ALATIKE AKO 6
KATIKO 10 Tou Vikiʼi Ia Sehova, Totatou ʼAtua
“Tou Vikiʼi Te Huafa ʼo Sehova”
“Kotou vikiʼi ia Sehova! Kotou vikiʼi te huafa ʼo Sehova.” —PES. 113:1.
TE MANATU TAFITO
ʼE tou vakaʼi anai ʼi te alatike ʼaeni pe kotea ʼae ʼe ina uga tatou ke tou vikiʼi ai te huafa ʼo Sehova ʼi te ʼu faigamalie fuli.
1-2. Kotea te faʼifaʼitaki ʼe tokoni mai ke tou mahino pe kotea ʼae neʼe logoʼi e Sehova ʼi te ʼu fasituʼu ʼae neʼe fai kia te ia?
FAKAKAUKAUʼI age muʼa te faʼifaʼitaki ʼaeni: Ko he tahi ʼe ke ʼofa mamahi ai ʼe ina fakamatala he ʼu meʼa ʼe kovi ʼo ʼuhiga mo koe. ʼE ke iloʼi ʼe ko he loi, kae ko ʼihi ʼe natou tui pe ki ai. Kae ko te meʼa ʼae kovi, he kua mafola te logo pea kua tui ki ai te tokolahi. Kotea leva ʼae ʼe ke logoʼi? Kapau ʼe ke tuʼania ki te ʼu palalau ʼae ʼe fai e te hahaʼi ʼo ʼuhiga mo koe he ʼe ʼulihi ai tou matagafua, ʼe mahino ia ko te fasituʼu ʼaia ʼae neʼe fai kia koe, ʼe ke lotomamahi ʼaupito ai.—Taag. 22:1.
2 ʼE tokoni mai te faʼifaʼitaki ʼaeni ke tou mahino pe kotea ʼae neʼe logoʼi e Sehova ʼi te ʼulihi ʼo tona huafa. Ko he tahi ʼi ʼona foha fakalaumalie neʼe ina fakamatala he loi ʼo ʼuhiga mo ia ki te ʼuluaki fafine ko Eva. Pea neʼe tui ai te fafine ki te loi ʼaia. Ko te loi ʼaia neʼe ina uga ai te ʼuluaki taumatuʼa ke nā talagataʼa kia Sehova. Koia ʼae, neʼe agahala fuli ai te malamanei katoa pea mo mamate. (Sen. 3:1-6; Loma 5:12) Ko te ʼu malaʼia fuli ʼae ʼe tau mo te tagata, ohage la ko te mate, mo te tau pea mo te ʼu mamahi, ʼe tupu mai te ʼu loi ʼae neʼe fakamafola e Satana ʼi te ʼoloto ʼo Eteni. Neʼe mamahi koa ia Sehova ʼi te ʼu fasituʼu ʼae neʼe fai kia te ia mo ʼona nunuʼa kovi? ʼE mahino papau ia neʼe lotomamahi ʼaupito ai. Kae ʼe mole taupau ia e Sehova he loto ʼe kovi, koteʼuhi ko ia te “ ʼAtua fiafia.”—1 Tim. 1:11.
3. Kotea te pilivilesio ʼae ʼe tou maʼu?
3 ʼE tou maʼu ia te pilivilesio ʼae ke tou lagolago ki te fakalakatonuʼi ʼo te huafa ʼo Sehova, ʼaki tatatou fakalogo ki te fakatotonu ʼaeni: “Kotou vikiʼi te huafa ʼo Sehova.” (Pes. 113:1) Pea ʼe tou fakaha ʼaki tatatou tala te moʼoni ʼo ʼuhiga mo Ia ʼae ʼe ina fua te huafa ʼaia. ʼE ke fia vikiʼi koa te huafa ʼo Sehova? ʼE tou vakaʼi anai tupuʼaga ʼe tolu ʼe uga ai tatou ke tou vikiʼi ai te huafa ʼo te ʼAtua ʼaki he loto katoa.
ʼE TOU FAKAFIAFIAʼI IA SEHOVA
4. Ka tou fai he ʼu fakavikiviki kia Sehova, he koʼe ʼe fiafia lahi ai ? Tuku mai he faʼifaʼitaki. (Vakaʼi mo te pāki.)
4 Ka tou vikiʼi te huafa ʼo tatatou Tamai ʼae ʼi selo, ʼe fiafia lahi ai. (Pes. 119:108) ʼE hage koa totatou ʼAtua mafimafi ko te tagata ʼae loto pe ke fai age he ʼu fakavikiviki moʼona fakalotomalohiʼi? Kailoa. Tou toʼo he faʼifaʼitaki. Ko te kiʼi taʼahine ʼe faʼofua ki tana tamai ʼo ui fenei: “Ko koe pe papa ʼae ʼe agalelei tokotahi ʼi te malamanei!” ʼE mahino ia ʼe fiafia anai te Tamai he ʼe malave tana ʼu palalau ki tona loto. Kotea tona tupuʼaga? ʼE fakaʼuhiga koa ʼe fakamaʼua pe e te tamai ke fakavikiviki tuʼumaʼu e tana kiʼi tamasiʼi moʼo fakalotomalohiʼi ia ia? Kailoa ia. ʼE mole tuʼania te tamai ki te faʼahi ʼaia, koteʼuhi ʼe ʼofa ki tona ʼofafine, pea ʼe fiafia he ʼe ina fakaha tona ʼofa pea mo tona lotofakafetaʼi kia ia. Pea tahi, ko te ʼu kalitate ʼaia ʼe tokoni anai ki tona ʼofafine, ʼi tana kua lahi ke maʼuli fiafia. ʼE toe feia pe mo tatou, moka tou vikiʼi ia Sehova te Tamai ʼae ʼe lahi tokotahi, ʼe tou fakafiafiaʼi ai ia te ia.
5. Ka tou vikiʼi te huafa ʼo Sehova, kotea te loi ʼae ʼe tou fakafeagai ki ai?
5 Ka tou vikiʼi tatatou Tamai ʼae ʼi selo, ʼe tou fakafeagai ai ki te loi ʼaeni ʼe lau e Satana kia tatou: ʼE ui e Satana ʼe mole ʼi ai he tahi ia tatou ʼe ina lava puipui te huafa ʼo te ʼAtua. Kia ia, ka hoko pe he ʼu ʼahiʼahi ʼe mole he tahi ʼe nofo agatonu anai ki te ʼAtua. ʼE ina ui ko tatou fuli ʼe tou situʼa anai ki te ʼAtua, mo kapau ʼe tou manatu ʼe lelei age pe ia ke mole tou nonofo agatonu. (Sopo 1:9-11; 2:4) Kae ʼi te nofo agatonu ʼa Sopo neʼe ina fakamoʼoni ai ko Satana ʼe gutu loi. Kae kia koe, ʼe ke nofo agatonu anai kia Sehova? ʼA tatou takitokotahi te puipui te huafa ʼo tatatou Tamai, pea ke tou fakafiafiaʼi tona loto ʼaki tatatou nonofo agatonu kia te ia. (Taag. 27:11) ʼE ko he toe pilivilesio ʼaia kia tatou!
6. ʼE feafeaʼi hatatou faʼifaʼitakiʼi ia te Hau ko Tavite mo te kau Levite? (Nehemia 9:5)
6 ʼUhi ko tanatou ʼofa ʼae ki te ʼAtua, ʼe uga ai te ʼu kaugana agatonu ke natou vikiʼi tona huafa mo he loto katoa. Neʼe tohi fenei e te Hau ko Tavite: “ ʼE au fia vikiʼi ia Sehova. Ke au vikiʼi tona huafa taputapu mo toku loto katoa.” (Pes. 103:1) Neʼe mahino ia Tavite ko te vikiʼi te huafa ʼo Sehova, ʼe hage pe ʼe ina vikiʼi ia Sehova totonu. ʼE ʼi ai te pikipikiga tafito ʼo te huafa ʼo Sehova mo tona ʼuhiga totonu. ʼE tou manatuʼi ai ʼona kalitate taulekaleka pea mo ʼana gaue fakaofoofo. Neʼe iloʼi e Tavite te taputapu ʼo te huafa ʼo tana Tamai pea neʼe ina fia vikiʼi mo ‘tona loto katoa.’ Neʼe toe manatu feia pe mo te kau Levite. Neʼe natou ui ʼaki he agavaivai, ko ʼanatou fakavikiviki ʼe mole feʼauga ke natou fakaha te maʼoluga ʼo te maʼoniʼoni ʼae ʼe tuha mo te huafa ʼo Sehova. (Lau ia Nehemia 9:5.) ʼE mahino ia, ko tanatou fakavikiviki ʼaia mo he agavaivai neʼe fiafia lahi ai ia Sehova.
7. ʼE feafeaʼi hatatou vikiʼi ia Sehova ʼi te faifakamafola pea ʼi te ʼaho fuli?
7 Ia ʼaho nei, ʼe tou fakafiafiaʼi ia Sehova ʼi tatatou palalau ʼo ʼuhiga mo ia ʼaki he lotomafana, mo he lotofakafetaʼi mo te ʼofa. Ka tou faifakamafola, ʼaua naʼa galo kia tatou, ʼe tonu ke tou taki mai te hahaʼi kia Sehova, pea mo tokoni kia natou ke natou logoʼi te ʼofa ʼae kia te ia ohage pe ko te ʼofa ʼae ʼe tou logoʼi ki tatatou Tamai. (Sakp. 4:8) Ko he toe fiafia lahi tatatou akoʼi te hahaʼi ʼaki te Tohi-Tapu ke natou iloʼi ia Sehova, tafito ʼona kalitate ohage ko tona ʼofa, tana faitotonu, tona poto, tona mafimafi pea mo ʼihi atu kalitate taulekaleka. Pea tahi, ʼe tou vikiʼi pea mo fakafiafiaʼi ia Sehova ʼaki tatatou faiga ʼae ke tou faʼifaʼitakiʼi ia ia. (Efe. 5:1) ʼI te malama ʼaeni ʼae tou maʼuʼuli ai, ʼe tokagaʼi e te hahaʼi tatatou aga ʼo natou feuiʼaki pe koʼe ʼe mole tou tatau mo natou. (Mat. 5:14-16) Ohage la, ka tou felaveʼi mo natou ʼi te ʼu aluʼaga ʼae ʼo te ʼaho fuli, ʼe tou maʼu ai te faigamalie ke tou fakamahino kia natou ʼo ʼuhiga mo tatatou aga. Ka tou fai feia, ʼe tou taki mai ai te hahaʼi fakamalotoloto ki totatou ʼAtua. Ka tou vikiʼi ia Sehova ʼi te ʼu faʼahi kehekehe ʼaia, ʼe tou fakafiafiaʼi lahi ai tona loto.—1 Tim. 2:3, 4.
ʼE TOU FAKAFIAFIAʼI IA SESU
8. Neʼe fakaha feafeaʼi e Sesu tana vikiʼi te huafa ʼo Sehova?
8 ʼE mole he tahi ʼi te kele mo te lagi ʼe ina iloʼi lelei age te Tamai gata pe ki te ʼAlo. (Mat. 11:27) ʼE ʼofa Sesu ʼi tana Tamai, pea ʼe ko ia te faʼifaʼitakiʼaga lelei tukupau ʼo ʼuhiga mo te vikiʼi ʼo te huafa ʼo Sehova. (Soa. 14:31) ʼI te po ʼi muʼa ʼo tana mate, neʼe faikole ia Sesu ʼo palalau fakanounou ai ki te gaue ʼae neʼe maʼuhiga ʼaupito kia ia ʼi tona minisitelio. Neʼe ina ui fenei: “Neʼe au fakaha age tou huafa.” (Soa. 17:26) Kotea neʼe fia ui e Sesu?
9. Ko te lea fakata fea ʼae neʼe fakamahino lelei ai e Sesu te ʼuhiga totonu ʼo tana Tamai?
9 Neʼe mole fakaha pe e Sesu ko te huafa ʼo te ʼAtua ʼe ko Sehova, koteʼuhi neʼe kua iloʼi pe e te kau Sutea ʼae neʼe ina akoʼi te huafa ʼo te ʼAtua. Kae ʼe ui ʼi te Tohi-Tapu, neʼe ko Sesu ʼae neʼe ina ‘fakamahino pe ko ai te ʼAtua.’ (Soa. 1:17, 18) Ohage la, neʼe kua fakaha ʼi te ʼu Koga Tohi Fakahepeleo ko Sehova ko he ʼAtua manavaʼofa. (Eke. 34:5-7) Kae ʼi te lea fakata ʼo te tamai mo tona foha ʼae neʼe puli, neʼe fakamahino lelei ai e Sesu te moʼoni ʼaia. ʼI te sio ʼa te tamai ki tona foha ʼae neʼe fakahemala logo la tana kei mamaʼo, neʼe lele ʼo faʼofua mo ʼuma mamahi ki ai pea mo fakamolemole age ʼaki he loto katoa. ʼE ha lelei ʼi te hisitolia ʼaia te manavaʼofa fakaofoofo ʼa Sehova. (Luka 15:11-32) Koia, neʼe fakamahino lelei e Sesu te ʼuhiga totonu ʼo tana Tamai.
10. (1) ʼE tou iloʼi feafeaʼi neʼe fakaʼaogaʼi e Sesu te huafa ʼo tana Tamai pea neʼe loto ke toe fakaʼaogaʼi e ʼihi? (Maleko 5:19) (Vakaʼi mo te pāki.) (2) Kotea ʼae ʼe loto e Sesu ke tou fai ia ʼaho nei?
10 Neʼe loto koa e Sesu ke fakaʼaogaʼi e ʼihi te huafa ʼo tana Tamai? ʼEi foki. Ko ʼihi takitaki lotu ʼi te temi ʼo Sesu, neʼe natou ui ʼe mole tonu ke puʼaki te huafa ʼo te ʼAtua ʼuhi he ʼe taputapu ʼaupito. Kae neʼe mole tuku e Sesu te talatisio fakatagata ke taʼofi ai tana fakakololiaʼi te huafa ʼo tana Tamai. ʼI te tahi lakaga, ʼi te koga fenua ʼo te kau Kelasena neʼe ina fakamalolo ai te tagata neʼe ulu sino ai te ʼu temonio. Neʼe matataku ai te hahaʼi ʼo natou kolekole age kia Sesu ke mavae ʼi tonatou koga fenua. (Mko. 5:16, 17) Kae neʼe loto e Sesu ke iloʼi e te hahaʼi ʼo te koga fenua ʼaia te huafa ʼo Sehova. Koia ʼae neʼe ina fekauʼi ai te tagata ʼae neʼe ina fakamalolo ke alu ʼo fakamatala ki te hahaʼi te ʼu meʼa ʼae neʼe fai e Sehova, kae mole ʼae neʼe fai e Sesu. (Lau ia Maleko 5:19.) a Pea ia ʼaho nei ʼe toe loto e Sesu ke tou fai te faʼahi ʼaia: Ke tou fakaha te huafa ʼo tana Tamai ʼi te malamanei katoa. (Mat. 24:14; 28:19, 20) Ka tou fai feia, ʼe tou fakafiafiaʼi ai totatou Hau ko Sesu.
11. Kotea te faikole ʼae neʼe akoʼi e Sesu ki ʼana tisipulo? He koʼe ʼe maʼuhiga ke tou fai te faikole ʼaia? (Esekiele 36:23)
11 Neʼe iloʼi e Sesu te fakatuʼutuʼu ʼa Sehova ʼae ke fakatapuha Tona huafa, ke fakamaʼa ai mai te ʼu loi fuli ʼae neʼe fai kia te Ia. Koia ʼae neʼe akoʼi mai ai e totatou Pule ke tou faikole fenei: “Ko tamatou Tamai ʼae ʼe ʼi selo, ke tapuha tou huafa.” (Mat. 6:9) Neʼe mahino ia Sesu ko te fakatapuha ʼo te huafa ʼo tana Tamai ʼe ko he aluʼaga maʼuhiga ʼaupito, pea ʼe kau te fakatupu fuli ki te lagolago peʼe kailoa ki te fakamaʼoniʼoniʼi ʼo te huafa ʼaia. (Lau ia Esekiele 36:23.) Maʼia ʼi te ʼu ʼaselo mo te tagata, ʼe mole he tahi neʼe ina fakatapuha ʼo lahi age te huafa ʼo Sehova gata pe kia Sesu. Kae ʼi te puke ʼae ʼo ia, kotea te agahala ʼae neʼe tukugakoviʼi ʼaki ai ia Sesu? Neʼe ui ʼe ʼona fili neʼe aga pauʼu! ʼE mahino ia kia Sesu, ko te laukoviʼi ʼo te huafa maʼoniʼoni ʼo tana Tamai, neʼe ko te agahala mamafa ʼaupito ʼi te ʼu agahala fuli. ʼUhi ko te tukugakoviʼi mamafa ʼaia, neʼe lotomamahi ʼaupito ai ia Sesu. Ko te tupuʼaga la ʼaia, lolotoga te ʼu hola ʼi muʼa ʼo tona puke, neʼe ‘lahi ʼaupito ai tana hoha.’—Luka 22:41-44.
12. Kotea ʼae neʼe lava ʼutakiʼi e Sesu moʼo fakatapuha te huafa ʼo tana Tamai?
12 Moʼo fakatapuha te huafa ʼo tana Tamai, neʼe ʼutakiʼi e Sesu te ʼu gaohi koviʼi kehekehe, mo te ʼu laukovi mo ni fasituʼu ʼo ʼuhiga mo ia. Neʼe ina iloʼi papau neʼe agatonu pe ki tana Tama ia meʼa fuli, pea kia ia, neʼe mole ʼi ai he tupuʼaga ke ufiufi ai. (Hep. 12:2) Pea neʼe ina iloʼi pe ko Satana ʼae neʼe ina tauʼi fakahagatonu ia ia ʼi te temi faigataʼa ʼaia. (Luka 22:2-4; 23:33, 34) Neʼe faiga malohi ia Satana ke mole nofo agatonu ia Sesu, kae neʼe to noa ʼana faiga. Neʼe fakamoʼoni e Sesu ko Satana ko he tahi ʼe gutu loi ʼaupito mo agakovi, pea ko Sehova ʼe ʼi ai ʼana kaugana ʼe natou lava nofo agatonu maʼia ʼi te ʼu ʼahiʼahi ʼae ʼe kovi ʼaupito!
13. ʼE feafeaʼi hau fakafiafiaʼi tou Hau?
13 ʼE ke fia fakafiafiaʼi koa tou Hau? Kapau ko ia, ke hoko atu tau vikiʼi te huafa ʼo Sehova ʼaki tau fakaha te ʼuhiga totonu ʼo totatou ʼAtua. ʼI tau fai feia, ʼe ke mulimuli ai ki te faʼifaʼitakiʼaga ʼa Sesu. (1 Pet. 2:21) Ohage ko Sesu, ʼe ke fakafiafiaʼi anai ia Sehova pea mo fakamoʼoni ai ko tona Fili lahi ko Satana ʼe gutu loi mo agakovi!
ʼE TOU HAOFAKI AI TE HAHAʼI
14-15. Kotea te aluʼaga fakaofoofo ʼe hoko moka tou akoʼi ki te hahaʼi te ʼuhiga totonu ʼo Sehova?
14 Ka tou vikiʼi te huafa ʼo Sehova, ʼe tou tokoni ai ke haofaki te hahaʼi. ʼO feafeaʼi? ʼAua naʼa galo kia tatou, ʼe fakapoʼuliʼi e Satana te ʼatamai ʼo te kau heʼe tui. (2 Ko. 4:4) Koia ʼae tokolahi ʼe natou tui ai ki te ʼu loi ʼaeni: ʼE mole ʼi ai he ʼAtua, ʼe mamaʼo te ʼAtua ia tatou, ʼe mole tokaga ia ki te hahaʼi, ko he ʼAtua ʼe agakovi pea ʼe ina tutu te kau agahala ʼi he afi kakaha ʼo talu ai. ʼAki te ʼu loi ʼaia, ʼe faigaʼi e Satana ke ʼulihi ai te huafa ʼo Sehova pea ke moamoagaʼi ai tona ʼuhiga totonu ke mole fia fakaovi ai te hahaʼi kia te ia. Kae ko te gaue faifakamafola ʼe fakafeagai ki te fakatuʼutuʼu ʼaia ʼa Satana. Ka tou akoʼi ki te hahaʼi te moʼoni ʼo ʼuhiga mo tatatou Tamai, ʼe tou vikiʼi ai tona huafa maʼoniʼoni. Pea kotea ʼona fua lelei?
15 Ko te ʼu moʼoni ʼo te Folafola ʼa te ʼAtua ʼe malohi ʼaupito. ʼI tatatou akoʼi ki te hahaʼi te ʼuhiga totonu ʼo Sehova, ʼe ʼi ai te aluʼaga fakaofoofo ʼe hoko ai. ʼE mole kei kivi te hahaʼi ʼi te ʼu loi ʼae ʼa Satana, he kua natou kamata malama ki te ʼu kalitate taulekaleka ʼa tatatou Tamai. ʼE natou punamaʼuli ki te fakaofoofo ʼo tona malohi. (Esa. 40:26) ʼE natou ako ke natou falala kia te ia, he ko tana faitotonu ʼe haohaoa. (Tet. 32:4) ʼE natou ako te lahi ʼo tona poto. (Esa. 55:9; Loma 11:33) Pea kua natou lotofimalie ʼi tanatou iloʼi ʼae, ko te ʼuhiga totonu ʼo Sehova ʼe ko te ʼofa. (1 Soa. 4:8) ʼI tanatou fakaovi ʼaia kia te ia, ʼe natou tui papau ai ʼe natou liliu anai ko ʼana fanau pea mo maʼuʼuli anai ʼo heʼe gata. Ko he toe pilivilesio lahi ke tou tokoni ki te hahaʼi ke natou fakaovi ki tanatou Tamai! Ka tou fai feia, ʼe tou “kaugā gaue” ai mo Sehova.”—1 Ko. 3:5, 9.
16. Neʼe malave feafeaʼi ki ʼihi tanatou iloʼi ʼae te huafa ʼo te ʼAtua? Tuku mai he ʼu faʼifaʼitaki.
16 ʼI te kamata ako e te hahaʼi te Tohi-Tapu, ʼe natou iloʼi ai ko te huafa ʼo te ʼAtua ko Sehova. Pea ʼaki pe ki te faʼahi ʼaia ʼe feala ke malave ʼaupito ki he tahi ʼe fakamalotoloto. Ohage la ko te faʼifaʼitaki ʼaeni ʼo Aaliyah b. Neʼe lahi ake ʼi he famili neʼe lotu Mahometa. Neʼe mole fiafia ia ʼi tana lotu pea neʼe mole fia fakaovi ia ki te ʼAtua. Kae ʼi te kamata ako leva e Aaliyah te Tohi-Tapu mo te kau Fakamoʼoni ʼa Sehova, neʼe fetogi lahi ai tana manatu. Neʼe sio leva ki te ʼAtua kua hage ko hona kaumeʼa. Pea neʼe punamaʼuli ʼi tana iloʼi ʼae neʼe molehi te huafa ʼo te ʼAtua ʼi te ʼu Tohi-Tapu, pea neʼe fetogi ʼaki te ʼu higoa fakatuʼulaga ohage la ko ʼAliki. Ko tana iloʼi ʼaia te huafa ʼo Sehova neʼe fetogi lahi ai tona maʼuli. Neʼe ina ui fenei: “Kua au iloʼi leva, ʼe ʼi ai te higoa ʼo toku kaumeʼa lelei!” Kotea ʼona fua? ʼE ina ui fenei: “ ʼI te temi nei, kua au logoʼi ʼosi te toe tokalelei lahi ʼi toku loto pea kua au ʼalikisia ai.” Pea koʼeni te faʼifaʼitaki ʼo Steve, neʼe ko te tagata faimaholo pea neʼe lotu Sutea. Neʼe mole fia kau ki he lotu ʼuhi ko tana sio ʼae ki te aga malualoi ʼa te hahaʼi ʼo tana lotu. Kae neʼe putu leva ʼuhi ko te mate ʼo tana faʼe ʼo ina tali ai ke kau ki he ako Tohi-Tapu mo te kau Fakamoʼoni ʼa Sehova. Neʼe malave ʼosi ki tona loto tana iloʼi ʼae te huafa ʼo te ʼAtua. ʼE ina ui fenei: “Neʼe heʼeki au iloʼi pe la pe ko ai te higoa ʼo te ʼAtua.” Pea ʼe ina toe ui: “Ko taku hoki mahino e, ʼe ʼi ai te ʼAtua! Pea kua au iloʼi ʼe maʼuli moʼoni. Kua au maʼu leva hoku Kaumeʼa.”
17. He koʼe ʼe ke faiga malohi ke ke vikiʼi te huafa ʼo Sehova? (Vakaʼi mo te pāki.)
17 Ka ke faifakamafola pea mo faiako, ʼe ke fakaha koa ki te hahaʼi te huafa taputapu ʼae ko Sehova? ʼE ke tokoni koa kia natou ke natou iloʼi te ʼuhiga totonu ʼo te ʼAtua? ʼI tau fai feia, ʼe ke fakavikiviki ai te huafa ʼo Sehova. Koia, hoko atu tau vikiʼi te huafa maʼoniʼoni ʼaia, ʼaki tau fakaha ki te hahaʼi pe ko ai moʼoni ia Ia ʼae ʼe ina fua te huafa ʼaia. ʼE ke haofaki ai te hahaʼi mo mulimuli ai ki totatou faʼifaʼitakiʼaga ʼae ko totatou Hau ia Kilisito Sesu. Kae ko te meʼa ʼae ʼe maʼuhiga ʼaupito, ko tau fakafiafiaʼi tatatou Tamai ʼofa ʼae ko Sehova. Koia, faiga malohi ke ke “vikiʼi [tona] huafa ʼo talu ai”!—Pes. 145:2.
KA TOU VIKIʼI TE HUAFA ʼO TE ʼATUA, HE KOʼE ʼE TOU . . .
-
fakafiafiaʼi ai ia Sehova?
-
fakafiafiaʼi ai ia Sesu Kilisito?
-
tokoni ai ke haofaki ai te hahaʼi?
KATIKO 2 Ko Tou Huafa Ko Sehova