1-2. Yu gend ne Johova kangem tokes mokjup bar, olom nalmal pim nawal pakerondo kenem pilkane esmen?

 BU embe to pile: Ende nim kantawol ka enen alamb, nim bol yu keswei dom. Nim pisen e yu gend; ba ga pende yu weieri nepisim. Ala wal keswei paim, yu gend e, newai ninambe ga puli pilgi nim eri. Nim nalmal pisen? Alamb nal nepisam na nem kangem ka panda nepin dal, yu gend nim bar nim keswei, napisel mo?—Prov. 22:1.

² Yubol embe mal tomon pakerondo Johova kangem tokes mokjup, nalmal pim pilkane esmen. Olom enjol walem min epen monjup ende, komna ersem amb Iv kin yu gend nim. Amb Iv yu gend pilgi nim erkelnge adam bol Johova yu to kenjil. Embe enjil bar, alamb porpor sin nganja pande gosum eri. (Stt. 3:​1-6; Rom 5:12) Ombun embe mal yipe ya mala paim—gosmon mem, opnganmal, ombun duwom kaumon—Seten kulu Iden yu gend nim bar ombun embe min wom. Ombun porpor min wonom bar Johova kes pisem mo? Kes pisem, ba olom popol si kumbol mul wamnam nasinem. Yu weieri ninamen, olom “kapil meim Got.”—1 Tim. 1:11.

3. Kenem nalmal ere Got kangem erka enamen?

 ³ Seten, Johova bol yu gend nim erkun enamen nepinjin dal, yu onom mal e karkar enamen: “Johova kangem min keramen.” (Sng. 113:1) Johova wal kaka erim mal alamb ende nengonom kunum, Olom kangem kuru min kesmen. Nim olom kangem min kerel mo? Pi mem talende dongal kerma paim erkelde, kumbol palngo Got kangem min keramen mal omukro kanamen.

JOHOVA KANGEM MIN KESMEN KAPISEM

4. Nalende Johova kangem min kesmen kapisem? Yubol to. (Piksa pra kane.)

⁴ Danjen min epen meim kangem ambil min kesmen kunum, olom kawei pisem. (Sng. 119:108) Yu embe nimen bar, mala sin nganja paim alamb ende yu ne kangjip min keram nepisem mal, dongal poro paim Got embe ding mal pisem mo? Mawei. Yu ekin ende omukro kanamen. Ambel kerei ende kawei pile muko ne pu dam ngunj kangele embe dom, “Mala ye ende nameim mal nim na dana kawei men!” Yu embe dom bar, dam kumbol a wei pile tuwol ere kawei pisem. Nalende embe pisem? Olom dongal napaim, amblem olom kangem amble min kerem bar dongal sinem paninamen mo? Ma, kenem pilkane esmen olom dongal paim, ba amblem olom kanka kane kangem ambil min kerem bar kawei pisem. Olom pilkane enem amblem mambnem embe enem bar, bulto yaumin wonda kunum, kanka mem tane kapil mora. Embe ding mal, Johova Danjen kerma kangem ambil min kesmen kunum, olom kawei pisem.

5. Kenem Got kangem ambil min kesmen kunum, nal yu gend ende nijip si penem kesmen?

⁵ Kenem Danjen min epen meim kangem min kesmen kunum, Seten yu gend ende kenem dingding ne bol nim sipenem kesmen. Seten alamb porpor Got bol kanamolo, kangem min nakeram nepim. Ombun min wonda kunum, Got bol kanamoram nepim eri. Olom embe nim: Got alamb wal ngondo si lotu erngom nangonda kunum, bulngonam panim. (Jop 1:​9-11; 2:4) Ba pilgi dongal pam ye Jop Got kin kamolo tanim, Seten yu gend nim. Pi nim nal endel? Kenem dingding ne pilgi dongal pande, Danjen bol kamolo konganem enamen bar erkelpe olom kawei pisa. (Prov. 27:11) Weieri, embe enamen bar olom kangem kerma sinda.

6. King Depit na Liwai ga enjip mambnem, kenem nalmal karkar enamen? (Nehemia 9:5)

⁶ Got kangem kakanjip erkelnge pilgi dongal pam ga, kumbol pelngo olom kangem ambil min kenjip. King Depit embe nim: “Na Johova kangem ambil min keral, ala na bol tuwalto  seim wal porpor, olom kangem kuru ambil min keram.” (Sng. 103:1) Depit pilkane erim, Johova kangem ambil min keramen olom ambil min keramen pam. Kangem Johova pismen kunum, olom mambnem aiyem kawei pende paim na nawal pende enem mal pilkane esmen. Depit kapim, Dam Jehova kangem kuru pam pile ambil min keral nepim “wal porpor olom kumbol tuwalto” seim—ngo embe enal nepim. Embe ding mal, Liwai ga molse ngimba pu, Johova kangem ambil min kenjip. Enjep weieri molmene kele yu ende ne Johova kangem kuru paim ambil min keramen kaple wei nanem panijip. (Nehemia 9:5 gere.) Kenem weieri pilkane esmen, enjep molmene wei kele kumbol ngo Johova kangem ambil min kenjip bar, olom kumbol a wei pim.

7. Nomolpa esmen bar na Baibel yu neori kesmen bar, Johova kangem nalmal ambil min keramen?

⁷ Yipe kenem yu ne alamb ngonamen bar, Johova kanka kane sangiyo nimen mem tanipe olom kapisa. Kenem Baibel yu neori keramen kunum bu kerma panda, alamb pakero kelpe se Johova bol mand wo, Danjen kanka mem sem ye kenem kanka kanmen mal, enjep pra kanam eri. (Jems 4:8) Johova ye nalmal meim Baibel neori kerem tanipe, alamb kanam bar kapismen. Olom kanka mem sem, mambnem dulto enem, bunuman kapaim, dongal kerma paim, ala mambnem ka pende pra paim eri. Kenem ombol wei ere, olom mambnem aiyem karkar esmen kangem min kelpe kapisem. (Efe. 5:1) Mambnem kes pikronom bar kenem jel mal molo, ya mala alamb ngomon. Kunum pende ne enjep bol tapronamen kunum, nalende kenem jel mal meimen nengopo pilkane enam. (Mat. 5:​14-16) Embe-enamen-bar, Johova kangem ambil min keramen. Kumbol kasem alamb se Got bol mand wonam. Wusngam embe mal karkar ere, Danjen Johova kangem ambil min kesmen kunum, olom kawei pisem.—1 Tim. 2:​3, 4.

KENEM JOHOVA KANGEM AMBIL MIN KESMEN KUNUM JISES KAPISEM

8. Jises nalmal se ngimba pu Johova kangem min kem?

⁸ Wal porpor min epen na ya mala meim, Jises Dam Johova kanpol weironom mal narom. (Mat. 11:27) Olom Dam kankawei kane, se ngimba pu kangem ambil min kem. (Jon 14:31) Olom gora kunum emilpal yane ne Dam ngom bar, ya mala Baibel yu neori kel wanim kunum, kongan kerma ende erim mal neori kele embe nim: “Na nim kangnem ne enjep ngond.” (Jon 17:26) Nalmem pange Jises yu embe nim?

9. Jises nal yu ekin ende konganem ere, Dam bunuman pam mal ne penem kem?

⁹ Jises, Got kangem Johova mongse ne alamb nangom, wal puli pende erim eri. Jises yu ne Juda ngom ga Got kangem yero pilkane enjip. Ba, olom molse ngimba pu, Dam Ye “nalmal . . . yubol kaweiro kenem ngom.” (Jon 1:​17, 18) Baibel Olpela Testamen Johova wandil mem, seim ye pane penem a kere pilkane esmen. (Kis. 34:​5-7) Ala Jises yu ekin ende erim bar, ngal ende dam sikele puwane yem wom panim bar, Johova alamb wandil sinem mambnem e, tane penema wei kem. (Luk 15 11-32) Yu germen bar pilkane esmen, ngal Dam kanem ngangem kumbol to akro seyem wonal ne, “pende kolbar wom kunum” wandil si kumbol pelngo olom alla wakro, muko nepu ngunj kangim. Jises yu ekin e, erim bar Dam Johova alamb wandil wei sinem mem taninde pilkane esmen.

10. (a) Jisas Dam kangem konganem erim, ala kenem pra konganem enamen nepim, nalmal pilkane esmen? (Mak 5:19) (Piksa pra kane.) (b) Yipe Jises kenem nal enamen nepisem?

¹⁰ Jises Dam kangem ga pende pra konganem enam nepim mo? Weieri pim. Ba, lotu ye  kerma pende Got kangem kuru paim nadaramen nepinjip, Baibel nanim mal embe enjip pile, Jises Dam kangem ambil min kele neori kera bar yu embe nijip kolnarungum. Kulu Gerasa ye ende kipkes tawol ernge mom. Jises pu pakero to ori kem mal yu bolom omukro kandpe. Alamb kipkes tawol erim ye e, bol kisal golo Jises kulu e sikele sepanijip. (Mak 5:​16, 17) Ba, olom kapim Got kangem alamb ele monjup pilkane enam nepim. Jises kipkes tawol erim pakerom ye nengo, na nim pakenarond Johova nim pakerom pane alamb nganim. (Mak 5:19 gere.) a Yipe pra—kenem olom Dam kangem neori kelpe, alamb mal tambem yemyem mol pum pisam olom kapisem! (Mat. 24:14; 28:​19, 20) Kenem embe esmen kunum, King aijen Jises kapisem.

11. Jises karkar enjip ga nawal pil yane niya nim, nalernge embe enam wal kerma pam? (Esekiel 36:23)

¹¹ Jises dam Johova kangem yu gend ne tokes mokjup, er kerambe kuru senda Johova kapim pilkane erim, e mem pange Jises karkar enjip ga yane embe niya nim “Kin Danjen min epen men, nim kangem kuru senda.” (Mat. 6:9) Jises pilkane erim e, wal kerma wei ende alamb porpor enam pam. (Esekiel 36:23 gere.) Min kupula na ya mala wal porpor meim, Jises, Johova kangem ambil min kem mal embe nakesim. Ba Jises to karpos enjip kunum, olom bol opyem enjip ga nal sin kerma ende erim panijip? Got kangem to kes moksum panijip! Jises pilkane erim, olom Dam kangem kuru to kes moksa e, sin kerma wei enda pam. Embe pile, olom Dam kangem to kes mokum paninam bar kawei napim. Mem embe pange, Jises to karpos enam kunum yero anj dunglom pende tuwalto, “kumbol ombun kerma wei sim.”—Luk 22:​41-44.

12. Nal wusngam kerma wei ende, Jises Dam kangem ambil min kem?

¹² Jises Dam Johova kangem ambil min keral ne erim bar, ombun puli ngojup, yu gend ne olom to er keswei enjip. Ba olom pilkane erim Dam yu karkar wei erim; embe enjip bar nganjil gora mem kanapam. (Hib. 12:2) Ombun kes mal olom bol min wom Seten erim. (Luk 22:​2-4; 23:​33, 34) Seten erkelnge Jises dam Johova bol kanamora ne erim; ba embe erim kaple wei narem! Jises mambnem embe  erim bar tanim Seten yu gend ye keswei, ala Johova konganem ga puli ombun kes mal wei min wo, Johova bol kameim mem erkanal ne enem kauwo akilgi nim!

13. Nim nalmal erkeli King ainem kapisa?

¹³ Nim erkeli King ainem kapisa nepisen mo? Anjngo Johova kangem ambil min kele, alamb ende pakeroi olom mambnem kaka paim mal, kanpol tonam. Nim embe endel, Jises mambnem aiyem karkar enen. (1 Pita 2:21) Jises erim mal nim embe enen kunum, Johova kapisem, ala tane penem a keren Seten yu gend ye!

JOHOVA KANGEM AMBIL MIN KESMEN ALAMB PAKERONDO KOLMEM SINAM

14-15. Johova ye nalmal kenem duwom ere alamb ngonamen kunum, nawal ka pende min wonda?

¹⁴ Kenem Johova kangem ambil min kesmen, alamb pakeropo, kolmem sinam. Nalmal embe esmen? Weieri, pilgi napaim alamb “mala got, enjep bunuman koltungnom.” (2 Kor. 4:4) E, erkelde Seten yu gend pende dom bar wei nepisim, e embe mal: Got nameim, Got kolbar meim, alamb kantawol nanem, mo mambnem kes esim alamb, to dop gare kunum kunum do meim panim. Yu gend embe mal nim, Got mambnem kapaim na kangem to kes moksum, ala erkelde alamb Johova bol mand wonam kanapisim. Ba, kenem Baibel yuwei neori kesmen erkelde, Seten yu gend dom alamb pilgi nanim. Kenem Danjen mambnem wei paim mal duwom ere alamb ngomon kunum, Got kangem kuru ambil min kesmen. Embe esmen bar nawal min wonom?

¹⁵ Got Yuwom yuwei dongal kerma wei paim. Johova ye nalmal wei meim alamb duwom erngomon kunum, kenem pilkane esmen wal ka pende min wonom. Seten yu gend ninde pilgi nemeim sikele, Danjen kanka mem seim ye kenem kanmen mal kanpoltom. Olom dongal kerma wei paim mal kanim kunum, kisal golo olom bol molmene kesim. (Ais. 40:26) Johova mambnem dulto enem bar pilgi nim. (Lo 32:4) Ala wal puli duwom ere, olom bunuman kapaim mal pilkane esim. (Ais. 55:9; Rom 11:33) Kanka mem sem Got ne pilkane esim kunum, kumbol amin wei sim. (1 Jon 4:8) Enjep se Johova bol mand wom kunum, mibulto kol aimanj mem sinamen ne  pilgi ne kui esim wal, wose dongal punom. Embe pile, alamb pakeropo se Danjen Johova bol mand wombar, kenem kawei wei pisamen! Ala Johova kenem olom bol “kongan ding alamb, nepisem.”—1 Kor. 3:​5, 9.

16. Alamb pende God kangem duwom er kanim kunum, nal nepisim? Wal ende min wom mal yubol to.

¹⁶ Kenem pulnombol alamb yu duwom erngomon bar, Got kangem Johova panimen. Kumbol kasem alamb nengomon, kumbola wei pisim. Ende embe mal, amb gal ende kangem Aliya b mol yaumin wombar Baibel yu pilgi-nanim. Olom lotu erim bar kanapim Got bol mand namei nepim. Ba Witnis ga bol yu duwom pulnombol erim kunum, bu kolsi Got Senond ye ende meim nepim. Ala Baibel puli bonjup bar, Got kangem wei sikele Lord mo Ye Kerma pane bonjup bar kane, malmal wei erim. Johova kangem wei duwom er kanim erkelnge, bunuman kolwei si embe nim: “Na Seno kapis alamb kangem paim!” Embe nepim bar nawal min wom? Yu ende embe nim: “Na pi kumbol amin wei sind, Got kangem pilkane erind bar kawei pis:” Ye ende tambal misik toro erim kangem Stepen, Juda ga lo dongal ende pambar molo yaumin wom. Lotu pende monjup bar mand napum nalerim, yu ne alamb ngojup mal enjep karkar nanjip. Ba olom mam golngo kumbol ombun sim kunum, Johova Witnis ende wo ende Baibel yu duwom erngom bar, tuwal mol pisal nepim. Got kangem nijip pim kunum olom kumbol a wei pile embe nim: “Got kangem pam na wei pilkane narind.” Olom yu pende embe nim: “Na pi mand pulnombol pilkane erind Got weieri meim! Senonal Ye ka ende kansind.”

17. Nalende Johova kangem anjngo ambil min keramen ne, bunuman kerma panda? (Piksa pra kane.)

¹⁷ Nim Baibel yu neori kele, duwom ere alamb ngonon bar Got kangem kuru paim, Johova nengonon mo? Nim enjep pakeroi kenem Gotjon ye, nalmal wei kanpol tonam ne enen mo? Nim embe endel bar, God kangem ambil min kerel. Nim Johova kangem anjngo ambil min kerel bar erkeli, olom ye nalmal wei kanpol tonam. Embe endel bar pakeroi alamb kolmem sinam. Nim King ainem Krais Jises mambnem karkar enen eri. Ala wal kerma wei paim, nim Danem kanka mem seim ye Johova kawei pisem, embe pile nim kunum kunum [olom] kangem “ambil min kerel”!—Sng. 145:2.