanguna ha pagdayaw han ngaran ni Jehova. (Juan 14:31) Han nag-ampo hi Jesus ha iya Amay han gab-i antes hiya mamatay, iya iginsumaryo an iya ministeryo ha tuna. Hiya nagsiring: “Iginpakilala ko ha ira an imo ngaran.” (Juan 17:26) Ano an iya karuyag sidngon?

9. Ano nga parabola an igin-istorya ni Jesus basi maisaysay hin maopay kon ano gud nga klase hin persona an iya Amay?

⁹ Diri la basta pagpakilala han ngaran ni Jehova an ginbuhat ni Jesus. An mga Judio nga gintututdoan ni Jesus maaram na han ngaran han Dios. Pero hi Jesus an nanguna ha ‘pag-esplikar mahitungod ha Iya.’ (Juan 1:​17, 18) Pananglitan, ha Hebreo nga Kasuratan iginpapakita nga hi Jehova maloloy-on ngan mapinairon. (Ex. 34:​5-7) Mas iginpatin-aw ni Jesus ini nga kamatuoran han nag-istorya hiya hin parabola mahitungod han matinalapason nga anak ngan han iya tatay. Kon mabasa naton an mahitungod han tatay nga nakakita han iya mabinasulon nga anak “samtang hirayo pa,” nagdalagan hiya pagtapo ha iya, ginhangkopan hiya, ngan kinasingkasing nga ginpasaylo hiya, masasabtan naton hin maopay kon ano ka maloloy-on ngan mapinairon hi Jehova. (Luc. 15:​11-32) Iginpakilala ni Jesus kon ano gud nga klase hin persona an iya Amay.

10. (a) Paonan-o naton mahibabaroan nga gin-gamit ni Jesus an personal nga ngaran han iya Amay ngan karuyag liwat niya nga ito an buhaton han iba? (Marcos 5:19) (Kitaa liwat an piktyur.) (b) Ano an karuyag ni Jesus nga buhaton naton yana?

¹⁰ Karuyag ba liwat ni Jesus nga gamiton han iba an personal nga ngaran han iya Amay? Sigurado. An iba nga relihiyoso nga mga lider posible nga natoo nga kawaray-respeto an pagyakan han ngaran han Dios, pero waray gud tuguti ni Jesus an sugad nga diri kasuratanhon nga mga tradisyon nga magpugong ha iya nga dayawon an ngaran han iya Amay. Tagda an panahon nga  gintambal niya an ginsaniban nga tawo ha rehiyon han Gerasa. Nahadlok an mga tawo ngan nakimalooy hira kan Jesus nga bumaya hiya, salit waray hiya mag-iha didto. (Mar. 5:​16, 17) Pero karuyag ni Jesus nga makilala an ngaran ni Jehova didto. Salit ginsidngan niya an lalaki nga iya gintambal nga sumatan an mga tawo, diri han iya ginbuhat, kondi han ginbuhat ni Jehova. (Basaha an Marcos 5:19.) a Ito liwat an iya karuyag yana—nga ipakilala naton an ngaran han iya Amay ha bug-os nga kalibotan! (Mat. 24:14; 28:​19, 20) Kon buhaton naton ito, mapapalipay naton an aton Hadi, hi Jesus.

11. Ano an igintutdo ni Jesus ha iya mga sumurunod nga ig-ampo, ngan kay ano nga importante ito? (Ezekiel 36:23)

¹¹ Maaram hi Jesus nga an katuyoan ni Jehova amo an pagbaraan han Iya ngaran, basi ipakita nga buwa an mga ginsiring mahitungod ha iya. Salit gintutdoan han aton Agaron an iya mga sumurunod nga mag-ampo: “Amay namon ha langit, baraanon unta an imo ngaran.” (Mat. 6:9) Nasabtan ni Jesus nga ini an pinakadaku nga isyu nga gin-aatubang han ngatanan nga linarang. (Basaha an Ezekiel 36:23.) Waray intelihente nga linarang ha uniberso an nakakahimo hin mas labaw ha pagbaraan han ngaran ni Jehova kay han ginhihimo ni Jesus. Pero han gin-aresto hi Jesus, ano nga sala an gin-akusar ha iya han iya mga kaaway? Pagpasipara! Sigurado nga inabat ni Jesus nga an pag-abuso o pagpakaraot ha baraan nga ngaran han iya Amay amo an pinakamaraot nga sala. Nabaraka gud hiya nga aakusaran hiya ngan idideklara nga salaan hini nga krimen. Bangin ito an nangunguna nga rason kon kay ano nga ‘duro gud an kasakit’ ni Jesus ha mga oras nga hirani na hiya arestuhon.—Luc. 22:​41-44.

12. Paonan-o ginbaraan ni Jesus an ngaran han iya Amay ha pinakamaopay nga paagi?

¹² Basi mabaraan an ngaran han iya Amay, gin-ilob ni Jesus an tagsa nga pag-torture, pag-insulto, ngan pakaraot nga gin-akusar ha iya. Maaram hiya nga ginsugot niya an iya Amay ha ngatanan nga butang; waray hiya angay ikaawod. (Heb. 12:2) Maaram liwat hiya nga direkta hiya nga gin-aatake ni Satanas hiton makuri nga panahon. (Luc. 22:​2-4; 23:​33, 34) Sigurado nga naglaom hi Satanas nga mabubungkag niya an integridad ni Jesus; pero napakyas gud hiya! Ginpamatud-an gud ni Jesus nga hi Satanas duro kabuwaon ngan hi Jehova may-ada maunungon nga  mga surugoon, nga padayon nga nagtitipig han ira integridad bisan ha pinakamakuri nga mga pagsari!

13. Paonan-o mo mapapalipay an imo nagmamando nga Hadi?

¹³ Karuyag mo ba mapalipay an imo nagmamando nga Hadi? Padayon nga dayawa an ngaran ni Jehova pinaagi ha pagbulig ha iba nga mahibaro mahitungod han ngatanan nga mag-opay nga kalidad han aton Dios. Kon bubuhaton mo ito, ginsusunod mo an mga pitad ni Jesus. (1 Ped. 2:21) Pariho kan Jesus, ginpapalipay mo hi Jehova ngan ginpapamatud-an mo nga buwaon gud an Iya kaaway, hi Satanas!

NABULIG KITA PAGTALWAS HIN KINABUHI KON GINDADAYAW NATON AN NGARAN NI JEHOVA

14-15. Ano an mag-opay nga butang nga bangin mahitabo kon tutdoan naton an mga tawo mahitungod kan Jehova?

¹⁴ Kon gindadayaw ta an ngaran ni Jehova, nabulig kita ha pagtalwas hin mga kinabuhi. Paonan-o? “Ginbuta . . . [ni Satanas] an mga hunahuna han mga diri tumuroo.” (2 Cor. 4:4) Salit tinoo hira han mga kabuwaan ni Satanas, sugad han: An Dios diri naeksister, an Dios hirayo ha aton ngan waray hiya labot ha mga tawo, ngan an Dios mapintas ngan ginpapasakitan an mga magpakasasala ha waray kataposan. Ginsiring ni Satanas ito nga mga buwa, tungod kay karuyag niya nga madaot an maopay nga ngaran ni Jehova, ngan basi diri na maruyag an mga tawo nga magin duok ha iya. Pero kon nagsasangyaw kita, ginpupugngan naton hi Satanas nga makab-ot an iya katuyoan. Gintututdoan naton an mga tawo han kamatuoran mahitungod han aton Amay, ngan pinaagi hito, nadadayaw an baraan nga ngaran han aton Dios. Ano an resulta?

¹⁵ Gamhanan gud an mga kamatuoran han Pulong han Dios. Pinaagi ha pagtutdo ha mga tawo mahitungod kan Jehova ngan kon hin-o gud hiya, may makikita kita nga maopay. An mga tawo hinay-hinay nga diri na nabubutahan han mga buwa ni Satanas, ngan nakikita na nira an mag-opay nga kalidad han aton Amay. Nahipapausa hira tungod han iya waray tubtoban nga gahum. (Isa. 40:26) Nahibabaro hira ha pagsarig ha iya, tungod han iya perpekto nga hustisya. (Deut. 32:4) Nahibabaro hira hin damu tikang ha iya daku nga kinaadman. (Isa. 55:9; Roma 11:33) Ngan naliliaw hira ha paghibaro nga hiya an gugma. (1 Juan 4:8) Samtang nagigin duok hira kan Jehova, mas nagigin sigurado an ira  paglaom nga mabuhi ha waray kataposan sugad nga iya mga anak. Daku gud nga pribilehiyo para ha aton nga buligan an mga tawo nga magin duok ha ira Amay! Kon bubuhaton naton ito, huhunahunaon kita ni Jehova sugad nga iya “mga igkasi-magburuhat.”—1 Cor. 3:​5, 9.

16. Ano an nagin epekto ha iba han nahibaroan nira an ngaran han Dios? Paghatag hin mga ehemplo.

¹⁶ Ha siyahan, bangin magtutdo la kita ha mga tawo nga an ngaran han Dios hi Jehova. Pero mahimo ito makagbag-o han kinabuhi han sinsero nga tawo. Pananglitan, usa nga batan-on nga babaye nga hi Aaliyah b an ginpadaku ha relihiyon nga diri nagtututdo han Biblia. Pero diri hiya kontento ha iya relihiyon ngan diri hiya naabat nga duok hiya ha Dios. Nagbag-o ito han nagpa-Bible study hiya ha mga Saksi. Nakita niya an Dios sugad nga iya Sangkay. Ngan nahipausa hiya han nahibaroan niya nga an ngaran han Dios gintanggal ha damu nga Biblia ngan ginsaliwnan na la hin mga titulo, sugad han Ginoo. An paghibaro han ngaran ni Jehova usa nga importante nga takna ha iya kinabuhi. Hiya nagsiring: “An akon pinakaduok nga Sangkay may ngaran!” Ano an resulta? Siring niya: “Yana murayaw gud an akon kasingkasing. Daku gud ito nga pribilehiyo.” Hi Steve musikero nga may konserbatibo nga Judio nga gintikangan. Diri niya karuyag magin bahin han usa nga organisado nga relihiyon kay nakita niya an duro nga pagkahipokrito hito. Pero han namatay an iya nanay, umapi hiya ha pag-aram nga gindudumara han usa han mga Saksi ni Jehova. Nabantad gud hiya han nahibaroan niya an ngaran han Dios. Hiya nagsiring: “Waray ko gud mahibaroi an ngaran han Dios.” Nagsiring pa hiya: “Ha siyahan nga higayon, nasabtan ko nga tinuod an Dios! Nakita ko hiya sugad nga usa nga Persona. Nahibaroan ko hito nga panahon nga nakabiling ako hin usa nga Sangkay.”

17. Kay ano nga determinado ka nga padayon nga dayawon an ngaran ni Jehova? (Kitaa liwat an piktyur.)

¹⁷ Ha imo pagsangyaw ngan pagtutdo nga buruhaton, ginsusumat mo ba ha mga tawo an sagrado nga ngaran ni Jehova? Ginbubuligan mo ba hira nga makita an aton Dios kon hin-o gud hiya? Ha pagbuhat hito, gindadayaw mo an ngaran han Dios. Hinaot padayon mo nga dayawon an baraan nga ngaran ni Jehova pinaagi ha pagbulig ha mga tawo nga mahibaroan kon ano gud hiya nga klase hin Persona. Hito nga paagi, makakagtalwas ka hin mga kinabuhi. Masusunod mo an pagpanguna han imo Hadi nga hi Kristo Jesus. Ngan labaw ha ngatanan, mapapalipay mo an imo mahigugmaon nga Amay, hi Jehova. Hinaot ‘dayawon mo an iya ngaran ha kadayonan, oo ha kadayonan’!—Sal. 145:2.