1-2. Which example fit help us understand how Jehovah feel when Satan lie against-am?

 THINK about this example: Somebody wey you love talk something wey really bad about you. You know say na lie e talk, but some people believe-am. To spoil the matter more, the people wey believe the story start to tell other people and many people believe them. How you go feel? If e de worry you for mind how the lie fit affect the people wey believe-am and your good name, e go really make you feel bad.—Prov. 22:1.

² This example fit help us understand how Jehovah feel when Satan spoil im name. Satan lie to Eve about Jehovah, and e believe-am. This one make Eve and im husband wey be Adam sin against Jehovah. Because of this one, everybody de sin and die. (Gen. 3:​1-6; Rom. 5:12) All the problem wey we de face for this earth today, like death, war, and suffer-suffer, na because Satan lie about Jehovah for garden of Eden. The lie wey Satan talk and all the problem wey e don cause, de pain Jehovah? Yes. But even with this one Jehovah no vex sotey e no fit happy again. In fact, Bible call Jehovah “the happy God.”—1 Tim. 1:11.

3. Which honor we get?

³ Na big honor we get as Jehovah allow us join to clean im name from the lie wey Satan talk. We fit do this one when we obey this command wey talk say: “Make una praise Jehovah name.” (Ps. 113:1) We de do this one when we de tell people the truth about Jehovah. You go like to praise Jehovah name? Make we talk about three things wey fit move us to use all our heart praise Jehovah name.

 WE DE MAKE JEHOVAH HAPPY WHEN WE PRAISE IM NAME

4. Why e de make Jehovah happy when we praise-am? Give example. (Still check the picture.)

⁴ We de make our Papa for heaven happy when we praise im name. (Ps. 119:108) This one mean say Jehovah be like Person wey want make people de praise-am before e go know say e de do wetin correct? No. Make we use this example explain-am. Just think about one small girl wey run go meet im papa, hug-am, and tell-am say, “Na you be the best papa for the whole world!” This one go make im papa happy well-well, especially as nobody tell-am make e do-am. This one mean say the papa no know say e be good papa? Or say the papa go happy only when im pikin praise-am? No. Instead, we dey sure say the papa happy say im pikin love-am and value-am. The papa know say when the pikin grow, e go be happy person because e love people and de show say e value wetin people de do for-am. Na this kind reason make Jehovah wey be our Papa wey high pass, de happy when we praise-am.

5. When we praise Jehovah name, which Satan lie we de fight against?

⁵ Another thing be say, when we praise our Papa for heaven, we de show say wetin Satan talk about each of us na lie. Satan talk say nobody for this earth go ever hold Jehovah tight when them face serious problem. Wetin Satan mean be say, nobody go continue to worship Jehovah when e face serious temptation. E talk say we go leave Jehovah if we think say that one go make our condition better. (Job 1:​9-11; 2:4) But Job hold Jehovah tight and show say Satan na liar. What about you? Each of us get the honor to choose to continue to worship Jehovah even when we de face problem. This one go show say we de praise Jehovah name, and e go make Jehovah happy. (Prov. 27:11) This na really big honor for us.

6. How we fit copy the example of King David and the Levites? (Nehemiah 9:5)

⁶ People wey love Jehovah de use all their heart praise im name. King David write say: “Make I praise Jehovah; Make everything about me praise im holy name.” (Ps. 103:1) David know say when we praise Jehovah name, e mean say we de praise Jehovah. When we hear Jehovah name, e de make us think about the kind God wey e be. E de help us think about the better-better character wey e get and the wonderful things wey e de do. Na im make David love to treat Jehovah name as something wey dey holy and praise-am. And na everything about-am e  take praise Jehovah name. This one mean say e praise-am with all im heart. For the same way, na the Levites be the number one people for Israel wey de praise Jehovah. Them know say no word wey them fit use, wey go fit praise Jehovah name finish. (Read Nehemiah 9:5.) We dey sure say the way them de bring body down and use all their heart praise Jehovah, go don make-am happy.

7. How we fit praise Jehovah when we de preach to people and when we de do things with people?

⁷ For this our time, we fit make Jehovah happy when the way we de talk about-am show say we love-am and value wetin e de do for us. When we de preach to people, make we always remember say the main reason why we de preach to them be say, we want help them de see Jehovah the way we de see-am. (Jas. 4:8) We de happy to show people how Bible describe Jehovah, how e talk about im love, the way e de judge, im sense, power and other better-better character. We still de praise Jehovah when we do our best to copy im example. (Eph. 5:1) When we do like this, we de show say we dey different from people for this world. People fit see-am, and want know why we dey different. (Matt. 5:​14-16) When we de do things with them, we fit get the chance to explain to them why we dey different. And this one fit make people wey get good heart want know Jehovah. When we praise Jehovah like this, e de make-am happy.—1 Tim. 2:3, 4.

WE DE MAKE JESUS HAPPY WHEN WE PRAISE JEHOVAH NAME

8. How Jesus take show say na im be the number one person wey de praise Jehovah name?

⁸ Among everybody for heaven and for this earth, nobody know Jehovah reach the way Jesus know-am. (Matt. 11:27) Jesus love im Papa well-well, and na im be the number one person wey de praise Jehovah name. (John 14:31) The night before them kill Jesus, e pray to Jehovah. Wetin e talk for the prayer show the main work wey e come do for this earth. E talk say: “I don make them know your name.” (John 17:26) Wetin this one mean?

9. How Jesus use the story of the foolish son explain the kind God wey Jehovah be?

⁹ Jesus no only tell people say God name na Jehovah. Israel people for Jesus time don already know God name. But na Jesus be the number one person wey “explain who [Jehovah] be.” (John 1:​17, 18) For example, the part of Bible wey them use Hebrew language write, show say Jehovah na God wey get pity and soft heart. (Ex. 34:​5-7) Jesus make this one clear more when e talk the story of the foolish son and im papa. When we read the story, we see say when the pikin don repent and de come house, im papa see-am “as e still de come from far,” e pity-am, run go embrace-am and use all im heart forgive-am. This story help us understand say Jehovah na God wey really get pity and soft heart. (Luke 15:​11-32) Jesus help other people understand the kind God wey Jehovah really be.

10. (a) How we take know say Jesus use im Papa name, and say e want make other people do the same thing? (Mark 5:19) (Still check the picture.) (b) Wetin Jesus want make we do for this our time?

¹⁰ Jesus want make people use im Papa real name? Yes! Some people wey de lead for religion that time believe say for person to call God name de show say the person no get respect for God. But Jesus no allow this kind bad teaching stop-am to use im Papa name. Think about wetin happen when e pursue demons comot from one man body for one area wey them de call the Gerasenes. The people  start to fear and beg Jesus say make e comot from their area, so e no stay there again. (Mark 5:​16, 17) Even with this one, Jesus want make people for there know Jehovah name. So e tell the man wey e cure say make e tell people for the area wetin Jehovah don do for-am, no be wetin Jesus do for-am. (Read Mark 5:19.) a Na the same thing Jesus want make we do today. E want make we help people for the whole world know Jehovah name. (Matt. 24:14; 28:​19, 20) When we do our best to help people know Jehovah name, we de make Jesus wey be our King happy.

11. Wetin Jesus teach im disciples say make them de pray for, and why e dey important?

¹¹ Jesus know say wetin Jehovah want na to clear all the lie wey Satan don talk about Im name. Na this one make Jesus teach im disciples say make them pray say: “Our Papa wey dey heaven, make your name dey holy.” (Matt. 6:9) Jesus understand say this na the matter wey dey important pass. (Read Ezekiel 36:23.) No other person for heaven or for earth don do wetin go make Jehovah name clean, pass wetin Jesus don do. Even with this one, when them arrest Jesus, them talk say e no show respect for God name. Jesus know say to talk lie about Jehovah name, na the worst sin wey person fit commit. E go don really worry Jesus for mind say im enemy them go judge-am say e no de respect Jehovah name, and kill-am for that sin. E fit be say na this one really pain Jesus the night wey them arrest-am.—Luke 22:​41-44.

12. How Jesus make im Papa name holy for the best way?

¹² To make Jehovah name holy, Jesus endure all the suffer, insult, and lie wey e face. E no get anything wey fit make-am shame because e don obey im Papa for everything. (Heb. 12:2) E know say na Satan de cause all the problem wey e face before e die. (Luke 22:​2-4; 23:​33, 34) Satan think say e go fit make Jesus stop to worship Jehovah, but e fail. Jesus prove for the end say Satan na big liar and say Jehovah get servants wey hold-am tight, even when them de face serious problem.

13. Wetin you fit do to make Jesus happy?

 ¹³ You go like do wetin go make Jesus happy? If your answer na yes, continue to help people know the kind God wey Jehovah be. This one go show say you de praise Jehovah name. If you do like this, e go show say you de follow Jesus example. (1 Pet. 2:21) Like Jesus, you de make Jehovah happy and de show say Satan na liar wey no get shame!

WE DE SAVE PEOPLE LIFE WHEN WE PRAISE JEHOVAH NAME

14-15. When we teach people the truth about Jehovah, how that de help them?

¹⁴ When we de praise Jehovah name, e de help to save people life. Why we talk like that? Satan de block people mind so that them no go believe the good news. (2 Cor. 4:4) Because of this one, them believe the different-different lie wey Satan don talk about God, say: God no dey, God far from us and e no de care about us, and say God de burn people for hellfire. Na one thing Satan de use all this lie do. E de use them spoil Jehovah name and make people feel say Jehovah bad, so that people no go like to worship Jehovah. But when we de preach to people, we de spoil Satan work. We de teach people the truth about our Papa and praise im holy name. How this one de help people?

¹⁵ The truth wey dey Bible get power. When we de teach people the truth about Jehovah and the kind God wey e be, this one de really help them. Many people eye de open and them de see the better-better character wey Jehovah get. For example, them de surprise when them learn about the kind power wey Jehovah get. (Isa. 40:26) When them learn say Jehovah no de do partial, e de make them trust Jehovah. (Deut. 32:4) Them de learn say Jehovah really get sense. (Isa. 55:9; Rom. 11:33) And e de really make them happy when them learn say Jehovah na love. (1 John 4:8) The more them de near Jehovah, the more their hope to live forever de strong. Na really big honor we get to help people to fit become Jehovah friend. When we de do this one, Jehovah de see us as people wey de work with-am.—1 Cor. 3:5, 9.

16. How some people don feel when them learn say God name na Jehovah? Give example.

 ¹⁶ When we want teach people about Jehovah, we fit first teach them about im name. Only this one fit touch the heart of person wey really want serve God. For example, one young woman wey im name na Abigail b grow for family wey them no de use Bible for their religion. E no happy with the religion and e no see God as im friend. But, this one change when e start to study Bible with Jehovah Witness people. E start to see God as im real friend. And e surprise-am to learn say, people don remove God name for many Bible and change-am to titles like Lord. When e learn say God name na Jehovah, this one change im life. E talk say: “My best Friend get name!” Wetin come happen? E talk say: “Now, I really de happy. Na big honor for me.” Make we talk about one man wey im name na Steve. Na Jew person and e de sing before. E no want join any religion because e don see say plenty people for religion de pretend to be who them no really be. But after im mama die, im friend wey de study Bible with one Jehovah Witness, invite-am make e join the study, and e agree. For the study, e learn say God name na Jehovah and this one really touch-am. E talk say: “I never ever hear say God get name. This na the first time wey I understand say God na real Person. I come know that time say I fit make-am my friend.”

17. Why you don make up your mind to continue to praise Jehovah name? (Still check the picture.)

¹⁷ You de tell people Jehovah name when you de preach to them or teach them? You de help them know the kind God wey Jehovah really be? If you de do this one, e show say you de praise God name. Make you continue to help other people to know the kind Person wey Jehovah be, and this one go show say you de praise Jehovah holy name. And e go help you to fit save people live. E go show say you de copy Jesus example wey be our King. And the one wey dey important pass be say you go make Jehovah happy. Make you continue to “praise [Jehovah] name forever and ever”!—Ps. 145:2.